मकवानपुर । राष्ट्रिय प्रजातन्त्र पार्टी (राप्रपा) ले हेटौंडामा मोटरसाइकल र्याली निकालेको छ । संघीय संसदमा राजा ज्ञानेन्द्रका विरुद्ध अपशब्दको प्रयोग गर्ने नेताहरूको विरुद्धमा बृहत मोटरसाइकल र्याली निकालिएकाे पार्टीले जनाएकाे छ ।
पार्टी कार्यालयबाट सुरु भएको मोटरसाइकल र्याली सानोपोखरा, ओमभवन, शितलमहल चोक, बसपार्क, एसपी कार्यालय र लोकप्रिय चोक हुँदै सीमाचोकमा कोणसभामा परिणत भएको थियो ।
राप्रपा हेटौंडा नगर अध्यक्ष अरुण लामाले देशको अवस्था बदल्न, व्यवस्था बदल्न राप्रपाले र्याली निकालेको बताए । ‘देशका आम जनता आहात भएकाले व्यवस्था बदल्न सडकमा आएका छन्’ उनले भने । देशले परिवर्तन खोजेको बताउदैं व्यवस्था बदल्न खोजेकोले संघीयता खारेजी गर्नु पर्ने आवाज उठेकाे उनले बताए । देशभित्रका बेथिति विरुद्ध राप्रपाले राजा ज्ञानेन्द्रको पुनःवहालीका लागि चरणबद्ध आन्दोलनका कार्यक्रम गर्दै आएको उनले बताए ।
राप्रपा महिला संगठन केन्द्रीय सचिव सरस्वती थिङले अहिले राज्यले गरेका गतिविधिहरुको बारेमा सजग गराउन र आम नागरिकलाई देशमा भइरहेको विकृति, विसंगती र अराजकता चिर्न र्याली निकालिएको बताइन् । उनले हिन्दु राष्ट्र कायम, राजसस्था पुनस्थापना, भष्ट्राचार नियन्त्रण नभएसम्म राप्रपाका आन्दोलनका कार्यक्रम यथावत रहने जानकारी दिइन् ।
मकवानपुर । नेकपा एमालेले सुरु गरेकाे जरा अभियान प्रभावकारी बनेकाे एमाले मनहरीकाे दोस्रो पूर्ण बैठकले निष्कर्ष निकालेकाे छ । मनहरी गाउँपालिका कमिटीको रजैयास्थित अग्निहोत्राश्रममा भएकाे बैठकले तीन महिने जरा अभियान अन्तर्गत मनहरी गाउँपालिकाका ९ वटै वडामा भएका पार्टी र जनसंगठन कमिटीहरुको प्रगति विवरणहरुको समिक्षा गर्दै अभियान प्रभावकारी भएकाे निष्कर्ष निकालेकाे हाे ।
मंगलबारकाे बैठकमा हरेक वडामा खटिएका जिल्ला कमिटीका सदस्यहरुले वडाको बस्तुगत अबस्था र आगामी दिनमा गर्नुपर्ने कामका रिपोर्टिङ गरेको एमाले गाउँपालिका कमिटी सचिव पोशकबाबु बिष्टले बताए । तीन महिने अभियानको मध्यावधि समिक्षा गरिएको र आगामी चैतको दोस्रो साता आयोजना हुने तेस्रो पूर्ण बैठकमा जरा अभियानको प्रभावकारिता मापन हुने उनले जानकारी दिए ।
बैठकलाई सम्बोधन गर्दै नेकपा एमाले केन्द्रीय कमिटी सदस्य तथा मकवानपुर जिल्ला इन्चार्ज रामेश्वर रानाले जरा अभियानले पार्टीका गतिविधिहरुलाई सक्रिय बनाउँदै सुसुप्त रहेका शक्तिहरुलाई उजागर गर्ने बताए । पार्टी र सरकारप्रति अहिले भइरहेको अनावश्यक आरोप, टिप्पणी र प्रचारबाट एमालेजन सचेत हुनुपर्नेमा उनले जोड दिए ।
कार्यक्रममा बागमती प्रदेश कमिटी उपसचिव एबम् प्रचार विभाग प्रमुख भक्तकुमारी लामाले संगठन निर्माण, परिचालन, एजेण्डाको उठान लगायतका बिषयहरु जानकारी गराएका थिए । एमाले जिल्ला अध्यक्ष श्रीधर पोखरेलले जिल्ला कमिटीले गरेको निर्णयहरुको कार्यान्वयन पालिका कमिटी, वडा कमिटी र टोल कमिटीहरुले गर्नुपर्ने भन्दै जरा अभियानमा सबैजना जोडिनुपर्ने बताए ।
मनहरी गाउँपालिका कमिटि अध्यक्ष नवीन सुवेदीकाे अध्यक्षतामा भएको बैठकमा बागमती प्रदेश कमिटी सदस्य एबम् मनहरी गाउँपालिका इन्चार्ज अर्जुन अर्याल, बागमती प्रदेश कमिटी सदस्य एकराज उप्रेती, जिल्ला कमिटी उपसचिव आरती पाठक र गाउँपालिकाभित्रका जिल्ला कमिटी सदस्यहरुको सहभागिता रहेको थियो ।
मकवानपुर । बागमती प्रदेशका मुख्यमन्त्री बहादुरसिंह लामा तामाङले राज्यले गर्नुपर्ने धेरै काम यातायात व्यावसायी आफैँले गरिरहेको बताएका छन् । नारायणी यातायात व्यावसायी सङ्घको ३६औँ वार्षिक साधारणसभा तथा १६ औँ अधिवेशन उद्घाटन समारोहलाई शनिबार हेटौँडामा सम्बोधन गर्दै उनले यस्तो बताएका हुन् । ‘यातायातमा भएका समस्या समाधान गर्न प्रदेश सकार तयार छ रहेकाे बताउँदै उनले भने यसकाे लागि नियम कानुन संशोधन गरिनु पर्छ । रोड परमिट, सवारी जाँचपास र नवीकरणलाई प्रविधिमैत्री बनाउन छलफल अगाडि बढाउन प्रदेश सरकार तयार रहेको उनले बताए । ‘विदेशमा भएको प्रणाली (सिस्टम) प्रदेशमा पनि कार्यान्वयनमा ल्याउनुपर्छ’ उनले भने ‘दुर्घटना तथा बिमासम्बन्धी ऐनमा आवश्यक संशोधन गर्न प्रदेश सरकारले आवश्यक सहजीकरण गर्नेछ ।’
साधारणसभामा बागमती प्रदेश सरकार श्रम रोजगार तथा यातायात मन्त्री प्रेमभक्त महर्जनले बागमती प्रदेशको ३० प्रतिशत राजश्वमा यातायात क्षेत्रले योगदान गरिरहेको बताए । २२ लाख सवारी चालक अनुमति पत्र नागरिक एपमा राखिएको जानकारी दिदैं उनले भने ‘अनलाइनबाटै राजस्व तिर्ने, नवीकरण गर्ने र नामसारी गर्ने व्यवस्था मिलाउने तयारीमा प्रदेश सरकार लागिपरेकाे छ ।’
कार्यक्रममा संघ अध्यक्ष हीरालाल श्रेष्ठले सेवामूलक संस्था भएर पनि संघले नेपाल सरकारलाई कर तिर्दै आइरहेको बताए । हेटौँडामा मुख्य कार्यालय रहेको नारायणी यातायात व्यावसायी संघले चितवनको रामनगरमा रहेको जग्गा बिक्री गरी कर तिर्ने तयारी गरिरहेको छ । ‘नेपाल सरकारलाई कर तिर्नु पर्दा आर्थिक अभाव भएका कारण भरतपुरको रामनगरमा रहेको जग्गा बिक्री गरेर कर चुक्ता गर्ने विषयमा छलफल भइरहेको छ’ उनले भने ।
करिब २ करोड रुपियाँ कर तिर्नुपर्ने भएपछि संघ भौतिक सम्पत्ति बिक्री गरेर मात्रै कर चुक्ता गर्न सकिने अवस्था रहेको उनले जानकारी दिए । २०७५ फागुन १९ गतेको राजपत्रमा प्रकाशित केही नेपाल ऐनलाई संशोधन गर्न बनेको ऐन अनुसार नारायणी यातायात व्यावसायी संघको रूपान्तरित कम्पनीको रूपमा स्थापना भएको पुरानो नारायणी यातायात कम्पनी प्रालि दर्ता गरेर संघका नेतृत्वले व्यावसयीका दुर्घटना, बिमा दायित्वलगायत विषयमा काम गर्न थालेको उनले जानकारी दिए । ढुवानी तथा तौलपुल बन्द गर्न सरकारी संयन्त्र नै अग्रसर भएको उनले बताए ।
संविधान सभा सदस्य अनन्त पौडेल, प्रदेश सभा सदस्य इन्द्रबहादुर बानियाँ, प्रेमबहादुर पुलामी, प्रमुख जिल्ला अधिकारी स्किम श्रेष्ठ, मकवानपुर उद्योग वाणिज्य सङ्घका अध्यक्ष प्रमोद सिंह रानाभाट लगायतले यातायात सम्बन्धी समस्या समाधान गर्न आवश्यक सहयोग र सहकार्य गर्न आआफ्नो क्षेत्रबाट तयार रहेको बताएका छन् ।
हेटौंडामा मुख्यालय रहेको मानवसेवा आश्रमलाई हरेक साधारणसभामा सहयोग गर्दै आएको संघले यो वर्ष ५१ हजार नगर रुपियाँ सहयोग गरेको छ । त्यसैगरी लामो समयदेखि यातायात दुर्घटना नगराउने ५ जना चालकलाई जनही १० हजार रुपियाँ नगरसहित सम्मान गरिएको छ । सम्मान हुने चालकहरुमा हेटौंडाका अर्जुन भुर्तेल, ध्रुवलाल श्रेष्ठ, काठमाडौंका सुरेश श्रेष्ठ, चितवनका भोला थापा र रौतहटका रामपुकार राय छन् ।
साधारणसभाकाे अवसरमा नेपाल मेडिसिटी अस्पताल काठमाडौंका विशेषज्ञ डाक्टरसहितकाे टोलीले व्यावसायी तथा स्थानीयकाे स्वास्थ्य परीक्षण समेत गरेको थियो । कार्यक्रमलाई संघका महासचिव सरोज खनालले सहजिकरण गरेका थिए ।
मकवानपुर। नेकपा (एकीकृत समाजवादी) बागमती प्रदेश कमिटीका पूर्वसदस्य शिवहरि बर्तौलासहित २ दर्जन नेता कार्यकता नेकपा (एमाले)मा फर्किएका छन् ।
सोमबार हेटौंडास्थित पार्टी कार्यालयमा बसेको एमाले मकवानपुरको पूर्ण बैठकमा उनीहरु एमालेमा प्रवेश गरेका हुन् । उनीहरुलाई एमाले वरिष्ठ उपाध्यक्ष तथा पूर्वउपप्रधानमन्त्री ईश्वर पोखरेल, एमाले स्थायी कमिटी सदस्य तथा बागमती ईन्चार्ज डा. राजन भट्टराई, एमाले केन्द्रीय सदस्य तथा मकवापुर ईन्चार्ज रामेश्वर रानालगायतका नेताहरुले एमाले पार्टीमा स्वागत गरेका थिए ।
बर्तौलासहित समाजवादी मकवानपुरका जिल्ला कमिटी सदस्य मानबहादुर बल, पूर्व जिल्ला कमिटी सदस्य कर्णबहादुर पाख्रिन, देवलाल गोले, सुनिलकुमार गोले, लोकबहादुर घिसिङ एमालेमा प्रवेश गरेका हुन् । यसैगरी, समाजवादी भीमफेदी गाउँपालिका कमिटीका सचिवालय सदस्य रवि खड्का, पालिका कमिटी सदस्य वीरबहादुर बल, शेरमान थापा, हेटौंडा–१ उपसचिव भुपाल थिङलगायत २ दर्जन नेता कार्यकर्ता एमालेमा फर्किएको कार्यक्रमको सहजीकरण गरेका एमाले मकवानपुरका उपाध्यक्ष हिदम लामाले जानकारी दिए ।
एमालेमा फर्किएका बर्तौलाले समाजवादी पार्टीबाट देश नबन्ने निष्कर्षसहित एमालेमा समाहित भएको बताए । उनले समाजवादीमा रहेकाहरुलाई एमालेमा फर्कन र पार्टी काममा लाग्न आग्रह गरे । उनले एमालेको मिसन ८४ मा कटिवद्ध भएर लाग्ने प्रतिवद्धता समेत व्यक्त गरे ।
उपाध्यक्ष लामाले पार्टीको ३ महिने वडा केन्द्रीत जरा अभियानअन्तर्गत पार्टी प्रवेश कार्यक्रम भएको बताए । उनले अभियानअन्तर्गत जिल्लाको १० वटै स्थानीय तहको १०२ वटै वडा कमिटीमा बैठक सञ्चालन भएको र पार्टीको जरा अभियान सक्रिय रुपमा सञ्चालन भइरहेको जानकारी दिए ।
सोमबारबाट सुरु भएको दुईदिने जिल्ला कमिटी बैठकमा सबै स्थानीय तह कमिटीको रिर्पोटिङ लिने र अभियानलाई अझ बृहत ढंगले अगाडि बढाउने छलफल हुने बताइएको छ । पार्टी जिल्ला अध्यक्ष श्रीधर पोखरेलको अध्यक्षतामा बसेको जिल्ला कमिटी बैठकमा एमाले एमाले स्थायी कमिटी सदस्य तथा बागमती ईन्चार्ज भट्टराईले निर्देशनात्मक मन्तव्य राख्नेछन् ।
मकवानपुर । नेकपा एमालेका वरिष्ठ उपाध्यक्ष ईश्वर पोखरेलले देशकाे संकट समाधानको लागि एमालेकाे बहुमत आवश्यक रहेकाे बताएका छन् । सोमबार एमाले जिल्ला कमिटी मकवानपुरको बैठकमा सम्बोधन गर्दै पोखरेलले उक्त कुरा बताएका हुन् ।
एमालेले बहुमत ल्याउन नसक्दा मुलुक फेरि पनि राजनीतिक अस्थिरताको भूमरीमा फस्छ उनले भने ‘त्यसैले सबै मिलेर एमालेलाई देशको निर्णायक राष्ट्रिय शक्ति बनाउनु पर्छ ।’ उनले लोकतन्त्रलाई सबल बनाउन पनि एमाले बलियो हुनुपर्ने बताए । एमालेको नेतृत्वलाई बदनाम गराउन विभिन्न तत्वहरु क्रियाशील हुँदा कार्यकर्ता पंक्ती चुप लागेर बस्न नमिल्ने उनको भनाई छ ।
वरिष्ठ उपाध्यक्ष पोखरेलले वडा तहबाटै एमालेलाई बलियो बनाउनुपर्ने बताए । जनताको मन जितेमात्र मत प्राप्त गर्न सकिने भएकोले जनचाहना बुझेर काम गर्न उनले कार्यकर्तालाई निर्देशन दिए।
यसैगरी वर्तमान सरकार कसैले पनि ढाल्न नसक्ने उनले बताए । ‘कांग्रेस र एमालेमा बईमानी पलाए मात्र सरकार ढल्छ’ उनले भने ‘दुबै दल इमानदार हुँदासम्म ओली नेतृत्वको सरकार ढल्दैन ।’ राजनीतिक स्थायित्वको लागि वर्तमान सत्ता समीकरण निर्माण भएको उनले बताए । ’२०७९ को निर्वाचन पछि राजनीतिक अस्थिरतको बढेकाेले दुबै दलले आपसमा सहकार्य गरेको हुन्’ उनले भने ।
वरिष्ठ उपाध्यक्ष पोखरेलले कांग्रेस म्याजिकल नम्बरको चक्करमा फस्दा २०७९ को निर्वाचनपछि राष्ट्रिय सहमतिको सरकार बन्न नसकेको जिकिर गरे । कांग्रेससँग मिल्दै गर्दा आगामी चुनावीमा कांग्रेस नै मुख्य प्रतिस्पर्धी दल हो भन्ने कुरालाई नभुल्न पनि उनले कार्यकर्तालाई आग्रह गरे ।