गत फागुन १४ बाट नेपाली चलचित्र एकसाथ प्रदर्शनमा आए । ती मध्येकाे एउटा चलचित्र हाे मायावी । मायावी भन्ने वित्तिकै मायाकाे कुरा जोडिएर आउँछ । पुरै चलचित्रकाे कथा पोखराकाे सेरोफेरोमा घुमेकाे छ । पोखराकाे पनि लेकसाइड केन्द्रमा छ चलचित्र, जहाँ मुख्य पात्र जोय (पल शाह) सामन्य परिवारकाे तथा आफ्नो रेस्टुरेन्टमा काम गर्छन्।
परिवारका सदस्यले विवाहको कुरा गर्दा उनी सुन्दर केटीको खोजी रहेकाे बताउँछन् । उनी साइकल चढेर ढुल्छन । मन्दिरमा भजन गाउँछ । सानो पसलमा चिया बेच्ने अनि बाटोघाटोमा युवतीहरुलाई जिस्काउदैं हिड्ने पात्र जोय । सुन्दर केटीकाे कल्पना गर्दै जादाँ संयोगवश डाक्टर आर्या (दीपिका प्रसाईं) को गाडीमा साइकल ठोक्किन्छ । त्यहीबाट सुरु हुन्छ चलचित्रको कथा ।
फितलो जिस्काइ सँगै कथा (एक तर्फी प्रेम) को सुरुवात हुन्छ । तर आर्यालाई प्रभावित पार्न कम्मर कसेर लागेकै बेलामा उनी पहिल्यै आदित्य भट्टराईसँग विवाहको तयारीमा रहेको खुल्छ करिब चलचित्रको मध्य तिर । अर्कोतर्फ, जोयका साथीहरू सुशील (जो अपाङ्गता भएका व्यक्ति हुन्) र करिश्माबीच प्रेम सम्बन्ध हुन्छ । तर फिल्मको मुख्य सस्पेन्स आर्याले जोयलाई रोज्छिन् कि आदित्यलाई? अनि सुशील र करिश्माको प्रेम सफल हुन्छ कि असफल? यसैमा टिकेको छ। निर्देशकले यसलाई फिल्ममा सस्पेन्सको रूपमा प्रयोग गर्न खोजेका छन् ।
फिल्मले प्रेम केवल भौतिक सुख सुविधालाई मात्रै हेरेर मात्र हुन्न भन्ने सन्देश दिन खोजेको छ । प्रेममा त्याग हुनुपर्छ भन्ने प्रेरणादायी सन्देश प्रवाह गर्न खोजेको भए पनि चलचित्रलाई भूमरी(ट्विस्ट) बनाउने चक्करमा कथा रुमलिएको छ र कमजोर बनेकाे छ । फिल्मको सिनेमाटोग्राफी राम्रो देखिन्छ । पुरै चलचित्रमा पोखराको फेवाताल वरपरको प्राकृतिक दृष्यले चलचित्रलाई आकर्षक बनाएको छ ।
लक्ष्मी गिरी, राजाराम पौडेल, र अंशु थापाको कमेडीले दर्शकलाई बिचबिचमा हल्का राहत दिएको छ । कही कही सस्ता संवाद दिए पनि उनिहरुको कमेडी प्रभावकारी नै छ। करिश्मा श्रेष्ठको अभिनयमा केही निख्खारता देखिंदा दीपिका प्रसाईँको अभिनयले दर्शकको मन लान्न सकेको देखिदैन । पल शाह चरित्रमा फिट हुन सकेका छैनन् ।
फिल्मको कथा त्रिकोणात्मक प्रेम सम्बन्धलाई आधार बनाएर लेखिएको छ । तर कथामा नयाँ पन केही छैन । कथा र कथ्य शैलीमा नयाँपन दिन नसकिएको प्रष्ट हुन्छ । हिरोको दुर्घटना हुँदा हिरोइन आईपुग्नु, हिरोइन पछ्याउदै हिरो अस्पताल धाउनुजस्ता सिनले चलचित्रमा पुरानो पाराको स्वाद भेटिन्छ । चलचित्र चलाउन सस्तो संवादको सहारा लिएको भन्ने लाग्छ । चलचित्रमा थुप्रै भावुक दृश्य छन् तर ती दृश्यले दर्शकको मन छुन सक्दैन/छुन सकेन ।

निर्देशक दिवाकर भट्टराईले निर्देशनले ९० को दशककै कथ्यशैली देखाइरहेको छ । सुरुवातमा २ पात्रलाई मात्रै फिचराइज्ड गरेर मध्यान्तरमा अर्को पात्र प्रवेशलाई नै सस्पेन्स बनाउन खोजेको कथाले अन्तिमको नतिजासम्म सस्पेन्स टिकाउन सक्दैन र नतिजा सहजै अनुमान गर्न सकिने बनाएको छ । फिल्म निर्माणमै हुने कमजोरी समेत ‘मायावी’ मा छ ।
प्रेम मनबाट हुने हो । प्रेमकथाको पक्ष भावना हो । तर ‘मायावी’का प्रेमिल संवाद अनि दृश्यहरू प्रभावकारी लाग्दैनन् । पात्रबीचको भावनात्मक सम्बन्धलाई दर्शकको मनसम्म पुग्ने गरी लैजानै सकेका छैनन् । कथासँगै दर्शकको मनले यात्रा गर्न सकेको छैन मायावीमा । अक्सर चलचित्र भन्दा बढी गीतलाई स्थान दिइएको छ ‘मायावी’मा । ८ वटा गीतले स्थान पाएको फिल्ममा ती गीतले कथालाई अझै कमजोर बनाएको छ।
फिल्मको पहिलो भागको कथा सुस्तरी अगाडि बढ्छ। जहाँ निर्देशकले दर्शकको धैर्यताको परीक्षा नै लिए समान अनुभव हुन्छ । कथासँगै कमजोर देखिएको छ पटकथा । भनाईमा हिरोइनको बुबाको पात्रलाई कडा मिजासको देखाउन खोजिए पनि उनलाई कुनै पनि दृश्यमा त्यसरी प्रस्तुत गरिएको छैन ।
त्यसो त अष्ट्रेलियामा पढ्न जादा भटेको र माया बसेको भनेर कथान्तरको मध्य तिर मुख्य पात्रलाई सप्राइज दिन हिरोइनले उभ्याएको पात्र कतैबाट टिपेर ल्याएको जस्तो लाग्छ । घर इन्डिया मात्रै भनिएको पात्र इन्गेजमेन्ट पछि टाढा हुँदा हिरोइनले महसुस गरेको फ्रड पात्र पल प्रतिको माया नै कथाको मुख्य सार हाे । पहिले ननसेन लाग्ने पात्र पछि हिरोइनले टाढा राख्छु भन्दा नसकेकाे देखाएकाे टाढा रहनेहरुसँग खासै मन नबस्ने यथार्थ फिल्मले भन्न खोजेकाे देखिन्छ ।
अभिनेता पल शाहका फ्यानहरुका लागि खुशीको खबर बनेर आएको चलचित्र ‘मायावी’ उनको करियरको एउटा कमजोर चलचित्रको रुपमा नेपाली रजतपटमा नाम लेखाएको छ । धेरै ठाँउमा चलचित्र हेर्दा अल्छी लाग्छ । दर्शकले गफ गर्ने, अन्त मन लगाउन सक्छन् ।
यस अगाडि ‘मेरो जीवन साथी’ ‘स्टुपिड मन’, ‘ऐश्वर्य’ र ‘क्याप्टेन’जस्ता फिल्म निर्देशन गरिसकेका दिवाकरले निर्देशन गरेको मायावी कमजोर चलचित्र हो भन्न सकिन्छ । कसैलाई नाम देख्दा आहा भन्ने लागेर मायावी हेर्न जानु भयो र हेरिरहँदा मजा लागेन भने त्यसको टिमलाई नरम तरिकाले गाली गर्ने छुट पक्कै हुनेछ । चलचित्रको अन्त्य दर्शकले कल्पना गर्न खोजेका तर यसो होला की भन्दै अलिअलि उत्सुकता छ । तर व्यावहारिक जीवनमा यस्ता घटना सायदै हुन्छ । ४/५ वर्षकाे नानी बाबुले पहिलाे भेटमै एक अर्का प्रति देखाएकाे आत्मियता राम्राे देखिदैन् ।
अन्तमा कमजोर कथाबस्तु, औसत पटकथा संवाद, सामान्य अभिनय लगायतका कारण चलचित्र मायावी औसत चलचित्रभन्दा माथि उठेको छैन । निर्देशक दिवाकर भट्टाईको पर्दामा कथा भन्ने शैली पुरानै चलचित्रको प्रभाव देखाउँदा नेपाली सिनेजगतमा ‘मायावी’ परम्परागत चलचित्रकै रुपमा आएको छ । दर्शककाे मन जित्न ठूलो बजेट, महँगा नाम चलेका कलाकार राखेर चलचित्र निर्माण गर्ने होइन उत्कृष्ट कथाबस्तु, कलात्मक दृष्टिकोण र अभिनयमा पोख्त कलाकार भए हुन्छ । जादाजादै चलचित्रकाे समूहलाई शुभकामना ।
मकवानपुर । मकवानपुर जिल्लास्तरीय राष्ट्रपति रनिङ्ग शिल्ड प्रतियोगितामा हेटौंडा उपमहानगरपालिका प्रथम भएकाे छ । आइतबारबाट सुरु १५ औं संस्करणको प्रतियोगितामा ५ स्वर्ण, १० रजत र ९ कांस्य पदकसहित हेटौंडा प्रथम भएकाे हाे ।
मकवानपुर जिल्ला खेलकुद विकास समितिको आयोजनामा भएको रनिङ्ग शिल्ड प्रतियाेगितामा १३ स्वर्ण, ५ रजत र १० कांस्य पदक प्राप्त गर्दै बकैया गाउँपालिकाले द्वितीय स्थान हात पारेकाे छ । यसैगरी थाहा नगरपालिकाले ११ स्वर्ण, ९ रजत र ६ कांस्य पदक प्राप्त गर्दै तृतीय भएकाे छ । प्रतियोगितामा प्रथम, द्वितीय र तृतीय हुनेहरुलाई क्रमशः स्वर्ण, रजत र कास्य पदकसहित प्रमाणपत्र प्राप्त गरे ।
प्रतियोगितामा मकवानपुरको ९ वटा पालिकाबाट विभिन्न विधाका करिब ६ सय खेलाडीहरुको सहभागिता रहेको थियो । राष्ट्रपति रनिङ्ग शिल्ड प्रतियोगिता अन्तर्गत भलिबल, एथ्लेटिक्स, कराँते, तेक्वान्दो कबड्डी लगायतका खेलहरु सञ्चालन भएको थियो । इन्द्रसरोवर गाउँपालिका प्रतियोगितामा सहभागी जनाएन ।
गत वर्ष सम्पन्न भएको १४ औँ संस्करणको जिल्लास्तरीय राष्ट्रपति रनिङ शिल्ड प्रतियोगितामा पनि २० स्वर्ण, ७ रजत र १९ कास्य पदक प्राप्त गर्दै हेटौंडा प्रथम भएको थियो । मकवानपुर जिल्ला खेलकुद विकास समितिका अध्यक्ष राजकुमार मुक्तानको अध्यक्षतामा तथा हेटौंडा उपमहानगरपालिकाकी प्रमुख मीनाकुमारी लामाको प्रमुख आतिथ्यमा मंगलबार पुरस्कार वितरण कार्यक्रम भएको हो ।
मकवानपुर । स्वीस नागरिक टोनी हेगनको अर्धकदको शालिक हेटौँडामा अनावरण गरिएको छ ।
मंगलबार टोनी हेगनकी छोरी डा. क्याट्रिना हेगन, उपमहानगरपालिकाकी नगर प्रमुख मीना कुमारी लामा, निवर्तमान नगरप्रमुख हरिबहादुर महतले भुगर्भविद टोनी हेगनको अर्धकदको शालिक अनावरण गरे।
हेटौंडामा मानव वस्तीको परिकल्पना गरेका तथा नेपालविद भनेर चिनिएका डा. हेगनको सम्मानमा हेटौंडा उपमहानगरपालिकाले हेटौँडा–१० मा टोनी हेगन पार्क निर्माण गरेको छ । १ विगाहा ४ कठ्ठा साढे १७ धुर क्षेत्रफल रहेको उक्त पार्कमै अर्धकदको शालिक निर्माण गरिएको हो । टोनी हेगनकी छोरी नेपाल आएको अवसर पारेर शालिक अनावरण गरिएको डा. टोनी हेगन स्मृति पार्क विकास मञ्चका अध्यक्ष ईन्द्रप्रसाद नेपालले जानकारी दिए । शालिक हेटौंडा १८ हर्नामाडीका लक्ष्मण भुजेलले निर्माण गरेका हुन् ।
पार्क निर्माणमा हेटौंडा उपमहानगरपालिका, हेटौंडा १० नम्बर वडा कार्यालय, बागमती प्रदेशका मन्त्रालयहरु, संघीय संसदको सांसद विकास कोष, हेटौँडा खानेपानी व्यवस्थापन बोर्ड, डिभिजन वन कार्यालयले सहयोग गरेको नेपाल बताउँन ।
अध्यक्ष नेपालका अनुसार ६ लाख रुपैयाँ लागतमा शालिक निर्माण गरिएको हो । टोनी हेगन पार्क निर्माणमा हालसम्म २ करोड ९ लाख ८१ हजार रुपैयाँ खर्च भइसकेको उनले बताए ।
मकवानपुर । राष्ट्रिय प्रजातन्त्र पार्टी (राप्रपा) ले हेटौंडामा मोटरसाइकल र्याली निकालेको छ । संघीय संसदमा राजा ज्ञानेन्द्रका विरुद्ध अपशब्दको प्रयोग गर्ने नेताहरूको विरुद्धमा बृहत मोटरसाइकल र्याली निकालिएकाे पार्टीले जनाएकाे छ ।
पार्टी कार्यालयबाट सुरु भएको मोटरसाइकल र्याली सानोपोखरा, ओमभवन, शितलमहल चोक, बसपार्क, एसपी कार्यालय र लोकप्रिय चोक हुँदै सीमाचोकमा कोणसभामा परिणत भएको थियो ।
राप्रपा हेटौंडा नगर अध्यक्ष अरुण लामाले देशको अवस्था बदल्न, व्यवस्था बदल्न राप्रपाले र्याली निकालेको बताए । ‘देशका आम जनता आहात भएकाले व्यवस्था बदल्न सडकमा आएका छन्’ उनले भने । देशले परिवर्तन खोजेको बताउदैं व्यवस्था बदल्न खोजेकोले संघीयता खारेजी गर्नु पर्ने आवाज उठेकाे उनले बताए । देशभित्रका बेथिति विरुद्ध राप्रपाले राजा ज्ञानेन्द्रको पुनःवहालीका लागि चरणबद्ध आन्दोलनका कार्यक्रम गर्दै आएको उनले बताए ।
राप्रपा महिला संगठन केन्द्रीय सचिव सरस्वती थिङले अहिले राज्यले गरेका गतिविधिहरुको बारेमा सजग गराउन र आम नागरिकलाई देशमा भइरहेको विकृति, विसंगती र अराजकता चिर्न र्याली निकालिएको बताइन् । उनले हिन्दु राष्ट्र कायम, राजसस्था पुनस्थापना, भष्ट्राचार नियन्त्रण नभएसम्म राप्रपाका आन्दोलनका कार्यक्रम यथावत रहने जानकारी दिइन् ।
मकवानपुर । कला र सस्कृति प्रवर्द्धनबाट समाजमा रहेकाे विभेद र विकृति हटाई समाजमा चेतना फैलाउन सकिने हेटाैँडा उपमहानगरपालिका ४ नम्बर वडाध्यक्ष नवीन सिग्देलले बताएका छन् ।
हेटौंडाको ४ नम्बर वडा कार्यालयकाे आयाेजना र झलझली मल्टिक्रियसन म्युजिक स्टुडियाेकाे व्यवस्थापनमा शुरू भएकाे सामाजिक रूपान्तरणकाे लागि सचेतनामूलक नगरस्तरीय प्रथम सडक नाटक प्रतियाेगिताकाे उद्घाटन गर्दै वडाध्यक्ष सिग्देलले यस्तो बताएका हुन् । ‘विद्यालयबाटै विद्यार्थीहरूलाई कला र सस्कृतिसंग जाेड्न सके दक्ष र उकृष्ट कलाकारकाे समेत उत्पादन गर्न सकिन्छ’ उनले भने यसबाट समाजमा विद्यमान विकृति, विसंगति, कुरिति, कुसंस्कार अन्धविश्वास, मानवीय हिँसालाई हटाउन सकिन्छ ।’
आइतबार भएको पहिलाे प्रतियाेगितामा ज्ञानाेदय बालबाटिका आवासीय मावि हेटौंडा ५ को समूहले महिला हिँसा विरूद्व सचेतनामूलक रक्ताम्मे मेराे शरीर शीर्षकको नाटक र १८ नम्बर वडा बाल सञ्जालले लागू औषध दुर्व्यसनीविरूद्व चेतना मूलक नाटक प्रस्तुत गरेका थिए । नगरभित्रका १२ वटा समूहको सहभागिता रहेकाे प्रतियाेगिता फागुन २३ गतेसम्म सञ्चालन हुने नाट्यकर्मी आशाकाजी श्रेष्ठले बताए ।
बाल सञ्जाल, नवाेदय शिशु सदनकी उपाध्यक्ष एनि घलेकाे अध्यक्षतामा सुरु प्रतियाेगितामा टाेल विकास संस्था नगर समन्वय समिति महासचिव शिवहरी दाहाल, शैक्षिक गुणस्तर सुधार समिति संयाेजक श्रीराम दाहाल, महिला जागरण समूह अध्यक्ष राधिका चाैलागाई, नवाेदय शिशु सदनका निर्देशक दीपेश जाेशी, राष्ट्रिय जनसाँस्कृतिक मञ्च अध्यक्ष राजुराम राउत, सिस्नुपानी नेपाल मकवानपुरका अजर फुँयाल लगायतको उपस्थिति रहेकाे थियाे ।