मकवानपुर । राष्ट्रिय परीक्षा वोर्डले कक्षा १२ को नतिजा सार्वजनिक गरेकाे छ । सोमबार साँझ प्रकाशित नतिजा अनुसार ६१.१७ प्रतिशत विद्यार्थी उत्तीर्ण भएका छन् । बोर्डका अनुसार ३८.८३ विद्यार्थीको एनजी(ननग्रेड) आएको छ ।
परीक्षामा पाँच लाख ११ हजार ५२५ परीक्षार्थी सहभागी भएकाेमा कुल २ लाख ८४ हजार ३०५ परीक्षार्थी ग्रेडेड (उत्तीर्ण) भएका हुन् । परीक्षामा सहभागी मध्ये १७ जनाको परीक्षाफल रद्द गरिएको बाेर्ड जानकारी दिएकाे छ । नियमित तर्फ ११ र आंशिक तर्फ ६ जना गरी कुल जम्मा १७ जनाको परीक्षा रद्द भएको हाे ।
कक्षा १२ को परीक्षा गत वैशाख २१ गते देखि सञ्चालन गरिएको थियो । पाँच हजार २०२ विद्यालयका नियमिततर्फ एक लाख ९८ हजार ८७५ छात्र र एक लाख ९७ हजार १३ छात्रा गरी तीन लाख ९५ हजार ९०८ परीक्षार्थी सहभागी भएका थिए । त्यस्तै आंशिकतर्फ एक लाख १५ हजार ६१७ जना सहभागी भएकाे वोर्डले जनाएकाे छ ।
कक्षा १२ को पूरक परीक्षा आगामी भदौ २८ र २९ गते सञ्चालन हुने भएको छ । राष्ट्रिय परीक्षा बोर्डले सोमबार नतिजा सार्वजनिक गर्दै पूरक परीक्षाबारे जानकारी दिएको हो ।
यसरी हेर्न सकिनेछ नतिजा
बोर्डका अनुसार यो वर्षको १२ कक्षाको परीक्षाकाे नतिजा वेबसाइट, एसएमएस सर्भिस र आईभीआर सर्भिसमार्फत हेर्न र थाहा पाउन सकिने छ ।
राष्ट्रिय परीक्षा बोर्डको वेबसाइट result.neb.gov.np वा neb.gov.np र नेपाल टेलिकमको वेबसाइट https://neb.ntc.net.np बाट नतिजा हेर्न सकिन्छ ।
यसैगरी एसएमएस सेवा अन्तर्गत NEB Symbol No. टाइप गरी नेपाल टेलिकमको १६०० मा एसएमएस गरेर नतिजा प्राप्त गर्न सकिने छ ।
यसैगरी आईभीआर सेवा अन्तर्गत नेपाल टेलिकमको १६०१ नम्बरमा डायल गरी प्राप्त निर्देशानुसार नतिजा प्राप्त गर्न सकिनेछ । यूएसएसडी सेवा अन्तर्गत *१६०१# नम्बरमा डायल गरी प्राप्त निर्देशानुसार पनि नतिजा प्राप्त गर्न सकिन्छ ।
मकवानपुर । बागमती प्रदेश प्रमुख दीपकप्रसाद देवकोटाले ४ वटा विधेयक प्रमाणीकरण गर्नु भएको छ । सोमबार प्रदेश प्रमुख देवकोटाले प्रदेशसभाबाट पारित भएका ४ वटा विधेयकहरुलाई प्रमाणीकरण गर्नु भएको हो ।
विभिन्न मितिमा प्रदेश सभाबाट पारित भएका विधेयकहरु गत ११ साउनमा प्रदेश प्रमुखसमक्ष प्रमाणीकरणको लागि पेस गरिएको थियो ।
प्रदेश प्रमुख देवकोटाले प्रदेश औद्योगिक व्यवसाय ऐन, २०७५ लाई संशोधन गर्न बनेको विधेयक, प्रादेशिक व्यापार तथा व्यवसाय सम्बन्धी ऐन, २०७५ लाई संशोधन गर्न बनेको विधेयक, मदन भण्डारी स्वास्थ्य विज्ञान प्रतिष्ठान ऐन, २०७६ लाई संशोधन गर्न बनेको विधेयक र प्रदेश कृषि विकास सम्बन्धमा व्यवस्था गर्न बनेको विधेयक प्रमाणीकरण गर्नु भएको हो ।
प्रदेश प्रमुख देवकोटाले व्यावसायिक २ विधेयक र स्वास्थ्य विज्ञान प्रतिष्ठानको विधेयकलाई नेपालको संविधानको धारा २०१ को उपधारा (२) बमोजिम प्रमाणीकरण गरेका हुन् भने प्रदेश कृषि विकास सम्बन्धी विधेयक संविधानको धारा २०१ को उपधारा (४) प्रमाणीकरण गरेका हुन् ।
मकवानपुर । बागमती प्रदेशकाे मुख्यमन्त्रीमा नेपाली काँग्रेस संसदीय दलकाे नेता इन्द्र बहादुर बाँनियाले दावी पेश गरेका छन् ।
काँग्रेस बागमती सभापति समेत रहेकाे बाँनियाले सोमबार सत्ता गठबन्धन दल नेकपा एमाले र कांग्रेसको समर्थनमा मुख्यमन्त्रीमा दाबी पेस गरेका हुन् । मुख्यमन्त्री बहादुर सिंह लामाले पदबाट राजिनामा दिए पछि बागमती प्रदेश प्रमुख दीपक प्रसाद देवकाेटाले मंगलबार दिउँसो २ बजेसम्म मुख्यमन्त्रीमा दावी पेश गर्न आह्वान गरेका थिए ।
आइतबार मुख्यमन्त्री बहादुर सिं लामाले पदबाट राजिनामा दिएकाेमा उक्त राजिनामा पत्र सोमबार प्रदेश प्रमुख समक्ष पेश भएको थियो । यो सँगै प्रदेश प्रमुखबाट नेपालको संविधानको धारा १६८ को उपधारा (२) बमोजिम मुख्यमन्त्रीको लागि दावी पेश गर्न आव्हान गरेका थिए ।
बानियाँले नेपाली काँग्रेस संसदीय दलका ३७ जना र नेकपा (एमाले) संसदीय दलका २७ जना सदस्यसहित ६४ जना बहुमत सदस्यकाे समर्थन सहित नेपालको संविधानको धारा १६८ को उपधारा २ बमोजिम मुख्यमन्त्री पदमा नियुक्तिका लागि प्रदेश प्रमुख समक्ष दावी पेश गरेका हुन् । बागमती प्रदेश सभामा ११० जना सदस्य छन् ।
मकवानपुर । बागमती प्रदेशका मुख्यमन्त्री बहादुर सिंह लामाले स्वकीय सचिव मार्फत प्रदेश प्रमुखसमक्ष राजीनामा पेस गरेका छन् ।
सोमबार बहादुरको तर्फबाट स्वकीय सचिव छत्र बहादुर लामाले प्रदेश प्रमुख दीपक प्रसाद देवकोटाका प्रमुख स्वकीय सचिव बलराम गैरेमार्फत प्रदेश प्रमुखसमक्ष राजीनामा पत्र पेस गरेका हुन् ।
लामाले आइतबार पत्रकार सम्मेलन नै गरेर पदबाट राजीनामा दिएको घोषणा गरेका थिए । लामाले नेपालको संविधानको धारा १६९ को उपधारा १ (क) अनुसार मुख्यमन्त्री पदबाट राजीनामा दिएका हुन् ।
यसैगरी प्रदेश प्रमुख देवकोटा अस्पतालबाट स्वास्थ्य लाभ गरी सोमबार नै कार्यालयमा उपस्थित भएका थिए । आइतबार अस्पतालबाट डिस्चार्ज भएका उनी सोमबार सिमरा हुँदै हेटौँडास्थित कार्यालय आएका हुन् ।
स्वास्थ्यमा समस्या देखिएपछि प्रदेश प्रमुख देवकोटा गत साउन १५ गते काठमाडौँको धापासीस्थति ग्रान्डी अन्तर्राष्ट्रिय अस्पतालमा भर्ना भएका थिए ।
लामाले राजीनामा पत्र बुझाएसँगै अब नयाँ मुख्यमन्त्री नियुक्ति प्रक्रिया सुरु हुनेछ । बागमतीकाे छेटौं मुख्यमन्त्रीमा काँग्रेस बागमती प्रदेश सभापति तथा संसदीय दलका नेता इन्द्र बहादुर बाँनियाले सत्तारुट दल नेकपा एमालेकाे समर्थनमा दावी पेश गर्नेछन् ।
मकवानपुर । झ्वाट्ट हेर्दा कुनै मन्त्रालय जस्तो वा सरकारी प्रशासनिक भवन जस्तो । पुर्व पश्चिम राजमार्गको हेटौंडा–११ थानाभर्याङ खण्डको आडैमा रङ्गरोगनले चट्ट देखिने यो भवन । यो तरकारी बजार हो भनेर अनुमान गर्नै नसकिने ।
३० करोड ८७ लाख लागतमा निर्माण गरिएको तरकारी बजार उद्घाटन तथा हस्तान्तरण गरिएको हो । हेटौंडा उपमहानगरपालिका–११ थानाभर्याङमा निर्माण सम्पन्न भएको प्रादेशिक कृषि थोक बजारको निर्माण सम्पन्न भएको वर्षदिन पछि सदुपयोगमा आउने भएको हो ।
हो यही प्रदेशिक तरकारी बजार निर्माण सकिएको वर्षदिनपछि हस्तान्तरण गरिएको छ ।बागमती प्रदेश सरकारका कृषि तथा पशुपन्छी विकास मन्त्री प्रकाश श्रेष्ठ र हेटौंडा उपमहानगरपालिकाकी मेयर मिना कुमारी लामाले संयुक्त रूपमा बजारको उद्घाटन गरेका छन् । साेही अवसरमा मन्त्री श्रेष्ठले थोक बजारको औपचारिक रुपमा साँचो नगर प्रमुख मिनाकुमारी लामालाई हस्तान्तरण गरिएको हो । अब बजारको व्यवस्थापनको जिम्मेवारी उपमहानगरपालिकाले गर्नुपर्नेछ ।
सुविधासम्पन्न उक्त कृषि थोक बजार सञ्चालनमा आएपछि हेटौंडा र आसपासका क्षेत्रका कृषक, व्यापारी तथा उपभोक्तालाई व्यवस्थित व्यापारिक पूर्वाधार उपलब्ध हुने अपेक्षा गरिएको छ । एउटै घरमा ६ वटासम्म मन्त्रालय राखेर, झ्याल झ्यालमा मन्त्रालयको बोर्ड झुड्याएपछि चर्चामा आएको बागमती प्रदेशको राजधानीमा यो तरकारी बजार निर्माण सम्पन्न भएको एक वर्षपछि बल्ल हस्तान्तरण गरिएको छ ।
प्रदेशको मन्त्रालय बन्न नसके पनि प्रादेशिक थोक तरकारी बजार अब प्रयोगमा ल्याउने सकिने अवस्थामा तयार भएर पनि एक वर्ष अलपत्र अवस्थामै रह्यो । कसरी कुन मोर्डालिटीमा सञ्चालन गर्ने भन्ने कार्यविधि नबनाएको बाहानामै बित्य एक वर्ष। कृषि उत्पादनलाई प्रोत्साहन गर्नेको लागि निर्माण गरिएको थोक बजार कार्यविधिकै अभावमा अलपत्र थियो ।
प्रदेशको आर्थिक मामिला तथा योजनामन्त्री कुन्दनराज काफ्लेले २०८१ भदौमा बजारको स्थलगत निरीक्षण गर्दै लगत्तै सञ्चालन गर्न निर्देशन दिएका थिए । तर त्यो निर्देशन लागु हुन एक वर्ष लाग्यो। थोक बजारको भौतिक संरचना तयार भएसँगै कार्यविधि निर्माणमा समय लागेको मन्त्रालयले जनाएको छ ।
भवन हस्तान्तरण हुनु अघि कार्यविधि बनाइसक्नु पर्ने तर कार्यविधि निर्माणका मत बाझिइरहेने गरेको कारण समस्या भएको थियो । प्रदेश सरकार र हेटौंडा उपमहानगरपालिकाबीच यसअघि नै थोक बजार निर्माणको सम्झौता भएर सञ्चालनको जिम्मा उपमहानगरपालिकाको कार्यालयले लिने सहमति भएको थियो ।
हेटौंडा उपमहानगरका प्रवक्ता सविन न्यौपानेले कार्यविधि बनेपछि यो थोक बजार उपमहानगरपालिकाले सञ्चालन गर्न उपमहानगरपालिका तयार रहेको बताए ।
प्रदेश सरकारले ७०/३० को लगानी मोडलअनुसार दुई बिघा ४ धुर क्षेत्रफलमा तीन वर्ष लगाएर थोक बजार निर्माण गर्ने लक्ष्यसहित १४ भदौ २०७७ मा हेटौंडा उपमहानगरपालिकासँग सम्झौता गरेको थियो ।
सम्झौताको एक वर्षपछि थोक बजार निर्माण थालिएको थियो । थोकबजार निर्माणका लागि अनक/माउण्टेन जेभी काठमाडौंले ३० करोड ८७ लाख ६२ हजार ७ सय ८७ रुपैयाँमा ठेक्का पाएको थियो ।
९ जेठ २०७८ मा काम सुरु गरेको कम्पनीले जेठ २०८१ भित्र सम्पन्न गर्नुपर्ने सम्झौतामा थियो । ७ महिना म्याद थप भएकाले ८ मंसिरसम्ममा काम सम्पन्न गरेको दावी गरएिको छ । कृषि विकास निर्देशनालय बागमती प्रदेशले कृषि थोक बजारको भौतिक प्रगति ९६ प्रतिशत भएको जानकारी दिएको छ ।
थोक बजार निर्माणका लागि हेटौंडा उपमहानगरले तत्कालीन समयमा थानाभर्याङस्थित राप्ति पुल नजिकैको जग्गामा रहेका ५८ वटा घर/टहरा हटाएको थियो । जग्गा खाली गरेपछि १८ असार २०७८ मा बागमतीका तत्कालीन मुख्यमन्त्री डोरमणि पौडेल र उपमहानगरका मेयर हरिबहादुर महतले शिलान्यास गरेका थिए ।
यस्तो छ थोक बजार

थोक बजारमा होलसेल मार्केट, रिटेल (खुद्रा) मार्केट, किसानको टहरा, प्रशासनिक तथा क्यान्टिन, कोल्ड स्टोरेजलगायतका संरचना तयारी छ । बजारको होलसेल मार्केटमा ४० वटा सटर र रिटेल मार्केटमा २३ वटा सटर रहेको छ । भवनमा अण्डरग्राउण्ड पार्किङको पनि सुविधा छ ।
एउटै भवनमा दुई वटासम्म लिफ्ट छ । बजारक्षेत्र प्रवेशको लागि ३ वटा ठुला मुख्य गेटहरु राखिएको छ । गेटमा सुरक्षाकर्मी राखिने छ, सुरक्षा पोष्ट निर्माण गरिएको छ ।
अन्तर्राष्ट्रिय मापदण्ड अनुसार यो थोक बजार निर्माण गरिएको हो । ताजा तरकारी भण्डारण, शीतभण्डार, प्याकिङ, ग्रेडिङ र प्रशोधन जस्ता कार्य यहाँबाट गर्न सकिने छ ।
हेटौंडा १० मा रहेको तरकारी बजारलाई व्यवस्थित गर्न २ वर्ष अघि हेटौंडा १ स्वर्गद्वारीमा उपमहानगरपालिकाले बजार सारेको थियो । अब त्यही तरकारी बजार फेरी हेटौंडा ११ स्थित यो संरचनामा सारिने छ ।