मकवानपुर । प्रतिपक्षमा हुँदा आफैंले उठाउँदै आएको एजेण्डा आफू सत्तामा पुगेपछि पुरा गरेर देखाउने नैतिक दबाबमा अहिले बागमती प्रदेश सरकारमा रहेको एमालेले भोग्दै आएको छ ।
त्यो सवाल हो मन्त्रालयको संख्या घटाउने बारे । एकै घरको झ्याल झ्यालमा दर्जन मन्त्रालय राखेर देशैभर चर्चा पाएको बागमती प्रदेशमा यसपटक मन्त्रालयको संङ्ख्या घटाउने रस्साकस्सी चोटीलो बनेको छ ।
५ दलको सहभागीता रहेको प्रदेश सरकारमा सबैलाई मन्त्रालय पु-याउनु पर्ने दबाब र अर्थहिन मन्त्रालय घटाएर खर्च कटौति गरेर देखाउनु पर्ने सवाल छ अहिले एमालेका सामू ।
अघिल्लो सत्ता गठबन्धनले मन्त्रालय टुक्र्याएरपछि मन्त्रालय घटाउनै पर्ने बारे निरन्तर दबाब दिंदै आएको नेकपा एमाले अहिले सत्ताको सबैभन्दा ठुलो दल हो । सत्ता गठबन्धन एकाएक बदलिएपछि सत्ताको पहिलो दल बनेपछि एमाले आफैंले विगतमा भने जसरी मन्त्रालय संख्या घटाउनको लागि नैतिक दबाबमा छ ।
नव गठित सत्ता गठबन्धनबाट नेकपा मओवादी केन्द्रका संसदीय दलका नेता शालिकराम जम्कट्टेलले मुख्यमन्त्रीमा सपथ लिएकै दिन मन्त्रालय संख्या घटाउन कार्यदल नै गठन गरिएको थियो । बागमती प्रदेशमा मन्त्रालयको संख्या निर्धारण गर्न अध्ययन कार्यदल समिति गठन भएको आज सोमबार १५ औं दिन हो । अर्थात कार्यदलले प्रतिवेदन बुझाउनु पर्ने अन्तिम म्याद हो आज ।
बागमती प्रदेशको मुख्यमन्त्री शालिकराम जम्मकट्टेलले शपथग्रहणलगत्तै पहिलो निर्णय गर्दै मन्त्रालयको संख्या निर्धारण गर्न कार्यदल गठन गरेका थिए।
मुख्यमन्त्री तथा मन्त्रिपरिषद् कार्यालयका प्रमुख सचिव मुकुन्द प्रसाद निरौलाको संयोजकत्वमा जम्मकट्टेलले ५ सदस्यीय कार्यदललाई १५ दिनभित्र प्रदेशको मन्त्रालयहरुको अध्ययन गरेर संख्या निर्धारण गर्दै प्रतिवेदन बुझाउन निर्देशन दिएका थिए।
५ दलको समर्थन रहेको प्रदेश सरकारमा सत्ता गठबन्धनको ठूलो दल नेकपा एमालेले ५ वटा, नेकपा माओवादी केन्द्रले ४ वटा, एकीकृत समाजवादीले २ वटा, राप्रपाले २ वटा, हाम्रो नेपाली पार्टीले १ वटा मन्त्रालयमा दाबी गरेका छन् । यस हिसाबले पनि १४ वटै मन्त्रालयको माग दाबि देखिन्छ । मन्त्रालय संख्या घटाएर मन्त्रालयको भागबण्डा मिलाउन सौहार्दपूर्ण वातावरण बनाउनको लागि हाल शिर्ष नेताहरु लभिङको केन्द्रसँग दौडुधपमा छन् ।
हाल बागमती प्रदेशमा १४ वटा मन्त्रालय रहेको छ। सुरुवातमा ७ वटा मन्त्रालय रहेको बागमती प्रदेशको दोस्रो मुख्यमन्त्री अष्टलक्ष्मी शाक्यले सामाजिक विकास मन्त्रालयबाट स्वास्थ्य मन्त्रालयलाई विभाजन गर्दै ८ वटा पुर्याएकी थिइन्।
त्यसपछि प्रदेशको तेस्रो मुख्यमन्त्री राजेन्द्र पाण्डेले गठबन्धन दलहरुमा भागवण्डा पुर्याउन ८ मन्त्रालयलाई विभाजन गरेर १४ पुर्याएका थिए। भागबण्डा पुर्याउन मन्त्रालय विभाजन गरेपछि मुख्यमन्त्री पाण्डे र बागमती प्रदेशको देशैभरि आलोचना भयो।
उक्त समयमा मन्त्रालय विभाजन गर्न मुख्यमन्त्री पाण्डेलाई लिखित सहमति दिएका वर्तमान मुख्यमन्त्री जम्मकट्टेल अहिले कुनै पनि हालतमा मन्त्रालय घटाउनुपर्ने दबाबमा छन्।
५ दलको समर्थनमा मुख्यमन्त्री बनेका जम्मकट्टेल मन्त्रालय घटाउने दबाबसँगै भागबण्डा पुर्याउनुपर्ने दबाबमा पनि छन्। त्यसैले उनले बागमती प्रदेशको १४ मन्त्रालयलाई ११ वटामा झार्ने बताउँदै आएका छन्।
मुख्यमन्त्री जम्मकट्टेलले विभाजित मन्त्रालयहरुको काम, उनीहरुको प्रभावकारिता र औचित्यको अध्ययन गर्न गठित समिति सुझाव दिने छ ।
समितिले आज सोमबार बेलुका मात्रै मुख्यमन्त्रीलाई प्रतिवेदन बुझाउने तयारी गरेको बुझिएको छ। हालसम्मको आन्तरीक तयारी अनुसार प्रदेशमा ११ वटा मन्त्रालय कायम रहने विषयमा मुख्यमन्त्रीसहित सत्ता गठबन्धन लगभग तयार रहेको बुझिएको छ ।
मन्त्रालयको अध्ययन गर्न बनेको समिति अध्ययनको चरणमा रहदा नै मुख्यमन्त्रीसहित मन्त्रीहरुले ११ मन्त्रालय रहने अभिव्यक्ति सार्वजनिक कार्यक्रमहरुले दिंदै आएका छन् । विभिन्न दृष्टिकोणले प्रदेशको मन्त्रालयहरुको अध्ययन गरेको समितिका संयोजक मुकुन्दप्रसाद निरौला बताए ।
प्रदेश सरकारको १४ वटै मन्त्रालयहरुको विषयगत रूपमा अध्ययन गरेको निरौलाले बताए। सबै मन्त्रालयको सूक्ष्म रूपमा अध्ययन गर्दा विभाजित केही मन्त्रालयको काम राम्रो र आवश्यक भए पनि ३ वा ४ मन्त्रालय भने तत्कालको लागि आवश्यक नरहेको समितिको ठहर छ । यस अनुसार कुन कुन मन्त्रालयलाई कुन मन्त्रालयमा गाभिने वा खारेज गरिने भन्नेबारे भने प्रतिवेदनले नै सार्वजनिक गर्नेछ ।
प्रदेशको उद्योग तथा वाणिज्य मन्त्रालय, युवा तथा खेलकुद मन्त्रालय, संस्कृति तथा पर्यटन मन्त्रालय, भूमि व्यवस्था,सहकारी तथा गरिबी निवारण मन्त्रालयको काम त्यति उत्कृष्ट नदेखिएको संकेत कार्यदलले गरेको छ ।
हामीले अध्ययन गर्दा अहिले १० वटा मन्त्रालय मात्रै आवश्यक देखेका छौ। तर, मुख्यमन्त्रीसँग सल्लाह गरेर उहाँको चाहानाअनुसार १० वा ११ वटा मन्त्रालय कायम गर्न सुझाव दिन्छौ’,निरौलाले भने। उनले सरकारको निर्देशनअनुसार नै आफूहरु चल्ने भएकोले सोहीअनुसार मन्त्रालय संख्या निर्धारण गर्न सुझाव दिने बताए। तर मुख्यमन्त्री जम्मकट्टेल सहकारी मन्त्रालय नघटाउने पक्षमा देखिएका छन्।
प्रदेशमा रहेको १४ मन्त्रालयमध्ये सहकारी मन्त्रालय सबैभन्दा कम बजेट भएको मन्त्रालय हो। चालू आर्थिक वर्षमा सरकारले यो मन्त्रालयलाई २४ करोड मात्रै बजेट दिएको थियो। मुख्यमन्त्री राजेन्द्र पाण्डेले सहकारबाट बाहिरिदा १४ वटै मन्त्रालयबाट भएका कार्यप्रगतिलाई विषयगत रुपमा उल्लेख गरेर सार्वजनिक गरेका थिए।
जसमा सहकारी मन्त्रालयको काम सबैभन्दा थोरै थियो। तर,वर्तमान मुख्यमन्त्री जम्मकट्टेलले उक्त मन्त्रालय घटाउन ईच्छा नदेखाएपछि समितीले सो मन्त्रालय पनि राख्नुपर्ने सुझावसहितको प्रतिवेदन दिने संभावना रहेको समितीका एक सदस्यले बताए । समितीले अध्ययन गरेर तयार पारेको प्रतिवेदनको बारेमा सरकारका मन्त्रीहरुलाई जानकारी गराइसकिएको समिति संयोजक निरौलाले बताए ।
मकवानपुर । बागमती प्रदेश प्रमुख यादवचन्द्र शर्माले तामाङ समुदायको नयाँ वर्ष सोनाम ल्होसार २५८९ को अवसरमा शुभकामना व्यक्त गरेका छन् । प्रदेश प्रमुख शर्माले आइतबार ल्हाेसारकाे शुभकामना दिएका हुन ।
प्रदेश प्रमुख शर्माले एक सन्देश जारी गर्दै ल्हाेसार पर्वले सबै नेपालीहरुमा सुख, शान्ति र समृद्धि अभिवृद्धि हुन सकोस् भन्ने शुभकामना दिएका छन् । सोनाम ल्होसार’ तामाङ समुदायमा नयाँ वर्षको रुपमा धुमधामका साथ मनाइने पर्व भएको प्रमुख शर्माको शुभकामना सन्देशमा उल्लेख छ ।
प्रदेश प्रमुख शर्माको शुभकामनामा भनिएको छ, ‘नव वर्ष आरम्भको यस सुखद् घडीमा ल्होसार पर्व मनाउने समुदायका स्वदेश–विदेशमा रहनु हुने दाजुभाई, दिदिबहिनी तथा सम्पूर्ण नेपालीहरुप्रति सुख, शान्ति र समृद्धिका लागि हार्दिक शुभकामना व्यक्त गर्दछु ।’उनले विविधतामा एकता, सद्भाव र सामाजिक सहिष्णुता एवम् बन्धुत्व र पारस्परिक मेलमिलाप नै हाम्रो समाजको मूल चरित्र भएको बताउँदै हाम्रा यस्ता राष्ट्रिय धरोहरप्रति हामी सबैले गौरवबोध गर्न सक्नुपर्ने बताए ।
यसैगरी बागमती प्रदेशका मुख्यमन्त्री शालिकराम जम्कट्टेलले तामाङ्ग समुदायहरुको महान पर्व सोनाम ल्होछार (२८५९) का अवसरमा स्वदेश तथा विदेशमा रहनु भएका तामाङ्ग समुदायका दाजुभाई तथा दिदीबहिनीहरूमा सुख, शान्ति, समृद्धि र प्रगतिको कामना गर्दै शुभकामना दिएका छन् ।
‘मञ्जुश्री पात्रो अनुसार पहिलो महिनाको पहिलो दिन अर्थात् नयाँ वर्ष २८५९ ( खरायो वर्ष) शुरुवातको दिन माघ शुक्ल प्रतिपदादेखि मनाईने सोनाम ल्होछार पर्वमा कूल पूजा, प्रकृति पूजा, बुद्धको पूजा गर्ने एवम् आपसमा भेला भई नाचगान गर्दै हर्षोल्लासका साथ मनाउने प्रचलन रहिआएको छ’ साेनाम ल्हाेसारकाे अवसरमा आइतबार मुख्यमन्त्री जम्कट्टेलले शुभकामना सन्देश जारी गर्दै भनेका छन् ‘नेपाल राष्ट्रको पहिचान र अमूल्य निधिको रुपमा रहेका यस किसिमका मौलिक संस्कृतिको संरक्षण तथा सम्बर्द्धन गर्ने प्रमुख दायित्व राज्यको रहेको हुँदा यस तर्फ तीनै तहका सरकारको ध्यान जाने विश्वास समेत गरेको छौं ।’
‘विशेष गरी तामाङ्ग जातिहरुको बाहुल्यता रहेको बागमती प्रदेश भित्र तामाङ्ग समुदायले यस पर्वलाइ नयाँ वर्षको रुपमा मनाइरहँदा यस पर्वले विशिष्टिकृत सांस्कृतिक पहिचान स्थापित गरेको र परम्परागत मुल्य मान्यता प्राप्त गरेको महशुस गरेका छौं’ उनले सन्देशमा भनेका छन् । ‘प्रदेश भित्र बसोबास गर्ने जात जातिका संस्कृतिहरुको संरक्षण तथा प्रवर्द्धन गर्दै पर्यटन विकासका लागि संस्कृतिको जगेर्ना गर्नका लागि आवश्यक सहयोग गर्न बागमती प्रदेश सरकार सदैव तयार रहने विश्वास समेत दिलाउन चाहन्छौं’ उनले भने ।
सोनाम ल्होछार पर्वले हामी बिच आत्मीयता, आपसी समझदारी, एकता, सामाजिक सद्भाव कायम गर्दै देशको समृद्धि एवं अमन चयन कायम गर्ने वातावरण निर्माण भै समृद्ध नेपाल र समुन्नत बागमती प्रदेश निर्माण गर्ने तर्फ उत्प्रेरणा मिलोस भन्ने कामना गर्दै यस पर्वले सबै नेपाली बिच सामाजिक एकता सुदृढ गर्दै उत्साह र उमङ्गका साथ देशमा शान्ति सद्भाव र धार्मिक सहिष्णुता कायम गरी लोककल्याणकारी राज्य स्थापन गर्दै समृद्ध नेपाल, समुन्नत बागमती प्रदेश निर्माण गर्ने लक्ष्य हासिल गर्न हामी सबै नेपाली एकताबद्ध भई अघि बढ्न प्रेरणा प्रदान गर्नेछ भन्ने अपेक्षा राख्दै शुभकामना व्यक्त गर्दछु मुख्यमन्त्री जम्कट्टेलले जारी गरेकाे शुभकामना सन्देशमा भनिएकाे छ ।


मकवानपुर । गत मंसिरमा सम्पन्न चुनावी परिणाम पछी सरकार गठनकाे समयमा एकाएक बदलिएकाे सत्तागठबन्धनले नेपाली काँग्रेस प्रमुख प्रतिपक्षमा रहेकाे थियाे । संसदमा सबै भन्दा ठुलाे दल काँग्रेसले पुष्पकमल दाहाल प्रचण्ड प्रधानमन्त्रीमा नियुक्त हुँदा विपक्षमा मत दिएकाे हाे ।
तिनै प्रधानमन्त्रीले विश्वासकाे मत दिदा काँग्रेस समेतले विश्वासकाे मत दिए पछी संघीय संसद प्रमुख प्रतिपक्ष विहिन जस्तै भएकाे छ । केन्द्रीय संसदकाे झल्काे दिने गरी बागमती प्रदेशमा समेत काँग्रेसले मुख्यमन्त्री शालिकराम जम्कट्टेललाई विश्वासकाे मत दिदाँ संसद प्रमुख प्रतिपक्ष विहिन भएकाे छ । बागमती प्रदेश सभामा रहेका ७ दल मध्ये ६ दलले मुख्यमन्त्रीलाई विश्वासकाे मत दिएकाे हाे ।
तर ३ सदस्य रहेकाे नेपाल मजदुर किसान पार्टीले भने विश्वासकाे मतकाे विपक्षमा मतदान गरेकाेले संसदमा एक्लाे तर कमजाेर प्रतिपक्ष भएकाे छ । केन्द्रीय सरकारका प्रधानमन्त्रीलाई पनि विश्वासको मत दिएको थिएन। नेपाली कांग्रेसले समेत मुख्यमन्त्री जम्कट्टेललाई विश्वासको मत दिएपछि नेमकिपा एक्लो प्रतिपक्षी दल बनेको हो । नेमकिपा प्रदेशसभाको पहिलो कार्यकालमा पनि ५ वर्ष नै प्रतिपक्षमा बसेको थियो। नेमकिपाका २०७४ सालमा पहिलाे पटक गठन भएकाे प्रदेश सभमा २ जना प्रदेशसभा सदस्य रहेका थिए ।
११० जना सांसद रहेको प्रदेशसभामा मुख्यमन्त्री जमकट्टेलले ९५ प्रतिशत संसदकाे मतकाे विश्वास प्राप्त गरेका छन् । उनलाई नेपाली कांग्रेसका ३७, नेकपा एमालेका २७, नेकपा माओवादी केन्द्रका २१, राप्रपाका १३, नेकपा एकीकृत समाजवादीका ७ र हाम्रो नेपाली पार्टीका २ जना सांसद गरी १०५ जनाले विश्वासको मत दिएका हुन्।
मकवानपुर । बागमती प्रदेशको मुख्यमन्त्री शालिकराम जम्कट्टेलले विश्वासको मत पाएका छन्। आज मङ्गलबार भएको मतदानमा ११० सदस्यमध्ये ९५ प्रतिशतले मत दिएका हुन् । बागमती प्रदेशसभाका १०५ सदस्यले मुख्यमन्त्री जमकट्टेललाई विश्वासको मत दिएका थिए । विश्वासको मतका लागि उनलाई ५६ मत आवस्यक थियो ।
उनको विपक्षमा ३ जनाले मात्रै मत दिए। सभामुख भुवनकुमार पाठक र उपसभामुख अप्सरा चापागाईं विश्वासको मतमा सहभागी भएनन्। प्रदेशसभाको ७ वटा राजनीतिक दलमध्ये ३ सदस्यीय नेपाल मजदुर किसान पार्टी मात्रै मुख्यमन्त्रीको विश्वासको मतको विपक्षमा उभिएको हो।
पुस २६ गते केन्द्रमा माओवादी केन्द्रका अध्यक्ष समेत रहेका प्रधानमन्त्री पुष्पकमल दाहाल प्रचण्डलाई विश्वासको मत दिएको कांग्रेसले मंगलवार प्रदेशमा माओवादीकै मुख्यमन्त्रीलाई विश्वासको मत दिएको हो।
मुख्यमन्त्री जम्कट्टेललाई नेपाली कांग्रेसको ३७, नेकपा एमालेको २७, नेकपा माओवादी केन्द्रको २१, राष्ट्रिय प्रजातन्त्र पार्टीको १३, नेकपा एकीकृत समाजवादीको ७ र हाम्रो नेपाली पार्टिको २ जनाले विश्वासको मत दिएका हुन्।
५ दलको ७० सांसदको समर्थनमा गत पुस २५ गते प्रदेशको चौथो मुख्यमन्त्रीमा नियुक्त भएका जम्कट्टेलले २६ गते सपथ लिएका थिए। उनलाई मुख्यमन्त्री नियुक्त हुँदा केन्द्रको समीकरण बाहिर रहेको समाजवादी र हाम्रो नेपाली पार्टीले समर्थन गरेको थियो ।
मुख्यमन्त्रीमा शपथ ग्रहण गरेको ३० दिन भित्र संसदबाट विश्वासको मत लिनु पर्ने संवैधानिक व्यवस्था छ ।
मकवानपुर । बागमती प्रदेशको नवनिर्वाचित उपसभामुख अप्सरा चापागाईंले आज पद तथा गोपनियताको सपथ लिएकी छिन् ।
बागमती प्रदेश कार्यालयमा प्रदेशका सभामुख भुवन पाठकले उपसभामुख चापागाईंलाई सपथ गराएका हुन् ।
चापागाई सत्ता गठवन्धनको तर्फबाट उपसभामुखमा निर्वाचित भएकि थिइन् । चापागाई एमालेबाट समानुपातिक सांसद बनेकी थिईन् ।