मकवानपुर । सत्ता समीकरण परिवर्तनसँगै केन्द्रीय सरकारबाट प्रचण्ड बाहिरिएका छन् । शुक्रबार सदनमा विश्वासकाे मत प्राप्त नगरेपछि उनी नेतृत्वकाे सरकार ढलेकाे हाे । शुक्रबार नै राष्ट्रपतिबाट अर्काे सरकार गठनकाे लागि आव्हान नेपाली काँग्रेस र नेकपा एमालेले सरकार गठनकाे लागि दावी पेश गरेका छन् ।
नेपाली काग्रेस र नेकपा एमालेकाे समिकरणमा केपी शर्मा ओलीकाे नेतृत्वमा सरकार गठन प्रक्रिया आइतबार मात्रै हुने भएकाे छ । केन्द्र सरकारकाे परिवर्तनकाे प्रक्रिया सदनबाटै तय भएकाे छ त्यसकाे असर प्रदेश सरकार फेरबदलको प्रक्रिया सुरु हुनेछ । केन्द्रमा नयाँ सरकार निर्माणकाे प्रक्रिया सुरु हुँदा प्रदेशमा पनि नयाँ सरकार गठनकाे तयारीमा दलहरू छन् ।
बागमती प्रदेशमा केन्द्रीय समिकरण अनुसार नयाँ सरकार गठनकाे लागि असार २४ गते नेकपा एमालेले माओवादी केन्द्रलाई दिएकाे समर्थन फिर्ता लिदैं सरकारबाट बाहिरिइसकेको छ । योसँगै माओवादी केन्द्रबाट मुख्यमन्त्री बनेका शालिकराम जम्कट्टेल अल्पमतमा परेको छन् । तर मुख्यमन्त्री जम्कट्टेल पनि सदनकाे फेस गर्ने प्रचण्डकाे पदचाप पछ्याउने तयारीमा छन् ।
काँग्रेस र एमालेले मधेस बाहेक ३-३ वटा प्रदेश सरकारको नेतृत्व गर्ने गरी सत्ता साझेदारी गर्ने सहमति भएकाे बताइएकाे छ । सहमति बाहिर नआएपनि बागमती प्रदेश सरकार नेतृत्व कांग्रेसको भागमा परेको चर्चा छ । २०७४ सालकाे निर्वाचनपछि पहिलाे पटक बागमती प्रदेशमा कांग्रेसले सरकार निर्माण गर्ने अवसर प्राप्त गर्ने भएकाे छ ।
बागमतीमा अहिलेसम्म एमालेका २, एकीकृत समाजवादी र माओवादी केन्द्रका १-१ गरी ४ मुख्यमन्त्री भएका छन् । प्रदेशकाे पाँचौ मुख्यमन्त्री कांग्रेसबाट हुने निश्चित भएकाे छ तर काँग्रेसबाटको मुख्यमन्त्री हुने भन्ने अन्योलता रहेकाे छ । सरकारको नेतृत्व कांग्रेसले नै गर्ने भएपछि मुख्यमन्त्रीका लागि विशेष गरेर दुईजना नेताहरू सक्रिय बनेका छन् ।
कांग्रेस संसदीय दलका नेता बहादुर सिं लामा र यसअघि संसदीय दलका नेता बनिसकेका इन्द्रबहादुर बानियाँ मुख्यमन्त्री बन्ने दौडमा रहेकाे बताइन्छ । अहिले दुवै नेताहरू काठमाडौं केन्द्रित रहेर आ–आफ्नो पक्षमा लबिङ बढाइरहेका छन् । सरकार गठनका विषयमा केन्द्रमा सामान्य छलफल भए पनि निकास दिने गरी छलफल हुन नसकेको हाे ।
संसदीय दलकाे विधान अनुसार लामा मुख्यमन्त्री
नेपाली कांग्रेसको प्रदेशसभा संसदीय दलको विधानअनुसार संसदीय दलको नेता नै मुख्यमन्त्री हुने व्यवस्था छ । प्रदेशसभा संसदीय दलको विधानको दफा ६ को उपदफा १० मा पार्टीले प्रदेश सरकार गठन गरेको अवस्थामा नेताले नै नेतृत्व गर्ने भन्ने छ ।
काँग्रेस बागमती प्रदेशकाे संसदीय दलकाे नेतामा नुवाकाेटका बहादुर सिंह लामा छन् । लामा अघि मकवानपुरका इन्द्र बहादुर बानियाँ संसदीय दलका नेता थिए । काँग्रेस बागमती प्रदेश सभापति बानियाँलाई हरादै लामाले संसदीय दलकाे नेता बन्न सफल भएका थिए । राजनीतिमा अन्य घटना नघटे कांग्रेसको प्रदेशसभा संसदीय दलको विधान अनुसार अघि बढ्दा बागमतीकाे मुख्यमन्त्रीमा संसदीय दलकाे नेता लामाको विकल्पमा जान सकिदैन् ।
पछिल्लो समय संसदीय दलका नेता लामाको प्रस्तुति कमजोर हुँदै गएकाे र संसदीय दलको भूमिका सशक्त बन्न नसकेको पार्टीभित्र गुनासो रहेकाे बताइन्छ । जसकाे कारण दलको नेता परिवर्तनको चर्चा समेत चलेको थियो । संसदीय दलकाे नेता परिवर्तनकाे पक्षमा केन्द्रले निर्णय गरे र बाँनिया संसदीय दलकाे नेता बने भने बाँनिया नै मुख्यमन्त्रीकाे दाबेदार हुनेछन् ।
नेता लामाबाट प्रदेश सरकार चल्न नसक्ने र त्यसका लागि दलको नेता परिवर्तन वा अन्य विकल्प खोजी गरेर बानियाँलाई मुख्यमन्त्री बनाउनु पर्ने बानियाँ पक्षधरकाे भनाई छ । यता, नेता लामा पक्षका सांसद भने तत्काल संसदीय दलको नेता परिवर्तन सम्भव नरहेको बताउँछन् । विधानअनुसार नै सरकारको नेतृत्व दलको नेताले गर्ने लामा पक्षीय सांसदकाे बुझाइ छ । कांग्रेस आफ्नो विधान विपरीत नजाने हाे भने लामा नै मुख्यमन्त्री बन्ने पक्का छ । दलको नेता नै फेर्ने योजना भएको खण्डमा भने पार्टी केन्द्र नै निर्णायक भूमिकामा रहने छ ।
प्रदेश स्थापनाकाे ७ वर्षपछि काँग्रेसकाे नेतृत्व
प्रदेश स्थापनाकाे ७ वर्षपछि नेपाली काँग्रेसले सरकारकाे नेतृत्व गर्दैछ । उक्त अवधिमा अधिकांश समय प्रमुख प्रतिपक्ष रहेको कांग्रेस विगतमा ३ वर्ष सत्ता साझेदार बनेको थियो । २०७८ कात्तिकमा सत्ता साझेदारी गर्दै काँग्रेस सरकारमा सहभागी भएकाे थियाे । संघीयता कार्यान्वयनकाे ७ वर्षकाे अवधिमा काँग्रेस एमाले गठबन्धनले बागमतीमा काँग्रेसकाे सरकार गठन जुराएकाे हाे ।
२०७८ मा कांग्रेससहितको समीकरणबाट एकीकृत समाजवादी पार्टीका राजेन्द्र प्रसाद पाण्डेले बागमती प्रदेश सरकारको नेतृत्व सम्हालेका थिए । उक्त समय मुख्यमन्त्री त्यागेर निर्वाचनको तयारीमा लागेको कांग्रेसले २०७९ पुसमा गठित सरकारमा पनि स्थान पाउन सकेन । २ महिना प्रतिपक्षमा रहेको कांग्रेस चैतमा मात्र सरकारमा सामेल भएकाे थियाे ।
एमाले, माओवादी केन्द्र र राप्रपाको गठबन्धन सरकार २ महिनामा ढलेपछि २०७९ चैतमा सरकारमा कांग्रेस सहभागी भएको थियो । सो समयमा पनि मुख्यमन्त्रीको सशक्त दाबी गरेको कांग्रेसले माओवादी केन्द्रलाई सरकारको नेतृत्व दिएको थियो ।
एक वर्षपछि २०८० फागुनमा फेरि एमाले माओवादीसहितकाे समीकरण भत्किए लगत्तै सरकारबाट कांग्रेस बाहिरियो । माओवादी केन्द्रकै नेतृत्वमा एमाले, एकीकृत समाजवादी र हाम्रो नेपाली पार्टीबिच सत्ता साझेदारी हुँदा कांग्रेस प्रमुख प्रतिपक्षको भूमिकामा रहेकाे थियाे । कांग्रेस विगत ४ महिनादेखि प्रमुख प्रतिपक्षको भूमिकामा रहँदै आएको छ । संघीयता कार्यान्वयनपछि भएका २ वटा निर्वाचन पश्चातका अधिकांश समय कांग्रेस प्रमुख प्रतिपक्षको भूमिकामै रहँदै आएको छ ।
२ कार्यकालको ७ वर्षे अवधिमा कांग्रेस २६ महिनामात्र सरकारमा रह्यो । सो बाहेकका अधिकांश समय प्रतिपक्षमा रहेर भूमिका निर्वाह गर्दै आएको छ ।
नयाँ सरकार गठनकाे प्रक्रिया मुख्यमन्त्रीकाे विश्वासकाे मतपछि
बागमतीमा नयाँ समिकरण अनुसारकाे सरकार मुख्यमन्त्रीले विश्वासकाे मत लिएपछि सुरु हुनेछ । अहिलेकाे मुख्यमन्त्री शालिकराम जम्कट्टेलकाे सरकारलाई दिएकाे समर्थन नेकपा एमालेले फिर्ता लिएपछि अल्पमतमा परेका जम्कट्टेलले प्रदेश सभाकाे फेस गर्ने तर राजिनामा नदिने यस अघि बताएका छन् ।
११० सदस्य रहेकाे प्रदेशसभमा काँग्रेस र एमाले बीचकाे नयाँ समिकरणले जम्कट्टेलले विश्वासकाे मत पाउने देखिदैन् । प्रदेश सभामा बहुमत प्राप्त गर्न ५६ सदस्यकाे समर्थन आवश्यक छ । काँग्रेसका ३७ र एमालेका २७ सांसदले गर्दा ६४ सदस्य नयाँ समिकरण कै पुग्छ । जुन सरकार गठनका लागि पर्याप्त हुन्छ ।
केन्द्रमा पुष्पकमल दाहाल प्रचण्डकाे नेतृत्व सरकारलाई समर्थन नगरेका दलले समेत प्रदेशमा समर्थन गर्ने देखिदैन्। केन्द्रमा प्रचण्डलाई समर्थन गरेका माओवादी केन्द्रका २१, एकीकृत समाजवादीका ७ सांसद मात्रै छन् । यद्यपी बर्तमान सरकारलाई समर्थन गरेकाे हाम्रो नेपाली पार्टीका २ सांसद समेत गर्दा उनकाे पक्षमा ३० सांसद देखिन्छ । राष्ट्रिय प्रजातन्त्र पार्टी (१३) ले समर्थन गर्ने देखिदैन् । नेपाल मजदुर किसान पार्टीका (३) यसअघि नै सरकारलाई समर्थन नगरेकाे अवस्था छ ।
मुख्यमन्त्री जम्कट्टेलले राजिनामा नदिने प्रष्ट भइसकेकाे अवस्थामा प्रदेश सभा सचिवालयमा बैठकमा विश्वासकाे मतकाे लागि कार्यसूची तय हुनेछ । त्यसपछिकाे बैठकमा उनले विश्वासकाे मतकाे लागि प्रस्ताव राख्नेछन् । विश्वासकाे मत प्राप्त नभए उनी स्वतः पदमुक्त हुनेछन र नयाँ सरकार गठनकाे बाटाे खुल्नेछ । त्यसकाे लागि केही समय पर्खनु पर्ने देखिन्छ ।
काँग्रेस संसदीय दलकाे आग्रह तत्काल मार्ग प्रशस्त गरिदिनुस
नेपाली कांग्रेस बागमती प्रदेश संसदीय दलले मुख्यमन्त्री शालिकराम जम्कट्टेललाई मार्ग प्रशस्त गरिदिन आग्रह गरेको छ । बिहीबार कांग्रेस संसदीय दलका नेता बहादुरसिं लामाले विज्ञप्ति जारी गर्दै मुलुकमा राजनीति स्थायित्व र संविधानमा समयानुकूल संशोधन गर्न संघ र सातै प्रदेशमा सहमतिय सरकार गठन हुने प्रक्रियामा रहेका कारण मुख्यमन्त्रीले सहमतीय सरकार गठन गर्न तत्काल मार्ग प्रशस्त गर्न अनुरोध गरेका हुन् ।
‘वर्तमान मुख्यमन्त्रीको नेतृत्वमा गठन भएको प्रदेश सरकारबाट एमालेका मन्त्रीहरुले राजीनामा बुझाइ विश्वासको मत फिर्ता लिइसकेको पृष्ठभूमिमा वर्तमान सरकार प्रष्टरुपमा अल्पमतमा परी कामचलाउन सरकारको हैसियतमा पुगिसकेको स्थिति छ ।’, विज्ञप्तिमा हालको अवस्थामा सरकारलाई कुनै पनि महत्वपूर्ण निर्णय वा नियुक्ती नगर्न समेत आग्रह गरिएको छ ।
एमाले र कांग्रेसको नयाँ राजनीतिक समीकरण जनअपेक्षित भएको कांग्रेस संसदीय दलको दावी छ । नयाँ सत्ता समिकरणका साझेदार दल एमालेले यसअघि विज्ञप्ति जारी गर्दै दीर्घकालिन असर पार्ने निर्णय नगर्न सरकारलाई आग्रह गरिसकेको छ ।
आइतबार बागमतीमा नयाँ सरकारकाे बाटो खाेलिने सम्भावना
बागमती प्रदेशका मुख्यमन्त्री शालिकराम जम्कट्टेलले आइतबार मात्रै विश्वासकाे मिति तय गर्ने भएका छन् । साउन पहिलो साता नयाँ सरकार निर्माणको मार्ग खुल्ला गर्ने तयारी गरेका छन् । विश्वासको मत लिने विषयमा तत्काल मिति तय नगरिएकोले सत्ता गठबन्धनका दलहरुबिच छलफल गरेर निर्णय गर्ने बताउँछन् ।
दलहरूसँगको छलफलका आधारमा एमाले कांग्रेस गठबन्धनबाट सरकार निर्माणका लागि बाटो खुल्ला गरिदिने उनको बताए । साझेदार दलहरूसँगको छलफल पछि राजिनामा वा विश्वासकाे मतकाे लागि संसद् सचिवालयमा पत्र पठाउने तय गरिने भएकाे बताइन्छ । केन्द्रमा माओवादी नेतृत्वले संसदबाट विश्वासको मत नपाएकोमा प्रदेशमा पनि विश्वासकाे मत प्राप्त नहुने बुझेका उनले सोही अनुसार सरकार निर्माणका लागि मार्ग प्रशस्त गर्न प्रक्रियामा अघि बढ्न लागेका हुन् ।
नयाँ समीकरणका दलहरू केन्द्रमा सरकार निर्माणमा जुटेको र आइतबार नै नयाँ सरकार गठन हुने भएकाले सो पश्चात् एमाले कांग्रेसले प्रदेशमा सरकार गठनकाे तयारी थाल्ने बुझाइमा रहेका मुख्यमन्त्री जम्कट्टेलले साेही अनुसार राजिनामा दिने वा विश्वासकाे मत लिने गरी सत्तारुट दलसँगकाे छलफलपछि अघि बढ्ने भएका हुन् ।
मकवानपुर । मकवानपुर जिल्ला हेटौंडा उपमहानगरपालिका वडा न १७ राजदेवी मन्दिर परिसरमा शनिबार फरक माहोल थियो । कार्यक्रमको लागि खचाखच हल भरिएको थियो, तर उस्तो साह्रो उल्लाष र रौनकता देखिदैनथ्यो।
कार्यक्रममा गण्डकी प्रदेशको पूर्व प्रदेश प्रमुख सिता पौडेल, बागमती प्रदेशको पुर्व मुख्यमन्त्री डोरमणी पौडेलेलगायत पाटीका विभिन्न तहका नेता तथा कार्यकर्ताको उपस्थिती थियो । कार्यक्रमको अग्रभागमा राखिएको थियो बालकुमारी थापाको तस्बीर ।
सन्दर्भ थियो, नेकपा एमाले पार्टी सेल्टर दाता बालकुमारी थापाको स्मृतिमा आयोजना गरिएको सम्मान कार्यक्रम । पार्टी सेल्टर दातामा निधन भएको ४ वर्षपछि उनको बासस्थान नजिकै मन्दिर परिसरमा आयोजना गरिएको कार्यक्रममा थापा जस्तै दुई नेतृहरु उनकै नामबाट सम्मानीत भए । गण्डकी प्रदेशको पूर्व प्रमुख तथा नेकपा एमाले स्थायी कमिटी सदस्य सिता पौडेललगायतले उनीहरुलाई सम्मान गरेका हुन् ।
कार्यक्रममा सहभागी सबै नेता तथा कार्यकर्ताहरुले पार्टी आमाको नामले चिनिने स्व. बालकुमारी थापाले पार्टीमा गरेको योगदानको कदर गरे, स्मरण गरे । आफूहरुले थापाको जीवनीबाट पाठ सिकेको भन्दै योगदानलाई पछ्याउनु पर्ने बताए ।
थापालाई कसले कसरी सम्झिए यहाँ क्लिक गरेर भिडियो हेर्न सकिनेछ ।
कार्यक्रममा एमाले मकवानपुरको लागि अगुवाइ गर्ने हस्तिको रुपमा परिचित बालकुमारी थापाका सहयोद्धाहरु तारा लामा र सिता लामिछानेलाई नगद सहित सम्मान गरिएको थियो । उनीहरुलाई बालकुमारी थापा स्मृति केन्द्रको आयोजना तथा अखिल नेपाल महिला संघ मकवानपुरको समन्वयमा भएको कार्यक्रममा केन्द्रकी अध्यक्ष तथा जुनेली श्रेष्ठले केन्द्रमार्फत मकवानपुरको राजनीति तथा समाज सेवामा योगदान गर्ने महिलालाई सम्मान गरिने बताइन् ।
“हामी कुन पार्टी वा दलको मान्छे भनेर हेर्ने छौनौ, पहिलो पटक भएकाले हामीले आफ्नै पार्टीका योद्धालाई सम्झियौ, तर आगामी वर्षबाट हामी पार्टीभन्दा माथि उठेर महिलाको योगदानलाई सम्मान गर्नेछौ” श्रेष्ठले भनिन् ।
महिलाहरुको योगदानलाई खोजि गर्ने, अभिलेखिकरण गर्ने र सम्मान तथा हौसला प्रदान गर्ने उद्देश्यका साथ बालकुकारी थापा स्मृति केन्द्र स्थापना गरिएको सचिव सुमित्रा काफ्लेले बताइन् ।
को हुन् तारा र सीता
तारा : वि.स २०१९ साल असार १५ मा मकवानपुरको फाखेल ४ कफ्लेनी (हाल इन्द्र सरोवर) मा आमा मानकुमारी लामा र बुबा मानबहादुर लामाको सन्तानको रुपमा जन्मेकी तारा लामा वि.स २०३२ सालमा पार्टी सम्पर्कमा आएकी थिइन् । मकवानपुरले कम्युनिष्ट आन्दोलनमा आफ्नो उर्जाशिल समय खर्चेकी लामाले गाउँदेखि शहरी स्तरमा पार्टी कमिटी विस्तार र मजबुतीको लागि योगदान गरिन् ।
वि.स २०६४ सालमा पार्टी सदस्य लिएकी लामा २०३८ मै अनेमसंघ मकवानपुरको जिल्ला सचिव भएकी थिइन् । पार्टी काममा लागिपर्दा जेल जीवन समेत भोग्नु परे पनि उनीले सधैं आफ्नो मातहतका महिलाहरुलाई जोश प्रदान गर्ने गरेकी छिन् । “हाम्रो पालको राजनीति ज्यानै माया मारेर गर्नु पथ्र्यो, अहिले जस्तो थिएन” सम्मान ग्रहण पछि उनले भनिन् “आफ्नो ज्यान र परिवारभन्दा पार्टीको माया लाग्थ्यो ।”
सीता : वि.स २००५ जेष्ठ १५ गते धादिङ जिल्लाको ७ घुम्तीमा आमा विष्णुमाया पण्डित बुवा ठूले पण्डितको सन्तान सीताको १० वर्षकै उमेरमा विवाह भएको थियो । मकवानपुर जिल्ला चित्लाङ निवासी केशव लामीछानेसँग विवाहपछि मकवानपुर आएकी सीता २०३६ सालदेखि कम्युनिष्ट आन्दोलनमा लागिन् ।
वि.स २०३८ सालमा अध्ययन समुहमा आवद्ध भएकी उनी पार्टी टोल कमिटीमा २०४० सालमा नगरसम्मेलन तयारी समितीमा २०४१ मा वडा कमिटीमा आवद्ध २०५३ सालमा सक्रिय भइन् । सानैदेखी बिद्रोही स्वभावको सीता आफूमाथि समेत हिंसा हुँदासम्म आफूलाई सम्हालेर पार्टीको निर्देशनमा अडिग नेतृ मानिन्छिन् ।
पार्टी लडाकुहरुलाई भूमीगत काममा सहयोग गरेको, सुरक्षा दिएको साथै बस्ति, टोल स्तरदेखि जिल्ला तहसम्म संगठन विस्तार र सुदृढीकरणमा योगदान वापतसम्मान गर्दै उनीहरुलाई सम्मान गरिएको केन्द्रकाे सचिव सुमित्रा काफ्लेले बताइन् ।
सूर्य आकाशका जस्तै अर्का भानु तिमी धरा
नेपाली दिलमा चुम्दै दौडिएका गरा गरा
नभमा झुल्किदै हाँस्दै उषा किरणका छरी
धरा भानु!तिमी सारा अन्धकार सबै हरी ।
तेस्रो भानु गरा जोड्ने एकीकरण तीरमा
अक्सिजन तिमी हाम्रो भाषासूत्र समीरमा!
तोतेमा छौ तिमी भाका थोतेमा लय तानका
गीत सङ्गीतका केन्द्री नेपाली शान मानका ।
अन्यायीमा तिमी राम न्यायीमा छौ विभीषण
व्यङ्ग्यनायक हे,स्रष्टा!श्रध्दाभाव छ अर्पण!
देशमा,भेषमा,भाषा, संस्कृतिमा रमाउँछ
भाषा,भेष,कला भित्रै सौन्दर्य मुस्कुराउँछ ।
शिष्टताका लिई शब्द मित्रमा भई भिन्नका
छिन्नभिन्न भए जम्मै तिमी एक अभिन्नका
व्यङ्ग्यका वाँणले हान्दा उडुस उपियाँनिर
पुगी बेजोडले ठोक्दा झुके अन्यायका शिर।
जनजीवनका भाषा एकीकरणका छत
अजरामर छौ साँच्चै नहुने दाग लत्पत
समद्रष्टा छ यो चन्द्र रातमा हुन्छ शीतल
नेपाली समका द्रष्टा भानु!झल्मल झल्मल।
धनकुटा
छन्द अनुष्टुप
निर्माण व्यवसायीले डिभिजन सडकमा लगाए ताला
Tags: No Comments
मकवानपुर । निर्माण व्यवसायी संघ मकवानपुरले सडक डिभिजन कार्यालय हेटौंडामा ताला लगाएका छन् । निर्माण व्यवसायी सरकारको विकास निर्माणको काम गरेबापतको भुक्तानी नपाएपछि आन्दोलित हुदै डिभिजन सडकमा ताला लगाएका हुन् ।
विभिन्न क्षेत्रमा निर्माणको कार्य सम्पन्न हुँदा समेत भुक्तानी नपाएकाे विराेधमा निर्माण व्यवसायीले भुक्तानी निकासा माग गर्दै डिभिजन सडक कार्यालय हेटौंडामा शुक्रबार तालाबन्दी गरी धर्ना दिएका छन् । निर्माण व्यवसायी संघ मकवानपुरले डिभिजन सडकमार्फत भएका कामको भुक्तानीको निकासाका लागि माग गर्दै धर्ना र तालाबन्दी गरिएको हो ।
कार्यालयकाे मुख्यद्वारमा संघ मकवानपुर अध्यक्ष बालगोपाल कँडेललगायतका निर्माण व्यवसायीले तालाबन्दी गरी विरोध जनाएका थिए । संघले सडक र पुल निर्माण गरिएको २५ करोड भन्दा बढी रकम भुक्तानी नपाएको जनाएको छ । गत फागुनदेखि नै निर्माणको कामको बिलसहित भुक्तानी माग गर्दासमेत भुक्तानी पाएका छैनन् । सडक डिभिजन कार्यालय, हेटौंडा मातहतका मकवानपुर, बारा र पर्सा जिल्लामा भएका कामको भुक्तानी नपाएपछि तीन जिल्लाका निर्माण व्यवसायी संयुक्त रूपमा धर्नामा बसेका थिए ।
निर्माण व्यवसायीले लगाएको ताला प्रहरीले खोलेको थियो । सडक डिभिजन कार्यालय, हेटौंडाका प्रतिनिधि र धर्नामा बसेका निर्माण व्यवसायी संघ मकवानपुरका पदाधिकारीबिच छलफल भएको थियो । छलफलमा निर्माण व्यवसायीले तत्काल भुक्तानीको व्यवस्था गर्न माग गरेपछि सडक डिभिजनका कर्मचारीले भुक्तानीका लागि पहल गर्ने प्रतिबद्धता जनाएका थिए ।
संघ मकवानपुरका अध्यक्ष कँडेलले व्यवसायीले काम सम्पन्न गरेर भुक्तानी माग गरेकाे लामाे समय हुँदा समेत भुक्तानी नपाएपछि धर्ना र तालाबन्दी गरिएको जानकारी दिए । निर्माण व्यवसायीको माग तत्काल सम्बोधन नभएमा थप आन्दोलनका कार्यक्रम गर्न संघ बाध्य हुने समेत उनले बताए । ‘कार्यालयमा ताला लगाउनु रहर हाेइन बाध्यता हाे’ कँडेलले भने आफ्नाे सम्पत्ति वैंकमा राखेर लगानि गरि निर्माण गरेका काम सम्पन्न भईसकेपछि पनि भुक्तानी नहुँदा यस्ताे कदम चाल्न बाध्य भएका हाैं ।’ ‘निर्माण व्यवसायीलाई राज्यले पिडामा पारेकाे छ हाम्राे माग तत्काल सम्बाेधन नभए शसक्त रुपमा सडकमै आन्दाेलनमा उत्रने छौं’ उनले भने ।
संघका अनुसार डिभिजन सडकलगायतका कार्यालय र स्थानीय तहका ५० करोड रुपियाँभन्दा बढी रकम निर्माण व्यवसायीले भुक्तानी पाउन बाँकी रहेको छ । काम गरेको बिलसहित भुक्तानीलाई अनुरोध गर्दा समेत विभिन्न बहानामा भुक्तानी नपाएको संघले जनाएकाे छ ।
संघले डिभिजन सडक मार्फत निर्माण व्यवसायीले करिब १७ करोड रुपियाँ निर्माणको कामबापत भुक्तानी पाउन बाँकी रहेको भन्दै तत्काल भुक्तानीको व्यवस्था मिलाउन माग गरेको छ । स्थानिय तहहरुबाट १५ कराेड भुक्तानी हुन बाँकी रहेकाे छ भने पुल निर्माणकाे १२ कराेड, सडक निर्माणकाे १५ कराेडसम्म भुक्तानी रहेकाे संघले जनाएकाे छ । जिल्लाभर करिव ५० कराेड रकम भुक्तानी बाँकी रहेकाे बताइएकाे छ ।
मकवानपुर । नेकपा (एमाले) मकवानपुरको जनसंगठन समन्वय संयन्त्रको पहिलो बैठकले वार्षिक कार्ययोजना अनुमोदन गरेकाे छ । संयन्त्रकाे शुक्रबार बसेकाे पहिलाे बैठकले जनसंगठन परिचालनका सम्बन्धमा विभिन्न निणर्यहरु समेत गरेकाे छ ।
बैठकले साउन महिनाभित्र सबै जनसंगठनको वार्षिक कार्ययोजना निर्माण गर्ने, साउन ६ गते पार्टी जिल्ला कमिटीले आयोजना गर्ने पुष्पलाल स्मृति दिवस सफल बनाउन सबै जनसंगठनको उपस्थिति गराउने, जिल्ला विपद् व्यवस्थापन तथा स्वस्यमसेवक विभागसँग समन्वयमा विपदमा उद्धार र राहतलगायत कार्यमा जनसंगठनहरु परिचालित हुनका लागि बैठकले निर्देशित गरेको छ । त्यसैगरी, पार्टी जिल्ला कमिटीको सर्कुलरअनुसार असोज मसान्तसम्म अवधि पुगेका सबै जनसंगठनको जिल्ला एवम् पालिका तहसम्म अधिवेशन गर्नसमेत बैठकले निर्देशित गरेको छ ।
एमाले केन्द्रीय सदस्य केदार न्यौपानेले जनसंगठनहरुले वर्गीय एवम् सामुदायिक मुद्दाहरु सम्बोधन गर्दै संगठन विस्तार र पार्टी निर्माणको आधार तयार गर्नुपर्ने बताए । केन्द्रीय सदस्य रामेश्वर रानाले जनसंगठन समन्वय सम्बन्धी निर्देशिका-२०७८ ले संयन्त्रमार्फत जनसंगठन परिचालनको स्पष्ट व्यवस्था गरेकोले जनसंगठनहरु सोही अनुसार क्रियाशील हुनुपर्ने बताए । यसैगरी, एमाले मकवानपुरका अध्यक्ष श्रीधर पोखरेलले पार्टीको मिसन-२०८४ लाई सफल बनाउन जनसंगठनको महत्वपूर्ण भूमिका हुने भएकाले योजनाबद्ध रुपमा जनसंगठन परिचालित हुनुपर्ने बताए ।
संयन्त्र संयोजक सन्तोष पौडेलको अध्यक्षता एवम् पार्टी केन्द्रीय सदस्य न्यौपानेको प्रमुख आतिथ्यता भएकाे बैठकमा पार्टी जिल्ला कमिटी उपाध्यक्ष हिदम लामा, सचिव सीता विष्ट, संयन्त्र सह-संयोजक मिलन पाठक, विपद् व्यवस्थापन तथा स्वयमसेवक विभाग प्रमुख शिवहरि दाहाल, जनसंगठनहरुका इन्चार्ज, सहइन्चार्ज तथा जिल्ल्ला अध्यक्षहरुको उपस्थिति रहेको थियो ।