मकवानपुर/वाग्मती प्रदेश सभाअन्तर्गत् सोमबार हुने दुईवटा समितिको सभापति छनौटका लागि हुने निर्वाचनमा सत्तापक्षले सहभागीता नै नजनाउने भएको छ ।
निर्वाचनको लागि प्रमुख प्रतिपक्षी दल नेकपा एमालेले मात्र उम्मेदवारी दर्ता गराएको छ । प्रदेश सभाअन्तर्गत् रहेका अर्थ तथा विकास समिति र शिक्षा, स्वास्थ्य तथा कृषि समिति सभापति छनौट गर्न निर्वाचनमा सत्ता पक्षले उम्मेदवारी नै नदिएको हो। आइतबार साझ ५ बजेसम्म उम्मेदवारी दर्ताको समय रहेको थियो । निर्वाचनको विषयमा गठबन्धनमा छलफल नै नभएपछि उम्मेदवारी नै नदिईएको बुझिएको छ ।
निर्वाचन कार्यतालिका अनुसार आइतबार उम्मेदवारी ५ बजेसम्म दर्ता गर्नुपर्ने थियो । तोकिएको समयमा एमालेले मात्र उम्मेदवारी दर्ता गराएको छ । एमालेको बहुमत रहेका कारण सत्तारुढ गठबन्धनले उम्मेदवार नै दर्ता नगराएको हो । एमालेले अर्थ समिति सभापतिमा काठमाडौंका नारायणबहादुर सिलवाल र शिक्षा समितिमा काठमाडौंकै केशवप्रसाद पोखरेललाई उम्मेदवार बनाएको छ । प्रदेश सभा अन्तरगत अर्थसमितिमा २० जना सदस्यमध्ये एकजना सभापति चयन हुनेछ । यो समिति गत बैशाख देखि सभापति बिहिन थियो ।
यस्तै शिक्षा, स्वास्थ्य तथा कृषि समितिका १९ जना सदस्यमध्ये एकजना सभापति चयन हुदैछ । अर्थ समितिका तत्कालिन सभापति सरेश नेपाल प्रदेश सरकारको मन्त्री बनेसँगै उक्त पद रिक्त रहेको थियो । शिक्षा, स्वास्थ्य तथा कृषि समितिका सभापति घनश्याम दाहाल राजेन्द्रप्रसाद पाण्डे नेतृत्वको सरकारमा मन्त्री नियुक्त भएसँगै उक्त पद पनि रिक्त रहेको प्रदेश सभाका सचिव कृष्णहरि खड्काले बताए ।
अर्थ समितिको सभापति पदको निर्वाचन सोमबार मध्यान्ह १२ बजेका लागि तय गरिएको छ । शिक्षा, स्वास्थ्य तथा कृषि समितिको सभापति पदको निर्वाचन सोमबार दिनको २ बजेका लागि तय गरिएको छ । दुबै समूहमा एमालेको मात्र उपस्थिति रहने भएपछि जित सुनिश्चित देखिएको छ ।
मकवानपुर । सत्तारुढ गठबन्धन दलका नेताहरु २०७९ साल जेठ महिनामा स्थानीय तहको निर्वाचन गर्न सहमत भएका छन् ।
यसअघि २०७९ फागुन महिनामा निर्वाचन गर्ने समझदारीमा सत्तगठबन्धनका ५ दल पुगेका थिए । नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी लगायतका दलहरु चौतर्फी दबावपछि जेठमै चुनाव गर्न तयार भएका हुन् ।
शनिबार साँझ प्रधानमन्त्रीको सरकारी निवास बालुवाटारमा बसेको सत्तारुढ गठबन्धनका शीर्ष नेताहरुको बैठकले जेठभित्रमा स्थानीय तहको निर्वाचन गर्न सरकारलाई सुझाव दिने निर्णय गरेको सञ्चार तथा सूचनाप्रविधि मन्त्री ज्ञानेन्द्रबहादुर कार्कीले जानकारी दिए ।
गठबन्धनको निर्णयपछि अब सरकारले निर्वाचन आयोगसँगको परामर्शमा स्थानीय तहको निर्वाचनको मिति तोक्नेछ । निर्वाचन आयोगले भने स्थानीय तह निर्वाचन ऐन २०७३ अनुसार आगामी जेठ ५ गते स्थानीय तहका जनप्रतिनिधिको कार्यकाल सकिने भन्दै त्यसको दुई महिनाअघि नै निर्वाचन गर्नुपर्ने भन्दै सरकारलाई दबाव दिँदै आएको थियो ।
तर सत्तारुढ दलका नेताहरु भने स्थानीय तहको जनप्रतिनिधिको कार्यकाल पाँच वर्षको हुने र कार्यकाल सकिएको ६ महिनाभित्र निर्वाचन गर्नुपर्ने व्यवस्था संविधानमा रहेको भन्दै स्थानीय तह निर्वाचन ऐन संविधानसँग बाझिएकाले संशोधन गरेर निर्वाचन फागुनमा सार्ने मनस्थितिमा थिए ।
मकवानपुर । प्रधानमन्त्री शेरबहादुर देउवाले स्थानीय तहको निर्वाचन चाँडै गर्ने बताएका छन् । शनिबार बालुवाटारमा बसेको सत्तारुढ ५ दलीय गठबन्धनको बैठकमा प्रधानमन्त्री देउवाले स्थानीय तह निर्वाचन ऐन २०७३ को संशोधन नगर्ने तर निर्वाचन चाडै गर्ने प्रस्ताव राखेका छन् ।
स्थानीय तह निर्वाचन ऐनअनुसार आगामी जेठ ५ मा स्थानीय जनप्रतिनिधिको कार्यकाल सकिने भन्दै निर्वाचन आयोगले वैशाखभित्र निर्वाचन गर्न प्रस्ताव गरेको छ । तर सत्तारुढ ५ दलले संविधानसँग बाँझिएको भन्दै स्थानीय तह निर्वाचन ऐन संशोधन गर्ने र स्थानीय जनप्रतिनिधिको कार्यकाल सकिएको ६ महिनाभित्र निर्वाचन गराउने व्यवस्था गर्ने सहमति गरेका थिए ।
तर स्थानीय निर्वाचन टार्न खोजेको भन्दै चौतर्फी आलोचना भएको छ भने राष्ट्रपति विद्यादेवी भण्डारीले समेत प्रधानमन्त्रीलाई पत्र पठाएर दबाव दिएकी छन् ।
यसैबीच नेकपा एकीकृत समाजवादीका अध्यक्ष माधवकुमार नेपालले वैशाखमै स्थानीय तहको निर्वाचन भए पनि त्यसको सामना गर्न तयार रहेको बताएका छन् ।
शनिबार काठमाडौंमा आयोजित पार्टी निकट निजामति कर्मचारी संगठनलाई सम्बोधन गर्दै उनले आफूहरुलाई निर्वाचनमा जानबाट डरायो भनी भ्रम छर्ने काम भइरहेको बताए । ‘हामी चुनावसँग आत्तिएका छैनौं, चुनाव वैशाखमै हुन्छ भने पनि सामना गर्न तयार छौं’, उनले भने ।
उनले संविधानको व्यवस्थाबमोजिम नै चुनावको मिति तोक्नेबारे छलफल भइरहेको तथा आगामी निर्वाचनसम्म गठबन्धन कायम रहने बताए ।
यस्तै नेकपा एमालेले स्थानीय तहको निर्वाचनको मिति घोषणाका लागि जनवर्गीय संगठनहरुमार्फत दबाबमूलक आन्दोलनको तयारी सुरु गरेको छ । आन्दोलन तयारीको विषयमा छलफल गर्नका लागि एमालेले आफ्नो २२ वटा जनवर्गीय संगठनहरुको बैठक भक्तपुरमा बोलाएको छ । बैठकमा आन्दोलन तयारीको विषयमा छलफल हुने बताइएको छ ।
मकवानपुर । नेपाली काँग्रेसको शुक्रबार बसेको केन्द्रीय कार्यसमितिको बैठकले केन्द्रीय कार्यसम्पादन समिति गठन गरेकाे छ । कार्यसमितिको भर्चुअल बैठकबाट सभापति शेरबहादुर देउवाले कार्यसम्पादन समिति गठन गरेका हुन् ।
केन्द्रीय कार्यसमितिको आकार ठूलो भएपछि काँग्रेसले कार्यसम्पादन समिति गठन गरेकाे हाे । काँग्रेस विधान अनुसार ४६ सदस्यीय सम्पादन समिति बन्ने भएपनि आज पदाधिकारीसहित ३७ जनालाई मात्र समेटिएको हो । जसमा १३ जना पदेन सदस्य रहेका छन् । कांग्रेस केन्द्रीय समिति १ सय ६८ सदस्यीय हुने व्यवस्था छ।
सभापति देउवाले १४ औं महाधिवेशनमा आफूलाई सहयोग गरेका र शीर्ष नेताहरू समेटेर कार्यसम्पादन समिति गठन गरेका हुन्। कांग्रेसमा १३ जना पदाधिकारी छन् भने कोषाध्यक्ष मनोनीत गर्न बाँकी छ। कार्यसम्पादन समितिमा प्रवक्ता पनि सदस्य हुन्छन् तर अहिले कांग्रेसले प्रवक्ता नियुक्त गरेको छैन।
सभापतिले ३१ जना केन्द्रीय सदस्यलाई कार्यसम्पादन समितिमा राख्ने पाउने व्यवस्था छ । २० जना केन्द्रीय सदस्य मनोनीत गर्न बाँकी रहेकाले कार्यसम्पादन समितिले भने पूर्णता पाएकाे छैन ।
कार्यसम्पादन समिति सदस्य
पदाधिकारीहरुबाट समितिमा रहने पदेन सदस्यहरु
सभापति देउवा, उपसभापतिद्वय पूर्णबहादुर खड्का, धनराज गुरुङ, महामन्त्रीद्वय गगन थापा, विश्वप्रकाश शर्मा सहमहामन्त्रीहरु फरमुलाह मन्सुर, उमाकान्त चौधरी, महालक्ष्मी उपाध्याय ‘डिना’, भीष्मराज आङ्दम्बे, महेन्द्र यादव, किशोर सिंह राठौर, बद्री पाण्डे र जीवन परियार ।
बरिष्ठ नेताहरुबाट समिति सदस्यहरु
वरिष्ठ नेता रामचन्द्र पौडेल, पूर्वउपसभापतिहरु गोपालमान श्रेष्ठ, विमलेन्द्र निधि, विजय गच्छदार र प्रकाशमान सिंह सम्पादन समिति सदस्य बनेका छन् । पूर्वमहामन्त्री कृष्णप्रसाद सिटौला, शशांक कोइराला, पूर्व कोषाध्यक्ष चित्रलेखा यादव, पूर्वसहमहामन्त्रीहरु रामशरण महत, अजुर्ननरसिंह केसी, प्रकाशशरण महत र सुनिलबहादुर थापा ।
केन्द्रीय सदस्यहरूबाट समिति सदस्यहरु
शेखर कोइराला, बलबहादुर केसी, बालकृष्ण खाँण, ज्ञानेन्द्रबहादुर कार्की, रमेश रिजाल, नारायण खड्का, जीप छिरिङ लामा, पद्मनारायण चौधरी, उमा रेग्मी , एनपी साउद, सुजाता कोइराला, आनन्द ढुंगाना ।
मकवानपुर । नेकपा एमालेका पोलिटब्युरो सदस्य महेश बस्नेतले सत्तारुढ गठबन्धन दल चुनावबाट भाग्न खाेजेकाे बताएका छन् । सरकारले स्थानीय तहको निर्वाचन सार्ने खेलमा लागे मुलुकले थेग्नै नसक्ने आन्दोलन हुने चेतावनी दिएका छन् । प्रेस चौतारी नेपाल मकवानपुरले विहीबार हेटौंडामा आयोजना गरेको पत्रकार सम्मेलनलाई सम्बोधन गर्दै बस्नेतले शेरबहादुर देउवा नेतृत्वको वर्तमान सरकार निर्वाचन सार्ने दाउ हेरिरहेको भन्दै नेकपा एमालेका जनवर्गीय संगठनले त्यसको सशक्त प्रतिकार गर्ने बताए ।
सत्तागठबन्धन दलले स्थानीय तह प्रदेश संघीय तीनै तहको चुनाब एकै पटक गर्ने गरी भनाइहरु सार्वजनिक भइरहेकाेमा बस्नेतले उक्त भनाइ कुनै तर्क नभइ कुतर्क रहेको बताएका छन् । नेता बस्नेतले संविधान अनुसार स्थानीय तहको मिति तत्काल घोषणा गर्न समेत माग गरेका छन् । एमाले पाँच दलिय गठबन्धनसँग एक्लै चुनाव लड्न तयार रहेको रहेको समेत उनले दाबी गरे ।
नेता बस्नेतले पाँच दलिय गठबन्धनको रुपमा रहेको वर्तमान सरकारको काम नेकपा एमालेलाई कमजोर बनाउने षड्यन्त्रमै केन्द्रीत भइरहेको समेत आरोप लगाएका छन् । स्वास्थ्यमन्त्री बिरोध खतिवडालाई आफ्नो मन्त्रालयको के काम हो भनेर थाहा नभएको अरुकाे बिरोध गर्नमै व्यस्त रहेको उनले आरोप लगाएका छन् । सरकारका मन्त्रीहरु मन्त्रालयको काम कारवाहीमा केन्द्रित हुन नसकेको उनले बताए ।
पत्रकार सम्मेलनमा युवा संघ नेपालका केन्द्रीय अध्यक्ष किरण पौडेलले चरणवद्धरुपमा वर्तमान सरकार विरुद्ध आन्दोलन गर्ने बताए । पाैडेलले सरकार गलत बाटोमा अगाडि बढेका कारण सरकारविरुद्ध युवासंघ संघर्षमा उत्रिन बाध्य भएको बताए । पौडेलले अहिलेको सरकारले स्थानीय तह जनप्रतिनिधि बिहीन बनाउन लागेको आरोप लगाए ।
प्रेस चौतारी मकवानपुर अध्यक्ष बालकृष्ण अधिकारीको अध्यक्षतामा भएको कार्यक्रममा नेकपा एमाले बागमती प्रदेशका उपसचिव महेश बतौला, नेकपा एमाले मकवानपुरका अध्यक्ष एकलाल श्रेष्ठ ,युवा संघ केन्दिय आर्थिक विभाग प्रमुख सन्तोष चौलगाई लगायतको उपस्थिती थियो ।