मकवानपुर । मकवानपुरगढी गाउँपालिकालाई बालमैत्री स्थानीय शासनयुक्त गाउँपालिकाको रुपमा घोषणा हुने भएकाे छ । मुख्यमन्त्री तथा मन्त्रिपरिषद्को कार्यालय बागमतीले विहीवार मकवानपुरगढीलाई बालमैत्री स्थानीय शासनयुक्त गाउँपालिकाको रुपमा घोषणा गर्न अनुमति प्रदान गरेकाे छ । बागमती प्रदेशका प्रमुख सचिव मुकुन्द प्रसाद निरौलाले गाउँपालिकाको प्रमुख प्रशासकीय अधिकृत रामकुमार पुडासैनीलाई अनुमति पत्र प्रदान गरेका हुन् ।
अनुमति प्राप्त गरे पछी गाउँपालिका बालमैत्री स्थानीय शासनयुक्त घाेषणा हुने भएकाे हाे । गाउँपालिकाले मकवानपुरगढी–५, धादिङस्थित शारदा माध्यमिक विद्यालयको खेल मैदानमा १२ चैत शनिवार बालमैत्री स्थानीय तह घोषणा गर्ने भएकाे हाे । गाउँपालिकाबाट बालमैत्री स्थानीय शासन कार्यान्वयन निर्देशिका २०७८ अनुसार ५१ वटै सूचक पूरा गरेर बालमैत्री स्थानीय शासनयुक्त गाउँपालिका घोषणा अनुमतिका लागि जिल्ला समन्वय समिति मकवानपुरमा सिफारिस भएकाे थियाे । समितिले गाउँपालिका अनुमगन पश्चात घोषणा अनुमतिका लागि मुख्यमन्त्री तथा मन्त्रिपरिषद्को कार्यालय बागमतिमा सिफारिस गरेको हाे ।
गाउँपालिकाले ५ वटा मुख्य क्षेत्र(सूचक) भित्रका ५१ वटा सूचकहरु चरणबद्ध रुपमा पारेर पालिकालाई बालमैत्री घोषण गर्न लागिएको मकवानपुरगढी गाउँपालिका अध्यक्ष विदुर हुँमागाईंले जानकारी दिए । बाल बचाउँ, बाल विकास, बाल संरक्षण, बाल सहभागिता र संथागत विकास मुख्य सूचक रहेका छन् । उनले घोषणा कार्यक्रमलाई सफल पार्न विभिन्न समिति तथा उप–समिति गठन गरिएको र तयारी अन्तिम चरणमा पुगको बताए ।
पालिकाले बालमैत्री स्थानीय कार्यान्वयन तथा दिगोपनाको लागि वडास्तरको लगानी योजना र पाँच बर्षे रणनीतिक योजना बनाइएको छ । वडास्तरिय लगानी योजना अन्तर्गतको कार्यक्रमका लागि गाउँपालिकाले ३ करोड बजेट विनियोजन गरेको बताइएकाे छ । घोषणाका लागि सम्पूर्ण तयारी पूरा भएको गाउँपालिकाले जनाएकाे छ ।
गाउँपालिकालाई बालमैत्री घोषणाको पूर्व तयारी अनुरुप गत फागुन २७ गते शुक्रबार सबै वडाहरु बाल मैत्री घाेषणा गरिएकाे थियाे ।
मकवानपुर । मकवानपुरको भीमफेदी गाउँपालिकामा १५ शैयाको अस्पताल १५ जना जेष्ठ नागरिकबाट गरिएको छ । विहीबार फरक तरिकाले गाउँपालिकाले आफ्नो पालिकामा निर्माण हुन लागेको १५ शैयाको अस्पतालको शिलान्यास गरेको हो । गाउँपालिका भित्रका ७० वर्ष माथि उमेर समूहका १५ जना जेष्ठ नागरिकद्वारा संयुक्त शिलान्यास गर्दै पृथ्वी चन्द अस्पताल निर्माण कार्यको सुरुवात गरेको छ ।
भीमफेदी–६ मा बन्न लागेको अस्पतालको लागत १२ करोड ६१ लाख ९२ हजार ७५७ रुपैयाँ ३६ पैसा रहेको छ । मिनि ट्रमा सेन्टरको विकास गर्ने उद्देश्यले निर्माण हुन लागेको उक्त अस्पताल २०८१ फागुन १५ गतेसम्ममा सम्पन्न हुने गरी ठेक्का सम्झौता भएकाे छ ।
गाउँपालिकाका अध्यक्ष हिदम लामाले आफ्नो कार्य अविधिमा स्वास्थ्य क्षेत्रमा उल्लेखिनिय कामहरु भएको बताए । ‘गाउँपालिकाको सबै वडाहरुमा स्वास्थ्य भवन निर्माणको कामहरु भईरहेको छ’ उनले भने–‘स्थानीय सरकार गठन भएपछी गाउँपालिकामा भौतिक क्षेत्रको विकास,आर्थिक,सामाजिक सुरक्षा क्षेत्रको विकास भएकाे छ।’
अध्यक्ष लामाले सरकारको स्वास्थ्य मन्त्रालय,नेपाल हेल्थ सेक्टर सर्पोट प्रोगाम र पुरातत्व विभागको सहयोग र गाउँपालिको कर्मचारीहरुको साथ र सहयोगमा स्वास्थ्य भवन निर्माणको शिलान्यास भएको बताए । उनले समाजमा ठूलाबडाले शिलान्यास गर्दा राम्रो हुन्छ भन्ने सोच रहेको भन्दै त्यसलाई चिर्न जेष्ठ नागरिकहरुको हातबाट शिलान्यास गरेको बताए ।
उनले पछिल्लो समयमा जेष्ठ नागरिकहरुलाई वृद्धाआश्रममा लैजाने प्रवृति गलत भएको भन्दै जेष्ठ नागरिकहरुलाई घर परिवार,समाज,स्थानीय तह र सरकारले सम्मान गर्नुपर्ने बताए । अध्यक्ष लामाले अस्पतालको शिलान्यास गर्ने १५ जना जेष्ठ नागरिकहरुलाई अस्पतालबाट आजीवन ओपिडी सेवा निशुल्क हुने समेत घोषणा गरे ।

शिलान्याश कार्यक्रममा निर्माण कम्पनी रबिना नवसिर्जनशिल जेभीका प्रतिनिधि बिक्रम चौलागाईले अस्पताल निर्माण कार्य समयमै सम्पन्न गर्ने प्रतिबद्धता व्यक्त गरे । यसैगरि कार्यक्रममा गाउँपालिकाका इन्जिनियर सुन्दर बर्तौलाले स्वास्थ्य मन्त्रालयले तोकेको मापदण्ड अनुसारनै सेवा, सुविधा सम्पन्न अस्पताल भवन निर्माण गर्न लागेको बताए । उनले ३ वटा ब्लकमा निर्माण हुन लागेको अस्पतालमा लिफ्ट सिस्टमसहित भूकम्प प्रतिरोधि, बालमैत्री, अपाङ्गमैत्री भवनमा प्रयोगशाला, एक्सरे, शल्यक्रिया र इमर्जेन्सी सेवा उपलब्ध रहने बताए ।
यसैगरि,कार्यक्रममा जिल्ला समन्वय समिति मकवानपुरकी उपप्रमुख भागवती पुडासैनीले गाउँपालिकाले विकास निर्माणका कामहरु गर्दै आएको बताईन् । उनले जिल्ला समन्वय समितिले गाउँपालिकाको प्रशासनिक भवन निर्माण लगाएत विभिन्न सहयोग गरेको बताउँदै आउँदो दिनहरुमा पनि सहयोग गर्ने प्रतिबद्धता जनाईन् ।
कार्यक्रममा गाउँपालिकाकी उपाध्यक्ष पार्वती राना,प्रमुख प्रशासकीय अधिकृत भिमलाल महर्जन,वडा अध्यक्षहरु,वडा सदस्यहरु,गाउँपालिकाका कर्मचारी,राजनीतिक दलहरुका प्रतिनिधि तथा स्थानीयहरुको उपस्थिति रहेको थियो ।
मकवानपुर । सर्लाहीमा जारी छैठौं संस्करणको राजर्षी जनक गोल्डकप प्रतियोगितामा मकवानपुरको पिप्ले युवा क्लब फाइनल प्रवेश गरेको छ । विहीबार भएको पहिलो सेमीफाइनल खेलमा आयोजक बागमती युवा क्लबलाई टाइब्रेकरमा ४–२ गोल अन्तरले स्तब्ध पार्दै पिप्ले फाइनलमा प्रवेश गरेको हो ।
खेलकाे निर्धारित ९० मिनेट गोलरहित बराबरीमा सकिएपछि पेनाल्टी सुटआउटमामा धकेलिएको थियो । पेनाल्टीमा पिप्लेका ४ जना खेलाडीले गोल गरेका थिए । यसैगरी बागमती युवा क्बलका २ खेलाडीले मात्रै गोल गरेका थिए । बागमतीकाे एक पेनाल्टी पोष्ट बाहिर प्रहार भएकाे थियाे । पिप्लेका गोलरक्षक अनिष देउलाले एक बल बचाउ गरेसँगै पिप्लेले फाइनल यात्रा तय गरेको हो । पिप्लेका गोलकिपर देउला म्यान अफ द म्याच चयन हुँदै १० हजार रुपैयाँ नगद प्राप्त गरेका छन् ।
खेलाडीको मिहिनेतका कारण फाइनल यात्रा तय गर्न सफल भएको पिप्ले युवा क्लबका प्रशिक्षक सुविन घिमिरेको भनाइ छ । प्रशिक्षक घिमिरेले लगातार दोस्रो पटक उपाधि उचाल्ने लक्ष्य नजिक पुगेको बताए ।
प्रतियोेगिताको फाइनल खेल आइतबार हुनेछ । यसअघि पिप्ले युवा क्लब ‘ए’ डिभिजन हिमालय शेर्पालाई हराउँदै सेमिफाइनलमा प्रवेश गरेको हो । प्रतियोगिताको विजेताले १० लाख १ हजार र उपविजेताले ५ लाख ५ सय पुरस्कार प्राप्त गर्नेछन् ।
मकवानपुर । राजर्षि जनक कप अन्तर्राष्ट्रिय आमन्त्रण फुटबल प्रतियोगिताको छैटौँ संस्करणमा साविक विजेता पिप्ले युवा क्लब हेटाैडा र आयोजक बागमती युवा क्लब सर्लाही आज विहीबार सेमिफाइनलमा भिड्ने भएका छन् ।
साविक विजेताको हैसियतले सिधै क्वाटरफाइनल खेलमा प्रवेश पाएको पिप्लेले आइतबार भएको खेलमा एडिभिजन टोली हिमालय शिर्पा क्लबमाथि ३–० गोल अन्तरकाे जित निकाल्दै प्रतियोगिताको सेमिफाइनलमा प्रवेश गरेकाे हाे ।मंगलबार भएको खेलमा न्युरोड टिम एनआरटीलाई १–० गोल अन्तरको संघर्षपूर्ण नतिजाका साथ बागमतीले पिप्लेसंगको भेट पक्का गरेको थियो । फेरी पनि उपाधि रक्षा गर्ने लक्ष्यसहित सर्लाहीको मैदानमा उत्रिएको पिप्लेले अब सेमिफाइनलमा गतसिजनको चिरपरिचित प्रतिद्वान्दी आयोजक बागमतीसंग भिड्नु पर्ने भएको हाे ।
गत संस्करणको फाइनलिस्ट टोलीको खेल आज विहीबार दिउँसो ३ बजे हुनेछ । बागमती घरेलु मैदानको साथमा गत संस्करणको हार बदला लिने लक्ष्यसहित मैदानमा उत्रने छ । यता पिप्ले उही मैदान पुरानै नजिता सहज तरिकाले दोहो¥याउने लक्ष्यसहित मैदान उत्रनेछ । पराजित भएपछि प्रतियोगिताबाटै बाहिरिने भएकोले दुबै टोलीमाथि जित्नै पर्ने दबाब छ । उपाधि होडमा रहेको दुई टोलीबिचको खेल निकै प्रतिस्पर्धात्मक हुने बताइएकाे छ ।
प्रतियोगितामा दुबै टोली एडिभिजन टोलीलाई पराजित गर्दै सेमिफाइनलमा स्थान बनाएको बागमती भन्दा तुलनात्मक रुपमा पिप्ले केही बलियो देखिन्छ । पहिलो खेलमा जित निकाल्न बागमतीलाई निकै संर्घष गर्नु परेको थियो भने पिप्लले शानदार नतिजा निकालेको थियो । तर, कुन टोली प्रतियोगिताको फाइनलमा स्थान बनाउछ, त्यो विहिबारको खेलले नै निर्धारण गर्नेछ ।
राजर्षि जनक कप अन्तर्राष्ट्रिय आमन्त्रण फुटबल प्रतियोगिताको अघिल्लो पाँचौ संस्करणमा हेटौंडाको पिप्ले युवका क्लब र आयोजक बागमती युवा क्बलबिच फाइनल खेल भएको थियो । २०७७ चैत ३० गते भएको फाइनल खेलमा आयोजक टोली बागमतीलाई घरेलु मैदानमा हराउँदै उपाधि चुमेको थियो । प्रतियोगितामा पहिलो पटक सहभागिता जनाएको पिप्लेले उपाधि चुम्न फाइनल खेलमा निकै संर्घष गर्नु परेको थियो । फाइनलमा पिप्लेले निर्धारित समय, ट्राइब्रेकर हुँदै सडनडेथसम्मको संर्घष गुर्नु परेको थियो । सडनडेथमा ५–४ गालेको संर्घषपुर्ण जित निकाल्दै पहिलो सहभागितामै पिप्लेले उपाधि हात पारेको थियो ।
१२ टिमको सहभागिता रहने प्रतियोगिताको फाइनल खेल चैत १३ गते फाइनल हुनेछ । प्रतियोगिताको विजेताले राजर्षि जनक कपसहित १० लाख एक हजार र उपविजेताले पाँच लाख पाँच सय, सिल्ड र मेडल प्राप्त गर्नेछन्।
मकवानपुर । हेटौंडामा व्यक्तिगत घटना दर्ता र सामाजिक सुरक्षा सम्बन्धी शिविर सुरु भएकाे छ । हेटौंडा उपमहानगरपालिकाको आयोजना र राष्ट्रिय परिचयपत्र तथा पञ्जीकरण विभागको समन्वयमा बुधबारबाट हेटौंडामा दर्ता शिविर सञ्चालन गरिएको हाे ।
व्यक्तिगत घटना दर्ता गर्न छुटेकाहरुलाई स्थानीय स्तरबाटनै सेवा लिनका लागि शिविर सुरु गरिएकाे मेयर हरि बहादुर महतले बताए । शिविरको उद्घाटन् गर्दै मेयर महतले व्यक्तिगत घटना दर्ता गर्ने काम सानो देखिएपनि ठुलो प्रभाब पार्ने भएकाले स्थानीय स्तरमानै दिइएको सेवा लिनका लागि आग्रह समेत गरे ।
बुधबार हेटाैडा उपमहानगरपालिकाकाे वडा नं. ५ बाट शिविरकाे सुरुवात गरिएकाे हाे । हेटौंडा–५ को पीप्ले सामुदायिक वन उपभोक्ता समितिको सभाहलमा शिविर भएको हो । हेटौंडाका १९ वटै वडाका ५७ स्थानमा घटना दर्ता शिविर हुनेछ । बुधबारबाट हेटौंडाकाे ६, १७ र १८ मा शिविर सञ्चालन हुने छ ।
व्यक्तिगत घटना दर्ता तथा सामाजिक सुरक्षा सम्बन्धी दर्ता शिविर सञ्चालन हुने भएको हुँदा वडा कार्यालयको पहुँच बाहिर रहि समयमा सेवा लिन नसकेका तथा सेवा प्राप्त गर्न छुटेका लाभग्राहीहरुले आफुलाई पाएक पर्ने शिविरसम्म आई व्यक्तिगत घटना (जन्म, विवाह, सम्बन्ध विच्छेद, मृत्यु र वसाइसराई) दर्ता तथा सामाजिक सुरक्षा सम्बन्धी दर्ता गराउन उपमहानगरपालिकाका सूचना अधिकारी भानुभक्त थपलियाले आग्रह गरेका छन् ।
प्रत्येक वडामा ३ स्थानमा दर्ता शिविर सञ्चालन हुने छ । नेपाल सरकारको नीति तथा कार्यक्रम अनुसार व्यक्तिगत घटना दर्ता शतप्रतिशत दर्ता गराउने उद्देश्यका साथ हेटौंडाका वडा वडामा गएर घटना दर्ता शिविर सञ्चालन गर्न लागिएको सूचना अधिकारी थपलियाले जानकारी दिए । सरकारले नागरिक पहुँच नपुगेकै कारण सामाजिक सुरक्षा भत्ता प्राप्त गर्न छुट भएको भए सोको दर्ता गराउन सहज पहुँच पुर्याउने उद्देश्य अनुरुप स्थानीय तहका प्रत्येक वडाका फरक फरक स्थानमा दर्ता शिविर संचालन गर्न लागिएकाे हाे ।
दर्ता शिविरकाे लागि सरकारले चालू आर्थिक वर्षमा वित्तीय हस्तान्तरण मार्फत स्थानीय तहमा बजेट व्यवस्था गरेकाे छ । घटना दर्ताकार्यको लक्ष्य प्राप्तीको निम्ती सामाजिक सुरक्षा तथा व्यक्तिगत घटना दर्ता प्रणाली सुदृढीकरण आयोजना संचालन निर्देशिकाको संसोधन अनुसार काम सुरु गरिएको हो । शिविर संचालन गर्दा दर्ता शत प्रतिशत हुने गरी योजना तयार गरी सोही अनुसार कार्यान्वयन गर्ने तयारी थालिएको उपमहानगरपालिकाका एमआइएस अप्रेटर दिपेन्द्र विश्वकर्माले जानकारी दिए ।
बुधबारकाे शिविर उद्घाटन कार्यक्रममा उपमहानगरपालिकाका प्रमुख प्रशासकिय अधिकृत शिबराज चौलागाई, योजना बजेट, सूचना तथा तथ्याङ्क महासाखाका प्रमुख भीम प्रसाद तिमल्सीना लगायतको आतिथ्यता रहेको थियो ।