भोलि चन्द्रग्रहण : भरणी नक्षत्र र मेष राशिलाई कष्ट
Tags: No Comments
मंगलबार (भोलि) ग्रस्तोदित खग्रास चन्द्रग्रहण लाग्ने भएको छ । मंगलबार बेलुकी ५ बजेर ११ मिनेटमा चन्द्रोदय हुँदादेखि नै ग्रहण लाग्नेछ । बेलुकी ५ बजेर १३ मिनेटमा सूर्यास्त भएपछि ग्रहण स्पष्ट रूपमा देखिनेछ ।
नेपाल पञ्चांग निर्णायक विकास समितिले बेलुकी ५ बजेर २७ मिनेटमा ग्रहणको सुरु हुने जनाएको छ । यस्तै, बेलुकी ६ बजेर ३४ मिनेटमा ग्रहण सकिने भएको छ । १ घण्टा २३ मिनेट नेपालबाट ग्रहण देखिनेछ ।
चन्द्रोदय हुँदादेखि नै ग्रहण लागेर उदय हुने भएकाले ग्रस्तोदित चन्द्रग्रहण भनिएको हो । ग्रहणले पूरै चन्द्रमा ढाक्ने भएकाले खग्रास भनिएको हो ।
नेपाल पञ्चांग निर्णायक विकास समितिका अनुसार, मंगलबार लाग्ने ग्रस्तोदित खग्रास चन्द्रग्रहण भरणी नक्षत्र र मेष राशिका व्यक्तिलाई अति कष्टदायक हुने देखिएको छ ।
चन्द्रग्रहण मेष राशिलाई घात, वृष राशिलाई व्यय, मिथुन राशिलाई लाभ, कर्कट राशिलाई सुख, सिंह राशिलाई माननाश, कन्या राशिलाई कष्ट फल दिने योग रहेको समितिले प्रकाशन गरेको ‘राष्ट्रिय पञ्चांग’मा उल्लेख छ । यसैगरी तुला राशिलाई स्त्रीपीडा, वृश्चिक राशिलाई सुख, धनु राशिलाई चिन्ता, मकर राशिलाई व्यथा, कुम्भ राशिलाई श्रीप्राप्ति र मीन राशिलाई क्षतिको फल मिल्ने पनि ‘राष्ट्रिय पञ्चांग’मा उल्लेख छ ।
धर्मशास्त्रविद् प्राडा रामचन्द्र गौतमका अनुसार, चन्द्रग्रहणको ९ घण्टाअघिदेखि सुतक लाग्ने धर्मशास्त्रका ग्रन्थमा उल्लेख छ । जसअनुसार मंगलबार बिहान ८ बजेर ११ देखि बाल, वृद्ध र बिरामीबाहेकलाई भोजन निषेध गरिएको छ । बेलुकी ६ बजेर ३४ मिनेटमा ग्रहण सकिएपछि मात्र भोजन गर्न हुनेछ । ग्रहणका बेला जप, स्नान, ध्यान, पाठलगायत कर्म गर्दा फलदायी हुने शास्त्रीय वचन छ ।
यसअघि ८ कात्तिकमा कृष्ण औंसीका दिन सूर्यग्रहण लागेको थियो । यसरी यो वर्षको कात्तिक महिनाका दुवै पक्षमा ग्रहण लाग्ने समितिले जनाएको छ । औंसीमा सूर्यग्रहण र पूर्णिमामा चन्द्रग्रहण लाग्छ ।
शुक्र अस्तले चतुर्मास व्रत उद्यापन रोकिँदैन : धर्मशास्त्रविद्
उता, धर्मशास्त्रविद्ले शुक्र अस्तमा चतुर्मास व्रत समापन गर्न नहुने भनी गरिएको प्रचारप्रसार शास्त्रीय नभएकामा जोड दिइका छन् ।
आषाढ शुक्ल एकादशी अर्थात् हरिशयनी एकादशीदेखि कात्तिक शुक्ल एकादशीका दिनसम्म घरघरमा विशेषरूपमा तुलसीको पूजा आराधनासहित चतुर्मास व्रत एवं कात्तिक स्नान गर्ने वैदिक सनातन हिन्दू धर्मावलम्बीले कात्तिक शुक्ल द्वादशीदेखि हवन गरेर व्रत समापन गर्ने गर्छन् । यस वर्ष १४ असोजमा अस्त भएको शुक्र ६ मंसिरमा उदय हुने नेपाल पञ्चांग निर्णायक विकास समितिले जनाएको छ ।
यो अवधिमा कुनै कामनाले गरिने कर्म मात्र गर्न नहुने धर्मशास्त्रविद् समितिका सदस्य प्राडा देवमणि भट्टराई बताउँछन् । चतुर्मास व्रत प्रत्येक वर्षको नियमित कर्म भएकाले शुक्र एवं वृहस्पति अस्तले यस्ता कर्म नरोकिने उनले बताए । केही व्यक्तिले सामाजिक सञ्जाललगायतबाट गरेको यससम्बन्धी प्रचारप्रसार गलत रहेको समितिले जनाएको छ ।
धर्मशास्त्रविद् प्राडा रामचन्द्र गौतम शुक्र अस्त भएकाले चतुर्मास व्रत समापन गर्नुहुन्छ कि हुन्न भनी दैनिक धेरैले सम्पर्क गर्ने गरेको बताउँछन् । तिथिअनुसार प्रत्येक वर्ष मनाइने चाडबाड मनाउन र नियमित व्रत समापन गर्न शुक्र एवं वृहस्पति अस्तले फरक नपर्ने उनले बताए । पुराण वाचन, विवाह, व्रतबन्धजस्ता कर्म भने शुक्र एवं वृहस्पति अस्तका बेला गर्नु नहुने शास्त्रीय वचन छ ।
प्रत्येक वर्ष कात्तिक शुक्ल द्वादशीदेखि मार्ग शीर्ष कृष्ण पञ्चमीसम्म तुलसीको विशेष पूजा समापन गर्न गरिने हवनका लागि अग्नि जुराउनुपर्दैन । त्यसपछि भने अग्नि जुरेका दिनमा मात्र चतुर्मास व्रत समापनसहित तुलसीको विशेष पूजा उद्यापन गरिन्छ । राजधानी दैनिकबाट
४ मंसिरमा हुने प्रतिनिधि तथा प्रदेशसभा निर्वाचनका लागि प्रयोग हुने अधिकांश निर्वाचन सामग्री विदेशबाटै आयात भएको छ । निर्वाचन आयोगले आसन्न निर्वाचनका लागि केन्द्र र जिल्लाबाट गरी निर्वाचनका लागि ७२ प्रकारका निर्वाचन सामग्री खरिद गरेको छ । जसमध्ये अधिकांश विदेशबाट आयात भएका छन् ।
आयोगका सहायक प्रवक्ता सूर्यप्रसाद अर्यालका अनुसार आयोगले केन्द्रीय कार्यालयमार्फत बोलपत्रबाट ५७ प्रकारका तथा जिल्ला तहबाट १५ प्रकारका गरी ७२ प्रकारका निर्वाचन सामग्री खरिद गरेको हो । तीमध्ये धेरैजसो विदेशबाटै ल्याइएका छन् ।
७२ प्रकारका निर्वाचन सामग्री
आयोगले मतपेटिका उत्तरी छिमेकी मुलुक चीनबाट ल्याएको हो । यसैगरी, सियो, लाह छाप भारतबाट ल्याइएको छ । धेरैजसो स्टेसनरीका सामग्री आयोगले भारतबाट खरिद गरेको छ ।
आयोगले निर्वाचन प्रयोजनमा छपाइसम्बन्धी (मतपेटिका स्टिकर र परिचयपत्र), मतपेटिका, छपाइसम्बन्धी (पोलबुक तथा कार्ड), लाह छाप, सुरक्षण सिल, रबर म्याट, स्वस्तिक छाप (रबर र पित्तल), स्ट्याप्लर मेसिन, स्ट्याप्लर पिन, छेकबार, स्ट्याम्प प्याड र मसी, मार्कर, सिसा कलम, सोसर, प्लास्टिक थैलो र बोरा, फोटोकपी पेपर, स्केल तथा कैंची, जेलपेन (कालो र रातो), मार्कर पेन, पन्चिङ मेसिन, कार्ड होल्डर, सलाई, धागो, ग्लुस्टिक तथा कोरा कपडा, डोरी, सियो, खापसियो, मैनबत्तीलगायतका सामग्री खरिद गरेको छ ।
१ लाख बढी मतपेटिका प्रयोग हुने
मंसिरमा हुने प्रतिनिधि तथा प्रदेशसभा निर्वाचनमा १ लाखभन्दा बढी मतपेटिका प्रयोग हुने भएको छ । निर्वाचन आयोगले आसन्न निर्वाचनका लागि ५५ हजार थान नयाँ मतपेटिका खरिद गरेको छ भने बाँकी पुरानै जगेडा मतपेटिकालाई प्रयोग गर्ने तयारी गरेको हो ।
आयोगका सहायक प्रवक्ता सूर्यप्रसाद अर्यालले आसन्न निर्वाचनमा १ लाख २० हजार थान मतपेटिकाको प्रयोग हुने जानकारी दिए ।
उनका अनुसार आयोगले निर्वाचनका लागि स्थायी मतदान स्थल १० हजार ८ सय ९२ र मतदान केन्द्र २२ हजार २ सय २७ निर्धारण गरेकाले प्रत्येक मतदान केन्द्रमा कम्तीमा चारदेखि बढीमा पाँचवटा मतपेटिका पठाइनेछ । यसैगरी, केही मतपेटिकालाई आयोगले जगेडासमेत राख्नेछ ।
आयोगले निर्वाचनका लागि ८ करोड ३ लाख ९४ हजार ५ सय थान मतपत्र छपाइ गरेर धमाधम ढुवानी गरिरहेको छ । आयोगका अनुसार प्रतिनिधिसभाको प्रत्यक्ष निर्वाचन प्रणालीका लागि कुल १ करोड ९८ लाख ७१ हजार थान प्रदेश सभातर्फ प्रत्यक्षका लागि १ करोड ९९ लाख १८ हजार ५ सय थान मतपत्र छापिएको छ ।
यसैगरी, प्रतिनिधि सभातर्फको समानुपातिक निर्वाचन प्रणालीतर्फका लागि २ करोड ४ लाख २१ हजार थान र प्रदेशसभाको समानुपातिकतर्फका लागि २ करोड १ लाख ८४ हजार थान मतपत्र छपाइ भएको हो । समानुपातिक निर्वाचन प्रणालीतर्फको मतपत्र आयोगले सबै जिल्लामा पठाइसकेको छ ।
निर्वाचनका लागि कुल मतदाता १ करोड ७९ लाख ८८ हजार ५ सय ७० कायम भएका छन् । जसमा पुरुष मतदाता ९१ लाख ४० हजार ८ सय ६ जना तथा महिला मतदाता ८८ लाख ४७ हजार ५ सय ७९ जना कायम छन् । यसैगरी, अन्य मतदाता १ सय ८५ जना छन् । राजधानी दैनिकबाट
मकवानपुर । भेटेरेनरी अस्पताल तथा पशु बिज्ञ केन्द्र हेटौंडाले स्थानीय तहको सिफारिसमा मात्र किसानलाई सहुलियत प्रदान गर्ने भएको छ । केन्द्रले आर्थिक वर्ष २०७९/०८० को लागि स्वीकृत कार्यक्रम तथा प्रथम चौमासिक समीक्षा गर्दै उक्त कुराको जानकारी गराएको हो ।
मकवानपुर जिल्लाका १० वटै स्थानीय तहका कृषि तथा पशु शाखा प्रमुख, योजना शाखा प्रमुख स्थानीय तहका वडा अध्यक्षहरुको उपस्थितिमा समीक्षा तथा जानकारी कार्यक्रम भएको हो ।
केन्द्रबाट चालु आर्थिक वर्षमा किसानको लागि पशु तथा पन्छि व्यबसाय गर्न प्रदान गरिने बिउ पुजि सहुलिएन ऋण प्राप्त प्रक्रियाको जानकारी गराइएको निमित्त प्रमुख ब्रज किशोर ठाकुरले बताए ।
कृषकहरुलाई स्थानीय पालिका र बिज्ञ केन्द्रबाट प्रदान गरिने सहुलियतमा दोहोरोपना आए पछि यस वर्षदेखि स्थानीय तहको सिफारिसमा मात्रै सहुलियत प्रदान गरिने गरि कार्यबिधि बनाइएको बिज्ञ केन्द्रका योजना शाखा प्रमुख डा. आभाष कोइरालाले बताए ।
केन्द्रले किसानको लागि प्रदान गरिने कार्यक्रम बारे सूचना यसै साताबाट जिल्लाको सम्बन्धित स्थानीय तहबाट प्रकाशन गरिने तयारी भएकाले सम्बन्धित किसानहरुलाई सेवा लिन केन्द्रका पशु सेवा प्राबिधिक प्रदीप सापकोटाले बताए ।
मकवानपुर । मकवानपुरको बागमती गाउँपालिकामा पहिलाे पटक नमूना मतदान अभ्यास गरिएकाे छ । आगामी मंसिर ४ गते हुने प्रतिनिधि तथा प्रदेशसभा सदस्य निर्वाचन लक्षित नमूना मतदान अभ्यास गरिएकाे प्रदेश निर्वाचन कार्यालयले जनाएकाे छ ।
प्रदेश निर्वाचन कार्यालय हेटौंडाले आगामी मंसिर ४ गते हुने प्रतिनिधि सभा र प्रदेश सभा सदस्य निर्वाचनलाई लक्षित गरी आइतबार गाउँपालिका कार्यालय झुरझुरेमा नमूना मतदानको आयोजना गरेको हो ।
निर्वाचनमा मतदातालाई स्पष्टता दिन तथा मतदान केन्द्रसम्म पुग्ने, मतदान कति ठाउँमा दिने, कसरी मतदान गर्ने, मतपत्र मतपेटिकामा खसाल्नेलगायत जागरुक बनाउन नमुना मतदानको आयोजना गरिएको प्रदेश निर्वाचन कार्यालय बागमतीका निर्वाचन अधिकारी लुम्बनाथ पोखरेलले जानकारी दिए । उनले नमुना मतदानबाट मतदाताहरुलाई मत बदर हुनबाट जोगाउन मद्दत गर्ने समेत बताए ।
नमुना मतदानमा महिला र पुरुष गरी ५३ जना मतदाता सहभागी भएका थिए । नमुना मतदानका क्रममा प्रतिनिधि सभा प्रत्यक्षतर्फको मात्रै मतगणना गरिएको थियो । जसमा खसेको ५३ वटा मतमा ५२ सदर भएको र १ वटा मत बदर भएकाे पोखरेलले बताए । नमुना मतदानकाे अभ्यास साेमबार बकैया गाउँपालिकामा गरिने बताइएकाे छ ।
यसैगरी, मकवानपुरमा मतदाता शिक्षा कार्यक्रम सञ्चालन गरिएकाे छ । गत शुक्रबारबाट मतदाता शिक्षा कार्यक्रम सञ्चालन गरिएकाे निर्वाचन अधिकारी पाेखरेलले जनाएका छन् । आगामी मंसिर ४ गते हुने प्रतिनिधिसभा तथा प्रदेशसभा सदस्य निर्वाचनका लागि प्रदेश निर्वाचन कार्यालयले मकवानपुरको १० वटा स्थानीय तहको १ सय २ वटै वडामा मतदाता शिक्षा कार्यक्रम सुरु भएको हाे ।
मकवानपुरमा मतदाता शिक्षा कार्यक्रमका लागि स्थानीय तहहरुसँगकाे समन्वयमा वडा तहमा कर्मचारी परिचालन गरी मतदाता शिक्षा सुरु गरिएको पोखरेलले जानकारी दिए । वडा–वडामा खटिएका स्वास्थ्य स्वयंसेविकाहरुले मतदान केन्द्रसम्म पुग्ने, मतदान गर्ने, मतपत्र पट्याउने, मतपत्र मतपेटिकामा खसाल्नेलगायतकाे जानकारी मतदातालाई जानकारी दिने छन् ।
यस पटकको निर्वाचनमा ४ प्रकारको मतपत्रकाे प्रयाेग हुने निर्वाचन आयाेगले जनाएको छ । मतदाताले प्रतिनिधिसभाको प्रत्यक्षतर्फ तथा प्रतिनिधिसभाको समानुपातिकतर्फ मतदान पहिले गर्नुपर्नेछ । त्यसपछी प्रदेशसभाको प्रत्यक्षतर्फ र प्रदेशसभाको समानुपातिकतर्फ मतदान गर्नुपर्नेछ । प्रतिनिधि र प्रदेशसभाको प्रत्यक्षतर्फको मतपत्र रातो रंग र समानुपातिकतर्फको मतपत्र कालो रंगको हुनेछ ।
गत स्थानीय तहकाे निर्वाचनमा मतदाता शिक्षा कार्यक्रम सञ्चालन नहुदाँ बदर मतकाे संख्या बढी भएकाेले यस पटक बदर मत कम गर्न मतदाता शिक्षा प्रभावकारी हुने बताइएकाे छ ।
मकवानपुर । मकवानपुर क्षेत्र नम्बर २ प्रदेशसभा क’ की उम्मेदवार कुमारी मोक्तानले गठबन्धनको सरकार बनेमा तेब्बर बजेट ल्याउने बताएकी छिन् । नेकपा माओवादी केन्द्रकी मकवानपुर इन्चार्ज माेक्तानले भीमफेदी गाउँपालिकाकाे चुनावी कार्यक्रममा गठबन्धनले बोलेको पुरा गरेर बिकास गर्नेमा मतदातालाई ढुक्क हुन आग्रह समेत गरिन् ।
‘हामी (प्रदेश सरकार)ले यो गाउँपालिकामा २ अर्ब ८८ करोड बजेट हालेका छौ,’ बागमती प्रदेशकी सामाजिक विकास मन्त्री समेत रहेकी उनले भनिन्, ‘अब फेरी हाम्रो गठबन्धनको प्रदेश सरकार बन्यो भने डबल हैन, तेब्बर बजेट गाउँपालिकामा आउँने छ ।’ लोकतान्त्रिक बाम गठबन्धनका प्रतिनिधिलाई अबिश्वास गर्नुपर्ने कुनै ठाउँ नभएको भन्दै गठबन्धन सरकारले आमनागरिकको समस्या समाधानमा पहल गरेको उनको दाबी छ ।
यसैगरी चुनावी कार्यक्रममा नेकपा एकीकृत समाजवादीकी केन्द्रीय सदस्य मुनु सिग्देलले गठबन्धनको सबै प्रतिनिधिले जनतालाई विश्वासघात नगर्ने भन्दै ढुक्क भएर गठबन्धनलाई मतदान गर्न आग्रह गरिन् । ‘हाम्रो गठबन्धनका उम्मेदवारले विश्वासघात गर्नुहुन्न, तपाईहरु ढुक्कले गठबन्धनलाई भोट हाल्नुहोस्,’ उनले भनिन् । मकवानपुरकै मुख्यमन्त्री भएरपनि एमालेका डोरमणि पौडेलले ३ बर्षमा आफ्नै वडा हेटौंडा ११ मा एउटा पुलबाहेक कतै बजेट नहालेको भन्दै उनले लोकतान्त्रिक बाम गठबन्धनले जितेमा विकास र आर्थिक समृद्धीका लागि भूमिका खेल्ने दावी गरिन् ।
