मकवानपुर । मकवानपुरबाट १६६ जना कैदीबन्दी नियन्त्रणमा लिइएको छ । देशका विभिन्न कारागार तथा बाल सुधारगृहबाट भागेकाहरु मध्ये नेपाल प्रहरी, नेपाली सेना र सशस्त्र प्रहरी बलको संयुक्त प्रयासमा उनीहरूलाई मकवानपुरको विभिन्न स्थानबाट नियत्रणमा लिइएकाे हाे ।
भिमफेदी कारागारबाट भागेका ४४० कैदीबन्दी मध्ये ७८ जनालाई पक्राउ गरिएको जिल्ला प्रहरी कार्यालय मकवानपुरले जनाएकाे छ । प्रहरीका अनुसार भिमफेदी कारागारका ३६२ जना कैदीबन्दी अझै फरार रहेका छन् । भिमफेदी कारागारमा एक नाबालकसहित कुल १ हजार ६६ जना कैदीबन्दी रहेको जिल्ला प्रहरी कार्यालय मकवानपुरका प्रवक्ता श्यामु अर्यालले जनाकारी दिए ।
प्रवक्ता एवम् प्रहरी नायव उपरीक्षक अर्यालका अनुसार मकवानपुरस्थित बाल सुधार गृहबाट भागेका ७२ जना मध्ये ४१ जनालाई नियन्त्रणमा लिइएको छ भने ३१ जनाको खोजी कार्य जारी छ । उक्त बाल सुधार गृहमा कुल ९४ जना रहेका थिए । काठमाडौं उपत्यकाका विभिन्न कारागारबाट भागेका कैदी बन्दीहरुलाई पनि मकवानपुरबाट प्रहरीले पक्राउ गरेको छ । नख्खु कारागारबाट भागेका मध्ये ७ जना र जगन्नाथदेवलस्थित केन्द्रीय कारागारबाट भागेका २ जनालाई नियन्त्रणमा लिइएको छ ।
कास्की कारागारबाट भागेका १ जना र तनहुँ जिल्ला कारागारबाट भागेका २ जनालाई नियन्त्रणमा लिइएको सुरक्षा निकायले जनाएको छ । प्रहरीले नियन्त्रणमा लिइएका ३५ जना कैदीबन्दी कुन कारागारबाट भागेका हुन् भन्ने खुल्न बाँकी रहेको प्रवक्ता अर्यालले बताए । उनीहरूको पहिचान गर्ने कार्य भइरहेको छ ।
मकवानपुर । मकवानपुरको हेटौंडा–११ थानाभर्याङमा रहेको बालसुधार केन्द्रबाट एकैचोटि ७२ जना बालकहरु भागेका छन् । बुधबार दिउँसो ३ बजे उनीहरु भागेको प्रहरीले जनाएको छ । गृहमा ९४ जना बालकहरु रहेको थिए । अपराधिक गतिविधिमा संलग्न बालकहरू सुधारको लागि राखिएका थिए ।
बालसुधार गृह मकवानपुरका कार्यालय प्रमुख प्रदीप गौतमका अनुसार बालसुधार गृहको संरचना तोडेर उनीहरू फरार भएका हुन् । घटनापछि सुरक्षा निकायहरू, प्रहरी टोली तथा सरोकारवाला निकायहरू सक्रिय भएका छन् र फरार बालकहरूको खोजी कार्य तीव्र पारिएको बताइएको छ ।
यता मकवानपुरको भिमफेदी गाउँपालिका वडा ६ मा रहेको भिमफेदी कारागारका कैदी बन्दीहरु पनि भागेका छन् ।
कारागारको ख ब्लकमा रहेको कैदी बन्दी पर्खाल फुटाई भागेका हुन् । कारागारमा रहेका कैदी बन्दीहरु मध्ये अन्दाजी ४ सय जना मुख्य गेटबाटै भाग्ने कोशिस गरेपछि कारागार सुरक्षा बेशमा खटिएको सुरक्षा निकायले ५ राउण्ड ग्यास सेल फायर गरेको थियो । मंगलबार राती २५९ जना कैदी बन्दी फरार रहेका थिए । बुधबार दिउँसो फेरी १६९ जना फरार भएको कारागार प्रशासनले जनाएको छ । अब यस कारागारमा ६२६ जना बाँकी रहेको बताइएको छ ।
रेकर्ड सबै खरानी सेना परिचालनपछि चकमन्न हेटौंडा
जेनजीको आन्दोलपछि आगजनी गरिएको हेटौंडा खण्डहर बनेको छ । बागमती प्रदेशको राजधानी हेटौडाको सबै मन्त्रालयहरु, सरकारी कार्यालयहरु, विभिन्न दलका नेतृत्वको निजी घरहरु तोडफोड र आगजनी गरिएको छ ।
हेटौँडा उपमहनगरपालिकाको विभिन्न वडा कार्यालयका समेत महत्वपूर्ण कागजातहरु जलेर खरानी भएका छन् । जिल्ला प्रशासन कार्यालय मकवानपुर मात्र सग्लो रहेको हेटौंडामा प्रदेश सरकारका अधिकांश मन्त्रालयहरु तोडफोड तथा आगजनी गरिएको छ । मुख्यमन्त्री तथा मन्त्रिपरिषद्को कार्यालय, लोकसेवा आयोगका संघीय र प्रदेश कार्यालय समेत जलेका छन् । मकवानपुर जिल्ला अदालतको भवनसहित कागजात जलेर नष्ट भएका छन् ।
यि कागजसँगै इतिहास तथ्याङ्कहरु खरानी भएका छन् । जेनजी पुस्ताको माग अनुसार भ्रष्टाचार विरुद्धको छानविनको लागि समेत नापि, मालपोत, अख्तियार कार्यालयहरुको रेकर्ड खरानी भएका छन् ।
प्रदेशसभा सचिवालयका दुईवटा भवन जलेर नष्ट भएका छन् । हेटौँडा उपमहानगरपालिका कार्यालयको आगो बुधबार दिउँसोसम्म पूर्णरुपमा निभाउन सकिएको छैन । जिल्ला ट्राफिक कार्यालय मकवानपुरको कार्यालयमा समेत आगजनी भएको छ । भाटभटेनी स्टोरदेखि निजी घरमा समेत आगजनी र तोडफोड भएका छन् ।
मकवानपुर । देशभर एकैपटक नयाँ पुस्ता (जेनजी) नेतृत्वमा सुरु भएको आन्दोलन मकवानपुरमा पनि जारी छ । सामाजिक सञ्जाल बन्द, भ्रष्टाचार विरुद्ध लगायतको सवालमा तीव्र बनाइएको आन्दोलनले मकवानपुरको हेटौंडामा आज बिहान १० बजेदेखि नगरपालिका रोड हुँदै बुद्धचोकसम्म शान्तिपूर्ण र्याली निकालेको थियो ।
भ्रष्टाचार, असमानता र प्रशासनिक दुरुपयोगविरुद्ध जनचेतना फैलाउने र सरकारी निकायलाई जवाफदेही बनाउन दबाब सिर्जना गर्ने उद्देश्यले सुरु गरिएकाे आन्दोलनमा अहिले हेटौडाको बुद्धचोकमा प्रदर्शनकारीहरुको संङ्ख्या बढ्दो छ । हालै सरकारले फेसबुकसहित २६ वटा सामाजिक सञ्जाल बन्द गरेपछि युवाहरू आक्रोशित बनेका छन्।
प्रतिबन्ध लगाइएको सन्दर्भमा टिकटक भने खुला रहेकाले त्यही प्लेटफर्ममार्फत आन्दोलनको घोषणा गरिएको हो। विशेषगरी टिकटकमा ‘नेपो बेबी ट्रेण्ड’ ले तहल्का मच्चाइरहेको छ, जहाँ नेताका छोराछोरीको आलिशान जीवनशैलीमाथि युवाहरूले प्रत्यक्ष प्रश्न उठाएका छन्। ‘करप्ट पोलिटिसियन चाइल्ड’ शीर्षकमा हजारौं भिडियो बनेका छन्। ती भिडियोमा यस्तो सन्देश दिइएको छ| देशभर एकैपटक जेनजी नेतृत्वमा सोमबारदेखि सुरु हुने भ्रष्टाचारविरोधी आन्दोलनको उत्रेका हुन् ।
काठमाडौंमा कर्फ्यू
जेनजी प्रदर्शनी निषेधित घेरा तोड्न थालेपछि काठमाडौंमा कर्फ्यू लगाइएको छ । जिल्ला प्रशासन कार्यालयले काठमाडौँका निश्चित स्थानमा कर्फ्यु आदेश जारी गरेको छ । दिउँसो १२ः३० बजेदेखि राति १० बजेसम्मका लागि कर्फ्यु आदेश जारी भएको हो ।
जिल्ला प्रशासन कार्यालयले जारी गरेको सूचना अनुसार नयाँ बानेश्वर चोकदेखि पश्चिम एभरेस्ट होटल हुँदै बिजुली बजारसम्म, बानेश्वर चोकदेखि पूर्वतर्फ मिन भवन, शान्तिनगर हुँदै तीनकुने चोकसम्म, बानेश्वरदेखि उत्तर आइप्लेक्स मल हुँदै रत्नराज्य माध्यमिक विद्यालयसम्म र बानेश्वर चोकदेखि दक्षिण शंखमुल ओरालो हुँदै शंखमुल पुलसम्म कर्फ्यु आदेश जारी गरिएको उल्लेख छ ।
मकवानपुर । मकवानपुरकाे हेटौंडा उपमहानगरपालिकामा चट्याङ लागेर १ जनाकाे मृत्यु भएकाे छ । शुक्रबार राती हेटौंडा –१५ कमेरोपानीमा चट्याङ लागेर हेटौंडा–१६ सानो आकाशधाराका ३७ वर्षीय बुद्ध बहादुर प्रजाकाे मृत्युकाे मकवानपुर प्रहरीले जनाएकाे छ ।
मकवानपुर जिल्ला प्रहरी कार्यालयका प्रवक्ता श्यामु अर्यालका अनुसार चट्याङ लागेर हाल बारा निजगढ नगरपालिका–१३, बस्ने प्रजाको घटनास्थलमा नै मृत्यु भएको हो । स्थानीय धनबहादुर स्याङतानले सञ्चालन गरेको किराना पसलमा दैनिक उपभोगका सामान खरिद गर्न गएका बेला चट्याङ लागेर उनकाे मृत्यु भएको हो । प्रहरीका अनुसार शव परीक्षणका लागि हेटौंडा अस्पताल ल्याइएकाे छ ।
