मकवानपुर । मकवानपुरको भीमफेदी कारागारमा रहेका कैदीबन्दी मध्य ३ सय ५५ जनामा कोरोना भाइरस पोजेटिभ देखिएको छ । एन्टिजिन बिधिबाट गरिएको परिक्षणमा उनीहरुलाई कोरोना पोजेटिभ देखिएको हो ।
अहिले भीमफेदी कारागारमा ९ सय ७० जना कैदी बन्दी रहेका छन् । केही कैदीबन्दीमा रुघाखोकी देखेर पनि निको भएको बताइएको छ । १४ जनामा संक्रमणको समस्या देखेपछि थप उपचारको लागि साउन ११ गते काठमाडौं पठाइएकोमा उनीहरुमा कोरोना पुष्टि भएपछि कारागारमा
परीक्षण गरिएको भिमफेदी गाउपालिकाका स्वास्थ्य संयोजक राममान थिङले बताए ।
अहिले स्वास्थ मापदण्ड पूरागरेर आईसोलेसनमा राखेका छौं । संक्रमण देखिएकालाई प्रोटिन युक्त खानाको व्यवस्थापन गरेर संक्रमण नियन्त्रणको काम भैरहेको जेलर नारायण पाण्डेले बताए ।
मकवानपुर । आमा बुबाबाट समान माया र संरक्षण पाउने बालबालिकाहरूको अधिकार भए पनि यो व्यवहारीक नभएको बाल अधिकारकर्मीहरूले बताएका छन् ।
विभिन्न समस्याको कारण अभिभावक विहिन भएका बालबालिकाहरुलाई यस्तो प्रकारको वातवरण सिर्जना गर्न समस्या भएको अधिकारकर्मीहरुले बताएका हुन् । एक्प्याक्ट लगजेम्बर्गको सहयोगमा रास्ट्रीय बाल अधिकार परिषदसँगको समन्वयमा तथा सेलर्ड र शक्ती समुहले काम गरिरहेको सुरक्षाको लागि साथ साथ परियोजना अन्तर्गत विहीबार मानव बेचबिखन बिरुद्ध तथा बाल संरक्षणको सम्बन्धमा सेवा प्रदायकहरुलाई एक दिवशीय तालिम आयोजना गरिएको थियो।

पीडितलाई न्याय दिलाउने क्रममा अधिकारकर्मीहरू नै समस्यामा पर्ने गरेको सवाल पनि कार्यक्रममा उठाइएको थियो । पीडित आफैंले मोबाइल नम्बर परिवर्तन गर्ने तर सम्बन्धित निकायमा जानकारी नगराउने जस्ता कारण पीडितलाई नै सम्पर्क गर्न समस्या हुने गरेको सिविन बाल हेल्थलाईनका प्रमुख झविन्द्र ज्ञावलीले बताए ।

यसैगरी पीडितको पक्षमा साक्षी बस्नेहरू सहजै पाउन समस्या हुने गरेको अधिकारकर्मीहरूले बताएका थिए । न्यायको लडाइ झन्झटिलो हुंदा साक्षी बस्ने व्यक्ति नपाउने गरेको उनीहरूको भनाई थियो । कार्यक्रममा हेटौंडा उपमहानगरपालिका महिला बालबालिका महाशाखा प्रमुख जगन्नाथ सापकोटाले स्थानीय तह र सामाजिक संस्थाले आपसमा सहकार्य गर्नुपर्ने बताए ।
महिला र बालबालिकाको सवालमा लामो समयदेखि चल्दै आएको परम्परागत व्यवहारलाई सच्याउदै जानको लागि सहकार्य जरुरी रहेको सापकोटाले बताए । महिला तथा बालबालिका महाशाखा बसेर आफूले काम गर्ने क्रममा दिनानुदिन आवश्यक हुने धेरै सवालबारे सिकाइ भएको सापकोटाले बताए ।
तालिममा मानव बेचविखन तथा ओसारपसारः बदलिदों स्वरुप, बाल संरक्षण सम्बन्धि मुलभुत अवधारण, स्वयमसेवा पर्यटन र पीडितको अधिकार संरक्षण, क्षतिपुर्ति र पुर्नस्थापनाको बारेमा स्रोत व्यक्तिको रुपमा सिविन बाल हेल्प लाइनका झविन्द्र ज्ञावली र सम्झना अधिकारीले प्रशिक्षण गराएका थिए । यसै गरी सेलर्डका फिल्ड अफिसर जगन्नाथ सुवेदीले पनि तालिममा सहजिकरण गरेका थिए ।

बालबालिकाहरुमाथि हुन सक्ने संभावित दुर्घटना रोक्नको लागि कानुनी रुपमा समेत बन्देज लगाइएको सेलर्डका फिल्ड अफिसर सुवेदीले बताए । ‘पर्यटन भिसामा आएका पर्यटकहरुलाइ कानुनले कुनै पनि विषयमा काम गर्ने अधिकार दिएको छैन’ सुवेदीले भने ।
बालबालिकाको क्षेत्रमा काम गर्ने सबैले मौजुदा ऐन कानुनबारे जानकारी हासिल गरिराख्नु आवश्यकता मनन गरेको र यो तालिमबाट त्यस्तो सिकाइ भएको सहभागीहरुले बताएका थिए ।
तालिममा मानव अधिकार तथा मानव बेचविखन विरुद्धको जिल्ला सञ्जालमा सक्रिय संस्थाहरु माइती नेपाल, मकवानपुर महिला समूह, अस्मिता नेपाल, हिमराइट्स मकवानपुर, सिविन बाल हेल्प लाइन, हाम्रो घरलगायतका संस्थाका प्रतिनिधिहरू तथा पत्रकारहरु गरी २४ जनाकाे उपस्थिति रहेको सुवेदीले बताए ।

मकवानपुर । मकवानपुर प्रहरीले ६५ किलो लागूऔषध गाँजा र स्कारपियो सहित २ जनालाई पक्राउ गरेको छ ।
विहीबार हेटौंडा उपमहानगरपालिका १९ नेवारपानीमा मनहरी तर्फबाट हेटौंडातर्फ आउदै गरेको बा ११ च ९५०९ नंबरको स्कारपियो गाडीलाई चेकजाँच गर्दा उक्त गाडीमा लुकाई छिपाई ल्याएको ६५ किलो लागूऔषध गाँजा फेला परेकोले स्कारपियाे सहित २ जना पक्राउ गरिएकाे जिल्ला प्रहरी कार्यलय मकवानपुरले जनाएको छ ।
गाँजा र स्कारपियाे सहित पक्राउ पर्नेमा भरतपुर महानगपालिका २० चनौली चितवनका ३८ वर्षीय रोशन परियार र राक्सिराङ गाउँपालिका ६ मकवानपुरका ४३ वर्षीय ललित तामाङ रहेका प्रहरीले जानकारी दिएकाे छ ।
उनीहरु सहित लागूऔषध गाँजा स्कारपियो नियन्त्रणमा लिई थप अनुसन्धान भईरहेको प्रहरीले जनाएको छ ।
मकवानपुर । बागमती प्रदेश र प्रदेश २ जोड्ने दक्षिण यसियाकै पहिलो सुरुङ्ग मार्गलाई पर्यटकीय गन्तव्यको रुपमा विस्तार गरिने बागमती प्रदेशका मुख्य मन्त्री डोरमणि पौडेलले बताएका छन् ।
सम्पदाको संरक्षण गर्न प्रदेश सरकारले चासो राखेको बताउंदै मुख्यमन्त्री पौडेलले विहीवार यस्तो बताएका हुन । भौतिक पुर्वाधार विकास मन्त्रालय, यातायात पुर्वाधार निर्देशनालय बागमती प्रदेश अन्तरगतको आयोजना भएको चुरियामाई सुरुङ्ग मार्ग पुनर्निर्माण कार्य शिलान्यास समारोहमा मुख्य मन्त्री पौडेलले यस्तो बताएका हुन् ।

कार्यक्रममा मुख्य मन्त्री पौडेलले वि.स २०१९ सालमा आफैले यात्रा गरेको स्मरण गरे । मकवानपुरको भिमफेदीबाट बारा जिल्लाको अमलेखगञ्जसम्म यात्रा गरेको मुख्यमन्त्री पौडेलले स्मरण गरे । सरकार आफैं निर्माण व्यवसायीसंग पीडित भएको भन्दै पौडेलले कुनै पनि हालतमा तोकिएको अवधिमा काम सप्पन्न गर्न निर्माण कम्पनीलाई निर्देशन दिए । सुरुङ्ग मार्गलाई पर्यटकीय स्थलको रूप दिन प्रदेश सरकारले मर्मत संभारको योजना बनाएको उनले बताए ।
समय सापेक्ष विकासको गतिविधि स्वीकार गर्दै सुरुङ्ग मार्गको संरक्षण गर्न लागिएको मुख्यमन्त्री पौडेलले बताए । “सडक चौडा गर्दा सुरुङ्गलाई असर नपर्ने गरि केही परबाट सुरुङ्ग मार्गको संरचना आकर्षक र अध्ययन स्थलको रुपमा विकास गरिनेछ” पौडेलले भने।

कार्यक्रममा भौतिक पुर्वाधार मन्त्री रामेश्वर फुयालले आवश्यक तहमा समन्वयको काम सकिएको बताए । “१०४ बर्ष अघिको तुलनामा अहिले धेरै अनुकूलता छ, हामी आंटेको काम सफलता पुर्वक गर्न सक्छौ” मन्त्री फुयालले भने । नेपालमा इन्जिनियरिङ्गको पढाइको क्रमामा बिद्यार्थीलाई सिकाईको लागि भिजिट गर्नै पर्ने स्थानको रुपमा यो क्षेत्रको विकास गरिने मन्त्री फुयालले बताए । पाठ्यक्रममा समेत यसको बिषयवस्तु समाबेश गरिने उनले बताए ।
प्रदेश सरकारले १ सय ९८ मिटर लम्बाई, २ दशमलव ५ मिटर चौडाई र ३ मिटर उचाईमा मर्मत गर्ने छ । यो सुरुङ्ग मार्ग ३ करोड ३६ लाख लागतमा २०७९ को बैशाख १९ गतेभित्र कार्य सम्पन्न गर्नेगरी सम्झौता गरिएको यातायात पुर्वाधार निर्देशनालय बागमती प्रदेशले जनाएको छ ।
मकवानपुर । कोरोना भाईरस महामारी नियन्त्रणको लागि जारी गरिएको निषेधाज्ञा मकवानपुरमा पुनः १० दिन थपिएको छ ।
तर निषेधाज्ञाको प्रभावकारितामा भने प्रश्न उठाउन थालिएको छ ।
जिल्ला कोभिड संकट व्यवस्थापनको संयोजक एवं जिल्ला प्रशासन कार्यलय मकवानपुरका प्रमुख भरतमणी पाण्डेले जारी निषेधाज्ञा थप १० दिन थपिने निर्णय भएको जानकारी दिए ।
आज बसेको जिल्ला कोभिड संकट व्यवस्थापनको बैठकले थप १० दिन निषेधाज्ञा जारी राख्ने निर्णय गरेको हो । पछिल्लो पटक थप गरिएको निषेधाज्ञा साउन १४ गने सम्म रहेको थियो । निषेधाज्ञा खुकुलोनै रहने प्रमुख पाण्डेले बताए ।
जिल्लामा कोरोना संक्रमण पुष्टि हुनेको संख्या नघटेको र संक्रमणको जोखिम कायम रहेको निष्कर्ष निकाल्दै निषेधाज्ञा जारी राख्ने निर्णय भएको प्रमुख पाण्डेले बताए ।
प्रशासनले निषेधज्ञामा बिहान ४ बजेबाट ११ बजेसम्म खाद्यन्न व्यवसाय तथा ११ बजेबाट साँझ ६ बजेसम्म अन्य व्यवसायहरु सञ्चालन गर्न अनुमति दिएको छ । संघीय सरकारले बन्द गरेका शैक्षिक संस्थाहरु सहितका व्यवसाय भने बन्दनै रहने छ । जिल्लामा निजि तथा सार्वजनिक यातायात संचालन भईरहेको छ ।
जिल्लामा गत बैशाख २१ गतेबाट निषेधाज्ञा जारी छ ।तर यसको खासै प्रभावकारिता देखिएको छैन । बजार व्यापक भिड देखिँदा प्रशासनले वास्तै गरेको छैन ।