मकवानपुर । साफ वुमन्स च्याम्पियनसिपमा नेपाल फाइनल प्रवेश गरेको छ ।
आइतबार भएको सेमिफाइनलमा पेनाल्टी सुटआउटमा भारतलाई ४-२ गोल अन्तरले पराजित गर्दै नेपालले फाइनलमा स्थान पक्का गरेको हो । निर्धारित समयमा खेल १-१ को बराबरी भएपछि खेलको निर्णय पेनाल्टी सुटआउटबाट लिइएको थियो ।
खेलको दोस्रो हाफमा भारतले ७० औं मिनेटमा गोल गर्दै सुरुवाती अग्रता लिएको थियो । एक घण्टाभन्दा बढी समय अवरुद्ध रहेको खेल सुचारु हुनासाथ सावित्रा भण्डारीले गोल गर्दै नेपाललाई खेलमा फर्काएकी थिइन् ।
खेलको ७०औं मिनेटमा भारतले अग्रता लिएपछि नेपालले तुरुन्त खेल शुरु गरेर गोल फर्काएको थियो । तर रेफ्रीले नेपालको गोललाई भने मान्यता नदिएपछि नेपालले विरोध गरेको थियो । लामो विवाद भएपछि खेल एक घण्टाभन्दा बढी समय अवरुद्ध बनेको थियो ।
खेलको ५० औं मिनेटमा रेखा पौडेलले दोहोरो पहेंलो कार्ड पाउँदै रातो कार्ड पाएपछि दर्शकले अवरोध गरेका कारण खेल १० मिनेटभन्दा बढी अवरुद्ध भएको थियो ।
फाइनलमा नेपालले आगामी बुधबार बंगलादेशसँग खेल्ने छ । आइतबारको पहिले सेमिफाइनल खेलमा बंगलादेशले भुटानलाई पराजित गर्दै फाइनल प्रवेश गरेको हो ।
मकवानपुर । बागमती प्रदेश प्रमुख दीपक प्रसाद देवकोटालाई अख्तियार दुरूपयोग अनुसन्धान आयोग हेटौंडा कार्यालयले ३४ औं प्रतिवेदन बुझाएको छ ।
आइतबार अख्तियार दुरुपयोग अनुसन्धान आयोगको कार्यालय, हेटौडाका प्रमुख उमाकान्त आचार्यलगायतको समूहले आयोगको आर्थिक वर्ष २०८०/८१ वार्षिक प्रतिवेदन प्रदेश देवकोटा समक्ष पेश गरेका हुन् ।
‘पारदर्शिता सबैभन्दा अपरीहार्य सवाल भएकोले यसतर्फ सचेत हुनु पर्छ’ प्रतिवेदन ग्रहण गर्दै प्रदेश प्रमुख देवकोटा भने ‘आर्थिक तथा अन्य कुनै पनि अख्तियारीमाथिको पारदर्शिताको लागि आयोगले गर्दै आएको काममा पूर्ण साथ रहने छ ।’ प्रतिवेदन अध्ययन गरेर थप सुझाव प्रदान गर्ने उनले बताए ।
आयोगले वर्षभरी गरेको काम कारबाही समेटिएको आर्थिक वर्ष २०८०/०८१ को ३४ औं वार्षिक प्रतिवेदन ६ परिच्छेद र ५२४ पृष्ठ रहेको छ । नेपालको संविधानको धारा २९४ को उपधारा ३ को व्यवस्था बमोजिम आयोगले प्रदेश प्रमुख समक्ष प्रतिवेदन पेस गरिएको हो । यस अवधिमा आयोगबाट भ्रष्टाचार सम्बन्धी उजुरीको प्रारम्भिक छानबिन एवं विस्तृत अनुसन्धान गर्ने, भ्रष्टाचार देखिएका उजुरीउपर विशेष अदालतमा आरोप–पत्र दायर गर्ने तथा विशेष अदालतबाट भएको फैसला उपर चित्त नबुझेमा सर्वोच्च अदालतमा पुनरावेदन गर्ने गरेको छ।
आयोगको कार्यालय, हेटौंडाको उजुरी दर्ता र फछर्यौट सम्बन्धी विवरण हेर्दा बागमती प्रदेशका विभिन्न विषयका संघीय कार्यालयहरुसँग सम्बन्धित १७९, प्रदेशका कार्यालयहरुसँग सम्बन्धित २४५ र स्थानीय तहसँग सम्बन्धित ५२३ गरी कुल ९४७ उजुरी दर्ता भएकोमा ६९९ उजुरी विभिन्न माध्यमबाट फछ्यौट भएका छन् । त्यसै गरी मधेश प्रदेशका विभिन्न विषयका संघीय कार्यालयहरुसँग सम्बन्धित २६३, प्रदेशका कार्यालयहरुसँग सम्बन्धित १८२ र स्थानीय तहसँग सम्बन्धित १७६१ गरी कुल २२०६ उजुरी दर्ता भएकोमा १५४३ उजुरी फछर्यौट भएका छन्।
सार्वजनिक पद धारण गरेको व्यक्तिले भ्रष्टाचार गरी अख्तियारको दुरुपयोग गरेको सम्बन्धमा आयोगले अनुसन्धान गर्न वा गराउन तथा अनुसन्धानबाट भ्रष्टाचार मानिने कुनै काम गरेको देखिएमा त्यस्तो व्यक्ति र सो अपराधमा संलग्न अन्य व्यक्तिउपर कानूनबमोजिम अधिकार प्राप्त अदालतमा मुद्दा दायर गर्ने कार्य गर्दै आइरहेको छ ।
मकवानपुर । देशभर स्थानीय वायु, पश्चिमी वायुका साथै भारतको ओडिशा आसपास रहेको न्यून चापीय क्षेत्रको समेत आंशिक प्रभाव कायमै रहेको मौसम पूर्वानुमान महाशाखाले जनाएको छ ।
महाशाखाका अनुसार ती वायुको प्रभावले कोशी र मधेश प्रदेश लगायत देशका पहाडी भूभागमा आंशिकदेखि साधरणतया बदली रही बाँकी प्रदेशहरूमा आंशिक बदलीदेखि मौसम मुख्यतया सफा रहेको छ ।
आइतबार दिउँसो कोशी र बागमती प्रदेश लगायत देशका पहाडी भूभागमा आंशिक बदली रही बाँकी भूभागमा आंशिक बदलीदेखि मौसम मुख्यतया सफा रहने छ । देशका पहाडी भूभागका एक–दुई स्थानमा चट्याङ्गसहित हल्का वर्षाको सम्भावना समेत रहेको महाशाखाले जनाएको छ ।
यसैगरी आइतबार राति देशका पहाडी भूभागमा आंशिक बदली रही बाँकी भूभागमा आंशिक बदलीदेखि मौसम मुख्यतया सफा रहने छ । कोशी र गण्डकी प्रदेशका पहाडी भूभागका एक–दुई स्थानमा चट्याङ्गसहित हल्का वर्षाको सम्भावना रहेको छ ।
देशका एक–दुई स्थानमा चट्याङ्गसहित हल्का वर्षाको सम्भावना रहेकोले कृषि, स्वास्थ्य, पर्यटन, पर्वतारोहण, सडक तथा हवाई यातायातमा आंशिक असर पर्न सक्ने हुनाले आवश्यक सतर्कता अपनाउन महाशाखाले अनुरोध गरेको छ ।
मकवानपुर । निर्वाचन आयोगले स्थानीय तह उपनिर्वाचनमा उम्मेदवारले खर्च गर्न पाउने रकमकाे सिमा ताेकेकाे छ । १६ मंसिर २०८१ मा हुने उप निर्वाचनकाे लागि विभिन्न पदकाे उम्मेदवारहरुकाे खर्च सिमा ताेकिएकाे हाे ।
आयोगले महानगरपालिकाका प्रमुख तथा उपप्रमुख पदका उम्मेदवारले सात लाख ५० हजार र उपमहानगरपालिकाका प्रमुख तथा उपप्रमुख पदका उम्मेदवारले पाँच लाख ५० हजार खर्च गर्न पाउने गरी सिमा निर्धारण गरेकाे छ। यसैगरी नगरपालिकाका प्रमुख तथा उपप्रमुख पदका उम्मेदवारले चार लाख ५० हजार र गाउँपालिका अध्यक्ष तथा उपाध्यक्ष पदका उम्मेदवारले तीन लाख ५० हजार रुपियाँसम्म खर्च गर्न पाउने गरी सिमा ताेके आयोगका प्रवक्ता नारायणप्रसाद सापकोट जानकारी दिए ।
सापकाेटाका अनुसार जिल्ला समन्वय समितिका प्रमुख तथा उपप्रमुख पदका उम्मेदवारले ५० हजार रुपियाँसम्म खर्च गर्न पाउने सिमा ताेकिएकाे छ भने महानगरपालिकाका वडा अध्यक्ष पदका उम्मेदवारले तीन लाख रुपियाँ खर्च गर्न पाउने भएका छन् । यसैगरी उपमहानगरपालिकाका वडा अध्यक्ष पदका उम्मेदवारले दुई लाख रुपियाँ खर्च गर्न पाउने सिमा निर्धारण गरिएकाे छ । गाउँपालिका वडा अध्यक्ष पदका उम्मेदवारले खर्च गर्न पाउने रकमकाे सिमा एक लाख ५० हजार रुपियाँ निर्धारण गरेकाे छ ।
निर्वाचन आयोगका अनुसार स्थानीय तह निर्वाचन ऐन, २०७३ को दफा ६४ तथा स्थानीय तह निर्वाचन नियमावली, २०७३ को नियम ४० बमोजिम उम्मेदवारको मनोनयनपत्र दर्ता भएको मितिदेखि निर्वाचनको परिणाम घोषणा भएको अवधिसम्मका लागि खर्चको सिमा निर्धारण गरिएकाे हाे ।
जिल्ला समन्वय समितिका प्रमुख २, गाउँपालिका अध्यक्ष २, उपाध्यक्ष ३, गाउँपालिका वडाध्यक्ष ९, नगरपालिका प्रमुख १, उपप्रमुख १ र वडाध्यक्षका २१ सहित स्थानीय तहका ३९ पद रिक्त छन्। नेपालको संविधान तथा स्थानीय तह निर्वाचन ऐन, २०७३ मा पदावधि समाप्त नहुँदै पद रिक्त भएमा र एक वर्षभन्दा बढी समय बाँकी रहेको अवस्थामा उपनिर्वाचन गर्नुपर्ने व्यवस्था छ।
स्थानीय तह उपनिर्वाचनका लागि २५ वटा दल दर्ता भएका छन् । २०७९ सालका स्थानीय तह निर्वाचनमा भाग नलिएकाे राष्ट्रिय स्वतन्त्र (रास्वपा) ले समेत उप निर्वाचनकाे लागि दल दर्ता गराएकाे आयोगले जनाएकाे छ ।
काठमाडौं । मकवानपुरकाे इन्द्रसरोवर गाउँपालिकामा स्थित सिस्नेरीमा रहेका एन्फा एकेडेमी घटनाकाे उच्चस्तरीय छानबिनकाे माग गरेका छन्।
असोज दोस्राे साता भएकाे अविरल वर्षाकाे कारण फुटबल खेलाडीको दुःखद निधनको विषयमा पीडित परिवारले प्रधानमन्त्री केपी शर्मा ओलीलाई भेट गरेका थिए । भेटमा उनीहरुले घटनाकाे उच्चस्तरीय छानबिन गरी दोषीमाथि कारबाहीको लागि ध्यानाकर्षण गराएका छन्।
एन्फाद्वारा सञ्चालित वत्सलादेवी माध्यमिक विद्यालयककाे होस्टेलमा बस्दै आएका ६ जना बालबालिकाको गत असोज १२ गते बाढीपहीरोमा परी मृत्यु भएको थियो। शुक्रबार प्रधानमन्त्री निवास बालुवाटारमा भएको भेटमा पीडित परिवारले घटनाको उच्चस्तरीय छानबिन गरी दोषीमाथि कारबाहीको माग गरेका हुन्।
नेकपा एमालेका प्रमुख सचेतक महेश बर्तौलाको सहजीकरणमा भएको भेटमा परिवारले कुलेखानी ड्याम खोल्ने पूर्व सूचना र लगातारको वर्षाका बीच पनि विद्यार्थीलाई सुरक्षित स्थानमा नसारिएको भन्दै लापर्वाहीको आरोप लगाएका छन्। साथै, मृतक बालबालिकाको सम्झनामा अक्षय कोष स्थापना गरी खेलकुद क्षेत्रको विकास गर्न पनि आग्रह गरिएको छ।
पीडित परिवारले मृतक बालबालिकाका नाममा अक्षय कोष स्थापना गरी खेल क्षेत्रको प्रर्वद्धन गर्न समेत आग्रह गरेका छन् । पीडित परिवारका तर्फबाट ललितबहादुर घलान, भक्तबहादुर बलम्पाकी, कमला रेग्मी, टीकाराम आचार्य, हेमबहादुर योञ्जन, र दिपा बानियाँले प्रधानमन्त्रीलाई संयुक्त ध्यानाकर्षणपत्र बुझाएका थिए ।
प्रधानमन्त्री ओलीले घटनाप्रति दुःख व्यक्त गर्दै यसको यथार्थ छानबिन गर्ने र पीडित परिवारको पक्षमा सरकार रहने प्रतिबद्धता जनाउनु भएकाे बर्तौलाले जानकारी दिए ।
प्रधानमन्त्रीसँगकाे भेटमा बागमती प्रदेशका पूर्व मुख्यमन्त्री शालिकराम जम्मरकट्टेल, प्रदेश सांसद कुमारी मोक्तान, पूर्व संविधानसभा सदस्य सुवास ठकुरी र नेपाली काँग्रेस मकवानपुरका जिल्ला सभापति बुद्धशरण लामा लगायतको उपस्थिति थियो।