मकवानपुर । मकवानपुर जिल्ला फुटबल संघले रेफ्रीमाथि हातपात र अभद्र व्यवहार गर्ने खेलाडी र क्लबलाई कारबाही गरेकाे छ । सोमबार जिल्ला लिग क्वालिफाइ फुटबल प्रतियोगितामा पञ्चसिल र दि रिभाइबल क्लबबीचको खेलमा रेफ्रीमाथि हातपात सहित अभद्र व्यवहार गरिएको भन्दै जिल्ला फुटबल संघले दि रिभाइबल क्लबलाई कारबाही गरेकाे छ ।
यसैगरी क्लबका गोल रक्षक, कप्तान, खेलाडी र टिम म्यानेजरलाई ३ वर्षसम्मको प्रतिबन्धको निर्णय गरेको मकवानपुर जिल्ला फुटबल संघले जनाएकाे छ । खेल सकिएर रेफ्री ग्राउन्ड बाहिर निस्कदा दि रिभाइबल क्लबका खेलाडी, अफिसियल सहित टिम मेनेजरले रेफ्रीमाथि हातपात, अभद्र व्यवहार गरेको जिल्ला फुटबल संघले जनाएको छ ।
संघको मंगलबार बिहान बसेको बैठकले दि रिभाईबल क्लबलाई ३ वर्षको प्रतिबन्ध लगाउने, क्लबका गोलरक्षक तथा कप्तान अनिल लोप्चनलाई २ बर्षको प्रतिबन्ध गर्ने, खेलाडी सुनिल खड्कीलाई ३ वर्षको प्रतिबन्ध लगाउने र क्लबका टिम म्यानेजर कृष्ण बहादुर ठकुरीलाई ३ वर्षको प्रतिबन्ध लगाउने निर्णय गरेको छ । यस्तै घटनामा संलग्न रहेको भन्दै क्लबका ओम गुरुङ कृष्णलाई समेत एक वर्षको प्रतिबन्धको निर्णय गरिएको छ ।
प्रतिबन्धमा परेको खेलाडी तथा अफिसियल एन्फाद्धारा आयोजित फुटबल प्रतियोगिता र एन्फा रेफ्री आबद्ध प्रतियोगितामा सहभागी हुन नपाईने गरि प्रतिबन्ध गरिएको जिल्ला अध्यक्ष टिकाराम लामाले जानकारी दिए ।
मकवानपुर । मकवानपुरको हेटौंडामा बृहत् खेलकुद तथा व्यापार महोत्सव हुदैछ । खेल क्षेत्रको विकासका लागि मकवानपुर जिल्ला खेलकुद विकास समितिको आयोजना पौष ५ गेते देखि १७ गतेसम्म हुने बृहत् खेलकुद तथा व्यापार महोत्सवको लागि मूल आयोजक समिति गठन भएको छ ।
समिति अध्यक्ष वेष खड्गीको अध्यक्षतामा १०१ सदस्यीय महोत्सव मूल आयोजक समिति गठन भएको हो ।खेलकुद विकास समितिका कार्यालय प्रमुख माधव कोइरालाको संयोजकत्वमा विभिन्न खेल संघका पदाधिकारी रहने गरी खेलकुद संयोजक समिति गठन गरिएको छ भने पूर्व अध्यक्षहरु रहेको सल्लाहकार समिति निर्माण भएको छ ।
महोत्सवमा राष्ट्रिय, प्रदेश तथा स्थानीय गरी १३ वटा विभिन्न खेलकुद प्रतियोगिता हुनेछ । महोत्सवमा महिलाको राष्ट्रिय उसु प्रतियोगिता, महिलाकै राष्ट्रिय भलिबल, कबड्डीको महिला पुरुष दुवै विधाको प्रदेशस्तरीय प्रतियोगिता हुनेछ ।
यस्तै कराँतेको जिल्लास्तरी प्रतियोगिता, फुलकन्ट्याक्ट कराँतेको जिल्ला स्तरीय, आर्चारीको खेल प्रदर्शन, रेस्लिङको आमन्त्रित र कुस्तीको अन्तर्राष्ट्रिय प्रदर्शन हुनेछ । ब्याड्मिन्टनको खुला प्रतियोगिता, आइटीएफ तेक्वान्दो र हक्कीको प्रदेशस्तरीय प्रतियोगिता र महिलाको लागि ७ ए साइड फुटबल प्रतियोगिता गर्ने आयोजकले जानकारी दिएको छ ।
सबै प्रतियोगिताको विजेता उपविजेताले नगदसहित ट्रफी, मेडल र प्रमाणपत्र प्राप्त गर्नेछन् । खेलकुद महोत्सवबाट भएको आम्दानीको करिब २५ लाख रुपैयाँ खेलकुद विकास समितिले बचत गर्ने लक्ष्य रहेको अध्यक्ष खड्कीले बताए ।
‘मकवानपुर खेल क्षेत्रको उर्वरभूमी हो । आर्थिक अभावकै कारण धेरै खेलाडीले बीचमै खेल छोड्नुपरेको छ । आर्थिक अभावमा उपचार हुन नसकेको अवस्था छ’, अध्यक्ष खड्कीले भने, ‘यो सबै समस्याको समाधानका लागि आर्थिक जोहो गर्ने उद्देश्यले खेलकुद तथा व्यापार महोत्सवको आयोजना गर्न लागेका हौं । हाम्रो उद्देश्य पवित्र छ, तसर्थ सबै संघसंस्था र आम जिल्लाबासीबाट सहयोग प्राप्त हुनेमा विश्वस्त छौं ।’ महोत्सवबाट प्राप्त हुने रकम खेलकुद समितिमै राखेर खेल र खेलाडीको बृत्तिविकासमा लगाउने अध्यक्ष खड्कीले जानकारी दिए ।
महोत्सवमा खेलकुदको स्पर्धासँगै कृषि, पर्यटन, हस्तकला, खेलकुद सामग्री, धार्मिक, सामुदायिक, स्वास्थ्य, जनचेतनामुलक, खानाखाजाका स्टल समेत रहनेछ । यस्तै बाल उद्दान, राष्ट्रिय तथा स्थानीय कलाकारको प्रस्तुती, खुला नृत्य प्रतियोगिता र लाइभ दोहोरी समेत आयोजना हुने आयोजकले जानकारी दिएको छ । महोत्सवमा मकवानपुरमा क्रियाशिल खेलकुदसँग सम्बन्धित सबै संघसंस्थाको प्रतिनिधित्व रहने बताइएको छ ।
मनहरीमा अध्यक्ष कप फुटबल प्रतियोगिता
Tags: No Comments
मकवानपुर । मकवानपुरकाे मनहरीमा गाउँपालिकास्तरीय फुटबल प्रतियाेगिता हुने भएकाे छ । मनहरीमा चौथो अध्यक्ष कप फुटबल प्रतियोगिता–२०८० को हुने भएकाे हाे ।
खेलकुद विकास समिति मनहरीको आयोजना संचालन हुने प्रतियाेगिता आगामी मंसिर ३० गतेबाट सुरु हुने छ ।शनिबार प्रतियाेगिताकाे तयारी तथा व्यवस्थापनकाे पत्रकार भेटघाट गरी जानकारी गराइएकाे हाे । प्रतियोगिताको खेल तालिका सार्वजनिक, मैदान मर्मत, आन्तरिक व्यवस्थापनलगायत सम्पूर्ण तयारी पूरा भएको पत्रकार भेटघाटमा जानकारी दिइएको छ ।
प्रतियोगितामा गाउँपालिकाका नौवटा वडाको सहभागिता रहनेछ । नकाउट आधारमा सञ्चालन हुने प्रतियोगिताको विजेताले नगद १ लाख र उपविजेताले ५० हजार रुपैयाँ प्राप्त गर्ने आयोजक समिति संयोजक विरु लामाले जानकारी दिए ।
प्रतियोगिताको सर्वोत्कृष्ट खेलाडीले नगद १० हजार रुपैयाँ प्राप्त गर्नेछन् । विधागत उत्कृष्ट गोलरक्षक, डिफेन्डर, मिडफिल्डर, फरवार्डलाई जनही ५/५ हजार रुपैयाँ प्राप्त गर्ने समिति सदस्य कविन दर्लामीले बताए । प्रतियोगिताको उद्घाटनमा मनहरी गाउँपालिकाबाट जुनियर राष्ट्रिय टोलीमा समावेश २ जना फुटबलरलाई सम्मानित गरिने बताइएकाे छ ।
प्रतियोगितामा करिब आठलाख ५० हजार रुपैयाँ हुने अनुमान गरिएको छ । प्रतियाेगिता संचालनकाे लागि गाउँपालिकाकाे ७ लाख रुपैयाँ सहयाेग रहने अध्यक्ष रञ्जन कालाखेतीले जानकारी दिए । गाउँपालिकाले राष्ट्रिय खेलाडी उत्पादन गर्ने उद्देश्यका साथ वर्षेनी प्रतियोगिता सञ्चालनमा सहयाेग गर्दै आएकाे उनले बताए । पालिकाले विभिन्न खेलहरुमा योजनाबद्ध लगानी गर्दै आएकाेमा त्यसबाट नतीजा निस्कन थालेको उनकाे भनाइ रहेकाे छ ।
शनिबारबाट मकवानपुर लिग क्वालिफाइ फुटबल प्रतियोगिता
Tags: No Comments
मकवानपुर । शनिबारबाट हेटौडामा मकवानपुर लिग क्वालिफाइ फुटबल प्रतियोगिता हुने भएकाे छ । मकवानपुर जिल्ला फुटबल संघको आयोजनामा नयाँ क्लबबीचको एन्फा मकवानपुर लिग क्वालिफाइ नक आउट फुटबल प्रतियाेगिता हुन लागेकाे हाे ।
संघले बुधबार प्रतियोगितामा सहभागी भएका क्लबका पदाधिकारीहरुको उपस्थितिमा खेलतालिका सार्वजनिक गरिसकेकाे छ भने शुक्रबार पत्रकार भेटघाट गरी प्रतियाेगिताकाे तयारी सम्बन्धमा जानकारी गराएकाे छ । शनिबारदेखि सुरु हुने प्रतियोगिताको पहिलो खेल बिहान हेटौंडा–१८ स्थित कमलादेवी युवा क्लब र हेटौंडा–१२ पदमपोखरीस्थित पञ्चशील युवा क्लबबीच हुनेछ । प्रतियाेगिताकाे दोस्रो खेलकाे प्रतिष्पर्धा शनिबार नै हुने भएकाे छ । शनिबार दिउँसो हेटौंडा–१९ को जनहित युवा क्लब र हेटौंडा–१३ को पदमपोखरी एकेडेमीबीच प्रतिष्पर्धा हुनेछ ।
हेटौंडा उपमहानगरपालिका–५ को पिप्ले–क्याम्पा रंगशालामा हुने प्रतियोगिताको फाइनल खेल मंसिर ३० गते हुने आयोजकले जानकारी दिएकाे छ । प्रतियोगिताको उपाधि विजेता र उपविजेताले शिल्ड, मेडल र ट्रफी प्राप्त गर्नेछन् । यस्तै, प्रत्येक खेलको म्यान अफ द म्याच र विधागत उत्कृष्ट खेलाडीहरुका लागि पनि पुरस्कारको व्यवस्था गरिएको प्रतियाेगितामा सहकार्य गरेकाे नारायणी कलेजका प्रिन्सिपल रघुनाथ खरालले जानकारी दिए । जिल्लास्तरीय क्लबको मान्यता दिँदै जिल्ला लिग खेल्न पाउने २ वटा क्लब छनोट गर्न प्रतियोगिता आयोजना गर्न लागेको जिल्ला फुटबल संघले जनाएकाे छ ।
प्रतियोगितामा १२ वटा टिमको सहभागिता जनाउने भएका छन् । प्रतियोगितामा प्रथम र द्वितीय हुने दुई टिम जिल्लास्तरीय टिमको रुपमा छनोट भई जिल्ला लिगमा सहभागी हुनेछन् । आगामी लिगमा दुई वटा टिम घटुवामा पर्ने समेत बताइएको छ । करिब ४ लाख ८५ हजार लागत अनुमान गरिएकाे प्रतियाेगितामा बागमती प्रदेश खेलकुद परिषद् र नारायणी कलेज हेटौडाले सहयाेग रहेकाे छ ।
२०७६ सालपछि एन्फा रेलिगेटेड लिग गर्नुपर्ने नियम लागू भएपछि मकवानपुरले लिग सुरु गरेको हाे । शुक्रबारकाे पत्रकार भेटघाटमा प्रतियाेगिताकाे तयारी पुरा भएकाे बताइएकाे छ भने एन्फा मकवानपुर लिग क्वालिफाइ नक आउट फुटबल प्रतियोगिता २०८० प्रतियोगिताकाे नियमावली समेत सार्वजनिक गरिएकाे छ । नियमावली अनुसार प्रतियोगितामा सहभागी हुन मकवानपुर जिल्ला भित्रका आधिकारिक स्थायी बसोबास गर्ने खेलाडी तथा क्लबहरुले मात्र पाउने छन् ।
फिफा नियम अनुसार सन्चालन हुने प्रतियोगिताको फाइनलमा पुगेका दुई टिमका खेलाडिहरुले मकवानपुरको पहिलो रेलिगेटेड जिल्ला लिग फुटबल प्रतियोगितामा सहभागी हुन नपाउने मकवानपुर जिल्ला फुटबल संघका सदस्य तथा प्रतियाेगिता संयाेजक आलोक स्याङ्तानले बताए । उनका अनुसार प्रतियोगितामा गत सिजन नेपालको हाल राष्ट्रिय टिममा रहेका सिनियर खेलाडि र ए डिभिजन लिग खेलेका खेलाडीहरुले सहभागी जनाउन पाउने छैन तर विभिन्न उमेर समुहमा खेलेका मकवानपुरे खेलाडि भने सहभागी हुन पाउने छन् ।
प्रतियाेगितामा १२ टिमले सहभागिता जनाउने भएका छन् । स्याङ्तानका अनुसार हेटौंडा–१२, पदमपोखरीको पञ्चशील युवा क्लब, बकैया गाउँपालिकाको बकैया युथ क्लब, हेटौंडा–१८ को कमलादेवी युवा क्लब र हेटौंडा–१३ को पदमपोखरी एकेडेमी, हेटौंडा–१९ को जनहित युवा क्लब, हेटौंडा–२ को द रिभाइबल युवा क्लब, हेटौंडा–८ को कमाने फुटबल एकेडेमी र हेटौंडा–१६ को अग्रसर युवा क्लब, हेटौंडा–१६ को ज्ञानज्योति युवा क्लब, हेटौंडा–५ को जनप्रवाह युवा क्लब, हेटौंडा–१५ को सहयोगी युवा क्लब र हेटौंडा–१४ को समाज कल्याण युवा क्लबले सहभागिता जनाएका छन् ।

मकवानपुर । हेटौंडा भएकाे छैठौं संस्करणको उपमेयर नगरकप भलिबल प्रतियोगिताको पुरुषतर्फ सेमिफाइनल समिकरण पूरा भएको छ । केशवलाल श्रेष्ठ स्मृति केन्द्रिय प्रतिष्ठान र मकवानपुर जिल्ला भलिबल संघको आयोजना, मकवानपुर जिल्ला खेलकुद विकास समितिको सहकार्य तथा हेटौंडा उपमहानगरपालिकाको सहयोगमा हेटौंडा–१९ नेवारपानीमा प्रतियोगिता जारी छ ।
प्रतियाेगितामा शुक्रबार पुरुषतर्फ क्वाटर फाइनलका खेल भए । यस्तै महिला तर्फ पहिलाे सेमिफानलकाे खेल भएकाे छ । शुक्रबार भएको पुरुष भलिवलकाे क्वार्टरफाइनल खेलबाट वडा नम्बर १७, ५, १९ र ११ सेमिफाइनल प्रवेश गरेका हुन् । शुक्रबारकाे खेलमा वडा नम्बर १७ ले वडा नम्बर १० लाई २५–१६ र २५–२० को सोझो सेटमा हराउँदै सेमिफाइनलमा स्थान पक्का गरेकाे हो ।
यस्तै ६ नम्बर वडा र ५ नम्बर वडावीच भएकाे खेलबाट ५ नम्बर सेमिफाइनल प्रवेश गरेकाे हाे ।५ नम्बर वडा २०–२५, २५–२३ र १५–१० को सेटमा विजयी भएको हो । शुक्रबारै भएको खेलमा १९ नम्बरले १२ लाई हराउँदै सेमिफाइनल प्रवेश गर्यो । १९ ले १२ लाई २५–१८, १८–२५ र १५–१० को सेटमा पराजित गरेको हो । अन्तिम क्वार्टरफाइनल खेलमा ११ ले १६ लाई सोझो सेटमा हरायो । ११ नम्बर वडा २५–१२ र २५–११ को सेटमा विजयी भएको हो ।
जारी प्रतियोगितामा महिलातर्फ भने ९ नम्बर वडा फाइनल प्रवेश गरेको छ । शुक्रबार भएकाे महिलातर्फको पहिलो सेमिफाइनलमा वडा नम्बर ९ ले १४ लाई हराउँदै फाइनलमा स्थान बनाएकाे हाे । ९ ले १४ लाई २२–२५, २५–२३, २५–११, २५–१९ को सेटमा पराजित गर्दै उपाधी भिडन्त पक्का गरेकाे हाे । महिला तर्फ वडा नम्बर १७ र १२ बीच भएकाे दाेस्राे सेमिफाइनल रात परेको कारण स्थगित गरिएकाे आयाेजकले जनाएकाे छ । खेल जारी रहँदा रातपरेपछि शनिबार बिहान पुन खेल हुने भएकाे हाे ।
प्रतियोगितामा पुरुषतर्फ १२ वटा वडाले सहभागिता जनाएका छन् भने महिलातर्फ ७ वटा वडाले सहभागिता जनाएकाे संयोजक पुष्प मैनालीले जानकारी दिए । उनका अनुसार पुरुष भलिवल तर्फ वडा नं ३, ४, ५, ६, ९, १०, ११, १२, १३, १६, १७ र १९ ले सहभागिता जनाएका छन् भने महिला भलिवल तर्फ ६, ९, १०, १२, १४, १७ र १९ वडाले मात्र सहभागिता जनाएका छन् ।
प्रतियोगितामा प्रथम हुने वडाले ५० हजार, द्वितीय हुनेले ३० हजार र सान्त्वना हुनेले १० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् । विधागत उत्कृष्ट खेलाडीहरुका लागि पनि पुरस्कारको व्यवस्था गरिएको आयोजकले जनाएको छ । मंसिर १४ गतेदेखि सुरु प्रतियाेगिताकाे फाइनल खेलहरु १७ गते खेलाइने छ ।
गत वर्ष भएको पाँचौ सस्करणको उपमेयर कपको उपाधि महिलातर्फ १९ नम्बर वडा र पुरुषतर्फ ११ नम्बर वडाले हात पारेकाे थियो ।
