मकवानपुर । भीम विराग सङ्गीत साहित्य कला प्रतिष्ठान नेपालले वरिष्ठ गीतकार राजेन्द्र थापा र गायिका निशा देसारलाई सम्मान गरेको छ ।
यस वर्षको १ लाख राशिको बिजुलीमाया वनः श्रेष्ठ अन्तर्राष्ट्रिय सङ्गीत पुरस्कारबाट थापा सम्मानित भएका हुन । यस्तै २५ हजार राशिको भीम विराग युवा सङ्गीत पुरस्कार २०७९ बाट देसार सम्मानित भएकी हुन । बिहीबार हेटौंडामा १५ औँ संस्करणको कार्यक्रम गरि थापा र देशारलाई वरिष्ठ साहित्यकार नगेन्द्र थापाले सम्मान प्रदान गरेका हुन् ।
सम्मानपछि गितकार थापाले आफूले देखेको भोगेको समाज, परिस्थितिलाई अक्षरमा उतारेर समाजमा सचेतना दिने गरेको बताए । “म बन्दुक बोकेको मान्छे हुं, तर कलम मेरो प्रिय हो” उनले भने “भीम बिरागलाई सम्झिरहने छु, म उहाँको फ्यान हुं ।”
व्यवसायी कन्हैयाकृष्ण श्रेष्ठले वि.सं. २०६४ मा आमा बिजुलीमाया व:न श्रेष्ठको नाममा स्थापित बिजुलीमाया व:न श्रेष्ठ अन्तर्राष्ट्रिय पुरस्कारबाट यसअघि गीत तथा सङ्गीत क्षेत्रका सशक्त व्यक्तित्वहरू अम्बर गुरूङ (२०६४), प्रेमध्वज प्रधान (२०६५), भक्तराज आचार्य (२०६६), फत्तेमान राजभण्डारी (२०६७), शान्ति ठटाल (२०६८), दीप श्रेष्ठ (२०६९), प्रकाश श्रेष्ठ (२०७०), न्हुच्छेबहादुर डङ्गोल (२०७१), मीरा राणा (२०७२), कर्म योञ्जन (२०७३), चेतन कार्की (२०७४), दावा ग्याल्मो (दीपक जंगम) र किरण प्रधान (२०७९) सम्मानित भइसकेका छन् ।

यसैगरी भीम विराग युवा सङ्गीत पुरस्कार २०७७ पोखराको हार्मोनिक समूह र २०७८ गायक शिव परियार प्रदान गरिएको थियो । हरेक वर्ष यो पुरस्कारलाई फरक फरक व्यक्तित्वले प्रायोजन गर्दै आएका छन् । यस पटक चितवनका साहित्यकार एलबी क्षेत्रीले उक्त पुरस्कारको प्रायोजन गरेका हुन । देशार रेडियो नेपालकी ‘क’ श्रेणी गायिका हुन् । २०६६ सालमा राष्ट्रव्यापी आधुनिक गीत सम्मेलनमा प्रथम भएकी थिइन् ।
प्रतिष्ठानले प्रदान गर्ने अन्य सम्मान तथा पुरस्कारहरू तुलसीमाया–शिवकुमारी सिर्जनशील नारी पुरस्कार, भीम–मथुरा बाल प्रतिभा पुरस्कार, कमला–भवानी सङ्गीत पुरस्कार, शीला नारी सङ्गीत पुरस्कार, हर्षनर बज्राचार्य स्मृती स्वर्ण पुरस्कार, विजय बानियाँ स्मृति लोक सङ्गीत पुरस्कार, चिनुकुमारी लामा स्मृति साहित्य पुरस्कार, मंगलादेवी श्रेष्ठ स्मृति स्वास्थ्य सेवा पुरस्कार, अजित सेन गुप्ता स्मृति भिन्न क्षमता पुरस्कार रहेको प्रतिष्ठान महासचिव छवि अनित्यले जानकारी दिए ।
२०५९ भाद्र ७ गते स्थापना भएको प्रतिष्ठानले नेपाली सङ्गीत, साहित्य र कला क्षेत्रको उन्नयनमा देश तथा विदेशमा रहेर नेपाली वाङ्मय क्षेत्रमा उल्लेखनीय योगदान पुर्याउँदै आउनु भएका सर्जक, स्रष्टाहरूलाई सम्मान एवम् पुरस्कृत गर्दै आइरहेको प्रतिष्ठानका अध्यक्ष केशवलाल श्रेष्ठले जानकारी दिए ।
- गाेपिनी दाहाल
मकवानपुर । चौथो मेयर कप फुटबल प्रतियोगितामा हेटौंडा वडा नम्बर ६ र १३ दोस्रो चरणमा प्रवेश गरेको छ । बुधबार भएको खेलमा विजयी हुँदै दुबै टोली दोस्रो चरणमा प्रवेश गरे ।
नगर खेलकुद विकास समिति हेटौंडाको आयोजनामा हेटौंडा–५ स्थित पिप्लेक्याम्पा रंगशालामा जारी प्रतियोगितामा हेटौंडा–६ ले १८ नम्बर वडालाई र हेटौंडा १३ ले १९ नम्बर वडालाई पराजित गर्दै अघिल्लो चरणमा स्थान सुरक्षित गरेका हुन् ।
हेटौंडा ६ को जीतमा सुरज स्याङ्तानले दुई गोल गरे । उनले गरेको दुई गोलले नै ६ नम्बरले अघिल्लो चरणको यात्रा तय गरेको हो । उनी खेलको म्यान अफ दी म्याच घोषित भए । १८ नम्बरले एक गोल आत्मघाती गोल प्राप्त गरेको थियो । खेलमा १८ नम्बरले प्राप्त पेनाल्टी सदुपयोग गर्न नसक्दा हार व्यहोर्न बाध्य भयो ।
प्रतियोगितामा हेटौंडा १३ को जीतमा एकमात्र निर्णायक गोल स्यामुएल सुनुवारले गरे । उनले खेलको अन्तिम मिनेटमा गरेको गोल नै निर्णायक भयो । उनी खेलको म्यान अफ दी म्याच घोषित भए ।
बिहीबारको पहिलो खेल हेटौंडा ७ र १४ तथा दोस्रो खेल १ र ४ नम्बर वडावीच हुनेछ । उक्त खेलको विजयी टोलीले अन्तिम चारमा स्थान सुरक्षित गर्नेछन् ।
मकवानपुर । बागमती प्रदेशका खानेपानी उर्जा तथा सिंचाइ मन्त्री एकालाल श्रेष्ठले वित्तीय संकट देखिएका सहकारीकाे नियमन गर्नु पर्ने बताएका छन् ।
मकवानपुरगढी- ३ मा रहेको जागरण वचत तथा ऋण सहकारी संस्थाले बुधबार आयोजना गरेकाे २५ औं रजत महोत्सव समापन समारोहमा मन्त्री श्रेष्ठले उक्त कुरा बताएका हुन् । सहकारीमा बसेर आफैं ऋणलिएर नतिर्ने प्रवृत्ति देखिएकोले सरकारले नियमित नियमन गर्नुपर्ने उनले बताए ।
उनले गाउँ भन्दा शहरको सहकारीमा वित्तीय संकट आएको बताए । ग्रामीण भेगमा सहकारी स्थापना गरेर स्वर्णिम अवधी समेत पार गरेकोमा जागरणलाई उनले बधाई दिए । मन्त्री श्रेष्ठले अहिलेको समय बजेट कार्यान्वयन र नयाँ बजेट बनाउने चरणमा रहेको बताउदै आगामी बजेट बनाउँदा कार्यान्वयन हुने खालकाे बनाइने बताए ।
सहकारी अभियानकर्मी सम्मानित
रजत महोत्सवमा संस्थाले संस्थापक सदस्य, मकवानपुरगढी गाउँपालिकाका सहकारी अभियानमा जिल्ला, प्रदेश र केन्द्रमा आफ्नो स्थान बनाएका सहकारी अभियानकर्मी, सञ्चारकर्मी, जेष्ठ शेयर सदस्यहरुलाई सम्मान गरेकाे छ ।
४९ जना संस्थापक सदस्यलाई सम्मान गरिएको हाे । त्यस्तै अभियानकर्मीहरुमा मकवानपुरगढीका नारायणप्रसाद देवकोटा, बद्रीप्रसाद लम्साल, विदुर हुमागाई, कल्पना श्रेष्ठ, सुलोचना स्याङ्तान, निर्मला लम्साल, रामजी सापकोटा, हरिप्रसाद अधिकारी, खीलाप्रसाद चौलागाई, हरिप्रसाद कंडेल र कृष्ण बहादुर विडारीलाई सम्मान गरिएको छ ।

यसैगरी सञ्चारकर्मी सुरेश श्रेष्ठ र श्रीराम अर्जुनलाई सञ्चार माध्यमबाट सहकारी अभियानमा सहयाेग पुर्याएकाेमा सम्मान गरिएको हाे । यस्तै पुर्व कर्मचारीतर्फ भगवती घिमिरे, कल्पना सापकोटा, उमा रुम्बा, सन्तोषी श्रेष्ठ, कविता तिवारी, आइतीमाया थिङ र पुना राईलाई सम्मान गरिएको थियो । रजत महोत्सवको अवसरमा जागरण साकोस रजत वर्ष स्मारिका-२०८० विमोचन समेत गरिएको थियो ।
सहकारी अध्यक्ष कल्पना श्रेष्ठको सभाध्यक्षता तथा मन्त्री श्रेष्ठको प्रमुख आतिथ्यतामा भएकाे कार्यक्रममा सहकारी मन्त्रालयका रजिष्ट्रार रोहित पोखरेल, मकवानपुरगढी गाउँपालिकाका वडा ३ का वडाध्यक्ष भागवत घिमिरे, वडा ४ का अध्यक्ष अर्जुनप्रसाद तिमल्सिना,बागमती प्रदेश बचत संघका अध्यक्ष उद्धव सापकोटा, महासचिव जिवसराज खड्का, प्रमुख कार्यकारी अधिकृत केशव प्रसाद दाहाल, नेफ्स्कुन फिल्ड हेटौंडा ईन्चार्ज विदुर खड्कालगायतका सहभागिता रहेकाे थियाे ।
चितवन। चितवन राष्ट्रिय निकुञ्ज क्षेत्रमा मंगलबारदेखि विक्रम बाबा पूजा एवम् मेला सुरु भएको छ ।
प्रत्येक वर्ष चैत कृष्ण औँशीको दिनदेखि शुरु भएर वैशाख पूर्णिमासम्म मेला सञ्चालन हुने गर्दछ । यस वर्ष पनि चैत कृष्ण औँशीको दिनदेखि शुरु भएर वैशाख ११ गते पूर्णिमाको दिनसम्म मेला सञ्चालन हुनेछ ।
मंगलबार भरतपुर महानगरपालिका उप प्रमुख एवम् मेला आयोजना मुल समारोह समितिका संयोजक चित्रसेन अधिकारीले एक कार्यक्रमका बिच विक्रम बाबाको पूजा आराधना गरी मेलाको शुभारम्भ गरे । मेलाको शुभारम्भ गर्नुहुँदै नगर उपप्रमुख अधिकारीले विक्रम बाबा सबैको आस्थाको केन्द्र भएको बताए । `हिजोका दिनमा थारु समुदायले मात्रै मनाउँदै र मान्दै आएको यस पर्वलाई अहिले सबै जातजातिहरुले उतिकै महत्वका साथ मनाउँदै आएको पाइन्छ´ उप प्रमुख अधिकारीले भन्नुभयो `विक्रमबाबा हामी सबैको आस्था र धरोहर पनि हो ।´
चैते दसैँमा हजारौं भक्तजनले विक्रमबाबा दर्शन गर्ने र पशुपंक्षी वली दिने प्रचलन रहिआएको छ । मेलामा चितवन सहित नवलपुर, नवलपरासी, तनहुँ, लमजङ, गोर्खा, मकवानपुरलगायतका जिल्लाबाट दर्शनार्थी तथा भक्तजनहरु आउने गर्छन् । साथै छिमेकी राष्ट्र भारतबाट पनि दर्शनार्थी तथा भक्तजनहरु आउने गर्छन् ।
मन्दिरमा पूजा गर्नका लागि बिहान ६ बजेदेखि साँझ ५ बजेसम्म समय तोकिएको छ । साँझ ५ वजे पछि जंगली जनावारको चहलपहल हुने भएकाले सो समय निर्धाारण गरिएको निकुञ्ज प्रशासनले जानकारी दिएको छ ।
विक्रमबाबाको दर्शन गर्नाले सन्तान प्राप्ति, सुख शान्तिलगायतका मनोकांक्षा पूरा हुने जनविश्वास रहिआएको पाइन्छ । जानकारहरुका अनुसार वनाम गरेको आदीबासीहरुको (गुरौ) को बाघको आक्रमणबाट ज्यान गएको ठाउँमा पूजा गर्नाले मनले चिताएको पूरा हुन्छ भन्ने विश्वास पनि रहिआएको छ ।
चितवनको राप्ती पुलबाट करिब २ किलोमिटर निकुञ्ज भित्र विक्रमबाबाको दर्शन तथा पूजापाठ गर्ने गरिन्छ ।
मेलामा धुमपान तथा मद्यपानलाई पूर्णरुपमा निषेध गरिएको छ । त्यस्तै मेला परिसरमा सहायता कक्ष र हेल्थ डेस्क पनि राखिएको छ । भक्तजनहरूको स्वास्थ्य अवस्थालाई मध्यनजर गर्दै एम्बुलेन्स,भइपरी आउने दैवी प्रकोप तथा उद्धार को लागि दमकल पनि मेला अवधिभर मेला परिसरमा रहनेछ । विक्रमबाबा पूजा स्थल कसरा क्षेत्रको भित्री व्यवस्थापनको जिम्मा चितवन राष्ट्रिय निकुञ्जले गरेको छ भने बाहिरी क्षेत्रको मेला व्यवस्थापनको जिम्मा नगर प्रहरी बल, नेपाल प्रहरी र सशस्त्र प्रहरी बलले लिएको छ ।
झण्डै ७ लाख दर्शनार्थीहरुले मेला अवलोकन गर्ने अनुमान गरिएको कार्यसम्पादन समितिका सयोजक एवम् भरतपुर- २३ का अध्यक्ष दीपक दवाडीले जानकारी दिए ।
मकवानपुर । मकवानपुरको हेटौंडामा जारी मेयर कप फुटबल प्रतियोगिता अन्तर्गत मंगलबारको खेलमा हेटौंडा १ र १५ नम्बर विजयी भएका छन् ।
हेटौंडा-५ स्थित पिप्लेक्याम्पा खेल मैदानमा जारी चौथो मेयर कप प्रतियोगितामा हेटौंडा १ ले १७ नम्बर वडालाई र हेटौंडा १५ ले २ नम्बर वडालाई पराजित गरेको हो । १ नम्बर वडाले १७ नम्बरलाई पेनाल्टी सुटआउटमा ५-४ गोल अन्तरले पराजित गर्यो भने हेटौंडा १५ ले २ नम्बर वडालाई ५-० गोलले अन्तरले जित हासिल गर्यो ।
मंगलबार १ नम्बर र १७ नम्बर बिच भएको पहिलो खेल निर्धारित समय १-१ गोलको बराबरीमा टुंगिएपछि पेनाल्टीमा १ नम्बर वडा ५-४ गोल अन्तरमा विजयी भएको हो । खेलमा १ नम्बर वडाका विश्व लामा म्यान अफ दी म्याच घोषित भए ।
यसैगरी, मंगलबारको दोस्रो खेलमा हेटौंडा १५ को तर्फबाट रिकेश श्रेष्ठले खेलको २० र ४८ औं मिनेटमा, विश्वास ब्लोनले २८ र ३५ औं मिनेटमा तथा अनिष लामाले खेलको ४१ औं मिनेटमा गोल गर्दै २ नम्बरलाई पराजित गरेको थियो । खेलमा विश्वास ब्लोन म्यान अफ दी म्याच घोषित भए ।
हेटौंडामा जारी प्रतियोगितामा उपमहानगरका १९ वडाको सहभागिता रहेको छ । नगर खेलकुद विकास समिति हेटौंडाको आयोजनामा भएको प्रतियोगिताको विजेताले नगद २ लाख र उपविजेताले नगद १ लाख ५० हजार रुपैयाँ प्राप्त गर्ने आयोजकले जनाएको छ ।
बुधबार हेटौंडा १६ र १३ को पहिलो तथा हेटौंडा ६ र १८ नम्बरको दोस्रो खेल हुने छ ।