मकवानपुर । जिल्ला स्तरीय राष्ट्रपति रनिङ शिल्ड प्रतियाेगितामा हेटौंडा उपमहानगरपालिकाले प्रथम स्थान हासिल गरेकाे छ । १४औँ संस्करणको जिल्ला स्तरीय राष्ट्रपति रनिङ शिल्ड प्रतियोगिता अन्तरगत हेटौडा उपमहानगरपालिका २० स्वर्णसहित प्रथम भएकाे हाे ।
हेटौंडाको हुप्राचौरमा माघ १२ गतेदेखि १४ गतेसम्म सचालन भएकाे प्रतियोगितामा हेटौंडा उपमहानगरपालिका २० स्वर्ण, १० रजत र २० कास्य जित्दै प्रथम भएको हो । यसैगरी बकैया गाउँपालिका १२ स्वर्ण १० रजत र ९ कास्य प्राप्त गरी द्वितीय स्थानमा रहँदा थाहा नगरपालिकाले ९ स्वर्ण ९ रजत ९ कास्यसहित तृतीय स्थान हासिल गरेको छ ।
राष्ट्रपति रनिङ शिल्डमा बागमती गाउँपालिकाले ४ स्वर्ण ८ रजत ८ कास्य, भीमफेदी गाउँपालिकाले ४ स्वर्ण १ रजत ३ कास्य, मनहरी गाउँपालिकाले १ रजत ३ कास्य, इन्द्रसरोवर गाउँपालिकाले १ स्वर्ण २ रजत २ कास्य, कैलाश गाउँपालिकाले २ स्वर्ण ९ रजत ३ कास्य हात पारेकाे मकवानपुर जिल्ला खेलकुद विकास समितिका प्रमुख माधव कोइरालाले जानकारी दिए । मकवानपुरको राक्सिराङ गाउँपालिकाले प्रतियाेगितामा कुनै पनि पदक प्राप्त गर्न सकेन ।
मकवानपुर । हेटौंडा – १७ स्थित अंगारेश्वर टोल विकास संस्थाको प्रथम साधारण सभा भएको छ। शनिबार भएकाे साधारण सभाले संस्थाको तदर्थ समिति अध्यक्ष सिताराम वाइवाको ११ सदस्यीय कार्यसमिति गठन गरेको छ।
नवगठित कार्यसमितिको उपाध्यक्षमा रमा खड्का, सचिवमा सन्तोषी खड्का, कोषाध्यक्षमा सीता दाहाल, सह-सचिव शारदा अधिकारी चयन भएका छन् । यसैगरी सदस्यहरूमा बिना दाहाल, वीर बहादुर गोङ्बा, सेती कुमारी गोङ्बा, मनिषा गोङ्बा, अर्चना पुडासैनी र गोमा तिमल्सिना चयन भएका छन् । भेलाले अध्यक्ष सिताराम वाइवा र कोषाध्यक्ष सीता दाहालले प्रस्तुत् गर्नुभएको प्रतिवेदन पारित गरेको छ।
यसैगरी साधारण सभामा हेटौंडा १७ को खेलकुद विकास समितिकाे आयोजनामा भएकाे ‘प्रथम वडाध्यक्ष कप रनिङ शिल्ड फुटबल प्रतियोगिता – २०८०” मा खेल टिम सहभागी गराउन आर्थिक सहयोग गर्नुहुने व्यक्ति तथा संस्थालाई सम्मान गरेकाे छ । सम्मानित हुनेहरुमा सन्तोष थापामगर, बाबु सिङ्तान लामा, सूर्य बहादुर पाख्रिन , नविन विष्ट, महेश गोङ्बा र बि. एन. के. स्नुकरलाई सम्मान-पत्र प्रदान गरिएकाे थियो।
संस्था अध्यक्ष वाइवाकाे अध्यक्षता तथा हेटौंडा १७ का वडासदस्य कृष्ण बहादुर अधिकारीको प्रमुख आतिथ्यमा भएको साधारण सभमा हेटौंडा उपमहानगरपालिका सामाजिक महाशाखाका प्रतिनिधि, लेखापाल रामचन्द्र बानियाँ, सल्लाहकार कमलबहादुर विष्ट, हटिया सकोसका अध्यक्ष रमेशकुमार राना, टाेल विकास संस्था नगर समन्वय समिति सदस्य देवराज अधिकारी लगायतकाे उपस्थिति थियाे ।
मकवानपुर । मकवानपुरकाे हेटौंडामा गिजर प्रयोग गरी नुहाउने क्रममा १ जनाकाे मृत्यु भएकाे छ । हेटौडा उपमहानगरपालिका वडा नम्बर ९ लामसुरेका २१ वर्षीय युनेश काफ्लेकाे ग्यास गिजर प्रयोेग गरी नुहाउने क्रममा मृत्यु भएको मकवानपुर प्रहरीले जनाएकाे छ ।
सोमबार दिउँसो नुहाउन गएका उनी लामो समय बाथरुमबाट ननिस्किएपछि परिवारका सदस्यले बाथरुमको ढोका फोडेका थिए । प्रहरीका अनुसार बाथरुममा ग्यास गिजर प्रयोेग गरी नुहाउने क्रममा उनी वेहाेश भएकाे पाइएकाे थियाे । अचेत अवस्थामा युनेशलाई उपचाचरकाे लागि हेटौंडाकाे मकवानपुर सामुदायिक अस्पताल पुर्याउँदा चिकित्सकले मृत घोषित गरेकाे जिल्ला प्रहरी कार्यालय मकवानपुरले जानकारी दिएकाे छ ।
मकवानपुर । मकवानपुरकाे हेटौडामा सोमबार शिक्षक दौड तथा महिला शिक्षक स्लो स्कुटी प्रतियाेगिता भएको छ । सहिद सप्ताह अन्तरगत हेटौंडा उपमहानगरपालिका ४ नम्बर वडा कार्यालयको आयोजना तथा नेपाल राष्ट्रिय शिक्षक संगठन मकवानपुरको व्यवस्थापनमा प्रतियाेगिता भएकाे हाे ।
पुरुष शिक्षक दौडमा मकवानपुरगढी गाउँपालिकाकाे भानु माध्यामिक विद्यालयका मुकेश चौलागाई प्रथम, भानु माविकै दुर्लभ कुमार दुलाल द्वितीय भएका छन् । यसैगरी हेटौंडा–४ मा रहेकाे नवोदय शिशु सदनका राम कंशाकार तृतीय हुँदा मकवानपुरगढीकाे शारदा माविका दिनेश सुवेदी चौथो स्थानमा रहे । नवोदय शिशु सदनका अविरल शाक्यले सान्त्वना परस्कार प्राप्त गरे ।
स्लो स्कुटी प्रधिस्पर्धामा हेटौंडा–१४ स्थित भृकुटी माविकी सिर्जना थिङ प्रथम, हेटौँडा–४ स्थित ब्रह्मदिक एकेडेमीकी सुजिता बोम्जन द्वितीय र ब्रह्मदिककै मुना लामा तृतीय भए । पुरुष शिक्षक दौडमा ३४ जनाको सहभागिता रहेको थियो भने महिला शिक्षक स्लो स्कुटी प्रतियोगितामा ४० जनाको सहभागिता रहेको नेपाल राष्ट्रिय शिक्षक संगठन मकवानपुर अध्यक्ष श्रीराम दाहालले बताए ।

प्रतियाेगितामा पुरूष शिक्षक तर्फ दाैडमा प्रथम हुनेले ७ हजार, द्वितीय हुनेले ५ हजार, तृतीय हुनेले ३ हजार, चाैथाे हुनेले २ हजार र सान्त्वना हुनेले १ हजार प्राप्त गरे । यस्तै महिला शिक्षक तर्फ स्लाे स्कुटी प्रतियाेगितामा प्रथम हुनेले ७ हजार, द्वितीय हुनेले ५ हजार र तृतीय हुनेले ३ हजार पुरस्कार प्राप्त गरे ।
दौड प्रतियोगिता ४ नम्बर वडा कार्यालयबाट शुरू भई शितलमहल चोक, ओमभवन चोक, भैरवरोड, मिलनचोक हुँदै ४ नम्बर वडा कार्यालयमै आइपुगेको थियोे । स्लो स्कुटी प्रतियोगिता भने हुप्रचौरमा भएको थियो । शिक्षक संगठन अध्यक्ष दाहालको सभाध्यक्षता तथा पूर्व युवा तथा खेलकुद मन्त्री पुरूषोत्तम पौडेलको प्रमुख आतिथ्यमा भएकाे कार्यक्रमा ४ नम्बर वडाध्यक्ष नवीन सिग्देलको विशेष आतिथ्यमा रहेको थियो ।
मकवानपुर । मकवानपुरका क्रियाशील पत्रकार रुपक कालिराज ‘स्वर्गीय उदय सिंह पाठक पत्रकारिता पुरस्कार’ बाट सम्मानित भएका छन् । बस्तीपुर जेसीज हाँडीखोलाकाे १३ औं पदस्थापना कार्यक्रममा कालिराजलाई उक्त पुरस्कारद्वारा सम्मानित गरिएकाे हाे ।
यसैगरी उक्त कार्यक्रममा ओम बृद्धाआश्रमका अध्यक्ष सिद्धिलाल श्रेष्ठलाई सामाजसेवी पुरस्कार प्रदान गरिएकाे छ । कालिराज र श्रेष्ठलाई ७ हजार २ सय २ रुपैयाँ नगद सहित दोसल्ला र सम्मानपत्र साथ सम्मानित गरिएकाे हाे । जेसीज वर्ष २०२४ का अध्यक्ष अमृत पाठकका परिवार र प्रतिनिधि सभा सदस्य दीपक बहादुर सिंहले उनीहरुलाई सम्मानित गरेका हुन् ।
पदस्थापन कार्यक्रममा प्रतिनिधि सभा सदस्य एवं पुर्व ऊर्जा राज्यमन्त्री सिंहले जेसीजले देखाएको नेतृत्व हस्तान्तरणको शैलीबाट राजनीतिक दल तथा नेताहरुले पनि पाठ सिक्नुपर्ने बताए । ‘नेताहरू ५ पटक मन्त्री बन्दा पनि पदको लोभ त्याग्दैनन् र हस्तान्तरणको कला बुझ्दैनन्, तर जेसीजले गरेको पद हस्तान्तरणबाट नेताहरूले सिक्नुपर्छ।’ उनले भने । दलमा पनि जेसीज जस्तो नेतृत्व हस्तान्तरण गर्ने शैलीको विकास गरिनु पर्नेमा उनले जोड दिए । आफू घुस नलिने र जनताको हित हुने काममा मात्र लाग्ने घोषणा गर्दै सिंहले भने ‘म कहिल्यै पनि घुस खाँदिन र खान पनि दिँदिन। म जनताको शिर निहुरिने, जनहित विपरीत हुने काम गर्दिन।’ उनले युवालाई सक्रिय राजनीतिमा आउन आग्रह गर्दै युवाहरूले नै देशकाे जिम्मेबारी वहन गर्दै बचाउन सक्ने बताए ।
पदस्थापना तथा पुरस्कार वितरण कार्यक्रममा नवनिर्वाचित अध्यक्ष अमृत पाठकसहितका पदाधिकारीलाई पदभार हस्तान्तरण गरिएकाे छ। हेटौंडा-१९ मा आयाेजना गरिएकाे कार्यक्रममा वर्ष २०२३ का अध्यक्ष जेसिज प्रेम बहादुर गोङ्बाले वर्ष २०२४ का लागि निर्वाचित पाठकलाई पद हस्तान्तरण गरेका हुन् । जेसीजका नवनिर्वाचित कार्यकारिणी उपाध्यक्ष हरेराम हटुवाल (निर्मल) र सञ्जोग उप्रेती र उपाध्यक्षमा लोक लामा मोक्तान, रविन लामा, सोवित वाईबा र दिनेश चौलागाई,कोषाध्यक्ष सन्देश पण्डित,महासचिव सुरज बर्तौला र कानुनी सल्लाहकार सन्दिप पाठक सहितका पदाधिकारीहरुले पदभार ग्रहण गरेका छन् ।

नवनिर्वाचित अध्यक्ष पाठकले पदभारपछि आफ्नो कार्यकालमा गरिब तथा विपन्न विद्यार्थीहरूको स्वास्थ्य र शिक्षालाई प्राथमिकता दिने बताए । उनले आर्थिक रूपमा विपन्न परिवारका बालबालिकाहरू स्वास्थ्य सेवा र गुणस्तरीय शिक्षाबाट वञ्चित हुन नदिन पहल गर्ने जानकारी दिए । ‘हाम्रो समाजमा गरिबी र असमानता छन् । सबैका लागि गुणस्तरीय शिक्षा र स्वास्थ्य सुनिश्चित गर्नु मेरो प्राथमिकता हुनेछ’ उनले भने । यसैगरी मनहरी गाउँपालिका अध्यक्ष रन्जन कालाखेतीले जेसीजले युवाहरूका लागि रोजगारीका अवसर सिर्जना गर्ने तथा क्षमता विकासका कार्यक्रम सञ्चालन गरी सशक्त बनाउन आग्रह गरे । यसकाे लागि आफ्नाे र गाउँपालिकाकाे साथ र सहयोग सधै रहने प्रतिबद्धता समेत उनले बताए ।