मकवानपुर । मकवानपुरको बकैया गाउँपालिकामा कला साहित्य महोत्सव हुने भएको छ । मकवानपुरको साहित्यिक संस्था झरना साहित्यिक परिवारको आयोजनामा बकैया–कला साहित्य महोत्सव–२०८१ हुने भएको हो ।
झरना साहित्यिक परिवारको ३१३ औँ साहित्य शृङ्खला एवम् ३२ औँ वार्षिकोत्सवका अवसरमा आगामी १६ र १७ फागुनमा बकैया–कला साहित्य महोत्सव–२०८१ आयोजना गरिने शनिबार पत्रकार सम्मेलन मार्फत जानकारी गराइएको हो ।
बकैया–५ स्थित कर्मप्राप्ति माविमा हुने महोत्सवमा पुरस्कार समर्पण, चित्रकला प्रदर्शनी, पत्रिका विमोचन, विभिन्न जातजातिका नृत्यहरू, बकैयाको काव्य महक, समकालीन गजल मुक्तक उत्सव, पालिका अध्यक्षलाई १० प्रश्न, समकालीन काव्य उत्सव, सम्मानित स्रष्टाको रचना वाचन र नवसर्जक रचना वाचन हुने आयोजक सस्थाका सचिव मसान उपासकले जानकारी दिएको छ ।
कर्मप्राप्ति माविको सहकार्यमा हुने महोत्सवमा बकैया गाउँपालिका सहयोग रहने उपासकले बताए ।
११ विद्याका सम्मान प्रदान गरिने
कला महाेत्सवमा विभिन्न ११ विधामा सम्मान प्रदान गरिने भएकाे छ । साहित्यसेवी नुरप्रसाद गौतमले मातापिताको सम्मानमा स्थापना गगरेकाे होमनाथ–टीकामाया प्रतिभा सम्मान भैरहवाका स्रष्टा प्राडा कपिल लामिछानेलाई प्रदान गरिने भएको छ । उक्त सम्मानकाे राशी नगद २१ हजार १ सय २१ रुपैंया रहेकाे छ ।
त्यस्तै साहित्यसेवी रमेशमोहन अधिकारीले मातापिता नाममा स्थापना गरेको शिव–सावित्री अधिकारी स्मृति मुक्तक सम्मान–२०८१ इलामका शिव अधिकारीलाई प्रदान गरिने भएको छ । १५ हजार ५ सय ५५ रुपैंया राशिको उक्त पुरस्कार चैतको चौथो शनिबार हेटौंडामा आयोजना हुने मुक्तक साँझमा प्रदान गरिने आयोजकले जनाएको छ ।
त्यस्तै, साहित्यसेवी विनोद सुवेदीले मातापिताको नाममा स्थापित पुरस्कार नगद रू. १५ हजार ५ सय ५५ राशिसहितको बाबुलाल–भोजमाया स्मृति साहित्य सम्मान–२०८१ मकवानपुरका मुक्तककार देवराज खरेललाई प्रदान गरिने भएको छ ।साहित्यसेवीहरू अर्पण पराजुली र दर्पण पराजुलीले मातापिताको सम्मानमा स्थापित नगद रू ८ हजार ५ सय राशि सहितको खडानन्द–मनमाया प्रतिभा सम्मान–२०८१ मकवानपुरका बिर्खे अञ्जानलाई प्रदान गरिने भएको उपासकले बताए ।
साहित्यसेवी राजन दङ्गालले आफ्नो दिवङ्गत छोरीको स्मृतिमा स्थापना गरेको नगद रू. ७ हजार ७ सय ७७ राशिसहितको सुशीला दङ्गाल स्मृति सिर्जनशील नारी सम्मान–२०८१ गजलकार बबी थापालाई प्रदान गरिने छ । साहित्यसेवी तुलसी गिरीद्वारा स्थापित ७ हजार ७ सय ७७ रुपैंया राशिको सञ्जीवनी बुटि साहित्य सम्मान–२०८१ बाराका नियात्राकार अप्सरा पुडासैनीलाई प्रदान गरिने छ ।

मकवानपुरमा रही यस संस्थाको प्रचारप्रसार गर्न पत्रकारिताका माध्यमबाट सहयोग गरेवापत पत्रकार प्रदान गरिने स्व. गोकर्ण गौतमको परिवारद्धारा स्थापना गरिएको ११ हजार १ सय ११ रुपैंया राशिको गोकर्ण गौतम स्मृति पत्रकारिता सम्मान–२०८१ मकवानपुरका पत्रकार ज्योति न्यौपानेलाई प्रदान गरिने उनले जानकारी दिए ।
बकैयाका नवप्रतिभाको सम्मान गर्ने हेतुले बकैयाका चन्द्रकुमार राईले स्थापना गरेका ५ हजार ५ सय ५५ रुपैयाँ राशिको झरना–बकैया नवप्रतिभा पुरस्कार–२०८१ पुरस्कार सन्तोष विकलाई प्रदान गरिने भएको छ । बकैया गाउँपालिकाका उपाध्यक्ष भक्तबहादुर खत्रीले आफ्ना पिताको नाममा स्थापित ७ हजार ७ सय ७७ रुपैंया राशिकाे खिमबहादुर खत्री स्मृति कलाकारिता सम्मान–२०८१ गरेको पुरस्कार मुर्तिकार ओमभक्त भण्डारीलाई प्रदान गरिने भएको छ ।
साहित्यकार जनार्दन खनालले आफ्ना मातापिताको नाममा स्थापना गरेको ७ हजार ७ सय ७७ रुपैंया राशिकाे ऋषेश्वर–रुक्मिणी–लक्ष्मीदेवी खनाल साहित्य सम्मान–२०८१ ललितपुरका रत्न विरही घिमिरेलाई प्रदान गरिने भएको छ । बकैया गाउँपालिकाभरीका विद्यालयमध्ये उत्कृष्ट शिक्षक सम्मान –२०८१ बुद्ध माविका हरि घिमिरेलाई प्रदान गरिने भएको छ ।
पत्रकार सम्मेलनमा आयोजक संस्थाका अध्यक्ष विश्वनाथ सन्जेल, उपाध्यक्ष चिरञ्जीवी लामिछाने लगायतकाे उपस्थिति रहेको थियो ।
मकवानपुर । मकवानपुरकाे हेटौंडा ४ स्थित हुप्राचौरमा मगर सांस्कृतिक फुड फेस्टिवल हुने भएकाे छ । नेपाल मगर संघ जिल्ला समन्वय समितिकाे आयाेजनाका १५ फागुनमा फुड फेस्टिवल हुने भएकाे हाे ।
१५ फागुनमा मनाइने मगर दिवसकाे ४३ ओैं स्थापना अवसरमा हेटौंडा उपमहानगरपालिका ४ स्थित हुप्राचाैरमा मगर सांस्कृतिक फुड फेस्टिवल हुने शनिबार हेटौंडामा पत्रकार भेटघाट गरी जानकारी गराइएकाे हाे ।
१० वटा स्टलहरु रहने फेस्टिवलमा मगर समुदायका परिकारहरु राखिने मगर संघ मकवानपुर अध्यक्ष सन्देश तुम्सिङ्ग मगरले जानकारी दिए । दिवसका अवसरमा साँस्कृतिक कार्यक्रम समेत आयोजना गरिने उनले बताए । फुड फेस्टिवलकाे हेटौंडा उपमहानगरपालिका प्रमुख मिना कुमारी लामाले गर्ने भएकी छिन् ।
कार्यक्रममा राष्ट्रिय कलाकारहरु राधिका हमाल, शशी पुन मगर आउने आयोजकले जनाएकाे छ । फेस्टिवलकाे लागि करिव ५ लाख रुपैया खर्च हुने अनुमान गरिएकाे छ । अध्यक्ष तुम्सिङ्गका अनुसार १९ वटा समिती, १८ वटा मगर गुठी, ५ भातृ सङ्गठन, १ बौद्ध सेवा समाज आवद्धता संस्था तथा १० स्थानीय तहकाे कार्यक्रममा सहभागिता रहने छ ।
कार्यक्रमका लागि हेटौंडा उपमहानगरपालिका, राक्सिराङ,मनहरी गाउँपालिका तथा हेटौंडाका ३,४,५,८ वडाबाट आर्थिक सहयाेग रहने पत्रकार भेटघाटमा उनले जनाकारी दिए । २०७८ सालकाे जनगणना अनुसार मगरहरुकाे संख्या २० हजार ८२१ जना रहेकाे बताइएकाे छ । कार्यक्रमकाे दिन बिहान हेटौंडाको बुद्धचोकबाट सिमाचोक, सितलमहल चोक हुदै हुप्राचौरमा भेला हुने तालिका रहेकाे उनले बताए ।
मगर संघ मकवानपुर अध्यक्ष तुम्सिङ्ग मगरकाे सभाध्यक्षतामा भएकाे पत्रकार भेटघाटमा मगर संघ जिल्ला काेषाध्यक्ष डेमिज थापा मगर, सहसचिव भुपेन्द्र राना, पत्रकार महासंघ जिल्ला अध्यक्ष वालकृष्ण अधिकारी, संचारिका समुह नेपाल मकवानपुरकी अध्यक्ष निशा गुरुङ लगायतकाे उपस्थिति रहेकाे ।
झुरझुरे बागमती । साविक विजेता मछिन्द्र फुटबल क्लब काठमाडौं साताैं संस्करणकाे बागमती गोल्डकप राष्ट्रिय फुटबल प्रतियोगिता फाइनल प्रवेश गरेकाे छ । प्रतियोगिता अन्तरगत शनिबार भएकाे अन्तिम सेमिफाइनलमा थ्रीस्टार क्लब ललितपुरलाई ३–० गोलले पाखा लगाउदैं मछिन्द्र उपाधी नजिक पुगेकाे हाे ।
बागमती–४ स्थित शहीद स्मृति रंगशालामा भएकाे खेलमा साविक विजेता मछिन्द्र क्लबले चौथो संस्करणकाे गोल्डकप विजेता थ्री स्टारलाई पराजीत गरेकाे हाे । थ्रीस्टारका लागि खेलकाे पहिलाे हाफकाे ३७ औं मिनेटमा एलेक्सले १ गोल गर्दैं सुरुवाती अग्रता लिएका थिए । सुरुवाती अग्रता बनाएको थ्रीस्टारले अग्रता कायम राख्न भने सकेन । मछिन्द्रकाे जीतमा खेलकाे बयालिसौं मिनेटमा शिशिर लेखीले गोल गर्दै खेललाई बराबरी पुर्याएका थिए ।
खेलकाे दोस्राे हाफमा ५१ औं मिनेटमा मछिन्द्रका समिरराज थोकरले १ गोल गर्दै टिमलाई अग्रता दिलाए । त्यस्तै खेलकाे ८९ औं मिनेटमा मछिन्द्रका स्टेफेनले थप १ गाेल गर्दै अग्रता बढाएका थिए । थ्रीस्टारले १ गोल पछि खेलका फर्कने प्रयासका बावजुत सकेन । दोस्राे सेमिफाइनलकाे म्यान अफ दी म्याच मछिन्द्रका टिम क्याप्टेन देवेन्द्र तामाङ घाेषित भए । उनले १० हजार रुपैंया हात पारे ।
फाइनल प्रवेशसँगै मछिन्द्रले फाइनलमा पहिलो चर्च व्वाइज युनाइटेडसँगकाे भेट पक्का गरेकाे छ । यसअघि शुक्रबार भएको पहिलो सेमिफाइनल खेलमा विभागीय टोली एपीएफलाई ३–२ गोल अन्तरले हराउँदै चर्च ब्वाइज प्रतियोगिताको फाइनलमा स्थान बनाएकाे थियाे । साेमबार हुने फाइनलमा उपाधी रक्षाका लागि प्रतियाेगितामा पहिलाे पटक सहभागी चर्च व्वाइज र मछिन्द्र भिड्ने छन् ।
प्रतियोगितामा मछिन्द्रले सर्लाहीको बागमती युवा क्लबलाई र थ्री स्टारले हिमालयन शेर्पालाई हराउँदै सेमिफाइनलमा प्रवेश गरेको हो । गत संस्करणमा मछिन्द्रले विभागीय टोलि सशस्त्र प्रहरी बलको एपीएफलाई हराउँदै उपाधी जितेको थियो भने थ्री स्टारले चौथो संस्करणमा क्यामरुनको अफ्रिकन रुट्स एसोसिएसनलाई हराउँदै उपाधी जितेको थियो ।
प्रतियोगिताको उपाधि विजेताले १० लाख र उपविजेताले ५ लाख प्राप्त गर्नेछ । प्रतियोगिताको सर्वोत्कृट खेलाडीलाई १ लाख १ हजार तथा विधागत उत्कृष्ट खेलाडीलाई जनही २५ हजार रुपैयाँसहित ट्रफी प्रदान गरिने आयोजकले जनाएको छ । प्रतियाेगितामा ७ विभागीय टोली तथा ३ वटा माेफसलकाे टाेलीले सहभागिता जनाएका थिए ।
मकवानपुर । सरकारले राष्ट्रिय खोप कार्यक्रम अन्तरगत सञ्चालन गरेको पाठेघरको मुखको क्यान्सरविरूद्धको एचपीभी खोप अभियानमा मकवानपुर जिल्लामा ९७ प्रतिशत किशोरीले खाेप लगाएका छन् । पाठेघरको मुखको क्यान्सर गराउने एचपीभी (ह्युमन प्यापिलोमा भाइरस) विरुद्धको खोप अभियानकाे रुपमा दिइएकाे हाे ।
२२ माघबाट सुरु अभियानकाे अन्तिम दिन ६ फागुनसम्म जिल्लाका १० वटै पालिकामा २० हजार १२३ जनाले खाेप लगाएका हुन् । जिल्ला जनस्वास्थ्य कार्यालयका अनुसार जिल्लाका २० हजार ७८३ जना किशोरीहरुमा खाेप लगाउने लक्ष्य लिइएकाेमा २० हजार १२३ जनालाई उक्त खाेप लगाइएकाे हाे । अभियानका क्रममा ६ कक्षादेखि १० कक्षासम्म अध्ययनरत छात्रा र विद्यालयबाहिर रहेका १० देखि १४ वर्षका किशोरीलाई स्थानीय तहमा रहेका केन्द्रहरूमार्फत खोप प्रदान गरिएको हाे ।
जिल्लाकाे हेटौंडा उपमहानगरपालिकामा सुबै भन्दा बढी किशाेरीले खाेप लगाएका छन् । उपमहानगरमा ९ हजार २३८ जनालाई खाेप लगाउने लक्ष्य लिइएकेमा ९ हजार ११ जनालाई खाेप लगाइएकाे स्वास्थ्य कार्यालयका सूचना अधिकारी लक्ष्मण घिमिरेले जानकारी दिए । यो उपमहानगरमा लगाइएकाे खाेपकाे ९८ प्रतिशत हाे ।
यसैगरी थाहा नगरपालिकामा १ हजार ८८९ जना किशाेरी लक्षितमा १ हजार ८०५ जना अर्थात ९५ प्रतिशत, इन्द्र सरोवर गाउँपालिकामा ४८८ जनकाे लक्ष्य गरिएकाेमा ४ सय ५७ जना अर्थात ९५ प्रतिशत, भीमफेदीमा ८४४ जनाकाे लक्ष्यमा ७९५ अर्थात ९४ प्रतिशत, मकवानपुरगढी गाउँपालिकामा १ हजार ७३ जनाकाे लक्ष्यमा ९ सय ८५ जना अर्थात ९२ प्रतिशत, बकैयामा १ हजार ८५३ जनाकाे लक्ष्यमा १ हजार ७१० अर्थात ९२ प्रतिशत किशाेरीलाई उक्त खाेप लगाइएकाे घिमिरेले जानकारी दिए ।
उनका अनुसार बागमतीमा १ हजार ३३९ जनकाे लक्ष्यमा १ हजार २९५ जना अर्थात ९७ प्रतिशत, मनहरीमा २ हजार २६२ जनाकाे लक्ष्यमा २ हजार ५४ अर्थात ९१ प्रतिशत राक्सिराङमा ७ सय ९८ जनामा ७ सय ७३ अर्थात ९७ प्रतिशत, कैलाशमा १ हजार १ मा ९ सय ९३ अर्थात ९५ प्रतिशत किशाेरीमा खोप लगाइएकाे हाे । यसैगरी एमसीएच क्लिनिक मार्फत २ सय ६३ जना किशोरीलाई एचपीभी खाेप लगाइएकाे उनले बताए ।
हेटौंडा उपमहानगरपालिकालाई वितरण गरिएकाे खाेप डोज मध्ये १५ भायल खाेप ड्यामेज भएकाे तथा मकवानपुर गढीमा ४५ जना किशाेरीले गत वर्ष नै खाेप लगाइएकाे पाइएकाे उनले जानकारी दिए ।
बागमती प्रदेशमा २ लाख ५६ हजारले लगाए खाेप
बागमती प्रदेशका २ लाख ५६ हजार १९१ जना किशाेरीले खोप लगाएका छन् । अभियानकाे अन्तिम दिन ६ फागुनसम्म २ लाख ९८ हजार ९०५ जना किशोरीलाई खोप लगाउने लक्ष्य लिइएकाेमा प्रदेशमा ८६ प्रतिशतले मात्रै खोप लगाएका हुन् । बागमती प्रदेश स्वास्थ्य मन्त्रालयले दिएको जानकारी अनुसार प्रदेशका १३ जिल्लामध्ये लक्ष्यको सबैभन्दा बढी नुवाकोटमा सबै भन्दा बढी ९९.८३ प्रतिशत किशोरीहरुले खोप लगाएका छन् ।
यस्तै दोलखामा लक्षित किशोरीमध्ये ९९ प्रतिशतले खोप लगाएका छन् । रामेछापका ९८ प्रतिशत, सिन्धुपाल्चोकका ९७ प्रतिशत, सिन्धुली र काभ्रेका ९६ प्रतिशत किशोरीलाई खाेप लगाइएकाे छ । मन्त्रालयका अनुसार धादिङका ९५ प्रतिशत, मकवानपुरका ८८ प्रतिशत, चितवनका ८४ प्रतिशत, भक्तपुरका ८५ प्रतिशत, काठमाडौं र ललितपुरका ७९ प्रतिशत र सबैभन्दा कम रसुवाका ९६.१ प्रतिशत एचपिभी खोप लगाइएको हाे ।
संख्यात्मक हिसाबले काठमाडौंमा सबैभन्दा बढी किशाेरीलाई खाेप लगाइएकाे छ । काठमाडौंका १ लाख ११ हजार १०४ जनालाई खाेप लगाउने लक्ष्य राखिएकाेमा ८८ हजार १०८ जना किशोरीलाई खाेप लगाइएकाे मन्त्रालयले जनाएकाे छ । सबैभन्दा कम रसुवाका १ हजार ६८६ जनामा एक हजार ६२० जनालाई खाेप लगाइएकाे हाे । नुवाकोटमा ११ हजार १७८ जनालाई खोप लगाउने लक्ष्य लिइएकोमा ११ हजार १६० जना किशोरीहरुले खोप लगाएकाे मन्त्रालयले जनाएकाे छ ।
यसैगरी दोलखामा ६ हजार ५२० जना किशोरीलाई खोप लगाउने लक्ष्य राखिएकोमा ६ हजार ४८० जनाले खोप लगाएका हुन् । रामेछापका ७ हजार ७८ जना किशोरीलाई खोप लगाउने लक्ष्य राखिएकोमा ६ हजार ९५२, सिन्धुपाल्चोकका १० हजार ४६८ मध्ये १० हजार ११७ जना, सिन्धुलीका १४ हजार ६२२ मध्ये १४ हजार ८२ जनालाई एचपीभी खोप लगाइएको मन्त्रालयले जनाएको छ ।
यस्तै मन्त्रालयका अनुसार काभ्रेका १६ हजार ११३ जनामा १५ हजार ५१५, धादिङका १४ हजार ५७३ जनामा १३ हजार ८२४, मकवानपुरका २२ हजार ७१३ जनामा २० हजार ९३, चितवनका ३१ हजार ५७० जनामा २६ हजार ४४७, भक्तपुरका १९ हजार २९५ जनामा १६ हजार ३७६ ललितपुरका ३१ हजार ९८५ जनामा २५ हजार ११७ जना किशोरीले खोप लगाएका छन् ।
अभियानका क्रममा ६ कक्षादेखि १० कक्षासम्म अध्ययनरत छात्रा र विद्यालयबाहिर रहेका १० देखि १४ वर्षका किशोरीलाई स्थानीय तहमा रहेका केन्द्रहरूमार्फत खोप प्रदान गरिएको छ । खोप अभियान सञ्चालनका लागि प्रदेशमा ८ हजार ७३६ स्वयंसेवक र ४ हजार ३२४ जना कर्मचारी खटाइएको प्रदेशको स्वास्थ्य मन्त्रालयले जनाएको छ ।

मकवानपुर । मकवानपुरकाे हेटौंडामा दोस्रो राष्ट्रिय नवसर्जक उत्सव–२०८१ सुरु भएको छ । नवसर्जक साहित्य चौतारी नेपालको आयोजनामा शुक्रबारबाट सुरु उत्सव शनिबार (आज) सम्म चल्ने छ ।
देशका सातै प्रदेशबाट नवसर्जक सहभागी उत्सवमा शुक्रबार पहिलो दिन साहित्यका विभिन्न विधामा कार्यशाला गरिएकाे थियाे । उत्सव शुभारम्भकाे दिन नवसर्जकहरुले हेटौंडा उपमहनागरपालिका–११ स्थित शहीद स्मारकको भ्रमण गरेका थिए । उनीहरुले बागमती प्रदेशका पहिलाे मुख्यमन्त्री डोरमणि पौडेलसँग ‘शहीद स्मारककाे परिकल्पना, विकास र भावी याेजना’ विषयमा अन्तरसंवाद समेत गरेका छन् ।
यसैगरी हेटौडा–४ स्थित भुटनदेवी माध्यमिक विद्यालय परिसरमा सहित्यका विभिन्न ९ विधामा कार्यशाला आयोजना गरिएकाे थियाे । गजल लेखन, मुक्तक लेखन, लोकलय कविता लेखन, गद्य कविता लेखन, कथा लेखन, यात्रा संस्मरण, नाटक लेखन, हास्ययव्यङ्ग्य लेखन तथा चित्रकलाकाे कार्यशाला भएकाे आयोजकले जनाएकाे छ ।
गजलमा केशव समर्पण, मुक्तकमा विश्वनाथ सञ्जेल, लोकलय कवितामा पुरुषोत्तम आचार्य, गद्य कवितामा सुवास खनाल, कथामा निमेष निखिल, यात्रा संस्मरणमा रमेशमोहन अधिकारी, नाटकमा माधव पोखरेल, हास्ययव्यङ्ग्यमा राजकुमार लामिछाने र चित्रकलामा सूर्य सन्यासीले सहजीकरण गरेका थिए । उक्त कार्यशालाहरुमा विद्यालय तहका २ सय ७० जना विद्यार्थी सहभागी रहेकाे आयोजकले जनाएकाे छ ।
नजसर्जक उत्सवको दोस्रो दिन आज शनिबार भुटनदेवी माध्यमिक विद्यालय परिसरमै नवसर्जक साहित्य चौतारीको प्रथम केन्द्रीय अधिवेशन हुँदैछ । कार्यक्रममा स्रष्टा सम्मान, राष्ट्रव्यापी गजल प्रतियोगिता, गजल तथा नृत्य, बहत्, मुक्तक, कविता वाचन, पुस्तक प्रदर्शनी हुनेछ ।
यसैगरी नवप्रतिभा प्रवर्द्धनमा विद्यालय र स्थानीय सरकारकाे भूमिका विषयमा बहस कार्यक्रम समेत हुनेछ । बहसमा हेटौंडा उपमहानगरपालिका महिला तथा बालबालिका महाशाखा प्रमुख विष्णु कुमारी लामिछाने,श्रीराम दाहाल प्राध्यापक श्रमिक मावि, विनोद सुवेदी प्रिन्सिपल बालजागृति इंग्लिस स्कुल,पत्रकार सुरेश श्रेष्ठ सहभागी हुनेछन् । कार्यक्रमकाे अभिभावकत्व वडाध्यक्ष सिग्देल तथा सहजिकरण नवसर्जक साहित्य चौतारी नेपालकी सचिव कृतिका लौडारीले गर्नेछिन् ।
शुक्रबार नवसर्जक साहित्य चौतारी नेपालकी अध्यक्ष प्रसन्ना चौलागाईको अध्यक्षता तथा प्रा.डा. चुणामणि बन्धुको प्रमुख आतिथ्यमा उद्घाटन समारोह भएको थियो । कार्यक्रममा ४ नम्बर वडाध्यक्ष नवीन सिग्देललगायतकाे आतिथ्यता थियो ।