मकवानपुर । बागमती विश्वविद्यालयको उपाध्यक्षमा कुसुमराज सुवेदी नियुक्त भएका छन् । मङ्गलवार बसेको बागमती विश्वविद्यालयको कार्यकारी परिषद्ले सुवेदीलाई उपाध्यक्ष पदमा नियुक्त गरेको हो ।
उपाध्यक्ष विश्वविद्यालयको प्रशासकीय प्रमुख हुने व्यवस्था छ भने उपाध्यक्षको नियुक्ति संरक्षक समितिले गठन गरेको छनौट समितिले सिफारिस गरेका तीन जना उम्मेदवारमध्येबाट कार्यकारी परिषद्ले गर्ने व्यवस्था छ । सोही व्यवस्थाअनुसार संरक्षक समितिले सुवेदीलाई जिम्मेवारी दिएको हो ।
विधानत उपाध्यक्षको पदावधि ४ वर्षको रहने व्यवस्था गरिएको छ ।
उनीसहित ५ जनालाई उपाध्यक्ष नियुक्तिका लागि सिफारिस समितिले सर्ट लिष्ट गरेको थियो । सो लिस्टमा खेमराज जोशी, देवचन्द्र मानन्धर, धर्मदत्त तिवारी र शिवराज सन्जेल समावेश रहेका थिए ।
चितवन खैरहनी–५ निवासी सुवेदी करिब २० वर्षदेखि शिक्षण पेसामा आबद्ध छन् । खैरहनी–३ स्थित सहिद स्मृति बहुमुखी क्याम्पसमा अध्यापन गराउँदै आएका सुवेदीले त्रिभुवन विश्वविद्यालयबाट शिक्षा शास्त्र संकायको शिक्षाशास्त्र तथा पाठ्यक्रम मूल्याङ्कन अन्तर्गत पेडागोजी विषयमा विद्यावारिधि गरेका छन् ।
मकवानपुर । बागमती प्रदेशका उत्कृष्ट विद्यालयहरुलाई पुरस्कृत गरिएको छ । राष्ट्रिय शिक्षा दिवस २०८१ को अवसरमा प्रदेशको शिक्षा विकास निर्देशनालय हेटौंडाले बुधबार उत्कृष्ट बिद्यालयलाई हेटौडामा पुरस्कृत गरेकाे हाे ।
निर्देशनालयले ५ सामुदायिक र ५ संस्थागत विद्यालयलाई नगदसहित पुरस्कृत गरिएको हो । शिक्षा विकास निर्देशनालयले छनौट गरेका सामुदायिक तर्फका मेघा माध्यमिक विद्यालय तेखापुखु भक्तपुर, बलम्बु माध्यमिक विद्यालय चन्दागिरि नगरपालिका काठमाडौँ, पृथ्वी माध्यमिक विद्यालय विदुर–४ नुवाकोट, तरुण माध्यमिक विद्यालय बालाजु काठमाडौं र श्रम राष्ट्रिय माध्यमिक विद्यालय कुमारीगाल काठमाडौं उत्कृष्ट भएका थिए ।
त्यस्तै संस्थागत तर्फका ह्विज किड्स इन्टरनेशनल स्कुल बालुवाटार काठमाडौं, रिलायन्स इन्टरनेशनल एकेडेमी बुढानीलकण्ठ काठमाडौं, गोकर्णेश्वर लाइट एकेडेमी गोकर्णेश्वर काठमाडौं, शाकरी स्कुल छाउनी काठमाडौं र माउन्ट ग्लोरी इङ्ग्लिस बोर्डिङ हाइस्कुल उत्कृष्ट भएका थिए । उत्कृष्ट सामुदायिक र संस्थागत विद्यालयहरूलाई क्रमशः १ लाख रुपैयाँ, ८० हजार, ७० हजार, ६० हजार र ५० हजार रुपैयाँ सहित पुरस्कृत गरिएको थियो ।
कार्यक्रममा दिवसको अवसरमा आयोजित निबन्ध लेखन प्रतियोगिताको प्रथम, द्वितीय र तृतीय स्थान हासिल गर्ने विद्यार्थीहरूलाई पनि पुरस्कृत गरिएको छ । निवन्ध लेखन प्रतियाेगितामा स्कृति चौलागाई बाँसबारी माध्यमिक विद्यालय काठमाडौं प्रथम, सुमना बुढाथोकी स्याउरी भूमि माध्यमिक विद्यालय शिवपुरी नुवाकोट द्वितीय, अविना कार्की भालेश्वर माध्यमिक विद्यालय पनौती काभ्रे तृतीय भएका थिए ।
प्रथम द्वितीय र तृतीयलाई क्रमशः १० हजार, ८ हजार र ५ हजार नगदसहित मुख्यमन्त्री बहादुर सिंह लामा, सामाजिक विकास मन्त्री हरिप्रभा खड्गी, शिक्षा विकास निर्देशनालय हेटौंडाका निर्देशक दिपेन्द्र सुवेदी लगायतकाले पुरस्कृत गरेका थिए ।
मकवानपुर । हेटौंडा–७ स्थित आशा विशेष पाठशाला तथा पुर्नस्थापना केन्द्रको व्यवस्थापनमा आफूले सहयाेग गर्ने बागमती प्रदेशका आर्थिक मामिला तथा योजना मन्त्री कुन्दन राज काफ्लेले बताएका छन् ।
शारीरिक अशक्त बालबालिकाहरुको लागि सरकारले गर्नुपर्ने दायित्व आशा विशेष पाठशालाले निर्वाह गरेको बताउँदै मन्त्री काफ्लेले आगामी दिनमा आफूले नीतिगत रुपमै सहयाेग गर्ने बताए । विहीबार भवन समुद्घाटन कार्यक्रममा बोल्दै मन्त्री काफ्लेले अशक्त बालबालिकाहरुको क्षेत्रमा आशा विशेष पाठशालाले गरेको कामको प्रसंशा गरे ।
आउँदो दिनहरुमा प्रदेश सरकारले नीतिमा आधारित बजेट छुट्टयाउने प्रतिबद्घता समेत उनले प्रकट गरे । ‘कस्तो विडम्बना छ, एकातिर नेपाली युवाहरुको विदेशिने लहर छ । अर्कोतिर विदेशी चेलीले हाम्रो देशमा आएर समाज सुधार अभियान चलाईरहेकी छन्’, मन्त्री काफ्लेले भने, ‘अब हाम्रो देश बनाउनेतर्फ सरकारसँगै युवाहरुले पनि हातेमालो गर्न जरुरी छ ।’
हाल आशा फाउण्डेशनले हेटौंडासँगै ललितपुरको सानेपामा आशा विशेष पूर्व व्यवसायिक शिक्षा तथा सिपमुलक तालिम केन्द्र सञ्चालन गरी १८ वर्ष माथिका शारीरिक तथा बौद्धिक अपाङ्गता भएका विद्यार्थीलाई शिक्षा प्रदान गर्दै आएको छ ।
जन्मजात बौद्धिक अपाङ्ग भएका बालबालिकाको संरक्षण, हेरचाह, शिक्षालगायतको काम गदै आएको आशा विद्यालयलाई बागमती प्रदेश सरकार र आर्थिक मामिला मन्त्री काफ्लेको प्रतिबद्घता अनुसार आवश्यक सहयोग प्राप्त हुने कुरामा आफूहरु विश्वस्त रहेको आशा विशेष पाठशालाका अध्यक्ष बालकृष्ण चौलागाईंले बताए ।
कसरी स्थापना भयाे पाठशाला ?
आशा विशेष पाठशाला तथा पुर्नस्थापना केन्द्रको सञ्चालक संस्था सि आशा फाउन्डेशनकी संरक्षक आइना बार्का पढाइको सिलसिलामा पहिलो पटक सन् २०१२ मा नेपाल आएकी थिइन् । युनिभर्सिटी अफ बार्सिलोनामा ‘सोसल वर्क’ पढिरहेकी आइना त्यतिबेला २१ रहेकी उनी बताउँछिन् ।
आफ्नो देशमा पनि बौद्धिक अपाङ्गता भएकाहरूसँग काम गरिरहेकी आइना यस्तै व्यक्तिबारे थप जानकारी लिने उद्देश्यले नेपाल आएकी बताइन् । तर, पहिलोपटक नेपाल भ्रमण गरेपछि उनको जीवन नै परिवर्तन भएको आइनाको भनाइ छ । उनी भन्छिन, ‘पहिलो पटक म हेटौँडा आउँदा अशक्त बालबालिकाको लागि पढ्ने विद्यालय नै थिएन । हेटौंडामा भन्दा पनि, पूरै मकवानपुर जिल्लामै विद्यालय नभएको कारणले बालबालिकाहरू सधैँ घरमा बस्थे । उनीहरूको काम सुत्ने र खाने मात्रै थियो ।’
त्यस लगतै उनी स्पेन फर्किन । स्पेन फर्केको १५ दिनपछि नै नेपाल फर्कन्छु भनेर उनले सोच बनाइन् । तर, आइनालाई नेपाल फिर्ता हुन आठ महिना लाग्यो । त्यस अवधिभर उनले स्पेनमा दर्ता गरेको संस्थामार्फत् पैसा सङ्कलन गर्न थालिन् । उनले रकम संकलनको क्रममा स्पेनका अधिकांशलाई नेपाल कहाँ हो भन्ने पनि थाहा नभएकोले पैसा जुटाउन निकै असहज भएको आफ्नो त्यो अनुभव सुनाइन् ।
यसरी सङ्कलन भएको पैसा बोकेर उनी नेपाल फर्किइन् । एउटा सुन्दर संसार बनाउनका लागि अशक्त बालबालिकाहरुको क्षेत्रमा आफ्नो पनि केही योगदान होस् भन्ने चाहना बोकेर आइना सुरुमै हेटौँडा आइन् ।
सन् २०१३ को डिसेम्बरमा आइनाले हेटौँडामा आशा विशेष पाठशाला खोलिन् । यो स्थापना गर्दाको सुरुवाती समय स्मरण गर्दै उनले त्यसबेला आफू विदेशी र एक्ली महिला भएकै कारण भेदभाव सहनुपरेको बताइन् । तर, करिब २ दुई महिनाको निरन्तर संघर्ष पश्चात् अन्ततः उनी सफल भइन् ।
मकवानपुर । मकवानपुरकाे हेटौंडा अस्पताललाई पुस्तक हस्तान्तरण गरिएको छ । अन्तर्राष्ट्रिय साक्षरता दिवसको अवसरमा आइतबार अस्पताललाई ८० थान पुस्तक हस्तान्तरण गरिएकाे हाे ।
समृद्ध समाज दैनिक र सचेत नागरिक युवा समूहले हेटौंडा अस्पताललाई पुस्तक हस्तान्तरण गरिएको हो । अस्पताल भर्ना भएर उपचाररत विरामी र कुरुवालाई अध्ययनको अवसर प्राप्त होस् भनी पुस्तक हस्तान्तरण गरिएकाे युवा समूहका अध्यक्ष शिवनारायण श्रेष्ठले बताए । हेटौंडा अस्पतालको साधारण वार्ड र हाडजोर्नी वार्डमा २०/२० थान तथा बालबालिका वार्डमा ४० थान पुस्तक हस्तान्तरण गरिएको समृद्ध समाज दैनिकका सम्पादक सुरेश श्रेष्ठले जानकारी दिए ।
पुस्तक हस्तान्तरण पछि पठन संस्कृतिको विकास गर्न र विरामी र कुरुवाले पुस्तक अध्ययन गरेर सकारात्मक मनस्थिति विकास गर्न सहयोग पुग्ने अपेक्षा गरिएको सम्पादक श्रेष्ठले बताए । सम्पादक श्रेष्ठ र अध्यक्ष श्रेष्ठसहितको टोलीले हेटौंडा अस्पतालका निर्देशक प्राडा. धिरेन्द्र गिरी, अस्पताल सञ्चालन तथा व्यवस्थापन समितिका सदस्यद्वय उत्सव राज चौलागाई र हीरा वाईबाको उपस्थितिमा तीनवटै वार्डमा पुस्तक हस्तान्तरण गरेको हो ।
यसअघि समृद्ध समाज दैनिकको वार्षिकोत्सवको अवसरमा हेटौंडा अस्पतालको तीनवटै वार्डका लागि पुस्तक हस्तान्तरण गरिएको थियो ।
चितवन । चितवनकाे नारायणगढमा रहेकाे सम्पूर्ण किताबले आफ्नाे स्थापनाकाे दिन एक जना छात्रालाई शैक्षिक सामग्री सहयाेग गर्ने भएकाे छ ।
भदौ २३ गते आइतबार सम्पूर्ण किताब नारायणगढको बार्षिकोत्सवमा कविलास मावि भरतपुर-२९ जुगेडीमा कक्षा ७ मा अध्ययनरत सीमा गुरुङलाई शैक्षिकसामग्री सहयाेग गर्ने भएकाे हाे । २०७५ सालमा स्थापना भएकाे सम्पूर्ण किताबले स्थापना वर्षसँगै सामुदायिक विद्यालयमा अध्ययनरत एक जना छात्रालाई शैक्षिक सामग्री दिदै आएकाे संचालन लेखराम सापकाेटाले जानकारी दिए ।
उक्त कार्यक्रम सुरु भएकाे यस वर्ष ७ औं वर्ष पनि हामीले उक्त कार्यक्रमलाई निरन्तरता दिइएकाे उनले बताए । सम्पूर्णमा एक समारोहबीच बिहान गुरुङ्गलाई शैक्षिक सामग्री उपलब्ध गराइने छ । विद्यालयले छनौट गरेर सिफारिस गरेकाे आधारमा प्रत्येक वर्ष सहयाेग गरिदै आएकाे सापकाेटा बताउँछन् ।
यसअघि सम्पूर्णले उद्घाटन वर्ष २०७५ मा १ जना तथा स्थापना दिवसमा ४ जना गरी ५ जना छात्रालाई शैक्षिक सामग्री सहयाेग गरेकाे छ । स्थापना वर्षमा नारायणी मावि गैंडाकोट-७ मा कक्षा ४ मा पढ्दै गरेकी ममता चितौरेलाई सहयाेग गरेकाे कार्यक्रम सुरु गरिएकाे उनले जानकारी दिए । यसैगरी २०७६ सालमा रामनगर मावि भरतपुर-१ मा कक्षा ७ मा पढ्दै गरेकी अस्मिता विक, २०७८ सालमा राष्ट्रिय आधारभूत विद्यालय इच्छाकामना- ७ खेतबारीमा कक्षा ६ मा पढ्दै गरेकी रञ्जिता चेपाङ, २०७९ सालमा दुर्गा मावि बाह्रघरे भरतपुर-४ मा कक्षा ९ मा पढ्दै गरेकी ओमकुमारी थापा र २०८० सालमा देउराली राष्ट्रिय आधारभूत विद्यालय इच्छाकामना-७ मा कक्षा ७ मा पढ्दै गरेकी विमला तामाङलाई शैक्षिक सामग्री गरिएकाे हाे ।
‘सामाजिक उत्तरदायित्व अन्तरगतकाे सहयाेग गर्ने गरिएकाेमा २०७७ सालमा कोभिडका कारण कार्यक्रम गर्न सकिएन’ सापकाेटाले भने । चितवन र नवलपरासीका सामुदायिक विद्यालयलाई यो कार्यक्रममा समेट्ने गरिएकाे उनले बताए । वार्षिकोत्सव कार्यक्रमसँगै दशैँ – तिहार पुस्तक मेलाको शुभारम्भ समेत गरिने भएकाे छ । मेलामा विशेष सहुलियतमा किताब बिक्रीवितरण हुने उनले बताए ।