मकवानपुर । प्रतिनिधि र प्रदेशसभा निर्वाचनको मतगणना सम्पन्न भएको छ । निर्वाचन आयोगले आयोगको वेबसाइटमा राखिएको मत नै फाइनल मत भएकाे भन्दै समानुपातिकतर्फ मतगणना सकिएको जनाएकाे हाे ।
आयोगका अनुसार कुल समानुपातिक तर्फ १ करोड ५ लाख ६० हजार ६७ मत सदर भएको छ । समानुपातिकतर्फ निर्वाचन आयोगले सार्वजनिक गरेको अन्तिम तथ्यांक अनुसार एमाले पहिलो दल बनेको छ । प्रत्यक्ष निर्वाचनमा नेकपा एमाले ४४ सिटका साथ दाेस्राे भएकाेमा समानुपातिकतर्फ २८ लाख ४५ हजार ६ सय ४१ मत प्राप्त गर्दै पहिलाे भएकाे छ ।
प्रत्यक्षमा ५७ सिट जित्दै पहिलो दल बनेको नेपाली कांग्रेस भने समानुपातिकतर्फ दोस्रो स्थानमा रहेको निर्वाचन आयोगले बताएकाे छ । कांग्रेसले २७ लाख १५ हजार २ सय २५ मत प्राप्त गरेको छ । त्यस्तै, माओवादी केन्द्रले समानुपातिकर्फ ११ लाख ७५ हजार ६ सय ८४ मत प्राप्त गर्दै तेस्राे भएकाे छ । चौथोमा रहेको राष्ट्रिय स्वतन्त्र पार्टीले ११ लाख ३० हजार ३४४ मत प्राप्त गरेको छ भने राष्ट्रिय प्रजातन्त्र पार्टीले ५ लाख ८८ हजार ८ सय ४९ मत ल्याइ पाचाैं भएकाे छ ।
आयोगका अनुसार जनता समाजवादी पार्टी नेपालले ४ लाख २१ हजार ३ सय १३ मत प्राप्त गरी छैटौ स्थान बनाउँदा जनमत पार्टीले ३ लाख ९४ हजार ५ सय ६६ मत प्राप्त गरी राष्ट्रिय पार्टी बन्न सफल भएकाे छ ।
नेकपा एकिकृत समाजवादीले आयाेगले ताेकेकाे थ्रेसहाेड कुल सदर मतकाे ३ प्रतिशत प्राप्त गर्न नसकी राष्ट्रिय पार्टी बन्न पाएन भने अन्य दलले १ लाख भन्दा कम मत प्राप्त गरेका छन् । जसमा नेकपा (एमाले)बाट विभाजन भएको दल एकीकृत समाजवादी भने राष्ट्रिय दल बन्न असफल भएको छ । १० सिट प्रत्यक्षमा जिते पनि नेकपा एसले समानुपातिकमा २ लाख ९८ हजार ३ सय ९१ मत प्राप्त गर्दा राष्ट्रिय दल बन्नका लागि १८ हजार ४११ मत अपुग भएको आयोगले जनाएको छ ।
राप्रपा अध्यक्षमा राजेन्द्र लिङ्देन विजयी भएपछि पुनः राप्रपा नेपाल पार्टी खोलेर चुनावमा होमिएका कमल थापाकाे पार्टीले देशभरबाट न्युन मत प्राप्त गरेकाे छ । राप्रपा नेपालले समानुपातिक तर्फ २१ हजार ६ सय ९६ मत मात्र पाएको छ ।
मकवानपुर । नेपाली कांग्रेस मकवानपुरले गत मंसिर ४ गते भएको निर्वाचनमा लोकतान्त्रिक बाम गठबन्धनका उम्मेदवारमाथि अन्तरघात नभएको बताएकाे छ । पार्टीले निर्वाचनमा अन्तरघात भएकाे प्रमाण भेटिए कारबाही गरिने समेत बताएको छ ।
पार्टीले आइतबार पत्रकार सम्मेलन गर्दै गठबन्धनका उम्मेदवारलाई अन्तरघात भएको सामाजिक सञ्जाल र केही सञ्चार माध्यममा प्रकाशित भएकाे समाचार आधारहीन कुरामा विश्वास नगर्न पार्टी र गठबन्धका नेता कार्यकर्तामा आग्रह गरेको हो । विशेष गरी प्रतिनिधि सभा क्षेत्र नम्बर १ की उम्मेदवार महालक्ष्मी उपाध्याय डीना र १ (ख) का उम्मेदवार आनन्दराम पराजुलीमाथि गठबन्धन दल र पार्टीबाटै अन्तरघात भएको भनी आधारहीन प्रचार गरिएको पार्टीले जनाएको छ ।
‘हामी सबै पार्टी र गठबन्धनका उम्मेदवार जिताउन प्रतिवद्ध भएर लागेका थियौं । सबैको प्रयास हुँदा हुँदै पनि उहाँहरुको पराजय भयो, हामी दुखित छौं’ पार्टी जिल्ला सभापति बुद्ध लामाले भने । ‘केही माध्यमबाट पार्टीका जिम्मेवार व्यक्तिहरुकै नाम लिएर अन्तरघात गरियो भनेर कुप्रचार भएकाे छ’ लामाले भने पार्टी र गठबन्धनभित्र निर्वाचनको समीक्षा हुनै बाँकी छ, यदि कतै कसैले कमजोरी गरेको रहेछ भने हामी त्यसपछि के गर्नुपर्छ हामी गर्छौं ।’
पार्टीका उम्मेद्वारहरुको पराजयका सम्बन्धमा भएको प्रचार प्रसारप्रति ध्यानाकर्षण भएको भन्दै नेपाली कांग्रेस जिल्ला कार्यसमिति मकवानपुर एवम् नेपाली कांग्रेस मकवानपुरका जिल्ला सभापति, बागमती प्रदेश सभापति लगायत जिल्ला तहका नेताहरु गठबन्धनको मर्म÷भावना अनुसारका क्रियाकलापहरुमा संलग्न भएको पार्टी जिल्ला प्रवक्ता अर्जुन चौलागाईले प्रष्ट पारे ।
मकवानपुर । दोलखा जिल्लाकाे १० मतदान केन्द्रमा प्रतिनिधिसभा तथा प्रदेशसभा अन्तरगत पुनः मतदान भएकाे छ । विहीबार भएको पुनः मतदानमा ५० प्रतिशत मत खसेको मुख्य निर्वाचन अधिकृतकाे कार्यालय दाेलखाले जनाएकाे छ ।
जिल्लाको वैतेश्वर गाउँपालिका वडा नंं ६ स्थित वैतेश्वर माध्यमिक विद्यालय मतदान केन्द्रको क, ख र ग, वडा नं २ को जनज्योति माध्यमिक विद्यालय पुतलीकाठ मतदान केन्द्रको क र ख, वडा नं ३ कालिढुङ्गा माध्यमिक विद्यालय मतदान केन्द्र क, ख र ग रहेको थियो । तामाकोशी गाउँपालिका वडा नं ३ हेल्थपोष्ट भवन जफे मतदान केन्द्रका क, ख र ग मा मतदान भएको थियो । पुनः मतदान शान्तिपूर्ण रुपमा सम्मन्न भएकाे मुख्य निर्वाचन अधिकृत डिल्लीरत्न श्रेष्ठले जानकारी दिए । ती मतदान केन्द्रमा चारवटा बुथमा आठ हजार पाँच सय १४ मतदाता रहेकाे बताइएकाे छ ।
पुनः मतदान भएकाे केन्द्रमा मङ्सिर ४ मा मतदान हुँदा विवाद उत्पन्न भएपछि उक्त मतदान रद्द गरी पुनः मतदान गराउन मङ्सिर ११ गते निर्वाचन आयोगले सम्बन्धित निर्वाचन अधिकृतको कार्यालयलाई निर्देशन दिएको थियो । प्रतिनिधिसभामा एक निर्वाचन क्षेत्र रहेको दोलखामा जम्मा ९४ मतदानस्थल र एक सय ९५ मतदान केन्द्र रहेका थिए ।
कूल एक लाख ६१ हजार ४ सय ५० मतदाता रहेको यस क्षेत्रमा १४ राजनीतिक दल र सात स्वतन्त्र गरी २१ उम्मेदवार रहेका छन् ।
मकवानपुर । प्रतिनिधि सभा र प्रदेश सभा अन्तरगत दोलखा जिल्लाका १० वटा मतदान केन्द्रमा मङ्सिर १५ गते अर्थात् आज बिहीबार मतदान हुदैछ । निर्वाचन आयोगको मङ्सिर ११ गते बसेको बैठकले दाेलखा जिल्लाका १० मतदान केन्द्रमा मंसिर ४ गते मतदान हुन नसकेकाेले आज विहीबारलाई मतदानकाे मिति तय गरेकाे थियाे ।
आयाेगले दोलखाको वैत्यश्वर गाउँपालिका–६ का वैत्यश्वर माध्यमिक विद्यालय मतदान केन्द्रको क, ख, ग, वैत्यश्वर वडा नम्बर ३ को कालीढुङ्गा मावि मतदान केन्द्रमा क, ख, ग मतदान केन्द्र, वडा नं २ को जनज्योति माध्यमिक विद्यालय पुतली काठका मतदान केन्द्र क र ख, तामाकोसी गाउँपालिका–३ हेल्थपोष्ट भवन जफे मतदान केन्द्रका क र ख गरी सात वटा मतदान केन्द्रमा यही मङ्सिर ४ गते सम्पन्न भएकोे निर्वाचनलाई रद्द गरी सोही ठाउँमा पुनः मतदान गर्ने निर्णय गरेको थियो ।
आयाेगले उक्त मतदान केन्द्रमा मंसिर ४ गते भएकाे मतदान रद्द गरिएकाे ती मतदान केन्द्रहरुकाे मतदान सम्पन्न गर्न मुख्य निर्वाचन अधिकृतको कार्यालय दोलखालाई निर्देशनसमेत दिएको थियो । मुख्य निर्वाचन अधिकृत डिल्लीरत्न श्रेष्ठका अनुसार आज हुने निर्वाचनका लागि तयारी पूरा भएको जानकारी दिए । उनका अनुसार मतदान हुने मतदान केन्द्रमा करिब आठ हजार मतदाता रहेका छन् ।
मकवानपुर । निर्वाचन आयोगले यही मंसिर ४ गते सम्पन्न प्रतिनिधि सभा तथा प्रदेश सभा सदस्य पदको निर्वाचनमा सहभागी राजनीतिक दल र उम्मेदवारलाई खर्च विवरण पेस गर्न निर्देशन दिएको छ । आयोगले निर्वाचनको परिणाम घोषणा भएको ३५ दिनभित्र निर्वाचन खर्चको विवरण पेस गर्न राजनीतिक दल र उम्मेदवारलाई निर्देशन दिएको हो ।
प्रतिनिधि सभा सदस्य तथा प्रदेश सभा सदस्य निर्वाचन प्रयोजनको लागि पहिलो हुने निर्वाचित हुने निर्वाचन प्रणाली तर्फ मनोनयनपत्र पेश गरेका उम्मेदवारहरुले प्रतिनिधि सभा सदस्य निर्वाचन ऐन, २०७४ को दफा ७२ को उपदफा (४) अनुसार सम्बन्धित प्रदेश/जिल्ला निर्वाचन कार्यालयमा निर्वाचन परिणाम घोषणा भएको मितिले पैंतीस दिनभित्र प्रतिनिधि सभा सदस्य निर्वाचन तथा प्रदेश सभा सदस्य निर्वाचन निर्देशिका, २०७९ को अनुसूची -४० बमोजिमको ढाँचामा निर्वाचन खर्चको विवरण पेश गर्नु पर्ने आयोगले जनाएको छ ।
यस्तै समानुपातिक निर्वाचन प्रणाली तर्फ बन्दसूची पेश गरेका राजनीतिक दलहरुले निर्वाचन परिणाम घोषणा भएको मितिले पैंतीस दिनभित्र प्रतिनिधि सभा सदस्यको लागि प्रतिनिधि सभा सदस्य समानुपातिक निर्वाचन निर्देशिका, २०७९ को अनुसूची -३४ र प्रदेश सभा सदस्यको लागि प्रदेश सभा सदस्य समानुपातिक निर्वाचन निर्देशिका, २०७९ को अनुसूची -३६ बमोजिमको ढाँचामा आयोगमा पेश गर्नु पर्नेछ।
विवरण पेस गर्दा तोकिएको हद (सीमा) बमोजिमको रकम मतदाता नामावली खरिद, सवारीसाधन, प्रचारप्रसार सामग्री, ढुवानी, गोष्ठी अन्तरक्रिया, अन्य प्रचारप्रसार, छापा एवं विद्युतीय माध्यम (सामाजिक सञ्जालसमेत), कार्यालय सञ्चालन र प्रतिनिधि परिचालन लगायतका विषय शीर्षक उल्लेख गरी बुझाउनु पर्नेछ । उम्मेदवारले निर्वाचनमा खर्च गर्दा प्रयोग गरेको बैंक खाताको विवरण र खर्च गर्ने जिम्मेवार पदाधिकारीको नामसमेत उल्लेख गरी पेश गर्नुपर्नेछ ।
निर्वाचन प्रचार–प्रसारका लागि कोणसभा वा आमसभा गर्दा मञ्चको तयारीका लागि लागेको खर्चको विवरण सम्बन्धित उम्मेदवारले आफैँ वा आफ्नो प्रतिनिधि मार्फत मतदान सम्पन्न भएको मितिले १५ दिनभित्र निर्वाचन कार्यालयमा पेस गर्नुपर्नेछ । विवरण पेस गर्दा दलले हेलिकप्टर प्रयोग गरेको भए सोसमेत र दलले निर्वाचनमा खर्च गर्दा प्रयोग गरेको बैंक खाताको विवरण र खर्च गर्ने जिम्मेवार पदाधिकारीको नामसमेत उल्लेख गरी पेस गर्नुपर्ने छ ।
समानुपातिक निर्वाचन प्रणालीतर्फ बन्दसूची पेस गरेका राजनीतिक दलले निर्वाचन परिणाम घोषणा भएको मितिले ३५ दिनभित्र प्रतिनिधि सभा सदस्यका लागि प्रतिनिधि सभा सदस्य समानुपातिक निर्वाचन निर्देशिका, २०७९ को अनुसूची ३४ र प्रदेशसभा सदस्यका लागि प्रदेशसभा सदस्य समानुपातिक निर्वाचन निर्देशिका, २०७९ को अनुसूची ३६ बमोजिमको ढाँचामा आयोगमा पेश गर्नुपर्नेछ ।
राजनीतिक दल तथा उम्मेदवारलाई निर्वाचन खर्च बुझाउने जानकारी गराउन सूचना प्रकाशन गर्ने र सोही बमोजिम पहिलो हुने निर्वाचित हुने निर्वाचन प्रणाली तर्फको निर्वाचन खर्चको विवरण संकलन गरी आयोगको IEIMS प्रणालीमा अभिलेख राखी सो सम्बन्धी कागजात सुरक्षित राख्न सबै प्रदेश/जिल्ला निर्वाचन कार्यालयलाई आयोगले निर्देशन समेत दिएको छ ।