मकवानपुर । बामगती प्रदेश सरकारले ल्याएकाे आगामी आर्थिक वर्ष २०८०/०८१ को बजेट बागमती प्रदेशसभाबाट बहुमतले पारित भएको छ । प्रदेशसभाको बिहीबारको बैठकले बजेट बहुमतले पारित गरेको हो ।
प्रदेशसभामा प्रतिनिधित्व गर्ने विपक्षी दलहरुको असहमतिका बीच सत्तारुढ दलका बहुमत सदस्यहरुको समर्थनमा सरकारको विनियोजन विधेयक र आर्थिक विधेयक बहुमतले पारित भएको हाे । गत असार १ गते बागमती प्रदेश सरकारकाे तर्फबाट आर्थिक याेजना मन्त्री बहादुर सिं लामाले ६२ अर्ब ७० करोड ९० लाखको बजेट प्रदेश सभमा प्रस्तुत गरेका थियो ।
प्रदेशसभामा गत असार १२ गतेदेखि बजेटमाथि छलफल सुरु भए पनि प्रतिपक्षको अबरुद्धका कारण १७ गतेबाटमात्रै छलफल सुरु भएको थियो । बजेटमाथिको छलफलमा ५४ जना प्रदेशसभाका सासंदले भाग लिएका थिए भने ९ जना सासंदहरुले संसोधन प्रस्ताव दर्ता गराएका थिए । बजेटमाथि उठेका प्रश्नको विषयगत मन्त्रीहरु र मुख्यमन्त्रीले जवाफ दिए पछि पारितकालाई सभामा प्रस्तुत हुँदा बहुमतले पारित भएकाे हाे ।
सरकारको नेतृत्व गरिरहेको नेकपा माओवादी केन्द्र, सत्ता साझेदार दल नेपाली कांग्रेस, नेकपा एकीकृत समाजवादी पार्टी र हाम्रो नेपाली पार्टीका ६७ जना सांसदहरु बजेटको पक्षमा रहेदै बजेट बहुमतले पारित भएकाे हाे । यस्तै नेकपा एमाले, राप्रपा र नेमकिपासहितका ४३ सांसदहरु बजेटकाे विपक्षमा रहेका उभिएका थिए ।
सरकारले एक पक्षीय रुपमा बजेट विनियोजन गरेको साथै बजेट वितरण असमान गरेको भन्दै प्रमुख प्रतिपक्ष दल एमाले सहित राप्रपा र नेपाल मजदुर किसान पार्टीले भन्दै प्रतिपक्ष दलले संसद अवरोध गर्दै आएको थिए । प्रदेश सरकारले प्रतिपक्षी दलहरुको योजनालाई समावेश गर्ने प्रतिवद्धता जनाए पछि प्रदेशसभाको अवरोध हटेकाे थियाे । सत्ता पक्षले प्रतिपक्षी दलहरुका योजनालाई पनि समोवश गर्ने सहमति छलफलबाट भए पछि बजेटमाथिकाे छलफल १७ गतेबाट सुरु भएकाे थियाे ।
प्रदेश सरकारकाे बजेट पारित भएसँगै बागमती प्रदेश सभाकाे बैठक अर्काे सूचना जारी नभएसम्मकाे लागि सभामुख भुवन कुमार पाठकले स्थगित गरेका छन् ।
काठमाडाैँ । राष्ट्रिय परीक्षा बोर्ड मातहतको परीक्षा नियन्त्रण कार्यालयले विसं २०७९ को माध्यमिक शिक्षा परीक्षा (एसइई) कक्षा १० को परीक्षाफल प्रकाशित गरेको छ ।
राष्ट्रिय परीक्षा बोर्डका अध्यक्ष डा महाश्रम शर्मासहितको उपस्थितिमा भक्तपुरस्थित कार्यालयमा आज बसेको बोर्डको बैठकले परीक्षाफल प्रकाशित गर्ने निर्णय गरेको थियाे । बोर्डले यसवर्ष अन्तिम पटकका लागि २०७२ सालको पद्धतिअनुसार नै सैद्धान्तिक र प्रयोगात्मकको अङ्क जोडेर परीक्षाफल प्रकाशित गरेको छ ।
विसं २०७२ को पद्धतिअनुसार ९० देखि १०० प्रतिशत प्राप्ताङ्क हुनेलाई ए प्लस, ८० देखि ९० भन्दा कम प्राप्ताकङ्क हुनेलाई ए, ७० देखि ८० भन्दा कम प्राप्ताङ्क हुनेलाई बी प्लस ग्रेड प्रदान गरिन्छ । साथै ६० देखि ७० भन्दा कम प्राप्ताङ्क हुनेलाई बी, ५० देखि ६० भन्दा कम प्राप्ताङ्क हुनेलाई सी प्लस, ४० देखि ५० भन्दा कम प्राप्ताङ्क हुनेलाई सी, ३० देखि ४० भन्दा कम प्राप्ताङ्क हुनेलाई डी प्लस, २० देखि ३० प्राप्ताङ्क हुनेलाई डी तथा २० भन्दा कम प्राप्ताङ्क हुनेलाई ई ग्रेड प्रदान गरिन्छ ।
गत चैत १७ गतेदेखि २९ गतेसम्म देशभरका दुई हजार ३७ परीक्षा केन्द्रमा सञ्चालित परीक्षामा सामुदायिक र संस्थागत विद्यालयका साधारणतर्फ कूल चार लाख ८५ हजार तीन सय ९६ विद्यार्थीको सहभागिता रहेको थियो । परीक्षामा दुई लाख ४२ हजार सात सय १२ जना छात्रा र दुई लाख ४२ हजार छ सय ७४ जना छात्रले भाग लिएको बोर्डको भनाइ छ । बोर्डका अनुसार प्राविधिक धारतर्फ १५ हजार चार सय ६१ जना परीक्षार्थी थिए ।
विद्यालय शिक्षाको लागि सबैभन्दा महत्त्वपूर्ण मानिदै आएको यो परिक्षाको लागि मकवानपुरबाट ६ हजार ३३३ जना विद्यार्थी सहभागी भएका थिए । यसैगरी बागमती प्रदेशभित्रका १३ वटा जिल्लाहरूको गरी १ लाख १ हजार ७३३ जना विद्यार्थी सहभागी हुने भएका थिए ।
काठमाडौ । विगत केही दिनयता सामान्य रूपमा चलिरहेको नेपालको राजनीति बुधबारदेखि पुनः तरंगित बनेको छ । प्रधानमन्त्री पुष्पकमल दाहाल ‘प्रचण्ड’ले सोमबार राजधानीमा आयोजित एक कार्यक्रममा प्रधानमन्त्री दाहालले आफूलाई प्रधानमन्त्री बनाउन भारतीय नागरिक प्रितम सिंह पटकपटक दिल्ली गएको भनी दिएको अभिव्यक्तिपछि नेपालको राजनीति अहिले तरंगित बनेको हो ।
प्रधानमन्त्रीले बोलेका भनाइलाई लिएर प्रमुख विपक्षी दल नेकपा एमालेले उनको राजीनामासमेत माग गरेको छ । प्रधानमन्त्री दाहालको भनाइलाई लिएर एमालेले प्रतिनिधिसभा र राष्ट्रिय सभाको बुधबारको बैठक अवरोध गर्दा प्रतिनिधिसभाको अर्काे बैठक शुक्रबार र राष्ट्रिय सभाको बैठक बिहीबार बस्नेगरी स्थगित गरिएको छ ।
उनको यस अभिव्यक्ति दाहाललाई सत्ताच्युत गराउन प्रमुख विपक्षी एमालेलाई राम्रो मसलासमेत बन्ने निश्चितप्रायः छ । एमाले अध्यक्ष केपी शर्मा ओलीले प्रधानमन्त्री दाहालको यो पछिल्लो भनाइको चर्काे विरोध गरेका छन् । प्रधानमन्त्री दाहालले यस’बारे जवाफ दिएर मात्रै नहुने, राजीनामा नै दिनुपर्ने ओलीको भनाइ छ ।
बुधबार संसद् भवनबाट बाहिरिँदै गर्दा सञ्चारकर्मीले सोधेको प्रश्नको जवाफ दिँदै ओलीले प्रधानमन्त्री दाहालको अभिव्यक्ति राष्ट्रिय स्वाभिमान र स्वाधीनता गिराउने खालको अशोभनीय रहेको टिप्पणी गरे । ‘प्रधानमन्त्रीको भनाइ राष्ट्रिय स्वाभिमान र स्वाधीनता गिराउने खालको अशोभनीय र आपत्तिजनक रह्यो,’ एमाले अध्यक्ष ओलीले भने, ‘हामीलाई जवाफ होइन, राजीनामा चाहिन्छ, प्रधानमन्त्रीले राम्रो काम त गर्दै गर्नुभएन, नराम्रो गर्दैगर्दै आएर अब त राष्ट्रिय स्वाभिमान र स्वाधीनताको प्रश्नमाथि, संविधानमाथि, संसद्माथि घोर अपमान हुने यस्तो खालको अभिव्यक्ति दिनुभयो, जसले गर्दा उहाँले राजीनामा गर्नु आवश्यक छ ।’
बुधबारको दुवै संसद्का बैठकमा पनि एमालेका सांसदहरू प्रधानमन्त्री दाहालको भनाइलाई लिएर खनिए । एमालेका प्रतिनिधिसभा सदस्य रघुजी पन्तले प्रधानमन्त्री दाहाललाई लेन्डुप दोर्जेको नेपाली संकरणको उपाधिसमेत दिन भ्याएका छन् । ‘आज बादल लागेको छ, तर अहिले मौसम मात्रै उदास छैन, नेपालीहरूको मनमा पनि बादल लागेको छ, सम्माननीय प्रधानमन्त्री पनि नभनुँ कि जस्तो लाग्छ, नेपालको प्रधानमन्त्री बनाउन नेपालतिर जाने कि दिल्लीतिर जाने ?’
प्रधानमन्त्री दाहालले आफूलाई दिल्लीले प्रधानमन्त्री बनाउन भूमिका खेलेको विवादित अभिव्यक्ति दिएको विरोधमा एमालेसहितका दलहरूले संसद् बैठक अवरोध गरेपछि सभामुख देवराज घिमिरेले बैठक आधा घण्टालाई स्थगित गरेका थिए । तर, स्थगित बैठक शुक्रबार मात्रै बस्नेगरी बोलाइएको छ ।
बुधबार आधा घण्टापछि बस्नेगरी स्थगित भएको प्रतिनिधिसभाको बैठक विशेष कारणले निर्धारित समयमा बस्न नसक्ने भएकाले प्रतिनिधिसभा नियमावली, २०७९ को नियम ६ को उपनियम (३) बमोजिम सम्माननीय सभामुखज्यूले सभाको अर्को बैठक भोलि शुक्रबार २२ असार २०८० मा दिनको ३ः०० बजे बस्नेगरी निर्धारण गरेको सूचना संसद् सचिवालयद्वारा प्रकाशित गरिएको थियो ।
उता, बुधबार राष्ट्रिय सभा बैठक सुरु हुने बित्तिकै राष्ट्रिय सभाका एमाले संसदीय दलका नेता देवेन्द्र दाहालले प्रधानमन्त्री दाहालले व्यवसायी प्रितम सिंहको पुस्तक विमोचन गर्नेक्रममा दिएको अभिव्यक्तिप्रति आपत्ति जनाउँदै तत्काल राजीनामा माग गरेका थिए । आफूहरूको माग पूरा नभएसम्म संसद् बैठक चल्न नदिने अडान एमाले नेता दाहालले राखेका थिए । उनले प्रधानमन्त्रीले आफू व्यवसायी सिंहको प्रयासमा भारतको इसारामा प्रधानमन्त्री बनेको अभिव्यक्ति दिएकाले त्यस्तो प्रधानमन्त्री आफ्नो पार्टीलाई स्वीकार्य नहुने पटकपटक दोहो-याएका थिए ।
‘हाम्रो देशका सम्माननीय प्रधानमन्त्रीको अभिव्यक्तिलाई लिएर देशव्यापी कौतुहलता जागेको छ, हाम्रो देशको प्रधानमन्त्री कसले नियुक्त गर्छ ? कसको इसारामा हुन्छ ? प्रधानमन्त्रीजीले प्रितम सिंह मलाई प्रधानमन्त्री बनाउन पटकपटक दिल्ली गएको भन्नुभएको छ, दिल्लीमा राजनीतिक वातावरण बनाएको बताउनुभएको छ, यो कुरा नेपालका लागि शीर निहु¥याउने विषय हो, उहाँ स्वयंले यो कुरा अभिव्यक्त गर्दा लज्जित भएका छौं, हामीलाई लज्जाबोध भएको छ, हामी कुन देशका नागरिक हौँ ? हामीले हाम्रो देशको प्रधानमन्त्री बनाउँदा यस देशका सार्वभौमसत्ता सम्पन्न संसद्ले बनाउँछ कि भारतको इसारामा, दिल्लीको इसारामा बन्छ ?’ राष्ट्रिय सभाका एमाले संसदीय दलका नेता दाहालले भने, ‘यसरी भारतको इसारामा बन्ने प्रधानमन्त्री हामीलाई ग्राह्य छैन, त्यस्ता प्रधानमन्त्री हामीलाई स्वीकार्य छैन ।’
त्यसो त सरकारकै प्रमुख घटक नेपाली कांग्रेसले समेत प्रधानमन्त्रीको भनाइप्रति आपत्ति जनाएको छ । नेपाली कांग्रेसका महामन्त्री विश्वप्रकाश शर्माले प्रधानमन्त्रीको अभिव्यक्ति गलत र आलोचनायोग्य रहेको बताएका छन् । संसद् भवन परिसरमा सञ्चारकर्मीहरूसँग कुरा गर्दै महामन्त्री शर्माले प्रधानमन्त्रीले संसद्को सम्मान गर्नसक्नुपर्ने बताए ।
‘संसद्को सम्मान र नेपालको राष्ट्रिय सम्मान अभिवृद्धि गर्ने काम प्रधानमन्त्रीले गर्नुपर्छ, प्रधानमन्त्रीले हिजो जे बोल्नुभयो, त्यो आलोचनाका लागि योग्य छ, उहाँले गलत बोल्नुभएको छ,’ उनले भने ।
सत्तारूढ नेपाली कांग्रेसका सांसद उदयशमशेर राणाले पनि प्रधानमन्त्री दाहालले भारतीय नागरिक प्रितम सिंह’बारे दिएको अभिव्यक्ति गलत रहेको बताएका छन् । प्रधानमन्त्रीले भारतीय नागरिक सिंहले आफूलाई प्रधानमन्त्री बनाउन भारतमा गएर पटकपटक पहल गरेको भन्ने अभिव्यक्ति बोल्न मिल्ने खालको नभएको उनको भनाइ थियो ।
संघीय संसद् भवन परिसरमा सञ्चारकर्मीका जिज्ञासाको जवाफ दिने क्रममा सांसद राणाले प्रधानमन्त्रीले यस सम्बन्धमा संसदमा स्पष्टीकरण दिनुपर्ने मागसमेत गरेका छन् । एमालेसहितका विपक्षी दलहरूले त्यसप्रति आपत्ति जनाएपछि प्रधानमन्त्रीले संसद्मा उभिएर त्यस’bout स्पष्ट पार्नुपर्ने भन्दै उनले भने, ‘यस सन्दर्भमा प्रधानमन्त्रीजीले पुस्तक विमोचन गर्ने बेला केही कुरा बोल्नुभएको थियो, त्यसमा उहाँहरूले आपत्ति जनाउनुभयो, अब प्रधानमन्त्रीले हाउसमा आएर स्पष्ट बनाइदिनुपर्छ ।’
प्रधानमन्त्री दाहालले भने सञ्चारमाध्यममा आएको जस्तो अभिव्यक्ति नदिएको प्रष्टीकरण दिएका छन् । बुधबार माओवादी भ्रातृ संगठन अनेरास्ववियुको कार्यक्रममा उनले आफूले त्यस किसिमको अभिव्यक्ति नै नदिएको दाबी गरेका छन् ।
प्रधानमन्त्री दाहालले कार्यक्रममा प्रितम सिंहले बोलेको कुरा आफूले बोलेको भएता पनि त्यही अभिव्यक्तिलाई लिएर बबन्डर मच्चाउन खोजिएको आरोप लगाए ।
त्यसो त माओवादीका अरू नेताहरू पनि प्रधानमन्त्रीको अभिव्यक्तिको बचाउमा उत्रिएका छन् । उपप्रधानमन्त्री नारायणकाजी श्रेष्ठले बुधबार सञ्चारकर्मीसँग प्रधानमन्त्री हुन भारत जानुपर्छ भनेर प्रधानमन्त्री दाहालले भन्नुभएको नदेखिएको बताए । ‘कुनै व्यक्तिले आफ्नो सोचअनुसार भारतलाई पनि मिलाइदिनुपर्छ कि क्या हो भनेर दौडनुभयो भने त्यो उहाँहरूको कुरा हो, प्रधानमन्त्रीले मलाई प्रधानमन्त्री बनाउन भारत पठाएँ र भारतको सहयोग भएर म प्रधानमन्त्री भएँ भन्नुभएको छैन, हाम्रो प्रधानमन्त्री नेपालको संसद्ले निर्वाचित गरेको प्रधानमन्त्री हो ।’ उपप्रधान तथा गृहमन्त्री श्रेष्ठले यस सम्बन्ध प्रधानमन्त्रीले प्रस्ट पार्ने बताए । राजधानी दैनिकबाट
- कृष्णदेव भण्डारी
केही दिन पछि २०७९ को माध्यमिक शिक्षा परीक्षा (एसईई) को परीक्षाफल प्रकाशित हुदैछ । एसईई परीक्षामा केही विद्यार्थीहरूले उत्कृष्ट अङ्क प्राप्त गरी लेटर ग्रेडिङ्गमा A वा A+ हासिल गर्दछन भने, धेरै परीक्षार्थीहरू अपेक्षाकृत कम अङ्क प्राप्त गरी पछिल्लो ग्रेडिङमा उत्तीर्ण हुन्छन् । उत्कृष्ट अङ्क प्राप्त गर्ने विद्यार्थीहरू अति उत्साहित हुनु जरुरी छैन र अपेक्षाकृत कम अङ्क प्राप्त गर्ने विद्यार्थीहरू हतोत्साही पनि हुनुहुँदैन । हरेक वर्ष कति विद्यार्थीहरू परीक्षाफलको डरले परीक्षाफल प्रकाशित हुनुपूर्व र कतिले परीक्षाफल प्रकाशित भएपश्चात आत्महत्या गर्ने गर्दछन्। यो लेखकाे आशय यसवर्ष त्यस्ता अप्रिय, दुःखदायी घटनाहरू नहोउन भन्ने रहेकाे छ ।
पहिलो कुरा त, एसईई परीक्षा जीवनको अन्तिम परीक्षा होइन, यो त परीक्षाहरूको आरम्भ हो। शुरुआतमै हार स्वीकार्नु कायरता हो। हामीले जीवनमा साहसी र आत्मविश्वासी हुनुपर्छ । के फुटबलको कुनै टिम पहिलो हाफमा ३–० ले पछाडि पर्यो भने त्यो टिम दोस्रो हाफमा भाग नलिई बाइ दिन्छ र? त्यसो भएको छैन र हुँदैन पनि। अन्तमा, त्यो टिम ४–३ ले विजयी हुन सक्छ । खेलमा यस्ता धेरै दृष्टानतहरू छन। सास रहेसम्म आस रहन्छ भनेझै हामीले निरन्तर प्रयास गरिरहनुपर्छ। आत्मविश्वास, साहस, कामप्रति लगाव भएमा हामी सबै सफल हुन सक्छौ। त्यसैले पूरा म्याच खेलौ, बिचमा आत्मसमर्पण गरेर कायरता प्रदर्शन नगरौं ।
अर्को कुरा, शैक्षिक संस्थाहरूबाट शैक्षिक योग्यताको प्रमाणपत्र हासिल गर्नको लागि संचालन गरिने परीक्षा नै सबथोक होइन । यो जीवनको एउटा पाटो मात्र हो। विद्यालय वा विश्वविद्यालयहरूबाट प्राप्त प्रमाणपत्रले स्वाभाविकरूपमा अन्य अवसरका ढोकाहरू खोल्दछन्। तथापि शैक्षिक संस्थाहरूले लिने परीक्षामा कम उपलब्धी हासिल हुनु भनेको जीवन सकिनु होइनस जीवनले नयाँ मोड लिनु हो, जसले मानिसलाई सफलताको नयाँ उचाइमा पुर्याउन सक्छ । त्यसैले सदा आशावादी बनौं, जीवनरूपी रथलाई कुशलतापूर्वक अगाडि बढाऔ।
दिनेशराज पन्त भाषा तथा संस्कृतिविद, इतिहासविद, पूर्णिमा पत्रिकाका सम्पदक तथा ७ सय भन्दा बढी सोधपत्रका लेखक हुन् । उनले तीनवटा विश्वविद्यालयमा प्राध्यापनसमेत गरेका छन् । अध्ययन मोहका कारणले औपचारिक शिक्षाविना नै उनले देश र समाजको लागि विशिष्ट योगदान गर्न सफल भएका छन्।
विद्यार्थीहरूले कक्षाका अन्य साथीहरूसङ्ग तुलना गरेर दु:ख मान्ने र डिप्रेसनमा जानेसम्म हुनसक्छ । संसारका सबै व्यक्तिहरु अद्वितीय (unique) हुन्छन् । हरेक व्यक्तिमा फरकफरक क्षमता हुन्छ । व्यक्तिले आफ्नो अन्तरनीहित क्षमताको पहिचान गरी त्यसको विकासमा केन्द्रित हुनुपर्छ । अर्कोसङ्ग तुलना गर्ने र प्रतिस्पर्धा गर्ने मनोविज्ञानबाट बाहिर आएर आफ्नै बिगतसङ्ग तुलना गरेर आजको आफूसँग प्रतिस्पर्धा गरी भोलि अझ राम्रो गर्ने अठोट लिएर अघि बढेमा समाजलाई विशिष्ट योगदान गर्दै आफ्नो रुचिको विषयमा उत्कृष्ट हुन सकिन्छ।
विद्यालय शिक्षा पुरा नगरेका घनश्याम दास बिर्ला सफल व्यापारी हुन। उनले व्यापार र शिक्षामा योगदान गरेकाले उनी भारतकै दोस्रो उच्च नागरिक सम्मान पद्म विभुषणबाट सम्मानित भएका थिए । त्यसैगरी विश्वका अग्रणी सफल व्यक्तित्वहरू गौतम अडानी, मार्क जुकरबर्ग, स्टिभ जब्स र बिल गेट्सहरूले विश्वविद्यालयको प्रमाणपत्रविना नै आ-आफ्नो क्षेत्रमा उत्कृष्ट काम गरेर विश्वप्रसिद्ध भएको यथार्थ हाम्रो सामु छ।
औपचारिक शिक्षा ग्रहण नगरेका दिनेशराज पन्त भाषा तथा संस्कृतिविद, इतिहासविद, पूर्णिमा पत्रिकाका सम्पदक तथा ७ सय भन्दा बढी सोधपत्रका लेखक हुन् । उनले तीनवटा विश्वविद्यालयमा प्राध्यापनसमेत गरेका छन् । अध्ययन मोहका कारणले औपचारिक शिक्षाविना नै उनले देश र समाजको लागि विशिष्ट योगदान गर्न सफल भएका छन्।
तसर्थ एसईई परीक्षाफलमा जस्तो नतिजा प्राप्त भएपनि पुस्तक अध्ययन गर्ने बानीको विकास गरी आफ्नो रुचिको विषयसँग सम्बन्धित धेरैभन्दा धेरै पुस्तकहरू अध्ययन गर्नुहोस । जुन तपाईंको ज्ञानको दायरा फराकिलो बनाएर अपेक्षित सफलता हासिल गर्न सहयोगी सिद्ध हुन्छ। आत्मविश्वास, साहस, दृढईच्छाशक्ति, अध्ययनशीलता र निरन्तरतालाई मूलमन्त्र बनाएर जीवनमा सफल हुन सक्नुहोस्, सम्पूर्ण विद्यार्थी भाइबहिनीहरूलाई शुभकामना ।
मकवानपुर हेटौंडा १७ का भण्डारी शैक्षिक क्षेत्रमा आवद्ध व्यक्ति हुन् ।
मकवानपुर । नेपाल सरकारले संघीय निजामती सेवा ऐन हालसम्म ल्याउन नसकेको अवस्थामा बागमती प्रदेश सरकारले प्रदेश निजामति ऐन बनाएर कार्यान्वयनमा ल्याएको छ ।
बागमती प्रदेश मन्त्री परिषदको आज बसेको बैठकले उक्त ऐन कार्यान्वयमा ल्याएको हो । बागमती प्रदेश सरकारले पहिलो पटक प्रदेश निजामती सेवा ऐन, २०७९ को कार्यान्वयनमा ल्याउँदै ऐनको दफा १५ को उपदफा १ बमोजिम दुइ जनालाई सेवामा बढुवा गरेको छ । आजको मन्त्री परिषदको बैठकले प्रदेश सरकार अन्तरगत कार्यरत डा. चन्द्रप्रसाद लुइँटेल र पूर्णबहादुर दर्जीलाई प्रदेश प्रशासन सेवा, एघारौं तहमा बढुवा गरेको छ ।
यससँगै बैठकले ४ वटा महत्वपूर्ण निर्णय गरेको छ । पर्यटन उद्योग तथा सहकारी मन्त्रालय अन्तर्गतको पर्यटन विकास आयोजना, हेटौंडा र पर्यटन विकास आयोजना, इकाई कार्यालय, काठमाडौँको २०८० श्रावणदेखि २०८२ आषाढ मसान्तसम्म २ वर्षको लागि म्याद थप्ने निर्णय गरेको छ ।
यसैगरी प्रदेशको दोलखा जिल्लाको जिरी नगरपालिकामा सञ्चालन हुने मानवनिर्मित पर्यटकीय ताल निर्माण आयोजनाका लागि सो नगरपालिकामा जग्गा प्राप्ति ऐन २०३४ को उपदफा क बमोजिम करिब ५४१ दशमलब २३ रोपनी व्यक्तिगत जग्गा प्राप्ति गर्न जलस्रोत तथा सिंचाइ विकास डिभिजन कार्यालय दोलखाका प्रमुखलाई जग्गा प्राप्ति सम्बन्धि प्रारम्भिक कारबाही चलाउन जिम्मेवारी तोकिएको छ । प्रदेश सरकारका प्रवक्त तथा आन्तरीक मामिला मन्त्री गंगानारायण श्रेष्ठले बताए । यसैगरी बजेटमा असमानता भएकोमा विरोध जनाउँदै आएको प्रदेश सरकारको प्रमुख प्रतिपक्षीलगायत प्रतिपक्षीहरूसँग सहमति भए अनुसार प्रतिपक्षीहरूको छुट्न गएका योजनाहरू समावेश गर्ने निर्णय पनि भएको श्रेष्ठले बताए ।
