स्थानीय तह शहीद स्मृती गोल्डकपः थ्रीस्टारलाई हराउँदै एपीएफ सेमिफाइनल प्रवेश
Tags: No Comments
मकवानपुर । मकवानपुरको हेटौडामा जारी शहीद स्मृति स्थानीय तह अन्तर्राष्ट्रिय फुटबल प्रतियोगितामा शसस्त्र प्रहरीकाे एपीएफ क्लब सेमिफाइनल प्रवेश गरेको छ । थ्रीस्टार क्लबलाई ४–० गोलअन्तरले हराउँदै एपीएफले सेमिफाइनलमा स्थान बनाएको हो ।
हेटौंडा–६ स्थित गौरीटार रंगशालामा भएकाे छैठौं संस्करण अन्तरगत मंगलबारकाे चौथो क्वार्टरफाइनलमा एपीएफले पहिलाे हाफमा हाफमा १ र दोस्रो हाफमा ३ गोल गरेको हो। आहा रारा गोल्डकपको उपविजेता थ्रीस्टारमाथि एपिएफले ४५ औँ ४८ औं ५८ औं र ७९ औं मिनेटमा एकतर्फी गोल गरेकाे थियाे । मंगलबारकाे खेलसँगै प्रतियाेगिताकाे सेमिफाइनल समिकरण पुरा भएकाे छ ।
खेलमा एपीएफका प्रदीप लामा म्यान अफ दी म्याच घोषित हुदै दश हजार रुपैयाँ प्राप्त गरे । यसअघि सर्लाहीको बागमती युवा क्लब, न्यु रोड टिम (एनआरटी) र राजारानी क्लब धनकुटा सेमिफाइनल प्रवेश गरिसकेको छ । प्रतियाेगिता अन्तरगत बुधबारबाट सेमिफाइनलका खेल हुने आयाेजकले जनाएकाे छ । पहिलो सेमिफाइनल न्यूरोड टिम एनआरटी र राजारानी क्लब धनकुटाको बीचमा हुनेछ।
आगामी माघ २७ गतेसम्म सञ्चालन हुने प्रतियोगिताको विजेताले १५ लाख रुपैयाँ पुरस्कार प्राप्त गर्नेछ। उपविजेताले दश लाख रुपैयाँ तथा सर्वोत्कृष्ट खेलाडीले बुलेट बाइक प्राप्त गर्नेछन्। यस्तै विधागत उत्कृष्ट खेलाडी तथा प्रशिक्षकले जनही २५/२५ हजार रुपैयाँसहित ट्रफी प्राप्त गर्नेछन् ।मकवानपुर जिल्ला फुटबल संघकाे आयोजनामा बागमती प्रदेश खेलकुद विकास परिषद्, सामाजिक विकास मन्त्रालय, हेटौँडा मकवानपुरका १० वटै स्थानीय तहको सहयोगमा प्रतियोगिता भएकाे हाे ।
प्रतियाेगितामा एक विदेशी क्लब, नेपालमा रहेका ८ वटा ए डिभिजन फुटबल क्लब, आयोजक टोली सहित मोफसलका तीन गरी १२ वटा टोेलीको सहभागिता रहेको छ ।
मकवानपुर । बागमती प्रदेशक मन्त्रिपरिषद् बैठकले प्रदेशकाे चितवन जिल्लास्थित गौतम बुद्ध अन्तर्राष्ट्रिय रंगशाला निर्माणका लागि ५२ करोड ५० लाख बजेट स्वीकृत गरेकाे छ । बजेट स्वीकृत भएसँगै अब रंगशाला निर्माणार्थ ठेक्का आह्वान हुने भएकाे छ ।
मंगलबार बसेको प्रदेश मन्त्रिपरिषद् बैठकले रंगशाला निर्माणका लागि स्रोत सुनिश्चित गरी बहुवर्षीय ठेक्का आह्वान गर्न स्वीकृति प्रदान गर्ने निर्णय गरेको मुख्यमन्त्री तथा मन्त्रिपरिषद्काे कार्यालयले जनाएकाे छ । बागमती प्रदेश सरकार र भरपुर महानगरपालिका चितवनले रंगशाला निर्माण गर्ने गरी गत कार्तिक २१ गते सम्झौता गरेका थिए ।
मुख्यमन्त्री शालिकराम जम्कट्टेल र भरतपुर महानगरपालिकाकी प्रमुख रेणु दाहालले रंगशाला निर्माणका समझदारी पत्रमा हस्ताक्षर पछि बजेट जुटाउन स्राेतकाे खाेजीलाई तिब्रता दिइएकाे थियाे । रंगशाला निर्माण गर्दाको ऋणको जिम्मा भने संघीय सरकारलाई नै छोड्ने गरी प्रदेश सरकारले ७० प्रतिशत र भरतपुर महानगरपालिकाले ३० प्रतिशत लगानी गरी तत्काल निर्माण गर्ने गरी सम्झौता भएकाे थियाे ।
भरतपुर महानगरपालिकाले तयार गरेको विस्तृत परियोजना प्रतिवेदन (डीपीआर) अनुसार प्रदेश सरकारले ५२ करोड ५० लाख रुपैयाँ र भरतपुर महानगरपालिकाले २२ करोड ५० लाख रुपैयाँ लगानी गर्नेछन् ।
चितवनको भरतपुर नगरपालिकामा रंगशाला निर्माण सुरु गरेको धुर्मुस सुन्तली फाउन्डेसनले बनाउन सुरु गरेको रंगशाला बजेट अभाव भएको भन्दै २०७८ साउन २२ गतेबाट पूर्ण रुपमा रोकिएको थियो । अब बाँकी संरचना भने बागमती प्रदेश र भरतपुर महानगरपालिकाले बनाउने छन् । महानगरले संघीय सरकारसँग पनि रंगशाला निर्माणकाे लागि रकम माग गरेकाे बताइएकाे छ ।
यसैगरी बागमतीको मन्त्रिपरिषद् बैठकले अघिल्लो आर्थिक वर्षमै सम्पन्न भएका आयोजनाहरुको ठेकेदार कम्पनीलाई भुक्तानी दिन बाँकी रकम भुक्तानी दिने निर्णय गरेको छ । विशेष गरी भौतिक पूर्वाधारसँग सम्बन्धित आयोजनाहरुको करिब ४० करोड रुपैयाँ भुक्तानी दिने निर्णय भएको छ ।
मन्त्रिपरिषद् बैठकले आगामी आर्थिक वर्षका लागि संघीय सरकारको समपूरक र विशेष अनुदानका लागि १०–१० वटा आयोजना पनि सिफारिस गरेको छ । समपूरकतर्फ संघीय सरकार र प्रदेश सरकारको सहलगानी रहनेछ भने विशेष अनुदानका योजनामा संघीय सरकारको एकल लगानी रहनेछ । रङ्गशाला निर्माणकाे लागि मकवानपुरकाे हेटाैंडा उपमाहानगरपालिकाले पनि सहयाेग गरेकाे थियाे ।
झरना साहित्यिक परिवारले ९ जनालाई सम्मान गर्ने
Tags: No Comments
मकवानपुर । मकवानपुरकाे साहित्यिक संस्था झरना साहित्यिक परिवारले ९ जना स्रष्टालाई सम्मान गर्ने भएको छ ।
झरनाले आगामी फागुन महिनामा आयोजना गर्ने ३१ औँ वार्षिकोत्सव तथा बकैया कला–साहित्य महोत्सव, २०८० मा सष्ट्राहरूलाई सम्मान गर्ने भएकाे हाे । हेटौंडामा सोमबार पत्रकार भेटघाट गर्दै झरनाले स्रष्ट्रा सम्मान तथा कला साहित्य महोत्सवकाे आयोजना गरी सम्मान गर्ने जनाएकाे हाे ।
साहित्यसेवी नुरप्रसाद गौतमले मातापिताको सम्मानमा स्थापना गरेका होमनाथ–टीकामाया प्रतिभा सम्मान २०७९ बाट काठमाडौँका डा. गीता त्रिपाठी सम्मानित हुने भएका छन् । गिरीलाई साहित्य क्षेत्रमा योगदान गरेबापत नगद २१ हजार १ सय २१ रुपैयाँ सहित सम्मान गरिने भएको हो ।यसैगरी,साहित्यसेवी रमेशमोहन अधिकारीले मातापिताको नाममा स्थापित गरेको शिव–सावित्री अधिकारी स्मृति मुक्तक सम्मानबाट खोटाङका बाबुराम पोखरेललाई सम्मान गरिने भएको छ । पाेखरेललाई साहित्यकाे मुक्तक विधामा योगदान पुर्याए वापत नगद १५ हजार ५ सय ५५ सहित उक्त सम्मानबाट सम्मानित गरिने झरनाले जानकारी दिएकाे छ ।
मकवानपुरका साम्ब ढकाललाई बाबुलाल–भोजमाया स्मृति साहित्य सम्मान प्रदान गरिने भएको छ । साहित्यसेवी विनोद सुवेदीले मातापिताको नाममा स्थापित गरेका उक्त पुरस्कारबाट जिल्लामा साहित्यिक संस्था स्थापना र जगेर्ना गर्न योगदान गरेबापत उनलाई सम्मान गर्ने भएकाे हाे। उक्त पुरस्कार राशी नगद १५ हजार ५ सय ५५ रहेकाे छ ।
त्यस्तै, साहित्यसेवी अर्पण पराजुली र दर्पण पराजुलीले मातापिताको सम्मानमा स्थापित गरेको खडानन्द–मनमाया प्रतिभा सम्मानबाट स्याङ्जाका मिलन समिर, साहित्यसेवी राजन दङ्गालले आफ्नी दिवङ्गत छोरीको स्मृतिमा स्थापना गरेको सुशीला दङ्गाल स्मृति सिर्जनशील नारी सम्मानबाट बिमला कार्की सुसं, साहित्यसेवी तुलसी गिरीले स्थापना गरेको सञ्जीवनी बुटी साहित्य सेवा सम्मानबाट भरतप्रसाद सापकोटा र बकैया गाउँपालिकाका उपाध्यक्ष भक्तबहादुर खत्रीले स्थापना गरेको खिम बहादुर खत्री स्मृति कलाकारिता सम्मानबाट बासुरीवादक बिष्णु घतानीलाई सम्मान गरिने झरनाका सचिव मसान उपासकले जानकारी दिए । उनीहरुलाई जनही नगद ७ हजार ७ सय ७७ सहित सम्मान गरिने भएको हो ।
त्यस्तै ५ हजार ५ रुपैयाँ राशीको झरना–बकैया नवप्रतिभा पुरस्कार गजलकार अजर फुयाँललाई प्रदान गरिने भएको छ । यो पुरस्कार बकैयाका चन्द्रकुमार राईले स्थापना गरेका हुन् । पत्रकारिताको माध्यमबाट संस्थाको प्रचारप्रसारमा सहयोग पुर्याएको भन्दै पत्रकार रामकुमार एलनलाई गोकर्ण गौतम स्मृति पत्रकारिता पुरस्कारबाट सम्मान गरिने भएको हो । उक्त सम्मानको राशी नगद ११ हजार १ सय ११ रहेको छ । उक्त पुरस्कार गौतमका माता नन्ददेवीले स्थापना गरेकी हुन् ।
झरनाको ३१ औँ वार्षिकोत्सव तथा बकैया कला–साहित्य महोत्सव, २०८० फागुन ११ र १२ गते बकैया–९, शिखरपुरमा हुने सचिव उपासकले जानकारी दिए । उनका अनुसार कालीदेवी माविमा हुने कार्यक्रमकाे पहिलो दिन रचना वाचन र चित्रकला प्रतियोगिता हुनेछ । यसैगरी पहिलाे दिन नै बकैया बिशेष रचना वाचन हुनेछ ।
यस्तै कला साहित्य महोत्सवको दोस्रो दिन नवपुस्ता केन्द्रित रचना वाचन कार्यक्रम, चेतनाको विकासमा स्थानीय तहको भूमिका विषयक वहस, खुल्ला कविता वाचन, गजल मुक्तक वाचन/गायन तथा सम्मानित स्रष्टाको मन्तव्य र रचना वाचन कार्यक्रम हुने उपासकले जानकारी दिए ।
स्थानीय तह शहीद स्मृती गोल्डकपः आर्मीलाई हराउँदै राजारानी सेमिफाइनल प्रवेश
Tags: No Comments
मकवानपुर । मकवानपुरको हेटौडामा जारी शहीद स्मृति स्थानीय तह अन्तर्राष्ट्रिय फुटबल प्रतियोगितामा धनकुटाको राजारानी क्लब सेमिफाइनल प्रवेश गरेको छ । त्रिभुवन आर्मीलाई ५–४ गोलअन्तरले पराजित गर्दै राजारानीले सेमिफाइनलमा स्थान बनाएको हो ।
हेटौंडा–६ स्थित गौरीटार रंगशालामा भएकाे छैठौं संस्करण अन्तरगत साेमबारकाे तेस्राे क्वार्टरफाइनल खेलको निर्धारित समय १–१ को बराबरीमा सकिएपछि खेल ट्राइब्रेकरमा धकेलिएकाे थियाे । ट्राइब्रेकरमा समेत ३–३ गाेल भए पछि सडनडेथमा राजारानीले मकवानपुर गोल्डकपको तेस्रो र चौथौँ संस्करणको विजेतासमेत रहेकाे त्रिभुवन आर्मी पराजीत गरेकाे हाे ।
ट्राइब्रेकरमा राजारानीकाे तर्फबाट विशाल घलान, रुपेश केसी, दीप कार्कीकाे प्रहारले जाली चुम्याे । सुनिल खड्काकाे प्रहार आर्मीमा गाेल रक्षकले राेकिदिदा अशोक खवासकाे प्रहार बाहिरिएकाे थियो । आर्मीको तर्फबाट जितेन्द्र कार्की, कमल थापा र रसबहादुर मगरले गोल गरेका थिए । ट्राइब्रेकरमा आर्मीका बसन्त जिम्बा र श्रीराम चौधरीकाे प्रहार बाहिरियाे ।
सडनडेथमा राजारानीका प्रवेश दनुवार र उमेश कार्कीले गोल गरेका थिए । आर्मीका विमल पाण्डेले गोल गर्दा सिद्धान्त चौधरीका प्रहार धनकुटाका गोलरक्षक दीप कार्कीले बचाएका थिए । खेलमा गोलरक्षक दिप कार्कीले उत्कृष्ट प्रदर्शन गर्दै म्यान अफ दी म्याच घोषित भए । उनले दश हजार रुपैयाँ प्राप्त गरे । आर्मीले खेलकाे पहिलाे हाफकाे १० औं मिनेटमा गोल गर्दै खेलमा अग्रता कायम गरेका थियो । राजारानीले दाेस्राे हाफकाे ८३ औं मिनेटमा गोल गर्दै खेलमा बराबरी गरेका थियाे ।
आर्मीले प्रतियाेगिता अन्तरगत क्वार्टरफाइनलमा स्थान वाइ पाएर बनाएकाे थियाे । राजारानी भने क्बल चर्च ब्वाईज युनाटेडलाई हराउँदै क्वाटरफाइनमा प्रवेश गरेको थियो । अब सेमिफाइनलमा राजारानी धनकुटाले न्यूरोड टिम (एनआरटी)सँग प्रतिस्पर्धा गर्नेछ । यसअघि सर्लाहीको बागमती युवा क्लब र न्यु रोड टिम एनआरटी सेमिफाइनल प्रवेश गरिसकेको छ । प्रतियोगिता अन्तर्गत् मंगलबार थ्रीस्टार र सशस्त्र प्रहरीको एपीएफ क्लबसँग क्वार्टरफाइनल अन्तरगत चौथो खेल हुने आयाेजकले जनाएकाे छ । ।
आगामी माघ २७ गतेसम्म सञ्चालन हुने प्रतियोगिताको विजेताले १५ लाख रुपैयाँ पुरस्कार प्राप्त गर्नेछ। उपविजेताले दश लाख रुपैयाँ तथा सर्वोत्कृष्ट खेलाडीले बुलेट बाइक प्राप्त गर्नेछन्। यस्तै विधागत उत्कृष्ट खेलाडी तथा प्रशिक्षकले जनही २५/२५ हजार रुपैयाँसहित ट्रफी प्राप्त गर्नेछन् ।मकवानपुर जिल्ला फुटबल संघकाे आयोजनामा बागमती प्रदेश खेलकुद विकास परिषद्, सामाजिक विकास मन्त्रालय, हेटौँडा मकवानपुरका १० वटै स्थानीय तहको सहयोगमा प्रतियोगिता भएकाे हाे ।
प्रतियाेगितामा एक विदेशी क्लब, नेपालमा रहेका ८ वटा ए डिभिजन फुटबल क्लब, आयोजक टोली सहित मोफसलका तीन गरी १२ वटा टोेलीको सहभागिता रहेको छ । पाँचौँ संस्करणको उपाधि विजेता मनाङ मर्स्याङ्दी क्लबले याे संस्करणमा सहभागिता जनाएकाे छैन ।
मकवानपुर । संस्थाकाे २६ औं स्थापना दिवसको अवसर पारेर प्रेस चौतारी नेपाल मकवानपुरले आज हेटौंडामा प्रभातफेरी कार्यक्रम गरेकाे छ ।
प्रेस चौतारी नेपाल मकवानपुर शाखाले आयोजनामा गरेकाे प्रभात फेरीमा जिल्लाका कृयाशिल पत्रकारहरुकाे सहभागीता रहेकाे थियाे । कार्यक्रममा प्रेस चौतारी नेपालका केन्द्रीय सदस्य तथा मकवानपुर इन्चार्ज हरि हुमागाईंले श्रमजिवी पत्रकारहरुको संस्था प्रेसचौतारी नेपालले पत्रकारहरुको हकहितका निम्ति धेरै राम्रा काम गरेको बताए ।
पत्रकारहरुकाे पेशागत हितकाे लागि सक्रिय चाैतारी पत्रकारकाे हितकारी संस्था भएकाे उनले बताए । कार्यक्रममा पत्रकार महासंघ बागमती प्रदेशका महासचिब कृष्ण सारु मगर, प्रेस चौतारी नेपाल बागमती प्रदेशका महासचिब प्रकाश दाहाल, पत्रकार महासंघ मकवानपुरका उपाध्यक्ष ध्रुब अधिकारी, प्रेस युनियन मकवानपुरका अध्यक्ष सुवास विडारीलगायतकाले पत्रकारकाे सवालमा सबै पत्रकारहरु एकै मतमा उभिने गरेकाे सही संस्कार रहेकाे बताए । विचारकाे आधारमा विभिन्न संगठनहरुमा आवद्ध भए पनि पेशागत हित र व्यवसायिक सवालमा एकै कित्तामा उभिने गरेकाे उनीहरुले बताए ।
कार्यक्रममा चाैतारी जिल्ला शाखा अध्यक्ष बालकृष्ण अधिकारीले पत्रकारहरुमा दक्षताकाे विकासमा समेत चाैतारी लागिपरेकाे स्मरण गरे ।