मकवानपुर । आगामी मंशिर १६ गते स्थानीय तहमा रिक्त रहेका ४४ पदकाे उपनिर्वाचन हुदैंछ । गत स्थानीय तहको निर्वाचनमा नेकपा माओवादी केन्द्रले जितेकाे हेटौंडा उपमहानगरपालिका वडा नम्बर १२ काे वडाध्यक्ष पदमा उपनिर्वाचन हुँदैछ ।
उक्त वडामा हुने उपनिर्वाचनमा मकवानपुरका नेकपा एमाले,कांग्रेस र माओवादीले उम्मेद्वार टुंग्याएका छन् भने अन्य दलले समेत उम्मेदवारकाे टुंगो लगाउन बाँकी छ । वडा अध्यक्षमा विजयी लतिल बहादुर घलान जिल्ला समन्वय समिति मकवानपुरको प्रमुखमा निर्वाचित भएपछि उक्त पद रिक्त भएकाे थियाे । पद रिक्त भएकाे स्थानका लागि निर्वाचन आयोगले उपनिर्वाचन गराउने भएकाे हाे ।
कांग्रेसले अर्जुन तिवारीलाई उम्मेदवार बनाउने निर्णय गरेको नेपाली कांग्रेस मकवानपुरले जनाएकाे छ । उनी गत निर्वाचनमा पनि वडाध्यक्षको उम्मेदवार हुन् । यस अघि नै एमाले र काँग्रेसले उम्मेदवारकाे टुंगो लगाइसकेका छन् । कांग्रेसको वडा समितिबाट अर्जुन तिवारी, शरण घिसिङ, कुमार पोखरेल, गीता न्यौपाने, सुदर्शन लामाको नाम जिल्लामा सिफारिस भएको थियो । पाँच जनाबीच सहमतिमै उम्मेदवारको टुंगो लगाइएको कांग्रेस मकवानपुर प्रवक्ता अर्जुन चौलागाईंले जानकारी दिए ।
माओवादीले रविन प्रधानलाई वडा अध्यक्षको उम्मेदवार बनाउने सर्वसहमत निर्णय गरेकाे छ । अन्यको आकाक्षा भएपनि प्रधानको नाममा सहमती जुुटेकाे हाे । यस्तै एमालेले पनि राजेश नगरकोटीलाई वडा अध्यक्षको उम्मेदवार बनाएको छ । गत स्थानीय तहको निर्वाचनमा पनि उम्मेदवार रहेका नगरकोटी यसपटक पनि सर्वसहमत उम्मेदवार छनौट भएका हुन् । ३ दलले उम्मेदवारको टुंगो लगाएर चुनावी रणनीति तयार गर्न लागि परेका छन् ।
आगामी मङ्सिर १६ गते विभिन्न कारणले रिक्त रहेका जिल्ला समन्वय समिति प्रमुख दुई, गाउँपालिका अध्यक्ष दुई, उपाध्यक्ष चार, नगरपालिका प्रमुख एक, उपप्रमुख एक र वडाध्यक्ष ३४ गरी जम्मा ४४ रिक्त पदका लागि उपनिर्वाचन हुनेछ । रिक्त रहेका ४४ पदका लागि हुने उपनिर्वाचन मध्येको एक स्थान हेटौँडा नगरपालिका १२ नम्बर वडा हो ।
वडा अध्यक्षमा २०७९ सालमा भएको स्थानीय तहको निर्वाचनमा प्रमुख तीन पार्टीबीच तीब्र प्रष्तिप्रर्धा भएको थियो । अव हुने उपनिर्वाचनमा समेत अवस्था उस्तै रहेकाे देखिन्छ । गतचुनावमा हेटौंडा–१२ माओवादी केन्द्रका ललितबहादुर घलानले १ हजार ३ सय ७१ मत प्राप्त गरी विजयी भएका थिए । उनका प्रतिस्पर्धी कांग्रेसका अर्जुनप्रसाद तिवारीले १ हजार ३ सय ४० मत प्राप्त गरेका थिए । यस्तै एमालेका राजेश नगरकोटीले १ हजार ३ सय २५ मत पाएका थिए ।
गतनिर्वाचनमा तीन दलका उम्मेदवारबीचको मतान्तरमा खासै फरक छैन् । विजय भएका माओवादीका घलान र निकटतम प्रतिद्वन्दी काँग्रेसका तिवारी बीच ३१ मतको मात्र फरक थियो । यस्तै विजयी घलान र तेस्राे स्थानमा रहेका एमालेका नगरकोटी ४६ मतको अन्तर थियो । तिवारी र नगरकोटीबीच भने १५ मतको मात्र फरक थियो । गतनिर्वाचनमा तीनै दलका उम्मेदवारले पाएको मतलाई हेर्दा चुनावमा कसले बाजी मार्छ अनुमान लगाउन सक्ने अवस्था भने देखिदैन् ।
यसबाहेक राप्रपा र नेकपा एसले पनि वडा अध्यक्षको उम्मेदवार चयनमा लागेका छन् । यो निर्वाचनले मकवानपुरमा दलहरुको पछिल्लो अवस्थालाई पनि चित्रण गर्ने भएकाले विशेष रुपमा हेरिएको छ । अहिलेसम्म निर्वाचनमा दलहरुबीच चुनावी तालमेल वा सहकार्य गर्ने कुनै तयारी भएको पाईदैन् ।
मकवानपुर जिल्लाकाे उक्त एक स्थानकाे लागि मात्र निर्वाचन हुने भएकाले जिल्लामा क्रियाशील राजनैतिक दलहरु कसरी स्थान सुरक्षित गर्न सकिन्छ भन्ने रणनीति लागेका छन् । माओवादीलाई गुमेको वडा अध्यक्ष पद फिर्ता गर्ने चुुनौती छ भने एमाले र काँग्रेसलाई एक स्थान थप्ने कसरतमा छन् । अन्य साना दलहरुले पनि निर्वाचनको तयारीमा जुटिरहेका छन् । जसले गर्दा उपनिर्वाचन रोचक हुने देखिन्छ । एमाले, काग्रेंस र माओवादी वीचमै त्रिपक्षिय भिडन्न हुने देखिन्छ ।
यस्तो छ उपनिर्वाचनकाे कार्यतालिकाः
उपनिर्वाचनका लागि मङ्सिर २ गते उम्मेदवारी दर्ता गर्नुपर्नेछ । मङ्सिर २ गते बिहान १० देखि अपराह्न ५ बजेसम्म निर्वाचन अधिकृतको कार्यालयमा उम्मेदवारको मनोयन दर्ता हुने छभने सोही दिन साँझ ५ देखि ६ बजेसम्म उम्मेदवारको सूची प्रकाशन हुनेछ ।
आयोगका अनुसार २०७९ मा सम्पन्न स्थानीय तहको निर्वाचनमा पुरुष उम्मेदवार निर्वाचित भई कार्यभार सम्हालिरहेको स्थानीय तहमा रिक्त रहेको पदमा महिला उम्मेदवार रहने गरी मनोनयनपत्र पेस गर्न राजनीतिक दललाई निर्देशन दिइएको छ ।
मङ्सिर ३ गते बिहान १० देखि अपराह्न ३ बजेसम्म उम्मेदवारको विरोधमा उजुरी दिने, सोही दिन अपराह्न ३ बजेपछि मनोनयपत्र र उजुरीमाथि जाँचबुझ एवं निर्णय गरी मङ्सिर ४ गते साँझ ५ देखि ६ बजेसम्म उम्मेदवारको नामावली प्रकाशन हुनेछ ।
मङ्सिर ५ गते बिहान ९ देखि अपराह्न १ बजेसम्म उम्मेदवारले नाम फिर्ता लिन सक्ने छभने सोही दिन दिउँसो १ देखि ३ बजेसम्म अन्तिम नामावली प्रकाशन गरी दिउँसो ३ देखि ५ बजेसम्म उम्मेदवारलाई निर्वाचन चिह्न प्रदान गरिने छ । मङ्सिर १६ गते बिहान ७ देखि अपराह्न ५ बजेसम्म मतदान हुनेछ । त्यसपछि मतगणनालगायतकाे प्रक्रिया हुनेछ ।
मकवानपुर । मकवानपुर । कोशी प्रदेशका आन्तरिक मामिला तथा कानूनमन्त्री लीलाबल्लभ अधिकारीले राजीनामा दिएका छन् । मन्त्रिपरिषदबाट स्वीकृत नगरी बैदेशीक भ्रमणमा गएको विषयमा विवादमा तानिएपछि अधिकारीले राजीनामा दिएका हुन् ।
अधिकारी केही दिनअघि भ्रमण स्वीकृत नगरी जापान गएका थिए । जापान जाँदा तीन जना असम्बन्धित व्यक्तिलाई पनि सँगै लैजान भूमिका खेलेको आरोप अधिकारीमाथि लागेको छ । मन्त्रीहरूले विदेश भ्रमणमा जाँदा प्रधानमन्त्री तथा मन्त्रिपरिषद्को कार्यालयमार्फत परराष्ट्र मन्त्रालयको सहमति लिनुपर्ने व्यवस्था रहेकाे छ । यसका साथै विदेश भ्रमणको सहमतिका लागि परराष्ट्र मन्त्रालयमा लेखिपठाउँदा प्रदेश मन्त्रिपरिषद्को निर्णय सहित पठाउनुपर्ने व्यवस्था समेत रहेकाे छ ।
उक्त विवादमा मुछिएपछि बुधबार मुख्यमन्त्री हिक्मतकुमार कार्कीलाई राजीनामा बुझाएर पत्रकार सम्मेलन गर्दै अधिकारीले अनुसन्धानलाई सहयोग गर्न राजीनामा दिएकाे बताए । अधिकारीसँगै जापान गएका असम्बन्धित भनिएका तीनै जना अहिले हनुमान ढोका प्रहरीको नियन्त्रणमा रहेकाे समेत उनले जानकारी दिए ।
मकवानपुर । निर्वाचन आयोगले स्थानीय तह उपनिर्वाचनमा उम्मेदवारले खर्च गर्न पाउने रकमकाे सिमा ताेकेकाे छ । १६ मंसिर २०८१ मा हुने उप निर्वाचनकाे लागि विभिन्न पदकाे उम्मेदवारहरुकाे खर्च सिमा ताेकिएकाे हाे ।
आयोगले महानगरपालिकाका प्रमुख तथा उपप्रमुख पदका उम्मेदवारले सात लाख ५० हजार र उपमहानगरपालिकाका प्रमुख तथा उपप्रमुख पदका उम्मेदवारले पाँच लाख ५० हजार खर्च गर्न पाउने गरी सिमा निर्धारण गरेकाे छ। यसैगरी नगरपालिकाका प्रमुख तथा उपप्रमुख पदका उम्मेदवारले चार लाख ५० हजार र गाउँपालिका अध्यक्ष तथा उपाध्यक्ष पदका उम्मेदवारले तीन लाख ५० हजार रुपियाँसम्म खर्च गर्न पाउने गरी सिमा ताेके आयोगका प्रवक्ता नारायणप्रसाद सापकोट जानकारी दिए ।
सापकाेटाका अनुसार जिल्ला समन्वय समितिका प्रमुख तथा उपप्रमुख पदका उम्मेदवारले ५० हजार रुपियाँसम्म खर्च गर्न पाउने सिमा ताेकिएकाे छ भने महानगरपालिकाका वडा अध्यक्ष पदका उम्मेदवारले तीन लाख रुपियाँ खर्च गर्न पाउने भएका छन् । यसैगरी उपमहानगरपालिकाका वडा अध्यक्ष पदका उम्मेदवारले दुई लाख रुपियाँ खर्च गर्न पाउने सिमा निर्धारण गरिएकाे छ । गाउँपालिका वडा अध्यक्ष पदका उम्मेदवारले खर्च गर्न पाउने रकमकाे सिमा एक लाख ५० हजार रुपियाँ निर्धारण गरेकाे छ ।
निर्वाचन आयोगका अनुसार स्थानीय तह निर्वाचन ऐन, २०७३ को दफा ६४ तथा स्थानीय तह निर्वाचन नियमावली, २०७३ को नियम ४० बमोजिम उम्मेदवारको मनोनयनपत्र दर्ता भएको मितिदेखि निर्वाचनको परिणाम घोषणा भएको अवधिसम्मका लागि खर्चको सिमा निर्धारण गरिएकाे हाे ।
जिल्ला समन्वय समितिका प्रमुख २, गाउँपालिका अध्यक्ष २, उपाध्यक्ष ३, गाउँपालिका वडाध्यक्ष ९, नगरपालिका प्रमुख १, उपप्रमुख १ र वडाध्यक्षका २१ सहित स्थानीय तहका ३९ पद रिक्त छन्। नेपालको संविधान तथा स्थानीय तह निर्वाचन ऐन, २०७३ मा पदावधि समाप्त नहुँदै पद रिक्त भएमा र एक वर्षभन्दा बढी समय बाँकी रहेको अवस्थामा उपनिर्वाचन गर्नुपर्ने व्यवस्था छ।
स्थानीय तह उपनिर्वाचनका लागि २५ वटा दल दर्ता भएका छन् । २०७९ सालका स्थानीय तह निर्वाचनमा भाग नलिएकाे राष्ट्रिय स्वतन्त्र (रास्वपा) ले समेत उप निर्वाचनकाे लागि दल दर्ता गराएकाे आयोगले जनाएकाे छ ।
मकवानपुर । बागमती प्रदेश मुख्यमन्त्री बहादुर सिंह लामाले नीति तथा योजना आयोगका उपाध्यक्ष गंगादत्त नेपालसँग कार्य सम्पादन करार सम्झौता गरेका छन् । मुख्यमन्त्री लामाले बुधबार उपाध्यक्ष नेपालसँग कार्यसम्पादन करार सम्झौता गरेका हुन् ।
प्रदेश नीति तथा योजना आयोग (गठन तथा कार्य सञ्चालन) आदेश २०७५ बमोजिम मुख्यमन्त्री लामाले चालु आर्थिक वर्ष २०८१/०८२ को वार्षिक स्वीकृत कार्यक्रमहरुको कार्य सम्पादनलाई प्रभावकारी र नतिजामुखी बनाउन आयोगका उपाध्यक्ष नेपालसंग कार्यसम्पादन सम्झौता गरे ।
सम्झौता अनुसार आयोगले वार्षिक स्वकीकृत कार्यक्रम सहित प्रभावकारी र उपलब्धीमुलक नयाँ तथा फरकशैलीको कार्यक्रम पनि गर्न निर्देशन गरिएको छ । मुख्यमन्त्री लामाले २६ भदौ २०८१ काे मन्त्रिपरिषद बैठकबाट नेपाललाई आयोगको उपाध्यक्षमा नियुक्त गरेका थिए ।
यसैबीच उपाध्यक्ष गंगादत्त नेपालसँग कार्यसम्पादन करार कार्यक्रममा मुख्मयन्त्री लामाले बजेट विनियोजन र योजना छनौटलाई प्रभावकारी बनाउने बताए । उनले प्रदेशमा आयोजना बैंक स्थापना गरेर प्रभावकारी कार्यान्वयनकाे लागि बजेट विनियोजन गर्ने तयारी भइरहेको जानकारी दिए । आयोजना बैंक स्थापना तथा संचालनलाई प्रभावकारी बनाउन उनले निर्देशन समेत दिए ।
मुख्यमन्त्री लामाले वार्षिक स्वीकृत कार्यक्रमका अलावा प्रदेश सरकारलाई आवश्यक तथ्यांक संकलन तथा सुझावहरु उपलब्ध गराएर नीति आयोगले प्रदेशको विकासमा महत्वपूर्ण भुमिका निर्वाह गर्नुपर्ने बताए । नयाँ र फरक ढंगका उत्पादन र रोजगारीमा केन्द्रीत हुने गरी आयोगले योजना निर्माण तथा बजेट विनियोजनमा सघाउन उनले आग्रह गरे ।
उनका अनुसार प्रदेश सरकार सिस्टम बनाउन सक्रिय रहेकाेले सरकारले तयार पारेको सिस्टम अनुसार नीति आयोगले नियमित काम गर्ने र प्रभावकारी योजना निर्माणमा अग्रसर हुनेछ ।
मकवानपुर । राष्ट्रिय स्वतन्त्र पार्टी(रास्वपा) सभापति रवि लामिछानेलाई ६ दिन हिरासतमा राख्न अदालतले अनुमति दिएको छ ।
आइतबार कास्की जिल्ला अदालतमा भएको थुनछेक बहसपछि उनलाई ६ दिन हिरासतमा राखेर अनुसन्धान गर्न कास्की प्रहरीलाई अनुमति दिएको हो । म्याद दिएसँगै प्रहरीले अनुसन्धान कार्य अघि बढाउनेछ । जिल्ला प्रहरी कार्यालय कास्कीले उनलाई सहकारी ठगी र संगठित अपराधमा अनुसन्धान गर्न भन्दै म्याद थपका लागि अदालतमा उपस्थित गराएको थियो ।
सूर्यदर्शन सहकारी ठगी प्रकरणमा शुक्रबार काठमाडौँबाट पक्राउ परेको उनलाई सोही राति पोखरा पुर्याइएको थियाे । उनी पक्राउ परेसँगै पार्टी नेता कार्यकर्ता भने आक्रोशित बन्दै सडकमा उत्रिएका छन् । आइतबार पनि पोखरामा दिनभर रास्वपाका कार्यकर्ताले प्रदर्शन गरेका थिए । प्रदर्शनका कारण पोखरामा निशेधाज्ञा समेत जारी गरिएकाे थियाे ।
यसैबीच पार्टी सभापति लामिछाने पक्राउको विरूद्धमा पार्टीका नेता तथा कार्यकर्ताले ७७ वटै जिल्लाबाट सरकारलाई ज्ञापनपत्र दिने भएको छ । लामिछानेलाई सरकारले राजनीतिक प्रतिशोधका आधारमा पक्राउ गरिएको आरोप लगाउँदै प्रमुख जिल्ला अधिकारीमार्फत ज्ञापनपत्र बुझाउन लागिएको रास्वपाले जनाएकाे छ ।