मकवानपुर । बागमती प्रदेशकी सामाजिक विकास मन्त्री कुमारी मोक्तानले प्रदेशका विभिन्न स्थानमा भइरहेकाे विकास निर्माण र विद्यालयहरुको अनुगमन गरेकी छन् । चितवनको भरतपुर महानगरपालिका र माडी नगरपालिकामा १ दर्जन बढी विद्यालय, शिक्षालय, कभर्ड हल र विकास, निर्माणको मन्त्री मुक्तानले अनुगमन गरेकी हुन् ।
मन्त्रालय अन्तर्गत निर्माणाधिन तथा संचालित विद्यालय र बहुप्राविधिक शिक्षालयहरुको भवन, प्रयोगशालाहरु, निर्माणाधिन कभर्ड हल, १ विद्यालय एक उद्यम कार्यक्रम अन्तर्गत विद्यालयहरुमा संचालित हाँस पालन, धान खेती लगायतको मन्त्री मुक्तान सहितकाे टोलीले अनुगमन गरेको हाे ।
मन्त्री मोक्तानसहितको टोलीले भरतपुर महानगरपालिका १० स्थित नारायणी नमुना माध्यमिक विद्यालय, नारायणी बहुप्राविधिक शिक्षालय, भरतपुर २२ स्थित निर्माणाधिन कभर्ड हल, भरतपुर २३ स्थित भरतपुर बहुप्राविधिक शिक्षालयको अनुगमन गरेको थियो । साथै, माडी नगरपालिकामा निर्माणाधिन कभर्ड हल, माडी ८ स्थित जनजीवन माध्यमिक विद्यालयमा प्रविधि सहयोग, तटबन्धन र वाल निर्माण, माडी ६ स्थित जनकल्याण माध्यमिक विद्यालयको हाँस पालन र धान खेती, दिवाकर स्मृति बहुप्राविधिक शिक्षालय र निर्माणाधिन भवन तथा माडी ५ स्थित दिवाकर मेमोरियल विद्यालयको निर्माणाधिन भवन र धान खेती अनुगमन गरिएको थियो ।

मन्त्री मोक्तानलाई विद्यालयहरुका प्रधानध्यापक तथा अध्यक्ष, बहुप्राविधिक शिक्षालयहरुका प्रमुख, निर्माण कम्पनीहरुका प्रतिनिधिले भएका विकास र प्रगति विवरण, बजेट, समस्या र थप सहयोगबारे अवगत गराएका थिए । मन्त्री मोक्तानसहितको टोलीलाई माडी नगरपालिकाका मेयर ठाकुरप्रसाद ढकालसहित विद्यालय, शिक्षालय, कम्पनीहरुका प्रमुख तथा प्रतिनिधिहरुले स्वागत समेत गरेका थिए ।
मन्त्री मोक्तानले विकास निर्माणमा ढिला सुस्ती अन्त्य गरी चाँडो र गुणस्तरीय विकास निर्माण गर्न सबैलाई आग्रह गर्दै कर्मचारीलाई सक्रिय रहन समेत निर्देशन दिएकी छन् । अनुगमन टोलीमा सामाजिक विकास मन्त्रालयका सचिव यज्ञप्रसाद ढुङ्गेल, आर्थिक मामिला मन्त्रालयका सचिव धनिराम शर्मा, प्राविधिक शिक्षा तथा व्यवसायिक तालिम परिषद् (सीटीइभीटी) बागमती प्रदेश कार्यालय हेटौंडाका निर्देशक टैलेन्द्र आचार्य लगायतको सहभागिता रहेको थियो ।
माकवानपुर । बागमती प्रदेश सरकारले सय दिनकाे उपलब्धी सार्वजनिक गरेकाे छ । राजेन्द्रप्रसाद पाण्डे मुख्यमन्त्री भएपछिका १ सय दिनमा गरेका कामको उपलब्धी शुक्रबार सार्वजनिक गरिएको हाे ।
पाण्डे २०७८ कार्तिक ११ गते मुख्यमन्त्रीमा नियुक्त भएका थिए । उनले पद बहाली गरे पश्चात् बागमती प्रदेश सरकारका उपलब्धीहरु प्रदेश मन्त्रीहरु, सचिबहरु, पत्रकारहरुको रोहबरमा सार्वजनिक गरेका हुन् । माओवादी केन्द्र, नेपाली कांग्रेस र एकिकृत समाजवादी दल मिलेर बनेकाे गठबन्धन सरकारमा मूख्यमन्त्री पाण्डेले १ सय दिनमा गरेका प्रमुख उपलव्धी ६७ बुँदामा सार्वजनिक गरेका छन् ।
प्रदेशबासीको हित, विकास र सुशासनको प्रत्याभूति, सङ्घीय शासन प्रणालीको सबलीकरण, न्यायपूर्ण, विभेद रहित, समतामूलक समाज निर्माण र सबल एवं समृद्ध प्रदेश निर्माणको सङ्कल्पका साथ गठन भएकाे सरकारले कार्यभार सम्हालेको सय दिन पुगेको उपलक्षमा गरेका कामहरु सार्वजनिक गरिएको हो ।
प्रदेश सरकारले गठवन्धनमा सहभागी दलहरूको सहभागितामा प्रभावकारी सेवा प्रवाह, दीगो विकास निर्माण, सन्तुलित आर्थिक विकास, उत्पादन तथा रोजगारी प्रवर्द्धन, गरिवी निवारण, शासकीय सुधार, भष्ट्राचार निवारण, सुशासन प्रवर्द्धन लगायतका उद्देश्य पुरा गर्न प्रदेशको स्रोत, साधन, सामर्थ्य र संयन्त्रलाई प्रभावकारी ढंगले र अभियानकै रुपमा परिचालन गर्ने नीति सहितको बागमती प्रदेश सरकारको साझा न्यूनतम कार्यक्रम, २०७८” तर्जुमा गरी कार्यान्वयनमा ल्याएको उनले बताए ।
प्रदेश सरकारको सचिवालय तथा प्रशासनिक भवनहरु निर्माण गर्न “प्रशासकीय भवनका लागि जग्गा पहिचान समिति” गठन गरी आवश्यक कार्य अघि बढाइएको बताउनुभयो । चालु आर्थिक वर्ष भित्रै जग्गा पहिचान गरी आफ्नो नाममा ल्याई प्रशासकीय भवन निर्माणको प्रक्रिया अघि बढाइने योजना सुनाउनुभयो । । कोभिड १९ को रोकथाम, उपचार र नियन्त्रण सम्बन्धी व्यवस्था गर्न “कोभिड १९ व्यवस्थापन प्रदेश निर्देशक समिति” गठन गरी आवश्यक कार्य अघि बढाइएको सार्वजनिक गरिएकाे उपलब्धीमा उल्लेख गरिएकाे छ ।
मुख्यमन्त्रीको अध्यक्षता र नेपाल सरकारका मुख्य सचिवको समुपस्थितिमा सात वटै प्रदेशका प्रमुख सचिवको सहभागितामा “अन्तर प्रदेश समन्वय बैठक तथा अन्तरक्रिया कार्यक्रम” सम्पन्न भई प्रदेशका समस्या तथा समाधानका सम्बन्धमा ११ बुँदे प्रतिबद्धता पत्र जारी गरिएको कामलाई प्रमुख उपलब्धीका रुपमा प्रदेश सरकारले राखेको छ ।
प्रदेशका पदाधिकारी तथा कर्मचारीलाई नीति निर्माण, सेवा प्रवाह लगायतको विषयमा क्षमता अभिवृद्धि गर्न “बागमती प्रदेशको क्षमता विकास योजना, २०७८” को मस्यौदा तयार भएको छ। “बेमौसमी वर्षाका कारण धानबालीमा क्षति व्यहोरेका कृषकहरू लक्षित गहुँ बालीको बीउमा राहत वितरण सम्बन्धी कार्यविधि,२०७८” स्वीकृत गरी कृषकहरूलाई गहुँको बीउ एवम् मलमा अनुदान उपलब्ध गराउने व्यवस्था मिलाइएको पाण्डेले बताउनुभयो । प्रदेश सरकारको आवश्यकता अनुरूपका भौतिक तथा सामाजिक पूर्वाधार विकासको कार्यक्रम सञ्चालन गर्न “प्रदेश विकास कार्यक्रम (विशेष) कार्यान्वयन सम्बन्धी कार्यविधि, २०७८” स्वीकृत गरी कार्यान्वयनमा ल्याइएको छ।
जनशक्ति व्यवस्थापन र कर्मचारीको अभिलेख व्यवस्थापन गर्न “प्रदेश किताबखाना (स्थापना तथा कार्यसञ्चालन) आदेश, २०७८” स्वीकृत गरी कार्यान्वयनमा ल्याइएको जानकारी गराउनुभयो । बहुवर्षीय आयोजनाको छनौट तथा ठेक्का सम्बन्धी कार्यलाई व्यवस्थित बनाउन “बहुवर्षीय ठेक्का सम्बन्धी मापदण्ड, २०७८” स्वीकृत गरी कार्यान्वयनमा ल्याइएको मुख्यमन्त्री पाण्डेको नेतृत्वको सरकारले गरेको उपब्धीका रुपमा लियएको छ । “सार्वजनिक खरिदमा कन्टिन्जेन्सी रकम खर्चलाई व्यवस्थित गर्ने कार्यविधि, २०७८” स्वीकृत गरी कार्यान्वयनमा ल्याइएको बताइएको छ ।
हेर्नुहाेस बागमती प्रदेश सरकारकाे सय दिनकाे उपलब्धी
मकवानपुर । बागमती प्रदेश सभामा प्रमुख प्रतिपक्षी दल नेकपा एमाले मुख्यमन्त्री राजेन्द्र पाण्डेकाे अभिव्यक्तीले आक्राेशित भएकाे छ । एमालेले मुख्यमन्त्री पाणडे पदीय मर्यादाविपरीत गालीगलौजमा उत्रिएको र भ्रष्टाचारमा संलग्न भएको भन्दै कडा प्रतिवादमा उत्रिने चेतावनी दिएको छ ।
एमाले बागमती प्रदेशसभा संसदीय दलका प्रमुख सचेतक दीपक निरौलाले विहीबार प्रेस विज्ञप्ति जारी गर्दै प्रदेशसभामै विपक्षी दलमाथि सरकार प्रमुखले संसदीय मर्यादाविपरित व्यक्तिगत गालीगलौजमा उत्रिएको भन्दै आपत्ति जनाएका छन् ।
‘सरकारले अन्धाधुन्ध गरेको खर्चको आम नागरिक, बुद्धिजिवी तथा सञ्चार जगतले तीव्र विरोध गरिरहँदा प्रदेश सरकारका प्रमुख स्वयंले सरकारले खर्च नगरे कस्ले गर्छ त ? भन्ने अत्यन्तै गैह्र जम्मेवार र पदीय मर्यादा विपरीत गैह्रकानूनी अभिव्यक्ति सार्वजनिक सभा समारोहहरुमा दिने, सरकारको नेतृत्व आफूले गरिरहेको समेत भूलेर प्रतिपक्ष जस्तो व्यवहार प्रस्तुत गर्ने, पदको मर्यादा भूलेर व्यक्तिगत गालीगलौजमा उत्रने क्रियाकलाप अत्यन्तै खेदजनक छ ।’ निरौलाले जारी गरेकाे विज्ञप्तिमा उल्लेख छ ।
लोकतन्त्रमा प्रतिपक्षविहीन संसदको परिकल्पना गर्नुपर्छ भन्ने मुख्यमन्त्रीको अभिव्यक्ति दम्भको पराकाष्ठा रहेको निष्कर्ष निकाल्दै एमालेले आगामी दिनमा संसदीय मान्यता र पदको गरिमा राख्न विज्ञप्ती मार्फत ध्यानाकर्षण गराएको छ । मुख्यमन्त्रीले सार्वजनिक सभा, समारोहमा मेरो पार्टीको कमिटि नबनेको वडामा एक रुपैयाँ पनि बजेट हाल्दिन भन्दै हिडेकाे उल्लेख गर्दै प्रदेश सरकार र मुख्यमन्त्रीलाई सच्चिन एमालेले भनेको छ ।
प्रदेश गौरवका आयोजनाहरु कटौती गर्ने तथा कानून, आर्थिक अनुशासन, चलनचल्ती एवम् न्युनतम् मूल्य र मान्यताहरुलाई कुल्चँदै रकमान्तर गर्ने, योजना कटौती गर्ने, महत्वपूर्ण परियोजनाहरुका कामहरु अवरुद्ध गर्ने जस्ता गैरजिम्मेवारीपूर्ण काम गरिरहेको पनि एमालेको आरोप छ ।


मकवानपुर । तामाङ समुदायले मनाउने सोनाम ल्होछारका अवसरमा बागमती प्रदेश प्रमुख यादवचन्द्र शर्माले शुभकामना दिएका छन् । यस वर्ष माघ १९ गते आज परेकाे तामाङ समुदायको विशेष धार्मिक तथा सांस्कृतिक पर्व सोनाम ल्होछारका अवसरमा शुभकामना सन्देश जारी गर्दै प्रदेश प्रमुख शर्माले सबैका लागि सुख, शान्ति र समृद्दि तथा उत्तरोत्तर प्रगतिका कामना व्यक्त गरेका छन् ।
देश भित्र र बाहिरका समेत विभिन्न मुलुकहरुमा छरिएर रहेका तामाङ समुदायले हर्षोलाशपूर्ण वातावरणमा मनाउँने २८५८ औं ताक ल्हो (सोनाम ल्होछार) पर्वका अवसरमा जारी शुभकामना सन्देशमा प्रदेश प्रमुख शर्माले यो पर्वलाई पनि हामी हाम्रा अन्य चाडपर्वहरुझैं एउटा महत्वपूर्ण पर्व मानिने गरिएको उल्लेख गरेका छन् । प्रमुख शर्माले सन्देशमा भनेका छन्,‘तामाङ समुदायकाे प्रचलनमा रहेकाे पञ्चाङ्ग अनुसार आजबाट एउटा वर्ष पूरा भई अर्को वर्ष सुरु भएको छ । यो नववर्ष ‘सोनाम ल्होछार’ ले हामी सबैका लागि सुख, शान्ति र समृद्दि ल्याउन सकोस् भन्ने कामनासहित उत्तरोत्तर प्रगतिका लागि शुभकामना व्यक्त गर्दछु ।’
प्रमुख शर्माले हामी संयौ थुङ्गा फूलका रंगीन बगैंचाका फूलहरु भएको उल्लेख गरदै हामी बहुल जातीय, बहुभाषिक, बहुधार्मिक एवम् बहुसांस्कृतिक समाजका अभिन्न अङ्ग भएको बताएका छन् । शुभकामना सन्देशमा उनले अन्य समुदाय सरह तामाङ समुदाय पनि देशकाे लागि उत्तिकै महत्वपूर्ण अङ्ग भएको उल्लेख गरेका छन् । प्रमुख शर्माले यो पर्वले हाम्रो धर्म, संस्कृति, रिती–रिवाज तथा परम्पराको सम्बर्द्दन गर्न महत्वपूर्ण योगदान गर्नेछ भन्ने विश्वास रहेको शुभकामना सन्देशमा भनेका छन् ।
‘हाम्रो समाजको मूल चरित्र भन्नु नै विविधतामा एकता, सद्भाव र सामाजिक सहिष्णुता एवम् बन्धुत्व र पारस्परिक मेलमिलाप हो’ प्रमुख शर्माले भने– ‘हाम्रा यी र यस्तै राष्ट्रिय धरोहरप्रति हामीले गौरवबोध गर्न सक्नुपर्छ ।’ ‘यो पर्वले हामीलाई यसकै लागि प्रेरित गर्नेछ । हाम्रो समाजमा मनाइने चाडपर्वहरु तथा अनुपालना गरिने संस्कृतिहरुले हामीलाई सामाजिक हित,आपसी सम्मान र भाइचाराको प्रबलीकरण गर्न प्रेरित गर्न सकोस् भन्ने पुन:एकपटक शुभकामना व्यक्त गर्दछु ।’

मकवानपुर । बागमती प्रदेश सरकारले साेनाम ल्होसार र न्वागी पर्वमा सार्वजनिक विदा दिने भएकाे छ । तामाङ समुदायकाे सांस्कृतिक तथा धार्मिक पर्व २८५८ औँ सोनाम ल्होछार पर्व र चेपाङ समुदायको मुख्य पर्व न्वागीमा सार्वजनिक विदा दिने भएकाे हाे ।
वर्षेनी तामाङ समुदाय र चेपाङ समुदायले आफ्नो मुख्य चाडमा सार्वजनिक विदा मागिरहेको अवस्था प्रदेश सरकारले साेमबार सार्वजनिक विदाकाे निर्णय गरेको हो । सोमबार बसेको मन्त्रिपरिषद् वैठकले साेनाम ल्होसारमा प्रदेशको १३ वटै जिल्ला र न्वागी पर्वमा चेपाङ समुदायको बसोबास रहेको मकवानपुर, चितवन र धादिङ जिल्लामा मात्र सार्वजनिक विदा दिने निर्णय गरेको हो ।
मकवानपुर लगायत बागमती प्रदेशका जिल्लाहरुमा साेनाम ल्हाेछारमा सार्वजनिक विदा माग गर्दै यस अघी मुख्यमन्त्री राजेन्द्र पाण्डेलाई ज्ञापनपत्र समेत बुझाएका थिए । नेपाल तामाङ घेदुङ संघीय कार्य समितिले प्रदेशमा सोनाम ल्होछारका अवसरमा ३ दिन सार्वजनिक विदा दिन माग गर्दै ज्ञापना पत्र बुझाएका थिए ।