मकवानपुर । बकैया गाउँपालिकाका ६० जना नेपाली काँग्रेस पार्टीमा प्रवेश गरेका छन् । पार्टी प्रवेश गर्नेमा गाउँपालिकाकाे अध्यक्ष पदकाे प्रत्यासी लक्ष्मी जिम्बासहित राष्ट्रिय प्रजातन्त्र पार्टी (राप्रपा) का ६० जना गरेका छन् ।
राष्ट्रिय प्रजातान्त्रिक महिला संघको केन्द्रीय सदस्यसमेत रहेकी जिम्बासहित नवप्रवेशीहरुलाई कांग्रेस केन्द्रीय सह–महामन्त्री महालक्ष्मी उपाध्याय डीना र बागमती प्रदेश सभापति इन्द्रबहादुर बानियाँले स्वागत गर्दै सदस्यता प्रदान गरेका हुन् ।
नवप्रवेशीहरुमा राप्रपाका जिल्ला सदस्य अर्जुनप्रसाद तिमल्सिना, राप्रपा बकैयाका सचिव गोवर्धन गौतम, सहसचिव सुदजराज ढकुरी, कोषाध्यक्ष बलराम लामिछाने, गाउँ समिति सदस्यहरु सुवास राई, सोमबहादुर राई, डक्बर बहादुर भोम्जन, रामप्रसाद दाहाल, लक्ष्मण राई, स्यामकुमार राई, कृष्णबहादुर शाही लगायत राप्रपाको महिला, युवा तथा अन्य भातृ संगठनका सदस्यहरु रहेका छन् ।
पार्टी प्रवेश कार्यक्रम सम्बाेधनकाे क्रममा नवप्रवेशीहरुलाई बधाई दिँदै कांग्रेस केन्द्रीय सदस्य डीनाले आसन्न स्थानीय तहको निर्वाचनका लागि तयारीमा जुट्न लागिपर्नुपर्ने बताइन् । उनले भनिन् जनताको बीचमा कांग्रेसका उम्मेदवार निर्वाचित हुने वातावरण बनाउन सबैको भूमिका महत्वपूर्ण हुनेछ ।
त्यस्तै बागमती प्रदेश सभापति बानियाँले नवप्रवेशीहरुलाई पनि विभेद नगरी समान अवसरको वितरण गरिने बताए । उनले जनताको हितमा काम गर्न इच्छा र लगनशीलता देखाउनेलाई कांग्रेसले समान अवसर दिँदै उनीहरुलाई पार्टी तथा देश र जनताप्रति थप जिम्मेवार बनाइने प्रतिवद्धता व्यक्त गरे । बानियाँले राप्रपाका पूर्व केन्द्रीय अध्यक्ष कलम थापाको राजनीतिक भविष्य समाप्त भइसकेको समेत बताएका छन् । उनले भने,‘आफू केन्द्रीत राजनीति गर्ने, म भए हुने नभए नहुने भन्ने स्वार्थबाट ग्रसित मानसिकताले राजनीति चल्दैन ।’
कांग्रेस प्रवेश गरेसँगै नेतृ जिम्बाले आफू जनताको सेवा गर्नका लागि राजनीतिमा लागेको र सोही अनुसारको जिम्मेवारी दिन आग्रह गरिन् । कार्यक्रममा कांग्रेस मकवानपुरका कार्यबाहक सभापति विष्णु लामिछाने, प्रवक्ता प्रदीप कोइराला, संघीय सभापति दामोदर खनाल, क्षेत्रीय सभापति सुशान्त श्रेष्ठ, सचिव भूमिनन्द गौतमलगायतको उपस्थिति रहेको थियो ।
मकवानपुर । सरकारले स्थानीय तहको निर्वाचन २०७९ साल वैशाख ३० गर्ने निर्णय गरेको छ । साेमबारकाे मन्त्रिपरिषद् बैठकले स्थानीय निर्वाचनको मिति तय गरेको हाे ।
प्रधानमन्त्रीको सरकारी निवास बालुवाटारमा बसेको मन्त्रिपरिषदको बैठकले वैशाख ३० मा सवै स्थानीय तहकाे निर्वाचन गर्ने एकै पटक गर्ने निर्णय गरेकाे हाे । सत्तागठबन्धन ३ दलको आइतबारको बैठकमा प्रधानमन्त्री देउवाले अबको मन्त्रिपरिषद्को बैठकमा स्थानीय निर्वाचनको मिति घोषणा गर्ने जानकारी गराएका थिए ।
निर्वाचन आयोगले एकै चरणमा गर्ने भए १४ वैशाख र २ चरणमा गर्ने भए १४ र २२ वैशाखको मिति सिफारिस गरेको थियो । तर सत्तारुढ पाँच दलीय गठबन्धनले जेठ मसान्तभित्र निर्वाचन गर्ने बताएपछि आयोगले ४ जेठकाे मिति प्रस्ताव गरेकाे थियाे । स्थानीय तह निर्वाचन ऐनअनुसार हाल कायम रहेका ७ सय ५३ स्थानीय तहका जनप्रतिनिधिको कार्यकाल २०७९ जेठ ५ मा कार्यकाल सकिने भएकाले वैशाख अन्तिम वा जेठ पहिलो साता निर्वाचन गर्ने गरी सरकारलाई सिफारिस गरेको थियो ।
मकवानपुर । बागमती प्रदेशकी सामाजिक विकास मन्त्री कुमारी मोक्तानले प्रदेशका विभिन्न स्थानमा भइरहेकाे विकास निर्माण र विद्यालयहरुको अनुगमन गरेकी छन् । चितवनको भरतपुर महानगरपालिका र माडी नगरपालिकामा १ दर्जन बढी विद्यालय, शिक्षालय, कभर्ड हल र विकास, निर्माणको मन्त्री मुक्तानले अनुगमन गरेकी हुन् ।
मन्त्रालय अन्तर्गत निर्माणाधिन तथा संचालित विद्यालय र बहुप्राविधिक शिक्षालयहरुको भवन, प्रयोगशालाहरु, निर्माणाधिन कभर्ड हल, १ विद्यालय एक उद्यम कार्यक्रम अन्तर्गत विद्यालयहरुमा संचालित हाँस पालन, धान खेती लगायतको मन्त्री मुक्तान सहितकाे टोलीले अनुगमन गरेको हाे ।
मन्त्री मोक्तानसहितको टोलीले भरतपुर महानगरपालिका १० स्थित नारायणी नमुना माध्यमिक विद्यालय, नारायणी बहुप्राविधिक शिक्षालय, भरतपुर २२ स्थित निर्माणाधिन कभर्ड हल, भरतपुर २३ स्थित भरतपुर बहुप्राविधिक शिक्षालयको अनुगमन गरेको थियो । साथै, माडी नगरपालिकामा निर्माणाधिन कभर्ड हल, माडी ८ स्थित जनजीवन माध्यमिक विद्यालयमा प्रविधि सहयोग, तटबन्धन र वाल निर्माण, माडी ६ स्थित जनकल्याण माध्यमिक विद्यालयको हाँस पालन र धान खेती, दिवाकर स्मृति बहुप्राविधिक शिक्षालय र निर्माणाधिन भवन तथा माडी ५ स्थित दिवाकर मेमोरियल विद्यालयको निर्माणाधिन भवन र धान खेती अनुगमन गरिएको थियो ।

मन्त्री मोक्तानलाई विद्यालयहरुका प्रधानध्यापक तथा अध्यक्ष, बहुप्राविधिक शिक्षालयहरुका प्रमुख, निर्माण कम्पनीहरुका प्रतिनिधिले भएका विकास र प्रगति विवरण, बजेट, समस्या र थप सहयोगबारे अवगत गराएका थिए । मन्त्री मोक्तानसहितको टोलीलाई माडी नगरपालिकाका मेयर ठाकुरप्रसाद ढकालसहित विद्यालय, शिक्षालय, कम्पनीहरुका प्रमुख तथा प्रतिनिधिहरुले स्वागत समेत गरेका थिए ।
मन्त्री मोक्तानले विकास निर्माणमा ढिला सुस्ती अन्त्य गरी चाँडो र गुणस्तरीय विकास निर्माण गर्न सबैलाई आग्रह गर्दै कर्मचारीलाई सक्रिय रहन समेत निर्देशन दिएकी छन् । अनुगमन टोलीमा सामाजिक विकास मन्त्रालयका सचिव यज्ञप्रसाद ढुङ्गेल, आर्थिक मामिला मन्त्रालयका सचिव धनिराम शर्मा, प्राविधिक शिक्षा तथा व्यवसायिक तालिम परिषद् (सीटीइभीटी) बागमती प्रदेश कार्यालय हेटौंडाका निर्देशक टैलेन्द्र आचार्य लगायतको सहभागिता रहेको थियो ।
मकवानपुर । निर्वाचन आयोगले आसन्न निर्वाचनलाई लक्षित गरी मतपत्र डिजाइन समेतका लागि निवेदन माग गरेको छ । आयोगले शनिबार सार्वजनिक सूचना प्रकाशित गरेर मतपत्र, लोगो, निर्वाचन चिह्न तथा निर्वाचन शिक्षा तथा सूचना सामग्री डिजाइनका विज्ञ सूचि तयारीकाे लागि निवेदन मागेको हो ।
आयोगले तोकेको समय र अवधि सम्म काम गर्न चाहने इच्छुक व्यक्तिले सूचना प्रकाशित भएको मितिदेखि ५ दिनभित्र आवेदन दिन सक्ने सूचनामा उल्लेख छ । आयोगद्वारा शनिबार जारी सूचनामा चित्रकला र ग्राफिक डिजाइनमा स्नातक गरेका अनुभवी विज्ञहरूबाट निवेदन आह्वान गरिएको छ। सूचनामा ग्राफिक्स डिजाइन र दृष्टान्त चित्रमा दुई वर्ष अनुभव भएकाहरूलाई पाँच दिनभित्र निवेदन दिन भनिएको छ।
आवेदन आयोगको कार्यालय वा आयोगको इमेलमा दर्ता गर्न सकिने भनिएको छ । निवेदनको ढाँचा आयोगको मतदाता नामावली तथा निर्वाचन सञ्चालन शाखाबाट वेबसाइटबाट प्राप्त गर्न सकिने बताएको छ ।
मकवानपुर । नेपाली कांग्रेस मकवानपुरका कार्यबाहक सभापति विष्णुप्रसाद लामिछानेले विहीबार पदभार ग्रहण गरेका छन् ।
पार्टीको १४ औँ महाधिवेशन अन्तर्गत मंसिर अन्मित साता सम्पन्न बागमती प्रदेश अधिवेशनबाट मकवानपुर सभापति इन्द्रबहादुर बानियाँ प्रदेश सभापति निर्वाचित भएपछि जिल्ला उपसभापति रहेका लामिछानेले कार्यबाहकको जिम्मेवारी पाएका थिए ।उनले विहीबार औपचारिक रुपमा पदभार ग्रहण गरेका हुन् ।
पदभार ग्रहण गर्दै कार्यबाहक सभापति लामिछानेले नेपाली कांग्रेसको जिल्ला अधिवेशन स्थानीय निर्वाचन पछि गर्न सहमतिको लागि आग्रह गरेका छन् । स्थानीय निर्वाचनको मिति नजिकै आईरहेको सन्दर्भमा सिंगो पार्टी अब निर्वाचनमा केन्द्रीत हुनुपर्ने भन्दै स्थानीय तहको निर्वाचन पछि मात्र जिल्ला अधिवेशन गर्नको लागि उनले आग्रह गरेका हुन् । सहमति भएको अवस्थामा आफु अब हुने अधिवेशनमा सभापतिको लागि तयार रहेको समेत उनले बताए । उनले भने ‘साथिहरु सबैले सहयोग गर्ने हो भने म जिल्ला सभापति हाक्न तयार छु ।’
केहि दिन अघि मात्रै प्रदेश सभापति बानियाँले जिल्लाका पदाधिकारीहरुलाई पनि जो जुन पदमा छ, सोही पदमा रहेर आफ्नो जिम्मेवारी निर्वाह गर्न निर्देशन दिएका थिए । जिल्लाको निर्वाचन नभएसम्मको लागि उपसभापतिलाई भने कार्यबाहक सभापतिको जिम्मेवारी दिइएको हो ।