मकवानपुर। मकवानपुरकाे हेटौंडा उपमहानगरपालिकामा भएको घरफोडी चोरी प्रकरणमा संलग्न रहेको आरोपमा १ जनालाई प्रहरीले पक्राउ गरेको छ।
हेटौंडा उपमहानगरपालिका–७ मा भएको घरफोडी चोरी प्रकरणमा संलग्न रहेको आरोपमा रामेछापको हिमागंगा ४ स्थायी घर भई हाल हेटौंडा १५ फारलाइन बस्ने २५ वर्षीय मनोज पुलामी मगरलाई मकवानपुर प्रहरीले पक्राउ गरेकाे हाे । जिल्ला प्रहरी कार्यालय मकवानपुरका अनुसार असार १० गते दिउँसो हेटौंडा–७ क्याम्पडाँडा नजिक सनउड कोलोनी बस्ने कृष्णप्रसाद गौतमको घरकाे पूर्वतर्फको ढोका फुटाई चोरी भएको थियो।
चोरीमा करिब एक तोला सुन, २५.५ तोला चाँदी १५ वटा चाँदीका सिक्का तथा नगद चार लाख रुपैयाँ चोरी भएको प्रहरीले जनाएको छ। मगरलाई बस्दै आएकाे घरबाट पक्राउ गरिएकाे बताइएकाे छ । प्रहरीका अनुसार उनको कोठामा खानतलासी गर्दा चाँदीका सिक्का, नगद, गरगहना, सुनजस्तो देखिने पहेँलो धातुका विभिन्न गरगहना तथा अन्य सामान बरामद गरेको छ।
प्रहरीको प्रारम्भिक अनुसन्धानका क्रममा पक्राउ परेका मगर यसअघि जेन्जी आन्दोलनका क्रममा भीमफेदी कारागारबाट फरार भएका व्यक्ति रहेको समेत खुलेको प्रहरीले जनाएको छ। पक्राउ परेका व्यक्तिलाई बरामद सामानसहित आवश्यक कानुनी कारबाहीका थप अनुसन्धान भइरहेको प्रहरीले जनाएको छ।
यसैबीच प्रहरीले सर्वसाधारणलाई घरमा धेरै नगद तथा गरगहना नराख्न, घर छोड्दा छिमेकी वा आफन्तलाई जानकारी गराई आवश्यक निगरानीको व्यवस्था मिलाउन आग्रह गरेको छ।
मकवानपुर । तेस्रो बागमती प्रदेश खेलकुद प्रतियोगिता–२०८३ को उपाधि काठमाडौंले जितेको छ । प्रतियोगितामा काठमाडौंले ५१ स्वर्ण, ३८ रजत र ४२ कास्य गरी कुल १३१ पदक जित्दै प्रथम बनेको हो ।
प्रतियोगितामा ललितपुरले ४६ स्वर्ण, ४१ रजत र ४४ कास्य पदक जित्दै प्रतियोगितामा द्वितीय स्थान प्राप्त गरेको छ । यस्तै चितवन ३० स्वर्ण, २८ रजत र २७ कास्य गरी कुल ८५ पदकसहित तेस्रो भएको छ । प्रथम स्थान हासिल गर्दै काठमाडौंले १ लाख रुपैयाँ, द्वितीय भएको ललितपुरले ७५ हजार रुपैयाँ र तृतीय भएको चितवनले ५० हजार रुपैयाँ नगरसहित ट्रफी प्राप्त गरेका छन् ।
अन्तिम पदक तालिकाअनुसार काभ्रेपलाञ्चोक २२ स्वर्ण, १८ रजत र १८ कास्य गरी ५८ पदकसहित चौथो स्थानमा रह्यो । भक्तपुरले १७ स्वर्ण, २२ रजत र ३६ कास्य गरी ७५ पदक, मकवानपुरले ११ स्वर्ण, १० रजत र ३२ कास्य गरी ५३ पदक, सिन्धुपाल्चोकले १० स्वर्ण, ११ रजत र १० कास्य गरी ३१ पदक, नुवाकोटले ९ स्वर्ण, १३ रजत र २० कास्य गरी ४२ पदक, धादिङले ९ स्वर्ण, १० रजत र २१ कास्य गरी ४० पदक जितेका छन् । रामेछापले ८ स्वर्ण, ३ रजत र २१ कास्य, सिन्धुलीले २ स्वर्ण, ११ रजत र २२ कास्य, रसुवाले २ स्वर्ण, ७ रजत र ४ कास्य तथा दोलखाले १ स्वर्ण, ३ रजत र १४ कास्य पदक जितेका छन् ।
फुटबलमा चितवन र काठमाडौं च्याम्पियन
प्रतियोगिताको अन्तिम दिन फुटबलतर्फ पुरुष र महिलाको फाइनल खेल भएको थियो । फुटबल पुरुषतर्फको उपाधि चितवनले जितेको छ भने महिलातर्फ काठमाडौं च्याम्पियन बनेको छ । मंगलबार हेटौंडा–५ स्थित पिप्ले रंगशालामा भएको महिलातर्फको फुटबलको फाइनलमा काठमाडौंले चितवनलाई १–० गोल अन्तरले पराजित गर्दै उपाधि जितेको हो । उपाधि विजेता काठमाडौंका खेलाडीहरूले जनही ५ हजार रुपैयाँ र उपविजेता चितवनका खेलाडीहरूले जनही ४ हजार रुपैयाँ प्राप्त गरे ।
यस्तै, मंगलबार नै हेटौंडाको गौरीटार रंगशालामा भएको पुरुष फुटबलतर्फको फाइनलमा चितवनले मकवानपुरलाई टाइब्रेकरमा पराजित गर्दै उपाधि जित्यो । निर्धारित समयको खेल २–२ गोलको बराबरीमा सकिएपछि खेल टाइब्रेकरमा धकेलिएको थियो । टाइब्रेकरमा चितवनले मकवानपुरलाई ३–१ गोल अन्तरले हराएको हो ।
प्रतियोगितामा बागमती प्रदेशका १३ वटै जिल्लाको सहभागिता थियो । विभिन्न १५ खेल विधामा २१७ स्वर्ण, २१४ रजत र ३११ कास्य गरी कुल ७४४ पदकका लागि खेलाडीहरूले प्रतिस्पर्धा गरेका थिए । प्रतियोगितामा १ हजार ५१५ पुरुष र १ हजार १९२ महिला गरी कुल २ हजार ७०७ खेलाडी सहभागी भएका थिए । प्रतियोगिताका खेलहरू हेटौंडा, चितवन, ललितपुर र काठमाडौंका विभिन्न खेलस्थलमा सञ्चालन गरिएको थियो । महिला भलिबल ललितपुरको जावलाखेल भलिबल प्रशिक्षण केन्द्रमा र पुरुष भलिबल काठमाडौंको त्रिपुरेश्वरस्थित राष्ट्रिय खेलकुद परिषद्को कभर्ड हलमा भएको थियो ।
महिला क्रिकेट र कराते चितवनमा, पौडी ललितपुरमा तथा उसु, जुडो र टेबलटेनिस काठमाडौंमा सञ्चालन गरिएको थियो । फुटबल, पुरुष क्रिकेट, बक्सिङ, एथ्लेटिक्स, ब्याडमिन्टन, तेक्वान्दो, बुद्धिचाल, फूलकन्ट्याक कराते र आईटिएफ तेक्वान्दो हेटौँडामा सञ्चालन भएको आयोजकले जनाएको छ । प्रत्येक खेलका विजेता टोलीलाई पुरस्कार र ट्रफी तथा प्रत्येक खेलका सर्वोत्कृष्ट खेलाडीलाई जनही २० हजार रुपैयाँ पुरस्कार प्रदान गरिएको थियो ।
“प्रदेश सरकारले खेलकुद नीति बनाउँदै छ”
समापन समारोहमा बागमती प्रदेश सरकारका युवा तथा खेलकुद मन्त्री उर्मिला नेपालले प्रदेश सरकारले खेलकुद नीति बनाउने काम अघि बढाएको बताउनु भयो । प्रदेशलाई खेलकुदमैत्री बनाउने, नयाँ प्रतिभा पहिचान गर्ने र अन्तर्राष्ट्रियस्तरमा प्रतिस्पर्धा गर्न सक्षम बनाउने प्रदेश सरकारको लक्ष्य रहेको उहाँले बताउनु भयो । पर्याप्त पूर्वाधार नहुँदा खेलाडीले आफ्नो प्रतिभा प्रस्तुत गर्न समस्या भोग्नुपरेको भन्दै मन्त्री नेपालले खेलकुद पूर्वाधार विकासलाई मन्त्रालयले प्राथमिकतामा राखेको जानकारी दिनु भयो ।
सदस्य सचिव लामाले सीमित समय र पूर्वाधारका बीच पनि प्रतियोगिता सफलतापूर्वक सम्पन्न भएको बताउनु भयो । खेलकुदको शैली परिवर्तन गर्नुपर्ने उल्लेख गर्दै उहाँले भन्नुभयो ‘यो प्रतियोगिता १० औँ राष्ट्रिय खेलकुद प्रतियोगिताका लागि छनोटको आधारका रूपमा समेत लिन सकिन्छ ।’ सकिने बताए ।
प्रतियोगिताको अन्तिम दिन मंगलबार फुटबलका फाइनल खेल सम्पन्न भएसँगै गौरीटार फुटबल मैदानमा समापन तथा पुरस्कार वितरण समारोह गरिएको थियो । बागमती प्रदेश खेलकुद विकास परिषद्को आयोजनामा असार १ गतेदेखि सुरु भएको प्रतियोगिताकाे उद्घाटन असार ३ गते गरिएकाे थियो ।
मकवानपुर । मकवानपुरको हेटौंडाबाट लागूऔषध प्रयोग गरि सवारी चलाउने १० जनालाई प्रहरीले पक्राउ गरेको छ ।
मकवानपुरका विभिन्न स्थानमा गरिएको सवारी जाँचका क्रममा लागूऔषध सेवन गरेर सवारी चलाउने १० जना चालकलाई मकवानपुर प्रहरीले पक्राउ गरेको हो । लागूऔषध दुरुपयोग तथा अवैध ओसारपसार विरुद्धको ३९औँ अन्तर्राष्ट्रिय दिवसको अवसरमा सञ्चालन गरिएको सप्ताहव्यापी कार्यक्रमअन्तर्गत चालकले सवारी चलाउँदा लागूऔषध सेवन गरे नगरेकाे परीक्षण गरिएको हाे ।
उक्त परीक्षणमा पक्राउ पर्नेमा बारा कलैया उपमहानगरपालिका–७ निवासी २० वर्षीय मोस्तकी अन्सारी, गोरखा सहिद लखन गाउँपालिका–३ निवासी २६ वर्षीय निर्मल श्रेष्ठ, सुनसरी इटहरी उपमहानगरपालिका–७ निवासी २७ वर्षीय अन्जित चौधरी, पर्सा वीरगञ्ज महानगरपालिका–२७ निवासी ४० वर्षीय रामनारायण मण्डल, सर्लाही लालबन्दी नगरपालिका–१५ निवासी ३४ वर्षीय अमिर योन्जन रहेकाे जिल्ला प्रहरी कार्यालय मकवानपुरले जानकारी दिएकाे छ ।
यसैगरी पक्राउ पर्नेमा रौतहट ईशनाथ नगरपालिका–५ निवासी ३५ वर्षीय पुकार यादव, मकवानपुर हेटौंडा उपमहानगरपालिका–१५ निवासी २३ वर्षीय रोहन लामा, महोत्तरी बर्दिबास नगरपालिका–१४ निवासी २७ वर्षीय रुद्रप्रसाद दाहाल, रौतहट फतुवा विजयपुर नगरपालिका–६ निवासी ३३ वर्षीय उमेश राय यादव तथा पर्सा वीरगञ्ज महानगरपालिका–१२ निवासी ३४ वर्षीय मैनिदिन मियाँ रहेको जिल्ला प्रहरी कार्यालय मकवानपुरले जनाएकाे छ ।
लागूऔषध दुरुपयोग तथा अवैध ओसारपसार विरुद्वको ३९ औ अन्तराष्ट्रिय दिवसको अवसरमा जिल्ला कार्यालय कार्यालय, ट्राफिक प्रहरी कार्यालय, सियान पुनस्थापनाको केन्द्र, जनस्वास्थ्य कार्यालयका प्रतिनिधिहरु, स्थानीय तहका जनप्रतिनिधि समेतको सहभागितामा सवारी साधनका चालकहरुले लागूऔषध प्रयोग गरे नगरेकाे जाँच गरिएकाे थियो ।
मकवानुर । पतञ्जलि योग समिति मकवानपुरले स्थापना भएको १९ वर्ष पूरा गरेको अवसरमा आज मानव सेवा आश्रम, हेटौंडामा आश्रित लक्ष्मीनारायणहरूलाई भोजन गराउने विशेष सेवा कार्यक्रम आयोजना गरेको छ।
समितिले १२ औँ अन्तर्राष्ट्रिय योग दिवसको अवसरमा सञ्चालन गरेको सप्ताहव्यापी कार्यक्रमको समापनसँगै स्थापना दिवसलाई सामाजिक सेवासँग जोड्दै मानव सेवा आश्रममा भोजन वितरण कार्यक्रम आयोजना गरेको छ।
कार्यक्रममा पतञ्जलि योग समिति मकवानपुर, पतञ्जलि महिला समिति, पतञ्जलि युवा समिति, नगर समिति तथा विभिन्न योग साधना केन्द्रका पदाधिकारी, साधक–साधिकाहरूको सक्रिय सहभागिता रहेको थियो।
आश्रममा आश्रित ज्येष्ठ नागरिक, असहाय तथा अभिभावकविहीन व्यक्तिहरूलाई सम्मानपूर्वक भोजन गराइएको थियो। सहभागीहरूले सेवा नै धर्म भएको भावना अनुरूप मानव सेवामार्फत योगको वास्तविक मर्मलाई व्यवहारमा उतार्ने प्रयास गरिएको बताएका थिए। पतञ्जलि योग समिति मकवानपुरका अध्यक्ष रामकृष्ण थापाले योग केवल शरीरलाई स्वस्थ राख्ने अभ्यास मात्र नभई मानवीय संवेदना, सेवा, करुणा र सकारात्मक जीवनदृष्टि विकास गर्ने माध्यम भएको बताउनुभयो।
उहाँले समाजका विपन्न, असहाय तथा सहयोगको आवश्यकता भएका व्यक्तिहरूप्रति उत्तरदायी बन्नु नै योगको वास्तविक सन्देश भएको उल्लेख गर्नुभयो। कार्यक्रममा बोल्दै विभिन्न वक्ताहरूले पतञ्जलि योग समिति मकवानपुरले विगत १९ वर्षदेखि योग, स्वास्थ्य, संस्कार, शिक्षा तथा सामाजिक सेवाका क्षेत्रमा निरन्तर योगदान पुर्याउँदै आएको चर्चा गरेका थिए।
उनीहरूले आगामी दिनमा पनि योगलाई जनजीवनसँग अझ नजिक पुर्याउने तथा सामाजिक उत्तरदायित्वका कार्यक्रमलाई निरन्तरता दिने प्रतिबद्धता व्यक्त गरे। मानव सेवा आश्रममा आयोजित भोजन सेवा कार्यक्रमसँगै पतञ्जलि योग समिति मकवानपुरले आफ्नो १९ औँ स्थापना दिवसलाई सेवामूलक र मानवीय कार्य गरेको बताइन् ।
मकवानपुर । मकवानपुरकाे हेटौंडा उपमहापालिकाका उपभोक्तालाई दैनिक ३ करोड ७५ लाख लिटर पिउने पानी वितरण हुँदै आएकाे छ । हेटौंडा खानेपानी व्यवस्थापन बोर्डले हेटौंडा उपमहानगरपालिकाका विभिन्न वडाका उपभाेक्तालाई उक्त परिमाणकाे प्रशाेधित पानी वितरण गर्दै आएकाे हाे ।
हेटौंडा उपमहापालिकाकाे १७ वटा वडामा पिउने पानी वितरण हुने गरेकाे खानेपानी व्यवस्थापन बोर्डका सूचना अधिकारी सञ्जय न्यौपानेले बताए । १९ वटा वडा रहेकाे उपमहानगरमा वडा नम्बर १२ र १३ बाहेकका वडामा पिउने पानी वितरण हुँदै आएकाे छ । करिब १ लाख ७२ हजार बासिन्दालाई स्वच्छ पिउने पानी दैनिक सरदर १० घण्टा वितरण गर्दै आएको न्यौपानेले जनाकारी दिए । उनका अनुसार उपमहानगरका विभिन्न वडामा बाेर्ड मार्फत हालसम्म २९ हजार ८ सय ३ वटा धारा जडान गरिएको छ ।
बुङदल खोलाको पानी, ४० डिपट्युवेल र १९ समवेलबाट दैनिक ३ करोड ७५ लाख लिटर पिउने पानी सङ्कलन गरिँदै आएको बतांइएकाे छ । बोर्डले कार्यालय परिसरभित्र अत्याधुनिक पानी परीक्षण प्रयोगशाला सञ्चालनमा ल्याएको छ । बोर्डले पानी सङ्कलन गर्ने कार्यमा प्रयोग गर्ने उद्देश्यले विभिन्न साइजका मोटर पम्पसेट खरिद गरेको जनाएको छ ।
बोर्डले हेटौंडा–१४ मा डिपट्युवेल, २ लाख लिटर क्षमताको पानी ट्याङ्की निर्माण र मेनलाइन शाखा पाइप विस्तार कार्य सम्पन्न गरेको बोर्डका प्रमुख विष्णुप्रसाद सापकोटाले जानकारी दिए । संघीय खानेपानी तथा ढल व्यवस्थापन आयोजना र हेटौंडा खानेपानी व्यवस्थापन बोर्डको संयुक्त आयोजनामा हेटौंडा–१६ शक्तिमा ६ वटा ९ सय घनमिटर क्षमताको समवेल निर्माण र करिब साढे ३ किलोमिटर पाइपलाइन विस्तार गर्ने कार्य सम्पन्न गरिएको सापकोटाले बताए ।
यसैगरी हेटौंडा–१५ को सानो सुकौलीमा बोर्डले १ लाख लिटर क्षमताको पानी ट्याङ्की र वडा नम्बर १६ मा शौचालय निर्माण गरेको छ । खानेपानी व्यवस्थापन बोर्ड र खानेपानी तथा सरसफाइ डिभिजन १ को संयुक्त लगानीमा हेटौंडा–११ थाना भर्याङको सिमलटार क्षेत्रमा हाल २ वटा समवेल, ४ लाख ५० हजार लिटर क्षमताको ओभरहेड पानी ट्याङ्की तथा घर निर्माण गरिएको प्रमुख सापकोटाले बताए । हेटौँडा–१२ र १३ का स्थानीय उपभोक्ताले आफ्नो लगानीमा छुट्टाछुट्टै खानेपानी ट्याङ्की निर्माण गरेर पाइप विस्तार गरी प्रत्येक घरमा खानेपानीको व्यवस्थापन गरेकाे बताइएकाे छ ।
हेटौंडा खानेपानी व्यवस्थापन बोर्डले सेवा विस्तार गरेका क्षेत्रमा नियमित रूपमा खानेपानी वितरण भइरहेको छ। हावाहुरीका कारण विद्युत आपूर्ति अवरुद्ध हुँदा पम्पिङ प्रणालीमा आधारित केही स्थानमा अल्पकालीन समस्या देखिए पनि समग्र नगर क्षेत्रमा खानेपानी आपूर्ति सहज रहेको बोर्डले जनाएको छ। हेटौंडा खानेपानी व्यवस्थापन बोर्डका अध्यक्ष प्रताप विष्टका अनुसार तीव्र शहरीकरण र जनसंख्या वृद्धि भइरहेका बेला पनि दीर्घकालीन योजना, स्रोत व्यवस्थापन तथा पूर्वाधार विस्तारका कारण नगरवासीले खानेपानी अभावको समस्या भोग्नुपरेको छैन।
“नेपालका धेरै शहरमा सुख्खा मौसममा पानीको हाहाकार हुने अवस्था छ, तर हेटौंडामा स्रोत संरक्षण, पूर्वाधार विस्तार र व्यवस्थापनका कारण नियमित सेवा दिन सफल भएका छौं,” अध्यक्ष विष्टले बताए। बोर्डका अध्यक्ष विष्टका अनुसार हाल खानेपानीको मुख्य स्रोतमा एक सतहगत मुहान, ४० वटा डिप ट्युबवेल र १९ वटा समवेल रहेका छन्। पानी भण्डारण क्षमता ८ हजार ९५२ घनमिटर रहेको छ भने करिब ८०० किलोमिटर लम्बाइको मुख्य तथा शाखा पाइपलाइनमार्फत वितरण प्रणाली सञ्चालन भइरहेको छ।
क्रमागत योजनाअन्तर्गत हेटौंडा–९ बेतखोल्ची डाँडामा ६ लाख लिटर क्षमताको पानी ट्यांकी निर्माण, हेटौंडा–१४ मा डिप ट्युबवेल तथा २ लाख लिटर क्षमताको ट्यांकी निर्माण, हेटौंडा–१५ मा ३ लाख लिटर क्षमताको ट्यांकी निर्माण, पाइपलाइन विस्तार तथा विद्युतीकरणका काम अघि बढिरहेका छन्।
यसैगरी बेतखोल्ची डाँडादेखि स्मृति चोकसम्म मुख्य पाइपलाइन विस्तार, रोटरी पम्प हाउसदेखि पिस पार्कसम्म करिब ४ किलोमिटर डिआई पाइपलाइन विस्तार तथा बुङ्दल मुहानदेखि सामरी पुलसम्म इन्टेक निर्माणसहित पाइपलाइन सुधार कार्य पनि सञ्चालनमा रहेको बोर्डले जनाएको छ।