मकवानपुर । मकवानपुरको राक्सिराङ गाउँपालिकामा धुलिखेल अस्पतालको शाखा विस्तार गरिने तयारी गरिएको छ । बागमती प्रदेशका भौतिक पूर्वाधार विकास राज्यमन्त्री सन्तबहादुर प्रजाले काभ्रेको धुलिखेल अस्पतालका पदाधिकारीहरुसँग मंगलबार अस्पतालमै पुगेर राक्सिराङ गाउँपालिका वडा नम्बर ७ गर्लिङमा शाखा विस्तार सम्वन्धी छलफल गरेका छन् ।
अस्पतालले प्रदान गरिरहेका सेवा सुविधाहरुको बारेमा जानकारी लिँदै राज्यमन्त्री प्रजाले विपन्न चेपाङ र तामाङ जातिको बाहुल्यता रहेको मकवानपुरकाे विकट राक्सिराङ गाउँपालिकामा स्वास्थ्य सेवाको आवश्यकताबारे अस्पताल पदाधिकारीहरुसँग छलफल गरेका थिए ।
निकट भविष्यमै चार शैयाको शाखा अस्पताल सञ्चालन गर्नेबारे धुलिखेल अस्पतालका पदाधिकारी सहमत भएको राज्यमन्त्री प्रजाले बताए । प्रजाको पहलमा धुलिखेल अस्पतालले यसअघि दुइपटक गर्लिङको क्षेत्रगत निरीक्षण गरिसकेको छ । राज्यमन्त्रीसँगको छलफल सकारात्मक भएको र निकट भविष्यमै गाउँलेको आवश्यकताको आधारमा स्वास्थ्य सेवा प्रदान गर्ने सोच बनाइएको धुलिखेल अस्पतालका पब्लिक हेल्थ अफिसर सुदिप श्रेष्ठले जानकारी दिए ।
‘स्थानीयको आवश्यकताको पहिचान गरिरहेका छौं । गाउँपालिकासँग पनि छलफल गर्ने तयारी गरेका छौं । जग्गा, भवन, उपकरणलगायत पूर्वाधार तयार गर्न स्थानीय तह र अन्य निकायसँग सहकार्य गरेर अघि बढिनेछ ।’ पब्लिक हेल्थ अफिसर श्रेष्ठले भने ।
गर्लिङमा अस्पताल निर्माण गर्ने सोचका साथ भौतिक पूर्वाधार राज्यमन्त्री प्रजाले पूर्वाधार विकास कार्यक्रमअन्तर्गतको ५ लाख रुपैयाँ बजेटसमेत विनियोजन गरेका छन् । धुलिखेल अस्पतालले नागरिकको स्वास्थ्य आवश्यकताको पहिचान गर्नुका साथै अन्य अवस्थाबारे जानकारी लिन तत्कालको लागि फागुन मसान्तसम्ममा राक्सिराङमा स्वास्थ्य शिविरको आयोजना गर्ने तयारी गरेको जनाएको छ ।
राज्यमन्त्रीसँगको छलफलमा अस्पतालका डाइरेक्टर रामकण्ठ माकाजु, संस्थापक डा राजेन्द्र कोजु, अर्थोपेडिक सर्जन डा. दीपक श्रेष्ठ, क्लिनिकल डाइरेक्टर डा. बलराम मल्ल, सामुदायिक विभाग तथा पब्लिक हेल्थ डाइरेक्टर डा. विराजमान कर्माचार्यलगायतको उपस्थिति रहेको थियो ।
काभ्रेको धुलिखेल नगरपालिका–६ मा रहेको धुलिखेल अस्पतालले हालसम्म देशभर १८ वटा शाखा विस्तार गरी स्वास्थ्य सेवा दिइरहेको अस्पतालले जनाएको छ ।
मकवानपुर । संघीय स्वास्थ्यमन्त्री विरोध खतिवडाको राजीनामा माग गरिएकाे छ । नेपाल कम्युनिष्ट पार्टी (एमाले)ले मन्त्री खतिवडाकाे राजिनामा मागेकाे हाे । खतिवडाले हालै सगरमाथा टिभीको एक कार्यक्रममा तत्कालीन प्रधानमन्त्री केपी शर्मा ओली नेतृत्वको सरकारका बेला कोभिडविरुद्धको पहिलो खोप ५ हजार रुपैयाँमा ‘किनेर लगाएको’ भनी दिएको अभिव्यक्ति प्रति आपत्ती जनाउँदै एमालेले उनकाे राजिनामा माग गरेकाे हाे ।
एमालेले मंगलबार विज्ञप्ती जारी गर्दै खतिवडाकाे अभिव्यक्ती गैरजिम्मेवार रहेको र यस्तो झुठो बोल्ने व्यक्ति मन्त्रीजस्तो गरिमामय पदमा बसिरहन नहुने भन्दै राजीनामा मागेको हो । एमालेकाे स्वास्थ्य तथा जनसंख्या विभाग प्रमुख याेगेश भट्टराईद्वारा जारी विज्ञप्तिमा भनिएको छ, ‘खोप किनेर लगाएको’ भन्ने स्वास्थ्यमन्त्री खतिवडाको उक्त भनाइ सरासर झुटो र अफवाहपूर्ण छ । सिभिल अस्पताल, बानेश्वरमा उहाँले पहिलो मात्रा खोप १९ फागुन २०७७ मा लगाएको अभिलेख सुरक्षित छ । तत्कालीन सरकारले १९–२१ फागुन ०७७ फागुनसम्म संघीय संसद्का सदस्यहरूलाई सिभिल अस्पतालमा निःशुल्क खोप उपलब्ध गराएको बेला सिभिल अस्पतालको रजिष्टर ‘ख’ मा क्र.सं. ४८ मा दर्ता गरेर खोप लगाउनुका साथै हस्ताक्षरसमेत गर्नुभएको छ । उक्त अभिलेखमा ६२ बर्षका खतिवडाले Batch no. 4120 Z 004 को कोभिसिल्ड खोप लगाएको स्पष्ट छ । सांसदहरूका लागि सरकारले दोस्रो डोज संसद् भवन, बानेश्वरमा र तेस्रो डोज सीसीएमसी कार्यालय परिसरमा व्यवस्था गरेको कुरा सबैलाई विदितै छ ।’
स्वास्थ्यमन्त्री खतिवडाको यो अभिव्यक्ति पूर्ववर्ती सरकारलाई बद्नाम गर्नका लागि मात्रै दिएको एमालेको दाबी छ । स्वास्थ्य मन्त्रालयको जिम्मेवारी सम्हालेका मन्त्रीबाट यस्तो गैरजिम्मेवार अभिव्यक्ति आउनु निन्दनीय र आपत्तिजनक रहेको एमालेले जनाएको छ । आमजनता कोभिड–१९ बाट आक्रान्त भइरहेको बेलामा मन्त्रीले दिएको उक्त अभिव्यक्तिको निन्दा र भत्र्सना गर्दै झुट बोल्ने व्यक्ति नैतिक रुपमा मन्त्री पदमा बसिरहन उचित नहुने जारी विज्ञप्तिमा उल्लेख छ । आफ्ना मन्त्रीको यस्तो गैरजिम्मेवार अभिव्यक्ति र व्यवहारप्रति संवेदनशील हुँदै उनलाई मन्त्री पदबाट बर्खास्त गर्न एमालेले प्रधानमन्त्रीको समेत ध्यानाकर्षण गराएको छ ।
मकवानपुर । मकवानपुर प्रहरीले लागुऔषध सहित ३ जनालाई पक्राउ गरेकाे छ । लागुऔषध ओमरेक्स २० बोतलसहित २ जना र लागुऔषध २ किलो ८ सय ग्राम गाँजासहित १ जना गरी ३ जनालाई मकवानपुर प्रहरीले पक्राउ गरेका हाे ।
ओमरेक्स २० बोतलसहित हेटौंडा–२ का ४० वर्षीय नमोरत्न मानन्धर र हेटौंडा–८ कमानेका १८ वर्षीय अभिषेक मोक्तानलाई पक्राउ गरिएकाे प्रहरीले जनाएको छ । त्यसैगरी गाँजा २ किलाे ८ सय ग्राम सहित हेटौंडा–३ बसामाडीका ३३ वर्षीय अशोक विश्वकर्मालाई पक्राउ गरिएकाे जिल्ला प्रहरी कार्यालय मकवानपुरका प्रहरी प्रवक्ता जयश्वर रिमालले जानकारी दिए ।
सोमबार बेलुका पाँच बजेको समयमा विशेष सूचनाको आधारमा जिल्ला प्रहरी कार्यालय मकवानपुरबाट खटिएको प्रहरी टोलीले हेटौंडा–४ स्थित एक खाजाघरमा खानतलासी गर्दा लुकाई छिपाई राखेको लागुऔषध ओमरेक्स र २० ग्राम गाँजासहित मानन्धर र मोक्तानलाई पक्राउ गरिएकाे हाे । पक्राउ परेका दुवैजनालाई मंगलबार जिल्ला अदालत मकवानपुरबाट ५ दिन म्याद अनुमती लिई थप अनुसन्धान भइरहेको प्रहरीले जनाएकाे छ।
सोमबार दिउँसो १ बजेको समयमा जिल्ला प्रहरी कार्यालय मकवानपुर र प्रहरी चौकी बसामाडीबाट खटिएको प्रहरी टोलीले विश्वकर्माकाे घरमा लुकाई छिपाई राखेको अवस्थामा गाँजा फेला पारी उनलाई पक्राउ गरको प्रहरीले जनाइएको छ । उनलाई गाँजासहित नियन्त्रणमा लिइ मंगलबार जिल्ला अदालत मकवानपुरबाट ५ दिन म्याद अनुमती लिई थप अनुसन्धान भइरहेको मकवानपुर प्रहरी प्रवक्ता रिमालले बताए ।
मकवानपुर । मकवानपुरकाे मनहरी गाउँपालिकामा सामुदायिक आँखा केन्द्र उद्घाटन गरिएकाे छ । मनहरी गाउँपालिकाको आर्थिक र हेटौडा सामुदायिक आंखा अस्पतालको प्राविधिक सहयोगमा आँखा केन्द्र स्थापना भइ उद्घाटन गरिएकाे हाे । गाउँपालिका अध्यक्ष एकराज उप्रेती र नेपाल आँखा कार्यक्रमका कार्यकारीणी सदस्य सिद्धिलाल श्रेष्ठले केन्द्रको उद्घाटन गरेका हुन् ।
नेपाल रेडक्रश सोसाईटी मनहरी उपशाखा र सामुदायिक आंखा अस्पतालको समन्वयमा यस अघी साप्तााहिक रुपमा संचालित आँखा केन्द्रलाई गाउँपालिकाको समन्वयमा दैनिक रुपमा संचालन गर्ने गरी केन्द्र स्थापना गरिएकाे हाे । गाउँपालिका अध्यक्ष एकराज उप्रेतीले आँखा स्वास्थ्य सेवाको विकास गर्न मनहरी गाउँपालिका सहयोग गर्न तत्पर रहेको बताए ।
नेपला आंखा कार्यक्रमका कार्यकारीणी सदस्य सिद्धिलाल श्रेष्ठले तिलगंगा सदैव अन्धोपन निवारणकोलागि लागि परिरहेको र मकवानपुरमा पहिलो पटक आँखा स्वास्थ्यको सेवा मनहरीबाट शुरु गरेको बताए । केन्द्र उद्घाटनकाे अवसरमा श्रेष्ठले आफ्नो बुबाको स्मृतिमा स्थापित संस्था पञ्चसिद्धि फाउण्डेशन मार्फत २५ जना विपन्न बिरामीहरुलाई निशुल्क मोतिविन्दुको शल्यक्रिया गर्न सहयोग गर्ने बताए ।
गाउँपालिकाले २ जना कर्मचारी र भवनको भौतिक सुधार गर्ने भएकाे छ । आँखा केन्द्रका लागि होण्डाई मोटर फाउन्डेसन र योङसाई विश्वविद्यालय दक्षिण कोरियाले २० लाख रुपैयाँ बराबरको उपकरण उपलब्ध गराएको छ । योग्सी युनिभर्सिटी र चुगंमुगं कोग कोरीयाबाट उपकरणहरुको सहायोगमा सामुदायिक आंखा केन्द्र सचालित छ ।
मनहरी गाउँपालिका र हेटौंडा सामुदायिक आँखा अस्पतालबीच सम्झौता भएको २ महिनापछि आँखा केन्द्र नियमित रुपमा सञ्चालनमा आएको हो । अस्पताल प्रमुख डा. सुनिल थकाली र गाउँपालिकाका अध्यक्ष उप्रेतीले २ महिनाअघि सम्झौतापत्रमा हस्ताक्षर गरेका थिए ।
आँखा केन्द्र उद्घाटन कार्यक्रममा तिलगंगा आंखा कार्यक्रममा प्रमुख संचालन अधिकृत पिताम्बर अधिकारी, बाह्य कार्यक्रम प्रबन्धक डा. मोहनकृष्ण श्रेष्ठ, मनहरी प्राथमिक स्वास्थ्य केन्द्रका अध्यक्ष ठाकुर तितुङ लगायतकाे उपस्थिति रहेकाे थियाे । यसअघि हेटौंडा सामुदायिक आँखा अस्पतालले मकवानपुरको बागमती गाउँपालिकामा पनि आँखा केन्द्र सञ्चालनमा ल्याएको छ ।
‘बकैया कला–साहित्य महोत्सव–२०७८’ गर्दै झरना
Tags: No Comments
मकवानपुर । मकवानपुरको बकैया गाउँपालिकामा ‘बकैया कला–साहित्य महोत्सव–२०७८’ हुने भएको छ ।
झरना साहित्यिक परिवार मकवानपुरले आफ्नो २९ औं वार्षिकोत्सवको अवसरमा तेस्रो ‘बकैया कला–साहित्य महोत्सव–२०७८’ गर्ने झरनाका सचिव मसान उपासकले जानकारी दिए । साेमबार हेटौंडामा पत्रकार सम्मेलन गर्दै सचिव उपासकले आउँदो फागुन २७ र २८ गते बकैया-३ हात्तीसुँडेस्थित बुद्ध माविको प्राङ्गण र गाउँपालिकाको सभाहलमा साहित्य महोत्सव गर्ने तयारी रहेको बताए ।
२०५० साल फागुन १२ गते तत्कालिन छतिवन गाविसमा स्थापना भएको झरनाले हरेक वर्ष वार्षिकोत्सवका अवसरमा बहत् साहित्य गोष्ठी गर्दै आएकोमा पछिल्ला २ वर्ष (२०७६) देखि बकैया साहित्य महोत्सव आयोजना गर्दै आएकाे छ । यसवर्षबाट स्थानीय कलासंस्कृतिको समेत जगेर्ना गर्ने उदेश्यले खैंजडी भजन,तामाङ,माझी,राई लगाएत जनजातिका कलाको प्रदर्शनीका साथै पुस्तक प्रदर्शनी हुने सचिव उपासकले बताए । २ दिवसीय महोत्सवमा कविता, गजल, मुक्तक विशेष कार्यक्रम हुने भएकाे छ ।
यसैगरि,पत्रकार सम्मेलनमा झरनाका अध्यक्ष दीपक गौतमले कला–साहित्य महोत्सवमा साहित्य बहसमूलक कार्यक्रम समेत हुने बताए । उनले आफुहरुले गर्न लागेको कला–साहित्य महोत्सवले साहित्य क्षेत्रको विकासमा सहयोग पुग्ने विश्वास व्यक्त गरे ।साहित्य महाेत्सवमा देशभरबाट ५० जना साहित्यकारहरु र बकैया गाउँपालिकाका राजनीतिक,सामानिक अगुवासहित करिब ५ सय जनाको उपस्थिति रहने बताइएकाे छ । महोत्सवमा करिब ५ लाख खर्च हुने आयोजकको अनुमान रहेको छ ।
१० जना सम्मानित हुने
यसैगरि,झरना साहित्यिक परिवार मकवानपुरले यस वर्ष साहित्यका विविध क्षेत्रमा योगदान पुर्याउने १० जनालाई विभिन्न सम्मानहरू प्रदान गर्ने भएको छ ।
यस वर्षको होमनाथ–टीकामाया प्रतिभा सम्मानबाट अग्रज साहित्यकार एवं प्राज्ञ डा.देवी नेपाल (भक्तपुर) सम्मानित हुने भएका छन् । २१ हजार १ सया २१ रुपैंया सहित नेपाललाई सम्मानित गरिने छ । यसैगरी शिव सावित्री अधिकारी स्मृति मुक्तक सम्मान १५ हजार ५ सय ५५ रुपैंया सहित अग्रज मुक्तककार वियोगी बुढाथोकी (काठमाडौं), बाबुलाल–भोजमाया स्मृति प्रतिभा सम्मान १५ हजार ५ सय ५५ रुपैंया सहित अग्रज साहित्यकार आरसी रिजाल (मकवानपुर) सम्मानित हुने भएका छन् ।
यस्तै खडानन्द मनमाया स्मृति युवा प्रतिभा सम्मान ७ हजार ७ सय ७७ रुपैंया सहित युवा कवि यात्रीप्रकाश पाण्डे (धादिङ), सुशीला दङ्गाल स्मृति सिर्जनशील नारी सम्मान ७ हजार ७ सय ७७ रुपैंया सहित युवाकवि शान्ति प्रियवन्दना (मकवानपुर), सञ्जीवनी बुटी साहित्य सेवा सम्मान ७ हजार ७ सय ७७ रुपैंया सहित साहित्यसेवी/समाजसेवी बेलप्रसाद दाहाल (बकैया-४,मकवानपुर) लाई सम्मानित गरिने भएकाे छ ।
यसैगरी खिमबहादुर खत्री स्मृति कलाकारिता सम्मान ७ हजार ७ सय ७७ रुपैंया सहित कलाकार बाबुलाल वाईवा मकवानपुर, झरना–बकैया पत्रकारिता सम्मान ७ हजार ७ सय ७७ रुपैंया सहित स्व पत्रकार गोकर्ण गौतम (मरणोपरान्त) (बकैया मकवानपुर), झरना–बकैया उत्कृष्ट नवप्रतिभा सम्मान ५ हजार ५ सहित उदीयमान गजलकार विजय दोङ (बकैया-५ मकवानपुर) र झरना–बकैया उत्कृष्ट बालसाहित्य सम्मान सम्मानपत्र र १० थान विशेष पुस्तकसहित झरना महेन्द्र बालसाहित्य समिति (महेन्द्र मावि बकैया ४) सम्मानित हुने झरना साहित्यिक परिवार मकवानपुरले जनाएको छ ।