मकवानपुर । विश्व वातावरण दिवस २०८३ को अवसरमा “भान्सा नै औषधालय” सम्बन्धी सचेतनामुलक कार्यक्रम आयोजना गरिएकाे छ । हेटौंडा उपमहानगरपालिका वडा नम्बर ४ को आयोजना तथा टोल विकास संस्था नगर समन्वय समिति, हेटौंडा उपमहानगरपालिकाको समन्वयमा कार्यक्रम आयोजना गरिएकाे हाे ।
कार्यक्रममा “भान्सा नै औषधालय” अभियानका प्रवर्द्धक राष्ट्रिय प्रशिक्षक रोमलाल गिरीले दैनिक जीवनमा प्रयोग हुने खाद्य सामग्री, जडीबुटी तथा प्राकृतिक खानपानको महत्वबारे प्रशिक्षण तथा सहजीकरण गर्नुभएको थियो। उहाँले आधुनिक जीवनशैलीका कारण बढ्दै गइरहेका नसर्ने रोगहरूलाई नियन्त्रण गर्न स्वस्थ खानपान, स्थानीय उत्पादनको प्रयोग र प्राकृतिक जीवनशैली आवश्यक रहेको बताउनुभयो। “भान्सा नै पहिलो औषधालय” भएकाेले भान्सामा प्रयोग हुने बेसार, अदुवा, लसुन, तुलसी, मेथी लगायतका सामग्रीहरू औषधीय गुणले भरिपूर्ण रहेको उहाँले बताउनु भयो ।
४ नम्बर वडा अध्यक्ष नवीन सिग्देलले वातावरण संरक्षण र नागरिक स्वास्थ्य एकअर्कासँग प्रत्यक्ष रूपमा जोडिएकाले स्वस्थ खानपान, सरसफाइ र हरियाली प्रवर्द्धनलाई स्थानीय तहले प्राथमिकताका साथ अगाडि बढाइरहेको जानकारी दिनुभयो। स्वस्थ नागरिक निर्माणका लागि जनचेतनामूलक कार्यक्रम अत्यन्त प्रभावकारी हुने उहाँले बताउनुभयो। समुदायमा सकारात्मक व्यवहार परिवर्तन ल्याउन यस्ता कार्यक्रमले सहयोग पुग्ने विश्वास व्यक्त गर्दै उहाँले सहभागी सबैलाई सिकेका कुराहरू व्यवहारमा लागू गर्न आग्रह गर्नुभयो।
टोल विकास संस्था नगर समन्वय समितिका अध्यक्ष ध्रुव प्रसाद अधिकारीले विश्व वातावरण दिवसलाई केवल औपचारिक कार्यक्रममा सीमित नराखी व्यवहारिक परिवर्तनसँग जोड्न आवश्यक रहेको बताउनुभयो। उहाँले वातावरण संरक्षण, सरसफाइ, हरियाली प्रवर्द्धन र स्वस्थ जीवनशैली निर्माणमा टोल विकास संस्थाहरूको महत्वपूर्ण भूमिका रहेको बताउनु भयो । “स्वस्थ भान्सा, स्वस्थ परिवार र स्वस्थ समाज निर्माणको आधार हो,” भन्दै उहाँले समुदायस्तरमा यस्ता सचेतनामूलक कार्यक्रमलाई निरन्तरता दिइने जानकारी दिनुभयो।
कार्यक्रममा हेटौँडा उपमहानगरपालिका वडा नं. ४ सहित नगरभित्रका विभिन्न वडाका टोल विकास संस्थाका पदाधिकारी, सामाजिक अभियन्ता, गरी ४०० जनाभन्दा बढीको सहभागिता रहेको थियो। सहभागीहरूले कार्यक्रमबाट प्राप्त ज्ञान तथा अनुभवलाई आफ्नो दैनिक जीवनमा प्रयोग गर्ने प्रतिबद्धता व्यक्त गरेका थिए। आयोजकका अनुसार विश्व वातावरण दिवस २०८३ को अवसरमा वातावरण संरक्षण, सरसफाइ तथा स्वस्थ जीवनशैली प्रवर्द्धनका विविध कार्यक्रमहरू निरन्तर सञ्चालन भइरहेका छन्।
मकवानपुर । बहुराष्ट्रिय कम्पनी युनिलिभर नेपाल लि. को संस्थागत सामाजिक उत्तरदायित्व (CSR) अन्तर्गतको आर्थिक सहयोग तथा राडो (RADO) नेपालसँगको सहकार्यमा हेटौंडा उपमहानगरपालिका ३ मा ‘सरोकारवालाको सहभागितामा वातावरणीय तथा सामाजिक उत्थानशीलता सुदृढीकरण’ परियोजनाको औपचारिक सुरुवात गरिएको छ।
गत जेठ ४ गते (मे १८, २०२६) स्थानीय सरोकारवालाहरूको उपस्थितिमा यो एकीकृत कार्यक्रमको शुभारम्भ गरिएको हो। कृषि, जलस्रोत संरक्षण, र जलवायु अनुकूलनलाई मुख्य प्राथमिकतामा राखेर सुरु गरिएको एकवर्षे परियोजनाले हेटौंडा–३ का सरस्वती कुना, सिमलथली, राजदेवी, राईटोल र मिलनटोल लगायतका क्षेत्रका करिब १ हजार घरधुरीलाई प्रत्यक्ष लाभान्वित तुल्याउने लक्ष्य राखेको छ।
कार्यक्रमबारे विस्तृत विवरण यो चित्रमा हेर्न सक्नुहुनेछ :

राडो नेपालका अध्यक्ष डा. कृष्ण धितालका अनुसार करिब १ करोड रुपैयाँको लागत अनुमान गरिएको यस दूरगामी योजना अन्तर्गत कृषि, पर्यावरण, खानेपानी बहुआयामी क्षेत्रहरूमा निम्न मुख्य कार्यहरू हुनेछः
- जल संकलन तथा पुनर्भरण संरचना: सिमलथली, मिलनटोल, राईटोल, राजदेवी र सरस्वती कुनामा खानेपानी प्रणालीको मर्मत–सम्भार तथा फिल्टरेशन/पर्कोलेसन संरचना निर्माण गरी करिब ७५० घरधुरीलाई स्वच्छ खानेपानीको पहुँच पुर्याइनेछ। साथै, माटोको चिस्यान संरक्षणमा जोड दिँदै ६ हेक्टर पुनर्भरण क्षेत्र समेट्ने गरी रिचार्ज पिट तथा लघु संरचनाहरू निर्माण गरिनेछ।
- माटो तथा चिसोपना संरक्षण: बसामाडी सामुदायिक वन र अन्य क्षेत्रमा कन्टुर ट्रेन्च तथा पानी संरक्षणका स–साना योजनाहरू अघि बढाइनेछन्।
- बहुउद्देश्यीय वृक्षारोपण तथा घाँस व्यवस्थापन: पर्यावरण संरक्षणका लागि बसामाडी सामुदायिक वनमा मात्र नभई किसानहरूको निजी जग्गामा समेत स्थानीय जलवायु र आवश्यकता अनुकूल विभिन्न प्रजातिका घाँस तथा फलफूल उपयोगी बिरुवाहरू रोप्ने कार्यको थालनी गरिनेछ । यस अन्तर्गत कृषकहरूको माग र भू-बनोट अनुसारका विभिन्न प्रजातिहरू समेटिएका छन्।
- फलफूल प्रवर्द्धन तथा बाँदर नियन्त्रक बाली प्रणाली: किसानहरूको आयआर्जन बढाउन विभिन्न प्रजातिका फलफूलका बिरुवाहरू वितरण गरिनुका साथै पछिल्लो समय मुख्य समस्याको रूपमा रहेको वन्यजन्तु (विशेष गरी बाँदर) को ओहरदोहर र क्षतिलाई न्यूनीकरण गर्ने खालका विशेष वनस्पति, प्रतिरोधात्मक बिरुवा तथा वैकल्पिक बालीहरूको खेतीलाई प्रोत्साहन गरिनेछ।
- जलवायु उत्थानशील कृषि तथा प्राकृतिक खेती: सिमलथली, राईटोल, मिलनटोल र बौराटार क्षेत्रका १०० भन्दा बढी किसानलाई समेटेर १० हेक्टर खेतीयोग्य जमिनमा सुधार गरिनेछ। यसका लागि ३ वटा फिल्ड स्कुल, करेसाबारी प्रवर्द्धन, र माटोको स्वास्थ्य सुधारका कार्यक्रमहरू तय गरिएका छन्।
सरकारी र निजी क्षेत्रको सहकार्य अपरिहार्य
कार्यक्रमको उद्घाटन समारोहमा बोल्दै जिल्ला समन्वय समिति मकवानपुरका प्रमुख ललित घलानले वास्तविक तल्लो तहका किसानहरूको आवश्यकता पहिचान गरी कार्यक्रम ल्याएकोमा खुसी व्यक्त गर्नुभयो। “सरकारले प्रत्याभूति गर्ने भनेको समाजको उद्गम तहमा पुगेर हो, जहाँ जे आवश्यकता छ, त्यहाँ त्यही गर्नुपर्छ,” प्रमुख घलानले भन्नुभयो, “स्थानीय बासिन्दाको वास्तविक हितका लागि निजी र गैरसरकारी क्षेत्रले स्थानीय सरकारका प्राथमिकता क्षेत्रमा सहकार्य गर्नुपर्छ।”
त्यस्तै, हेटौंडा उपमहानगरपालिका वडा नम्बर ११ की अध्यक्ष जुना दाहालले कृषि क्षेत्रलाई प्राथमिकता दिएर ल्याइएको यस एकीकृत कार्यक्रमले स्थानीय किसानहरूको आर्थिक जीवनस्तर उकास्न मद्दत पुग्ने विश्वास व्यक्त गर्नुभयो। उहाँले स्थानीय सरकारका तर्फबाट यस प्रकारका दिगो विकासका कार्यक्रमहरूमा सधैँ हातेमालो र पूर्ण सहयोग रहने प्रष्ट पार्नुभयो।
युनिलिभर नेपालका प्रबन्ध निर्देशक अम्लान मुखर्जीले यस पहलप्रति प्रशंसा व्यक्त गर्दै भन्नुभयो, “ हामी हाम्रो व्यावसायिक वृद्धि र समुदायको सबलता सँगसँगै अघि बढ्नुपर्छ भन्ने विश्वास राख्छौँ। यो पहल स्थानीय सरोकारवाला र समुदायसँग नजिकबाट सहकार्य गर्दै दीर्घकालीन सकारात्मक प्रभाव सिर्जना गर्ने हाम्रो प्रतिबद्धताको प्रतिबिम्ब हो। नेपालका लागि हित हुने कुरा युनिलिभरका लागि पनि हित हुनु हो, र हामी देशको वातावरणीय तथा सामाजिक प्रगतिमा अर्थपूर्ण योगदान दिन निरन्तर प्रतिबद्ध छौँ।”
विकास सहकार्यका लागि औद्योगिक क्षेत्र तत्पर:: कार्यक्रममा युनिलिभर नेपाल लि. का उद्योग प्रबन्धक सञ्जय भट्टचार्यले “उद्योग र कर्पोरेट क्षेत्र समाजभन्दा भिन्न नरहेको उल्लेख गर्दै जनसमुदायको हित र समृद्धि नै युनिलिभरको हित भएको बताउनुभयो। वास्तविक आवश्यकता पहिचान गरेर सही ठाउँमा बजेट परिचालन गर्न र सो बजेटलाई यथार्थ आवश्यकता सम्बोधन गर्ने तहसम्म पुर्याउन जोड दिनुभयो”
सोही अवसरमा युनिलिभर नेपालका कानुनी प्रमुख तथा कम्पनी सचिव गोविन्द शाहीले भन्नुभयो, “दिगो विकास तब सबैभन्दा प्रभावकारी हुन्छ जब यो जवाफदेहिता, अनुपालना, र साझा जिम्मेवारीमा आधारित हुन्छ। । यस सहकार्यले सामाजिक उत्तरदायित्व योगदानमा मात्र सीमित नभई दीर्घकालीन सामुदायिक स्वामित्व र वातावरणीय संरक्षणलाई मजबुत गर्ने प्रणाली निर्माण गर्नुपर्छ भन्ने हाम्रो विश्वासलाई थप सवल बनाएको छ।”
समारोहमा युनिलिभर नेपालका हारुन रशीद, आयुष शर्मा, पवन कुमार, रवीन्द्र यादव, बिनोद बजगाईं, प्रमोद मेहर, प्रेम सेठी, अभिषेक बारिया लगायतको सक्रिय सहभागिता रहेको थियो।
बहु–सरोकारवाला साझेदारी र पारदर्शी कार्यान्वयनमा सरोकारवालाको जोड: समारोहमा बोल्दै हेटौंडा खानेपानी व्यवस्थापन बोर्डका अध्यक्ष प्रताप विष्टले उद्योगले छरिएका माग र स्वार्थहरू सम्बोधन गर्नुभन्दा यस प्रकारको संस्थागत साझेदारी अघि बढाउनु महत्वपूर्ण हुने बताउनुभयो। विष्टले भन्नुभयो, “यस प्रकारको संस्थागत साझेदारी नै आगामी यात्राका लागि बहु-सरोकारवाला (Multi-stakeholders) को शक्ति र सहकार्यको एउटा बलियो सुरुवात हो।”
त्यस्तै, हेटौँडा उपमहानगरपालिका सामाजिक विकास महाशाखा प्रमुख डा. भिम तिमल्सिनाले यसअघि ‘एम-प्याक’ (M-PAC) मार्फत छलफल गरिएका योजनाबद्ध पहलहरू सकारात्मक दिशामा अघि बढेकोमा जोड दिनुभयो। डा. तिमल्सिनाले भन्नुभयो, “हामीले ‘M-PAC’ को बैठक र विभिन्न चरणमा छलफल गरेका नवप्रवर्तनकारी सोचहरू कार्यान्वयनको चरणमा पुगेका छन्। पारदर्शी परियोजना कार्यान्वयनमार्फत उत्कृष्ट नतिजा हासिल गर्न उपमहानगरपालिकाको सामाजिक विकास महाशाखा सदैव सहयोगी भूमिकामा रहनेछ।”
प्राविधिक सहयोग र खानेपानी व्यवस्थापनमा जोड: कार्यक्रमको समापन सत्रमा स्थानीय सेवाग्राहीहरू इन्दिरा लामिछाने र सुजन न्यौपानेले जलवायु परिवर्तनका कारण कृषि क्षेत्रमा अनपेक्षित चुनौतीहरू थपिएको तर्फ ध्यानाकर्षण गराउनुभयो। उहाँहरूले परियोजनालाई थप प्रभावकारी बनाउन गाउँमै कृषि जेटिए (JTA) को स्थायी व्यवस्था गरिदिन र खानेपानी प्रणालीको दिगो व्यवस्थापनमा समेत स्थानीय तहमा थप सहायता उपलब्ध गराउन माग गर्नुभयो।
राडो नेपालले यो एकवर्षे प्रारम्भिक योजनाको प्रभावकारिता, सरोकारवालाहरूको प्रतिक्रिया र पारदर्शी परिणामका आधारमा आगामी दिनमा यस कार्यक्रमको समयावधि थप गरेर अझ बृहत् रूपमा लैजान सकिने सकारात्मक संकेत दिएको छ। कार्यक्रमको अवसरमा उपस्थित स्थानीय किसानहरूलाई तरकारीका विभिन्न प्रजातिका उपयोगी बोटबिरुवाहरू समेत वितरण गरि परियोजनाको शुभारम्भ गरिएको थियो।
मकवानपुर । मकवानपुरकाे हेटौंडामा एकै मञ्चमा ४ जना स्रष्टा सम्मानित हुनु भएकाे छ । मकवानपुरको साहित्यिक संस्था मातृभूमि साहित्य समाजले शनिबार हेटौंडामा ‘मातृभूमि साहित्य उत्सव–२०८३’ कार्यक्रम आयोजना गरी ४ जनालाई सम्मान गरिएको हाे ।
सम्मानित हुनेमा प्रदिप रोदन (गोरखा), राजकुमार लामिछाने (मकवानपुर), बासुदेव पाण्डेय ‘प्रभाकर’ (सुर्खेत) र स्वस्तिका बानियाँ (मकवानपुर) हुनुहुन्छ । उक्त कार्यक्रममा गजलकार रोदनलाई १५ हजार रुपैंया राशीकाे ‘राजकुमार स्मृति मातृभूमि सम्मान–२०८२’ बाट सम्मानित गरिएकाे हाे । यस्तै हास्यव्यङ्गयकार लामिछानेलाई १५ हजार रुपैंया राशीकाे ‘क्षेत्रबहादुर स्मृति मातृभूमि सम्मान–२०८२’ बाट सम्मानित गरिएकाे समाजका सचिव किशन पौडेलले बताउनु भयो ।
यस्तै छन्द कवि ‘प्रभाकर’ लाई १५ हजार राशीकाे ‘होमनाथ बलदेवी छन्द साहित्य सम्मान–२०८२’ बाट सम्मानित गरिएकाे उनले जानकारी दिनुभयो । उनका अनुसार बानियाँलाई ७ हजार ५ सय राशीकाे ‘मंगलादेवी स्मृति मातृभूमि सम्मान–२०८२’ बाट सम्मानित गरिएकाे हाे ।
‘मातृभूमि साहित्य उत्सव–२०८३’ मा प्राज्ञिक विमर्श अन्तर्गत दुई वटा कार्यपत्रहरू प्रस्तुत गरिएका थिए । ‘साहित्यमा कृत्रिम बौद्धिकता’सम्बन्धी डा. घनश्याम घिमिरेले प्रस्तुत गर्नु भएकाे कार्यपत्र माथि साहित्यकार डीबी बर्तौला टिप्पणी गर्नु भयो । यसैगरी ‘साहित्यमा अध्यात्म दर्शन’ विषयमा डा. ज्ञानु अधिकारीले प्रस्तुत गर्नु भएकाे कार्यपत्रमा साहित्यकार अनिता कोइरालाले टिप्पणी गर्नु भयो ।
यस्तै ‘नारी स्रष्टाको साहित्य सिर्जनामा पुरुष अभिव्यक्ति’ शिर्षकमा भएकाे अन्तर संवादमा समालोचक चेतना शर्मा (काठमाडौं) समालोचक अनिता कोइराला (काठमाडौं) उपन्यासकार कल्पना खरेल (नेपालगंज) ले बहस गर्नु भएकाे थियाे । यस सत्रकाे सहजिकरण साहित्यकार डा. निमेष निखिल (हेटौंडा) ले गर्नु भएकाे थियाे ।
समाजका अध्यक्ष कृष्ण प्रसाद दाहालको सभाध्यक्ष, साहित्यकार धनराज गिरीकाे प्रमुख आथित्यतामा भएकाे कार्यक्रमको सहजीकरण समाजका उपाध्यक्ष हेमन्त ढुङ्गेलले गर्नुभएको थियो ।
नेपाली भाषा, साहित्य तथा कलाको संरक्षण, संवर्द्धन र प्रवर्द्धन गर्ने उद्देश्यले वि.सं.२०५६ सालमा स्थापना भएको समाजले स्थापना कालदेखि नै विविध साहित्यिक तथा सांस्कृतिक गतिविधिहरूलाई निरन्तरता दिँदै आइरहेको बताइएकाे छ। साहित्य समाजले स्थापित तथा नवोदित प्रतिभाहरूलाई साहित्य, कला, सङ्गीत एवं सामाजिक सेवाका विभिन्न क्षेत्रमा योगदान पुर्याएवापत पुरस्कार तथा सम्मान गर्दै आएको छ।
मकवानपुर । हेटौंडा खानेपानी व्यवस्थापन बोर्डले दैनिक ३ करोड ७५ लाख लिटर पानी वितरण गर्दै आएको छ । बोर्डले शुक्रबार १३ औ वार्षिक उत्सव मनाउँदै उक्त तथ्याङ्क सार्वजनिक गरेको हो ।
बोर्डबाट हाल हेटौडाको नगर क्षेत्र भित्रका १९ वटा वडाहरु मध्ये बडा नं १२ र १३ बाहेकका १७ वटा वडामा बसोबास गर्ने करिब १ लाख ७० हजार नगरवासिलाई सरदर दैनिक ८ देखि ९ घण्टा २९ हजार ७०९ वटा धाराहरु मार्फत दैनिक ३ करोड ७५ लाख लिटर खानेपानी उत्पादन गरी वितरण गर्दै आइरहेको छ ।
बोर्डले खानेपानी सेवा प्रवाहसँगै संस्थागत सुशासन, आर्थिक पारदर्शिता र प्रविधिमैत्री व्यवस्थापनलाई समेत जोड दिएको बार्डका अध्यक्ष प्रताप विष्टले बताए । खानेपानी सेवाको प्रभावकारिता अभिवृद्धिका लागि डिजिटल बिलिङ प्रणाली, मिटर व्यवस्थापन गर्दै आइरहेकोमा उपभोक्ता गुनासो सुनुवाइ प्रणालीलाई क्रमशः आधुनिकिकरण गर्ने प्रकृयालाई अगाडी बढाइएको अध्यक्ष विष्टले बताए ।
साथै विपद् बाढीपहिरो तथा खानेपानी अभावका समयमा वैकल्पिक वितरण प्रणालीमार्फत नागरिकलाई सेवा प्रदान गर्दै सामाजिक उत्तरदायित्वसमेत निर्वाह गर्दै आइरहेका विष्टले बताए । हाल बोर्डले पानीको स्रोत सतहगत मुहान १, डिप ट्यूवेल ४० बटा र समवेत १९ वटा सञ्चालनमा ल्याएको छ । मुख्य बजार क्षेत्रमा २४ सै घण्टा वितरण गर्दै आइरहेको छ ।
बोर्डमा हाल पानी भण्डारण क्षमता ८ हाजर ९५२ घनमिटर मुख्य तथा शाखा पाइप लाइन करिब ८०० किलो मिटर रहेको विष्टले बताए । बोर्डलाई प्रति युनिट पानी उत्पादन लागत १३ रुपैयाँ ७० पैसा रहेको र बोर्ड प्रति युनिट १९ रुपैया ६० पैसामा विक्री गर्ने गरेको छ ।
यस आर्थिक वर्षमा हेटौंडा १५ सानो सुकौलीमा १ लाख लिटर क्षमताको पानी टंकी, वडा नं १६ मा सार्वजनिक शौचालय निर्माण, शाखा कार्यालयको स्तरोन्नती लगायत अन्य विभिन्न स्थानमा रहेको भवन तथा पर्खाल निर्माण तथा मर्मत कार्य बोलपत्रको माध्यमबाट सम्पन्न गरिएको विष्टले बताए ।
बोर्डको कार्यालय परिसर भित्र संघीय खानेपानी तथा ढल व्यवस्थापन आयोजना संगको सहकार्यमा अत्याधुनिक पानी परिक्षण प्रयोगशाला संचालनमा ल्याईको छ । संघीय खानेपानी तथा ढल व्यवस्थापन आयोजना र यस बोर्डको सहलगानीमा हेटौडा १६ शक्तिमा खानेपानीको पूर्वाधार निर्माण अन्तर्गत पानी संकलन टंकी ६ वटा ९०० घनमिटर क्षमताको, समवेल निर्माण र करिब साँढे ३ किमि पाइप लाइन विस्तार कार्य बोलपत्रको माध्यमबाट सम्पन्न गरिएको उनले बताए ।
यसैगरी यसै आर्थिक वर्षमा बागमती प्रदेश सरकार खानेपानी तथा सरसफाइ डिभिजन नं १ र यस बोर्डको सहलगानिमा हेटौडा ११ थानाभऱ्याङ्ग सिमलटार क्षेत्रमा खानेपानीको पूर्वाधार निर्माण अन्तर्गत २ वटा समवेल र पाले घर तथा ४ लाख ५० हजार लिटर क्षमताको ओभर हेड पानी टंकी निर्माण कार्य वोलपत्रको माध्यमबाट सम्पन्न गरिएको छ भने हरिकुन्जपानी पोखरी जाने बाटोको स्तरीकरण गर्ने कार्य सम्पन्न गरिएको छ ।
आगामी दिनमा बोर्डले बोर्डको सेवा क्षेत्र भित्र विभिन्न स्थानहरुमा खानेपानीको पूर्वाधार निर्माण तथा मर्मत सम्भारको कार्य वोलपत्रको माध्यमबाट भई रहेको काम पुरा गर्ने, बोर्डको कार्यालयमा आवश्यक पर्ने विभिन्न साइजको एचडिपिई पाइप खरिदको लागि बोलपत्रको माध्यमबाट प्रकृया अगाडी बढाउने, सहलगानी खानेपानी आयोजना अन्तर्गत नेपाल सरकार संघीय खानेपानी तथा व्यवस्थापन आयोजना, हेटौडा उपमहानगरपालिका र हेटौडा खानेपानी व्यवस्थापन बोर्डको सहलगानी खानेपानी आयोजना वोलपत्रको माध्यमबाट संचालन भई रहेकोमा पुरा गर्ने लक्ष्य लिएको छ ।
खानेपानी व्यवस्थापनको क्षेत्रमा बोर्डले हेटौंडा उपमहानगरपालिका, बागमती प्रदेश सरकार र संघीय सरकार संगको सहकार्यमा पूर्वाधार विस्तारमा उल्लेखनीय उपलब्धि हासिल गरेको दावि गरेको छ । विभिन्न वडामा नयाँ पाइपलाइन विस्तार, पुराना संरचनाको स्तरोन्नति, ट्यांकी निर्माण तथा मुहान संरक्षण कार्यक्रम मार्फत दीर्घकालीन सेवा सुनिश्चित गर्ने प्रयास जारी रहेको बोर्डका निमिक्त कार्यकारी निर्देशक विष्णुप्रसाद सापकोटाले बताए । बोर्डले नगरको तिव्र शहरीकरणसँगै बढ्दो पानीको मागलाई सम्बोधन गर्न दीर्घकालीन योजना निर्माण गरी कार्यान्वयनमा ल्याइएको सापकोटाले बताए ।
हेटौडा खानेपानी व्यवस्थापन बोर्ड नेपालको स्थानीय तहमा समुदायमुखी खानेपानी व्यवस्थापनको सफल नमुनाका रूपमा स्थापित संस्थाको रुपमा रहेको छ। नेपाल खानेपानी संस्थानअन्तर्गत सञ्चालित हेटौडा शाखाको सम्पत्ति तथा दायित्व २०७० साल जेठ ८ गते औपचारिक रूपमा यस बोर्डमा हस्तान्तरण भएपछि नगर क्षेत्रको खानेपानी सेवा व्यवस्थापनको जिम्मेवारी बोर्डले सम्हाल्दै आएको छ। हस्तान्तरणसंगै स्थानीय आवश्यकता, दिगो व्यवस्थापन र सेवामुखी सोचलाई केन्द्रमा राखेर खानेपानी वितरण, मर्मत तथा विस्तार व्यवस्थापनका कार्यहरू प्रभावकारी रूपमा अघि बढाउदै आइरहेका नगरप्रमुख मिना कुमारी लामाले बताइन् ।
हेटौडा उपमहानगरपालिका क्षेत्रभित्र स्वच्छ र नियमित खानेपानी सेवा उपलब्ध गराउने उद्देश्यसहित बोर्डले पाइपलाइन विस्तार, धारा जडान, मुहान संरक्षण तथा वितरण प्रणाली सुधारका कार्यलाई प्राथमिकतामा राखेको छ। यस अवधिमा हजारौ उपभोक्तालाई नियमित सेवा प्रदान गर्दै नगरवासीको दैनिक जीवनसँग प्रत्यक्ष जोडिएले सेवाक्षेत्रमा शंवेदनशील भएकाे बाेर्डले जनाएको छ ।
बार्षिकोत्सवको अवसरमा बाेर्डले विभिन्न शाखाहरुमा कार्यरत कर्मचारीहरुलाई पोत्साहन स्वरुप नगरद सहित सम्मान गरेकाे कार्यलयका सूचना अधिकारी सञ्जयकुमार न्याैपानेले बताए ।
मकवानपुर । मकवानपुरको हेटौंडामा बृहत शैक्षिक महाेत्सव हुने भएको छ । हेटौंडा ४ नं. वडा कार्यालयकाे आयाेजनामा तथा शैक्षिक गुणस्तर सुधार समिति, हेटाैँडा-४ काे व्यवस्थापनमा हुने शैक्षिक महाेत्सवमा चित्रकला र नृत्य प्रतियोगिता समेत हुनेछ ।
यसअघि जेठ १४ हुने भनिएकाे कार्यक्रम जेठ १३ गते बुधबार हुने गरि तय गरिएकोले महोत्सवको तयारी भइरहेको शैक्षिक गुणस्तर सुधार समिति संयाेजक श्रीराम दाहालले जानकारी दिनुभयाे ।
विगत ३ वर्ष लगातार वडास्तरीय महोत्सव आयोजना गरिएकोमा यो वर्ष चाैधाे पटक हुन लागेकाे महाेत्सव नगरस्तरीय हुने भएको छ । महोत्सव, चित्रकला र नृत्य प्रतियोगिताको लागि नगरभित्रका विद्यालयलाई पत्रचार गरिसकेकाे दाहालले बताउनु भयो ।विद्यालयहरूले महाेत्सवमा सहभागी हुन विधागत तयारी गरिरहेकाे बताइएको छ ।
महाेत्सवमा विशेष कार्यक्रमकाे रूपमा राष्ट्रिय भाषा र सँस्कृति झल्कने नृत्य प्रतियाेगिता, विज्ञान विषयकाे प्रदर्शनी र चित्रकला प्रतियाेगीता हुने ४ नं. वडाध्यक्ष नवीन सिग्देलले बताउनु भयाे । सिग्देलले चित्रकला प्रतियाेगिताकाे विषय “२० वर्षपछिकाे हेटौंडा” रहेकाे बताउँदै आजकाे विद्यार्थीले २० वर्षपछिकाे हेटौंडा शहर कस्ताे बनाउने परिकल्पनामा चित्रकला बनाउने छन् ।
विद्यालय र विद्यार्थीबीचकाे स्वस्थ प्रतिस्पर्धाबाट उनीहरूकाे लुकेर बसेकाे प्रतिभालाई प्रस्फुटन गर्ने र शैक्षिक ज्ञानमा सुधार ल्याई विद्यार्थीलाई सृजनात्मक बनाउने महाेत्सवकाे उदेश्य रहेकाे छ । वडा अध्यक्ष सिग्देलले महाेत्सवमा हेटौंडा नगरभित्रका विद्यालयलाई सहभागी हुन र विद्यार्थीलाई महाेत्सवमा अवलाेकन गराउन प्रशासन र व्यवस्थापन समितिलाई आग्रह गर्नुभएकाे छ । महाेत्सवमा हजाराैं विद्यार्थी, अभिभावक र शिक्षकबाट अवलोकन गरिएकाे बताउँदै अध्यक्ष सिग्देलले यसपटक विद्यार्थी, अभिभावक र शिक्षक गरि १० हजार भन्दा बढीलाई महाेत्सवकाे अवलाेकन गराईने व्यवस्था मिलाईएकाे जानकारी दिनुभयो ।
महोत्सव अन्तरगत नृत्य प्रतियाेगितामा प्रथम हुने समुहले २० हजार, द्वितीय हुनेले १५ हजार, तृतीय हुनेले १० हजार र सान्त्वनालाई ५ हजार पुरस्कारको व्यवस्था गरिएको वडा सचिव रामप्रसाद गुरागाईंले बताउनु भयो । यसैगरि विज्ञान विषयकाे प्रदर्शनीमा प्रथम हुने विद्यालयले ३० हजार, द्वितीय हुनेले २० हजार, तृतीय हुनेले १० हजार र सान्त्वनालाई ५ हजार पुरस्कार रहेको सचिव गुरागाईले जानकारी दिनु भयो । उनका अनुसार चित्रकला प्रतियाेगितामा प्रथम हुनेलाई २० हजार, द्वितीयलाई १५ हजार, तृतीयलाई १० हजार र सान्त्वनालाई ५ हजार नगद पुरस्कार प्रदान गरिने छ ।