मकवानपुर । बागमती प्रदेशमा सञ्चालनमा रहेको सुरक्षित आप्रवासन प्रभावकारी कार्यान्वयन, समन्वय सुदृढीकरण तथा आगामी रणनीति निर्धारणका लागि प्रदेश कार्यक्रम समन्वय समितिको बैठ भएको छ।
श्रम, रोजगार तथा यातायात मन्त्रालय, बागमती प्रदेशको आयोजनामा , श्रम, रोजगार तथा यातायात मन्त्री जयराम थापाको अध्यक्षतामा सम्पन्न बैठकले कार्यक्रमको प्रगति समीक्षा गर्दै विभिन्न रणनीतिक निर्णयहरू गरेको छ।
बैठकमा चालु आर्थिक वर्ष २०८२।०८३ मा सञ्चालित गतिविधि तथा प्राप्त उपलब्धिहरूको विस्तृत समीक्षा गरिएको थियो।
बैठकमा विगतका निर्णयहरूको कार्यान्वयन अवस्थाको मूल्याङ्कन गर्दै सुधारका लागि आवश्यक निर्देशन दिइएको मन्त्रालयले जनाएको छ।
साथै, कार्यक्रम समन्वय तथा कार्यान्वयन एकाइबाट भएका निर्णयहरूलाई औपचारिक रूपमा अनुमोदन गरिएको छ।
कार्यक्रमको दिगोपना सुनिश्चित गर्न स्थानीय तहमा प्रदान गरिँदै आएको प्राविधिक सहयोगलाई क्रमशः न्यूनीकरण गर्दै लैजाने रणनीति समेत बैठकले तय गरेको छ। यसका साथै प्रदेश सुशासन केन्द्रसँग सहकार्य गरी क्षमता विकासका कार्यक्रमहरू सञ्चालन गर्ने निर्णय पनि गरिएको छ।
बैठकलाई सम्बोधन गर्दै श्रम, रोजगार तथा यातायात मन्त्रीले सुरक्षित आप्रवासन कार्यक्रमलाई थप प्रभावकारी, परिणाममुखी र दिगो बनाउनु अहिलेको आवश्यकता रहेको बताए। उनले वैदेशिक रोजगारीमा जाने श्रमिकहरूको अधिकार, सुरक्षा र सम्मान सुनिश्चित गर्न प्रदेश सरकार प्रतिबद्ध रहेको उल्लेख गरे।
“सुरक्षित आप्रवासन कार्यक्रमले श्रमिकलाई सही सूचना, सीप र मनोसामाजिक सहयोग उपलब्ध गराउँदै आएको छ। यसलाई अझ सुदृढ बनाउँदै स्थानीय तहसम्म संस्थागत रूपमा स्थापित गर्न आवश्यक छ,” मन्त्री थापाले भने।
उनले कार्यक्रम कार्यान्वयनमा सबै तहका सरकारबीच समन्वय अपरिहार्य रहेको उल्लेख गर्दै आगामी दिनमा सहकार्यलाई अझ मजबुत बनाइने बताए।
बैठकमा स्वास्थ्य निर्देशनालय र स्वास्थ्य तालिम केन्द्रले मनोसामाजिक सेवा प्रवाह सम्बन्धी प्रगति विवरण प्रस्तुत गरेका थिए। उक्त प्रस्तुतीकरणपछि सहभागीहरूबीच विस्तृत छलफल भएको थियो।
बैठकले सुरक्षित आप्रवासन कार्यक्रमलाई संस्थागत रूपमा मजबुत बनाउन आवश्यक कार्यविधि तर्जुमा गर्ने तथा आगामी आर्थिक वर्षका लागि बजेट विनियोजन सम्बन्धमा सिफारिस गर्ने निर्णय समेत गरेको छ।
बैठकमा बागमती प्रदेशका स्वास्थ्य मन्त्री किरण थापा, श्रम, रोजगार तथा यातायात मन्त्रालयका सचिव, स्वीस विकास सहयोगका प्रतिनिधि, प्रदेशका विभिन्न मन्त्रालयका प्रतिनिधि, स्थानीय तहका प्रमुख, जिल्ला प्रशासन कार्यालय मकवानपुरका प्रतिनिधि लगायत सरोकारवाला निकायहरूको सहभागिता रहेको थियो।
मन्त्रालयका अनुसार बैठकबाट कार्यक्रमको प्रभावकारी कार्यान्वयनका लागि स्पष्ट मार्गचित्र तय भएको र आगामी दिनमा समन्वयलाई थप सुदृढ बनाउँदै लैजाने विश्वास लिइएको छ।
मकवानपुर । बागमती प्रदेशको राजधानी हेटौंडाको केन्द्रमा रहेको हुप्र लोकतान्त्रिक चौर अझ आकर्षक र सुविधा सम्पन्न बन्ने भएको छ ।
मकवानपुरको हेटौंडा उपमहानगरपालिका वडा नं. ४ अन्तरगत रहेकाे लाेकतान्त्रिक चाैर लाई सुविधा सम्पन्न र आकर्षक चाैरकाे रूपमा विकास गरिने भएकाे छ ।
सबेरै हिड्न आउने, व्यायाम गर्न आउने, फुर्सदमा बालबालिकाको खेल्ने स्थान, युवाको खेलकुदको अभ्यासको उत्साह र अपरान्ह टहलिन आउने जेष्ठ नागरिकको शान्त उपस्थितिले पहिचान बनाउदै गएको चौरलाई नयाँ स्वरुपमा विकास गर्न लागिएको हो ।
दैनिक ५ हजार भन्दा बढीले उपस्थिति जनाउने हुप्र लोकतान्त्रिक चौरलाई करिव ३ कराेडकाे बजेट व्यवस्थापन गरि बागमती प्रदेशकै खुल्ला नमुना चाैरकाे रूपमा विकास गर्न लागिएको हो । हेटौंडा नगरलाई महिला मैत्री सहर निर्माण परियाेजना अन्तरगत चाैरकाे मास्टर प्लान बनाउने कार्य अन्तिम चरणमा पुगेकाे र मास्टर प्लान बनेसंगै निर्माण कार्यकाे लागि बाेलपत्र आव्हान गरिने भएको हो । यसको लागि महिला मैत्री शहर निर्माण परियाेजना र अन्य श्राेतबाट बजेटकाे व्यवस्थापन गरिने भएको छ ।
हेटौंडा उपमहानगरपालिका ४ नं. वडाध्यक्ष नवीन सिग्देलले चाैरलाई फुटबल, भलिवल र क्रिकेट खेल मैदानलाई थप व्यवस्थित बनाईने, खुल्ला जीम मर्मत र थप गर्ने, बालबालिका खेल्ने, जेष्ठ नागरिककाे लागि विशेष स्थलकाे व्यवस्था गर्ने, विभिन्न स्थान बस्ने र आराम गर्ने स्थान बनाईने, गेट र मञ्च थप सुविधाजनक र आकर्षक बनाईने बताए । यसअघि सार्वजनिक शाैचालय, हिँड्ने ट्रय्याक, भलिवल काेर्ट निर्माण गरिएकाे र क्रिकेट केज बनाउने कार्य भइरहेको छ ।
‘चौरलाई केवल खाली मैदानका रूपमा मात्र नभई बहुउद्देश्यीय सार्वजनिक स्थलका रूपमा रूपान्तरण गरिँदैछ’ उनले भने ‘चाैरलाई महिला, बालबालिका, अपाङ्ग र खेलमैत्री बनाउन विशेष ध्यान दिईएकाे छ ।’ वडा कार्यालयकाे व्यवस्थापनमा मर्मत र नियमित सरसफाई गरिदै आएकाे चाैरमा हालै ४ वटा हाईमाक्स जडान गरि रातमा पनि चाैर क्षेत्र उज्ज्यालाे बनाउने व्यवस्था गरिएकाे छ ।
मकवानपुर । मकवानपुर प्रहरीले लागूपदार्थ सेवन गरी सवारी चलाउने १२ जनालाई पक्राउ गरेको छ । प्रहरीद्वारा सञ्चालित ‘अप्रेशन ड्रप’ अन्तर्गत सोमबार उनीहरुलाई पक्राउ गरिएको जिल्ला प्रहरी कार्यालय मकवानपुरले जानकारी दिएको छ ।
जिल्ला ट्राफिक प्रहरी कार्यालय मकवानपुर र जिल्ला प्रहरी कार्यालय मकवानपुरको संयुक्त टोलीले ६५ वटा सवारी जाँच गरिएकोमा १२ जना चालकले लागूऔषध सेवन गरी सवारी चलाएको पाइएको हाे । मनहरी गाउँपालिका अन्तर्गतकाे सडकखण्डमा गरेको आकस्मिक सुरक्षाजाँचको क्रममा उनीहरु पक्राउ परेका हुन् । ‘अपरेशन ड्रप’ अन्तर्गत यसअघि मकवानपुर प्रहरीले १८ जनालाई पक्राउ गरेको थियो ।
लागूऔषध सेवन गरी सवारी चलाउँदा दुर्घटनाको जोखिम अत्यधिक बढाउने भएकाले चेकजाँच गरिएको प्रहरीले जनाएकाे छ । सडक सुरक्षालाई मध्यनजर गर्दै आगामी दिनमा चेकजाँचलाई निरन्तरता दिइने भएकाे छ । मकवानपुर प्रहरीले चालकलाई लागूऔषध सेवन नगरी जिम्मेवार ढंगले सवारी चलाउन आग्रह समेत गरेकाे।
मकवानपुर । मकवानपुरको ३ छुट्टाछुट्टै स्थानमा भएकाे सवारी दुर्घटनामा ४ जना घाइते भएका छन् । मकवानपुरकाे हेटौंडा उपमहानगरपालिकामा भएकाे दुर्घटनामा १ जना, थाहा नगरपालिकामा भएकाे दुर्घटनामा १ जना र मनहरी गाउँपालिकामा भएका दुर्घटनामा २ जना घाइते भएका हुन् ।
बागमती प्रदेश प्रहरी कार्यालय हेटौंडाका अनुसार हेटौंडा–९, सिमेन्टरोडमा दुई ट्रक ठोक्किँदा १ जना घाइते भएका छन् । शनिबार वनस्पतिबाट गुम्बाचोकतर्फ आउँदै गरेको ना ६ ख ४८०८ नम्बरको ट्रकले सडक छेउमा पार्किङ गरी राखिएको ना ६ ख १३०२ नम्बरको ट्रकलाई ठक्कर दिँदा दुर्घटना भएको प्रहरीले जनाएको छ । उक्त दुर्घटनामा ४८०८ नम्बरको सह–चालक विजन थोकर ट्रकमा च्यापिएर घाइते भएका हुन् ।
ना ६ ख १३०२ नं.को ट्रक चालक सिमेन्टरोडका ३८ वर्षीय रामसुन्दर अधिकारी र ना ६ ख ४८०८ नम्बरको ट्रक चालक हेटौंडा–१२ का २७ वर्षीय बिष्णु नगरकोटीलाई प्रहरीले नियन्त्रणमा लिएको छ । दुर्घटना हुँदा ४८०८ नम्बरको ट्रक थोकरले चलाइरहेको खुलेको छ । उनकाे हेटौंडा अस्पतालमा उपचार भइरहेकाे तथा प्रहरीले घटनाबारे थप अनुसन्धान गरिरहेको जनाएको छ ।
यसैगरी त्रिभुवन राजपथ अन्तर्गत थाहा नगरपालिका–१२, टिष्टुङमा शनिबार काठमाडौंबाट हेटौंडातर्फ आउँदै गरेको बा प्र ०३–००१ ख १७५० नम्बरको खाली १२ चक्के ट्रक अगाडिको दाहिने साइडको पट्टा भाँचिएर अनियन्त्रित भई सडकमै पल्टिएदा १ जना घाइते भएका छन् । उक्त दुर्घटनामा ट्रक चालक धादिङ बेनिघाटरोराङ गाउँपालिका–२, मौवाखोलाका २७ वर्षीय ध्रुव घले घाइते भएका छन् । उनलाई उपचारका लागि पालुङ अस्पताल लगिएको छ ।
यस्तै पूर्व–पश्चिम राजमार्गअन्तर्गत मकवानपुरको मनहरी गाउँपालिका–९, खरंगा क्षेत्रमा स्कार्पियो गाडी दुर्घटना हुँदा २ जना घाइते भएका छन् । शुक्रबार चितवनबाट हेटौंडातर्फ आउँदै गरेको बा १५ च ६०३५ नम्बरको स्कार्पियो अत्यधिक गतिका कारण अनियन्त्रित भई सडकबाट २० मिटर तल खोल्सामा खसेर दुर्घटना भएको प्रहरीले जनाएको छ । दुर्घटनामा चालक हेटौंडा–१९, बस्तिपुरका ४० वर्षीया झलक बर्तौला र सोही गाडीमा सवार ३० वर्षीय बद्री ढकाल घाइते भएका छन् । घाइते दुबै जनाको हेटौंडास्थित सन्चो अस्पतालमा उपचार भइरहेको प्रदेश प्रहरीले जनाएको छ ।
नक्कली परीक्षार्थी पक्राउ
Tags: No Comments
मकवानपुर । माध्यमिक शिक्षा परीक्षा (एसईई) मा नक्कली परीक्षार्थी बनेर परीक्षा दिन आएका १ जना मकवानपुरमा पक्राउ परेका छन् ।
मकवानपुर हेटौंडा उपमहानगरपालिका-१० भुटनदेवी रोडस्थित सोलिड्यारेटी माध्यमिक विद्यालय परीक्षा केन्द्रमा परीक्षा दिइरहेको अवस्थामा हेटौंडा-४ बस्दै आएका १८ वर्षीय बिराज बिकलाई नियन्त्रणमा लिएको प्रहरीले जनाएको छ ।
बिक अर्काको नाममा जारी गरिएको प्रवेश पत्रमा आफ्नो फोटो टाँसी परीक्षा दिन आएका थिए । उनी सिन्धुली मरिन गाउँपालिका-४ घर भई हाल हेटौंडा स्कुल अफ म्यानेजमेन्ट कलेजमा कक्षा ११ मा अध्ययनरत रहेको बताइएको छ ।
बिकले हेटौंडा -१२ पदमपोखरी घर भएका किशोर श्रेष्ठका १९ वर्षीय छोरा अंकिश श्रेष्ठको नाममा जारी प्रवेश पत्र प्रयोग गरी नक्कली परीक्षार्थीको रूपमा परीक्षा दिन आएको प्रहरीले उल्लेख गरेको छ ।
घटनामा संलग्न दुवै जनालाई नियन्त्रणमा लिएर जिल्ला प्रहरी कार्यालय मकवानपुरमा राखी थप अनुसन्धान भइरहेको बताइएको छ।