मकवानपुर । मकवानपुर जिल्लाको विकट राक्सिराङ गाउँपालिकाका विद्यार्थीहरुको शैक्षिक गुणस्तर सुधारोन्मुख भएको दाबि गरिएको छ ।
कोर इन्टरनेशनल क्यानडाको आर्थिक सहयोग, राक्सिराङ् गाउँपालिकाको समन्वय तथा हिमराइट्स मकवानपुरको आयोजनामा विगत ५ वर्षदेखि नियमित रुपमा बालबालिकालाई शैक्षिकसँगै विविध पाटोमा सहयोग गरेपछि उनीहरुको शैक्षिक गुणस्तरमा सुधार देखिएको हो ।
विहीबार हिमराइट्स मकवानपुरले विद्यार्थीहरुको लागि खाजा वापत प्राप्त हुने पैसाले खाद्यन्न वितरण गरेको छ । ज्याला मजदुरी गरेर जिविका चलाउंदै आएका २५ अभिभावकको सूर्यदय माध्यमिक विद्यालयमा अध्ययनरत २५ बालबालिकालाई सहयोग गर्दै आएको छ ।

विहीबार आयोजित खाद्यन्न वितरण कार्यक्रममा राक्सिराङ गाउँपालिका वडा ३ का वडाअध्यक्ष उत्तम वाइबाले विपन्न परिवारलाई छनौट गरेर गरिएको आर्थिक सहयोगले शिक्षामा सहयोगी भूमिका खेल्ने बताए । संस्थाले गरेको सहयोगलाई अभिभावकले सकारात्मक फल दिनको लागि ध्यान दिनुपर्ने उनले बताए ।
बालबालिकाको शैक्षिक उन्नती तथा उज्यालो भविष्यको लागि सकारात्मक निगरानी आफूले गर्ने उनले बताए । निरन्तर स्कुल आउन र फरक प्रकारको सिर्जनशीलता देखाउन विद्यार्थीलाई पनि वडा अध्यक्ष वाईबाले आग्रह गरे ।
कोर इन्टरनेशनल क्यानडाको आर्थिक सहयोगमा हिमराइट्स मकवानपुरले विद्यार्थीको अध्ययनको लागि शैक्षिक सामग्री, अतिरिक्त शिक्षक, विद्यालय पोशाक समेत सहयोग गर्दै आएको छ ।
कार्यक्रमा विद्यालयमा प्रध्यानाध्यापक सिताराम सुवेदीले सिमान्तकृत समूदायका बालबालिकालाई पढाइमा सुधार पुगेको, सहयोग निरन्तरता दिंदै दीगो आय आर्जनमा समेत ध्यान दिनुपर्ने बताए ।

हिमराइट्सले गरेको लगानीको प्रतिफल दिनको लागि अभिभावकले ध्यान दिनुपर्नेमा प्रध्यानाध्यापक सुबेदीले पनि अनुरोध गरे ।
पाँच वर्ष अघि र अहिले यहाँका विद्यार्थीहरुमा शैक्षिक गुणस्तरसँगै अतिरीक्त क्रियाकलापमा समेत सुधार भएको हिमराइट्सले व्यवस्थापन गरेको अतिरिक्त शिक्षक सबिना भारतीले बताइन् । विद्यालय समयभन्दा बाहेक प्रत्येक दिन भारतीले पाठ्यक्रम र अतिरिक्त ज्ञान हुनेगरी २ घन्टा कक्षा लिने गरेकी छिन् । भारतीलाई हिमराईट्सले नै पारिश्रमिक दिएर अतिरिक्त शिक्षकको व्यवस्था गरेको हो ।
बालबालिकाको सुरक्षा, हिंसाबाट बचावटको लागि पनि ध्यान दिनको लागि हिमराइट्स मकवानपुर प्रमुख कुमारी वाइबाले आग्रह गरिन् । अभिभावकलाई दीगो आर्थिक उपार्जनमा सघाउन बाख्रा पनि वितरण गरेको वाइबाले बताइन् ।
स्थानीय जुनमाया प्रजाले आफूलाई संस्थाले बीउ पूँजिको रुपमा बाख्र सहयोग गरेपछि अरु बाख्रा समेत थपेर व्यवसायिक बन्ने कोशिसमा लागेको बताइन् । उनको छोरी सुसिला प्रजा संस्थाकै सहयोगमा कक्षा १२ पढ्दै छिन ।
विद्यार्थीहरुलाई जाडोको लागि न्यानो कपडा वितरणको तयारी समेत भैरहेको हिमराइट्स मकवानपुरकी इन्दु गोलेले बताइन् ।
मकवानपुर । मकवानपुर प्रहरीले लागू औषध सहित दुई जनालाई नियन्त्रणमा लिएको छ ।
हेटौंडा १२ तिनताप्के स्थित भित्री सडक खण्डमा लागू औषध कारोबार भएको भन्ने बिशेष सुचनाको आधारमा खटिएको प्रहरीले लागू औषध सहित उनीहरूलाई पक्राउ गरेको जिल्ला प्रहरी कार्यालय मकवानपुरले जनाएको छ ।
प्रहरीले स्थानीय २१ बर्षिय अबिन थिङलाई नियन्त्रणमा लिई चेकजाँच गर्दा निजले बोकेको झोलाबाट लागू औषध नुरफिन ५० एम्पुल, डाईजोपाम ५० एम्पुल, फेनारगन ५० एम्पुल फेला परेको बताएको छ ।
यसैगरी अर्का स्थानीय ३४ बर्षिय प्रताप घलानलाई पनि प्रहरीले पक्राउ गरेको छ । घलान प्रहरी देख्ना साथ भाग्न खोज्दा तत्काल नियन्त्रणमा लिएर खोजतलास गर्दा घलानको घरको शौचालय माथि लुकाई राखेको नुरफिन ५४ एम्पुल, डाईजोपाम ६३ एम्पुल, फेनारगन ५७ एम्पुल फेला पारेको प्रहरीले जनाएको छ ।
थिङ र घलानलाई लागू औषध सहित नियन्त्रणमा लिइ थप अनुसन्धान र कारवाही प्रक्रिया अगाडी बढाइएको प्रहरी जनाएको छ ।
मकवानपुर । भीम विराग संगीत, साहित्य, कला प्रतिष्ठान नेपालले ६ जना व्यक्तित्वलाई पुरस्कृत गर्ने भएको छ । प्रतिष्ठानले बुधबार हेटौंडामा पत्रकार सम्मेलन गरी पहिलो चरणमा विभिन्न क्षेत्रबाट पुरस्कृत हुने ६ जना व्यक्तिको नाम र प्रादेशिक पुरस्कर सार्वजनिक गरेको हो ।
सार्वजनिक गरिएका ब्यक्तिलाई पुष ९ गते शनिबार एक समारोहकाबीच पुरस्कृत गरिने प्रतिष्ठानका महासचिव केशवलाल श्रेष्ठले जानकारी दिए । प्रतिष्ठानले तुलसीमाया शिवकुमारी सिर्जनशील नारी पुरस्कारबाट मकवानपुरे साहित्यकार भावना सापकोटालाई पुरस्कृत गर्ने भएको छ । सापकोटालाई १० हजार रुपैयाँ राशिसहित पुरस्कृत गरिने भएको छ । सरकारी शिक्षक पेशामा आवद्ध रही साहित्य सिर्जनामा क्रियाशील सापकोटा आँचल साहित्य कला पुञ्जकी अध्यक्ष समेत हुन ।
यस्तै भीम–मथुरा बाल प्रतिभा पुरस्कारबाट हेटौंडा–२ स्थित बालजागृति इंग्लिस सेकेण्डरी स्कूलकी छात्रा सुविज्ञा सुवेदी पुरस्कृत हुने भएकी छिन । बालसाहित्यमा सक्रिय सुवेदीलाई प्रदान गर्न लागिएको पुरस्कारको राशी ७ हजार ५ सय रुपैयाँ रहेको छ ।
यसैगरी विजय बानियाँ स्मृति लोक संगीत पुरस्कार मकवानपुरका लोक गायक रविन्द्रकुमार चेपाङलाई प्रदान गरिने भएको छ । सरिखेत पलासेका स्थायी बासिन्दा चेपाङ रेडियो नेपालबाट ५० को दसकमा लिइएको स्वर परिक्षामा समेत सफल गायक हुन । चेपाङलाई २० हजार रुपैयाँ राशीसहित पुरस्कृत गरिने भएको हो । यता चिनुकुमारी लामा स्मृति साहित्य पुरस्कार साहित्यकार बासुदेव गुरागाईँलाई प्रदान गरिने भएको छ । साहित्यमा पिडालु पण्डितको उपनामले चिनिने गुरागाईँलाई १५ हजार रुपैयाँ राशीसहित पुरस्कृत गरिने बताइएको छ । गुरागाई हेटौंडा १८ हर्नामाडीका स्थायी बासिन्दा रहि नेपाल सरकारको सह सचिबबाट सेवा निवृत कर्मचारी हुन । हाल काठमाडौ गोंगबु निवासी गुरागाईका लघुकथा कबिता हास्यब्यङ्य सग्रह प्रकशित छन।
यसैगरी मंगलादेवी स्मृति स्वास्थ्य सेवा पुरस्कारबाट स्वास्थ्यकर्मी बेला वैद्यलाई पुरस्कृत गरिदैछ । बैद्यलाइ पुरस्कृत गरिन लागेको पुरस्कारको राशी १० हजार रुपैयाँ रहेको छ । बैद्य स्वास्थ्य सेवामा स्थायी कर्मचारीको रुपमा कार्यरत रही सेवा निवृत कर्मचारी तथा हेटौंडाकी सफल स्वास्थ्य ब्यबसायी समेत हुन ।
अजित सेन गुप्ता स्मृति भिन्न क्षमता पुरस्कारबाट हेटौंडा–५, पिप्लेस्थित बालज्योति माविमा कार्यरत दृष्टिविहिन शिक्षक विदुर अधिकारीलाई पुरस्कृत गरिने भएको छ । दृष्टिविहिन विद्यार्थीलाई नै पढाउँदै आउनुभएका अधिकारीलाई १० हजार रुपैयाँ राशीसहित पुरस्कृत गरिने बताइएको छ ।
स्थापनाकालदेखि नै साहित्य, संगीत, सँस्कृति र कलाका क्षेत्रमा १२ वटा पुरस्कारको व्यवस्थापन गर्दै आएको प्रतिष्ठानले दोस्रो चरणको ६ वटा पुरस्कार आगामी माघ महिनामा दिइने बताइएको छ । पुरस्कृत ब्यक्तित्व र पुरस्कार सार्वजनिक गरिएको पत्रकार सम्मेलनमा प्रतिष्ठानका अध्यक्ष ह्यग्रीव आचार्य, निवर्तमान अध्यक्ष उज्ज्वल शर्मा भण्डारी, उपाध्यक्ष विष्णुगोपाल महर्जन, सहयोगी मुक्तिगोविन्द वैद्यको उपस्थिति थियो ।
मकवानपुर । आर्थिक जोहोका लागि वैदेशिक रोजगारीमा पुगेर पीडित भएका परिवारलाई शैक्षिक सामग्री बितरण गरिएको छ । सुरक्षित आप्रवासन (सामी) कार्यक्रमले अन्तराष्ट्रिय आप्रवासी श्रमिक दिवसमा वैदेशिक रोजगारमा रहदा वेपत्ता भएका, ज्यान गुमाएका र शारीरिक अशक्त परिवारका बालबालिकालाई शैक्षिक सामग्री वितरण गरिएको हो ।
रोजगारीको शिलशिलामा बिभिन्न मुलुकमा पुगे पनि कामको शिलशिलामा बिदेशमा हराएका र अशक्त भएकाहरुको परिवारलाई सरकारको मातहत रहेको बैदेशीक रोजगार बिभाग र बोर्डबाट आर्थिक सहायता र राहतको सुचिमा नपरेका परिवारलाई हेटौंडा उपमहानगरको सुरक्षित आप्रवासन (सामी) कार्यक्रमले ९ जना बिद्यार्थीलाई शैक्षिक सामग्री वितरण गरिएको हो ।
हेटौंडा उपमहानगरपालिका भित्रका बिभिन्न बिद्यालयमा अध्ययनमा रहेका छात्रछात्रालाई अध्ययनमा सहयोगका लागि झोला सहित कापी कलम, कलर बक्स, जुत्ता सहितको सामग्री हेटौंडा उपमहानगरपालिकाकी प्रमुख मिना कुमारी लामाले बितारण गरेकी हुन । सामीले विद्यार्थीको आवश्यताको आधामा सामग्रीहरु बितरण गरेको बताइएको छ ।
सामग्री हस्तान्तरण गर्दै प्रमुख लामाले देशको आर्थिक श्रोतलाई बलियो बनाउँनका लागि वैदेशिक रोजगारीमा गएका परिवारका वालबालिकालाई सहयोग गर्दा उनीहरुको शैक्षिक गुणस्तरमा मद्दत पुग्ने बताइन् । वैदेशिक रोजगारीको शिलशिलामा बेपत्ता भएका र शारीरिक रुपमा अशक्त भई काम गर्न नसक्ने अवस्थाका व्यक्तीको लागि सहयोगी बन्न उपमहानगर तयार रहेको उनले बताइन् ।
कार्यक्रममा हेटौंडा उपमहानगरपालिका १६ का अध्यक्ष तथा सामाजिक बिकास समितिका संयोजना रामकृष्ण कोइराला, सामाजिक बिकास महाशाखा प्रमुख भिमप्रसाद तिमल्सिना सामी परियोजनाकी कार्यक्रम अधिकृत लगायतको उपस्थिती रहेको थियो ।
मकवानपुर । जेसीआई बसामाडीको आयोजनामा हेटौंडामा भएको जिल्लास्तरीय रनिङ शिल्ड भलिबल प्रतियोगिताको उपाधि आग्रा स्पोर्ट्स क्लबले जितेको छ ।
जेसीआई बसामाडीको २० औं संस्करणको स्वर्गीय लक्ष्मीमाया बज्राचार्य स्मृति जिल्लास्तरीय रनिङ शिल्ड भलिबल प्रतियोगिताको उपाधि आग्रा स्पोर्ट्स क्लबले जितेको हो । शनिबार हेटौंडा–४, हुप्रचौरस्थित भलिबल कोर्टमा भएको फाइनल खेलमा आग्रा स्पोर्ट्स क्लबले विनयवावु स्मृति प्रतिष्ठानलाई ३–० को सोझो सेटले हराउँदै उपाधि हात पारेको हो ।
फाइनल खेलमा आग्रा स्पोर्ट्सले विनयवावु प्रतिष्ठानलाई २५–२०, २६–२४ र २६–२४ को सोझो सेटमा पराजित गरेको थियो । उपाधिसँगै आग्राले ६५ हजार रुपैयाँ नगद, शिल्ड, मेडल तथा प्रमाणपत्र प्राप्त गरेको छ । यस्तै उपविजेता विनयवावुले ३० हजार रुपैयाँ प्राप्त गरेको छ । प्रतियोगिताको सर्वोत्कृष्ट खेलाडी आग्राका पुजन गुरुङ घोषित हुँदा उत्कृष्ट स्पाइकर आग्राकै रमेश थिङ र सञ्जय थिङ घोषित भए ।
प्रतियोगितामा सहभागी ७ वटा टिम मध्ये बज्रबाराही युवा क्लब अनुशासित टिम घोषित भयो । प्रतियोगितामा विजेता तथा उपविजेता र उत्कृष्ट खेलाडीलाई प्रमुख अतिथि प्रदेशसभा सदस्य प्रेमबहादुर पुलामी र जेसीआई बसामाडीका अध्यक्ष चिराग अग्रवालले नगद तथा पुरस्कार वितरण गरेका थिए ।
प्रतियोगिताको फाइनल खेल बागमती प्रदेश सभा सदस्य छिन्तु प्रमुख आतिथ्यता, नेपाली काङ्ग्रेस मकवानपुरका वरिष्ठ नेता तथा जेसिआइ बसामाडीका अध्यक्ष सल्लाहकार जेसी अशोक शाक्यको विशिष्ट आतिथ्यता र पूर्व अन्तर्राष्ट्रिय भलिबल खेलाडी तथा प्रहरी निरीक्षक चुडा कुमारी खड्काको विशेष आतिथ्यतामा भएको हो।
