मकवानपुर । हेटाैँडा उपमहानगरपालिका वडा नं. ४ का वडा अध्यक्ष नवीन सिग्देलले अबकाे विकास प्रविधि मैत्री हुनपर्ने बताएका छन् ।
आजकाे युग प्रतिस्पर्धी युग भएकाेले विकासमा प्रविधिलाई जाेड्नु पर्ने र तालिमले प्रविधिकाे प्रयाेगकाे प्रवर्द्वन गर्नुका साथै सीपले राेजगारीकाे सृजना गर्न, आत्मनिर्भर र व्यवसायिक बनाउन मद्दत गरेकाे बताए ।
जीभ करिअर ईष्टिच्युट प्रा.लि.काे आयाेजना, व्यवसायिक सीप विकास तालिम केन्द्र, भैसेपाटी ललितपुरकाे सहयाेग तथा बाग्मती एजुकेशन कन्सल्टेन्सी प्रालिकाे समन्वयमा सञ्चालित माेवाईल फाेन मर्मत तालिमकाे उद्घाटन कार्यक्रममा बाेल्दै अध्यक्ष सिग्देलले यस्तो बताएका हुन् ।
प्रविधिकाे प्रयाेग र प्रवर्द्वनमा सबै तहकाे सरकारकाे ध्यान जानुपर्ने र स्थानीय सरकारकाे भूमिका महत्वपूर्ण हुने उनले बताए ।
हेटाैँडा ४ स्कुलराेड स्थित प्रालिकाे कार्यालयमा ६५ दिनसम्म सञ्चालित हुने माेवाईल फाेन मर्मत तालिममा २० जनाकाे सहभागीता रहेकाे छ ।
बाग्मती एजुकेशन कन्सल्टेन्सी प्रालीका सञ्चालक शिव श्रेष्ठकाे अध्यक्षतामा भएकाे कार्यक्रममा मकवानपुर माेवाईल एसाेसिएसनका अध्यक्ष नवराज चाैलागाई, प्रशिक्षक उद्वव घिमिरेलगायतको उपस्थिति थियो ।
मकवानपुर । चालु आर्थिक वर्षको ३ महिनामात्रै बाँकी रहदा संघीय लगानीमा बागमती प्रदेश सरकारमार्फत निर्माण हुने भनेको आवस निर्माणको कार्य प्रगती शून्य रहेको छ ।
चालु आर्थिक वर्षमा तोकिएको लक्ष्यित वर्गको आवास निर्माणको लागि छुट्याइएको ५ करोड बजेटको खर्च प्रगती शून्य रहेको हो । संघिय सरकारको विशेष अनुदान तर्फको सार्वजनिक निर्माण अन्तर्गत चेपाङ, वनकरिया, माझी, बोटे, थामीहरुको लागि एकिकृत वस्ती निर्माण गर्न यस आर्थिक वर्षमा ५ करोड छुट्याइएको थियो । जसमध्ये आर्थिक वर्षको ९ महिना सकिदासम्म निमांण हुने आवासहरुको लगत संकलन र विषयगत बैठकभन्दा बाहेक केही काम भएको छैन ।
लक्ष्यित वर्गको लागि मकवानपुर चितवन र धादिङ जिल्लाका लागि कुल १० करोड बजेटमा आर्थिक बर्ष ०७९।८० को लागि ५ करोड रकम विनियोजन गरेको थियो । ३ वर्षमा कार्य सम्पन्न गर्नुपर्नेमा सो योजना अन्तर्गत पहिलो बर्षमा कार्यविधि निर्माण, तथ्याँक संकलन भएको छ ।
आवास निर्माणका लागि कार्यक्रम सम्झौता समेत सकिएको छैन । कार्यक्रमको लागि सम्झौताको तयारी लगायतका कार्य भइरहेको भौतिक पूर्वाधार मन्त्रालयका सिनियर डिभिजन इन्जिनियर उपसचिव चन्द्रकाजि गुरुङले बताए । उल्लेखित जिल्लाहरुमा बस्तीको लागि लाभग्राही तथा लक्षित वर्गहरु मकवानपुरमा १२० घरधुरी रहेका छन् । यसैगरी चितवनमा ७५ घरधुरी र धादिङमा ५५ घरधुरी रहेको उनले बताए ।
लक्ष्यितवर्गको लागि आवास निर्माणार्थ प्रत्येक घरधुरीका लागि ४ लाख रकम बराबरको लागत अनुमान गरिएको छ । सरकारले घर निर्माण गरिदिने भनेको तर आशामात्रै देखाउँदै आवास निर्माणमा ढीलाइ गरेको मकवानपुर मनहरी नयाँ बस्तिका बोटे समूदायको गुनासो छ ।
“अघिल्लो वर्ष पनि घर बन्ने कुरा थियो, बनेन अहिले पनि कुरै मात्रै हो की” स्थानीय संगिता बोटेले भनिन् “अब झरीवर्षाको मौसम आउँदासम्म पनि घर नबने हाम्रो बिजोक हुन्छ ।” मनहरीको बोटे समूदायका १५ परिवारको केही वर्ष अघि एकीकृत बस्ति निर्माण गरिएको थियो । उनीहरुसँगै बस्दै आएका आवास विहिनहरुको लागि आवास निर्माण गर्ने भनिए पनि हालसम्म निर्माण हुन नसक्दा उनीहरु समस्या खेप्दै आएका छन् ।
मकवानपुर । सुर्तिजन्य पदार्थको प्रयोग स्वास्थ्यको लागि हानिकारक छ । तर मापदण्डले तोकिए बमोजिम निषेधित स्थानमा निषेधित व्यक्ती किन्न र बेच्नमा सहभागी हुने गरेका छन् ।
यस्तो गैरकानूनी काम रोक्न जनप्रतिनिधिको भूमिका कस्तो होला ? हेटौँडा उपमहानगरपालिका ४ का वडा अध्यक्ष नवीन सिग्देल यो गैरकानूनी कदम रोक्नको लागि घरदैलोमा लागेका छन् । वडा अध्यक्ष सहितको टोलीले शैक्षिक संस्था रहेको स्थानबाट कम्तिमा १ सय मिटर वरिपरी मध्यपान र धुम्रपान विक्री वितरण नगर्न अनुरोध गर्दै घरदैलोमा लागेका हुन् ।
हेटौंडा ४ मा रहेको श्रमिक मावि, ब्रम्हदिक एकेडेमी, नवदोय मावि, हेटौँडा क्याम्पस, आधुनिक मावि, स्कुल अफ म्यानेजमेन्ट, भुटनदेवी माविको क्षेत्रमा सोमबार सचेतना स्वरूप घरदैलो गरिएको थियो ।
आफ्नो पसलमा वडा अध्यक्ष आफैंले आएर हात जोड्दै मध्यपान र धुम्रपान विक्रि नगर्नु भनेपछि आफूले आगामी दिनमा यस्तो व्यापार नगर्ने व्यापारीहरुले प्रतिवद्धता ब्यक्त गरेका छन् । अध्यक्ष सिग्देलले घरदैलोको क्रममा मध्यपान र धुम्रपान विक्रि वितरणको सवालमात्रै उठाएनन् । बाल श्रम, लैङ्गीक हिंसा, लागूऔषतविरूद्व समेत जानकारी गराए । यस बारे सचेतनामुलक स्टिकर समेत विभिन्न स्थानमा टाँसिएको थियो ।
विद्यालय क्षेत्र वरिपरि मध्यपान र धुम्रपान मुक्त बनाउनु, विद्यालयलाई शान्ति क्षेत्र बनाउनु र लागू औषध, लैङ्गिक हिंसा, वालश्रम विरूद्व अभियान रहेको वडा अध्यक्ष सिग्देलले बताए ।
कार्यक्रममा जनप्रतिनिधिहरू, टोल विकासका प्रतिनिधिहरू, महिला तथा बालवालिका सरोकार केन्द्र, सामाजिक अभियान सञ्जाल हेटौँडा ४, नेपाल प्रहरी, विद्यालय व्यवस्थापन समितिका प्रतिनिधिहरू, शिक्षक, विध्यार्थीहरूको सहभागीता रहेको थियो ।
कार्यक्रममा वडा सदस्य जग्गनाथ पाण्डे, सामाजिक अभियान सञ्जाल, हेटौँडा ४ की अध्यक्ष माया लामा, टोल विकास संस्था वडा समन्वय समितिका अध्यक्ष राजेन्द्रकुमार बस्ताकोटी, शैक्षिक गुणस्तर सुधार समिति, हेटौँडा ४ को संयोजक श्रीराम दाहाल, श्रमिक मावि व्यवस्थापन समितिका अध्यक्ष विवेक कार्की, हेटौँडा क्याम्पसका प्रमुख देवचन्द्र मानन्धर, उपप्रमुख अर्पण पराजुली, महिला तथा वालवालिका सरोकार केन्द्र, मकवानपुरकी अध्यक्ष सरू सिलवाललगायतको सहभागीता रहेको वडा सचिव टीका कंडेलले बताए ।
हेटौंडा उपमहानगरपालिका बालमैत्री स्थानीय शासन लागु भएको स्थानीय तहको रुपमा घोषणा गर्ने तयारी हुँदै छ । यस्तो अभियानले उक्त लक्ष्यमा समेत टेवा पुग्ने वडा सचिव कंडेलले बताए ।
मकवानपुर । मकवानपुरकाे हेटौडा उपमहानगरपालिका वडा नम्बर १८ घर आगलागी हुँदा जलेर नष्ट भएकाे छ । हेटौडा -१८ हर्नामाडी भोर्ले आँपखोलामा १ घर जलेर नष्ट भएकाे हाे । हेटौंडा–१८, भोर्लेस्थित जंगबहादुर गुरुङको घर आगलागीले जलेर नष्ट भएको छ ।
शुक्रबार दिउँसो साढे ३ बजेको समयमा घर नजिकैको बाँसको झाङमा लगाएको आगो सल्किएर गुरुङको पराल राखिराखेको दुई तल्ले काठको घर आगले नष्ट भएको छ हेटौडा १८ नम्बर वडा सदस्य योगराज खतिवडाले जानकारी दिए । खतिवडाका अनुसार आगलागी भएकाे घर आवासका लागि प्रयोग नगरिएको हुनाले मानवीय क्षति भने भएकाे छैन् ।
आगलागी स्थानीय युवा र हेटौंडा उपमहानगरपालिकाको बारुणयन्त्रले करिब १ घण्टामा नियन्त्रणमा लिएकाे बताइएकाे छ ।
मकवानपुर । मकवानपुर प्रहरीले लागुऔषधसहित ५ जनालाई नियन्त्रणमा लिएको छ । मकवानपुरकाे छुट्टाछुट्टै स्थानबाट २ जना भारतीय नागरिक सहित अन्य ३ जनालाई लागुऔषाधसहित प्रहरीले नियन्त्रणमा लिएकाे जनाएकाे छ ।
हेटौंडा–१ स्थित चौकीटोलबाट प्रहरीले लागुऔषध वनरेक्स २ सय ४० बोतल (प्रति बोतल १ सय एमएल), डाइजेपाम १३ बट्टा (प्रति बट्टा ५० एम्पुल), नोरफिन ६ बट्ट (प्रति बट्टा १ सय एम्पुल), फेनारगन १ सय २० पत्ता (प्रति पत्ता ५ एम्पुल) सहित २ जना भारतीय नागरिकलाई नियन्त्रणमा लिएको हो । बिहिबार विशेष सूचनाको आधारमा वीरगंजबाट काठमाडौं जादै गरेको भारतीय प्लेट नम्बर भएको बोलेरो गाडीलाई हेटौंडा–१ चौकीटोलमा प्रहरीले जाँच गर्दा बोलेरो चालक भारतको सिवान जिल्ला पन्चायत–५ का २६ वर्षीय अमित कुमार र गाडीमा सवार सोहि स्थानका २३ वर्षीय अनिल कुमारलाई उक्त परिमाणकाे लागुऔषधसहित नियन्त्रणमा लिइएकाे जिल्ला प्रहरी कार्यालय मकवानपुरले जनाएको छ ।
यसैगरी लागुऔषध नाईट्राभेटसहित ३ जनालाई हेटौंडा उपमहानरगपालिका वडा नम्बर १५ चुरियामाई मन्दिरस्थितबाट मकवानपुर प्रहरीले नियन्त्रणमा लिएकाे छ । बिहिबार वीरगंजबाट हेटौंडातर्फ आउँदै गरेको बागमती प्रदेश ०३–००१ ह १३७२ नम्बरको अटोलाई सुरक्षाजाँच गर्दा अटोमा लुकाई छिपाई ल्याएको लागुऔषध नाईट्राभेट २ सय ९९ ट्यावलेट फेला पारि ३ जनालाई नियन्त्रणमा लिइएकाे जिल्ला प्रहरी कार्यालय मकवानपुरले जानकारी दिएको छ ।
पक्राउ पर्नेमा कन्चनपुर जिल्ला भिमदत्त नगरपालिका–१८, भगतपुर घर भई हाल नवलपरासी गैंडाकोट नगरपालिका–१ ब्रिटिशक्याम्प रोड बस्ने २७ वर्षीय सन्तोष सिंह, अटोमा सवार चितवन जिल्ला भरतपुर महानगरपालिका–२ क्षेत्रपुर बस्ने बर्ष ३५ वर्षीय ईश्वर श्रेष्ठ र अटोमा सवार सोहि ठाँउका ३४ वर्षीय रमेश घले रहेको प्रहरीले जनाएको छ ।
लागुऔषधसहित नियन्त्रणमा लिइएका ५ जनालाई थप अनुसन्धान गरिरहेको प्रहरीले जनाएकाे छ ।