मकवानपुर । मकवानपुरको हेटौंडा उपमहानगरपालिकाको एक विद्यालयका प्रधानाध्यापकले आफ्नो जन्मदिनमा विद्यालयलाई हस्तान्तरण गरेका छन् । हेटौंडा – १६ स्थित जनप्रिय माध्यमिक विद्यालयका प्रअ भुपेन्द्र चौलागाईंले आफ्नो जन्मदिनमा १ सय ४५ थान पुस्तक विद्यालयलाई हस्तान्तरण गरेका हुन् ।
अघिल्ला वर्षहरूमा समेत जन्मदिनमा पुस्तक हस्तान्तरण गर्दै आएका चौलागाईंले उक्त पुस्तकहरू जनप्रिय रिडर्स क्लब मातहत रहनेगरी विद्यालयलाई उपलब्ध गराएका हुन् । जनप्रिय रिडर्स क्लबकी अध्यक्ष शिक्षा गौतमलाई प्रअ चौलागाईंले पुस्तक हस्तान्तरण गरेका थिए । हेटौंडा – १६ नम्बर वडा सदस्य गुरूप्रसाद ढकाल, विव्यस अध्यक्ष मोहनप्रसाद बस्ताकोटी, शिक्षक अभिभावक सङ्घका अध्यक्ष गीताप्रसाद दुलाल, विभिन्न समितिका सदस्य तथा शिक्षकहरूको उपस्थितिमा पुस्तक हस्तान्तरण गरिएको हो ।
चौलागाईंले जनप्रियले चालेको अभियानले विद्यार्थीहरूको मानसिक क्षमतामा अभिवृद्धि गर्ने, पठन संस्कृतिले डिजिटल डिभाइसको अति प्रयोगलाई विस्थापन गर्ने, तार्किक क्षमतामा वृद्धि गर्दै वैयक्तिक विकासमा योगदान पुर्याउनेमा विश्वस्त रहेको बताए । अतिरिक्त विभाग संयोजक युक्तलाल विश्वकर्माले पुस्तकले सूचनासहित ज्ञानगुनका कुरा दिने बताउदै भविष्यको मार्गदर्शन गर्ने, विद्यार्थीहरूलाई धेरै सुन्न र थोरै अनि आवश्यक अनुसार बोल्न आग्रह गरे ।
साहित्य तथा बौद्धिक विभाग संयोजक संप्रस पौडेलले पठन संस्कृतिको खास रूप नै कक्षाको लाइब्रेरी रहेकोले पुस्तकहरू कक्षा-कक्षामैं रहनेगरी उपहार प्राप्त हुने क्रम बढ्दै गएको बताए । उनले भने ‘विद्यालयलाई पुस्तक उपहार प्राप्त हुँदा विद्यार्थीहरूमा पढ्ने र त्यसबारे छलफल गर्ने आनिबानीको विकास भएको छ ।’ पढ्ने तथा छलफल गर्ने बानीले निडर भएर बोल्ने क्षमताका साथै लेखनसीपमा सकारात्मक सुधार हुँदै गएको उनले बताए ।
विद्यालयका विभिन्न कक्षाहरूमा रहेको बुक र्याकमा पुस्तक राख्ने उद्देश्यले ‘एक व्यक्ति एक पुस्तक हस्तान्तरण कार्यक्रम’ अन्तर्गत शिक्षक, अभिभावक, विद्यार्थी, साहित्यकार, साहित्यसेवीहरूमार्फत् पुस्तक उपलब्ध भइरहेको विद्यालयले जनाएको छ । पौडेलका अनुसार विद्यार्थीहरूले खाली घण्टीमा अध्ययन गर्ने, घरमा लगी अध्ययन गर्ने गरेका छन् । गत वर्षदेखि पुस्तक पढेपश्चात् त्यसबारे समीक्षा समेत गर्ने गरिएको उनले जानकारी दिए।
मकवानपुर । माध्यमिक शिक्षा परीक्षा (एसइई) २०८१ को नतिजामा मकवानपुरका ४६.८६ प्रतिशत परीक्षार्थी उत्तीर्ण भएका हुन्।
शिक्षा विकास तथा समन्वय इकाई, मकवानपुरकाे सार्वजनिक सूचना अनुसार मकवानपुर जिल्लाबाट परीक्षा दिने कुल ५८८७ मध्ये ३१२८ जना परीक्षार्थी उत्तीर्ण भएका छन्। २८१० जना सामान्य विधाबाट र १३२ जना प्राविधिक विधाबाट गरी कुल ३१२८ जना परीक्षार्थी उत्तीर्ण भएका छन्।
सामान्यतर्फ ४७.०४ प्रतिशत र प्राविधिकतर्फ ४२.३ प्रतिशत परीक्षार्थी उत्तीर्ण भएका छन्। दुबै गरेर ४६.८६ प्रतिशत परीक्षार्थी उत्तीर्ण भएकाे शिक्षा विकास तथा समन्वय इकाईले जनाएकाे छ । यसपटक इनकम्प्लिट परीक्षार्थी संख्या २२९ रहेको छ ।
जिल्लाकाे नतिजा अनुसार, ४.० जीपीए ल्याउने विद्यार्थीको संख्या ५ जना रहेको छ । ४.० जीपीए भन्दा कम र ३.६ जीपीए भन्दा माथि ल्याउने विद्यार्थीको संख्या ३७२ जना सामान्य तर्फ र ६ जना प्राविधिक तर्फ गरेर जम्मा ३७८ जना रहेको छ ।
त्यसैगरी, ३.२ देखि ३.६ जीपीए ल्याउनेमा ८०२ जना (सामान्य ७७२, प्राविधिक ३०) , २.८ देखि ३.२ जीपीए ल्याउने ९८१ जना (सामान्य ९२७, प्राविधिक ५४), २.४ देखि २.८ जीपीए प्राप्त गर्ने ५३९ जना (सामान्य ५३२, प्राविधिक ७) तथा २.० देखि २.४ जीपीए प्राप्त गर्ने ५४ जना विद्यार्थी रहेकाे इकाईले जनाएकाे छ ।
यस वर्ष मकवानपुरले गत वर्षभन्दा नतिजामा सुधार ल्याएको छ । गत शैक्षिक सत्रमा मकवानपुरका ५ हजार सात सय ५२ जना विद्यार्थी माध्यमिक शिक्षा परीक्षा (एसइई)मा सहभागी भएकामा २ हजार ९८ जना उत्तीर्ण भएका थिए ।
३६.४७ प्रतिशत विद्यार्थी मात्रै ११ कक्षामा भर्ना हुन योग्य हुँदा ३ हजार ६ सय ५४ जना विद्यार्थी ननग्रेडेड (एनजी) भएका थिए ।
मकवानपुर । २०८१ सालको माध्यमिक शिक्षा परीक्षा (एसइई)को नतिजा प्रकाशित भएको छ । राष्ट्रिय परीक्षा बोर्ड, परीक्षा नियन्त्रण कार्यालय कक्षा १० ले शुक्रबार प्रकाशित नतिजाअनुसार ६१.८१ प्रतिशत परीक्षार्थी उत्तीर्ण भएका छन् ।
२०८२ काे एसइईमा ३.६ जिपिएदेखि ४ जेपीएसम्म ल्याउने ४८ हजार १७७ जना, ३.२ जिपिएदेखि ३.६ जिपिए ल्याउने ८१ हजार ३८५ जना र २.८ जिपिएदेखि ३.२ जिपिए ल्याउने ८९ हजार १२४ जना परीक्षार्थी रहेका छन् । त्यसैगरी २.४ जिपिएदेखि २.८ जिपिएसम्म ल्याउने ४८ हजार ४७९ जना, २ जिपिएदेखि २.४ जिपिए ल्याउने चार हजार १२६ जना र १.६ देखि २ जिपिए ल्याउने आठ जना परीक्षार्थी रहेका छन् ।
१२६ जना परीक्षार्थीको परीक्षा रद्द गरिएको बोर्डले जनाएकाे छ । एक लाख ६७ हजार ५९७ विद्यार्थी नतजिा अवर्गीकृत भएका छन् ।
गत २०८१ सालको चैत ७ गतेदेखि १९ गतेसम्म सञ्चालन भएको एसइईमा नियमिततर्फ ४ लाख ३१ हजार ४६६ र ग्रेड वृद्धितर्फ ६७ हजार ७१५ गरी जम्मा ४ लाख ९९ हजार १८३ विद्यार्थी सहभागी भएका थिए ।
नतिजा कसरी हेर्ने?
नतिजासम्बन्धी विवरणहरू एसएमएस, आईभीआर र वेबसाइटमार्फत हेर्न सकिने बोर्डले जनाएको छ । एसएमएस र आईभीआरमा नेपाल टेलिकम, जानकी टेक्नोलोजी, आकाश टेक, स्विफ्ट टेक्नोलोजी, अल स्टार आईटी सोलुसन्स मार्फत हेर्न सकिनेछ । नेपाल टेलिकमको एसएमएस/यूएसएसडी र आईभीआरका लागि १६०० मा मेसेज गरेर हेर्न सकिन्छ ।
त्यस्तै, जानकी टेक्नोलोजी प्रालिको एसएमएस मार्फत हेर्न ३५००१, आकाश टेक प्रालिबाट हेर्न ३४४५५, अल स्टार आईटी सोलुसन्स प्रालिको लागि ३४९४९ मा एसएमएस गरेर हेर्न सकिन्छ । राष्ट्रिय परीक्षा बोर्ड, नेपाल टेलिकम, इडियु सञ्जाल, इसेवा, खल्ती, स्मार्टकार्ड नेपाललगायतको वेबसाइटमार्फत पनि नतिजा हेर्न सकिने बोर्डले जनाएको छ ।
पूरक परीक्षा मिति तय
बाेर्डले एसईईको पूरक परीक्षाकाे मिति तय भएको छ । २०८१ सालकाे एसइई परीक्षाको नतिजा शुक्रबार प्रकाशित गरेसँगै पूरक परीक्षाको मिति समेत बार्डले तय गरेको हो ।
जसअनुसार पूरक परीक्षा साउन २९ देखि हुनेछ भने कार्यतालिका पछि प्रकाशित गरिने बोर्डका अध्यक्ष डा महाश्रम शर्माले जानकारी दिए ।
यस वर्षको माध्यमिक शिक्षा परीक्षा (एसईई) को नतिजा गत वर्षभन्दा सुधार भएर आएकाे छ ।
राष्ट्रिय परीक्षा बोर्डले आज सार्वजनिक गरेको नतिजा अनुसार ६१.८१ प्रतिशत विद्यार्थी उत्तीर्ण भएका छन् । २०८० सालको एसईईको नतिजामा ४७.८६ प्रतिशत मात्रै उत्तीर्ण भएका थिए । २०८१ सालको एसईईको नतिजामा १३.९५ प्रतिशतले सुधार आएको हो ।
यस वर्षको एसईईमा १ लाख ६७ हजार ५९७ परीक्षार्थी फेल भएका छन् । नतिजाअनुसार कुल परीक्षार्थीमध्ये २ लाख ७१ हजार २९९ जना मात्रै उत्तीर्ण भएका हुन् ।
माध्यमिक शिक्षा परीक्षा (एसईई) मा सबैभन्दा बढी विद्यार्थी गणितमा ननग्रेडेड (एनजी) अर्थात फेल भएका छन् । राष्ट्रिय परीक्षा बोर्डले सार्वजनिक गरेको २०८१ सालको एसईईको नतिजा अनुसार गणित विषयमा सबैभन्दा बढी एनजी आएको हो ।
गणित विषयमा मात्रै एक लाख २८ हजार २१५ जना ननग्रेडेड भएका छन् । त्यस्तै अंग्रेजीमा ८० हजार ६७२, नेपालीमा ५४ हजार ७३५, सामाजिकमा ५३ हजार १८६ र विज्ञान तथा प्रविधि विषयमा ७९ हजार २७१ विद्यार्थीले ननग्रेडेड भएको बताए ।
बागमती प्रदेशबाट बढी उत्तीर्ण
एसइई २०८१ मा सबैभन्दा बढी विद्यार्थी बागमती प्रदेशबाट उत्तीर्ण भएका छन् । सार्वजनिक नतिजा अनुसार बागमती प्रदेशबाट एक लाख १९ हजार ५१७ जना विद्यार्थी पास भएका छन् ।
त्यसपछि लुम्बिनी प्रदेशबाट विद्यार्थी उत्तीर्ण भएका छन् । लुम्बिनीबाट ९७ हजार ६८७ जना विद्यार्थी उत्तीर्ण भएका छन् । कोशी प्रदेशबाट ४७ हजार ८३५, मधेस प्रदेशबाट ५९,७४९, गण्डकी प्रदेशबाट ४७,८४९, कर्णाली प्रदेशबाट ४६ हजार ४५५ र सुदूरपश्चिम प्रदेशबाट ५९, ८०४ विद्यार्थी उत्तीर्ण भएका छन् ।
पुनर्योगका लागि असार २३ गते भित्र आवेदन दिन सकिने
एसइईको नतिजामा चित्त नबुझे २३ असार भित्र पुनर्योगका लागि आवेदन दिन सकिने बताएको छ । प्रकाशित नतिजामा चित्त नबुझेमा पुनर्योग गर्न र उत्तरपुस्तिका पुनः परीक्षण समेत गराउन सक्ने व्यवस्था रहेको बोर्डले जनाएको छ ।
पुनर्योगका लागि परीक्षार्थीलाई अनलाइनमार्फत आवदेन गर्न सकिने व्यवस्था गरिएको बाेर्डले जनाएकाे छ । परीक्षार्थीले आफूले पुनर्योग गर्न चाहेका विषयका लागि यस कार्यालयको वेबसाइटमा गई पुनर्योग फाराम भरी आवेदन गर्न सक्ने बोर्डले भनेको छ । पुनर्योगका लागि २३ असार बेलुका ५ बजेसम्मको समय बोर्डले तोकेको छ ।
चितवन । चितवनको रत्ननगरनगरपालिका स्थित भद्रकाली माध्यमिक विद्यालयमा राष्ट्रिय सेवादल (एनसिसी) तालिम सुरु भएको छ । नेपाली सेनाले सञ्चालन गर्ने उक्त तालिम सोमबारबाट सुरु भएकाे हाे ।
रत्ननगर नगरपालिका वडा नं. १६ हात्तिगाडेमा रहेको उक्त विद्यालयमा सुरु भएको तालिमको नयाँ सबुज गण भरतपुरका सेनानी जित बहादुर थापा र वडाध्यक्ष हेमराज थापाले उद्घाटन गरे। उद्घाटन कार्यक्रममा वडाध्यक्ष थापाले अनुशासित विद्यार्थीले देशको भविष्य सुन्दर बनाउन सक्ने भन्दै अनुशासनलाई प्राथमिकतामा राखेर तालिम पुरा गर्न सहभागीहरुलाई आग्रह गरे ।
सेनानी जित बहादुर थापाले युवामा अनुशासित, बफादारिता तथा इमान्दारिताका साथै राष्ट्रिय एकताको भावना विकास गर्न सेनाले तालिम सञ्चालन गर्दै आएको जानकारी दिए । यसैगरी उपसेनानी विशाल जीसीले तालिमको महत्व र उद्देश्य बारे प्रकाश पारेका थिए। युवामा व्यक्तित्व विकास तथा क्षमता अभिवृद्धि गरी असल नागरिक बनाएर राष्ट्र विकासमा सहयोग पुगोस भन्ने उद्देश्यले तालिम संचालन गरिएको उनले बताए ।
सय कार्य दिनकाे उक्त तालिम ७९ दिनसम्म विद्यालयमा सञ्चालन हुनेछ भने २१ दिन राष्ट्रिय सेवा दलको मध्य तालिम शिक्षालयमा नवलपरासी हात्तीखोरमा सञ्चालन हुनेछ । तालिममा ३० जना विद्यार्थी सहभागी छन् ।
मकवानपुर । मकवानपुरकाे पुरानो विद्यालय भुटनदेवी माध्यमिक विद्यालयले शिक्षकलाई सम्मान गरेकाे छ । हेटौंडा–४ स्थित विद्यालयले नव आगन्तुक विद्यार्थीका साथै उनीहरुका अभिभावकलाई स्वागत समेत गरेको छ ।
बिहीबार विद्यालयले नवआगन्तुक विद्यार्थी स्वागत तथा शिक्षक सम्मान कार्यक्रममा गरेकाे हाे । शैक्षिकसत्र २०८० को एसइई परीक्षामा ४ जीपीए ल्याउन सहयोग गर्ने विषयगत शिक्षक र विषयगतरुपमा ९० प्रतिशत भन्दा बढी विद्यार्थी उत्तीर्ण भएका विषयका शिक्षक समेत गरी १० जनालाई सम्मान गरिएकाे हाे । शिक्षकहरुलाई जनही ५ हजार १ सय रुपैयाँ नगदसहित सम्मान गरिएको विद्यालयका प्रधानाध्यापक माधव दाहालले जानकारी दिए ।
दाहालका अनुसार पालिकास्तरीय परीक्षा २०८१ मा ४ जीपीए ल्याउने ४ जना विद्यार्थीलाई जनही ५ हजार रुपैयाँ नगदसहित सम्मान गरिएको हाे । कार्यक्रममा विद्यालयका सहायक प्रधानाध्यापक भरत पोख्रेलले विद्यालयको वस्तुस्थितिबारे जानकारी गराएका थिए । कार्यक्रममा विद्यार्थी र अभिभावकको आचारसंहिता समेत जानकारी गराइएकाे थियाे ।
भुटनदेवी माध्यमिक विद्यालयमा चालु शैक्षिकसत्र २०८२ मा ४ सय जना नयाँ विद्यार्थी भर्ना भएका उनले बताए । कार्यक्रममा विद्यार्थीले नृत्य तथा गायन कला प्रस्तुत गरेका थिए । विद्यालय व्यवस्थापन समितिका सदस्य नारायण तिमल्सिनाको अध्यक्षता तथा बागमती प्रदेश सभा सदस्य एकालाल श्रेष्ठको प्रमुख आतिथ्यमा भएकाे कार्यक्रममा हेटौंडा ४ नम्बर वडाध्यक्ष नवीन सिग्देललगायतकाकाे आतिथ्यता रहेको थियो ।