मकवानपुर । हेटौंडामा जारी तेस्रो राष्ट्रिय रनिङ शिल्ड एट ए साइड भेट्रान्स कप फुटबल प्रतियोगितामा बिहीबारबाट क्वार्टरफाइनलका खेल हुने भएकाे छ । बुधबारकाे खेलबाट लेकसाइड भेट्रान्स पोखरा, पशुपति भेट्रान्सले बिरगंज, जोरपाटी भेट्रान्स र नागस्वती भेट्रान्स बि विजयी भएसँगै क्वार्टरफाइनलकाे समिकरण पुरा भएकाे हाे ।
बुधबारकाे पहिलाे खेलमा लेकसाइड भेट्रान्स पोखराले बिरगंज युनिटी भेट्रान्सलाई २–१ काे गोलले हराउँदै विजयी भएकाे हाे । लेकसाइडको तर्फबाट ९ औ मिनेटमा कन्या सुब्बा गुरुङले एक गोल र राजु हमालले ४६ औं मिनेटमा एक गोल गरेका थिए । यस्तै बिरगंज युनिटिको तर्फबाट ४८ औ मिनेटमा सान्त्वना गोल गरेका थिए । खेलमा लेकसाइड भेट्रान्सका खेलाडी कन्या सुब्बा गुरुङ म्यान अफ द म्याच घोषित भएका थिए ।
यस्तै दोस्रो खेलमा पशुपति भेट्रान्सले बिरगंज युथ एकेडेमी भेट्रान्सलाई ट्राइब्रेकरमा २–१ ले जित हासिल गरेको थियो । खेलमा निर्धारीत समयमा एकएक गोल भएपछि खेलकाे नतिजा ट्राइब्रेकरबाट लिइएकाे थियो । खेलको ३५ औं मिनेटमा पशुपति भेट्रान्सको तर्फबाट मदन श्रेष्ठ र बिरगंज युथका तर्फबाट १२ औं मिनेटमा संजय मण्डलले गोल गरेका थिए । ट्राइब्रेकरमा पशुपतिको तर्फबाट जितेन्द्र कर्मचार्य र मदन लामाले एक एक गोल गरेका थिए भने बिरगंज युथका तर्फबाट रामबाबु चौधरीले गोल गरेका थिए । खेलको म्यान अफ द म्याच पशुपति भेट्रान्सका नवराज केसि घोषित भएका थिए ।
बुधबारको तेस्रो खेलमा जोरपाटी भेट्रान्स बिजयी भएको छ । जोरपाटीले बिरगंज सिटि भेट्रान्सलाई ट्राइब्रेकरमै २–१ ले पराजित गरेको हो । निर्धारित समयकाे खेल बराबरीमा रोकिएपछि खेल ट्राइब्रेकरमा धकेलिएकाे थियाे । ट्राइब्रेकरमा जोरपाटी भेट्रान्सको तर्फबाट बिकाश श्रेष्ठ र राकेश लामाले गोल गरेका थिए भने बिरगंज सिटिको तर्फबाट रामबाबु चौधरीले गोल गरेका थिए ।
यस्तै चौथो खेलमा आयोजक नागस्वती भेट्रान्स बिले अभिषेक चर्च नवलपरासीलाई ४–० गोलले हराउँदै जीत निकालेकाे हाे । नागस्वतीको तर्फबाट खेलको मिलेन्द्र देवानले ७ औ, २१ औं र ३(औं मिनेटमा तिन गोल गरेका थिए भने २) औं मिनेटमा क्याप्टेन निमा लामाले एक गोल गरेका थिए । खेलको म्यान अफ द म्याच नागस्वती भेट्रान्सका मिलेन्द्र देवान घोषित भएका थिए ।
मङ्गलवार देखी हेटौंडामा दुई लाख राशिको तेस्रो राष्ट्रिय रनिङ शिल्ड एट ए साइड भेट्रान्स कप फुटबल प्रतियोगिता सुरु भएको हाे । नागस्वती भेट्रान्स क्लबको आयोजनामा सुरु भएको प्रतियोगिताको उद्घाटन हेटौडा उपमहानगरपालिका वडा नम्बर ७ का वडा अध्यक्ष दामोदर गौतमले गरे । उनले स्वास्थ्यकाे लागि खेलकुद महत्त्वपूर्ण रहेकाे बताए । कार्यक्रममा जिल्ला फुटबल सङ्घका अध्यक्ष टिका लामा, पत्रकार महासङ्घ मकवानपुरका अध्यक्ष मणिराज गौतम,अमेरिका निवासी युवा व्यवसायी गौरव बस्नेत लगायतले खेलको सफलताको शुभकामना दिएका थिए ।
मगलबारकाे उद्घाटन खेलमा आयोजक नागस्वती भेट्रान्स ए ले र एनजेजेभिसी भेट्रान्स सिमरालाई ३–१ गोल अन्तरले विजयी सुरुवात गरेको थियाे । खेलको १२,२७ र ३३ औ मिनेटमा नागस्वती भेट्रान्सका तर्फबाट डेबिन श्रेष्ठले तिन गोल गरेका थिए भने एनजेजे भेट्रान्सको तर्फबाट खेलको दोस्रो मिनेटमा रत्न बहादुर खत्रीले एक मात्र गोल गरेका थिए । खेलको म्यान अफ द म्याच नागस्वती भेट्रान्सका डेबिन श्रेष्ठ घोषित भएका थिए ।
यस्तै मगलबारकाे दोस्रो खेलमा हेटौडा भेट्रान्स विजयी भएको छ । हेटौडाले पश्चिम चितवन भेट्रान्सलाई ४–० गोल अन्तरले पाखा लगायो । खेलको १४,५१ र ५२ औ मिनेटमा हेटौडा भेट्रान्सको तर्फबाट रितेस थापाले तिन गोल र सुबिन घिमिरेले २३ औ मिनेटमा एक गोल गरेका थिए । खेलको म्यान अफ द म्याच हेटौडा भेट्रान्सका रितेस थापा घोषित भएका थिए । यस्तै मंगलबारकाे तेस्रो खेलमा चितवन भेट्रान्सले निजगढ भेट्रान्सलाई २–१ गोलले हराएकाे थियो । चितवनका तर्फबाट खेलको १७ मिनेटमा सुरेन्द्र चौधरी र ३९ औ मिनेटमा विष्णु दराईले गोल गरेका थिए भने निजगढ भेट्रान्सका तर्फबाट खेलको २४ औ मिनेटमा भीम लामाले एक गोल गरेका थिए । खेलको म्यान अफ द म्याच चित्तवन भेट्रान्सका विष्णु दराई घोषित भएका थिए ।
मङ्सिर ८ गतेसम्म हुने प्रतियोगितामा देशभरका ४० वर्ष माथि उमेर समूहका पूर्व राष्ट्रिय खेलाडीहरूको सहभागिता रहेकाे १५ वटा भेट्रान्स क्लबहरूको सहभागिता रहेको आयोजक क्लब अध्यक्ष सोम बहादुर तितुङ्ले जानकारी दिए । प्रतियोगिता विजेताले २ लाख १ हजार र उपविजेताले एक लाख १ हजार नगद सहित शिल्ड मेडल प्राप्त गर्नेछन् । स्वास्थ्यका लागि खेलकुद भन्ने नाराका साथ आयोजना भएको प्रतियोगिताले पूर्व खेलाडीहरूको मनोबल उच्च राख्न सहयोग पुग्ने उनले बताए । चार वर्ष अघि स्थापना भएको यस क्लबले लगातार तेस्रो सिरिजको प्रतियोगिता आयोजना गरेको हो । खेल हेटौडा ७ नागस्वतीमा रहेको नवज्योति विद्यालयको खेल मैदानमा भैरहेको छ ।
यसैगरी बिहीबारबाट प्रतियाेगिताका क्वाटरफाइनलका खेल हुनेछन् । बिहीबार आज क्वाटरफाइनलका चार खेल हुने आयोजकले जनाएकाे छ ।
मकवानपुर । मकवानपुरको मनहरी गाउँपालिकामा जारी चैनपुर जेसीज कप फुटबल प्रतियोगिताको फाइनल समिकरण पुरा भएको छ । जेसीज कप फुटबल प्रतियोगिताको सोमबारको सेमीफाइनलबाट एफसी परेली क्लब प्रवेश गरेसँगै फाइनल समिकरण पुरा भएकाे हाे ।
यसैगरी प्रतियोगिता अन्तरगत शुक्रबार भएकाे पहिलाे सेमिफाइनलबाट मकवानपुरगढी गाँउपालिकाकाे जेसीआई टिमले फाइनलमा स्थान बनाएकाे थियाे । सोमबार हुने फाइनलमा उपाधी रक्षाका लागि मकवानपुर गढीले परेलीकाे सामना गर्ने छ ।
शनिबार मनहरी गाउँपालिकाको गोलघर खेलमैदानमा भएको दोस्रो सेमीफाइनल खेलमा मनहरी–५ लाई टाइब्रेकरमा ५–४ गोलअन्तरले हराउँदै एफसी परेली फाइनलमा प्रवेश गरेको हो । निर्धारित समय २–२ गोलको बराबरीमा सकिएपछि खेल टाइब्रेकर धकेलिएकाे थियाे । यसैगरी मकवानपुरगढी जेसीआई शुक्रबार भएको सेमीफाइनल खेलमा एफसी नमोबुद्धलाई २–१ गोलअन्तरले हराउँदै फाइनल प्रवेश गरेकाे हाे ।
मनहरी–४, मसिनेस्थित गोलघर खेल मैदानमा प्रतियोगिताको विजेताले एक लाख एक हजार १११ रुपैयाँ र उपविजेताले ५१ हजार १५१ रुपैयाँसहित ट्रफी, मेडल र प्रमाणपत्र प्राप्त गर्नेछन् । प्रतियोगिताको सर्वोत्कृष्ट खेलाडीले ७ हजार ५ सय रुपैयाँ तथा अन्य विधागत उत्कृष्टले जनही नगद ३ हजार ५ सय रुपैयाँसहित ट्रफी र प्रमाणपत्र प्राप्त गर्ने आयोजकले जनाएको छ ।
प्रतियोगितामा मनहरी–४, एफसी नमोबुद्ध, सक्षम युवा क्लब, एफसी ढिँडो, कमाने फुटबल एकेडेमी, जेसीआई मकवानपुरगढी, पदमपोखरी युनाइटेड एफसी, आरआर एफसी, हाँडीखोला युथ क्लब, जनसिद्ध युवा क्लब, एफसी परेली क्लब, टिएनटी मनहरी, हेटौंडाको नारायणी कलेज, मनहरी २ नम्बर वडा, मनहरी ५ नम्बर वडा र ऋषेश्वर युवा क्लबको टिमसहित १६ टिमको सहभागिता रहेकाे थियाे ।
मकवानपुर । १६ मङ्सिरमा हुने स्थानीय तह निर्वाचनकाे लागि भाेली आइतबार उम्मेदवारहरुले मनोनयन दर्ता गर्ने भएका छन् । निर्वाचन आयोगकाे उपनिर्वाचन कार्यतालिका अनुसार देश भरका स्थानीय तहका ४४ रिक्त पद मा प्रतिस्पर्धा गर्न उम्मेदवारी दर्ता गर्ने छन् ।
मकवानपुर जिल्लाकाे १ पदकाे लागि उपनिर्वाचन हुने भएकाे छ । जिल्लाकाे हेटौंडा उपमहानगरपालिका वडा नम्बर १२ काे वडाध्यक्ष पदकाे लागि उपनिर्वाचन हुदैंछ । जिल्लामा क्रियाशील राजनीतिक दलहरुले उक्त पदकाे लागि उम्मेदवारहरुकाेको टुङ्गो लगाएका छन् । गत २०७९ वैशाखमा सम्पन्न स्थानीय तह निर्वाचनबाट सो वडाको वडाध्यक्षमा निर्वाचित ललितबहादुर घलान जिल्ला समन्वय समिति मकवानपुरको प्रमुखमा निर्वाचित भएपछि वडाध्यक्ष पद रिक्त भएको थियाे ।
नेपाली कांग्रेसले अर्जुन तिवारीलाई उम्मेदवार बनाउने निर्णय गरेको नेपाली कांग्रेस मकवानपुरले जनाएकाे छ । नेपाल कम्युनिष्ट पार्टी (एमाले) ले राजेश नगरकोटीलाई उम्मेदवारका रुपमा प्रस्तुत गरेको छ भने नेपाल कम्युनिष्ट पार्टी (माओवादी केन्द्र) ले रविन प्रधानलाई उम्मेदवार बनाउने भएकाे छ ।
तीनदलसँगै नेपाल कम्युनिष्ट पार्टी (एकीकृत समाजवादी) राष्ट्रिय स्वतन्त्र पार्टी र राष्ट्रिय प्रजातन्त्र पार्टीले पनि उम्मेदवार टुङ्गो लगाएका छन् ।रास्वपाले आशा वीरबललाई उम्मेदवार बनाउने निर्णय गरेको हेटौँडा नगर सभापति ध्रुवबहादुर विष्टले बताए । एकीकृत समाजवादीले बलराम बल र राप्रपाले प्रेम लामालाई उम्मेदवार बनाउने निर्णय उक्त पार्टीले जनाएकाे छ ।
दलहरुले उम्मेदवार चयन गरेसँगै चुनावी अभियानलाई तीव्रता दिएका छन् । उपनिर्वाचनकाे मिति नजिकिएसँगै उक्त वडामा चुनावी सरगर्मी बढेको छ ।
त्रिपक्षिय प्रतिष्पर्धा
२०७९ सालकाे स्थानीय तह निर्वाचनमा प्रमुख तीन दलबीच नै प्रतिस्पर्धा भएको हेटौडा १२काे वडाअध्यक्ष पदमा उपनिर्वाचनमा समेत तीनै दलबीच कडा प्रतिस्पर्धा हुने आकँलन गरिएको छ ।
गत निर्वाचनमा माओवादी केन्द्रका ललितबहादुर घलानले १ हजार ३ सय ७१ मत प्राप्त गरी वडाध्यक्ष पदमा विजयी भएका थिए । उनका प्रतिस्पर्धी कांग्रेसका अर्जुनप्रसाद तिवारीले १ हजार ३ सय ४० मत प्राप्त गरेका थिए । यस्तै एमालेका राजेश नगरकोटीले १ हजार ३ सय २५ मत प्राप्त गरे ।
गतनिर्वाचनमा उम्मेदवारबीचको मतान्तरमा खासै फरक छैन् । विजय भएका माओवादीका घलान र निकटतम प्रतिद्वन्दी काँग्रेसका तिवारी बीच ३१ मतको मात्र फरक थियो । यस्तै विजयी घलान र तेस्राे स्थानमा रहेका एमालेका नगरकोटी ४६ मतको अन्तर थियो । तिवारी र नगरकोटीबीच भने १५ मतको मात्र फरक थियो ।
गतनिर्वाचनमा तीनै दलका उम्मेदवारले पाएको मतलाई हेर्दा चुनावमा कसले बाजी मार्छ अनुमान लगाउन सक्ने अवस्था भने देखिदैन् । अन्य दलहरुले समेत उम्मेदवारकाे टुङ्गो लगाएकाेले उपचुनाव निकै प्रतिष्पर्धी हुने देखिन्छ ।
थपिए १५ सय मतदाता
उपनिर्वाचनमा हेटौंडा–१२ मा १ हजार ५ सय ८८ मतदाता थपिएका छन् । निर्वाचन आयोगले आगामी उपनिर्वाचनमा हेटौंडा–१२ को वडा अध्यक्ष पदका लागि ८ हजार ५३ मतदाता कायम गरेको छ । जसमा पुरुष ३ हजार ८ सय ७८, महिला ४ हजार १ सय ७४ र अन्य १ जना मतदाता कायम गरिएको छ ।
२०७९ सालको स्थानीय तह निर्वाचनमा उक्त वडामा ६ हजार ४ सय ६५ मतदाता कायम गरिएको थियो । आयोगले हेटौंडा–१२ मा आगामी उपनिर्वाचनका लागि २ वटा मतदानस्थल कायम गरेको छ भने ९ वटा मतदान केन्द्र कायम गरेकाे छ ।
मुख्य निर्वाचन अधिकृतकाे कार्यालय स्थापना
स्थानीय तहको उपनिर्वाचनकाे लागि हेटौंडा उपमहानगरपालिकाको वडा नम्बर १२ मा मुख्य निर्वाचन अधिकृतको कार्यालय स्थापना गरिएको छ । शुक्रबार उपनिर्वाचनकाे लागि १२ नम्बर वडा कार्यालय भवनमा मुख्य निर्वाचन अधिकृतको कार्यालय स्थापना गरिएको हो । मुख्य निर्वाचन अधिकृत अवानी मैनाली भट्टराईले वडा कार्यालय भवनमा कार्यालय स्थापना गरिन् ।
यस्तो छ निर्वाचन कार्यतालिका
निर्वाचनका लागि ३० कात्तिकमा मुख्य निर्वाचन अधिकृतको कार्यालय स्थापना गरिएकाे छ । मंसिर २ बाट निर्वाचनका कार्यक्रम संचालन गरिने छ । मंसिंर १६ मा मतदान हुने निर्वाचन आयोगको कार्यक्रम तालिका रहेको छ । मङ्सिर ३ गते बिहान १० देखि अपराह्न ३ बजेसम्म उम्मेदवारको विरोधमा उजुरी दिने, सोही दिन अपराह्न ३ बजेपछि मनोनयपत्र र उजुरीमाथि जाँचबुझ एवं निर्णय गरी मङ्सिर ४ गते साँझ ५ देखि ६ बजेसम्म उम्मेदवारको नामावली प्रकाशन हुनेछ ।
मङ्सिर ५ गते बिहान ९ देखि अपराह्न १ बजेसम्म उम्मेदवारले नाम फिर्ता लिन सक्ने छभने सोही दिन दिउँसो १ देखि ३ बजेसम्म अन्तिम नामावली प्रकाशन गरी दिउँसो ३ देखि ५ बजेसम्म उम्मेदवारलाई निर्वाचन चिह्न प्रदान गरिने छ । मङ्सिर १६ गते बिहान ७ देखि अपराह्न ५ बजेसम्म मतदान हुनेछ । त्यसपछि मतगणनालगायतकाे प्रक्रिया हुनेछ ।
विभिन्न कारणले रिक्त रहेका जिल्ला समन्वय समिति प्रमुख दुई, गाउँपालिका अध्यक्ष दुई, उपाध्यक्ष चार, नगरपालिका प्रमुख एक, उपप्रमुख एक र वडाध्यक्ष ३४ गरी जम्मा ४४ रिक्त पदका लागि उपनिर्वाचन हुदैंछ ।
आइतबारबाट निर्वाचन आचार संहिता लागु हुने
स्थानीय तहको उपनिर्वाचनका लागि २ मङ्सिर आइतबारदेखि निर्वाचन आचारसंहिता लागु हुने भएको छ । आचारसंहिता निर्वाचन सम्पन्न नभएसम्मका लागि लागु हुने निर्वाचन आयोगले जनाएकाे छ ।
आयोगको शनिबारको बैठकले निर्वाचन आयोग ऐन, २०७३ को दफा २२ तथा निर्वाचन आचारसंहिता, २०७९ को दफा १ को उपदफा (२) बमोजिम उपनिर्वाचन हुने जिल्ला भित्र निर्वाचन आचारसंहिता, २०७९ को सम्पूर्ण व्यवस्था लागू गर्ने निर्णय गरेको हो ।
निर्वाचन आचारसंहिता लागू भएको जिल्लाको निर्वाचन हुने स्थानीय तह बाहेक अन्य क्षेत्रमा निर्वाचन आचारसंहिताले निषेध गरेका कार्य गर्नु गराउनु परेमा निर्वाचन आयोगलाई पूर्व जानकारी दिई निकास भएबमोजिम गर्न सकिने आयोगले प्रकाशित गरेकाे विज्ञप्तिमा उल्लेछ ।
मकवानपुर । चैनपुर जेसीज मनहरी कप फुटबल प्रतियोगितामा हेटौंडा १३ पदमपोखरीको नमोबुद्ध एफसीले विजय सुरुवात गरेको छ ।
मनहरी गाउँपालिकाको ४ नम्बर वडास्थित मसिनेको गोलघर खेल मैदानमा शुक्रबारबाट सुरु दोस्रो सस्करणको प्रतियोगिताको उद्घटनमा खेलमा नमोबुद्धले मनहरी ४ नम्बर वडालाई २–० गोल अन्तरले हरायो । नमोबुद्धको जितमा खेलको २६ औं मिनेटमा सुनिल लामाले र ४३ औं मिनेटमा सामुयल सुनारले १/१ गोलको योगदान दिए । हारसंगै मनहरी ४ नम्बर वडा पहिलो खेलबाटै बाहिरिएको छ । खेलको म्यान अफ द म्याच नमोबुद्धका सामुयल सुनार घोषित भए।
प्रतियोगितामा शनिबार हाँडीखोला यूथ क्लव र जनसिद्ध क्लव बीच प्रतिस्पर्धा हुने आयोजकले जनाएको छ । मंसिर ३ गतेसम्म सञ्चालन हुने प्रतियोगितामा जिल्लाका १६ वटा टिमको सहभागिता रहेको छ । प्रतियोगिताको विजेताले एकलाख एकहजार १११ रुपैयाँ र उपविजेताले ५१ हजार १५१ रुपैयाँ नगदसहित ट्रफी प्राप्त गर्नेछन् । सर्वोत्कृष्ट खेलाडीले ७ हजार ५ सय रुपैयाँ र अन्य विधागत उत्कृष्टले जनही ३ हजार ५ सय रुपैयाँसहित ट्रफी प्राप्त गर्ने छन् ।
मनहरी गाउँपालिकाको ४ नम्बर वडाको मुख्य प्रायोजन एवम् अन्य विभिन्न संघसंस्थाको सहयोगमा सुरु प्रतियोगिताको शुक्रबार बागमती प्रदेश युवा तथा खेलकुद मन्त्री मिनकृष्ण महर्जन उदघाटन गरेका थिए । उदघाटनमा मनहरी गाउँपालिका अध्यक्ष रञ्जन कालाखेती, मनहरी गाउँपालिका ४ नम्बर वडा अध्यक्ष प्रकाश थापा, राष्ट्रिय स्वतन्त्र पार्टी प्रदेश सभापति सञ्जिव पाठक, पर्साखैरहनी जेसीजका अध्यक्ष नारन उप्रेतीलगायतको उपस्थिति रहेको थियो ।