मकवानपुर । मकवानपुरको मनहरी गाउँपालिका वडा नं.७ रमनटारमा टिपरको ठक्करबाट १ जनाको मृत्यु भएको छ । मृत्यु हुनेमा नवलपरासी मध्यबिन्दु नगरपालिका–१४ बस्ने बर्ष ४७ को दिल बहादुर टन्डन क्षेत्री रहेका छन् ।
पूर्वपश्चिम राजमार्ग अन्तरगत मकवानपुरको मनहरीबाट चितवनतर्फ जादै गरेको ना.७ ख ८४४९ नम्बरको टिपरले हेटौंडाबाट चितवनतर्फ जादै गरेको बा.प्र.०२–०३० प १६३१ नम्बरकोे स्कुटरलाई मंगलबार ठक्कर दिएको थियो । टिपरको ठक्करबाट स्कुटर चालक दिल बहादुर घाइते भएका थिए ।
घाउते उनलाई पुरानो मेडिकल कलेज भरतपुर लगिएकोमा डाक्टरले मृत घोषणा गरेको जिल्ला प्रहरी कार्यालय मकवानपुरले जनाएको छ । टिफर चालक नवलपरासी मध्यबिन्दु नगरपालिका–१० अरुणखोला बस्ने बर्ष ४० को बिर बहादुर कुमाललाई नियन्त्रणमा लिईएको प्रहरीले जनाएको छ ।
मकवानपुर । मकवानपुरको हेटौंडा उपमहानगरपालिका ४ मा स्वास्थ्य शिविर हुने भएको छ । ४ नं वडा कार्यालय र नेपाल हृदय रोग निवारण प्रतिष्ठान नेपाल शाखाको आयोजना जेठ ३२ गते स्वास्थ्य शिविर हुने भएको हो ।
मंगलबार हेटौंडामा पत्रकार भेटघाट कार्यक्रम गर्दै ४ नम्बर वडा अध्यक्ष नविन सिग्देलले स्वास्थ्य शिविर हुने जानकारी दिएका हुन । शिविरमा मुटुरोग, ढाड, नसा र फिजिसियन डाक्टरबाट जाँच गरिने उनले बताए। उक्त शिविरमा मदन भण्डारी स्वास्थ्य विज्ञान प्रतिष्ठान र मकवानपुर सहकारी अस्पतालको प्राविधिक सहयोग रहने बताए ।
शिविरमा नगर टोल विकास समन्वय समिति, मोहन बज्राचार्य शहरी स्वास्थ्य केन्द्र, भुटनदेवि मावि, रोटरी क्लव अफ हेटौडा , सुख समृद्दि बचत तथा ऋण सहकारी संस्थाको सहयोगमा रहने बताइएको छ । हुने उक्त शिविरमा इसिजि, इको, व्लड सुगर लेभल, लिपिड प्रोफाइल, दम रोगिको लागि पिटिएफ, अल्ट्रासाउण्ड तथा १५ दिनसम्म निशुल्क ओैषधि वितरण समेत गरिने सिग्देलले जानकारी दिए ।
स्वास्थ शिविर असार ३२ गते बिहान ८ बजेदेखि दिउँसो ४ बजेसम्म हेटौडा ४ स्थित रोयल पार्टी प्यालेसमा हुने उनले जानकारी दिए ।
हेटौडा ४ नम्बर वडाध्यक्ष नवीन सिग्देलको सभाध्यक्षता भएको कार्यक्रममा ह्रादय रोग निवारण प्रतिष्ठानका अध्यक्ष विजय बैद्य तथा शिविर संयोजक निर्मला लामा, वडा सदस्यलगायतको उपस्थिति रहेको थियो ।
मकवानपुर । मकवानपुरकाे हेटाैंडामा भएकाे नि:शुल्क शिविरमा ९४१ विद्यार्थीकाे आँखा जाँच गरिएकाे छ ।
पूर्व विद्यार्थीहरूको संस्था भुटनदेवी एल्मुनाई एशोसिएसन, रोटरी क्लब अफ हेटाैंडा, भुटनदेवी मावि र हेटौंडा सामुदायिक आँखा अस्पतालको संयुक्त आयोजनामा निःशुल्क आँखा परीक्षण गरिएकाे हाे ।
शिविरमा आँखा परिक्षण गरिएकाे मध्ये ७९ जनाको आँखामा समस्या देखिएको शिविरमा सहभागी हेटौंडा आँखा अस्पतालका डाक्टर शुसिल कुमार सिंहले जानकारी दिए । उनीहरुकाे आँखामा थप उपचार गर्नु पर्ने भएकाेले सामुदायिक आँखा अस्पताल रिफर गरिएकाे भुटनदेवी अल्मुनाई एशोसिएसन महासचिव राजेन्द्र पोखरेलले बताए।

शिविरमा भुटनदेवी माविका प्रअ माधवप्रसाद दाहाल, भुटनदेवी मावि पूर्व विद्यालय व्यवस्थापन समितिका अध्यक्ष पूर्वा दोर्जे लामा, रोटरी क्लब हेटौंडाका अध्यक्ष स्वागतराज प्याकुरेल, पूर्व प्रअ विशाल शर्मा बिडारी, एल्मुनाई एशाेसियनका सल्लाहकार विजेन्द्र अग्रवाल, हेटौडा २ का वडा अध्यक्ष अध्यक्ष विष्णु गोपाल महर्जनकाे उपस्थिति रहेकाे कार्यक्रम संयोजक सुदर्शन ढकालले बताए ।
मकवानपुर । नेकपा एकीकृत समाजवादी पार्टी हेटौंडा उपमहानगरपालिका कमिटीको अध्यक्षमा विष्णुमायामा लामा चयन भएकी छिन् । शनिवार भएकाे प्रथम नगर अधिवेशनले लामाको अध्यक्षतामा ६५ सदस्यीय नगर कमिटी सर्वसम्मत चयन गरेको हो ।
यसैगरी उपाध्यक्ष तारा ढुंगाना लामा, सचिव सफल अधिकारी, उपसचिवद्वय देवेन्द्र पराजुली र हेम सुवेदी चयन भएका छन् । यस्तै, सदस्यहरुमा भूगोल तर्फबाट ३८, दलितबाट ३, युवा खुलाबाट ५, युवा महिलाबाट २, मुस्लिमबाट २ र खुलाबाट १० जना निर्वाचित भएका छन् ।
एघार जना अग्रज व्यक्ति सम्मानित
प्रथम नगर अधिवेशनमा नेपाली कम्युनिष्ट आन्दोलनमा महत्वपूर्ण भूमिका निर्वाह गरेका घननाथ अधिकारी, श्रीबहादुर घलान, इन्द्रसिं थिङ, खिलाकुमारी लामिछाने, कुलप्रसाद रुपाखेती, बद्रीप्रसाद न्यौपाने, सीता बराल, बद्री देवकोटा, कृष्णमाया थिङ, विशुकुमार थापा र सन्तबहादुर राना मगरलाई सम्मानित गरिएकाे छ । नेपाली कम्युनिष्ट आन्दोलनमा योगदान पुर्याएको भन्दै उनीहरुलाई सम्मान गरिएको हाे ।
पार्टी नगर कमिटी अध्यक्ष देवराज गौतमको अध्यक्षतामा भएको प्रथम नगर अधिवेशनमा स्थायी कमिटी सदस्य एवं पार्टी बागमती प्रदेश कमिटी सहइन्चार्ज ललितकुमार बस्नेत, पोलिटब्युरो सदस्य एवं बागमती प्रदेश सरकारका कृषि तथा पशुपन्छी विकास मन्त्री डा.राजेन्द्रमान श्रेष्ठ, पोलिटब्युरो सदस्य तथा पार्टी कानून विभागका प्रमुख घनप्रसाद गौतम,पार्टी मकवानपुर अध्यक्ष विष्णुप्रसाद दहाल लगायतकाकाे आतिथ्यता थियो ।
मनहरी । मकवानपुरकाे मनहरी गाउँपालिकामा ३ वटा पक्की पुल संचालनमा आएकाे छ । बागमती प्रदेशसभा सदस्य इन्द्र बहादुर बानियाले शनिबार उक्त पुलकाे उद्घाटन गरेसँगै संचालनमा आएकाे हाे ।
मनहरीकाे ३ र ४ नम्बर वडाकाे जोड्ने लामिटार र ट्वाङ्ग्राको डबल स्पान पुल, ३ र ४ नम्बर वडाकै गोलघर र मिलडाँडा जोड्ने पुल र १ र २ नम्बर वडाको पार्ता र च्यापल जोड्ने ट्रिपल स्पानको पुलकाे नेपाली काग्रेस बागमती प्रदेश सभापती समेत रहेका बानियाले उद्घाटन गरेका हुन् ।
जोड्न लामिटार र ट्वाङ्ग्रा जोड्ने ६४.१५ मिटर लम्बाइको पुल ६ करोड ४९ लाख ६० हजार रुपैया, गोलघर र मिलडाँडा जोड्ने ७४.५५ मिटर लम्बाइको पुल ६ करोड ५९ लाख ५० हजार ६३ रुपैयाँ तथा १ र २ नम्बर वडाको पार्ता र च्यापल जोड्ने ९७ मिटर लामो पुल ६ करोड २८ लाख ९८ हजार रुपैयाँ लागतमा निर्माण भएकाे गाउँपालिका अध्यक्ष रन्जन कालाखेतीले जानकारी दिए ।
हिराचन बानिँया जेवि निर्माण कम्पनीले गाउँपालिकामा निर्माण गरिरहेकाे पाँच वटा पक्की पुल मध्ये तीन वटा पुलको निर्माण सम्पन्न भएकाेले उद्घाटन गरिएको हो । सबै पुलको चौडाई ७ मिटर रहेकाे बताइएकाे छ । गाउँपालिकाले गत आर्थिक वर्ष ०७७/७८ मा आन्तरिक श्रोतकाे ३३ करोड ४० लाख ६५ हजार लागतमा ५ वटा पक्की पुल निर्माणको काम सुरु गरेको थियो । गाउँपालिकाकाे वडा नं १,२,३, र ४ जोड्ने च्यापल खोला, हाँडिखोला, ट्वाङ्ग्रा खोला, मसिने खोला र ठाडो खोलामा गरी ५ वटा पुलको ठेक्का मार्फत निर्माण थालिएकाे थियाे ।
यसैगरी हाँडिखोला र ठाडो खोलामा निर्माणाधिन दुईवटा पुल २०८१ मंसिर महिनासम्म सम्पन्न भइसक्ने अध्यक्षले कालाखेतीले बताए । उनका अनुसार हालसम्म ठाडोखोला पुलकाे ८५ प्रतिशत र हाँडिखोला पुलकाे ६३ प्रतिशत निर्माणकाे काम भएकाे छ ।