मकवानपुर । मकवानपुरगढी गाउँपालिकाले वडास्तरमै सामाजिक सुरक्षा भत्ता बापतको रकम वितरण गरेपछि ज्येष्ठ नागरिक खुशी भएका छन् । ८ वटा वडा रहेकाे गढी गाउँपालिकाले माघ ४ गतेबाट वडास्तरमै सासु भत्ता वितरण थालेकाे हाे ।
गाउँपालिकाकाे वडा नम्बर – ८ मा गत माघ ४ गते र वडा नम्बर- १ मा विहीबार वडा स्तरबाट भत्ता वितरणको काम भएकाे गाउँपालिका अध्यक्ष दोर्जे लामा स्याङ्तानले बताए । वडा नम्बर १ मा घुम्ति शिविर मार्फत सामाजिक सुरक्षा भत्ता वितरण गरिएको हो । गाउँपालिका अध्यक्ष स्याङ्तान र वडा अध्यक्ष आईत सिह लोले वडास्तरमै सासु भत्ता वितरण गरेसँगै जेष्ठ नागरिकमा उत्साह छाएकाे छ ।
गाउँपालिकाको केन्द्रमा रहेकाे बैंकसम्म आवतजावत गर्न जेष्ठ तथा अशक्त नागरिकलाई समस्या भएपछि भौगोलिक रुपमा टाढा र बिकट रहेकाे गाउँपालिकाकाे वडास्तरबाटै सामाजिक सुरक्षा भत्ता वितरण गरी लाभग्राहीलाई सेवा दिने सुरुवात गरिएकाे स्याङ्तानले जानकारी दिए । वडा नम्बर १ मा भएकाे सासु भत्ता वितरण मार्फत १ सय ८३ जना लाभग्राहीहरुले भत्ता रकम बुझेको पञ्जिकरण शाखा प्रमुख रघुनाथ हुमागाईले बताए ।वडामा २ सय ३ जना सासु भत्ताकाे रकम पाउने लाभग्राही रहेकाे हुमागाईंले जानकारी दिए ।
गाउँपालिका अन्तरगतका विकट र दुर्गममा रहेकाले वडाहरुलाई प्राथिमकतामा राखेर वडाबाटै भत्ता वितरण गर्न लागेकोमा २०८० साल भित्रै सबै वडा स्तरबाट वितरण गरिने योजना रहेकाे हुमागाँईले बताए ।
चितवन। मैयाँदेवी स्मृति राष्ट्रिय महिला यू–१९ क्रिकेट प्रतियोगिताको उपाधि बागमती प्रदेशले हात पारेकाे छ । उपाधि भिडन्तमा शुक्रबार गण्डकी प्रदेशलाई हराउँदै बागमती च्याम्पियन बनेको हो ।
प्रतियाेगिताकाे विजेतासँगै बागमतीले १ लाख ७९ हजार ७ सय ५ रुपैयाँ र उपविजेता गण्डकीले ९५ हजार ७ सय ५ रुपैयाँ हात पारेको छ ।फाइनलमा बागमतीले गण्डकी प्रदेशलाई ६ विकेटले पराजित गरेको हो । विजयनगरस्थित गौतमवुद्ध अन्तर्राष्ट्रिय क्रिकेट रंगशालाको नमूना मैदानमा गण्डकीले दिएको ८५ रनको लक्ष्य बागमतीले १८ ओभरमा ४ विकेट गुमाएर भेट्टायो ।
बागमतीको जितमा कप्तान सोनी पाख्रिनले २० रन बनाईन् । सोनीले २३ बलमा २ चौका प्रहार गरिन् । सेविका यादवले २० तथा एलिसा खड्काले १५ रन जोडे । गण्डकीकी सीमाना केसीले एक विकेट लिईन् । त्यसअघि टस जितेर पहिलो ब्याटिङ रोजेको गण्डकीले निर्धारित २० ओभरमा ५ विकेट गुमाउँदै ८४ रन जोडेको थियो । गण्डकीकी ज्योत्स्निका मरासिनीले ३७ र सीमाना केसीले २१ रन बनाए । बागमतीकी विपिशा शाही र मनिषा उपाध्यायले एक– एक विकेट लिए ।
गण्डकीकी अलराउण्डर सीमाना केसी प्लेयर अफ दि टुर्नामेन्ट भईन् । सुदुरपश्चिमकी सावित्री धामी उत्कृष्ट ब्याटर तथा गण्डकीकी निरु जिटी प्रतियोगिताभर उत्कृष्ट बलर बनिन् । नेपाल लोकतान्त्रिक खेलकुद संघको आयोजनामा सम्पन्न प्रतियोगितामा सातै प्रदेशले सहभागिता जनाएका थिए ।
मकवानपुर । मकवानपुरकाे हेटौडामा जारी स्थानीय तह शहीद स्मृती गोल्डकपमा धनकुटाको राजारानी क्लब क्वार्टरफाइनलमा प्रवेश गरेको छ। छैटौँ सस्करणकाे प्रतियाेगिता अन्तरगत शुक्रबारकाे खेलबाट नेपाल पुलिस क्लबलाई २-० ले पाखा लगाउँदै राजारानीले क्वार्टरफाइनल स्थान बनाएकाे हाे ।
पहिलो हाफ गोलरहित बराबरीमा सकिएको खेलको ५३ औं मिनेटमा विदेशी खेलाडी अजायी मार्टिन्सको गोलबाट राजारानीले अग्रता लिएको थियो। खेलकाे ६४ औं मिनेटमा सुशिल लामाले गोल गर्दै राजारानीकाे अग्रता दोब्बर गरे । खेलकाे म्यानअफ दि म्याच राजारानीका मार्टिन्स घाेषित भए ।
यसैगरी, शनिबार हुने खेलमा न्यूरोड टिम एनआरटी र चर्च ब्वाइज क्लब भिड्नेछन्। यही माघ २७ गतेसम्म सञ्चालन हुने प्रतियोगिताको विजेताले १५ लाख रुपैयाँ पुरस्कार प्राप्त गर्नेछ। उपविजेताले दश लाख रुपैयाँ तथा सर्वोत्कृष्ट खेलाडीले बुलेट बाइक प्राप्त गर्नेछन्। यस्तै विधागत उत्कृष्ट खेलाडी तथा प्रशिक्षकले जनही २५/२५ हजार रुपैयाँसहित ट्रफी प्राप्त गर्नेछन्।
मकवानपुर जिल्ला फुटबल संघकाे आयोजनामा बागमती प्रदेश खेलकुद विकास परिषद्, सामाजिक विकास मन्त्रालय, हेटौँडा उपमहानगरपालिकासहित मकवानपुरका १० वटै स्थानीय तहको सहयोगमा प्रतियोगिता भएकाे हाे ।
प्रतियाेगितामा एक विदेशी क्लब, नेपालमा रहेका ८ वटा ए डिभिजन फुटबल क्लब, आयोजक टोली सहित मोफसलका तीन गरी १२ वटा टोेलीको सहभागिता रहेको छ । गोल्डकपकाे पाँचौँ संस्करणको उपाधि मनाङ मर्स्याङ्दी क्लबले हात पारेकाे थियो।
मकवानपुर । साहित्यकार सरुभक्तलाई भीमदर्शन मुक्तक पुरस्कार प्रदान गरिएको छ । नेपाल मुक्तक प्रतिष्ठान काठमाडौले शुक्रबार मुक्तक दिवसको अवसरमा ५१ हजार रुपैयाँको उक्त पुरस्कार प्रदान गरेको हो।
यस्तै दिवसको अबसर मै अनुराधा ढकालको ‘आरब्ध’ मुक्तक कृतिलाई ३१ हजार रुपैयाँसहित ‘कृष्ण-रत्न-चेतन मुक्तक पुरस्कार’बाट सम्मानित गरिएको छ । २०७९ सालभरि प्रकाशित नेपाली मुक्तककृतिमध्ये उत्कृष्ट ठहरिएको ढकालको ‘आरब्ध’लाई उक्त सम्मान प्रदान गरिएको प्रतिष्ठानले जनाएको छ ।उक्त पुरस्कारहरु नेपाल प्रज्ञा प्रतिष्ठानका पूर्व कुलपति तथा वरिष्ठ कवि बैरागी काँइलाले प्रदान गरेका थिए थियो।
दुवै पुरस्कार नेपाली आधुनिक मुक्तक साहित्यका प्रवर्तक भीमदर्शन रोका र कृष्णप्रसाद पराजुली, रत्नशम्सेर थापा र चेतन कार्कीको सम्मानमा स्थापित गरिएको प्रतिष्ठानले जानकारी दिएको छ । साथै कार्यक्रममा रत्नशम्सेर थापाको पहिलो मुक्तक कृति ‘शीतको रुनझुन’ को लोकार्पण समेत गरिएको थियो।
प्रतिष्ठानका अध्यक्ष रामकाजी कोनेको सभाअध्यक्षतामा भएको कार्यक्रममा समालोचक श्रीओम श्रेष्ठ रोदन, विमल भौकाजी, ज्ञानु पाण्डे, पुरस्कृत स्रष्टा अनुराधा ढकाल, रमेन्द्र शमशेर थापा, वियोगी बुढाथोकी, दिव्य गिरी लगायतका अग्रज स्रष्ट्रा साथै दिनेश शर्मा (हेटौंडा), सुनिल अधिकारी, राजेन्द्र घिमिरे सागर, मदन नेपाल, निर्मलरमण पराजुलीले मुक्तक वाचन गरेका थिए ।
प्रतिष्ठानका महासचिव यादव भट्टराईले सहजीकरण गरेको कार्यक्रममा अमेरिकाबाट आएका स्रष्टाहरु शेखर ढुङेल, सुन्दर जोशी, नेत्र बन्धु पोख्रेल, किस्मत भण्डारीसमेतको उपस्थिति रहेको थियो ।
मकवानपुर । मकवानपुरकाे हेटौडामा जारी छैठाैं संस्करणको शहीद स्मृति स्थानीय तह अन्तर्राष्ट्रिय फुटबल प्रतियोगिता अन्तरगत सशस्त्र प्रहरी बलकाे एपीएफ क्लब अन्तिम आठमा प्रवेश गरेकाे छ।
जिल्ला फुटबल संघ मकवानपुरकाे आयोजनामा भएकाे प्रतियाेगितामा विहीबार भएको खेलमा एपीएफ क्लबले मच्छिन्द्र क्लबलाई ४-३ ले पराजित गर्दै प्रतियोगिताको अन्तिम आठमा स्थान बनाएको छ। निर्धारित ९० मिनेटको खेल १-१ को बराबरीमा सकिएपछि खेल ट्राइब्रेकरमा धकेलिएकाे थियाे ।
एपीएफका गोलरक्षक एञ्जल श्रेष्ठले उत्कृष्ट प्रदर्शन गर्दै टाइब्रेकरका दुई प्रहार बचाए। खेलमा म्यान अफ दी म्याच घोषित हुँदै उनले नगर १० हजार प्राप्त गरे । अब एपीएफले अन्तिम आठको चरणमा थ्री स्टार क्लबसँग प्रतिस्पर्धा गर्नेछ। हेटौंडा–६ गौरिटारमा जारी प्रतियोगिता अन्तरगत शुक्रबारकाे खेल राजारानी धनकुटा र पुलिस क्लबबीच हुने आयाेजकले जनाएकाे छ ।
प्रतियोगिताको विजेताले उपाधिसहित नगद १५ लाख हात पार्नेछ भने उपविजेताले १० लाख प्राप्त गर्नेछ । त्यस्तै प्रतियोगिताको सर्वोत्कृष्ट खेलाडीले एक थान बुलेट मोटरसाइकल हात प्राप्त गर्ने छन् भने विधागत उत्कृष्ट हुने खेलाडी तथा प्रशिक्षकले जनही २५ हजार रुपैयाँ प्राप्त गर्ने आयोजकले जानकारी दिएकाे छ ।
प्रतियोगितामा एक विदेशी क्लब, नेपालमा रहेका ८ वटा ए डिभिजन फुटबल क्लब, आयोजक टोली सहित मोफसलका तीन गरी १२ वटा टोेलीको सहभागिता रहेको आयोजक जनाएको छ ।