मकवानपुर/ प्रथम बागमती प्रदेश खेलकुद प्रतियोगितामा आज मंगलबार भएको खेल अन्तरगत क्रिकेटमा काठमाडौं विजयी भएको छ । प्रतियोगिताको ब्याटमिन्टन अन्तरगत चितवन र धादिङ प्रथम भएका छन् ।
यस्तै हेटौंडाको क्याम्पा रंगशालामा भएकाे फुटबलक अन्तरगतकाे पहिलो खेल सिन्धुली र काठमाडौंबीच भएको थियो । खेलमा सिन्धुली विजयी भएको छ । पहिलो हाफमा सिन्धुलीले २ गोल गरेको थियो । खेलको दोस्रो हाफमा ४ गोल थप गर्दै ६–० गोल अन्तरले सिन्धुली क्वाटरफाइनल प्रवेश गरेको हो ।
दोस्रो खेलमा भक्तपुर विजयी भएको छ । रसुवालाई ६–० गोल अन्तरले हराउदैं भक्तपुर क्वाटरफाइनल प्रवेश गरेको हो ।
भोली बुधबार दुईवटा खेल हुनेछन् । पहिलो खेल धादिङ र काभ्रेपलान्चोकबीच हुनेछ । दोस्रो खेल सिन्धुली र मकवानपुरबीच हुने खेल संयोजक कल्पना शर्माले बताइन् । खेल नकआउट चरणमा खेलाइएको छ ।
ब्याटमिन्टन खेलमा चितवन र धादिङ प्रथम
हेटौंडामा भएको ब्याटमिन्टन प्रतियोगितामा पुरुष तर्फ चितवन प्रथम भएको छ । मंगलबार भएको फाइनल खेलमा ललितपुरलाई ३–१ अंकले हराउदैं चितवन प्रथम भएको हो । दोस्रो स्थानमा ललितपुर, तेस्रो स्थानमा धादिङ र सिन्धुली रहेको खेल संयोजक दीपक थापाले बताए ।
महिला तर्फभने धादिङ प्रथम भएको छ । फाइनल खेलमा सिन्धुपाल्चोकलाई ३–२ अंकले पराजित गर्दै प्रथम भएको हो । त्यस्तै, दोस्रो स्थान सिन्धुपाल्चोक, तेस्रो स्थान ललितपुर र नुवाकोट भएको ब्याटमिन्टन अफिसियल राम विनय श्रेष्टले बताए । ब्याटमिन्टन टिम इभेन्टको आधारमा खेलाइएको थियो ।
प्रदेश युवा तथा खेलकुद मन्त्री रत्नप्रसाद ढकाल, मन्त्रालयका सचिव, परिषद्का सदस्य सचिवलगायतले मेडल, प्रमाण र नगद सहित पुरस्कृत गरिएको थियो । प्रथम, द्धितीय र तृतीय हुनेले क्रमशः तीस हजार, चौबिस हजार र अठार हजार प्राप्त गरेका छन्।
महिला क्रिकेटमा काठमाडौं विजयी
चितवनको गौतमबुद्ध अन्तर्राष्ट्रिय क्रिकेट मैदानमा भएको महिला क्रिकेटतर्फ काठमाडौं विजेता भएको छ । चितवनलाई ६४ रनले पराजित गर्दै काठमाडौं प्रथम भएको छ । टस जितेर ब्याटिङ रोजेको काठमाडौंले एक विकेट गुमाएर २० ओभरमा १६२ रन बनाएको थियो । काठमाडौंको तर्फबाट कन्चन श्रेष्ठले ७० र अस्मिता खरेलले ४३ रन बनाइन् ।
चितवनले २० ओभरमा ४ विकेट गुमाएर ९८ रन बनाएका थियो । भरतपुर महानगरपालिकाका मेयर रेणुकुमारी दाहाल, परिषद् सदस्य सचिव सुर्यलाल भण्डारीले विजेता र उप विजेतालाई प्रमाणपत्र सहित पुरस्कार वितरण गरेका थिए ।
पुरुष तर्फको खेल भने भोली बुधबार हुनेछ । पहिलो खेल रामेछाप र नुवाकोट र दोस्रो खेल रसुवा र धादिङबीच हुने खेल संयोजक प्रेम बहादुर क्षेत्रीले बताए । पूरुषतर्फ सिन्धुलीले सहभागिता जनाएको छैन् ।
मकवानपुर /प्रथम वागमती प्रदेश खेलकुद प्रतियोगिताअन्तर्गत् हेटौंडामा जारी खेलमा आज पुरूष फुटबल अन्तर्गत २ खेल भएका छन् ।
पहिलो खेलमा रामेछाप र सिन्धुपाल्चोक तथा दोस्रो खेलमा मकवानपुर र नुवाकोट बिच खेल भएको छ । पहिलो खेलमा रामेछाप र दोस्रोमा मकवानपुर बिजयी भएका छन् ।
आज भएको दोस्रो खेलमा नुवकोटलाई पराजित गर्दै मकवानपुरले अन्तिम आठमा स्थान सुरक्षित गरेको हो । आज हेटौंडा–५ स्थित पिप्लेक्याम्पा रंगशालामा भएको फुटबलमा मकवानपुरले नुवाकोटलाई ३–० अन्तरले पराजित गरेको हो ।
मकवानपुरको जीतमा सुदिप सापकोटाले दुई र समिरराज थोकरले एक गोल गरेका थिए । सापकोटाले खेलको ७८ र ८३ औं मिनेटमा र थोकरले ६० औं मिनेटमा गोल गरेका थिए । खेलमा दुई गोल गरेका सापकोटा खेलको म्यान अफ दी म्याच घोषित भए ।
यसैगरि फुटबल अन्तर्गत सोमबारको पहिलो खेलमा रामेछापले सिन्धुपाल्चोकलाई टाइब्रेकरमा ४–२ गोलअन्तरले पराजित गर्दै दोस्रो चरणमा प्रवेश गरेको छ ।
निर्धारित र अतिरिक्त समय गोलरहित बराबरीमा टुंगिएपछि टाइब्रेकरमा रामेछापको तर्फबाट श्रीकृष्ण माझी, अनिल माझी, निकेश कार्की र सुमन नेपालले गोल गरेका थिए । सिन्धुपाल्चोकको तर्फबाट सुजन माझी र विज्ञान थिङले गोल गरेका थिए ।
पहिलो खेलमा अमिर श्रेष्ठले उत्कृष्ट प्रदर्शन गरेका थिए भने खेलको म्यान अफ दी म्याच रामेछापका गोलरक्षक युवराज तामाङ घोषित भए ।
भोलि मंगलबार दुईवटा खेल हुनेछन् । पहिलो खेल सिन्धुली र काठमाडौंबीच हुनेछ भने दोस्रो खेल भक्तपुर र रसुवाबीच प्रतिस्पर्धा हुने फुटबल खेल संयोजक कल्पना शर्माले बताइन । खेल नकआउट चरणमा खेलाइएको छ ।
ब्याटमिन्टनमा चितवन र ललितपुर फाईनल प्रवेश
हेटौंडामा भएको ब्याटमिन्टन प्रतियोगितातर्फ चितवन र ललितपुर फाइनल प्रवेश गरेको छ । आज ( सोमबार) विहान भएको क्वाटर फाइनल र सेमीफाइनल दुबै खेल जित्दै चितवन र ललितपुर फाइनल प्रवेश गरेको हो ।
चितवनले सिन्धुलीलाई ३–० र ललितपुरले धादिङलाई ३–० अंकले पराजित गर्दै फाइनल प्रवेश गरेको ब्याटमिन्टन अफिसियल राम विनय श्रेष्ठले बताए । फाइनल खेल मंगलबार हुनेछ ।
महिला तर्फभने धादिङ र सिन्धुपाल्चोक फाइनल प्रवेश गरेको छ । सेमी फाइनलमा धादिङले ललितपुरलाई ३–२ अंकले र सिन्धुपाल्चोकले नुवाकोटलाई ३–२ अंकले पराजित गर्दै फाइनल यात्रा तय गरेको हो ।
क्रिकेटमा काठमाडौ विजयी
महिला क्रिकेट खेलतर्फ पहिलो खेलमा काठमाडौं विजयी भएको छ । चितवनको गौतमबुद्ध अन्तर्राष्ट्रिय क्रिकेट मैदानमा भएको महिला क्रिकेट खेलतर्फ पहिलो खेलमा काठमाडौं विजयी भएको हो । टस जितेर ब्याटिङ गरेको भक्तपुरले १७.३ आभेर खेलेर ४१ रन बनाएको थियो । काठमाडौंले विकेट नगुमाई २.३ ओभर ट्रागेट पुरा गरि विजयी भएको हो ।
त्यस्तै दोस्रो खेल काठमाडौं र चितवनबीच भएको थियो । टस जितेर चितवनले बलिङ राजेको थियो । काठमाडौंले २ विकेट गुमाएर १८३ रन बनाउदैं चितवनलाई विशाल लक्ष्य दिएको थियो । चितवनले सबै विकेटको क्षति व्यहोर्दै १७.१ ओभरमा ६१ रन बनाएको थियो । मंगलबार चितवन र भक्तपुरबीच खेल हुनेछ । महिला क्रिकेट तर्फ तीन जिल्लाले मात्र सहभागिता जनाएको खेल संयोजक प्रेम बहादुर क्षेत्रीले बताउनुभयो । पुरुष तर्फको खेल भने चैत्र २ गतेबाट हुनेछ । पूरुषतर्फ सिन्धुलीले सहभागिता जनाएको छैन् ।
भलिबल खेल तर्फ
प्रदेश खेलकुद प्रतियोगिता अन्तरगत सोमबारबाट चितवनको माडी खेलकुद मैदानमा भलिबल खेलको सुरु भएको छ । लिग चरणमा भएको महिला तथा पुरुष भलिबल खेलमा भएको हो । महिला तर्फ दुई वटै खेलमा पराजित हुदैं भक्तपुर समूहबाट बाहिरिएको छ भने अरु बाकीँ लिग खेल मंंगलबार हुने खेल संयोजक अशोक काजी थापाले बताए ।
मकवानपुरमा चैत्र ५ गतेबाट तेक्वान्दो प्रतियोगिता सुरु हुनेछ । सिन्धुपाल्चोकमा चैत्र ७ गतेबाट कराँते खेल हुनेछ भने काठमाडौंमा चैत्र ६ गतेदेखि एथलेटिक्स प्रतियोगिता हुने परिषदले जनाएको छ ।
त्यस्तै, काभ्रेमा भने चैत्र ७ गतेदेखि महिला फुटबल र ९ गतेदेखी बक्सिङ खेल प्रतियोगिता हुने परिषदले जनाएको छ । विभिन्न खेलमा करिब २ हजार भन्दाबढी खेलाडीले सहभागिता जनाउनेछन् । प्रतियोगिताको लागि आठ करोड ४ लाख रकम खर्च हुने अनुमान गरेको छ ।
मकवानपुर । प्रथम प्रदेश खेलकुद प्रतियोगिता अन्तरगत भएकाे पुरुष फुटबल स्पर्धामा ललितपुर जिल्लाले विजयी सुरुवात गरेको छ । आइतबार हेटौंडाको क्याम्पा रंगशालामा भएकाे खेलमा ललितपुरले चितवनलाई १–० गोल अन्तरले पराजित गर्दै ललितपुर जिल्लाले आफ्नो विजयी सुरुवात गरेको हो ।
पहिलो हाफ गोल रहित सकिएपनि खेलको दोस्रो हाफको ६८ मिनेटमा ललितपुरका बसन्त तामाङले गरेको गालेनै ललितपुरका लागि निर्णायक गोल बन्न पुग्यो । सोमबार दुईवटा खेल हुनेछन् । पहिलो खेल रामेछाप र सिन्धुपाल्चोकबीच हुनेछ भने दोस्रो खेल मकवानपुर र नुवाकोटबीच हुने फुटबल खेल संयोजक कल्पना शर्माले बताइन् ।
त्यस्तै आइतबार नै हेटौंडामा भएको ब्याटमिन्टन प्रतियोगितामा चितवन, सिन्धुली, रसुवा, काभ्रेपलान्चोक, ललितपुर, रामेछाप, धादिङ र नुवाकोट जिल्ला सोझो सेटले विजयी भइ क्वाटरफाइनलमा प्रवेश गरेका छन् । आज ब्याटमिन्टन खेलका एकल खेलाडी र डबल खेलाडीबीच ३० खेल खेलाइएको थियो ।
महिला तर्फभने चितवन, धादिङ, ललितपुर, भक्तपुर, सिन्धुपाल्चोक,नुवाकोट, मकवानपुर र दोलखा जिल्ला क्वाटरफाइनलमा प्रवेश गरेको छ । सोमबार बिहानबाट क्वाटरफाइनलका खेल खेलाइने बताइएकाे छ ।
प्रदेश खेलकुद विकास परिषद् बागमतीकाे आयोजनामा शनिबार हेटाैडामा उद्घाटन भएकाे प्रथम प्रदेश खेलकुद प्रतियाेगिता अन्तरगत मकवानपुरमा आइतबारबाट फुटबल र व्याडम्निटन खेल सुरु भएको हाे । मकवानपुरमै चैत्र ५ गतेबाट तेक्वान्दो प्रतियोगिता सुरु हुनेछ । त्यस्तै, चितवनमा सोमबारबाट भलिबल र क्रिकेट खेल खेलाइने कार्य तालिका रहेकाे छ ।
त्यस्तै, सिन्धुपाल्चोकमा चैत्र ७ गतेबाट कराँते खेल हुनेछ भने काठमाडौंमा चैत्र ६ गतेदेखि एथलेटिक्स प्रतियोगिता हुने परिषदले जनाएको छ । त्यस्तै, काभ्रेमा भने चैत्र ७ गतेदेखि महिला फुटबल र ९ गतेदेखी बक्सिङ खेल प्रतियोगिता हुने परिषद्ले जनाएकाे छ । प्रतियोगिताको लागि ८ करोड ४ लाख रकम खर्च हुने अनुमान आयाेजकले गरेको छ । विभिन्न खेलमा करिब २ हजार भन्दाबढी खेलाडीले सहभागिता जनाउनेछन् । खेलको समापन कार्यक्रम १२ गते शनिबार काभ्रेको धुलिखेलमा हुनेछ ।
मकवानपुर । प्रथम प्रदेश खेलकुद प्रतियोगिताको हेटाैंडामा उद्घाटन गरिएकाे छ । बागमती प्रदेशका मुख्यमन्त्री राजेन्द्र प्रसाद पाण्डेले प्रथम खेलकुद प्रतियोगिताको शनिबार हेटौंडास्थित पिप्ले क्याम्पा रंगशालामा एक समारोहबीच उद्घाटन गरेका हुन् ।
प्रदेश खेलकुद विकास परिषद् बागमती प्रदेशको आयोजना हुने प्रथम खेलकुद प्रतियोगिताको मुख्यमन्त्री पाण्डेलेओलम्पिक टर्च बालेर ओलम्पियन धावक बैकुण्ठ मानन्धर हस्तान्तरण गर्दै प्रतियोगिताको उद्घाटन गरेका हुन् । शनिवार उद्घाटन गरिए पनि प्रतियाेगिता अन्तरगतका खेलहरु फागुन २९ गते आइतबारबाट सुरु हुने भएकाे छ । उद्घाटन कार्यक्रममा नेपाल आर्मी, नेपाल प्रहरीको व्याण्ड सहितको प्रस्तुती, विद्यार्थीहरुद्धारा ड्रिल प्रदर्शन, अतिसबाजी, मार्सल आट्र्स डेमो, विभिन्न तामाङ, नेवाः, थारु समुदायले आफ्नो झाँकी तथा खैजेडी र पञ्चेबाजाको साँस्कृतिक कार्यक्रम भव्य प्रस्तुत तथा प्रदर्शनी गरिएकाे थियो ।
कार्यक्रममा पिप्ले क्याम्पा रंगशाला निर्माणमा योगदान गरेका पूर्व राष्ट्रिय बक्सिङ खेलाडी तथा पिप्ले युवा क्बलका अध्यक्ष सुशील घिमिरेलाई सम्मान गरिएको थियो । कार्यक्रममा राष्ट्रिय तथा स्थानीय कलाकारहरुले आफ्नो गायन तथा नृत्य प्रदर्शन गरेका थिए ।

प्रतियोगिता मकवानपुरसहित चितवन, काभ्रे, काठमाडौं र सिन्धुपाल्चोक गरी ५ जिल्लामा विभिन्न खेलको आयाेजना हुनेछ । मकवानपुरकाे हेटाैडामा फागुन २९ गते आइतबारबाट पुरुष फुटबल, व्याडम्निटन र चैत्र ५ गतेबाट तेक्वान्दो प्रतियोगिता सुरु हुनेछ । त्यस्तै, चितवनमा ३० गतेदेखि भलिबल र क्रिकेट खेल सुरु हुने छन् । प्रतियाेगिता अन्तरगत सिन्धुपाल्चोकमा चैत्र ७ गतेबाट कराँते खेल हुनेछ भने काठमाडौंमा चैत्र ६ गतेदेखि एथलेटिक्सका खेल हुने छ । त्यस्तै, काभ्रेमा चैत्र ७ गतेदेखि महिला फुटबल र ९ गतेदेखी बक्सिङ खेल प्रतियोगिता हुने बताइएकाे छ ।
८ करोड ४ लाख खर्च हुने अनुमान गरिएकाे प्रतियाेगितामा बिभिन्न खेलमा करिब २ हजार भन्दाबढी खेलाडीले सहभागिता जनाउने छन् । १ हजार २ सय पुरुष खेलाडी र ९ सय महिलाले खेलाडीले प्रतियाेगितामा भाग लिने आयाेजकले जानकारी दिएकाे छ । खेलको समापन कार्यक्रम चैत्र १२ गते शनिबार काभ्रेको धुलिखेलमा हुनेछ ।
मकवानपुर । हेटौंडा उपमहानगरपालिका वडा नम्बर ५ को क्याम्पाडाँडामा निर्माण भएकाे पिप्ले क्याम्पा रंगशालाकाे शुक्रबार उद्घाटन गरिएकाे छ । पिप्ले युवा क्लबको अगुवाई, ५ नम्बर वडा कार्यालय, हेटौंडा उपमहानगरपालिका र जनसमुदायको सहयोगमा निर्माण भएको रंगशालाको शुक्रबार हेटाैडा उपमहानगरपालिका प्रमुख हरि बहादुर महतले उद्घाटन गरेका हुन् ।
मकवानपुरको हेटौंडा उपमहानगरपालिका वडा नम्वर ५ स्थित क्याम्पाडाँडामा निर्माण सुरु गरिएको एक वर्षमै रंगशालाकाे उद्घाटन गरिएकाे हाे । रगंशालाको उद्घाटन गर्दै मेयर महतले विकास निर्माण र खेलकुदको क्षेत्रमा हेटौंडा उपमहानगरपालिकाले प्राथमिकताका साथ काम गरेको बताए । सबै जनप्रतिनिधिहरुको साथ र सहयोगबाट उपमहानगरपालिकाले कामका उपलब्धी हासिल गरेकाे महतले बताए ।
करिब ५ बिगाह क्षेत्रफलमा निर्माण भएको पिप्ले क्याम्पा रंगशाला १ करोड ७० लाख लागतमा निर्माण भएको हाे । पिप्ले युवा क्लबको अगुवाइ र हेटौंडा उपमहानगरपालिकाको सहयोगमा रंगशाला निर्माण सुरु गरिएको थियो । रंगशाला निर्माण गर्न हेटौंडा उपमहानगरपालिका, ५ नम्बर वडा कार्यालय र व्यक्तिगतरुपमा पनि सहयोग प्राप्त भएको थियो ।
राष्ट्रिय तथा अन्तर्राष्ट्रियस्तरका प्रतियोगिता सञ्चालन गर्न र खेलाडीलाई दैनिक प्रशिक्षणका लागि व्यवस्थित स्थानको रुपमा पिप्ले रंगशाला निर्माण गरिएको पिप्ले युवा क्लबका अध्यक्ष सुशील घिमिरेले जानकारी दिए । रंगशालामा करिब १० हजार दर्शक अटाउने बताइएकाे छ । निर्माण सकिन अझै एक महिना लाग्ने छ अध्यक्ष घिमिरेले भने –‘पूर्णरुपमा निर्माण सकिएपछि लागत खर्च सार्वजनिक गर्ने योजना छ ।’

रंगशाला निर्माणमा हेटौंडा उपमहानगरपालिकाको १ करोड ९ लाख रुपैयाँ, ५ नम्बर वडा कार्यालयको ३० लाख बजेट विनियाेजन गरेकाे थियाे । यस्तै, जनसमुदायबाट ३० लाख रुपैयाँ संकलन गरी जम्मा १ करोड ७० लाख लागतमा बनेको रंगशाला हेर्नलायक रहेकाे घिमिरेले दाबी गरे ।
अध्यक्ष घिमिरेले भने, ‘आफू पनि खेलाडी हो । खेल क्षेत्रप्रति छुट्टै लगाव छ । बागमती प्रदेशको राजधानीको रुपमा रहेको हेटौंडामा खेलकुदको लागि एउटा रंगशाला आवश्यक थियो । रंगशाला निर्माण हुनु भनेको खेल क्षेत्रको विकास हुनु हो ।’ आगामी दिनमा रंगशालाले थुप्रै खेलाडी उत्पादन गर्ने उनकाे विश्वास छ । रंगशाला निर्माण भएपछि मकवानपुरका खेलाडीहरु पनि खुसी भएकाे उनले बताए ।
मकवानपुर फुटबल तथा अन्य खेलका खेलाडी उत्पादनको हिसाबले राम्राे स्थानमा रहेको भएपनि रंगशालाको अभावमा यहाँ संचालन हुने फुटबल लगायतका खेलका प्रतियोगिताहरु अस्थायी प्यारफिट तथा खुला मैदानमा संचालन गर्नु पर्ने बाध्यता रहँदै आएको थियो । रंगशालामा फुटबलसहित एथ्लेटिक्सको ट्रयाक समेत निर्माण गरिएको छ ।