पदमपोखरी युथ, गोर्खा व्वाइज विजयी
Tags: No Comments
मकवानपुर । मकवानपुरकाे हेटौडामा जारी मकवानपुर जिल्ला लिग फुटबल प्रतियोगितामा शनिबार ४ खेल भए । मकवानपुर जिल्ला फुटबल संघको आयोजना भएकाे प्रतियोगिता अन्तरगत शनिबारकाे खेलमा पदमपोखरी युथ, गोर्खा व्वाइज विजयी भए भने एक खेल गाेलरहित बराबरीमा राेकियाे ।
हेटौंडा ६ स्थीत गौरिटार रंगशाला भएकाे खेलमा पदमपोखरी युथ क्लबले सानोपाेखरा क्लबलाई हराउँदै जीत हासिल गर्याे । पदमपोखरीले सानाेपाेखरालाई ३–२ काे गोल अन्तरले हराएकाे हाे । गौरिटार रंगशालामा भएकाे एफसी मल्टिभिजन र ७ नम्बर फुटबल क्लब बिचकाे खेल १–१ गोल भएपछि अध्याराेकाे कारण खेलकाे केही समयबाँकी हुदै रोकिएकाे थियाे ।
यसैगरी हेटौडा ११ स्थित सिमलटार मैदानमा भएकाे गोर्खा व्याइज र रियलस्टार क्लब विच भएकाे खेलमा १–० गोल अन्तरले गोर्खा व्याइज विजयी भयाे भने न्यु कम्बाइन र एफसी नामटारले गोलरहित बराबरी खेले ।
प्रतियाेगिता अन्तरगत आइतबार ४ खेल हुने आयोजकले जनाएकाे छ । गोरिटार रंगशालामा दिउँसो १ बजे प्रतिभा युवा क्लव र हाडिखोला युवा क्लब बीच पहिलाे खेल हुनेछ भने दिउँसाे ४ बजे युनाइटेड नाईन र सहिद स्मृति बीच दोस्राे खेल हुनेछ । यस्तै सिमलटार खेल मैदानमा दिउँसो १ बजे एफसी पोताला र सक्षम युवा क्लव बीच पहिलाे खेले हुनेछ भने दिउँसाे ४ बजे पशुपति युवा र प्रगतिशील युवा क्लब बीच हुने आयाेजकले जनाएकाे छ ।
१४ भदौबाट सुरु लिगको प्रतियोगिताको फाइनल खेल असोज ९ गते हुनेछ । लिग विजेताले नगद १ लाख रुपैयाँ प्राप्त गर्ने छन् भने प्रदेशस्तरीय लिगमा सहभागिता जनाउने छन् । उपविजेता टिमले ५० हजार रुपैयाँ र विधागत उत्कृष्ट खेलाडीहरुले नगद पुरस्कार प्राप्त गर्नेछन् । जिल्लामा रहेका २८ वटा क्लवलाई वर्गीकरण गर्ने गरी जिल्ला लिग सुरु गरिएको हो । फुटबल संघमा आबद्ध रही अघिल्लो पटकको लिग खेलेका २८ क्लवलाई ४ समूहमा विभाजन गरि प्रतियाेगिता संचालन भइरहेकाे छ ।
यसअघि भएको जिल्ला लिगको उपाधि न्यु डाँफे युथ क्लबले जितको थियो भने हटिया स्पोटर्स एकेडेमीले उपविजेतामा चित्त बुझाएकाे थियो।
मकवानपुर । हिमालयन राइडर्स सोसाइटीको अध्यक्षमा राजु थापामगर चयन भएका छन् । शनिबार हेटौंडामा भएको दोस्रो साधारणसभाबाट तीनवर्षे कार्यकालका लागि थापामगर अध्यक्षमा चयन भएका हुन् ।
उनकाे अध्यक्षतामा गठन भएकाे १३ सदस्यीय सोसाइटीको उपाध्यक्षमा बुद्धराम श्रेष्ठ र जीतेन्द्र महतो, महासचिवमा ईश्वर पाण्डे, सचिवमा दामोदरप्रसाद ढुंगाना र कोषाध्यक्षमा लक्ष्मीचरण श्रेष्ठ चयन भएका छन् । यसैगरी सदस्यमा नवराज नेपाल, विश्वास सापकोटा, अशोक जोशी, धर्मराज पाण्डे, दुर्गाप्रसाद लामिछाने, आशिष थापामगर र सीता श्रेष्ठ चयन भएको निर्वाचन प्रमुख चेतनाथ आचार्यले जानकारी दिए ।
ब्यक्तिगत स्वास्थ्य, पर्यावरण, आन्तरिक पर्यटन प्रवर्धन, पेट्रोलियम खपतबाट हुने कार्वन उत्सर्जन न्यूनीकरणमा साइकलको ठूलो योगदान रहने मकवानपुर उद्योग वाणिज्य संघका कोषाध्यक्ष सन्तोषकुमार अर्यालले बताए । ‘दैनिक रुपमा १०/१५ किलोमिटरको यात्राका लागि सबैले साइकल चढ्ने बानीको विकास गर्न सकेको खण्डमा समाज र स्वास्थ्यमा सकारात्मक परिवर्तन देखिने छ’ अर्यालले भने ।
यसैगरी साधारणसभाले दुई जना उपाध्यक्ष रहनेगरी विधान संशोधन गर्ने निर्णय गरेको छ । सोसाइटीको नवनिर्वाचित कार्यसमितिको बैठक आगामी सोमबार बस्ने निर्णय भएको अध्यक्ष थापामगरले जानकारी दिए ।
यस्तै सोसाइटीले ६० वर्ष उमेर माथिका ५ जना र मेचीमहाकाली साइकलयात्रा गर्ने मकवानपुरकी पहिलो महिला साइकलयात्री सीता श्रेष्ठलाई सम्मानीत गरेको छ । दुईपटक मेचीमहाकाली साइकलयात्रा गर्ने ६० वर्ष उमेर माथिका लक्ष्मीचरण श्रेष्ठ, एकपटक मेचीमहाकाली साइकलयात्रा गर्ने चेतनाथ आचार्य, बुद्धिबहादुर आले, ओकिलराज बानियाँ र अशोक जोशीलाई कदरपत्रद्वारा सम्मान गरिएको हो ।
मकवानपुर उद्योग वाणिज्य संघका कोषाध्यक्ष सन्तोषकुमार अर्यालको प्रमुख आतिथ्यता तथा सोसाइटीका कार्यबाहक अध्यक्ष राजु थापामगरको अध्यक्षतामा भएकाे साधारण सभामा बारा राइडर्स सोसाइटीका अध्यक्ष शेषराज अधिकारी, बिशालराज महत, रामबिक्रम थापा, प्रमेन्द्र महर्जन, नेलसन घलान, प्रेस सल्लाहकार भानुभक्त आचार्य लगायतको उपस्थिति रहेको थियो ।
पशुपति,पोताला,सक्षम,न्यु डाँफे,परेली र हेटौडा एकेडेमी विजयी
Tags: No Comments
मकवानपुर । मकवानपुरकाे हेटौडामा जारी मकवानपुर जिल्ला लिग फुटबल प्रतियोगितामा शुक्रबार ६ खेल भए । मकवानपुर जिल्ला फुटबल संघको आयोजना भएकाे प्रतियोगिता अन्तरगत शुक्रबारकाे खेलमा पशुपति युवा क्लब, एफसी पोताला, सक्षम, न्यु डाँफे, परेली र हेटौडा फुटबल एकेडेमी विजयी भएका छन् ।
बिहीबार वर्षाका कारण भएका २ खेलहरु शुक्रबार बिहान हेटौंडा ६ स्थित गौरीटार रंगशाला र हेटौंडा–११, स्थित सिमलटार मैदानमा खेलाइएकाे थियाे । सिमलटार मैदानमा भएको खेलमा एफसी चाइना क्वाटरलाई १–० गोलअन्तरले हराउँदै पशुपति युवा क्लब विजयी भयाे । यसैगरी गौरीटार रंगशालामा भएको खेलमा विजय युथ क्लबलाई ५–३ ले हराउँदै एफसी पोताला विजयी भयाे ।
यसैगरी शुक्रबार गौरीटार रंगशालामा भएकाे खेलमा सक्षमले एफसी ईन्टरनेटलाई २-० गोल अन्तरले पराजीत गरेकाे छ भने न्यु डाफेले एफसी ईन्टरनेट सिटिलाई ५-१ ले पाखा लगाएकाे छ । शुक्रबार नै सिमलटार मैदानमा भएकाे खेलमा परेली युवा क्लबले हेटौंडा भेट्रान्सलाई ६ -० ले पराजीत गरेकाे छ भने हेटौंडा फुटबल एकेडेमीले महावीर क्लबलाई १-० गोल हराउँदै जीत हात पारेकाे छ ।
यस्तै शनिबार जिल्ला लिग अन्तरगत ४ खेल हुनेछ । गौरीटार रंगशालामा २ खेल तथा सिमलटार मैदानमा २ खेल हुने आयोजकले जनाएकाे छ । गौरीटार रंगशालामा पहिलाे खेल दिउँसाे १ बजे पदमपोखरी युथ क्लब र सानाेपाेखरा क्लब बीच हुनेछ भने दाेस्राे खेल दिउँसाे ४ बजे ७ नम्बर फुटबल क्लब र एफसी मल्टिभिजन बीच हुनेछ । यसैगरी सिमलटारमा दिउँसो १ बजे रियल स्टार र गोर्खा व्वाइज बीच तथा दिउँसो ४ बजे न्यु कम्बाइन र एफसी नामटार बीच हुने आयोजकले जनाएकाे छ ।
१४ भदौबाट सुरु लिगको प्रतियोगिताको फाइनल खेल असोज ९ गते हुनेछ । लिग विजेताले नगद १ लाख रुपैयाँ प्राप्त गर्ने छन् भने प्रदेशस्तरीय लिगमा सहभागिता जनाउने छन् । उपविजेता टिमले ५० हजार रुपैयाँ र विधागत उत्कृष्ट खेलाडीहरुले नगद पुरस्कार प्राप्त गर्नेछन् । जिल्लामा रहेका २८ वटा क्लवलाई वर्गीकरण गर्ने गरी जिल्ला लिग सुरु गरिएको हो । फुटबल संघमा आबद्ध रही अघिल्लो पटकको लिग खेलेका २८ क्लवलाई ४ समूहमा विभाजन गरि प्रतियाेगिता संचालन गरिएकाे हाे ।
यसअघि भएको जिल्ला लिगको उपाधि न्यु डाँफे युथ क्लबले जितको थियो भने हटिया स्र्पोटर्स एकेडेमी उपविजेता बनेको थियो।
मकवानपुर । मकवानपुरको हेटौंडा उपमहानगरपालिका ११ थानाभर्याङमा म्याजिक भ्यानले मोटरसाइकललाई ठक्कर दिंदा १ जनाको मृत्यु भएको छ ।
शुक्रबार बेलुका पूर्व पश्चिम राजमार्ग अन्तर्गत थानाभर्याङ राप्तिपुल नजिकै नवलपुरबाट हेटौडा बजार तर्फ आउदै गरेको ना १५ प ४१५७ नम्बरको मोटरसाइकललाई हेटौडा बजारबाट नवलपुर तर्फ जादै गरेको बागमती प्रदेश ०३-००१ज ०२५७ नम्बरको म्याजिकले ठक्कर दिएको थियो ।म्याजिकको ठक्करबाट मोटरसाइकल चालक हेटौडा – ११ थानाभर्याङ बस्ने २६ वर्षीय श्रीराम परियारको मृत्यु भएको जिल्ला प्रहरी कार्यालयले जनाएको छ ।
म्याजिकको ठक्करबाट टाउको र खुट्टामा चोट लागि घाईते भएका श्रीरामको उपचारको क्रममा मृत्यु भएको प्रहरीले जनाएको छ। माेटरसाइकललाई ठक्कर दिए लगत्ते उक्त म्याजिक ना १ ज ८१३१ नम्बरको म्याजिकमा समेत ठोक्किएको प्रहरीले जनाएको छ। उक्त घटनामा अन्य सबै सकुशल रहेको र दुई वटै म्याजिक, चालक र माेटरसाइकललाई प्रहरीले नियन्त्रणमा लिएको छ।
मकवानपुर । आज (२१ भदौ), आजैबाट चेपाङको न्वागी पर्व सुरु भएको छ । पर्वको अवसरमा बागमती प्रदेशको ३ जिल्ला र गण्डकी प्रदेशको ३ जिल्लाका चेपाङहरु गोरखा जिल्लामा भेला हुँदै छन् ।
यसपटक संयुक्त रुपमा गोरखा जिल्लामा यो पर्व मनाउने तयारी पुरा भएका छ । २१ भदौबाट सुरु हुने यो पर्व २२ गते मुख्य रुपमा मनाइन्छ ।बागमती प्रदेशको मकवानपुर, चितवन र धादिङमा रहेका चेपाङहरु गण्डकी प्रदेशको गोरखा, तनहुँ र लमजुङ जिल्लाका चेपाङले सामुहिक रुपमा पर्व मनाउन लागेका हुन् । गत वर्ष बागमतीका ३ जिल्लाका चेपाङहरुले धादिङ जिल्लाको गजुरी गाउँपालिकामा भेला भएर सयुक्त रुपमा पर्व मनाएका थिए । यसपालि भने २ वटा प्रदेशवासीले एकै थलोमा भेला भएर पर्व मनाउन लागेका हुन् ।
यस पटक गण्डकी प्रदेशको गोरखा जिल्ला, गण्डकी गाउँपालिका ६ मा रहेको तुमनडाँडा माविको प्राङ्गणमा सामुहिक रुपमा न्वागी मनाउन लागिएको हो । सामुहिक पर्व मनाउँदाको सम्पूर्ण खर्च गाउँपालिकाले नै व्यवहोर्ने तयारी भएको चेपाङ अगुवा तथा पूर्व साभासद् गोविन्दराम चेपाङले बताए । सामुहिक पर्व मनाउनको लागि लगभग ८ देखि १० लाख खर्च अनुमान गरिएको थियो । गतवर्ष पनि धादिङको गजुरी गाउँपालिकाले ८ लाख खर्च व्यहोरेको थियो ।
तुमनडाँडा माविको प्राङ्गणमा भेला हुने छन् भने चेपाङ केन्द्रीय समितिले आयोजनाको अन्य पाटो हेर्ने तयारी भएको छ । यहाँ झण्डै १ हजार ५ सयको हाराहारीमा चेपाङहरुको उपस्थिती रहने छ । स्थानीय मगर, गुरुङ समुदायहरुको पनि उपस्थिती हुने बताइएको छ । पर्व मनाउनको लागि भोज र पूजा सामग्रीको जोहो भइसकेको छ । सामुहिक भोजमा मासु भात खाइनेछ । यसको लागि चामल र मासुको लागि राँगो र सुङगुरको तयारी भएको छ । पूजाको लािग फलफूलमा काँक्रो, अमिलो गाभा मकै आदि आदिको तयारी भएको छ ।
सामुहिक पूजामा सहभागी प्राय सबैले ढ्याङग्रो ठोक्ने चेपाङ अगुवा तथा पूर्व साभासद् चेपाङले बताए । उनका अनुसार पूजामा कम्तिमा ७ जना झाक्री (पाण्दे) पुरेतको पनि व्यावस्था हुँदैछ । उनका अनुसार पर्व मनाउनकै लागि ६ वटा जिल्लाबाट कम्तिमा एक हजार जना चेपाङको उपस्थिती रहने छ । चेपाङहरुको राष्ट्रिय पर्व न्वागी (छोनाम) को अवसरमा बागमती प्रदेश सरकारले तीन जिल्लामा भदौ २२ गते सार्वजनिक बिदा दिने गरेको छ । यद्यपि यसवर्ष न्वागीको मुख्य दिन शानिबार परेको छ ।
यो वर्ष नयाँ अन्नबाली, फलफूल पाकेपछि विशेष पूजा गर्दै प्रकृतिलाई चढाएरमात्रै आफूले खाने गरिन्छ । यो चेपाङ समुदायको लागि नयाँ वर्ष पनि हो । केही वर्षयता नेपाल चेपाङ संघको पहलमा २२ भदौलाई छोनाम राष्ट्रिय पर्वको रूपमा मनाउने गरिएको छ । यो दिन चेपा·हरुले घैया धानको चामल, पिँडालु, निबुवा आदि फलफूलले भूमिलाई पूजा गरी पितृलाई खुवाउने गर्दछन् ।
आपसी भातृत्व र मित्रताको पर्वको रुपमा समेत लिइने पर्वमा चेपाङहरुले छरछिमेकी, नाताकुटुम्ब निम्तो गरेर सामूहिक भोज खाने, नाचगान गर्ने र सुखदुःख साट्ने गर्छन् । सांस्कृतिक रूपमा चेपाङ चेपुवामा परेको बताउँदै आएता पनि यो पर्वको विशेष महत्व दिने गरेको मकवानपुरका चेपाङ अगुवा तथा पूर्व साभासद् गोविन्दराम चेपाङले बताए ।
गाउँघरमा न्वागीका दिन चेपाङ झाँक्री (पान्दे) हरुले रातभर ढ्याङग्रो ठोकेर पितृ खुसी पार्ने गर्छन् । यो दिन न्वागी फलाक्ने झाँक्रीहरुका अलावा अन्य मानिसहरु भने सांस्कृतिक नाच र गीतहरु प्रस्तुत गर्ने गर्दछन् । यो दिन उनीहरुले कुखुराका बली समेत दिने गर्छन् ।
२१ गते साँझबाट ढ्याङग्रो फलाक्न सुरु गरिन्छ । सामान्यत जनैपूर्णिमाको दिनदेखि पान्देले ढ्याङ्ग्रो फलाक्ने कार्य सुरु हुन्छ । चेपाङ समुदायमा रहेका ७२ गोत्रहरुको भदौ महिनाको विभिन्न तिथिमा ढ्याङ्ग्रो ठोक्ने पूजा सुरु हुन्छ । २१ गते साँझबाट सुरु हुने ढ्याङग्रो ठोक्ने काम भने न्वागी सुरु भएको विशेष सूचक मानिन्छ ।
दिउँसोदेखि विशेष पूजा सुरु हुने र रातभर झाक्री (पान्दे) द्वारा पितृ पुजा रातभरि भोलीपल्ट विहान ‘बारना’ गरेर चाड समापन गरिन्छ । मकवानपुर जिल्लामा मनहरी, राक्सिराङ र कैलाश गाउँपालिकामा मात्रै चेपाङको बसोबास रहेको छ ।
नेपालमा मकवानपुर, धादिङ, चितवनलगायत २६ जिल्लामा चेपाङको बसोवास छ । वि.स २०७८ को जनगणना अनुसार नेपालमा ८४ हजार ३ सय ६४ ले जना चेपाङ छन् । जातिगत हिसाबले जिल्लामा १३ औं स्थानमा चेपाङ जातिको बसोबास रहेको छ । यसैबीच यो पर्वको अवसरमा मकवानपुरको मनहरी गाउँपालिकाले भने २१ गते पनि सार्वजनिक बिदा दिएको थियो ।
भड्कीलो बन्दै न्वागी
विभिन्न पर्वहरु भड्कीलो र खर्चिलो बन्दै आएको गुनासाहरु एकातिर सुन्ने गरीन्छ भने, अर्कोतिर समयको माग भएको दाबि सुन्ने गरिन्छ । जातीय पर्वको महत्व घरघरमै हुन्छ तर सामुहिक पर्वको नामम विभिन्न स्थानमा भेला भएर पर्व मनाउने परिपाटीको कारण न्वागी पनि सर्वसाधारणको पहुँचबाट बाहिरीदै छ ।
चेपाङ संघ गाउँ कमिटी, जिल्ला कमिटी, प्रदेश कमिटीहरुमा नेतृत्व गरिरहेका अगुवाहरुले नै सामूहिक पर्वलाई प्राथमिकता दिंदै गर्दा न्यून जीवनस्तर बाँचिरहेका चेपाङहरुले भने पर्व मनाउनै समस्या भोग्दै आएको चमेली चेपाङले बताइन् ।
घरघरमै पनि आफ्नो गच्छे अनुसार पर्व मनाउन र पर्वको मर्म बचाइराख्न आफूहरु लागि परेको ३४ वर्षिय रविना प्रजाले बताउँछिन् । “सामूहिक रुपमा मनाउने कार्यक्रममा सबैको सहभागीता संभव छैन, आफ्नो परम्परा त आफूले घरैमा मनाएर बचाउँने हो, हामी घरघर मै क्षमता अनुसार मनाउँछौ” रविनाले भनिन् ।
नेपाल सरकारले सूचीकृत गरेको ५९ आदिवासी जनजातिमध्ये चेपाङ पनि एक हो । सूचीकृत आदिवासीमध्ये चेपाङ अति सिमान्तकृत समुदायमा पर्छ । चेपाङ राप्ती नदी उत्तर, त्रिशूलीपूर्व उठेको महाभारत पर्वत शृंखला वरिपरिको रैथाने वासिन्दा मानिन्छन् ।
चेपाङ जातिलाई भौगोलिक सिमानाभन्दा सामाजिक तथा सांस्कृतिक सिमानाले बाँधेको छ । भूमिसँग अति निकट सम्बन्ध रहेको चेपाङ जातिभित्र माटोको बनोटको आधारमा उनीहरूको थर, उपथरहरूको वर्गीकरण भएको पाइन्छ ।
जन्मदेखि मृत्युसम्मको संस्कार भूमिसँग सम्बन्धित छ । उनीहरूको मूलथलो गाउँघर, खोलानाला, भीरपहरा आदिको नाम चेपाङ भाषाबाटै राख्छन् । चेपाङ जातिको चिनारी (२०६७) पुस्तकमा उल्लेख भए अनुसार बागमती प्रदेशको चितवन र धादिङको सिमानामा रहेको कान्द्राङगढी र चितवनको उपरदाङगढी चेपाङ वंशको ऐतिहासिक थलो हो ।
खास गरेर दामनदेखि पश्चिम त्रिशूलीसम्मका पर्वतको उत्तर र दक्षिण पाटो भिरालो पाखा, जंगल र नदीतिर प्रायःजसो फैलिएर बसेको क्षेत्र हो । इलाम, झापा, मोरङ, सुनसरी, भोजपुर, धनुषा, महोत्तरी, सर्लाही, सिन्धुली, बारा, पर्सा, ललितपुर, काठमाडौं, धादिङ, मकवानपुर, चितवन, गोरखा, लमजुङ, तनहुँ, कास्की, गुल्मी, नवलपरासी, रूपन्देही, दाङ, बाँके र बर्दिया गरी २६ जिल्लामा चेपाङ जातिको बसोबास छ ।
चेपाङ बाहुल्य जिल्लामध्ये सबैभन्दा धेरै चितवनमा छन् यहाँ कुल जनसंख्यामामा चेपाङको संख्या सातौं स्थानमा छ ।