मकवानपुर । फागुन २१ काे लागि तोकिएकाे प्रतिनिधि सभाकाे निर्वाचनकाे मिति नजिकिदै जादाँ मकवानपुरमा तीव्र रुपमा प्रचार प्रसारकाे कार्यमा पार्टी जुटेकाे छ । जिल्लामा क्रियाशील तथा उम्मेदवारी दिएका दलकासहित स्वतन्त्र उम्मेदवार समेत घरदैलोमा व्यस्त छन् ।
यसैबिच मकवानपुर क्षेत्र नं. २ का एमाले उम्मेदवार महेश कुमार बर्तौला अघिल्लो निर्वाचनमा गरेका प्रतिबद्धताहरू पूरा गरेको दाबी गरे । ‘मैले चुनावका बेला संसदमा निदाएर बस्दिनँ, रेडियो र टेलिभिजन खोल्दा आफ्नो क्षेत्रको मुद्दा उठाएको सुन्न र देख्न पाउने गरी काम गर्छु भनेको थिएँ,’ बर्तौला प्रचारप्रसारमा भने, ‘त्यो वाचा मैले संसदमा देखाएको सक्रियतामार्फत पूरा गरेको छु ।’
थाहानगरकाे गाउँटोलमा पुगेका बर्तौलालाई मकवानपुरका दार्शनिक नेता रुपचन्द्र बिष्ट (रुदाने) कै झल्को आउने गरी स्थानीयले सम्झिएका छन् । निर्वाचनका क्रममा घरदैलो गर्दै थाहा नगरपालिका (पालुङ) का गाउँटोलहरुमा पुगिरहेका बर्तौलाको कार्यशैलीमा जनमुखी नेता रुपचन्द्र बिष्ट ‘‘रुदाने’को झल्को पाएको उनीहरुले बताएका छन् ।
आफ्नो कार्यकालको महत्त्वपूर्ण उपलब्धिका रूपमा चित्लाङ–चन्द्रागिरी–थानकोट सडकलाई प्रस्तुत गर्दै उनले भने ‘मैले यो सडकको स्तरोन्नतिका लागि स्रोतको अभाव हुन दिन्न भनेको थिएँ । ३२ महिनाकै कार्यकालमा सरकारबाट झण्डै ६२ करोड बजेट सुनिश्चित गराउन सफल भएको छु । अहिले सडकको काम तीव्रताका साथ भइरहेको छ ।’
विगतमा चुनाव जितेपछि नेताहरू गाउँ नफर्कने आम गुनासोलाई बर्तौलाले तोडिदिएको स्थानीयले बताएका छन् । २०७९ को निर्वाचनपछि उनी संसद चलेको समयबाहेक अधिकांश समय गाउँकै घरदैलो र जनताका समस्या समाधानमा केन्द्रित हुने गरेका थिए ।
एमालेका निर्वाचन फोकल पर्सन आशिष अस्लामीका अनुसार, मतदाताहरूले बर्तौलाको सक्रियतालाई रुदानेको जनमुखी शैलीसँग तुलना गरेका छन् । बुधबार थाहाका मतदाताहरूसँग भेटघाट गर्दै बर्तौलाले स्थानीयका गुनासो सुन्ने, सुझाव लिने तथा आशीर्वाद ग्रहण गरेका थिए ।
यस्तो छ बर्तौलाको १० बुँदे प्रतिवद्धता
महेश कुमार बर्तौलाले १० बुँदे प्रतिवद्धता पत्र सार्वजनिक गरेका छन् । सामाजिक सञ्जाल फेसबुकमार्फत उनले आउँदो निर्वाचनमा आफ्ना १० बुँदे प्रतिवद्धता सार्वजनिक गरेका हुन् ।
१. मध्यवर्ती क्षेत्रका समस्याको दिगो समाधानलाई पहिलो प्राथमिकतामा राखेका छन्। भूमि समस्या समाधानका लागि कानूनी सुनिश्चितता, मानव–वन्यजन्तु द्वन्द्व व्यवस्थापन तथा न्यायोचित क्षतिपूर्ति र मध्यवर्ती क्षेत्रको सिमाना हेरफेरका विषयमा आवश्यक पहल गर्ने उनको प्रतिवद्धता छ।
२.पूर्वाधार विकासअन्तर्गत खानेपानी, सिंचाइ, कृषि तथा सञ्चार पूर्वाधार विस्तार, बस्ती संरक्षण तटबन्धन, सडक र पुल निर्माणलाई प्राथमिकता दिइने उल्लेख गरिएको छ । विशेषगरी रूपचन्द्र विष्ट मार्ग (मनहरी–राक्सिराङ–कैलाश–थाहा जोड्ने सडक) को निर्माण तथा स्तरोन्नतिमा पहल गरिने उल्लेख गरिएको छ।
३. स्वास्थ्य सेवामा नागरिकको सहज र सरल पहुँच स्थापना गर्ने योजना अघि सारिएको छ।
४. कृषि क्षेत्र सुदृढीकरणका लागि दुग्धजन्य र मासुजन्य उत्पादनको बजार विस्तार गर्दै ‘खोरेतमुक्त मकवानपुर’ अभियान सञ्चालन गरिने, वन्यजन्तुबाट हुने बाली क्षतिमा न्यायोचित क्षतिपूर्ति तथा नियन्त्रणका लागि कानूनी र संरचनागत व्यवस्था गरिने प्रतिवद्धता सार्वजनिक गरिएको हो।
५. सहकारी, कृषि र वन स्रोतको परिचालनमार्फत रोजगारी तथा स्वरोजगार सिर्जना गर्ने योजना पनि अघि सारिएको छ ।
६. शिक्षा, युवा तथा खेलकुद क्षेत्रमा ‘एक पालिका–एक आवासीय विद्यालय’ अवधारणाअनुसार शैक्षिक पूर्वाधार विकास, ‘पढ्दै कमाउँदै’ कार्यक्रमको नीतिगत सुनिश्चितता, युवा–विद्यार्थीसँग संसदीय संवाद कार्यक्रम सञ्चालन तथा मनहरीमा मदन भण्डारी क्षेत्रीय रंगशाला निर्माणमा पहल गरिने उल्लेख गरिएको छ। युवा उद्यम प्रवद्र्धन, स्टार्टअप कर्जा सहजता र कर्जाको सीमा वृद्धि गर्न प्रतिवद्ध रहेको बर्तौलाले बताए ।
७. कानून तथा नीति निर्माण प्रक्रियामा जनसहभागिता सुनिश्चित गर्ने, विभिन्न जाति, जनजाति, सिमान्तकृत समुदाय, महिला, दलित तथा अपाङ्गता भएका व्यक्तिको अधिकार, ज्ञान, सीप र संस्कृतिको संरक्षण तथा प्रवद्र्धन गर्ने प्रतिवद्धता पनि सार्वजनिक गरिएको छ ।
८. जनताका विकास आयोजनालाई सम्बोधन गर्न संसदीय निर्वाचन क्षेत्र विकास कार्यक्रम लागू गर्न पहल गरिने,
९. राक्सिराङ–कैलाश गाउँपालिकामा ‘समृद्धि विशेष कार्यक्रम’ सञ्चालन तथा थाहा, इन्द्रसरोवर र भीमफेदी गाउँपालिका समेटेर उत्तरी मकवानपुरमा पर्यटन सर्किट निर्माण गरिने योजना अघि सारिएको छ ।
१०. देशव्यापी रूपमा बढ्दो लागुऔषध दुव्र्यसन न्यूनीकरणका लागि कानूनी तथा संरचनागत सुधारसहित अभियान सञ्चालन गर्ने र स्थानीय, प्रदेश तथा संघीय सरकारसँग समन्वय गरी मकवानपुरमा उद्योगधन्दा सञ्चालनका लागि लगानीमैत्री वातावरण निर्माण गर्ने उम्मेदवारको भनाइ छ ।
एमाले देश निर्माणको नेतृत्वदायी शक्ति: राना
मकवानपुर क्षेत्र नं. १ का नेकपा एमाले उम्मेदवार रामेश्वर रानाले यहि फागुन २१ गते हुने निर्वाचनलाई आफ्नो पक्षमा माहोल बनाउनी उदेश्यले चुनावी घरदैलो तथा मतदाता भेटघाट कार्यक्रमलाई तीव्र बनाएका छन् । उनले पछिल्ला दिनहरूमा आफ्नो निर्वाचन क्षेत्रमा निरन्तर रुपमा जनतामाझ पुगेका रानाले हेटौंडा उपमहानगरपालिकाकाे ६ र १६ नम्बर वडामा आयोजित कार्यक्रमलाई सम्बोधन गर्दै एमाले देश निर्माणको नेतृत्वदायी शक्ति भएको दाबी गरेका छन्।
उनले भने ‘एमाले देश बनाउने शक्ति हो देश बिगार्ने होइन ।’ उनले विगतका सरकारहरूको कामको समीक्षा गर्दै अबको निर्वाचन देशलाई सही मार्गमा फर्काउने अवसर भएको उल्लेख गरे । फरक राजनीतिक परिस्थिति र चुनौतीपूर्ण अवस्थाबीच हुन लागेको यस निर्वाचनलाई उनले निर्णायक मोडको रूपमा व्याख्या गरे।
रानाले कार्यकर्ता र समर्थकहरूलाई घर–घरमा पुगेर पार्टीका एजेन्डा स्पष्ट रूपमा राख्न आग्रह गरे। जनताका गुनासा, आलोचना र सुझावलाई गम्भीरतापूर्वक सुन्ने र समाधानतर्फ अग्रसर हुने प्रतिबद्धता जनाउँदै उनले विकास, सुशासन र स्थायित्वलाई मुख्य प्राथमिकता बनाउने बताए।
‘देशलाई अस्थिरता र अव्यवस्थाबाट मुक्त गर्दै सही ट्र्याकमा ल्याउन देशभर एमालेको जित आवश्यक छ’ उनले भने । राष्ट्रको स्वाभिमान, समृद्धि र स्थायित्वका लागि एमालेको बहुमत अपरिहार्य रहेकाे उनले बताए । ‘घरदैलो क्रममा स्थानीय राखेका समस्या, अपेक्षा र सुझावलाई समेटेर योजनाबद्ध रूपमा समाधान गर्ने बिश्वास रानाले दिएका छन्।
मकवानपुर । दाङमा राष्ट्रिय स्वतन्त्र पार्टी (रास्वपा) का कार्यकर्ताले नेकपा एमालेको झण्डा जलाएको विरोदमा मकवानपुरमा विरोध प्रदर्शन गरिएको छ।
राष्ट्रिय युवा संघ मकवानपुरको नेतृत्वमा निकालिएको जुलुसमा सहभागी युवाहरूले उक्त गतिविधि लोकतान्त्रिक मूल्य–मान्यताविपरीत रहेको बताएका छन्। राष्ट्रिय युवा संघ मकवानपुरका अध्यक्ष राजेश नगरकोटीले झण्डा जलाउने कार्य अस्वीकार्य रहेको भन्दै सम्बन्धित पक्षले २४ घण्टाभित्र कारबाही नगरे आन्दोलनमा जाने चेतावनी दिए।
युवा संघले फागुन ११ गते हेटौैडामा रास्वपा सभापति रवि लामिछाने तथा बालेन शाह सहभागी हुने कार्यक्रममा संयमता अपनाउन समेत आग्रह गरेकाे छ । प्रदर्शनका क्रममा रास्वपाले घण्टी बजाउँदै हिँड्ने शैलीलाई ‘अराजनीतिक गतिविधि’को संज्ञा दिँदै अस्वीकार्य रहेको नगरकोटीले बताए। एमाले संगठित, अनुशासित राजनीतिक संगठन भएकाले यस्ता गतिविधिले पार्टीलाई कमजोर नबनाउने दाबी गरे ।
लोकतान्त्रिक मूल्य–मान्यताविरुद्धका यस्ता गतिविधिको प्रतिवाद गर्न आवश्यक भएकाले चेतावनीसहितको प्रदर्शन गरिएको बताइएकाे छ । हाम्रो संगठनको संस्कारका कारण यो हाम्रो सांगीतिक विरोध भएकोले यसलाई सामान्य नदिन युथ भोलेन्टियरका केन्द्रीय सदस्य सानु लामाले चेतावनी दिए ।
यसैगरी एमालेनिकट विद्यार्थी संगठन अनेरास्ववियुले दाङमा पार्टीको ‘सूर्य’ अंकित झण्डा जलाएको घटनाको विरोध जनाउँदै काठमाडौंमा मसाल जुलुस निकालेको छ ।
अनेरास्ववियुले आरआर क्याम्पसबाट मसाल जुलुस निकालेको हो ।
एमालेले आफ्नो पार्टीको झन्डा जलाएको आरोप रास्वपाको नेता कार्यकर्तालाई लगाएको छ । रास्वपाले यसको खण्डन गर्दै झन्डा जलाउने घटनामा पार्टीका नेता कार्यकर्ता संलग्न नरहेको बताइसकेको छ ।
यसैबीच नेकपा एमालेको झन्डा जलाएको आरोपमा एक जना पक्राउ परेका छन् । जिल्ला प्रहरी कार्यालय दाङले घटनामा संलग्न रहेको आरोपमा दाङको तुलसीपुर उपमहानगरपालिका-७ कालाखोलाका ५५ वर्षीय बुद्धिबहादुर बस्नेतलाई शुक्रबार नियन्त्रणमा लिएको हो ।
मकवानपुर । प्रतिनिधि सभा सदस्य निर्वाचन मिति १५ दिन मात्र बाँकी रहदा उम्मेदवारहरूले घरदैलो बलियी र प्रभावकारी बनाउन जोडबल गर्दै आएका छन् ।
पछिल्ला दिन उम्मेदवारहरू मतदाताको घरदैलोमा केन्द्रित भएका छन् । नेकपा एमाले मकवानपुर क्षेत्र नम्बर –१ को उम्मेदवार रहेका रामेश्वर राना पनि घरदैलो कार्यक्रमलाई तीव्रता दिइरहेका छन् ।
बुधवार बिहान ७ बजेदेखि नै रानाले हेटौंडा उपमहानगरपालिका –१४ नम्वर वडाबाट घरदैलो शुरु गरेका रानाले मतदाताको घरदैलोमा पुग्दै आफ्ना र पार्टीका एजेन्डा प्रस्तुत गर्दै मत मागिरहेका छन् ।
२०६४ सालको संविधानसभा निर्वाचनपछि प्रत्यक्ष चुनावी प्रतिस्पर्धाबाट केही समय टाढा रहेका राना करिब १८ वर्षपछि पुनः प्रतिनिधिसभा निर्वाचनमा होमिएका हुन् ।
स्वच्छ छवि, संयमित स्वभाव र शालीन राजनीतिक शैलीका कारण उनले स्थानीय राजनीतिमा फरक पहिचान बनाएका छन् । यही कारणले पनि उनले मतदाताबाट सकारात्मक प्रतिक्रिया पाइरहेका छन् ।
मकवानपुर–१ अन्तर्गत हेटौंडा उपमहानगरपालिकाका १५ वडा, बकैया, बागमती गाउँपालिका तथा मकवानपुरगढी गाउँपालिकाका ४ वडा समेटिएका छन् ।
४० वडा रहेको यस निर्वाचन क्षेत्रमा १३ राजनीतिक दलका १३ तथा १० स्वतन्त्र गरी कूल २३ जना उम्मेदवार प्रतिस्पर्धामा छन् ।
मकवानपुर । प्रतिनिधि सभाको लागि फागुन २१ गते निर्वाचन तोकिएको छ । देशै भर चुनावी चहलपहल बढी रहेको छ । उम्मेदवारहरु चुनावी अभियानमा आफ्नो क्षेत्रमा व्यस्त रहेका छन् । मकवानपुरको दुबै क्षेत्रमा चुनावी अभियानमा उम्मेदवारहरु स्थानीयस्तरमा भेटघाटमा व्यस्त छन् ।
निर्वाचन २०८२ अन्तरगत रहेर केही दिन मकवानपुरको दुबै क्षेत्रका उम्मेदवारहरुको परिचय प्रस्तुत गर्दैछौ ।
विजय गौतम (नेपाल कम्युनिष्ट पार्टी) नेकपा
मकवानपुर-१ मा नेपाली कम्युनिस्ट पार्टी (नेकपा) को तर्फबाट विजय गौतमले प्रतिनिधिसभा सदस्यको उम्मेदवारी दिएका छन् । काभ्रेमा जन्मिएका मकवानपुरको बकैया गाउँपालिका स्थायी घर भएका ४० वर्षीय गौतम विद्यार्थी राजनीतिबाट मुलधारकाे राजनीतिमा आएका हुन् ।
- विद्यार्थी राजनीतिमा आफूलाई प्रमाणित गर्दै छोटो समयमै पार्टी जिम्मेवारी पाउँदै मूलधारको राजनीतिमा स्थापित भएका हुन् उनी । उनको राजनीतिक यात्रा आन्दोलनको पृष्ठभूमिबाट अघि बढ्दै तत्कालीन नेकपा माओवादी पार्टीको केन्द्रीय सदस्य तथा मकवानपुर इञ्चार्जको भूमिकामा पुगेका उनी जिल्लामा पार्टी संगठन सुदृढीकरण र राजनीतिक व्यवस्थापनमा सक्रिय रहेका छन् ।
- युवा उमेरमै केन्द्रीय जिम्मेवारी पाएका गौतम पार्टी संगठन, कार्यकर्ता समन्वय र स्थानीय मुद्दामा सक्रिय भूमिकाका कारण मकवानपुरमा परिचित छन् । विशेषत: सुशासनको पक्षमा उनले आवाज उठाउँदै आएका छन् ।
- गौतमले नीति निर्माण र प्रशासनिक कामको प्रत्यक्ष अनुभव पनि हासिल गरेका छन् । नारायणकाजी श्रेष्ठ गृहमन्त्री रहँदा उनको सचिवालयमा रहेर काम गरेको अनुभवले उनलाई राज्य सञ्चालन, सुरक्षा संयन्त्र र प्रशासनिक प्रक्रियाबारे व्यावहारिक ज्ञान दिएको छ । यही अनुभवलाई संसदीय अभ्यास र नीति निर्माणमा उपयोग गर्ने बताउँदै आएका छन् ।
- त्रिभुवन विश्वविद्यालयबाट स्नातकोत्तर अध्ययन पूरा गरेका गौतम युवामैत्री राजनीति र परिवर्तनमुखी एजेन्डा उठाएका छन् । विकास र सुशासनलाई आफ्नो मूल राजनीतिक एजेन्डा बनाएका छन् ।
“म पहिलोपटक आएको हुँ, राम्रो गर्न आएको हुँ । तपाईंहरूले दिनुभएको भरोसा मन, वचन र कर्मले टुट्न दिने छैन’ गौतम भन्छन् ‘जति काम गर्छु, शिर उचो हुने गरी गर्छु । तपाईंहरूबाट टाढाको होइन फोन गर्दा भेटिने, ढोका ढकढक गर्दा निस्किने प्रतिनिधि बनेर काम गर्छु ।’
‘हाम्रो पुस्ता त जसोतसो गुज्रियो, तर हाम्रो अर्को पुस्ता पासपोर्ट च्यापेर विदेश जान बाध्य नहोस् भन्ने मेरो लडाइँ हो’ उनले भने। व्यवस्था बद्लियो, अब हाम्रो आँगन, हाम्रो बस्ती, हाम्रो जीवन बदलिनुपर्ने उनले बताए ।
मकवानपुर क्षेत्र नम्बर १ मा गौतमसहित स्वतन्त्र १० तथा दलका १३ जना निर्वाचनमा उम्मेदवार छन् ।
मकवानपुर । नेकपा एमाले मकवानपुरकाे निर्वाचन परिचालन सचिवालय बैठकले जिल्लाको दुवै निर्वाचन क्षेत्रमा पार्टीको जीत सुनिश्चित रहेको निष्कर्ष निकालेको छ ।
विगत निर्वाचनमा पार्टीको उम्मेदवारले प्राप्त गरेको मतलाई सुरक्षित गर्न र फरक चुनौतीलाई सामना गर्न सबै नेता र कार्यकर्ता चनाखो हुनपर्ने र प्रचार कार्यलाई थप प्रभावकारी बनाईनु पर्ने निर्णय समेत बैठकले गरेकाे छ । उम्मेदवारहरू कार्यकर्ता र मतदाता समक्ष पुग्दा अत्यन्तै उत्साहप्रद रहेको र यसअघि सञ्चालित उम्मेदवार अगुवा कार्यकर्ता भेला जिल्लाकाे १ सय २ वटै वडामा गरिएको निर्वाचन प्रचार प्रसार संयोजक नवीन सिग्देलले जानकारी दिए ।
निर्वाचन सम्पर्क कार्यलय वडा तहसम्म खोलिएकाे, पार्टी र जनसंगठनमा निर्वाचन परिचालन कमिटीहरू निर्माण भएको निर्वाचन परिचालन कमिटी सचिव हिदम लामाले बताए । बैठकमा निर्वाचन परिचालन मतदातासँगको जनसम्वाद, प्रचार प्रसार, स्वयम् सेवक परिचालन, आर्थिक व्यवस्थापन र घोषणा पत्र निर्माणबारे छलफल भएको सिग्देलले बताए ।
निर्वाचन परिचालन कमिटी, अनुगमन समिति संयोजक डोरमणि पौडेलले पार्टीप्रति विपक्षीले फैलाएको सबै भ्रमलाई मतदाताको बीच चिर्दै राष्ट्रिय रूपमा लोकतन्त्र स्थापना गर्न खेलेको योगदान, संविधान जारी गर्न र मुलुकमा शान्ति स्थापना, मुलुकमा विकास र समृद्विको लागि खेलेको भूमिकाबारे जनतामा प्रभावकारी रूपमा लैजान सबै नेता र कार्यकर्ता एकजुट भएर लाग्न निर्देशन दिएका थिए ।
बैठकमा केन्द्रीय सदस्य तथा प्रतिनिधि सभा क्षेत्र नं. १ निर्वाचन परिचालन संयोजक एकालाल श्रेष्ठ, क्षेत्र नं. क्षेत्र निर्वाचन परिचालन सहसंयोजक राजाराम स्याङ्तान, केन्द्रीय लेखा आयोगका सदस्य तथा निर्वाचन प्रचार प्रसार संयोजक सिग्देल, प्रतिबद्धता पत्र तयारी समिति संयोजक अनन्त पौडेल, आर्थिक व्यवस्थापन समिति संयोजक गोपाल श्रेष्ठलगायतले बैठकमा समिक्षात्मक रिपोर्टिङ्ग गरेकाे बताइएकाे छ ।