मकवानपुर । मकवानपुरकाे हेटौंडामा सुरु दशौं राष्ट्रिय हेटौंडा भेट्रान्स कप ८ ए साइड रनिङ शिल्ड फुटबल प्रतियोगितामा बानेश्वर फ्रेण्डसीप भेट्रान्स र बौद्ध भेट्रान्सले विजयी सुरुवात गरेका छन् ।
हेटौंडा भेट्रान्स क्लबकाे आयोजनामा बिहीबारबाट सुरु प्रतियाेगिताकाे उद्घाटन खेलमा बानेश्वर भेट्रान्सले वीरगंज सिटी भेट्रान्सलाई १–० गोल अन्तरले हराउँदै विजयी सुरुवात गरेकाे हाे । बानेश्वरको तर्फबाट हरिहर थापाले गरेको १ मात्रै गोल निर्णायक बन्यो । उनले खेलकाे अन्तिम समयमा गोल गरेका थिए । खेलको म्यान अफ द म्याच थापा घोषित भएका थिए ।
यसैगरी बिहीबार नै भएकाे दोस्रो खेलमा बौद्ध भेट्रान्सले वीरगन्ज युथलाई २–० गोल अन्तरले पराजीत गर्यो । बौद्धको तर्फबाट उमन मोक्तान र राजु कोइरालाले समान १/१ गोल गरे । खेलमा कोइराला म्यान अफ द म्याच घोषित भए । यस्तै आजै भएको तेस्रो खेलमा एबीसी भेट्रान्स पोखरा र भुटनदेवी भेट्रान्स भएकाे खेलकाे निर्धारित समय गोल रहित बराबरी भएकाे थियाे । समय अभावका कारण आज विजयीकाे छिनाेफानाे हुन सकेन । उक्त २ टिमबिच शुक्रबार विहान ट्राईब्रेकर मार्फत विजयीकाे घाेषणा हुनेछ ।
यसैगरी प्रतियोगिता अन्तरगत शुक्रबार ४ खेल खेलाइने छ । पहिलो खेल फ्रिडम फाइटर र चितवन भेट्रान्स बिच दिउँसो १ बजे हुने छ भने दोस्रो खेल सिमरा भेट्रान्स र नागस्वती भेट्रान्स हेटौंडा बिच दिउँसो २ बजे हुने तालिका रहेको छ । यस्तै तेस्रो खेल बगर भाईखलक पोखर र एन.जे.जे.भीसी सिमरा बिच दिउँसो ३ बजे तथा चौथो खेल अपराह्न ४ बजे किङकम भेट्रान्स र बुटवल भेट्रान्स बिच हुने आयोजकले जनाएकाे छ ।
प्रतियोगितामा पहिलो हुने समूहले एक लाख ५० हजार ५ सय ५५ र दोस्रो हुने समूहले ७५ हजार ५ सय ५५ प्राप्त गर्नेछन् । प्रतियोगितामा विभिन्न विधागत पुरस्कारकाे समेत व्यवस्था छ । सर्वश्रेष्ठ कोच, उत्कृष्ट फरवार्ड, उत्कृष्ट गोलकिपर, उत्कृष्ट डिफेन्स, उत्कृष्ट मिडफिल्डर विधामा पुरस्कार प्रदान गरिने कार्यक्रम संयोजक मणिराज गौतमले जानकारी दिए । उनका अनुसार विधागत उत्कृष्ठ हुनेलाई जनही ५ हजार रुपैंया नगद प्रदान गरिने छ । यस्तै प्रतियाेगिताकाे म्यान अफ द सिरिजले १० हजार रुपैंया प्राप्त गर्ने छन् ।
प्रतियोगितामा मुख्य प्रायोजकका रूपमा हेटौंडा उपमहानगरपालिका रहेको छ भने सह प्रायोजकका रूपमा हेटौंडा स्कुल अफ म्यानेजमेन्ट रहेको आयोजक क्लब अध्यक्ष रमेश उप्रेतीले बताए । प्रतियोगितामा हेटौंडाकाे २ वटासहित १४ वटा भेट्रान्स क्लबकाे सहभागिता रहेकाे छ । २०७२ सालबाट रोटरी क्लव अफ मकवानपुरसँगको सहकार्यबाट सुरु गरिएको प्रतियोगिता २०७४ साल देखि हेटौंडा भेट्रान्स क्लब आयोजक भई हेटौंडा भेट्रान्स कप ८ ए साईड राष्ट्रिय फुटबल प्रतियोगीता संचालन हुँदै आएकाे संयोजक गौतमले जानकारी दिए ।
पछिल्लो समय फुटबल खेल क्षेत्रमा भेट्रान्स खेलाडीहरुको सक्रियता उत्साहजनक भईरहेको, देशैभर ४० वर्ष माथि उमेर समूहका पूर्व राष्ट्रिय खेलाडीहरु भेट्रान्स खेलमा आकर्षण बढ्दो रुपमा रहेकाे, ४० वर्ष माथि उमेर समूहको भेट्रान्स फुटबल प्रतियोगिताले देशैभर रौनकता थप्दै आएको अवस्थामा भेट्रान्स प्रतियोगिताले पूर्व खेलाडीहरुको सम्बन्ध विस्तार र भाइचाराको सम्बन्ध प्रगाढ बनाउने उदेश्यले यो प्रतियाेगिता आयोजना गरिएकाे उप्रतीले जानकारी दिए ।
यसैबीच हेटौंडा उपमहानगरपालिकाका नगर प्रमुख मिना कुमारी लामाले भेट्रान्स प्रतियोगिताले पूर्व खेलाडीहरूको सम्बन्ध विस्तार र भाइचाराको सम्बन्ध प्रगाढ बनाउने बताएकी छिन् । प्रतियाेगिताकाे उद्घाटन गर्दै उनले युवा खेलाडी उत्पादनमा यस्ता प्रतियोगिताले प्रोत्साहन थप्ने बताइन् ।
बिहान तथा बेलुकाको समय व्यवस्थापन गर्दै खेलमा लगउान सके स्वस्थ्य बन्न सकिने उनले बताइन् । भेट्रान्स खेलले फुटबल खेलको विकासमा योगदान पुर्याउदै आएकाे बत्ताउदै उनले भनिन् ‘खेलाडीहरू बिच सुमधुर सम्बन्ध प्रगाढ बनाउँदै पुरानो सम्बन्धलाई नवीकरण गर्दै आएकाे छ ।’ हेटौडा भेट्रान्सले मकवानपुर जिल्लालाई खेल क्षेत्रबाट चिनाउन भूमिका खेलेको उनले बताइन् ।
प्रतियाेगिता उद्घाटनमा शिक्षाविद् पूरण बहादुर जोशी, एन्फाका केन्द्रीय सदस्य टिका लामा, हेटौडा उपमहानगरपालिकाका वडा नम्बर ४ अध्यक्ष नवीन सिग्देललगायतका अन्य वडाका अध्यक्षहरु, जिल्ला खेलकुद विकास समिति मकवानपुरका पूर्व अध्यक्षहरू बागमती प्रदेश फुटबल संगका महासचिव लवराज ठकुरी, निबर्तामान अध्यक्ष राजेन्द्र श्रेष्ठ लगायतकाे उपस्थिति रहेकाे थियाे ।
मकवानपुर । बागमती प्रदेशका युवा तथा खेलकुद मन्त्री मीनकृष्ण महर्जनले प्रदेशका सबै जिल्लामा रहेका खेलकुद पूर्वाधारहरुकाे सम्पत्ती खोजी गरिरहेकाे बताएका छन् । मकवानपुरको हेटौडा उपमहानगरपालिका वडा नम्बर १४ मा युनिक बक्सिङ क्लब भवनको शिलन्यास कार्यक्रममा मन्त्री महर्जनले यस्तो बताएका हुन् ।
मन्त्री महर्जनले बागमती प्रदेशका १३ जिल्लामा रहेका पूर्वाधारहरु र सम्पत्तीकाे आफूले अध्ययन गरिरहेको बताए । ‘हामीले सबै जिल्लाका पूर्वाधार सहितका सम्पत्तीको खोजी गरिरहेका छौं’ उनले भने ‘ति कस्तो अवस्थामा छन् जानकारी समेत लिने काम शुरु भएकाे छ ।’ उनले खेलाडीहरुका लागि छात्राबास र मार्सल आर्टकोे सुविधासम्पन्न भवन निर्माणको योजना बनाएको बताए ।
हेटौंडा ६ स्थित गौरीटार रंगशाला भित्र निर्माण भएका पुर्वाधारहरुको उचित उपयोग हुन नसकेको प्रति लक्षित गर्दै मन्त्री महर्जनले भने ‘यहाँका खेल पूर्वाधारहरु मनोमानी ढङले बनेका तथा चलेका भन्ने सुनेकाे छु । खेलाडी उत्पादन गर्ने मात्रै ठाउँ हो अरु गर्ने छुट छैन् । ‘विगतमा सामाजिक विकास मन्त्रालयभित्र खेलकुद राखिएकाे भए पनि युवा तथा खेलकुद मन्त्रालय छुट्टै भएकाे छ, अब खेल क्षेत्रकाे व्यवस्थित विकासका लागि काम गर्नु पर्छ’ उनले भने ।
उनले खेलकुद सँगै यूवा स्वरोजगार कार्यक्रमलाई समेत व्यवस्थित रुपमा अघि बढाउने बताए । जिल्लामा रहेका खेलकुदका भौतिक सम्पत्तीलाई खेलाडी र युवाको उपयोगमा ल्याउने गरी योजना अघि सारिएको उनले जनकारी दिए । उक्त भवनकाे आगामी तीन महिनाभित्रै निर्माण सकिने बागमती प्रदेश खेलकुद परिषद्का सदस्य सचिव दिपक लामाले बताए । ‘खेलकुद परिषद्को युनिक बक्सिङ क्लब भवनको शिलान्यास हुनु हाम्रा लागि खुःशी हो” उनले भने ।
हेटौंडा उपमहानगरपालिकाको २५ लाख रुपैंया लागतमा युनिक बक्सिङ क्लबको भवन निर्माण गर्न लागिएकाे हाे ।
मकवानपुर । मकवानपुर जिल्लास्तरीय राष्ट्रपति रनिङ्ग शिल्ड प्रतियोगितामा हेटौंडा उपमहानगरपालिका प्रथम भएकाे छ । आइतबारबाट सुरु १५ औं संस्करणको प्रतियोगितामा ५ स्वर्ण, १० रजत र ९ कांस्य पदकसहित हेटौंडा प्रथम भएकाे हाे ।
मकवानपुर जिल्ला खेलकुद विकास समितिको आयोजनामा भएको रनिङ्ग शिल्ड प्रतियाेगितामा १३ स्वर्ण, ५ रजत र १० कांस्य पदक प्राप्त गर्दै बकैया गाउँपालिकाले द्वितीय स्थान हात पारेकाे छ । यसैगरी थाहा नगरपालिकाले ११ स्वर्ण, ९ रजत र ६ कांस्य पदक प्राप्त गर्दै तृतीय भएकाे छ । प्रतियोगितामा प्रथम, द्वितीय र तृतीय हुनेहरुलाई क्रमशः स्वर्ण, रजत र कास्य पदकसहित प्रमाणपत्र प्राप्त गरे ।
प्रतियोगितामा मकवानपुरको ९ वटा पालिकाबाट विभिन्न विधाका करिब ६ सय खेलाडीहरुको सहभागिता रहेको थियो । राष्ट्रपति रनिङ्ग शिल्ड प्रतियोगिता अन्तर्गत भलिबल, एथ्लेटिक्स, कराँते, तेक्वान्दो कबड्डी लगायतका खेलहरु सञ्चालन भएको थियो । इन्द्रसरोवर गाउँपालिका प्रतियोगितामा सहभागी जनाएन ।
गत वर्ष सम्पन्न भएको १४ औँ संस्करणको जिल्लास्तरीय राष्ट्रपति रनिङ शिल्ड प्रतियोगितामा पनि २० स्वर्ण, ७ रजत र १९ कास्य पदक प्राप्त गर्दै हेटौंडा प्रथम भएको थियो । मकवानपुर जिल्ला खेलकुद विकास समितिका अध्यक्ष राजकुमार मुक्तानको अध्यक्षतामा तथा हेटौंडा उपमहानगरपालिकाकी प्रमुख मीनाकुमारी लामाको प्रमुख आतिथ्यमा मंगलबार पुरस्कार वितरण कार्यक्रम भएको हो ।
मकवानपुर । मकवानपुरकाे हेटौंडामा राष्ट्रिय हेटौंडा भेट्रान्स कप फुटबल प्रतियोगीता हुने भएकाे छ । २२ फागुनबाट दशौं राष्ट्रिय हेटौंडा भेट्रान्स कप ८ ए साइट रनिङ शिल्ड प्रतियाेगिता हुने भएकाे हाे ।
आयोजक संस्था हेटौंडा भेट्रान्स क्लबले आइतबार पत्रकार भेटघाट गरी प्रतियोगिताकाे जानकारी गराएकाे हाे । २६ फागुनसम्म हेटौंडाकाे हुप्रचौरमा आयोजना हुने प्रतियोगिताकाे उपाधी विजेता टोलीले १ लाख ५० हजार ५ सय ५५ रुपैंया नगद प्राप्त गर्ने छन् । यसैगरी प्रतियाेगिताकाे उपविजेता टोलीले ७५ हजार ५ सय ४४ रुपैंया हात पार्ने संयोजक मणिराज गौतमले जानकारी दिए ।
प्रतियोगितामा विभिन्न विधागत पुरस्कारकाे समेत व्यवस्था गरिएकाे गौतमले बताए । उनका अनुसार प्रतियोगिताका सर्वश्रेष्ठ कोच, उत्कृष्ट फरवार्ड, उत्कृष्ट गोलकिपर, उत्कृष्ट डिफेन्स, उत्कृष्ट मिडफिल्डर विधामा पुरस्कार प्रदान गरिने छ । उक्त विधागत उत्कृष्ठ हुनेलाई जनही ५ हजार रुपैंया नगद प्रदान गरिने उनले जानकारी दिए । यस्तै प्रतियाेगिताकाे म्यान अफ द सिरिजले १० हजार रुपैंया प्राप्त गर्ने छन् ।
प्रतियोगितामा हेटौंडाकाे २ वटासहित १४ वटा भेट्रान्स क्लबले सहभागिता जनाउने आयोजक क्लबका अध्यक्ष रमेशकुमार उप्रेती जानकारी दिए । दशौं संस्करणकाे हेटौंडा भेट्रान्स कप प्रतियाेगितामा वीरगञ्ज युथ भेट्रान्स क्लब (पर्सा), सिमरा भेट्रान्स क्लब (बारा), चितवन भेट्रान्स क्लब (चितवन), वगरभाई खलक भेट्रान्स क्लब (पोखरा कास्की), एबीसी भेट्रान्स क्लब (पोखरा), बुटवल भेट्रान्स क्लब (रुपन्देही), थापागाउँ भेट्रान्स क्लब (काठमाडौं), किंङकम भेट्रान्स क्लब (काठमाडौं), बौद्ध भेट्रान्स क्लब (काठमाडौं), फ्रिडम फाइटर भेट्रान्स क्लब (काठमाडौं), हेटौडा भेट्रान्स क्लब (आयोजक),नागस्वती भेट्रान्स क्लब (हेटौंडा), बानेश्वर फ्रेण्डसीप भेट्रान्स क्लब (काठमाडौं) र एन जे. जे.भी.सी. (सिमरा बारा) काे सहभागिता रहने उनले बताए ।
नवौं संस्करणकाे उपाधी काठमाडौंकाे बानेश्वर फ्रेण्डसीप भेट्रान्स क्लबले हात पारेकाे थियाे । भेट्रान्स प्रतियोगिताकाे पहिलाे र दोस्राे संस्करणकाे उपाधी चितवन भेट्रान्स क्लब चितवनले हात पारेकाे थियाे । सानो गौचरणनाईट किंग क्लव काठमाडौंले तेस्रो संस्करण, बगरभाई खलक भेट्रान्स क्लब पोखराले चौथो र छैटौं संस्करण, एवीसी भेट्रान्स क्लब पोखराले पाँचौ साताैं र आठौं संस्करणकाे उपाधी जितेकाे थियाे ।
प्रतियोगिताकाे लागि १२ लाख रुपैयाँ खर्च हुने अनुमान आयोजकले गरेकाे छ । प्रतियोगितामा मुख्य सहयोगीका रुपमा हेटौंडा उपमहानगरपालिका रहने छ भने हेटौंडा स्कूल अफ म्यानेजमेन्टका साथै जिल्लाका अन्य पालिकाहरु संघ संस्था तथा समाजसेवी, फुटबल खेलप्रेमीहरुको साथ सहयोग रहेकाे गौतमले जानकारी दिए ।
२०७२ सालबाट रोटरी क्लव अफ मकवानपुरसँगको सहकार्यबाट सुरु गरिएको प्रतियोगिता २०७४ साल देखि हेटौंडा भेट्रान्स क्लब आयोजक भई हेटौंडा भेट्रान्स कप ८ ए साईड राष्ट्रिय फुटबल प्रतियोगीता संचालन हुँदै आएकाे संयोजक गौतमले जानकारी दिए । स्वास्थ्यका लागि खेलकुद भन्ने नाराका साथ क्लबले गतवर्ष देखी ४५ वर्ष माथि उमेर समुहमा प्रतियोगिता आयोजना गर्दै आएको उनले बताए । यस वर्षपनि ४५ वर्ष माथि उमेर समुहमा खेल खेलाईने बताइएकाे छ ।
पछिल्लो समय फुटबल खेल क्षेत्रमा भेट्रान्स खेलाडीहरुको सक्रियता उत्साहजनक भईरहेको, देशैभर ४० वर्ष माथि उमेर समूहका पूर्व राष्ट्रिय खेलाडीहरु भेट्रान्स खेलमा आकर्षण बढ्दो रुपमा रहेकाे, ४० वर्ष माथि उमेर समूहको भेट्रान्स फुटबल प्रतियोगिताले देशैभर रौनकता थप्दै आएको अवस्थामा भेट्रान्स प्रतियोगिताले पूर्व खेलाडीहरुको सम्बन्ध विस्तार र भाइचाराको सम्बन्ध प्रगाढ बनाउने उदेश्यले यो प्रतियाेगिता आयोजना गर्न लागिएकाे अध्यक्ष उप्रतीले जानकारी दिए ।
मकवानपुर । मकवानपुरकाे हेटौंडामा भएकाे नगरस्तरीय महिला शिक्षक मैत्रीपूर्ण भलिबलकाे उपाधी हेटौंडा १८ मा रहेकाे ज्योति माध्यमिक विद्यालय हर्नामाडीले हात पारेकाे छ । शनिबार भएकाे फाइनलमा हेटौंडा ९ स्थित प्रगति माविलाई हराउँदै ज्यातिले उपाधी जितेकाे हाे ।
शनिबा हेटौंडा–४ स्थित आधुनिक राष्ट्रिय माध्यमिक विद्यालयको भलिबल कोर्टमा भएको प्रतियोगितामा उपाधिका लागि प्रगति मावि र ज्योति माविबीच फाईनल खेल भएकाे थियाे । फाइनलमा ज्याेति मावि हर्नामाडीले प्रगति माविलाई २५-१५, २६-२४ र १५-१२ काे सेटमा हराउँदै उपाधी हात पारेकाे हाे । उपाधी विजेता सँगै ज्योतिले ७ हजार रुपैंया नगद र मेडल तथा प्रमाणपत्र प्राप्त गर्यो ।
यसैगरी उपविजेता प्रगति ५ हजार रुपैंया नगद, शिल्ड, मेडल र प्रमाणपत्रमा चित्त बुझायो । ज्याेतिकी शाेभाकुमारी आचार्य वेस्ट प्लेयर (उत्कृष्ट खेलाडी) घाेषित भई ट्रफी हात पारिन् । त्यस्तै तृतीय स्थानकाे लागि भएकाे खेलमा चन्द्राेदय मावि हेटाैंडा-८ ले कृष्ण आवि हेटौंडा-६ लाई साेझाे सेटमा परानीत गर्यो । कृष्ण आविलाई २५-१७ र २५-१९ काे सेटमा हराउँदै तृतीय स्थान प्राप्त गरेकाे चन्द्राेदयले ३ हजार नगद, मेडल र प्रमाणपत्र प्राप्त गर्याे । सान्त्वना हुदै कृष्ण आविले १ हजार नगद र प्रमाणपत्र प्राप्त गर्याे ।
नगरस्तरीय शैक्षिक समन्वय समिति हेटौंडाकाे आयोजनामा भएकाे प्रथम नगरस्तरीय महिला शिक्षक मैत्रीपूर्ण भलिबल प्रतियोगितामा हेटौंडाका १० सामुदायिक विद्यालयले सहभागिता जनाएका थिए । विजेता तथा सहभागी विद्यालयका खेलाडीलाई हेटौंडा उपमहानगरपालिकाका मेयर मिनाकुमारी लामा, हेटौंडा उपमहानगरपालिकाका वडा नम्बर १८ का वडाध्यक्ष अनिल कुमार बानियाँ, १६ नम्बर वडाध्यक्ष रामकृष्ण काेईराला, ११ नम्बर वडाध्यक्ष जुना दाहाल, ४ नम्बर वडाध्यक्ष नवीन सिग्देल, ८ नम्बर वडाध्यक्ष रामकृष्ण थापा, राष्ट्रिय परीक्षा बाेर्ड हेटौंडाका प्रमुख कृष्ण घिमिरे, आधुनिक माविका प्रअ रामसागर गुरागाँई लगायतले पुरस्कार वितरण गरेका थिए ।