मकवानपुर । मकवानपुरका कैलाश, राक्सिराङ, भीमफेदी र थाहा नगरपालिकामा लागु औषध गाँजा र अफिम खेती अवैध रुपमा हुँदै आएकाे छ । लागु औषध गाँजा तस्करीको त मकवानपुर ‘ट्रान्जिट प्वाइन्ट’ कै रुपमा रहेकाे छ । मकवानपुरमा लागु औषध उत्पादन तथा ओसारपसारले प्रत्येक वर्ष समस्या निम्त्याउने गरेकाे छ । नेपालकाे कानूनले समेत लागु औषधलाई अवैध भनेकाे छ ।
मकवानपुरका उक्त स्थानमा अवैध रुपमा लगाइएका गाँजा तथा अफिम खेती निर्मुल पार्न नेपाल प्रहरी र स्थानीय सरकारले योजना बनाएर काम गर्दा समेत असफल भएका छन् । फडानीकाे लागि वर्षकाे केही समयमात्र प्रहरी परिचालन हुने भएकाेले समेत गाँजा तथा अफिम उत्पादन बढ्दै गईरहेको देखिन्छ ।
मकवानपुरमा गाँजाको विरुवा उम्रेर उत्पादनको तयारी हुने समयमा सयौँ प्रहरी जिल्लाको गाँजा खेती हुने कैलाश, राक्सिराङ, भीमफेदीको उत्तरी क्षेत्र, थाहा नगरका केहि भागमा परिचालन हुन्छन् र फडानीले तिब्रता पाउँछ । तर समस्या भने घटनुको साटो दिनानुदिन बढेको देखिन्छ । गाँजा उन्मुलन गर्दै तरकारी खेतीतर्फ आर्कषणको लागि स्थानीय पालिका तथा प्रहरी प्रशासनले सयौँ सचेतना कार्यक्रम, तरकारीको विउ वितरण लगाएका कामहरु गर्दै आईरहेपनि मकवानपुरमा भने गाँजा रोप्ने, तस्करी गर्ने क्रम भने रोकिएको छैन् ।
प्रहरीले वर्षेनी मकवानपुरको राक्सिराङ र कैलाश गाउँपालिकाका विभिन्न स्थानमा लागुऔषध फँडानी गर्दै आएको छ तर ती क्षेत्रमा अझै पनि गाँजा र अफिमको अवैध खेती हुन भने राेकिएकाे छैन । बागमती प्रदेश प्रहरी कार्यालय हेटौँडाले केही समयअघि मात्रै लागुऔषधको विकल्पमा कफि खेती प्रवर्द्धन गर्न सुरु गरेको थियो ।
तर जिल्ला प्रहरी कार्यालय मकवानपुरले गाँजा र अफिम नष्ट अभियान सुरु गरेको छ । लागु औषधकाे खेती भएका स्थानमा गाँजा र अफिम खेती फडानी गर्न मकवानपुर प्रहरीले आइतबार १ सय ३७ जना प्रहरी परिचालन गरेको छ । आइतबार प्रहरी निरीक्षकको कमाण्डमा मकवानपुरको राक्सिराङ गाउँपालिका र कैलाश गाउँपालिकाको विभिन्न वडामा लागुऔषध फँडानी गर्न प्रहरी टोली खटाइएको जिल्ला प्रहरी कार्यालय मकवानपुरले जनाएकाे छ ।
मकवानपुर प्रवक्ता प्रहरी नायव उपरीक्षक लक्ष्मी भण्डारीका अनुसार ५५ जना प्रहरी राक्सिराङ गाउँपालिकाको ५, ६, ७, ८ र ९ नम्बर वडाका विभिन्न स्थानमा लागुऔषध फँडानीका लागि खटिएका छन् । प्रहरी निरीक्षकको कमाण्डमा ४० जना प्रहरी राक्सिराङको १, २, ३ र ४ नम्बर वडाका विभिन्न स्थानमा खटिएका छन् ।
यस्तै प्रहरी निरीक्षककै कमाण्डमा ४० जना प्रहरी कैलाश गाउँपालिकाको विभिन्न वडामा परिचालन गरिएको छ भने २ जना प्रहरी ड्रोनसहित खटाइएको भण्डारीले जानकारी दिए ।
जिल्ला प्रहरी कार्यालय मकवानपुरकाे तथ्याङ्कमा समेत गाजाँ तथा अफिम खेती बढेको पाईन्छ । प्रहरीले गाँजा तथा अफिम खेती फडानी कार्यमा तीव्रता दिएकाे भएपनि जिल्लामा हुने खेती र तस्करीको क्रम भने हालसम्म रोकिएको छैन् । अझ तस्करीको दर बढेको छ । मकवानपुरको राक्सिराङ र कैलाशमा उत्पादन हुने लागुऔषध गाँजा र अफिम भारत निकासी हुने गरेको पाइन्छ ।
आर्थिक वर्ष २०७८/०७९ मा मकवानपुर प्रहरीले ५ सय १९ जना प्रहरी परिचालन गरि १ सय ४४ विगहा ३ कठ्ठा १६ धुरमा लगाईएको गाँजा फडानी तथा नष्ट गरेको थियो । यहि वर्ष प्रहरीले १ सय ४४ विगहा १४ कठ्ठामा लगाएको अफिम खेती पनि नष्ट गरेको थियो । तर आर्थिक वर्ष २०७९/०८० मा अघिल्लाे आव भन्दा थप २ सय अर्थात १ सय ४६ विगहा १९ कठ्ठा गाँजा फडानी भएकाे तथ्याङ्कले देखाउँछ । उक्त आवमा २ सय २४ विहगा ३ कठ्ठा क्षेत्रफलमा लगाईएको अफिम नष्ट गरेको छ । यि जमिनमा लागु औषध नष्ट गर्न प्रहरीको ४ सय ९७ जना जनशक्ति प्रयोग भएको थियो ।
मकवानपुर प्रहरीले चालु आर्थिक वर्षको करिब ४ महिनाको अवधिमा मकवानपुरमा लगाईएका १५ विगहा गाँजाखेति फडानी तथा नष्ट गरिसकेकाे तथ्याङ्क छ ।
लागु औषध उत्पादनसँगै जिल्लामा तस्करी तथा पक्राउको दर पनि बढ्दै गएकाे छ । मकवानपुर प्रहरीले आर्थिक वर्ष २०७८/०७९ मा २ हजार ६ सय ६२ किलो गाँजा बरामद गरेको थियो भने १२ किलो अफिम बरामद गरेकाेमा २ सय ५६ जनालाई पक्राउ समेत गरेको थियो । तर आर्थिक वर्ष २०७९–०८० मा त्यो दरमा तिब्र बृद्धि भएको छ । सो आर्थिक वर्षमा प्रहरीले ६ हजार ५ किलो गाँजा र १२ किलो अफिम बरामद गर्दै समग्र लागु औषधको केशमा २ सय ४८ जनालाई पक्राउ गरेको छ ।
गाँजालाई लागुऔषधको रुपमा नेपालको कानुनमा ब्यवस्था भएपनि उत्तरी मकवानपुरका किसानहरु गाँजालाई आयश्रोतकाे माध्यमको रुपमा लिने गर्दछन् । सामन्यतया भदौमा लगाइने गाँजा मंसिर, पुससम्म तयार हुने गरेकाे पाइन्छ । किसानहरु आयाश्रोतको अन्य विकल्प र खेतियोग्य जमिनमा सिंचाईको सुविधा नहुँदा अन्य खेति गर्न नसक्ने अवस्थामा रहेकाे बताइन्छ ।
गाँजा फडानी रोक्न माग
नेपाल तरुण दलका केन्द्रिय सदस्य राजेश भेटवालले मकवानपुरमा भईरहेको गाँजा फडानी कार्य रोक्न माग गरेका छन् । आइतबार सामाजिक संजालमार्फत भेटवालले पटक पटक प्रहरी प्रशासनद्वारा मकवानपुरको विभिन्न क्षेत्रमा भईरहेको गाँजा फडानीमा प्रश्न उठाएका हुन् ।
“पटक पटक प्रहरी प्रशासनद्वारा मकवानपुरका विभिन्न क्षेत्रमा भईरहेको गाँजा फडानी कार्यले प्रहरी प्रशासनलाई के कस्तो फाइदा पुग्ने हो ?’ भेटवालले फेसबुक पेजमा लेखेका छन् ‘संसदमै गाँजा खुल्ला गर्ने विषयले प्रवेश पाएको स्मरण गराउदै प्रहरी प्रशासनद्वारा सर्वसाधारणको रोजी रोटीमा समेत प्रत्यक्ष प्रभाव पार्ने कार्य किन गरिरहन्छ ? पिडामा भएका गरिब दिनदुखिलाई थप पीडा दिएर के पाउछौ ?”
एकातिर प्रकृतिले दिएको अमूल्य वरदान गाँजालाई उपयुक्त किसिमले उपभोग गर्ने गरि संसारमा धेरै देशले गाँजा उत्पादन खुल्ला गरेका छन् भने हाम्रोतिर गाँजा फडानी गरेर प्रहरी प्रशासन बहादुरीता प्रदर्शन गर्दै आइरहेको प्रति नेपाल तरुण दलका केन्द्रिय सदस्य भेटवालले सरकारलाई प्रश्न गरेका छन् । देशमा एकातिर स्थानीय उत्पादनलाई बढावा दिने छलफल चल्छ भने अर्कोतिर स्थानीय उत्पादन नष्ट गर्न प्रशासन आफैं अघि सरिरहेको कार्यप्रती सामाजिक संजालमार्फत नेपाल तरुण दलका केन्द्रिय सदस्य राजेश भेटवालले सरकारलाई प्रश्न गरेका छन ।

मकवानपुर । साहित्य सङ्गम मकवानपुरको ३ सय ३६ औं नियमित साहित्य सन्ध्यामा बालपुस्ताका नवसर्जक ॠत्विक केवी र समर्पण न्यौपानेको संयुक्त कविता सुनिएको छ ।
ॠत्विक र समर्पणले समान ३/३ वटा कविता सुनाएका थिए । ॠत्विकले आमा, समय, र प्रेत आत्मा शिर्षकका कविता सुनाउदा समर्पणले चोमोलुङ्मा,सगरमाथा र एभरेष्ट, टेबलमुनि के छ र इतिहास र मान्छे शिर्षकका कविता सुनाए ।
मकवानपुर जिल्लाकै अग्रणी साहित्यिक संस्थाको नियमित सन्ध्यामा ॠत्विक र समर्पणको कविताका साथै २४ स्रष्टाले रचना सुनाएका थिए । सन्ध्यामा सुनाइएका रचनाको समिक्षा गर्दै मकवानपुरे साहित्यकार सुवास खनालले भने ‘रचनाहरु देश, समय सान्दर्भिक राजनीतिसंग रहेका छन् । बालपुस्ता र नवयुवा पुस्तालाई पनि साहित्यमा स्थान दिनुपर्छ ।’
साहित्य सङ्गम मकवानपुरका अध्यक्ष डिबि बर्तौलाको सभाध्यक्षतामा तथा अग्रज साहित्यकार तुल्सी घिमिरेको प्रमुख आतिथ्यतामा भएको सन्ध्यामा साहित्यकार निमेष निखिल, श्याम कुमार बानियाँ, भावना सापकोटा, छवि सुवेदी, मसान उपासक, सम्प्रस पौडेल, किशन पौडेल, देवराज खरेललगायतको उपस्थिति थियो ।
बढी भाडा लिने सवारी साधनलाई कारवाही
Tags: No Comments
मकवानपुर । बढी भाडा लिने सवारी साधनलाई मकवानपुर प्रहरीले कारवाही गरेकाे छ । दशैंको मौका छोपेर यात्रुसँग तोकिएको भन्दा बढी भाडा लिने सवारी साधनलाई मकवानपुर प्रहरीले कारवाही गरेको हाे ।
यात्रुबाट सवारी साधनले बढी भाडा लिएको गुनासो आएपछि ट्राफिक प्रहरीले बढी भाडा लिने सवारी साधनलाई कारवाही गरेर बढी लिएकाे भाडा रकम यात्रुलाई फिर्ता गरेकाे छ । दसैं अवधिभर ट्राफिक प्रहरीले ८ सवारी साधनबाट बढी भाडा वापत २० हजार २५० रुपियाँ यात्रुलाई फिर्ता गराएको जिल्ला ट्राफिक कार्यालय हेटौँडा मकवानपुरका प्रमुख वसन्त आचार्यले जानकारी दिए ।
बढी भाडा लिने र ट्राफिक नियम पालना नगर्नेहरुलाई जनही १ हजारदेखि ५ हजारसम्म जरिवान गरिएको समेत आचार्यले बताए । ट्राफिक प्रहरीका अनुसार दसैं अवधिमा मादक पदार्थ सेवन गरेर सवारी साधन चलाउने १५ जना, सिट क्षमताभन्दा बढी यात्रु बोक्ने १ सय ३७ सवारी र यात्रुकाे टिकट नकाट्ने ३१ सुमोलाई कारवाही गरिएको छ ।
हेटौँडा–काठमाडौं सुमोभाडा दर ६५० तोकिए पनि यात्रुसँग १८ सयदेखि १२ सयसम्म लिएको भेटिएपछि प्रतिव्यक्ति ५५०/१५० सम्म रकम फिर्ता गराइएको उनले जानकारी दिए । सर्लाही–काठमाडौं १२ सय भाडादर तोकिएको भए पनि दुई हजारसम्म लिएकोमा प्रतिव्यक्ति आठ सय रकम फिर्ता गराइएकाे छ ।
त्यस्तै, सिमरा–काठमाडौं सुमो भाडादर ८५० तोकिएको भए पनि एक हजारसम्म यात्रुसँग लिएको भेटिएकोमा प्रतिव्यक्ति १५० रकम फिर्ता गराइएको मकवानपुर ट्राफिक प्रहरीले जनाएको छ । निजगढ–काठमाडौं ८५० भाडादर तोकिएको भए पनि १५ सय लिएकोमा प्रतिव्यक्ति ६५० रकम फिर्ता गराइएको हो ।
आज फूलपाती पर्वः हेटौडाकाे भुटनदेवी मन्दिरमा फूलपाती भित्र्याइयाे
Tags: No Comments
मकवानपुर । नेपालीहरुकाे महान चाड दशैंको सातौ दिन फूलपाती पर्व आज घरघरमा फूलपाती भित्रयाइदै छ । प्रत्येक वर्ष दुर्गा पक्षअन्तर्गत आश्विन शुक्ल सप्तमीका दिनमा मनाइने फूलपाती पर्वमा शास्त्रीय विधिअनुसार शुभ साइतको प्रतीक फूलपाती भित्र्याएर मनाइने गरिन्छ । दसैंघर अथवा जमरा राखिएको ठाउँमा साँझपख देवीको आराधनासहित फूलपाती भित्र्याउने चलन छ।
मकवानपुरको हेटौंडा उपमहानगरपालिका वडा नम्वर १० स्थित भुटनदेवी मन्दिरमा शनिबार फूलपाती भित्र्याइएको छ । हेटौंडा १० स्थित गोरेक्षश्वर मन्दिरमा राखिएको जमरासहितको शोभायात्राको टोलीले स्थानीय भुटनदेवी मन्दिरको दसैँघरमा बिहान धार्मिक विधि अनुसार फूलपाती भित्र्याइएको हो । नेपाली सेनाको म्याउली बाजा र नेपाल प्रहरीको ब्याण्ड बाजा, झाक्री र धार्मिक भक्तजनहरु सम्मिलीत समुहले फूलपाती भित्र्याइएको हो ।
फूलपाति गाेरक्षेश्वरबाट भुटनदेवी मन्दिरमा भित्र्याउन मकवानपुरका प्रमुख जिल्ला अधिकारी सूर्यराज सेढाई, बागमती प्रदेश प्रहरी नायव महानिरीक्षक किरण राणा, मकवानपुरका प्रहरी उपरीक्षक सिताराम रिजाल, नेपाली सेनाका उच्च अधिकृतहरु, स्थानीय समाजसेवी, धार्मिक भक्तजन र राजनीतिक दलका प्रतिनिधिहरु गोरेक्षश्वर मन्दिरमा पुगेका थिए ।
घटस्थापनाका दिनदेखि वैदिक विधिपूर्वक दुर्गालाई आह्वान गरी पूजाआजा गरिएको दसैँ घर अथवा पूजा कोठामा शुभ साइतको प्रतीकका रूपमा उखु, हलेदो, केराको बोट, धानको बाला, बेलपत्र, दारिम, जयन्ती, अशोकको फूल र मानवृक्ष भित्र्याउने गरिन्छ । नवपत्रिकाको नामले चिनिने फूलपाती नौवटी देवीको प्रतीकका रूपमा भित्र्याई शास्त्रीय विधिअनुसार शक्तिको आराधनाका साथ पूजा गर्ने वैदिक विधि रहेको छ।
केरामा ब्रह्मायणी, दारिममा रक्तदन्तिका, धानमा लक्ष्मी, हलेदोमा दुर्गा, मानवृक्षमा चामुण्डा, उखुमा कालिका, बेलपत्रमा शिवा, अशोकमा शोकरहिता र जयन्तीमा कात्तिकी देवीको आह्वान गरी पूजा गरिन्छ, यी देवी नवदुर्गाका पार्षद् अर्थात् सहायक हुने धर्मशास्त्रमा बर्णन गरिएकाे छ । फूलपाती भित्र्याएपछि नौवटै देवीको विधिपूर्वक पूजा आराधना गरिन्छ । फूलपाती भित्र्याउनका लागि साइतको आवश्यक्ता नपर्ने धर्मशास्त्रविद् बताउँछन् ।
यसैगरी, बडादसैँको अवसरमा शनिबार दिउँसो २ बजे हेटौंडा–२ बनस्खण्डी मन्दिरको दसैँघरमा फूलपाती भित्र्याउने कार्य तालिका रहेको भुटनदेवी मन्दिर व्यवस्थापन तथा धार्मिक पर्यटन विकास समितिका अध्यक्ष राममान श्रेष्ठले जानकारी दिए ।
बनस्खण्डी मन्दिरको दसैँघरमा पनि नेपाली सेनाको म्याउली बाजा र नेपाल प्रहरीको ब्याण्ड बाजा, झाक्री र धार्मिक भक्तजनहरु सम्मिलीत शुभयात्रा समूहले गाेरश्वर मन्दिर परिसरबाट फूलपाती भित्र्याइने उनले जानकारी दिए ।
यस्तै आज हनुमानढोका दरबारको दशैँघरमा गोरखा जिल्लाबाट ल्याइएको फूलपाती भित्र्याउने परम्परा छ ।यसैगरी देशभरका शक्तिपिठहरुमा समेत फुलपाती भित्र्याउने गरिन्छ । गोरखाबाट ल्याइएको फूलपाती हनुमानढोका दरबारको दसैंघरमा भित्र्याउने परम्परा छ। गोरखाबाट धादिङ जिल्लाको जीवनपुरसम्म दसैंघरका पुजारीसहित मगर जातिका छ जनाले ल्याउने र त्यहाँबाट काठमाडौंको जमलसम्म यहाँबाट गएका ब्राह्मण जातिका छ जनाले ल्याइन्छ।
जमलबाट हनुमानढोकासम्म निजामती सेवाका उच्चपदस्थ अधिकारी, गुर्जुका पल्टन, ब्यान्डबाजा, पञ्चैबाजा र सांस्कृतिक नाचगानसहितको लावालस्करका साथमा फूलपाती लैजाने प्रचलन छ।
गजल मञ्चकाे २ सय ७ औं यात्रामा गजल यात्रा-४ विमोचन
Tags: No Comments
मकवानपुर । गजल मञ्च मकवानपुरद्वारा प्रकाशित गजल यात्रा-४ पुस्तककाे विमोचन गरिएकाे छ । मञ्च मकवानपुरकाे २ सय ७ औँ गजल यात्रा तथा शुभकामना आदानप्रदान कार्यक्रममा शुक्रबार गजल यात्रा-४ को विमोचन गरिएको हो ।
२०६६ सालबाट प्रकाशन गर्न थालिएकाे गजल यात्राकाे चौथाे संस्करण शुक्रबार विमाेचन भएकाे हाे । गजल यात्रा पुस्तककाे हेटाैडा उपमहानगरपालिका वडा नंम्बर ४ का अध्यक्ष नविन सिग्देल, साहित्यकार तुल्सी घिमिरे, सर्जक सञ्जाल मकवानपुर संयाेजक निमेष लिखिल र गजल मञ्च अध्यक्ष केशव समर्पणले विमाेचन गरेका थिए ।
प्रमुख अतिथि सिग्देलले गजल मञ्चको कार्यक्रममा शुभकामना व्यक्त गर्दै भने- “साहित्यले समाजलाई सकारात्मक परिवर्तन गर्नुपर्छ । ‘अबको विकास भौतिक मात्र नभएर भाषा, संस्कृति र साहित्यको हुनुपर्छ‘ सिग्देलले भने–‘साहित्यले सबैलाई समेट्नु पर्छ ।’ साहित्यिक संस्थाहरुले वार्षिक योजना सहित प्रस्ताव ल्याउन सके स्थानीय तहबाट सहयाेग गरिने उनकाे भनाइ थियाे । साहित्यकाे क्षेत्रमा ४ नम्बर वडाले यस अघी लगानी गरेकाे बताउँदै उनले भने ‘समाजलाई साहित्य मार्फत परिवर्तन गराउन सकिन्छ ।
गजल यात्रामा गजलकारहरू श्याम बानियाँ, सुवास खनाल, पुरुषोत्तम आचार्य, श्रीराम अधिकारी, सुवास सजल अनिल कोइराला, तुलसी घिमिरे, केशव समर्पण प्रियान्सु विडारी संजीत श्रेष्ठलगायतले आफ्ना गजल वाचन गरेका थिए ।
कार्यक्रममा साहित्य सङ्गमका अध्यक्ष डी.बी. बर्तौला, मातृभूमि साहित्य समाजका अध्यक्ष माधव पोखरेल, सिस्नुपानी मकवानपुरका अध्यक्ष राजकुमार लामिछाने, ऋषी केवी, छवी अनित्य, मशान उपासक, सानू खनाल, मिथिला अधिकारीलगायतकाे साहित्यकारकाे उपस्थिति रहेकाे थियाे ।
गजल मञ्च मकवानपुरका अध्यक्ष केशव समर्पणको सभाध्यक्ष एवम् हेटौंडा वडा न. ४ का वडा अध्यक्ष नवीन सिग्देलको प्रमुख आतिथ्यमा भएको उक्त कार्यक्रममा तुलसी घिमिरे र सर्जक सञ्जाल मकवानपुरका संयोजक निमेष निखिल विशिष्ट आतिथ्यता रहेकाे थियाे ।