मकवानपुर । उपप्रधान एवम् शहरी विकास मन्त्री प्रकाशमान सिंहले मकवानपुरको मनहरी गाउँपालिकामा १ वटा भवनकाे शिलान्यास गरेका छन् । सिंहले शनिबार मनहरी गाउँपालिकाकाे प्रशासकिय भवनको शिलान्यास गरेका हुन् ।
यसैगरी बागमती प्रदेशसभा सदस्य ईन्द्रबहादुर बानियाँको जनसम्पर्क कार्यालयको समेत मन्त्री सिंहले उद्घाटन गरेका छन्। मन्त्री सिंहले छुट्टाछुट्टै समयमा गाउँपालिकाको प्रशासनिक भवनको शिलान्यास र सम्पर्क कार्यालयकाे उद्घाटन गरेका हुन्। मनहरी बजारमा नेपाली काँग्रेसका बागमती प्रदेश सभापति समेत रहेकाे बानियाँको सम्पर्क कार्यालय उद्घाटन गरेका सिंहले मनहरी ४ रजैयामा रहेकाे मनहरी गाउँपालिकाकाे भवनको शिलान्यास गरेका हुन्।
लामो समयदेखि भाडाको घरबाट सेवा प्रवाह गर्दै आएको मनहरी गाउँपालिकाले नयाँ प्रशासकीय भवन निर्माण थालेको हो । राष्ट्रिय वन क्षेत्रको जग्गाको स्वामित्व गाउँपालिका अन्तर्गत ल्याएर मनहरीले भवन निर्माण कार्य थालेको गाउँपालिकाकाले जनाएकाे छ । ६ कठ्ठा क्षेत्रफलमा ४२ वटा कोठासहित ३ तले सुविधा सम्पन्न भवन निर्माणकाे शिलान्यास गरिएकाे हाे ।
उक्त भवनकाे निर्माणका लागि तामाकोशी–ढाचा जेभी बालाजु काठमाडौंले निर्माणका लागि गत असोज १४ गते सम्झौता गरेको छ । ८ करोड २८ लाख ६ हजार रुपैयाँमा ठेक्का सम्झौता गरी काम सुरु गरिएको उक्त भवन निर्माण आगामी २०८२ चैत ३० गते सम्पन्न गर्नुपर्ने छ ।
बानियाँको मनहरीमा सम्पर्क कार्यालय
मकवानपुर क्षेत्र नम्बर २ ख का प्रदेशसभा सदस्य ईन्द्रबहादुर बानियाँले आफ्नो चुनावी क्षेत्रमै सम्पर्क कार्यालय स्थापना गरेका छन् । उपप्रधानमन्त्री तथा सहरी विकास मन्त्री प्रकाशमान सिंहले शनिबार कांग्रेस बागमती प्रदेश सभापति बानियाँको सम्पर्क कार्यालय उद्घाटन गरेका हुन् ।
उपप्रधानमन्त्री सिंहले सम्पर्क कार्यालय उद्घाटन गर्दै जनप्रतिनिधिले जनताको आवश्यकता र चाहनालाई सम्बोधन गर्न सहज पहुँच हुने स्थानमा कार्यालय स्थापना गर्न जरुरी रहेको बताए । देशमा जवजव जटिल समस्या पर्छ कांग्रेसले नेतृत्व लिएर समाधान गरेको विगतका उदाहरणहरु रहेकाे बताउँदै उपप्रधानमन्त्री सिंहले कांग्रेसको नेतृत्वमा मात्रै विकास र समृद्धि सम्भव भएको बताए ।
कांग्रेस बागमती प्रदेश सभापति एवं प्रदेशसभा सदस्य बानियाँले चुनावको बेला मतदातामाझ गरेको प्रतिवद्धता अनुरुप कार्यालय स्थापना गरिएकाे जानकारी दिए । मकवानपुरको पश्चिमी क्षेत्रस्थित मनहरी बजारमा मतदाताको गुनासो सुन्न तथा साझा सम्पर्क थलोको रुपमा विकास गर्न कार्यालय खोलिएको उनले बताए ।
सम्पर्क कार्यालयमार्फत् मकवानपुर क्षेत्र नम्बर २ ख का मनहरी, राक्सीराङ, कैलाश गाउँपालिका र हेटौंडा उपमहानगरपालिका वडा नम्बर ३ र १९ का मतदाताले विकास निर्माणलगायतका विषयमा छलफल गर्न सक्नेछन् ।
काठमाडौं । बागमती प्रदेशका प्रदेश प्रमुख दीपक प्रसाद देवकाेटाले देशकै पुरानो र मौलिक संस्कृति भजन तथा चुड्का भएकाे बताएका छन् । राष्ट्रिय लोक भजन चुड्का संरक्षण प्रतिष्ठान नेपालकाे केन्द्रीय बार्षिक साधारणसभा तथा बागमती प्रदेश कमिटीको प्रथम अधिवेशनमा उनले यस्तो बताएका हुन् ।
देशको पुरानो र मौलिक संस्कृतिको रूपमा रहेको भजन तथा चुड्काको जगेर्नामा अहोरात्र खटिने मौलिक संस्कृति उथ्थानको पहरेदार संस्थाको कार्यक्रममा उपस्थिति हुन पाउँदा गौरवको महसुस भएको प्रदेश प्रमुखले बताए । ‘२०६७ सालदेखि तपाईंहरू अनवरतरूपमा मौलिक एबम् लोपोन्मुख बाजागाजासङ्गै भजन संस्कृतिको संरक्षणमा लागिरहनुभएको छ’ उनले भने ‘माटाे र संस्कृति एक सिक्काको दुई पाटासरह हुन् । त्यसैले तपाईंहरुको कामको प्रसंशा जति गरेपनि कम हुन्छ, देशको असली राष्ट्रप्रेमी लोक भजन चुड्का संरक्षण प्रतिष्ठान रहेकाे छ ।’
‘भनिन्छ कुनै देशलाई ध्वस्त पार्नुछ भने उसको संस्कृतिबाट धावा बोल्न शुरु गरे हुन्छ’ उनले भने । ‘आफ्नो मौलिक पहिचान गुमाउँदै गर्दा हामी न घरको न घाटको बन्न पुग्छौं देवकाेटाले भने ‘आयातित सस्कृतिको अन्धनक्कलले हाम्रो मौलिक पहिचानलाई कुहिरोमा रुमल्ल्याएको छ ।’ हामीले यसबाट आफूलाई र युवा पुस्तालाई जोगाउनु पर्ने उनकाे भनाई थियाे । ‘विश्वब्यापीकरणको अर्थ आफ्नो मौलिक पहिचानलाई तिलान्जली दिनु कदापि होइन । हामीले बिबिधताको सम्मान गर्दै आफ्नो मन , मस्तिष्क र मुटुमा आफ्नो मौलिक पहिचानलाई सजाउनुपर्छ’ उनले भने । आखिर यो मन त नेपाली नै हो , होइन र ? भन्दैं उने प्रश्न गरे ।
हाम्रा सत्तल , पाटी, पूजापाठ, चाडपर्व, धार्मिक सास्कृतिक कार्यक्रम शंख, मुजुरा, खैजडीजस्ता थुप्रै बाद्ययन्त्रको ध्वनिसहित् भजन चुड्का गुन्जायमान हुँदा माहोल रमाइलो हुने उनले बताए । ‘भजन चुड्कामा यस्तो जीबन्तता छ जसले हामीलाई शान्त, उत्प्रेरित, संस्कारी, सभ्य र सकारात्मक बनाउँछ’ उनले भने ‘यसमा सन्देश छ, अनुशासन छ, मेलमिलाप छ, कर्तव्य छ र सौन्दर्यता छ । सङ्गीतले मान्छेलाई जोड्छ र सुखी जिवनको आधार तयार पार्दछ ।’
प्रदेश प्रमुख देवकाेटाले हामीले आफूद्वारा आफैंलाई जोगाउनुपर्ने बताए । भजन चुड्कामा रहेको बिशिष्टतालाई जीवनयापनको साथी बनाउनु पर्ने उनले बताए । ‘सुख र दुःखको साथी हाम्रो भजन चुड्का लगायत मौलिक संस्कृतिको संरक्षणमा राज्यका निकायहरू, संस्थाहरू, नागरिक समाज तथा हरेक तह र तप्काका ब्यक्तिहरू एकजुट भएर लाग्नुपर्छ’ उनले भने । धार्मिक तथा जुनसुकै सास्कृतिक कार्यक्रमहरूमा भजन, चुड्कालाई अनिबार्य समावेश गरिनु पर्ने तथा यसको व्यापक प्रचारप्रसार गर्नु पर्ने उनले बताए । ‘धार्मिक होस् वा अन्य अवसरमा मौलिक बाजासहित सुरिलो स्वरमा भजन चुड्काको प्रस्तुतिले वरपरको बाताबरणनै रौनकताले गुन्जिन्छ’ उनले भने ‘हाम्रा भजन, चुड्काहरू रोगनाशक औषधिसरह हाम्रो शरीर र मनलाई आरोग्य प्रदान गर्छन् ।’
प्रदेश प्रमुखले राष्ट्रिय लोक भजन चुड्का संरक्षण प्रतिष्ठानका अध्यक्ष नारायण प्रसाद खनाल “लेकाली ” लगायतकाे समूहलाई मौलिक सस्कृती जगेर्नाको अभियानमा गरिएका उत्कृष्ट कार्यकाे बधाई दिदै अभियान निरन्तरताको शुभकामना दिएका छन् । यो महाअभियानमा आफ्नाे पूर्ण साथ र सहयोग रहने प्रतिबद्धता समेत उनले व्यक्त गरे ।
कार्यक्रममा उत्कृष्ट भजन चुड्का र बाद्यबाजनको बेजोड प्रस्तुति रहेको थियो भने इन्द्रेणी कार्यक्रमका कृष्ण कंडेललगायतलाई सम्मान समेत गरिएको प्रतिष्ठानाका अध्यक्ष नारायण प्रसाद खनाल ‘लेकाली’ ले जानकारी दिए ।
खुला कविता प्रतियोगितामा कास्कीका संजोग प्रथम
Tags: No Comments
मकवानपुर। राष्ट्रिय युवा कविता उत्सव–२०८१ अन्तरगत भएकाे खुला कविता प्रतियोगितामा संजोग बस्याल कास्की प्रथम भएकाे छ । मकवानपुरकाे हेटौंडामा शनिबार भएकाे खुला कविता प्रतियोगितामा बस्यालकाे ‘सावधान’ शिर्षककाे कविताले प्रथम स्थान हासिल गरेकाे हाे ।
प्रदेश युवा परिषद् बागमती प्रदेशको आयोजना तथा साहित्य सङ्गम मकवानपुरको सहकार्यमा आयोजित प्रतियोगितामा प्रथम भएका बस्यालले ४० हजार रुपैंयाकाे पुरस्कार प्राप्त गरे । यसैगरी प्रतियोगितामा कास्कीका कवि सुदर्शन पौडेलकाे कविता घर नफर्किएको छोराको सम्झनामाले द्वितीय भएकाे छ । पौडेलले ३० हजार रुपैंया हात पारे । उदयपुरकी सुमी पोखरेलकाे समयदर्शक यन्त्रको पर्दा नियाल्दा तृतीय भयो । कवि पोखरेल तृतीय हुँदै २० हजार रुपैंया हात पारिन् । प्रतियोगितामा कवि महेश कठायतले सान्त्वना पुरस्कार प्राप्त गरे । बझाङका कवि कठायतकाे देश शिर्षककाे कविता सान्त्वना हुदै १० हजार रुपैंया प्राप्त गरे ।
खुला कविता प्रतियोगिताकाे लागि देशभरबाट २ सय २३ कविता प्राप्त भएका थिए । प्राप्त कविता मध्ये मूल्याङ्कन समितिले उत्कृष्ट २० कविता छनोट गरि नामावली सार्वजनिक गरेकाे थियाे । प्रदेश युवा परिषद् बागमती प्रदेशको आयोजना तथा साहित्य सङ्गम मकवानपुरको सहकार्यमा आयोजित राष्ट्रिय युवा कविता उत्सव २०८१ मा उत्कृष्ट २० वटा कविता स्वयं कवि उपस्थित भई वाचन गरिएकाे थियाे ।
उत्कृष्ट २० मा पर्न सफल कविता र कविहरूको नामावली वर्णानुक्रमानुसार प्रकाशन गरिएको थियाे । प्रतियोगितामा विजेता कवि तथा कविताका अलावाका उत्कृष्ट २० मा अग्रिमा शिवाकोटी मकवानपुरकाे रित्तिदैछ ‘देश’, अभिषेक ओझा बाराकाे ‘विसंवाद’, कुष्मा लौडारी मकवानपुरकाे ‘डिजिटल संसारको मायाजाल’, तारानाथ पराजुली पर्वतकाे ‘पागल प्रकृतिप्रेमीको बयान’, दीपिन सिंजापति दैलेखकाे ‘आकाङ्क्षा’, प्रदीप कोइराला तनहुँकाे ‘म’, बाबुराम श्रेष्ठ यात्री सिन्धुलीकाे ‘आमा, देश र माटो’, भरत थापा धनकुटाकाे ‘हर्कमाया दर्जी र झन्डाको व्यापार’, भीमप्रसाद खतिवडा अनुराग दोलखाकाे ‘जीवन एक पाठशाला’ शिर्षककाे कविता छानिएकाे थियाे ।
यसैगरी रञ्जिता अधिकारी धादिङकाे ‘परिवर्तन लेख्ने हातहरु’, राजु झल्लु प्रसाद धादिङकाे ‘खिया’, रुपा ढुङ्गेल मकवानपुरकाे ‘म शिक्षा मन्त्री भए’, सिजन श्रेष्ठ संखुवासभाकाे ‘उर्वशी’, सुन्दर शिरिष सिन्धुपाल्चोककाे ‘जहाज चढ्न मन छैन आमा’, सुबास सजल मकवानपुरकाे ‘डरलाग्दो अन्त्य मानव सभ्यताको’,सुमित्रा सुमी नुवाकाेटकाे ‘बुद्ध आऊ’ शिर्षकका कविता छनोटमा परेकाे थियाे ।
युवालाई उद्यम व्यवसाय गर्न प्रोत्साहित गर्नुपर्छः मन्त्री महर्जन
बागमती प्रदेशका युवा तथा खेलकुद मन्त्री मीनकृष्ण महर्जनले युवालाई उद्यम व्यवसाय सञ्चालन गर्न प्रोत्साहित गर्नुपर्ने बताएका छन् । प्रदेश युवा परिषद्ले हेटौंडामा आयोजना गरेको ‘राष्ट्रिय युवा कविता उत्सव २०८१’ को उद्घाटन गर्दै मन्त्री महर्जनले यस्तो बताएका हुन् ।
युवा जनशक्तिलाई विदेश पलायन हुनबाट रोक्न प्राविधिक तथा व्यावसायिक शिक्षा र सीप उपलब्ध गराउनेतर्फ सरकारको ध्यान केन्द्रित हुनुपर्ने उनले बताए । ‘आफू खेलकुद क्षेत्रबाट आएकोले युवाहरुको भावना र मर्म बुझ्छु, विषयगत ज्ञान पनि छ तर, म मन्त्री नियुक्त हुँदा बजेट बनिसकेको थियो जुन युवाका लागि पर्याप्त छैन’ उनले भने । हामीले युवाहरुको क्षेत्रमा उल्लेख्य काम गर्न सकिरहेका छैनौँ । फलस्वरुप युवाहरुलाई स्वदेशमा टिकाउनै मुस्किल भएकाे उनले जानकारी दिए ।
त्यसैगरी परिषद्का कार्यकारी उपाध्यक्ष सन्तोष चौलागाईंले युवाहरुलाई नेतृत्व, व्यक्तित्व विकाससँगै रचनात्मक, सिपमुलक तालिमसँग जोड्न सहयोग समन्वय गरिने बताए । उनले भने ‘सकारात्मक सोचसँगै कार्यसँग जनसंख्याकाे ४३ प्रतिशत युवा जनशक्तिलाई जोड्न सके विद्यमानमा रहेका धेरै समस्या समाधान हुनेछ ।’
कवि मोमिलाका एकल कविता वाचन
‘राष्ट्रिय युवा कविता उत्सव २०८१’ मा साहित्यकार मोमिला जोशीका कविता सुनिए । कवि मोमिलाले आफ्ना १० वटा कविता प्रस्तुत गरेकी थिइन् । कविले भाव समर्पण, प्रेम, पीडा, प्यास र पानी, सूर्य समय, एउटा लालीगुराँस हराएको बेला, मात्र एउटा हाँगा काटिने, दोभन प्रहारबाट, नगरबधुको वक्तव्य, हिउँदको प्रथम वर्षात्, उकालोमा मेरो तस्बिर, तिमी र म, भीमसेन थापाको सुसाइड नोट शिर्षकको कविता सुनाएकी थिइन् ।
राष्ट्रिय युवा कविता उत्सवका अवसरमा पुस्तक प्रदर्शनी समेत गरिएको थियाे । किताबघर हेटौंडाले पुस्तक प्रदर्शनीकाे व्यवस्थापन गरेकाे थियाे ।
मकवानपुर । राष्ट्रिय अपाङ्ग महासंघ नेपाल बागमती प्रदेशकाे अध्यक्षमा काठमाडौ जिल्ला निवासी उपेन्द्र श्रेष्ठ ७४ मतान्तरसहित बिजयी भएका छन् ।
उनले कुल ८६ मत ल्याउंदा उनका प्रतिष्पर्धी नुवाकोट जिल्लाका विरोध खतिवडाले १२ मत प्राप्त गरे ।
महासंघको अध्यक्षबाहेक अन्य सबै पदमा निर्विरोध भएको थियो । उपाध्यक्ष, सचिब, सहसचिव र कोषाध्यक्षमा क्रमश: शारदा पौडेल, एम प्रसाद सुवेदी,मनिष सुब्बा र सुप्रभा अर्याल निर्विरोध भएका छन् । १८ सदस्यीय नयाँ समितिको कार्यावधी ३ बर्षको हुनेछ ।
शुक्रबारबाट सुरु भएको अधिवेशनमा शनिबार बिहान ११:०० बजेदेखि मतदान कार्यक्रम भएको थियो । डिजिटल प्रविधिबाट भएकाे मतदान कार्यकाे मतगणना समेत डिजिटल प्रविधिबाट नै भएकाे राष्ट्रिय अपांग महासंघ बागमती प्रदेश व्यवस्थापक सीता मल्ल ठकुरीले बताइन् ।
महासंघमा आबद्द संस्था मध्ये ८३ वटाले समयमै नविकरण गरेका र निर्वाचनका लागि प्रतिनिधि चयन गरि पठाएका थिए । कुलमध्ये ५१% उपस्थिति भएमा बैधानिक मानिने भएकाेले यस अधिबेशनमा ७१ वटा संस्थाका १३७ जना प्रतिनिधि मध्ये १०३ जनाले मतदानमा सहभागिता जनाएका थिए ।
बागमती प्रदेशमा अपाङ्गता भएका व्यक्तिहरु १ लाख २१ हजार ४ सय ४७ जना रहेका छन् ।
मकवानपुर । राष्ट्रिय अपाङ्ग महासंघ नेपाल बागमती प्रदेशको नेतृत्व गर्न ५ जना आकांक्षी रहेका छन् । महांघमा अबकाे नेतृत्वकाे लागि सागर लामा, विरोध खतिवडा, गणेशचन्द्र दवाडी, रविन्द्र पन्त र रोचन भट्टराईले इच्छा देखाएका छन् ।
शनिबार हुने निर्वाचनमा भोटिङ मेसिनद्वारा आपाङ्गता भएका व्यक्तिहरुले अध्यक्ष चयनका लागि मतदान गरिँदैछ । बागमती प्रदेशको विभिन्न १३ जिल्लामा रहेका अपाङ्गता सम्बन्धी ७१ वटा संस्थाहरुबाट छनाैट भएका प्रतिनिधिहरुले मतदान गर्ने छन् ।
शुक्रबार राष्ट्रिय अपाङ्ग महासंघ नेपाल बागमती प्रदेशका अध्यक्ष अश्विन लम्सालको अध्यक्षता तथा आर्थिक मामिला तथा योजना मन्त्रालय बागमती प्रदेशका मन्त्री कुन्दनराज काफ्लेको प्रमुख आतिथ्यतामा साधारण सभा तथा अधिवेशन सुरु गरिएकाे छ ।
मन्त्री काफ्लेले धेरै समस्याबीच आपाङ्गता भएका व्यक्तिबीच पनि पक्ष र विपक्ष रहनु दुखद बिषय भएको बताए । नेपाल परिवर्तनशिल हुँदै गएको अवस्थामा अधिकारको नाउँमा कोही पनि बञ्चित नहुनु नपर्नु मन्त्री काफ्लेले बताए ।