मकवानपुर । बागमती प्रदेशका आन्तरिक मामिला तथा कानून मन्त्री गंगानारायण श्रेष्ठले लाेकतन्त्रमा मात्रै पत्रकारिता फस्टाउन सक्ने बताएका छन् । प्रेस युनियन मकवानपुरको आयोजनामा हेटौंडामा भएकाे सञ्चारकर्मीहरुको अधिकार, चुनौती र समाधानका विषयक कार्यशाला गोष्ठीमा उनले यस्ताे बताएका हुन् ।
प्रदेश सरकारका प्रवक्ता समेत रहेका श्रेष्ठले ‘निरंकुश शासन व्यवस्थामा नेपाली पत्रकारिता फस्टाउन नसक्ने बताए । ‘राज्यको चौथो अंगको रुपमा रहेको पत्रकारिता शसक्त र जिम्मेवार भएमात्रै मुलुकमा सुशासन स्थापना गर्न सहज हुन्छ’ उनले भने । मुलुकमा सुशासन स्थापना गर्नका लागि सबैपक्षबीच समन्वय जरुरी रहेकाे उनले बताए । उनले लोकतन्त्रको विकल्प उन्नत लोकतन्त्र मात्रै हुनसक्ने भन्दै लोकतन्त्र र गणतन्त्रको विरुद्ध आवाज उठाउने प्रयास भइरहेकोले लोकतन्त्रको विकल्प लोकतन्त्र बाहेक केही हुन नसक्ने जिकिर गरे ।
मन्त्री श्रेष्ठले पत्रकारिता क्षेत्रको प्रर्वद्धनका लागि बागमती प्रदेश सरकारले सञ्चार रजिष्ट्रार कार्यालयको स्थापना गरी काम गरिरहेको स्पष्ट पारे । उनले महिना महिनामा पत्रकारसँग भेटघाटगरी सल्लाह सुझाव लिने, सरकारका गतिविधिबारे जानकारी दिने, सञ्चार क्षेत्रको हित प्रर्वद्धनका लागि विभिन्न कार्यक्रमहरु गरिएको बताए ।
कार्यक्रममा नेपाल प्रेस युनियनका केन्द्रीय अध्यक्ष शिव लम्सालले पत्रकारिता क्षेत्र गुमेको विश्वास आर्जन गर्दै थप परिस्कृत एवम् परिमार्जित हुँदै अघि बढनुपर्ने बताए । नयाँनयाँ प्रविधि र सामाजिक सञ्जालका कारण पनि मूलधारको पत्रकारितामाथि प्रश्न उठिरहेको भन्दै पत्रकारिताप्रतिको विश्वासलाई जीवन्त राख्न पत्रकार, सञ्चार गृह स्वयं पनि सच्चिन तयार हुनुपर्ने बताए ।
कार्यक्रममा नेपाल पत्रकार महासंघका केन्द्रीय अध्यक्ष बिपुल पोखरेलले पत्रकारिताको अवस्था, चुनौती र सम्भावनाका विषयमा सुक्ष्म बहस र विश्लेषणसहित अघि बढ्नुपर्ने आवश्यकता औँल्याए । पत्रकारिताको अवस्था पत्रकारिताको विकास र दायरा बढेसँगै समस्या र चुनौती पनि बढेको भन्दै उनले ती समस्याको समाधान गर्न नेपाल पत्रकार महासंघले प्रयास गरिरहेको बताए ।
कार्यक्रममा आन्तरिक मामिला तथा कानूनमन्त्रालयका सचिव धु्रव गैँडाले पत्रकारिता क्षेत्रको प्रर्वद्धनका लागि वा स्वतन्त्र पत्रकारिता स्थापनाका आवश्यक ऐन कानूनसमेत संशोधन गरेर अधि बढ्न आफुहरु तयार रहेको बताए ।
कार्यक्रममा अधिवक्ता संजीव घिमिरेले नेपाली सञ्चारकर्मीहरुको अधिकार, चुनौती र समाधान विषयक कार्यपत्र प्रस्तुत गरेका थिए । बागमती प्रदेशका सञ्चार रजिष्ट्रार रेवती प्रसाद सापकोटाले आफ्नो कार्यालयले गरेका गतिविधि र पत्रकारिका क्षेत्रको सुधारका लागि सुझाव प्रस्तुत गरेका थिए ।
प्रेस युनियन मकवानपुरका अध्यक्ष सुवास विडारीको अध्यक्षतामा भएको कार्यक्रममा प्रेस युनियनका केन्द्रीय उपाध्यक्ष जीवन भण्डारी, महासचिव दीलिप पौडेल, पूर्व बरिष्ठ उपाध्यक्ष दीपक आचार्य, पत्रकार महासंघ बागमती प्रदेश अध्यक्ष शिव देवकाेटा, पूर्व अध्यक्ष प्रताप विष्ट, मकवानपुरका संस्थापक अध्यक्ष राममणी दाहाललगायतकाे सहभागिता रहेकाे थियाे ।
मकवानपुर । पूर्वराजा ज्ञानेन्द्र शाह आगामी ७ गते हेटौंडा आउने भएका छन् । शाहले हेटौडामा केही महत्वपूर्ण भेटघाट समेत गर्ने बताइएकाे छ ।
मकवानपुरको क्षेत्र १ बाट प्रतिनिधि सभा सदस्य सिंहले राप्रपा संघीयता खारेजीको अभियानमा रहेको बताए । पुर्वाधार विकास समिति सभापति समेत रहेका सिंहले विकास निर्माणका नाममा घुसखोरी बढेकोले यसको खबरदारी राप्रपाले गरिरहेको बताए ।
मकवानपुर । जनसरोकारका सवालमा प्रदेश सरकारको उपस्थिति कमजोर भएको भन्दै नेकपा एमाले खबरदारी गरेको छ ।
बागमती प्रदेशको नेकपा (एमाले) संसदीय दलको बैठकमा यस्तो खबरदारी गरिएको हो ।
सरकारले अनावश्यक हल्ला फिजाउँदा एमाले अब सशक्त भएर लाग्ने दलले निर्णय गरेको छ। संसदीय दलका नेता जगन्नाथ थपलियाको अध्यक्षतामा हेटौंडामा बसेको बैठकमा अधिकांश सदस्यले सरकार प्रति प्रतिपक्षको व्यबहार आवश्यकभन्दा नरम र लचिलो भएकोले सरकारले पेलेर अघिबढ्ने नीति लिएको बताए । एमालेका प्राय प्रदेश सभा सदस्यहरुले प्रतिपक्ष सरकार जस्तो लचिलो र सरकार चाहिँ प्रतिपक्ष जस्तो कडा भएको भन्दै टिप्पणी गरेका थियो ।
बैठकमा बोल्दै प्रदेश सभा सदस्य तथा नेकपा(एमाले ) मकवानपुरका अध्यक्ष एकालाल श्रेष्ठले जनताको आवश्यकता परिपूर्ति गर्ने र समानुपातिक तथा समतामूलक विकासका लागि एमालेले सशक्त प्रतिपक्षको भूमिका खेल्नुपर्नेमा बताए ।
नेकपा ( एमाले) का केन्द्रीय सदस्य समेत रहनुभएका प्रदेश सभा सदस्य भारती पाठकले सरकारका केही मन्त्रीले विकास बजेट दिनुलाई आफ्नो ढुकुटीबाट दान दिएको रूपमा व्यबहार गर्न थालेको टिप्पणी गरिन । उनले सरकारको दम्भ र स्वेच्छाचारीतामा मलजल पुग्ने काम नगर्न नेतृत्वलाई खबरदारी गरिन ।
सरकारले आफूहरूको मागको गलत ब्याख्या गर्दै सर्वसाधारण अनावश्यक हल्ला फिजाएकोमा संसदीय दलका प्रमुख सचेतक मधुसूदन पौडेलले आक्रोश व्यक्त गरे ।
“संसदीय समितिको पदाधिकारी टुङ्ग्याइनु पर्ने एमालेको मागलाई सरकारको एक मन्त्रीले एमालेले सबै समितिको सभापति माग्यो भनेर हल्ला गर्दै हिडेको समेत पाइएको छ,पार्टीले आफ्नो धारण स्पष्ट रुपमा बाहिर ल्याउनु पर्छ,हामीले यस्तो माग राखेकै हैनौ” पौडेलले भने “हामीले समानुपातिक र समावेशी विकास हुनुपर्ने र त्यसका लागि बजेट पुस्तकमा नपारिएका तर आमनागरिकका सवालमा गर्नै पर्ने योजनाको विवरण पेश गर्यौ, सरकारले त्यो कार्यान्वयन गर्ने लिखित सम्झौता पनि गर्यो , तर त्यो कार्यान्वयन गर्नुको साटो एमालेले पैसाको कुरा नमिलेर संसद चल्न दिएन भन्ने जस्ता हल्ला चलाएको छ ।”
संसदीय दलका नेता थपलियाले हाल सरकार प्रतिपक्षीको माग प्रति केही लचिलो देखिए पनि स्वेच्छाचारी गतिविधि गर्न नछाडेकाले विश्वास गर्न नसकिने बताए। एमाले जनताको पार्टी भएकोले जनताका पक्षमा डटेर लागिरहनु पर्ने बताए। आफ्ना दलका प्रदेश सभा सदस्यलाई प्रदेश सभाको आगामी बैठकमा अनिवार्य उपस्थित हुन निर्देशन दिदै नेता थपलियाले परिस्थिति अनुसार चल्न तयार रहन आग्रह गरे।
मकवानपुर । आगामी माघ ११ गते हुने राष्ट्रियसभा सदस्य निर्वाचनका लागि निर्वाचन आयोगले जारी गरेको आचारसंहिता आज मंगबारदेखि लागू भएकाे छ ।
आज माघ २ देखि १२ गतेसम्म राष्ट्रियसभा निर्वाचन सम्पन्न नभएसम्मका लागि आचारसंहिता लागू भएको निर्वाचन आयोगले जनाएकाे छ । सरोकारवाला सबै व्यक्ति, निकाय र अधिकारीलाई लागू हुने गरी आचारसंहिता जारी गरिएको आयोगका प्रवक्ता शालिग्राम शर्मा पौडेलद्वारा विज्ञप्तीमा भनिएकाे छ ।
आयोगको निर्णयानुसार निर्वाचन आचारसंहिताको दफा ४, दफा ५ को खण्ड (क), खण्ड (क१) र खण्ड (छ) दफा ९, दफा १४, दफा १६, दफा १७, दफा १८, दफा २१ र दफा २२ को व्यवस्था लागू गरिएको पुष २९ गते आइतबार पौडेलले जारी गरेको विज्ञप्तिमा उल्लेख छ। आचार संहिताकाे अवधिमा सार्वजनिक स्रोतसाधन र सम्पत्ति कुनै दल वा उमेदवारको पक्ष/विपक्षमा हुने गरी प्रयोग गर्न/गराउन पाइने छैन । निर्वाचनसँग सम्बन्धित सामग्री वा सूचनालाई बिगार्न, कुनै किसिमले थपघट गर्न/गराउन नहुने आयोगले जनाएको छ।
यस्तै, कुनै सरकारी वा अर्धसरकारी निकाय/सार्वजनिक संस्था वा विश्वविद्यालय/विद्यालय/महाविद्यालयको क्षेत्र प्रयोग गरी निर्वाचनसम्बन्धी भेला वा प्रचारप्रसार गर्न/गराउन पाइने छैन। राजनीतिक दल वा उमेदवारको निर्वाचन चिह्नअंकित कुनै सामग्री उत्पादन, प्रयोग, बिक्री–वितरण, प्रदर्शनलगायत कार्य गर्न/गराउन नहुने आयोगले जनाएको छ।
त्यसैगरी ज्येष्ठ नागरिक, महिला, यौनिक तथा लैङ्गिक अल्पसङ्ख्यक समुदाय र अपाङ्गता भएका व्यक्तिको भावनामा आँच आउने वा चरित्र हत्या हुने गरी निर्वाचन प्रचारप्रसार गर्न वा गराउन तथा बालबालिकालाई निर्वाचन प्रचारप्रसारमा प्रयोग गर्न वा गराउन हुँदैन । आचार संहिता अनुसार प्रचलित कानून बमोजिम निषेध गरिएको समय र स्थानमा अवरोध हुने गरी कुनै किसिमको जुलुस, आमसभा, कोणसभा, बैठक, भेला गरी निर्वाचन प्रचारप्रसार गर्न वा गराउन नहुने, सामाजिक सञ्जालमा गलत, भ्रामक वा द्वेषपूर्ण सूचना प्रवाह गर्न वा गराउन, निर्वाचनलाई प्रभाव पार्ने उद्देश्यले होच्याउने, दुष्प्रचार गर्ने, भ्रामक सूचना सम्प्रेषण गर्ने, अपमान गर्ने, द्वेषपूर्ण भाषण (हेट स्पिच) गर्ने जस्ता भ्रामक टिका टिप्पणी गर्न वा गराउन नहुने व्यवस्था छ ।
निर्वाचनलाई प्रतिकूल प्रभाव पार्ने वा अवरोध गर्ने गरी विचार राख्न, प्रचारप्रसार गर्न, कुनै विद्युतीय सामग्री उत्पादन गर्न तथा सामाजिक सञ्जालमा प्रकाशन गर्न वा अरूले प्रकाशन गरेका सामग्री शेयर गर्न नहुने, कुनै पनि किसिमबाट मतदाताको गोप्यता भङ्ग गर्ने कार्य गर्न नहुने, मतदाता र मतदानमा खटिएका कुनैपनि कर्मचारीसँग वादविवाद गर्न वा उनिहरुलाई हतोत्साहित गर्ने कुनै पनि कार्य गर्न नहुने, कुनै प्रकारले निर्वाचनको स्वच्छता वा निष्पक्षतालाई प्रभावित गर्ने गरी कुनै कार्य गर्न नहुने समेत निर्वाचन आयोगले जनाएकाे छ ।


थाहानगर। नेकपा एमाले थाहा नगर कमिटीले थाहानगरकाे अधिवेशन फागुण २८ गते गर्ने निर्णय गरेको छ । शनिबार पालुङमा सम्पन्न नगर कमिटीको पूर्ण बैठकले अच्युतम प्रसाद ढकालको संयोजकत्वमा एक सय ५ सदस्यीय अधिवेशन आयोजक कमिटी गठन गरेको हो ।
केन्द्रीय पोलिटव्युरो सदस्य तथा मकवानपुर इञ्चार्ज देवी ज्ञवालीको प्रमुख अतिथि एवम नगर अध्यक्ष ढकालको सध्यक्षतामा भएको बैठकले माघ पहिलो हप्ताभित्र सबै वडाहरुको बैठक, माघ २१ गतेभित्र सदस्यता नविकरण, फागुण ८ र ९ गते आवशीय प्रशिक्षण, फागुण १५ गतेभित्र सबै वडाहरुको अधिवेधन तथा प्रतिनिधि छनौट गर्ने निर्णय पनि गरेको हाे ।
बैठकमा प्रमुख अतिथि ज्ञवालीले पार्टीभित्र देखा परेको समस्यालाई चिरेर अघि बढे अर्को निर्वाचनमा गठबन्धनलाई पछार्न सकिने बताए । यसैगरी संविधान सभा सदस्य सुवाष चन्द्र ठकुरी, निर्वाचन क्षेत्र नम्बर २ का इञ्चार्ज बलराम बल, थाहा इञ्चार्ज तथा बागमती प्रदेश सदस्य इन्द्रमान स्याङ्तान, जिल्ला अध्यक्ष एकालाल श्रेष्ठले पार्टीका सर्कुलरहरु बारे बताउदै थाहामा जनताको विश्वास कायम गर्न आग्रह गरे ।
बैठकमा प्रदेश कमिटी, जिल्ला कमिटी र नगर कमिटीका नेता तथा कार्यकर्ताहरुको सहभागिता थियो ।