मकवानपुर । हेटौडा उपमहानगरपालिकामा जारी तेस्राे मेयर कप फुटबल प्रतियाेगिता अन्तर्गत बुधबार भएकाे खेलमा १८ नम्बर वडाकाे फुटबल टिम विजयी भएकाे छ । हेटौँडा उपमहानगरपालिका नगर खेलकुद विकास समितिको आयोजनामा भएको प्रतियाेगिता अन्तरगत बुधबारकाे खेलमा १८ नम्बर वडाले ४ नम्बर वडालाई सडन डेथमा पराजित गरेको हो ।
हेटौँडा–५ स्थित पिप्ले–क्याम्पा रंगशालामा भएको खेल निर्धारित समयमा दुबै टिमबाट गोलरहित बराबरीमा राेकिएपछि खेल टाइब्रेकरमा धकेलिएको थियो । टाइब्रेकरमा १८ र ४ नम्बर वडाले समान ३–३ गोल गरेपछि खेलको निर्णय सडेन डेथबाट लिनु परेकाे हाे । सडेन डेथको पहिलो प्रहारमै १८ नम्बरले जित निकालेको हो ।
बुधबारकाे विजेता १८ नम्बर वडाले अब आइतबार क्वाटरफाइनलमा १५ नम्बर वडासँग खेल्नेछ । जेठ १५ गते भएकाे प्रतियाेगिताकाे उद्घाटन खेलमा वडा नम्बर ३ लाई ३–१ गोलअन्तरले पराजित गर्दै १५ नम्बर विजयी भएकाे थियाे । यसैगरी मंगलबार भएको खेलमा ६ नम्बर वडालाई २–० गोलअन्तरले हराउँदै १० नम्बरले विजयी सुरुवात गरेको हाे । १० नम्बर वडाले प्रतियाेगितामा वाई पाएकाे १३ नम्बर वडासँग जेठ २१ गते आइतबार क्वाटरफाइनल खेल खेल्नेछ ।
हेटौँडा उपमहानगरका १९ वटै वडाको सहभागिता रहेको प्रतियोगितामा बिजेताले नगद २ लाख, उपविजेता १ लाख ५० हजार, सेमीफाइनलमा पराजित हुने २ वटा टिमलाई ५०/५० हजार रुपैया तथा सर्वोत्कृष्ट खेलाडिलाई १५ र उत्कृष्ट खेलाडीहरुलाई ५÷५ हजार रुपैयाँ नगदसहित शिल्ड एवम् मेडल पुरस्कार प्राप्त गर्ने हेटौडा उपमहानगरपालिका खेलकुद शाखा अधिकृत बसन्त सिटौलाले जानकारी दिए । प्रतियाेगिताकाे फाइनल खेल जेठ २७ गते हुने बताइएकाे छ ।

मकवानपुर । बागमती प्रदेशकाे राजधानी हेटौँडामा जारी खुला राष्ट्रिय पुरुष भलिबल प्रतियोगितामा गण्डकी प्रदेश भलिबल टिम सहित विभागीय टिम त्रिभुवन आर्मी, सशस्त्र प्रहरी र नेपाल पुलिस सेमीफाइनलमा प्रवेश गरेको छ । बुधबारको खेलबाट उनिहरु सेमिफाइनल पुगे पनि आधिकारिकत घोषणा भने उक्त टिमहरु बिचको विहीबारको खेल पछि हुनेछ ।
मकवानपुर जिल्ला भलिबल टिम, झापाको पाथीभरा टाइगर भलिबल क्लब र स्याङ्जाको वालिङ भलिबल क्लब भने समूह चरणबाटै बाहिरिएको मकवानपुर जिल्ला भलिबल संघका अध्यक्ष बसन्त कुमार सिटौलाले जनाकारी दिए ।
एउटै समूहमा रहेको आर्मी र गण्डकी समूह चरणको दुबै खेल जितेर सेमीफाइनल प्रवेश गरेको हो । हेटौँडा–४, हुप्रचौरस्थित भलिबल कोर्टमा बुधबार बिहान भएको पहिलो खेलमा त्रिभुवन आर्मीले मकवानपुर जिल्ला भलिबल संघलाई ३–० को सोझो सेटले पराजित गरेको हो ।
मंगलबार भएको पहिलो खेलमा मकवानपुरलाई हराएको गण्डकीले बुधबारकाे खेलमा वालिङलाई ३–१ सेटले हराएको हो । गण्डकीले पहिलो र दोस्रो सेट जित्दा तेस्रो सेटमा हार व्यहोर्नुपर्यो । चौथो सेटमा सफलता संगै गण्डकी प्रदेशको भलिबल टिम सेमीफाइनलमा स्थान बनाएको हो । प्रतियोगिता अन्तर्गत बुधबार दिउँसो भएको पहिलो खेलमा झापाको पाथिभरा टाइगर भलिबल क्लब नेपाल पुलिस क्लबसँग पराजित भएको छ । नेपाल पुलिसले पाथीभरालाई सोझो सेटमा पराजित गरेको हो ।

बुधबार भएको अन्तिम खेलमा त्रिभुवन आर्मी क्लबले वालिङ भलिबल क्लबलाई सोझो सेटमा पराजित गरेको हो । विहीबार पहिलो खेल मकवानपुर र वालिङबीच खेल हुनेछ भने दोस्रो खेलमा सशस्त्र प्रहरी र नेपाल पुलिस बीच प्रतिस्पर्धा हुनेछ ।
मकवानपुर र वालिङ बीचको खेल प्रतिष्ठाका लागि र सशस्त्र प्रहरी र नेपाल पुलिसबीचको खेल समूह चरणको विजेता र उपविजेता घोषणको लागि हुने सिटौलाले बताए । विहीबारको अन्तिम खेल त्रिभुवन आर्मी र गण्डकी प्रदेशको भलिबल टिमबीचको खेल पनि समूहको विजेता र उपविजेता छिनोफानो र सेमीफाइनल समीकरण पूराको लागि महत्वपूर्ण रहने अध्यक्ष सिटौलाले बताए ।
केशबलाल श्रेष्ठ स्मृति राष्ट्रिय प्रतिष्ठान मकवानपुर र मकवानपुर जिल्ला भलिबल संघको आयोजनामा जारी प्रतियोगितामा विजेता टोलीले नगद २ लाख प्राप्त गर्नेछ भने उपविजेता हुने टोलीले नगद १ लाख प्राप्त गर्नेछ। प्रतियोगिताको सेमिफाइनल पुग्ने दुई टोलीले नगद ५०/५० हजार हात पार्ने संघ अध्यक्ष सिटौलाले जानकारी दिए । यस्तै, प्रतियोगिताको सर्वोत्कृष्ट खेलाडीले नगद १५ हजार र विधागत उत्कृष्ट हुने खेलाडीहरूले जनही नगद ५/५ हजार प्राप्त गर्ने सिटौलाले बताए ।

अध्यक्ष सिटौलाका अनुसार प्रतियोगितामा विभागीय टोलीहरू नेपाल आर्मी, सशस्त्र प्रहरी बल र नेपाल प्रहरीसहित आयोजक मकवानपुर जिल्ला भलिबल संघ, बागमती प्रदेश भलिबल टिम, मधेस प्रदेश भलिबल टिम, मणिमुकुन्द भलिबल टिम, गण्डकी प्रदेश भलिबल टिम, वालिङ भलिबल टिम स्याङजा र पाथिभरा भलिबल टिम झापाको सहभागिता रहेकाे छ ।
प्रतियोगितामा करिब २५ लाख खर्च हुने आयोजकको अनुमान छ । प्रतियोगिता सञ्चालनमा हेटौंडा उपमहानगरपालिका, प्रदेश खेलकुद विकास परिषद् बागमती, हेटौंडा उपमहानगरपालिकाको १९ र ३ नम्बर वडा कार्यालयले सहयोग रहेकाे आयोजकले जनाएको छ।
मकवानपुर । बागमती प्रदेशको राजधानी हेटौंडामा खुला राष्ट्रिय पुरुष भलिबल प्रतियोगिता हुने भएको छ ।
केशवलाल श्रेष्ठ स्मृति प्रतिष्ठान हेटौंडा र मकवानपुर जिल्ला भलिबल संघ हेटौंडाको आयोजनामा राष्ट्रिय पुरुष भलिबल हुने भएको हो । आयोजक सस्थाले प्रतियोगिता जेठ १६ गते देखि २० गतेसम्म संचालन हुने हेटौंडामा पत्रकार सम्मेलन गरि जानकारी गराइएको हो ।
भलिबल प्रतियोगितामा राष्ट्रिय र मोफसलका गरि १० टिमले सहभागिता जनाउने आयोजक मकवानपुर जिल्ला भलिबल संघका अध्यक्ष बसन्त कुमार सिटौलाले जानकारी दिए । प्रतियोगितामा नेपाल आर्मी, सशस्त्र प्रहरी, नेपाल प्रहरी, मकवानपुर जिल्ला भलिबल टिम, बागमती प्रदेश भलिबल टिम, पाथीभरा भलिबल टिम, मणिमुकुन्द भलिबल टिम, मधेस प्रदेश भलिबल टिम, वालिङ भलिबल टिम र गण्डकी प्रदेश भलिबल टिमले सहभागिता जनाउने सिटौलाले जानकारी दिए ।
प्रतियोगितामा प्रथम द्वितीय हुने टिमले क्रमशः २ लाख र १ लाख सहित नगद शिल्ड मेडल र प्रमाणपत्र प्राप्त गर्ने छन । यस्तै गरि सेमिफाइनल पुग्ने २ टिम लाई नगद ५०/५० हजार प्रदान गरिने आयोजक केशवलाल श्रेष्ठ स्मृति प्रतिष्ठान अध्यक्ष प्रताप बिष्टले जानाकारी दिए । यसै गरि सर्बोत्कृष्ट खेलाडी र बिधागत उत्कृष्ट खेलाडी लाई नगद पुरस्कर प्रदान गरिने बिष्टले बताए ।
हेटौंडा उपमहानगरपालिका वडा नम्बर ४ स्थित हुप्राचौर खेल मैदानमा हुने प्रतियोगिताको अनुमानित लागत २५ लाख रहेको सिटौलाले जानकारी दिए ।
प्रतियोगिता सह आयोजक हेटौंडा उपमहानगरपालिका भलिबल संघ थाहा नगरपालिका भलिबल संघ भिमफेदी गाउँपालिका भलिबल संघ र मकवानपुर गढी गाउँपालिका भलिबल संघ रहेका छन । मकवानपुर जिल्ला खेलकुद समिति र नगर खेलकुद बिकास समितिको समन्वयमा प्रतियोगिता संचालन हुने भएको हो ।
प्रतियोगिताको मुख्य सहयोग हेटौंडा उपमहानगरपालिका तथा बागमती प्रदेश खेलकुद बिकास परिषद, हेटौंडा उपमहानगरपालिका ३ नम्बर वडा कार्यालय र १९ नम्बर वडा कार्यालय सहयोग रहेको सिटौलाले बताए ।

मकवानपुर । दोस्रो बागमती प्रदेश खेलकुद प्रतियोगिता शनिबार सम्पन्न भएको छ । बागमती प्रदेश खेलकुद विकास परिषदको आयोजना भएको प्रतियोगिताको हेटौंडा–५ स्थित पिप्ले क्याम्पा रंगशाला शनिबार विशेष समारोहकाबीच समापन गरिएको हो ।
प्रदेशका मुख्यमन्त्री शालिकराम जम्कट्टेलको उपस्थितमा प्रतियोगिताको समापन कार्यक्रम आयोजना गरिएको थियो । जेष्ठ ७ गते मुख्यमन्त्री जम्कटे्टलले पिप्ले क्याम्पा रंगशालामै प्रतियोगिताको उद्घाटन गरेका थिए ।
स्वास्थ्यका लागि खेलकुद, राष्ट्रका लागि खेलकुद भन्ने नारा साथ आयोजना भएको दोस्रो बागमती प्रदेश खेलकुद प्रतियोगितामा काठमाडौं ३१ स्वर्ण, २२ रजत र २५ कांस्य गरी कुल ७८ पदक सहित च्याम्पियन बनेको हो । प्रतियोगिताको पहिलो संस्करणमा दोस्रो स्थानमा रहेको काठमाडौं दोश्रो संस्करणमा पहिलो स्थान बनाउन सफल भयो ।
प्रतियोगिताको पहिलो सस्करणमा पहिलो भएको चितवन दोस्रो सस्करणमा २३ स्वर्ण, २४ रजत र २५ कांस्य गरी कुल ७२ पदक सहित दोस्रो स्थानमा रह्यो । यस्तै काभ्रेले २२ स्वर्ण, १३ रजत र १८ कांस्य सहित ५३ पदक जित्दै तेस्रो स्थान बनाउन सफल भयो ।
पदक तालिकाको चौथो स्थानमा ललितपुर रहेको छ । उसले १९ स्वर्ण २७ रजत र २७ कास्य पदकाे जितेकाे छ । सिन्धुपाल्चोक पाँचौ र मकवानपुर छैटौं स्थानमा छ । सिन्धुपाल्चाेकले १७ स्वर्ण ८ रजत र १६ कास्य पदक र मकवानपुरले १६ स्वर्ण ११ रजत र १७ कास्य पदक हात पारेकाे हाे । त्यस्तै भक्तपुर, नुवाकोट, रामेछाप, दोलखा, सिन्धुली क्रमशः सातौं, आठैं, नवौं, दशौं र एघारौं स्थानमा रहको छ ।
यसैगरी भक्तपुरले १४ स्वर्ण १४ रजत र ९ कास्य, नुवाकाेटले १० स्वर्ण १० रजत र २२ कास्य, रामेछापले १० स्वर्ण ९ रजत र १८ कास्य, दाेलखाले ३ स्वर्ण ११ रजत र ९ कास्य, सिन्धुलीले ३ स्वर्ण ७ रजत र १० कास्य पदक प्राप्त गरेका छन् । पदक तालिकाको अन्तिममा धादिङ र रसुवा रहेका छन् । धादिङले ६ रजत र १४ कास्य पदक प्राप्त गर्दा रसुवाले २ रजत र ५ कास्य पदका प्राप्त गरे ।
मकवानपुर, काठमाडौं, चितवन र ललितपुरमा संचालन गरिएकाे प्रतियाेगिता अन्तर्गतका १३ खेलमध्ये १२ खेलका कुल १ सय ६८ स्वर्ण पदक गणना भएको थियो । पौडी खुला प्रतियोगिता भएकाले पदक तालिकामा पौडीको पदक गणना गरिएन ।बागमती प्रदेशका १३ जिल्लाका करिब २५ सय खेलाडीले प्रतिस्पर्धा गरेका थिए । प्रतियोगिताका स्वर्ण, रजत र कांस्य विजेताले क्रमशः ५ हजार, ४ हजार र ३ हजार नगद पुरस्कार प्राप्त गरेका छन् ।
मुख्यमन्त्री जमकट्टेल, प्रदेशको आर्थिक मामिता तथा योजना मन्त्री बहादुर सिंह लामा, बागमती प्रदेशका सामाजिक विकास मन्त्री कुमारी मोक्तान, प्रदेश खेलकुद विकास परिषद्, बागमती प्रदेशका सदस्य–सचिव सूर्यलाल भण्डारी लगायतले समापनमा टिम च्याम्पियन बनेको काठमाडौं, दोस्रो चितवन र तेस्रो काभ्रेलाई ट्रफी प्रदान गरिएको थियो । पहिलो पटक प्रदेश खेलकुदको टिम च्याम्पियनका लागि ट्रफी प्रदान गरिएकाे हाे।
प्रदेश खेलकुद विकास परिषद्को आयोजनामा जेठ ७ गतेबाट सुरु भएकाे प्रतियोगितामा १३ खेल समावेश गरिएकाे थियाे । २ सय १९ स्वर्ण, २ सय १९ रजत र ३ सय ५६ कास्य गरी ७ सय ९४ पदका लागि प्रतिस्पर्धा हुने बताइएकाे भए पनि १ सय ६८ स्वर्ण, १ सय ६४ रजत र २ सय १४ कास्य गरी ५ सय ५० पदकका लागि प्रतिस्पर्धा भएकाे थियाे ।
प्रतियोगितामा फुटबल, भलिबल, एथलेटिक्स, तेक्वान्दो, कराते, बक्सिङ, रग्बी, ब्याडमिन्टन र आइटिएफ तेक्वान्दो हेटौँडाका विभिन्न खेल मैदानमा प्रतिस्पर्धा गराइएकाे थियाे भने प्रतियोगिताको पुरुष फुटबल र एथ्लेटिक्स् हेटौंडा–५ स्थित पिप्ले क्याम्पा रंगशालामा र महिला फुटबल हेटौडाकाे गौरीटार रंगशालामा खेलाइएका थिए । हेटौंडा–४ स्थित हुप्रचौरमा भलिबल, रग्वी, कराँते, तेक्वान्दो, आईटीटीफ र तेक्वान्दो खेलका प्रतिस्पर्धा भएकाे थियाे ।
त्यस्तै बक्सिङ्ग महिला र पुरुष खेल हेटौंडा–४ स्थित कर्भड हलमा तथा व्याटमिन्टन महिला र पुरुष हेटौंडा–११ थानाभ¥याङ्गस्थित कर्भड हलमा खेलाइएकाे थियाे । जुडो काठमाडौं, उसु त्रिपुरेश्वर, क्रिकेट चितवन, पौडी सादोबाटो ललितपुरमा प्रतिस्पर्धा गराइएकाे प्रदेश खेलकुद विकास परिषद्का सदस्य सचिव सूर्यलाल भण्डारीले जानकारी दिए ।
स्वास्थ्यका लागि खेलकुद राष्ट्रका लागि खेलकुद भन्ने नारा सहित बामगती प्रदेश खेलकुद बिकास परिषदले देशमै पहिलो पटक प्रदेश स्तरको खेलकुद प्रतियोगिता गत बर्ष आयोजना गरेको थियो । प्रतियोगिताको पहिलो संस्करणमा गत वर्ष ८ वटा विधामा खेल खेलाइएको मा दोस्रो संस्करणमा ५ खेल थप गर्दै १३ बिधामा प्रतियोगिता संचालन भएकाे हाे ।
प्रदेशका खेल प्रतिभाको खोजी, प्रदेश समुह तयार र खेलाडीलाई नियमित अभ्यास एवम् प्रशिक्षणको उद्देश्यका साथ दोस्रो वर्ष पनि प्रतियोगिता सुरु गरिएको प्रदेश खेलकुद परिषद्ले जनाएको छ । यस्तै दोस्रो बागमती प्रदेश खेलकुद प्रतियोगिताको मस्कटको रुपमा लोपन्मुख सालकलाई प्रयोग गरिएको थियाे । ‘किसानको साथी’ को रुपमा हेर्ने गरिएको सालक संरक्षणको पहल स्वरुप मस्कटको रुपमा प्रयोग गरिएको बागमती प्रदेश खेलकुद परिषद कार्यालयले जनाएको छ ।
मकवानपुर । दोस्रो बागमती प्रदेश खेलकुदअन्तर्गत पुरुष फुटबलमा मकवानपुरले स्वर्ण जितेको छ । शनिबार हेटौँडा ५ स्थित पिप्ले–क्याम्पा रंगशालामा भएको फुटबल फाइनलमा काठमाडौंलाई ४-३ ले हराउदै मकवानपुर दोस्रो पटक प्रतियोगिताको च्याम्पियन बनेको छ ।
खेलकुद प्रतियोगिताको अन्तिम दिन शनिबार भएको पुरुष फुटबलमा निर्धारित ९० मिनेटमा एक/एक गोलको बराबरी भएपछि खेलको निर्णय पेनाल्टी सुटआउटबाट लिइएको थियो । पेनाल्टी सुटआउटमा मकवानपुरले काठमाडौंमाथि ४–३ को जित हासिल गर्यो ।
निकै प्रतिस्पर्धात्मक फाइनल खेलको तालमेल नमिल्दा खेल सुरु भएको १२ औँ सेकेण्डमा मकवानपुरले आत्मखाती गोल गरे संगै काठमाडौंले १–० को अग्रता बनायो ।
खेलको पहिलो हाफमा गोलको लागि संर्घषरत मकवानपुरले राम्रो अवसर पाएपनि काठमाडौंको पोष्टमा गोल गर्न सकेन । मकवानपुरका लागि खेलको ७० औँ मिनेट सुजन गुरुङले गोल गर्दै खेल १–१ को बराबरीमा ल्याए । मकवानपुरका कप्तान प्रितम स्याङ्बोको पासलाई सुजनले काठमाडौको पोष्टमा जाली चुमाए । त्यसपछिको समयमा दुबै तर्फबाट गोल हुन नसके पछि खेल पेनाल्टीमा धकेलियो ।
पेनाल्टीमा मकवानपुरका निर्मल बल र काठमाडौंका खेमराज तामाङको प्रहार गोलमा परिणत हुन सकेन । मकवानपुरका विकास लामा, सुवास पाख्रिन, सुजन गुरुङ र प्रीतम स्याङ्बोले गोल गरे । काठमाडौंका लागि वाङ गुरुङ, कब्बु कन्दङ्वा र सनम शेर्पाको प्रहार गोलमा परिणत भयो । विवेक राईको प्रहार बाहिरिएसँगै मकवानपुरले स्वर्ण जित्यो ।
मकवानपुरका सुजन गुरुङ फाइनल खेलका म्यानअफ द क्याच घोषित भए । प्रतियोगिताको सर्बोउत्कृष्ट खेलाडी मकवापुरका कप्तान प्रितम स्याङ्बो घोषित भए । विधागततर्फ उत्कृष्ट मकवानपुरका गोलरक्षक गोपी बर्तौला, रक्षक काठमाडौंका सौगात लामा, मिडफिल्डर मकवानपुरका स्याम्युल सुनार, फर्वाड खेमराज तामाङ, सर्वाधिक गोलकर्ता प्रितम स्याङ्बो घोषित हुँदा उत्कृष्ट प्रशिक्षकमा मकवानपुरकै बिजयलाल श्रेष्ठ चुनिए ।
बागमती खेलकुद प्रतियोगिताको पहिलो संस्करणमा मकवानपुरले ललितपुरलाई पराजित गर्दै फुटबलमा स्वर्ण जितेको थियो ।