मकवानपुर । नेकपा एमालेका केन्द्रिय सदस्य रामेश्वर रानाले लोकतन्त्रको विकल्प उन्नत लोकतन्त्र मात्रै रहेकाे बताएका छन् । लोकतान्त्रिक संविधान र प्राप्त उपलब्धि विषयमा बिहीबार हेटौंडामा भएको नागरिक समाजसंगको अन्तरसंवाद कार्यक्रममा उनले यस्तो बताएका हुन् ।
‘लोकतन्त्रको विकल्प निरङकुश राजतन्त्र हुन सक्दैन’ रानाले भने ‘संघीय लोकतान्त्रिक गणतन्त्रामक व्यवस्थामा मुलुकले गरेको विकासको स्वामित्व सबै लोकतन्त्रवादी दलहरुले लिनुपर्छ ।’ मकवानपुर इन्चार्ज समेत रहनुभएका रानाले राजतन्त्रको नाममा आम नेपालीको मनोविज्ञानलाई बिगार्ने कुचेष्टालाई सबै पक्ष मिलेर परास्त गर्नुपर्ने बताए । ‘लोकतन्त्र कुनै नारा लगाउने विषय नभई राजनीतिक दलहरुको जीवनशैली हाे’ उनले भने ‘भएका कमजोरीहरुलाई सुधार गरी व्यवस्थालाई सुदुढ बनाउन आफूहरु प्रतिबद्ध रहेका छौं ।
हामी सबैको चौतारी लोकतन्त्र रहेकाेले सम्बृद्ध नेपाल बनाउन सबै अगाडि बढेकाे उनले बताए । ‘हाल बढिरहेको प्रतिगामी हर्कतको विरुद्धमा प्रतिबादमा हामी जान सक्नुपर्छ’ उनले भने । हाल जनतामा बढिरहेको निराशकाे सम्बोधन गर्ने गरी १८ चैतमा हेटौंडामा जागरण सभा तथा र्यालिको आयोजना गरिने समेत उनले बताए । ‘जागरण सभाले आम जनतालाई सचेत गराउने छ भने राजतन्त्र आउने भ्रम समाप्त हुन्छ’ उनले भने ।
यसैगरी अन्तरसंवाद कार्यक्रममा बागमती प्रदेशका प्रथम मुख्यमन्त्री डोरमणि पौडेलले राजतन्त्र फर्काउने दिवा सपना नदेख्न चेतावनी दिए । ‘लामो संघर्ष र बलिदानबाट प्राप्त नेपालको संविधानले राजतन्त्रलाई नचिन्ने भएकोले राजतन्त्र फर्किने कुनै सम्भावना नै छैन’ उनले भने । राजा नै नभएको ठाउँमा राजतन्त्रको पक्षमा वकालत गर्नुको कुनै अर्थ नभएको उनले बताए । ‘राजतन्त्र ल्याउने कुरा त कल्पना समेत गर्न समेत सकिँदैन’ यनले भने व्यवस्था बदलियो अवस्था बदलिएन भन्ने भन्दा पनि पहिला कस्तो अवस्था थियो र अहिले कहाँ पुग्यो त्यो हेर्न जरुरी छ ।’
नेकपा एमाले जिल्ला कमिटि मकवमनपुरकाे आयाेजनामा भएकाे कार्यक्रममा जिल्ला अध्यक्ष श्रीधर पाेखरेलकाे सभाध्यक्षता तथा पार्टीका केन्द्रीय सदस्य रामेश्वर रानाकाे प्रमुख आतिथ्यतामा भएकाे थियाे । कार्यक्रममा केन्द्रिय सदस्य केदार न्यौपाने, प्रदेशसभा सदस्य एकालाल श्रेष्ठ, नगर अध्यक्ष बाेलबहादुर कार्की, भूमि आयोग मकवानपुरका अध्यक्ष बलराम बल, गैसस बागमती प्रदेश अध्यक्ष कमल कुमार विश्वकर्मा, गैसस जिल्ला अध्यक्ष रमिला सापकाेटा, बालकल्याण समाज जिल्ला संयाेजक प्रकाश खतिवडा, हिमराइट्स नेपाल जिल्ला संयाेजक कुमारी वाइवा, माइती नेपाल मकवानपुर जिल्ला संयाेजक माया लामा लगायत नागरिक समाजका अगुवाहरुको उपस्थिति रहेको थियो ।
मकवानपुर । हेटौंडा उपमहानगरपालिका ४ नम्बर वडाध्यक्ष नवीन सिग्देलले शैक्षिक गुणस्तर बृद्विकाे लागि स्ववियुको भूमिका महत्वपूर्ण हुनु पर्ने बताएका छन् ।
हेटौंडा उपमहानगर क्षेत्र भित्रका क्याम्पसका नवनिर्वाचित स्ववियु पदाधिकारी तथा सदस्यलाई वडाले गरेको सम्मान कार्यक्रम उनले यस्तो बताएका हुन् । ‘विद्यार्थी माझ स्ववियुलाई लाेकप्रिय र विश्वासिलाे रूपमा स्थापित गर्नुपर्छ’ उनले भने । मकवानपुर बहुमुखी क्याम्पसकाे पूर्व सभापति समेत रहेका सिग्देलले भने ‘स्ववियुले रचनात्मक क्रियाकलापद्वारा विद्यार्थीकाे चाैतर्फी विकास र शैक्षिकस्तर माथि उठाउन ध्यान दिनु पर्छ ।’
स्ववियुकाे शुरूवात निरंकुश पंचायती व्यवस्था विरूद्व विद्यार्थीले आवाज उठाउने क्रममा भएकाे स्मरण गर्दै उनले विद्यार्थीहरू सधै लाेकतन्त्र र परिवर्तनकाे पक्षमा रहेकाे र रहनुपर्ने बताए । निरंकुशता र लाेकतन्त्रबीचकाे संघर्षमा सधै विद्यार्थी आन्दाेलन लाेकतन्त्रकाे पक्षमा रहेकाे बताउँदै उनले कसैले लाेकतन्त्र माथी धावा बाेल्छ भने विद्यार्थीले उचित जवाफ दिनु पर्ने बताए ।
मकवानपुर बहुमुखी क्याम्पस स्ववियुका नवनिर्वाचित अध्यक्ष प्रसिद्व रेग्मीले विद्यार्थी बीचमा रचनात्मक कार्य गर्दै हकहितको पक्षमा लाग्ने बताए । उनले गणतन्त्रकाे विकल्प गणतन्त्र मात्रै भएकाे समेत बताए । त्यस्तै, हेटौंडा क्याम्पसका स्ववियुका नवनिर्वाचित अध्यक्ष अभि मैनालीले विद्यार्थीकाे अभिमतलाई आत्मसाथ गर्दै स्ववियुले जहिले विद्यार्थीकाे असल प्रतिनिधिकाे रूपमा काम गर्ने बताए ।
४ नम्बर वडा कार्यालयले हेटाैंडा नगरभित्रका सामुदायिक क्याम्पसहरू मकवानपुर बहुमुखी क्याम्पस, हेटौंडा क्याम्पस, निर्मल बहुमुखी क्याम्पस, बंशगाेपाल बहुमुखी क्याम्पसका स्ववियुका पदाधिकारी तथा सदस्यलाई बधाई तथा सम्मान गरेको हो ।
मकवानपुर । मकवानपुरका हातिम मिया अन्सारी राष्ट्रिय प्रजातान्त्रिक मुस्लिम संगठन नेपालकाे केन्द्रिय सदस्यमा मनोनित भएका छन् । राष्ट्रिय प्रजातान्त्रिक पार्टी (राप्रपा) नेपाल निकट संगठनका केन्द्रीय अध्यक्ष खालिद इकबाल इराकीले संगठनको विधान बमोजिम मकवानपुर हातिमलाई केन्द्रिय सदस्यमा मनोनित गरेका हुन् ।
हातिमकाे मनोनयन पत्रमा पार्टीको सिद्धान्त र नीतिप्रति प्रतिवद्ध भई दिइएको जिम्मेवारी इमान्दारीपूर्वक निर्वाह गरी राप्रपा नेपाल र संगठनलाई देशको एक अग्रणी राष्ट्रवादी प्रजातान्त्रिक शक्तिको रुपमा स्थापित गर्ने अभियानमा योगदान गर्नुहुनेछ भन्ने विश्वासका साथै मुस्लिम समुदायको उत्थान र विकासमा पनि सक्रिय योगदान हुनेछ भन्ने आशा राख्दै सफलताको कामना गरिएकाे छ ।
काठमाडौं । नेपाली कांग्रेस बागमती प्रदेश प्रशिक्षण विभागले बागमती प्रदेश कार्यसमिति र बागमती प्रदेशका ६६ प्रदेशसभा क्षेत्रीय सभापतिहरुलाई प्रशिक्षण दिएको छ । पार्टीले संगठन सुदृढीकरण र समसामयिक राजनीतिक घटनाक्रमका सम्बन्धमा प्रशिक्षण दिएकाे हाे ।
काग्रेस केन्द्रीय सभापति शेर बहादुर देउवाले प्रशिक्षणले संगठन सुदृढिकरण र विस्तारमा सहज हुने बताए । अहिलेकाे विकसित राजनीतिक घटनाक्रम र कांग्रेसको भावी रणनीतिबारे स्थानीय नेता कार्यकर्ताहरुलाई पार्टीकाे धारणा बुझाउन क्षेत्रीय सभापतिहरुलाई उनले निर्देशन दिए ।
कांग्रेस बागमती प्रदेश सभापति ईन्द्रबहादुर बानियाँले प्रशिक्षणले गाउँगाउँमा रहेका आम कार्यकर्ता तथा जनतालाई कांग्रेसको धारणा बारे जानकारी दिन सहज हुने बताए । कांग्रेसले पार्टीको विधान, नेपालको संविधान संशोधन गर्दा ब्यवहारिक र बैज्ञानिकतालाई जोड दिनुपर्ने उनले बताए ।
कांग्रेसका महामन्त्री गगनकुमार थापाले प्रदेश कार्यसमिति र प्रदेशसभा निर्वाचन क्षेत्रीय कार्यसमितिको काम, कर्तव्य र अधिकार, केन्द्रीय प्रवक्ता डा. प्रकाशशरण महतले आर्थिक रुपान्तरणमा कांग्रेसको भूमिका, कांग्रेस केन्द्रीय नीति, अनुसन्धान तथा प्रशिक्षण प्रतिष्ठानका निर्देशक डा. कृष्णप्रसाद पौडेलले कांग्रेसको सांगठानिक अवस्था र संगठन विस्तारको रणनीति, कार्यकारी निर्देशक डा. बुद्धीमान श्रेष्ठले कांग्रेसको आदर्श, सिद्धान्त र समसामयिक मुद्दाका साथै कांग्रेस बागमती प्रदेश कोषाध्यक्ष डा. भद्रा पराजुली भण्डारीले संघीय समावेशी गणतन्त्रमा महिलाको भूमिका सम्बन्धमा प्रशिक्षण दिएका थिए ।
नेपाली कांग्रेस बागमती प्रदेशका उपसभापति एवं प्रशिक्षण विभाग प्रमुख चन्द्र महर्जनको सभाध्यक्षतामा कांग्रेस केन्द्रीय सभापति शेरबहादुर देउवाले उद्घाटन गरेका प्रशिक्षण कार्यक्रम कांग्रेस बागमती प्रदेश प्रशिक्षण विभागको आयोजना तथा प्रदेशसभा निर्वाचन क्षेत्रीय कार्यसमिति २ क ललितपुरको व्यवस्थापनमा भएको थियो ।
मकवानपुर । राष्ट्रिय स्वास्थ्यकर्मी महासंघ मकवानपुरको अध्यक्षमा उत्सव चौलागाईं चयन भएका छन् । शनिबार मकवानपुरको हेटौंडामा भएको स्वास्थ्यकर्मी महासंघको चौथो जिल्ला अधिवेशनले चौलागाईँको नेतृत्वमा १५ सदस्यीय कार्यसमिति सर्वसम्मत चयन गरेको हो ।
स्वास्थ्यकर्मी महासंघ उपाध्यक्षमा लक्ष्मी पौडेल र सानी मोक्तान, सचिवमा हीरालाल तामाङ, कोषाध्यक्षमा समाधी बल, उपसचिवमा सविता पौडेल चयन भएका छन् । यस्तै सदस्यमा मोहन खतिवडा, परिदेश पराजुली, रुपेश सिलवाल, मेनुका यादव, पार्वती पौडेल, मिलन थापासहित सर्वसम्मत चयन भएका छन् ।
स्वास्थ्यकर्मीहरुको हक हितमा संगठित संघको अधिवेशन मकवानपुरको इन्द्रसरोवर गाउँपालिका, भिमफेदी गाउँपालिका र राक्सिराङ गाउँपालिकामा सम्पन्न भैसकेको छ भने, बाँकी पालिकामा तयारी भइरहेको बताइएकाे छ ।अधिवेशन नितर्वमान अध्यक्ष भोलानाथ चौलागाईको अध्यक्षता तथा बागमती प्रदेशका प्रथम मुख्यमन्त्री डोरमणि पौडेलको प्रमुख आतिथ्यमा भएको हाे ।
मकवानपुरले स्वास्थ्य क्षेत्रमा फड्को मारेको छः प्रथम मुख्यमन्त्री पौडेल
बागमती प्रदेशका प्रथम मुख्यमन्त्री डोरमणी पौडेलले मकवानपुरले स्वास्थ्य क्षेत्रमा फड्को मारेको बताएका छन् । राष्ट्रिय स्वास्थ्यकर्मी महासंघ मकवानपुरको चौथो जिल्ला अधिवेशनकाे उद्घाटन सत्रलाई सम्बाेधन गर्दै उनले स्वास्थ्य सेवामा संलग्न समस्त स्वास्थ्यकर्मीहरुको पेशागत हक हित र अधिकारको संरक्षण एवम् सम्वर्धन गर्न संघले पहल गनुपर्ने बताए । ‘स्वास्थ्यकर्मीको पेशा संवेदनशील पेशा हो । तपाईंहरुले चाहेको खण्डमा धेरै राम्रा कामहरु हुनसक्छ, तपाईहरुको लापरवाहीले ठूलो दुर्घटना निम्त्याउन समेत सक्छ । त्यसैले आफनो पेशाप्रति ईमान्दार र सचेत रही कार्य गर्नुहाेस’ उनले भने ।
राजनीतिक पूर्वाग्रह राखेर केही तत्वहरुले मदन भण्डारी स्वास्थ्य विज्ञान प्रतिष्ठानको विरोध गरिरहेकाे समेत बताए । ‘केही व्यक्तिहरुको निजी स्वार्थको कारण अहिले प्रतिष्ठानको विरोध भइरहेको छ’ उनले भने ‘विगत देखि हेटौंडा अस्पतालमा भइरहेको चलखेल अन्त्य हुने डरले केही तत्वहरु प्रतिष्ठानको बिरुद्धमा लागेका छन् ।
राष्ट्रिय स्वास्थ्यकर्मी महासंघ नेपालका केन्द्रीय सचिव नारायण पौडेलले चिकित्सा शिक्षा आयोगबाट सिफारिस भएदेखि स्वास्थ्यकर्मी उत्पादनसम्ममा व्यवस्थापनको पाटो चिसिदै गएको बताए । स्वास्थ्य सेवा सम्बन्धी २६ वटा ऐन र कानूनका समस्या पुनरावलोकन गरी संविधानले कल्पना गरेको समृद्ध स्वास्थ्य निर्माण गर्नुपर्ने अवस्था आएको उनले बताए । ‘स्वास्थ्यकर्मी उत्पादन भएपछि जनताले गुणस्तरीय सेवा पाए कि, पाएनन् ? यसबारे चासो दिन आवश्यक छ । देशमा उत्पादित स्वास्थ्य जनशक्तिलाई देशमै बसेर स्वास्थ्य उर्जा खर्चिन उत्प्रेरणा जगाउनु पर्छ’ उनले भने ।
कार्यक्रममा बागमती प्रदेश सभा सदस्य एकालाल श्रेष्ठले संगठनले स्वास्थ्यकर्मीहरुको हक हित र अधिकारका लागि एकजुट हुनु पर्ने बताए । मदनभण्डारी स्वास्थ्य विज्ञान प्रतिष्ठान सञ्चालन ऐन तथा बागमती प्रदेश निजामति ऐन संशोधनका लागि बागमती प्रदेशसभामा छलफल प्रक्रिया अघि बढेको उनले जानकराी दिए ।
‘स्वास्थ्य क्षेत्रलाई कानुनी, संवैधानिक, प्राविधिक तथा बजेटिकरणको दृष्टिकोणले परिपूर्ति गर्न हामी तत्पर छौं’ उनले भने ‘नेतृत्व असल भएमात्र व्यवस्था राम्रो हुने भएकाेले नेतृत्व सक्षम र क्षमतावान हुन आवश्यक छ । ‘संगठनको एउटा अंग स्वास्थ्यकर्मी संघ हो । यो अंगले स्वास्थ्य क्षेत्रको विकासमा पहरेदारको काम गरी संगठन बलियो बनाउन सघाँउ पुर्याउने आशा राखेकाे छु’ उनले भने ।
कार्यक्रममा नेपाल नर्सिङ संघ मकवानपुर अध्यक्ष गंगा दाहाल, नेपाल प्राविधिक संघ वानका केन्द्रीय सचिव रेवती थापा, नेपाल चिकित्सक संघ बागमती प्रदेश अध्यक्ष हरि बहादुर खड्का, स्वास्थ्यकर्मी महासंघ नेपाल बागमतीका सचिव विनोद लामिछाने, नेकपा एमाले मकवानपुरका अध्यक्ष श्रीधर पोखरेल, मदन भण्डारी स्वास्थ्य विज्ञान प्रतिष्ठानका उपकुलपति प्रदिप ज्ञवाली, राष्ट्रिय स्वास्थ्यकर्मी महासंघ बागमती अध्यक्ष अनुप अधिकारी लगायतले शुभकामना मन्तव्य राखेका थिए ।
अधिवेशन नितर्वमान अध्यक्ष भोलानाथ चौलागाईको अध्यक्षता तथा बागमती प्रदेशका प्रथम मुख्यमन्त्री डोरमणि पौडेलको प्रमुख आतिथ्यमा भएको हाे ।