मकवानपुर । जिल्ला प्रहरी कार्यालय मकवानपुरले १ सय ६ किलाे अवैध लागु औषध गाँजा सहित ४ जान व्यक्ति र एउटा ट्रक नियन्त्रणमा लिएको छ ।
प्रहरीका अनुसार ९५ किलो गांजा सहित ना ८ ख २५४२ नम्बरको ट्रक नियन्त्रणमा लिएको हो । बिशेष सुचनाको आधारमा जिल्ला प्रहरी कार्यालय मकवानपुरबाट खटिएको प्रहरी टोलीले मकवानपुर जिल्ला हेटौंडा उपमहानगरपालिका ११ बाट ना ८ ख २५४२ नम्बरको ट्रक नियन्त्रणमा लिएको हो ।
ट्रकको पछाडीको भाग भित्र ६ वटा पोकामा ९५ किलो लागु औषध गांजा फेला परेको प्रहरीले जनाएको छ । ट्रक चालक फरार रहेको र प्रहरीले जनाएको छ ।
यसैबिच प्रहरीले ११ किलो २०० ग्राम लागु औषध गांजा सहित ३ जनालाई नियन्त्रणमा लिएको छ । हेटौंडाको ११ बाटै गाँजा बरामद गरेको हो । ना २ ह २३६३ नम्बरको अटोलाई रोकी चेकजांच गर्दा उक्त अटोको सिट पछाडीको खाली भागमा तयारी गांजा फेला परेको प्रहरीले जनाएको छ ।
प्रहरीले अटो चालक हेटौंडा १९ बस्ने ६० बर्षिय प्रेम बहादुर थिङ र सोही अटोमा रहेका हेटौंडा ३ का अन्य दुई जना महिलालाई नियन्त्रणमा लिएको छ ।
यसैगरी १५० मिलि ग्राम लागु औषध खैरोहेरोईन जस्तो देखिने कालो धुलो पदार्थ सहित मकवानपुर प्रहरीले अर्को १ जनालाई नियन्त्रणमा लिएको छ ।
हेटौंडा ११ नमुना टोल स्थित सडक खण्डमा शंकास्पद रुपमा हिडिरहेका स्थानीय २४ वर्षिय बिशाल बिश्वकर्मालाई प्रहरीले नियन्त्रणा लिएको हो । विश्वकर्मामाथि अनुसधान भैरहेको प्रहरीले जनाएको छ ।
मकवानपुर । मकवानपुरको हेटौडा उपमहानगरपालिका–४ मा रहेको राष्ट्रिय सूचना प्रविधि केन्द्रमा (डिजास्टर रिकभरी सेन्टर) लागेकाे आगाे नियन्त्रणमा आएकाे छ । नेपाल सरकार सञ्चार तथा सूचना प्रविधि मन्त्रालय अन्तर्गतकाे राष्ट्रिय सुचना प्रविधि केन्द्र (डिजास्टर रिकभरी सेन्टर) मा भएको आगलागी करिब डेढ घण्टाको प्रयास पछि नियन्त्रणमा लिइएको हाे ।
सेन्टरको व्याकअप व्याट्रीमा करेन्ट सर्ट हुदाँ आगोलागी भएको अनुमान गरिएको छ । हेटौंडा उपमहानगरपालिकाको दमकल, र सुरक्षाकर्मीको उपस्थितिमा आगो नियन्त्रणमा लिइएको थियो । उक्त कोठाभित्र ४ सय ८० वटा व्यकअप ब्याट्री रहेको बताइएको छ । घटनापछिको विस्तृत क्षति विवरण आउन बाँकी रहेको छ ।
यो केन्द्र सिंहदरबारको तथ्याङ्कीय ब्यकअप हो । काठमाडौंको सिंहदरबारमा रहेको तथ्याङ्कीय ब्याकअप डाटासेन्टर मकवानपुरको हेटौंडामा ३ वर्ष अघि स्थापना गरिएको हो । कोरियाली सरकारको सहयोगमा ३७ करोडको लगानीमा तय भएको डाटा सेन्टर ३१ जेठ २०७७ मा नेपाल सरकारका सूचना तथा सञ्चारमन्त्री गोकुल बाँस्कोटाले उद्घाटन गरेका थिए ।
सरकारी तथा निजी क्षेत्रका महत्वपूर्ण सूचनाको सुरक्षा र तिनीहरूको व्यावसायिक विवरणमा सेन्टरले सहयोग गर्ने गरी यसको स्थापना गरिएको हो । सिंहदरबारको डाटा सेन्टरको डाटा कुनै प्रकोपको कारण नष्ट भएमा त्यसको ब्याकअपको रुपमा सुरक्षित गर्न यो डाटा सन्टेर निर्माण गरिएको हो । हेटौंडाको हुप्रचौरस्थित नगर विकास समितिको १० कठ्ठा जग्गामा डाटा सेन्टर निर्माण भएको छ ।
डाटा सेन्टरमा राष्ट्रिय परिचयपत्र, मेसिन रिडेबल पासपोर्ट, ईप्रोक्युरमेन्ट, विद्युतीय हस्ताक्षर, ईकस्टमलगायतका सरकारी डाटाहरु सुरक्षित रहने बताइएकाे छ । सिंहदरबारको डाटा सेन्टर पनि कोरियाकै सहयोगमा निर्माण गरिएको हो ।
मकवानपुर । मकवानपुर जिल्लाको भीमफेदी गाउँपालिका ६ जुरीखेतमा विहीबार दिउँसो बस दुर्घटनामा ज्यान गुमाएका २ जनाको अझै पहिचान खुलेका छैन ।
दुर्घटनामा मृतक ७ जना मध्य अहिले सम्म ५ जनाको पहिचान भएको छ । अरु २ जनाको अझै पहिचान खुल्न सकेको छैन । मृतक मध्यमा नुवाकोट घर भएका ३३ वर्षीय रघुराज न्यौपाने, बाराका ३३ बर्षीय अब्दुल्लाहा मिया ठकुराई, बारा जितपुरका २५ बर्षिय शेख अरमान, मकवानपुर गढी–२ का ४३ वर्षीय मदन बिक र विरगंज ३१ पर्साका ४२ वर्षीय हृदय नारायण पंजियार रहेको मकवानपुरका प्रहरी प्रवक्ता टेकबहादुर कार्कीले बताए ।
काठमाडौंबाट हेटौंडाका लागि छुटेको ना ३ ख ७८५८ नम्बरको बस भीमफेदीको आरोलोमा सडकबाट तल खसेर दुर्घटना भएको हो । ओरालो बाटोमा माथिल्लो घुम्तिबाट खसेको बस तल्लो घुम्तीमा पुगेर अड्डिएको छ । करीब ६० मिटर तल बस झर्दा बसमा सबार ६ जनाको घटना स्थलमै र एक जनाको उपचारार्थ हेटौंडा ल्याउँदै गर्दा बाटोमा ज्यान गएको थियो ।
दुर्घटना हुँदा बसमा ठोक्किएर बाराबाट काठमाडौं जाँदै गरेको मधेस प्रदेश–०३–००१ ज ०२७१ नम्बरको सुमोमा ठोक्किएको थियो ।
बस दुर्घटनामा घाइते भएका २५ जना मध्यमा १९ पुरुष, ४ महिला र २ बालिका रहेको प्रहरीले जनाएको छ । दुर्घटनामा ४ जना गम्भिर अवस्थामा रहेकाहरुलाई पुरानो मेडिकल कलेज भरतपुरमा उपचार भइरहेको छ । अरुको हेटौंडाका अस्पतालमा उपचार भइरहेको प्रहरीले जनाएको छ ।
मकवानपुर ।मकवानपुरको भिमफेदी गाउँपालिका ६ जुरीखेत र धादिङ जिल्लाको धादिङ्गबेशीमा भएको दुर्घटनाबाट ८ जनाको मृत्यु भएको बागमती प्रदेश प्रहरी कार्यालयले जनाएको छ ।
मकवानपुरको भिमफेदी– कुलेखानि–काठमाण्डौ सडक खण्डको भिमफेदी ६ जुरिखेतमा कुलेखानीबाट भिमफेदी तर्फ आउदै गरेको ना ३ख ७८५८ नम्बर को मिनीबस अनियन्त्रित भई सडक बाट अंन्दाजी ५० मिटर तल सडकमा खसेको थियो । दुर्घटनमा परी मृत्यु हुनेको संङ्ख्या ७ पुगेको छ ।
हेटौडाबाट काठमाण्डौ जादै गरेको मधेश प्रदेश ०३००१ ज ०२७१ नंम्बरको सुमोमा ठोकिंदा सुमोमा सवार समेत घाईते भएको र बसमा सवार ३० जना मध्ये ६ जनाको घटना स्थलमा नै र एक जनाको उपचार लागि लैजादै गर्दा बाटोमा मृत्यु भएको प्रहरीले जनाएको छ ।
यता धदिङ जिल्लामा भएको दुर्घटनामा परी एक स्कुले बालकको मृत्यु भएको छ । धादिङ बेशिबाट काठमाण्डौ जादै गरेको ग १ ख ४५६५ नंम्बरको बसले सोही स्थानको आदर्श चोकमा स्कुल जाँदै गरेको आदर्श स्कुलमा पढ्ने दिल बहादुर नेपालीको छोरा बर्ष ६ वर्षिय बिजय परियारलाई ठक्कर दिंदा बालकको घटना स्थलमै मृत्यु भएको प्रहरीले जनाएको छ ।
घटनाको बिषयलाई लिएर स्थानियबासीहरु आक्रोसित भई बाटो दुईतर्फि बन्द गर्नुका साथै बसमा आगजनी गरेको प्रहरीले जनाएको छ । आगो निभाउने क्रममा शसस्त्र प्रहरी राजमार्ग सुरक्षा आदमघाटबाट खटिएको टोलिले ग्याँस गन बाट १ सेल फायर गरेको जनाएको छ ।
मकवानपुर / मकवानपुर जिल्लाको भीमफेदी गाउँपालिकामा यात्रु बाहक बस दुर्घटना हुदा ६ जनाको ज्यान गएको छ ।
भिमफेदी गाउँपालिकाको जुरीखेत भन्ने स्थानमा यात्रु बहाक बस दुर्घटना हुदा घटना स्थलमै ६ जनाको ज्यान गएको भिमफेदी प्रहरीले जनाएको छ ।
काठमाडौंबाट हेटौंडा आउँदै गरेको बा ३ ख ७८५८ नम्बरको बसमा कति जना यात्रु सवार थिए भन्ने बारे खुल्न बाँकी रहेको छ । घाइते रहेकाको संख्या र मृतकको सनाखत समेत भएको छैन । दुर्घटनामा गम्भीर घाईतेहरुलाई काठमाडौं पठाईएको छ ।