मकवानपुर । मकवानपुर प्रहरीले लागुऔषध अफिमसहित १ जनालाई नियन्त्रणमा लिएकाे छ । सोमबार दिउँसो ३ बजेकाे समयमा मकवानपुरको मनहरी गाउँपालिका वडा नम्बर ८ बाट पर्सा जिल्लाको पटेर्वा सुगौली गाउँपालिका–८ रंगपुरटारीका ५० वर्षीय शेख भिखारीलाइ अफिम १ केजी सहित नियन्त्रणमा लिइएकाे मकवानपुर प्रहरीले जनाएकाे छ ।
मनहरी ८ दारिमबासस्थित भित्री सडकखण्डमा कान्द्राङबाट मनहरीतर्फ आउँदै गरेको बा ४ ख ५१४८ नम्बरको यात्रुवाहक बस चेकजाँच गर्दा भिखारी र १ केजी अफिम नियन्त्रणमा लिइएकाे जिल्ला प्रहरी कार्यालय मकवानपुरका प्रहरी प्रवक्ता टेक बहादुर कार्कीले बताए ।
कार्कीका अनुसार बा ४ ख ५१४८ नम्बरकाे बसमा लागुऔषध लिई आउदै गरेको भन्ने खबर प्राप्त हुनासाथ इलाका प्रहरी कार्यालय मनहरीबाट प्रहरी निरीक्षक कृष्णराज ढकालको कमाण्डमा प्रहरी टोली खटिइ बसलाई सुरक्षाजाँच गर्दा बसमा सवार भिखारीलाई शंका लागि सुरक्षाजाँच गर्दा लागुऔषध अफिम १ केजी फेला पारेको हाे । उक्त लागुऔषधसहित भिखारीलाई नियन्त्रणमा लिएर थप अनुसन्धान गरिरहेको प्रहरीले जनाएको छ ।
मकवानपुर । पाँचौ संस्करणको स्थानीय तह सहिद स्मृति मकवानपुर गोल्डकप फुटबल प्रतियोगिता माघ २९ गतेबाट हुने भएकाे छ । फागुन ११ गतेसम्म नकआउट चरणमा संचालन हुने प्रतियाेगिताकाे साेमबार जिल्ला फुटबल संघ मकवानपुरले पत्रकार सम्मेलन गरी जानकारी दिएकाे हाे ।
पत्रकार सम्मेलनमा फुटबल संघ केन्द्रीय सदस्य समेत समेत रहेका जिल्ला अध्यक्ष टिका लामाले प्रतियोगितामा आयोजक मकवानपुरसहित १२ वटा क्लबहरुले भाग लिने जानकारी दिए । गोल्डकपको तयारी तीब्र पारिएको लामाले बताए । उनका अनुसार हेटौंडा–५ पिप्ले स्थित क्याम्पा रंगशालमा हुने प्रतियोगितामा आयोजक मकवानपुरसहित मनाङ् मस्र्याङ्दी क्लब, नेपाल पुलिस क्लब, थ्रिस्टार क्लब, एनआरटी क्लब, त्रिभुवन आर्मी क्लब, हिमालयन शेर्पा क्लब, मच्छिन्द्र क्लब, सातदोबाटो युवा क्लब, जवलाखेल युथ क्लब र एभिनिर एफ सि क्यामरुन क्लबले प्रतिस्पर्धा गर्ने छन् ।
प्रतियोगिताको उपाधि विजेता टोलीले नगद १५ लाख र उपविजेता टोलीले १० लाख रुपैयाँसहित शिल्ड, मेडल तथा प्रमाणपत्र प्राप्त गर्नेछन् । यसैगरी प्रतियोगिताको सर्वोकृष्ट खेलाडीले नगद ५० हजार, विद्यागत उत्कृष्ट खेलाडीले २५ हजार र म्यान आफ दि म्याच खेलाडीले १० हजार रुपैयाँ प्राप्त गर्ने आयोजकले जनाएकाे छ । सर्बोकृष्ट खेलाडीलाई यसअघिको तेस्रो र चौथो संस्करणमा हेटौंडा स्कुल म्यानेजमेन्टले रोयल इन्फिल्ड बाइकको प्रायोजन गर्दै आएको थियो । यस पटक पनि बाइकको प्रायोजनका लागि हेटौंडा स्कुल अफ म्यानेजमेन्टसँग छलफल गरिने जिल्ला फुटबल संघ मकवानपुरले जनाएकाे छ ।
जिल्लाको १० वटै स्थानीय तहहरुको आर्थिक सहयोगमा फुटबल संघले सहिद स्मृति गोल्डकप आयोजना गर्दै आएको छ ।२०६२/०६३ को जनआन्दोलनका सहिदहरुको स्मृतिमा २०६४ सालमा हेटौंडामा पहिलो पटक राष्ट्रिय फुटबल प्रतियोगिताको आयोजना फुटबल संघले गरेको थियो । पहिलो संस्करणको उपाधि थ्रिस्टार क्लबले जितेको थियो भने २०७५ मा भएको दोस्रो संस्करणको उपाधि घरेलु टोली मकवानपुर–११ ले जितेको थियो । २०७७ मा भएको तेस्रो संस्करण र गत जेठमा सम्पन्न चौथो संस्करणको उपाधि त्रिभुवन आर्मी फुटबल क्लबले जितेको थियो ।
मकवानपुर जिल्ला फुटबल संघका अध्यक्ष टिका लामाको सभाध्यक्षता तथा बागमती प्रदेश फुटबल संघका अध्यक्ष राजेन्द्र श्रेष्ठको प्रमुख आतिथ्यतामा भएको पत्रकार सम्मेलनमा जिल्ला खेलकुद विकास समिति मकवानपुरका अध्यक्ष भेष खड्की, हेटौंडा उपमहानगरपालिका खेलकुद विकास समितिका अध्यक्ष चन्द्र शाही लगायतको उपस्थिति रहेको थियो ।
मकवानपुर । मन्त्रालय बाँडफाँडमा आन्तरीक भागबण्डा नमिल्दा बागमती प्रदेश सरकारले मन्त्री परिषदलाई पूर्णता दिन सकेको छैन ।
प्रदेश सरकार गठन भएको दुई साता बितिसक्दा समेत मन्त्रिपरिषद् विस्तार हुन सकेको छैन । गत पुस २६ गते मुख्यमन्त्री शालिकराम जम्कट्टेलले मुख्यमन्त्रीको सपथ लिएका थिए । सोही दिन अन्य २ जनालाई मन्त्रीको जिम्मेवारी दिएका जम्कट्टेलले अथ मन्त्री परिषद विस्तार गर्न सकेको छैनन् ।
मन्त्रालयको टुङ्गो लगाएर मात्रै मन्त्री परिषद विस्तारमा लाग्ने तयारीमा मुख्यमन्त्री जम्कट्टेललागिरहदा सत्ता साझेदार दलका सांसदहरुले भने मन्त्री बन्न लबिङ तिव्रता दिएका छन् ।
सांसदहरुले आफू अनुकुल मन्त्रालयका लागि पार्टीका शीर्ष नेतृत्वसँगको भेटलाई बाक्लो बनाएका छन् । हाल प्रदेशमा सरकारको नेतृत्व गरिरहेको दल माओवादी केन्द्रबाट मन्त्रीमा ८ जनाको चर्चा रहेको छ । जसमा प्रदेशसभाकी पूर्व उपसभामुख राधिका तामाङ, पूर्व सामाजिक विकास मन्त्रीहरु युवराज दुलाल र कुमारी मोक्तान, पार्टीका प्रदेश अध्यक्ष सरल सहयात्री, नेताहरु गंगा नारायण श्रेष्ठ, युवराज चौलागाई, प्रेमबहादुर पुलामी र युवराज चौलागाईंको नाम चर्चामा रहेको छ । पुलामीले कुनै पनि हालमा आफूलाई एउटा मन्त्रालय दिनेमा पार्टी अध्यक्ष प्रचण्डनै कन्भिन्स भएको दाबि गरेका छन् । उनी प्रदेश सभाको पूर्व सांसद समेत हुन् । माओवादी केन्द्रले ४ वटा मन्त्रालय दाबि गर्दै आएको छ ।
प्रदशे सरकारमा सबैभन्दा ठुलो दल एमालेले ५ वटा मन्त्रालय दाबि गरिरहेको बेला यसपार्टीबाट मन्त्रीको आकाक्षिको रुपमा थप ५ जनाको नाम चर्चामा रहेको छ । एमालेबाट प्रकाश श्रेष्ठ, केशवप्रसाद पोखरेल, भारती पाठक, एकालाल श्रेष्ठ, अमन कुमार मास्केलगायतको नाम चर्चामा छ । एमालेबाट जगन्नाथ थपलिया यसअघि नै आर्थिक मामिला तथा योजना मन्त्री बनिसकेका छन् भने उपसभामुखमा अप्सार चापागाईं निर्वाचित भइसकेकी छिन् ।
यस्तै राप्रपाबाट प्रदेश सरकारको मन्त्रीमा कुमारी तामाङ, राजु विष्ट, डम्बरबहादुर तामाङ, लक्ष्मी घिमिरे, राजेन्द्र प्रजापतिलगायतले आकांक्षा व्यक्त गरेका छन् । राप्रपाबाट प्रदेशको सभामुखमा भुवन कुमार पाठक निर्वाचित भइसकेका छन् भने उद्धव थापा बिना विभागीय मन्त्री बनिसकेका छन् । मन्त्रालयको टुङगो लागेसंगै थापालाई एउटा मन्त्रालयको जिम्मेवारी दिने सहमति भएको छ ।
सरकारलाई समर्थन गरेको हाम्रो नेपाली पार्टीका शैलेन्द्रमान बज्रचार्य पनि मन्त्रीको लागि तीव्र लविङमा छन् । यस्तै सरकारलाई विश्वासको मत दिएको एकीकृत समाजवादीले पनि शक्तिशालि मन्त्रालय आफूहरुले पाउनु पर्ने दाबी गरेको छ । पार्टीगत रुपमा एकीकृत समाजवादीले २ वटा मन्त्रालय दाबि गरिरहदा यो पार्टीबाट कृष्णप्रसाद शर्मा खनाल, लक्ष्मण लम्साल, बसन्तप्रसाद मानन्धर, रमा आले मगर, राजेन्द्रमान श्रेष्ठ लगायतले मन्त्री पदको लागि लभिङ गरिहेका छन् ।
बागमती प्रदेशमा कुल ११० सदस्यमध्ये कांग्रेसको ३७, एमालेको २७, माओवादी केन्द्रको २१, राप्रपाको १३, एकीकृत समाजवादीको ७, नेमकीपाको ३ र हाम्रो नेपाली पार्टीको २ जना सांसद छन् । सरकारले मन्त्रालय घटाउने तयारीको थालिको छ ।
मकवानपुर । प्रतिपक्षमा हुँदा आफैंले उठाउँदै आएको एजेण्डा आफू सत्तामा पुगेपछि पुरा गरेर देखाउने नैतिक दबाबमा अहिले बागमती प्रदेश सरकारमा रहेको एमालेले भोग्दै आएको छ ।
त्यो सवाल हो मन्त्रालयको संख्या घटाउने बारे । एकै घरको झ्याल झ्यालमा दर्जन मन्त्रालय राखेर देशैभर चर्चा पाएको बागमती प्रदेशमा यसपटक मन्त्रालयको संङ्ख्या घटाउने रस्साकस्सी चोटीलो बनेको छ ।
५ दलको सहभागीता रहेको प्रदेश सरकारमा सबैलाई मन्त्रालय पु-याउनु पर्ने दबाब र अर्थहिन मन्त्रालय घटाएर खर्च कटौति गरेर देखाउनु पर्ने सवाल छ अहिले एमालेका सामू ।
अघिल्लो सत्ता गठबन्धनले मन्त्रालय टुक्र्याएरपछि मन्त्रालय घटाउनै पर्ने बारे निरन्तर दबाब दिंदै आएको नेकपा एमाले अहिले सत्ताको सबैभन्दा ठुलो दल हो । सत्ता गठबन्धन एकाएक बदलिएपछि सत्ताको पहिलो दल बनेपछि एमाले आफैंले विगतमा भने जसरी मन्त्रालय संख्या घटाउनको लागि नैतिक दबाबमा छ ।
नव गठित सत्ता गठबन्धनबाट नेकपा मओवादी केन्द्रका संसदीय दलका नेता शालिकराम जम्कट्टेलले मुख्यमन्त्रीमा सपथ लिएकै दिन मन्त्रालय संख्या घटाउन कार्यदल नै गठन गरिएको थियो । बागमती प्रदेशमा मन्त्रालयको संख्या निर्धारण गर्न अध्ययन कार्यदल समिति गठन भएको आज सोमबार १५ औं दिन हो । अर्थात कार्यदलले प्रतिवेदन बुझाउनु पर्ने अन्तिम म्याद हो आज ।
बागमती प्रदेशको मुख्यमन्त्री शालिकराम जम्मकट्टेलले शपथग्रहणलगत्तै पहिलो निर्णय गर्दै मन्त्रालयको संख्या निर्धारण गर्न कार्यदल गठन गरेका थिए।
मुख्यमन्त्री तथा मन्त्रिपरिषद् कार्यालयका प्रमुख सचिव मुकुन्द प्रसाद निरौलाको संयोजकत्वमा जम्मकट्टेलले ५ सदस्यीय कार्यदललाई १५ दिनभित्र प्रदेशको मन्त्रालयहरुको अध्ययन गरेर संख्या निर्धारण गर्दै प्रतिवेदन बुझाउन निर्देशन दिएका थिए।
५ दलको समर्थन रहेको प्रदेश सरकारमा सत्ता गठबन्धनको ठूलो दल नेकपा एमालेले ५ वटा, नेकपा माओवादी केन्द्रले ४ वटा, एकीकृत समाजवादीले २ वटा, राप्रपाले २ वटा, हाम्रो नेपाली पार्टीले १ वटा मन्त्रालयमा दाबी गरेका छन् । यस हिसाबले पनि १४ वटै मन्त्रालयको माग दाबि देखिन्छ । मन्त्रालय संख्या घटाएर मन्त्रालयको भागबण्डा मिलाउन सौहार्दपूर्ण वातावरण बनाउनको लागि हाल शिर्ष नेताहरु लभिङको केन्द्रसँग दौडुधपमा छन् ।
हाल बागमती प्रदेशमा १४ वटा मन्त्रालय रहेको छ। सुरुवातमा ७ वटा मन्त्रालय रहेको बागमती प्रदेशको दोस्रो मुख्यमन्त्री अष्टलक्ष्मी शाक्यले सामाजिक विकास मन्त्रालयबाट स्वास्थ्य मन्त्रालयलाई विभाजन गर्दै ८ वटा पुर्याएकी थिइन्।
त्यसपछि प्रदेशको तेस्रो मुख्यमन्त्री राजेन्द्र पाण्डेले गठबन्धन दलहरुमा भागवण्डा पुर्याउन ८ मन्त्रालयलाई विभाजन गरेर १४ पुर्याएका थिए। भागबण्डा पुर्याउन मन्त्रालय विभाजन गरेपछि मुख्यमन्त्री पाण्डे र बागमती प्रदेशको देशैभरि आलोचना भयो।
उक्त समयमा मन्त्रालय विभाजन गर्न मुख्यमन्त्री पाण्डेलाई लिखित सहमति दिएका वर्तमान मुख्यमन्त्री जम्मकट्टेल अहिले कुनै पनि हालतमा मन्त्रालय घटाउनुपर्ने दबाबमा छन्।
५ दलको समर्थनमा मुख्यमन्त्री बनेका जम्मकट्टेल मन्त्रालय घटाउने दबाबसँगै भागबण्डा पुर्याउनुपर्ने दबाबमा पनि छन्। त्यसैले उनले बागमती प्रदेशको १४ मन्त्रालयलाई ११ वटामा झार्ने बताउँदै आएका छन्।
मुख्यमन्त्री जम्मकट्टेलले विभाजित मन्त्रालयहरुको काम, उनीहरुको प्रभावकारिता र औचित्यको अध्ययन गर्न गठित समिति सुझाव दिने छ ।
समितिले आज सोमबार बेलुका मात्रै मुख्यमन्त्रीलाई प्रतिवेदन बुझाउने तयारी गरेको बुझिएको छ। हालसम्मको आन्तरीक तयारी अनुसार प्रदेशमा ११ वटा मन्त्रालय कायम रहने विषयमा मुख्यमन्त्रीसहित सत्ता गठबन्धन लगभग तयार रहेको बुझिएको छ ।
मन्त्रालयको अध्ययन गर्न बनेको समिति अध्ययनको चरणमा रहदा नै मुख्यमन्त्रीसहित मन्त्रीहरुले ११ मन्त्रालय रहने अभिव्यक्ति सार्वजनिक कार्यक्रमहरुले दिंदै आएका छन् । विभिन्न दृष्टिकोणले प्रदेशको मन्त्रालयहरुको अध्ययन गरेको समितिका संयोजक मुकुन्दप्रसाद निरौला बताए ।
प्रदेश सरकारको १४ वटै मन्त्रालयहरुको विषयगत रूपमा अध्ययन गरेको निरौलाले बताए। सबै मन्त्रालयको सूक्ष्म रूपमा अध्ययन गर्दा विभाजित केही मन्त्रालयको काम राम्रो र आवश्यक भए पनि ३ वा ४ मन्त्रालय भने तत्कालको लागि आवश्यक नरहेको समितिको ठहर छ । यस अनुसार कुन कुन मन्त्रालयलाई कुन मन्त्रालयमा गाभिने वा खारेज गरिने भन्नेबारे भने प्रतिवेदनले नै सार्वजनिक गर्नेछ ।
प्रदेशको उद्योग तथा वाणिज्य मन्त्रालय, युवा तथा खेलकुद मन्त्रालय, संस्कृति तथा पर्यटन मन्त्रालय, भूमि व्यवस्था,सहकारी तथा गरिबी निवारण मन्त्रालयको काम त्यति उत्कृष्ट नदेखिएको संकेत कार्यदलले गरेको छ ।
हामीले अध्ययन गर्दा अहिले १० वटा मन्त्रालय मात्रै आवश्यक देखेका छौ। तर, मुख्यमन्त्रीसँग सल्लाह गरेर उहाँको चाहानाअनुसार १० वा ११ वटा मन्त्रालय कायम गर्न सुझाव दिन्छौ’,निरौलाले भने। उनले सरकारको निर्देशनअनुसार नै आफूहरु चल्ने भएकोले सोहीअनुसार मन्त्रालय संख्या निर्धारण गर्न सुझाव दिने बताए। तर मुख्यमन्त्री जम्मकट्टेल सहकारी मन्त्रालय नघटाउने पक्षमा देखिएका छन्।
प्रदेशमा रहेको १४ मन्त्रालयमध्ये सहकारी मन्त्रालय सबैभन्दा कम बजेट भएको मन्त्रालय हो। चालू आर्थिक वर्षमा सरकारले यो मन्त्रालयलाई २४ करोड मात्रै बजेट दिएको थियो। मुख्यमन्त्री राजेन्द्र पाण्डेले सहकारबाट बाहिरिदा १४ वटै मन्त्रालयबाट भएका कार्यप्रगतिलाई विषयगत रुपमा उल्लेख गरेर सार्वजनिक गरेका थिए।
जसमा सहकारी मन्त्रालयको काम सबैभन्दा थोरै थियो। तर,वर्तमान मुख्यमन्त्री जम्मकट्टेलले उक्त मन्त्रालय घटाउन ईच्छा नदेखाएपछि समितीले सो मन्त्रालय पनि राख्नुपर्ने सुझावसहितको प्रतिवेदन दिने संभावना रहेको समितीका एक सदस्यले बताए । समितीले अध्ययन गरेर तयार पारेको प्रतिवेदनको बारेमा सरकारका मन्त्रीहरुलाई जानकारी गराइसकिएको समिति संयोजक निरौलाले बताए ।
मकवानपुर । बागमती प्रदेश प्रमुख यादवचन्द्र शर्माले तामाङ समुदायको नयाँ वर्ष सोनाम ल्होसार २५८९ को अवसरमा शुभकामना व्यक्त गरेका छन् । प्रदेश प्रमुख शर्माले आइतबार ल्हाेसारकाे शुभकामना दिएका हुन ।
प्रदेश प्रमुख शर्माले एक सन्देश जारी गर्दै ल्हाेसार पर्वले सबै नेपालीहरुमा सुख, शान्ति र समृद्धि अभिवृद्धि हुन सकोस् भन्ने शुभकामना दिएका छन् । सोनाम ल्होसार’ तामाङ समुदायमा नयाँ वर्षको रुपमा धुमधामका साथ मनाइने पर्व भएको प्रमुख शर्माको शुभकामना सन्देशमा उल्लेख छ ।
प्रदेश प्रमुख शर्माको शुभकामनामा भनिएको छ, ‘नव वर्ष आरम्भको यस सुखद् घडीमा ल्होसार पर्व मनाउने समुदायका स्वदेश–विदेशमा रहनु हुने दाजुभाई, दिदिबहिनी तथा सम्पूर्ण नेपालीहरुप्रति सुख, शान्ति र समृद्धिका लागि हार्दिक शुभकामना व्यक्त गर्दछु ।’उनले विविधतामा एकता, सद्भाव र सामाजिक सहिष्णुता एवम् बन्धुत्व र पारस्परिक मेलमिलाप नै हाम्रो समाजको मूल चरित्र भएको बताउँदै हाम्रा यस्ता राष्ट्रिय धरोहरप्रति हामी सबैले गौरवबोध गर्न सक्नुपर्ने बताए ।
यसैगरी बागमती प्रदेशका मुख्यमन्त्री शालिकराम जम्कट्टेलले तामाङ्ग समुदायहरुको महान पर्व सोनाम ल्होछार (२८५९) का अवसरमा स्वदेश तथा विदेशमा रहनु भएका तामाङ्ग समुदायका दाजुभाई तथा दिदीबहिनीहरूमा सुख, शान्ति, समृद्धि र प्रगतिको कामना गर्दै शुभकामना दिएका छन् ।
‘मञ्जुश्री पात्रो अनुसार पहिलो महिनाको पहिलो दिन अर्थात् नयाँ वर्ष २८५९ ( खरायो वर्ष) शुरुवातको दिन माघ शुक्ल प्रतिपदादेखि मनाईने सोनाम ल्होछार पर्वमा कूल पूजा, प्रकृति पूजा, बुद्धको पूजा गर्ने एवम् आपसमा भेला भई नाचगान गर्दै हर्षोल्लासका साथ मनाउने प्रचलन रहिआएको छ’ साेनाम ल्हाेसारकाे अवसरमा आइतबार मुख्यमन्त्री जम्कट्टेलले शुभकामना सन्देश जारी गर्दै भनेका छन् ‘नेपाल राष्ट्रको पहिचान र अमूल्य निधिको रुपमा रहेका यस किसिमका मौलिक संस्कृतिको संरक्षण तथा सम्बर्द्धन गर्ने प्रमुख दायित्व राज्यको रहेको हुँदा यस तर्फ तीनै तहका सरकारको ध्यान जाने विश्वास समेत गरेको छौं ।’
‘विशेष गरी तामाङ्ग जातिहरुको बाहुल्यता रहेको बागमती प्रदेश भित्र तामाङ्ग समुदायले यस पर्वलाइ नयाँ वर्षको रुपमा मनाइरहँदा यस पर्वले विशिष्टिकृत सांस्कृतिक पहिचान स्थापित गरेको र परम्परागत मुल्य मान्यता प्राप्त गरेको महशुस गरेका छौं’ उनले सन्देशमा भनेका छन् । ‘प्रदेश भित्र बसोबास गर्ने जात जातिका संस्कृतिहरुको संरक्षण तथा प्रवर्द्धन गर्दै पर्यटन विकासका लागि संस्कृतिको जगेर्ना गर्नका लागि आवश्यक सहयोग गर्न बागमती प्रदेश सरकार सदैव तयार रहने विश्वास समेत दिलाउन चाहन्छौं’ उनले भने ।
सोनाम ल्होछार पर्वले हामी बिच आत्मीयता, आपसी समझदारी, एकता, सामाजिक सद्भाव कायम गर्दै देशको समृद्धि एवं अमन चयन कायम गर्ने वातावरण निर्माण भै समृद्ध नेपाल र समुन्नत बागमती प्रदेश निर्माण गर्ने तर्फ उत्प्रेरणा मिलोस भन्ने कामना गर्दै यस पर्वले सबै नेपाली बिच सामाजिक एकता सुदृढ गर्दै उत्साह र उमङ्गका साथ देशमा शान्ति सद्भाव र धार्मिक सहिष्णुता कायम गरी लोककल्याणकारी राज्य स्थापन गर्दै समृद्ध नेपाल, समुन्नत बागमती प्रदेश निर्माण गर्ने लक्ष्य हासिल गर्न हामी सबै नेपाली एकताबद्ध भई अघि बढ्न प्रेरणा प्रदान गर्नेछ भन्ने अपेक्षा राख्दै शुभकामना व्यक्त गर्दछु मुख्यमन्त्री जम्कट्टेलले जारी गरेकाे शुभकामना सन्देशमा भनिएकाे छ ।


