मकवानपुर । मकवानपुरमा बैंकिङ कसुर सम्बन्धी मुद्दा बढेकाे छ । पछिल्लाे समय देखिएकाे आर्थिक मन्दीले बैंकिङ जन्य कारोबारमा बढि मुद्दा पर्ने गरेकाे प्रहरीकाे तथ्याङ्कले समेत देखाएकाे छ ।
जिल्ला प्रहरी कार्यालय मकवानपुरमा गत आर्थिक वर्षमा बैंकिङ कसुरका एक सय ८४ मुद्दा दर्ता भएकाे छ । आर्थिक वर्ष २०७९/०८० मा ७९ मात्रै बैकिङ कसुर सम्बन्धी मुद्दा दर्ता भएकाेमा गत आवमा बढेर एक सय ८४ पुगेकाे हाे । यसैगरी चालु आर्थिक वर्षकाे भदौ मसान्तसम्म पनि बैकिङ कसुरका मुद्दा बढी दर्ता भएकाे प्रहरीकाे तथ्याङ्कले देखाउँछ । चालु आवकाे भदौ मसान्तसम्म ३३ मुद्दा बैंकिङ कसुर सम्बन्धी रहेकाे छ ।
बैंकिङ कसुर सम्बन्धी मुद्दा पछि लागु औषध मुद्दा बढी दर्ता भएकाे देखिन्छ । आर्थिक वर्ष २०७९/०८० मा लागु औषध सम्बन्धी मुद्दा सबै भन्दा बढी दर्ता भएकाे थियाे । जिल्लामा उक्त आवमा एक सय ५३ मुद्दा लागु औषधका दर्ता भएकाेमा गत आवमा लागु औषधका एक सय ५८ मुद्दा दर्ता भएकाे जिल्ला प्रहरी कार्यालय मकवानपुरले जनाएकाे छ । यसैगरी चालु आवकाे भदौ मसान्तसम्म १७ मुद्दा लागु औषधका दर्ता भएका छन् ।
यसैगरी आव २०७९/०८० मा लागुऔषध सम्बन्धी मुद्दा १ सय ५३ दर्ता हुँदा २ सय ४८ जना पक्राउ परेका छन् । आव २०८०/०८१ मा लागु औषध मुद्दा एक सय ५८ दर्ता हुँदा दुई सय ४९ जना पक्राउ परेकाे जिल्ला प्रहरी कार्यालय मकवानपुरले जनाएकाे छ । यस्तै चालु आवमा १७ मुद्दा दर्ता हुँदा २९ जना पक्राउ परेका छन् ।

स्राेतः जिल्ला प्रहरी कार्यालय मकवानपुर
यस्तै मकवानपुर प्रहरीले आव २०७९/०८० मा मकवानपुरका विभिन्न पालिकामा १४६ विगाह १७ कठ्ठा १० धुरमा लगाइएकाे गाँजा फडानी गरेकाे छ । यसैगरी साेही आवमा २२४ विगाह ३ कठ्ठामा लगाइएकाे अफिम नष्ट गरेकाे छ । चार ९७ प्रहरी परिचालन गरी उक्त लागुऔषध फडानी गरिएकाे हाे । यसैगरी गत आवमा मकवानपुर प्रहरीले २७८ विगाह ३ कठ्ठामा लगाइएकाे गाँजा र १४६ विगाह ५ कठ्ठा १५ धुरमा लगाइएकाे अफिम नष्ट गरिएकाे हाे । उक्त अभियानमा ५ सय ९६ जना प्रहरी परिचालन गरिएकाे हाे ।
यस्तै जिल्ला प्रहरी कार्यालय मकवानपुरमामा अपराध अनुसन्धान सम्बन्धी मुद्दा दर्ताकाे संख्या बढ्दै गएकाे तथ्याङ्कले देखाउँछ । आर्थिक वर्ष २०७८/०७९ मा विभिन्न अपराधका आठ सय दुई मुद्दा दर्ता भएकाेमा सात सय ३० जना पक्राउ परेका छन् । आर्थिक वर्ष २०७९/०८० मा आठ सय ६६ मुद्दा दर्ता भएकाेमा सात सय ६४ जना पक्राउ गरिएकाे थियाे । गत आवमा अपराध सम्बन्धी एक हजार १९ मुद्दा दर्ता भएकाेमा सात सय ३२ जना पक्राउ गरिएकाे प्रहरीकाे तथ्याङ्कमा उल्लेख छ । चालु आवकाे भदौ मसान्तसम्म अपराधका एक सय ६४ मुद्दा दर्ता भएकाेमा एक सय २२ जना पक्राउ गरिएकाे छ ।
जिल्ला प्रहरी कार्यालय मकवानपुरकाे तथ्याङ्क अनुसार चालु आवकाे भदौसम्म फरार प्रतिवादी १५ जना पक्राउ गरेकाे देखिन्छ । यसैगरी गत आवमा विभिन्न मुद्दाका फरार प्रतिवादी दुई सय ६१ जना पक्राउ गरिएकाे प्रहरीले जनाएकाे छ । यस्तै आव २०७९/०८० मा फरार प्रतिवादी एक सय ६७ र आव २०७८/०७९ मा एक सय १४ जना फरार प्रतिवादी पक्राउ गरिएकाे तथ्याङ्कमा उल्लेख छ ।

स्राेतः जिल्ला प्रहरी कार्यालय मकवानपुर
मकवानपुर । बाल समूह सञ्जाल हेटौंडा ८ काे आयाेजनामा भएकाे वक्तृत्वकला प्रतियोगितामा परासर तिमल्सिना प्रथम भएका छन् ।
६० औं बाल दिवसको अवसरमा “बालमैत्री वडा दिगोपनामा हामी बालबालिकाको भूमिका र दायित्व” विषयक बक्तृत्वकलामा प्रशिद्धी भट्टराई द्वितीय तथा सवेक्षा तिमल्सिना तृतीय भएका छन् । प्रथम द्वितीय र तृतीय हुनेले क्रमशः ५ हजार, ३ हजार र २ हजार पुरस्कार प्राप्त गरेका छन् । यसैगरी सिमोन भट्टराई सान्त्वना हुँदै १ हजार पुरस्कार हात पारे ।
हेटौडा ८ मा रहेकाे चन्द्राेदय माविमा भएकाे प्रतियाेगितामा वडा अध्यक्ष रामकृष्ण थापाकाे सभाध्यक्षमा भएकाे हाे । कार्यक्रममा हामिद अलि,बाल अधिकार समिति सदस्य सरस्वती थिङ र लक्ष्मी कुँवर,बाल मैत्री सम्पर्क ब्यक्ति रिता मङराती, वडा सदस्य गोरखनाथ राय, वडा सहजकर्ता रोजिता दंगाल, निलगिरी बाल समुहको संरक्षक अभिभावक भिमसेन घिमिरेको आतिथ्यता रहेकाे थियाे ।
मकवानपुर । मकवानपुरको हेटौंडामा जारी वडास्तरीय टी–२० क्रिकेट प्रतियोगिताको उपाधि आयोजक नेपाल खेलकुद महासंघ ८ नम्बर वडाले हात पारेको छ ।
हेटौंडा –८, कमाने स्थित चन्द्रोदय माविको खेलमैदानमा शनिबारको फाइनल खेलमा वडा नम्बर ९ को ए टिमलाई ५ विकेटले पराजित गर्दै आयोजकले प्रथम टी–२० वडास्तरीय क्रिकेटकाे उपाधि जितेको हो । उपाधिसँगै आयोजकले नगद ५० हजारसहित शिल्ड, मेडल तथा प्रमाणपत्र प्राप्त गरेको हाे ।
उपविजेतामा चित्त बुझाएको ९ एले २५ हजार रुपैयाँसहित शिल्ड, मेडल तथा प्रमाणपत्र प्राप्त गर्यो । टस जितेर आयोजक टिमले ब्याटिङको निम्तो दिएपछि हेटौंडा ९ ए ले ९ विकेटको क्षतिमा १५२ रन जोड्यो । ९ ए का लागि क्याप्टेन युविन बुढाथोकीले अविजित ९२ रन बनाए ।
१५३ रनको विजयी लक्ष्यसहित ब्याटिङको लागि मैदान उत्रिएको आयोजक खेलकुद महासंघले ११ ओभर ५ बलमा लक्ष्य भेट्टायो । आयोजक टिमका लागि रमेश उपाध्यायले ३४ बलमा अविजित रहँदै ७४ रन बनाए । शुक्रबारको पहिलो सेमीफाइनल खेलबाट हेटौंडा–८ ‘ए’ लाई १०२ रनले हराउँदै आयोजक खेलकुद महासंघ वडा–८ कमिटी र वडा–२ लाई २३ रनले हराउँदै वडा–९ ले फाइनलमा भेट पक्का गरेका थिए ।
नेपाल खेलकुद महासंंघ ८ नम्बर वडा कमिटीको आयोजनामा प्रतियोगितामा १९ टिमको सहभागिता रहेको थियाे ।
मकवानपुर । मकवानपुरकाे हेटौंडामा भएको मकवानपुर जिल्लास्तरीय पुरुष भेट्रान्स भलिबलको उपाधि नारायणी कलेजले हात पारेकाे छ । प्रतियोगिता अन्तरगत शनिबार भएको फाइनल खेलमा नारायणीले भीमफेदी गाउँपालिकाको टिम टिमलाई ३–१ को सेटले पराजित गर्दै उपाधी कब्जा गरेको हो ।
हेटौंडा–४, हुप्रचौरस्थित भलिबल कोर्टमा भएको फाइनलकाे पहिलो सेट भीमफेदीले नारायणी कलेज २५-१८ ले जीतेकाे थियो । नारायणीले भीमफेदीलाई दोस्रो, तेस्रो र चौथो सेटमा क्रमशः २५–१५, २५–२१ र २५–१८ ले हराएकाे हो । उपाधि जितेसँगै नारायणी कलेजले ३० हजार रुपैयाँसहित शिल्ड, मेडल तथा प्रमाणपत्र प्राप्त गरेको छ ।
यसैगरी भीमफेदीको टिमले १५ हजार रुपैयाँसहित शिल्ड, मेडल तथा प्रमाणपत्र प्राप्त गर्दै उपविजेतामा चित्त बुझाएकाे छ । खेलको प्लेयर अफ द डे मकवानपुरगढीका शंकर गौतम घोषित भए । उनले नगद २ हजार रुपैया र ट्रफी हात पारे । प्रतियोगिताको उत्कृष्ट खेलाडी नारायणीका प्रकाश चालागाईं घोषित भइ २ हजार रुपैयाँको नगद प्राप्त गरे । उत्कृष्ट प्रशिक्षक नरायणीका इश्वर छत्कुली, डिफेन्डर नारायणीकै नविन राजबाहक घोषित हुँदा भीमफेदीका उत्कृष्ट सेटर विनोद सुवेदी र उत्कृष्ट स्पाइकर रत्नसिद्धि लामा घोषित हुँदै जनही १ हजार रूपैयाँ प्राप्त गरेका छ्न् ।
नारायणी कलेजले सेमिफाइनलमा मकवानपुरगढी गाउँपालिकाकाे टिमलाई हराउँदै फाइनल यात्रा तय गरेकाे थियाे भने भीमफेदीले हेटौंडा १९ काे भेष्ट्रान्सलाई पराजीत गर्दै फाइनलमा स्थान बनाएकाे थियाे । केशवलाल श्रेष्ठ स्मृति केन्द्रीय प्रतिष्ठानको आयोजना तथा छहारी सेवा समाजको सहआयोजनामा ३ भदौबाट संचालन भएकाे प्रतियोगितामा ११ वटा टिमको सहभागिता रहेको थियो ।
मकवानपुर । महालक्ष्मी साहित्य पुरस्कार, २०८० बाट महाकाव्यकार मुना अर्याल सम्मानित भएकी छिन् । शनिबार मातृभूमि साहित्य समाज र महालक्ष्मी विकास बैंकले संयुक्त रुपमा उक्त पुरस्कारबाट मकवानपुरकी साहित्यकार अर्याललाई सम्मानित गरिएकाे हाे ।
उक्त पुरस्रकारकाे राशी ५१ हजार रहेकाे छ । बागमती प्रदेशका आन्तिरिक मामिला तथा कानून मन्त्री सुरजचन्द्र लामिछाने, समाजका अध्यक्ष कृष्णप्रसाद दाहाल, महालक्ष्मी विकास बैंकका क्षेत्रीय प्रवन्धक शम्भूप्रसाद पराजुलीले पुरस्कार प्रदान गरेका थिए ।
उक्त पुरस्कार भाषा, साहित्यको क्षेत्रमा योगदान पुऱ्याउने साहित्य सेवीहरूलाई २०५९ सालदेखि प्रत्येक वर्ष निरन्तर रूपमा प्रदान गरिँदै आएको अध्यंक्ष दाहालले जानकारी दिए । हालसम्म उक्त पुरस्कारबाट २० जना साहित्यकार सम्मानित भइसकेका छन् । समाजले २०५९ सालमा यती फाइनान्ससँगकाे सहकार्यमा उक्त साहित्य पुरस्कारको स्थापना गरेकाे हाे । यती फाइनान्स महालक्ष्मी विकास बैंकसँग मर्ज भएपछि २०७४ सालबाट साहित्य पुरस्कारको नाम महालक्ष्मी साहित्य पुरस्कार भएको हाे ।

त्यस्तै, समाजसेवी ईश्वर मैनालीले आफ्नो बुबाको स्मृतिमा स्थापित केशवलाल स्मृति मातृभूमि पत्रकारिता पुरस्कार २०८० बाट हेटौंडा सन्देश दैनिकका सम्पादक माधवप्रसाद न्यौपाने सम्मानित भएका छन् । उक्त पुरस्कारका राशी भने नगद १० हजार रहेको छ । यसैगरी मकवानपुर श्री सम्मानबाट मकवानपुरका अग्रज शिक्षाप्रेमी बद्रीनाथ शर्मा अर्याललाई सम्मानित गरिएकाे छ ।
मातृभूमि साहित्य समाज, मकवानपुर भाषा, साहित्य, कला, सङ्गीत र संस्कृतिको संरक्षण/संवर्द्धन गर्ने उद्देश्यले २०५६ सालमा स्थापित संस्था हो। समाजले विभिन्न विधामा १७ वटा पुरस्कार प्रदान गर्दै आएकाे छ ।