मकवानपुर । मकवानपुर प्रहरीले अवैध लागुऔषध डायलेक्स र नाइट्रोभेट समेत गरी २ भारतिय नागरिक सहित ५ जनालाई पक्राउ गरेकाे छ । लागुऔषध १ सय ७३ बोतल डायलेक्स डीसीसहित पक्राउ ना १ ह ९४५० नम्बरको अटोेचालक भारतको बिहार रक्सौल पुर्वी चम्पारणका ३० वर्षीय अरविन्द कुमार पाण्डे र उक्त अटोमा सवार भारत बिहार रक्सौलका २६ की अमिता साह रहेको जिल्ला प्रहरी कार्यालय मकवानपुरले जनाएको छ ।
लागुऔषध नाइट्रोभेट ६ सय ट्याब्लेटसहित पक्राउ पर्नेमा चितवन जिल्लाको कालिका नगरपालिका–८ बस्ने २१ वर्षीय एन्जल गुरुङ, १८ वर्षीय निश्चल परियार, भरतपुर महानगरपालिका–१६ का ३३ वर्षीय नरबहादुर राना मगर र २८ वर्षीय युवराज गुरुङ रहेको जिल्ला प्रहरी कार्यालय मकवानपुरका प्रहरी प्रवक्ता जयश्वर रिमालले जानकारी दिए ।
मंगलबार दिउँसो १ बजेर ४८ मिनेटको समयमा जिल्ला प्रहरी कार्यालय मकवानपुरबाट खटिएको प्रहरी टोलीले हेटौंडा–१५ रातोमाटे चेकपोष्ट खण्डमा सवारी साधनहरु रोकी सुरक्षाजाँच गर्ने क्रममा पथलैयाबाट हेटौंडातर्फ आउँदै गरेको ना १ ह ९४५० नम्बरको अटोे अटोमा लुकाई छिपाई ल्याइएको लागुऔषध फेला परेको प्रहरीले जनाएको छ । पक्राउ परेका अटोे चालक पाण्डे र अटाेमा सवार साह दुवै जनालाई उक्त लागुऔषध, अटोसहित नियन्त्रणमा लिई बुधबार जिल्ला अदालत मकवानपुरबाट १० दिन म्याद अनुमति लिई थप अनुसन्धान भइरहेको प्रहरीले जनाएकाे छ ।
यसैगरी मंगलबार दिउँसो ४ बजेर १५ मिनेटको समयमा जिल्ला प्रहरी कार्यालय मकवानपुरबाट खटिएको प्रहरी टोलीले हेटौडा–१५ रातोमाटे चेकपोष्ट अगाडि गुरुङद्वय परियार र राना मगर सवार बीरगंजबाट हेटौंडातर्फ आउँदै गरेको ना ६ ख ५३०९ नम्बरको बसलाई रोकी सुरक्षाजाँच गर्ने क्रममा उनीहरुको साथमा लागुऔषध फेला परेको जनाइएको छ । पक्राउ परेका चारैजनालाई लागुऔषधसहित नियन्त्रणमा लिई बुधबार जिल्ला अदालत मकवानपुरबाट १० दिन म्याद अनुमति लिई थप अनुसन्धान भइरहेको प्रवक्ता रिमालले जानकारी दिए ।

मकवानपुर । बागमती प्रदेशका कृषि तथा पशुपंक्षी विकास मन्त्री बसुन्धरा हुमागाँईले प्रदेश सरकार किसानको हितको पक्षमा रहेको बताएका छन् । दुग्ध उत्पादन क्षेत्रको अवसर र चुनौती विषयक अन्तरक्रिया कार्यक्रममा बोल्दै मन्त्री हुमागाँईले प्रदेश सरकार किसानको हितको पक्षमा रहेको भन्दै कृषिलाई व्यवस्थित गर्दै कृषकको विकासको लागि लागिपरेको बताए ।
बिन्दाबासिनी मिडिया प्रालिद्वारा सञ्चालित रेडियो थाहासञ्चार ९९.६ हेटौंडाको वार्षिकोत्सवको अवसरमा सप्ताहव्यापी कार्यक्रमको चौथो दिन बुधबार आयोजित अन्तरक्रिया कार्यक्रममा मन्त्री हुमागाँईले पहुँचको आधारमा सरकारले अनुदान नदिने बताए । उनले भने ‘प्रदेश सरकारले वास्तविक किसानसम्म अनुदान पुर्याउने छ ।’ ‘सहज ढंगले किसानले अनुदान,सहुलिलयतपूर्ण ऋण पाउने व्यवस्था सरकारले मिलाउने छ’ मन्त्री हुमागाँईंले भने ‘किसानको हक अधिकारको लागि सदैव आफू तत्पर रहेको छु ।’
कार्यक्रममा किसानहरुले गाई वस्तुलाई खुवाउने खाद्यान्नको मुल्य आकासिदा दुधको मुल्य थोरै मात्रै बढेको र बढेको मुल्य पनि किसानलाई भन्दा धेरै बिचौलियालाई पोस्न खोजिएको गुनासो गरेका थिए । कार्यक्रममा रेडियो थाहासञ्चारको प्रवन्धक अरुणराज सुमार्गीले किसान बलियो भए मात्रै देशको अर्थतन्त्र बलियो हुने भन्दै कृषि क्षेत्रको विकासमा सरकारले ध्यान दिनुपर्ने बताए ।
मनकामना दुग्ध उत्पादक सहकारी सस्था प्रालिका अध्यक्ष अर्जुन दाहालको सभाध्यक्षातामा भएको कार्यक्रममा प्रदेश सहकारी विकास बोर्डको उपाध्यक्ष नारायण देवकोटा,मकवानपुरगढी गाउँपालिकाका अध्यक्ष बिदुर हुमागाँई, जिल्ला दुग्ध उत्पादक सहकारी संघ मकवानपुरका अध्यक्ष बासुदेब अधिकारी,गढी गांउपालीका वडा नम्बर ३ का वडा अध्यक्ष भागवत घिमिरे , श्रमिक साना किसान कृषि सहकारी सस्थाका अध्यक्ष निर्मला लम्साल, वस्तु तथा सेवा उपभोक्ता संरक्षण महासंघ केन्द्रीय अध्यक्ष रोमलाल गिरी र केन्द्रिय उपाध्यक्ष तथा साना किसान अभियानको अभियान्ता राजेन्द्र खनाल लगायतले मन्तव्य व्यत्त गरेका थिए ।
यस्तै रेडियोले कार्यक्रमको पाचौ दिन भोली सडक दुर्घटना न्युनिकरण नहुनुमा जिम्मेवारी कसको भन्ने विषयमा मा.वि स्तरीय वक्तृत्वकला कार्यक्रम गर्ने रेडियोको स्टेसन म्यानेजर मणिराज गौतमले जानकारी दिए । फागुन ६ गते कोरोना रोकथाम तथा नियन्त्रणमा सरोकारवालाहरुको भूमिका विषयक अन्तरिक्रिया कार्यक्रम रहेकाे छ । सप्ताहव्यापी कार्यक्रमको अन्तिम दिन ७ गते थाहा सम्मान तथा १४ औ वार्षिकोत्सव समापन समारोह एवम् साहित्य सम्मेलन हुने छ ।
कार्यक्रमको पहिलो दिन फागुन १ गते आईतबार पर्यावरण प्रवर्द्धन लागि रेडियोले साइकल ¥याली गरेको थियो भने दोस्रो दिन फागुन २ गते सोमबार बृहत रक्तदान कार्यक्रम सम्पन्न गरेको छ । यस्तै फागुन ३ गते रुपचन्द्र विष्ट र अहिलेको राजनीतिक परिवेश विषयक अन्तरक्रिया कार्यक्रम गरिएको थियो ।

मकवानपुर । गत माघ २५ गते देखि फागुन २ गतेसम्म संचालन भएकाे पीपीआर खाेप अभियान कार्यक्रम अन्तरगत बागमती प्रदेशमा ८ लाख ३० हजार १ सय ८७ वटा भेडाबाख्रमा खाेप लगाइएकाे छ । पिपिआर रोग विरुद्धको सप्ताहव्यापी खोप अभियान कार्यक्रममा प्रदेशभरका १३ वटा जिल्लामा उक्त संख्याका भेडाबाख्रामा खोप लगाइएको बागमती प्रदेशकाे कृषि तथा पशुपन्छी विकास मन्त्रालयले जनाएकाे छ ।
माघ २५ गतेबाट खोप अभियान सञ्चालन भएकाेमा ८ हजार ६ सय ९८ वटा भेडा र ८ लाख २१ हजार ४ सय ८९ वटा बाख्रामा पीपीआर खोप लगाइएको मन्त्रालयले जानकारी दिएकाे छ । पहिलो चरणमा मकवानपुरमा सबैभन्दा धेरै खोप लगाइएको थियाे । मकवानपुरमा १ लाख ६६ हजार ४ सय २३ वटा बाख्रामा खोप लगाइयो छ । नुवाकोटमा १ लाख २० हजार १९ वटा भेडाबाख्रामा खोप लगाइएको हाे । सबैभन्दा कम भक्तपुरमा ६ हजार १८१ वटामा लगाइएको मन्त्रालयका पशुपन्छी विकास महाशाखाका पशु चिकित्सक डा. सृजा वाग्लेले जानकारी दिए ।
पहिलो चरणमा काभ्रेमा ९९ हजार १ सय ८२, दोलखामा ९४ हजार ९ सय ९८, धादिङमा ८३ हजार २ सय ७०, चितवनमा ७१ हजार ४ सय १८, सिन्धुलीमा ४५ हजार ८ सय २५, रामेछापमा ४४ हजार ६ सय १०, काठमाडौंमा ३१ हजार ५ सय ५७, ललितपुरमा २७ हजार ५ सय ८७, रसुवामा २३ हजार १ सय ६५, सिन्धुपाल्चोकमा १५ हजार ९ सय ५२ वटा गरी गरि ८ लाख ३० हजार १ सय ८७ वटा भेडाबाख्रालाई खोप लगाइएको मन्त्रालयको तथ्याङ्कमा उल्लेख छ । प्रदेशका दोलखा, काभ्रे, चितवन, नुवाकोट, रसुवा र धादिङ जिल्लामा भने भेडामा पनि खोप लगाइएको छ ।

बागमती प्रदेशका स्थानीय तहका सबै वडाहरुमा खोप भ्याक्सिनेटर परिचालन र खोपकेन्द्र सञ्चालन गरि पहिलो पटक प्रदेश सरकारले खोप अभियान गरेको हो । पहिलो चरणमा १ करोड १९ लाख बजेटबाट ११ लाख ९० हजार खोपको मात्रा खरिद गरी खोप अभियान सुरु गरिएको हो । प्रदेशमा भेडाको संख्या ९३ हजार ६ सय ३९ र बाख्राको संख्या २३ लाख ५१ हजार २ सय १७ रहेको मन्त्रालयकाे तथ्याङ्कमा उल्लेख छ ।
पीपीआर खोपको मात्रा ११ लाख ९० हजार भएता पनि १ सातामा ८ लाख ३० हजार १ सय ८७ मात्रा प्रयोग गरिएको छ । भेडाबाख्राहरुमा पीपीआर राेग विरुद्ध एकचोटी खाेप लगाएपछि ३ वर्षसम्म लगाउनु नपर्ने पशु चिकित्सकहरु बताउँछन् ।



मकवानपुर । मकवानपुरको राक्सिराङ गाउँपालिकामा धुलिखेल अस्पतालको शाखा विस्तार गरिने तयारी गरिएको छ । बागमती प्रदेशका भौतिक पूर्वाधार विकास राज्यमन्त्री सन्तबहादुर प्रजाले काभ्रेको धुलिखेल अस्पतालका पदाधिकारीहरुसँग मंगलबार अस्पतालमै पुगेर राक्सिराङ गाउँपालिका वडा नम्बर ७ गर्लिङमा शाखा विस्तार सम्वन्धी छलफल गरेका छन् ।
अस्पतालले प्रदान गरिरहेका सेवा सुविधाहरुको बारेमा जानकारी लिँदै राज्यमन्त्री प्रजाले विपन्न चेपाङ र तामाङ जातिको बाहुल्यता रहेको मकवानपुरकाे विकट राक्सिराङ गाउँपालिकामा स्वास्थ्य सेवाको आवश्यकताबारे अस्पताल पदाधिकारीहरुसँग छलफल गरेका थिए ।
निकट भविष्यमै चार शैयाको शाखा अस्पताल सञ्चालन गर्नेबारे धुलिखेल अस्पतालका पदाधिकारी सहमत भएको राज्यमन्त्री प्रजाले बताए । प्रजाको पहलमा धुलिखेल अस्पतालले यसअघि दुइपटक गर्लिङको क्षेत्रगत निरीक्षण गरिसकेको छ । राज्यमन्त्रीसँगको छलफल सकारात्मक भएको र निकट भविष्यमै गाउँलेको आवश्यकताको आधारमा स्वास्थ्य सेवा प्रदान गर्ने सोच बनाइएको धुलिखेल अस्पतालका पब्लिक हेल्थ अफिसर सुदिप श्रेष्ठले जानकारी दिए ।
‘स्थानीयको आवश्यकताको पहिचान गरिरहेका छौं । गाउँपालिकासँग पनि छलफल गर्ने तयारी गरेका छौं । जग्गा, भवन, उपकरणलगायत पूर्वाधार तयार गर्न स्थानीय तह र अन्य निकायसँग सहकार्य गरेर अघि बढिनेछ ।’ पब्लिक हेल्थ अफिसर श्रेष्ठले भने ।
गर्लिङमा अस्पताल निर्माण गर्ने सोचका साथ भौतिक पूर्वाधार राज्यमन्त्री प्रजाले पूर्वाधार विकास कार्यक्रमअन्तर्गतको ५ लाख रुपैयाँ बजेटसमेत विनियोजन गरेका छन् । धुलिखेल अस्पतालले नागरिकको स्वास्थ्य आवश्यकताको पहिचान गर्नुका साथै अन्य अवस्थाबारे जानकारी लिन तत्कालको लागि फागुन मसान्तसम्ममा राक्सिराङमा स्वास्थ्य शिविरको आयोजना गर्ने तयारी गरेको जनाएको छ ।
राज्यमन्त्रीसँगको छलफलमा अस्पतालका डाइरेक्टर रामकण्ठ माकाजु, संस्थापक डा राजेन्द्र कोजु, अर्थोपेडिक सर्जन डा. दीपक श्रेष्ठ, क्लिनिकल डाइरेक्टर डा. बलराम मल्ल, सामुदायिक विभाग तथा पब्लिक हेल्थ डाइरेक्टर डा. विराजमान कर्माचार्यलगायतको उपस्थिति रहेको थियो ।
काभ्रेको धुलिखेल नगरपालिका–६ मा रहेको धुलिखेल अस्पतालले हालसम्म देशभर १८ वटा शाखा विस्तार गरी स्वास्थ्य सेवा दिइरहेको अस्पतालले जनाएको छ ।
गीताश्री शर्मा
प्रिय!
तिमी मान या नमान
तिमी विश्वास गर या नगर !
तिम्रा प्रत्येक श्वास प्रश्वासमा
तिम्रा मुटुका हरेक ढुकढुकीमा
तिमीले हेरेका हरेक
निमेष र मिनटमा
तिमीले हिँडेका
प्रत्येक पाइला र चालमा
तिमीलाई पलपल
माया गरेकी छु, प्रेम गरेकी छु ।
मैले गरेको प्रेम
एकान्त रोज्न होइन, अनि एकान्त खोज्न पनि होइन ।
प्रिय !
कहिले धड्किन्छ मुटु तिम्रै निम्ति
कहिले ज्वारभाटा भएर उठ्छन्
मुटुका धड्कनहरू
उठ्छन् मनमा हलचलहरू तिम्रा निम्ति
खेल्छन् मनमा कुराहरू
व्यक्त गर्न सक्दिनँ म !
मुटुमै गाँठो पर्छन्
गलामा आएर अड्किन्छन्
तर पनि तिमी मेरो नशानशामा
नसा भएर दौडन्छौ
मभित्र कतै मनमा
मुटुको टुक्रा र स्पन्दन भएर
समाहित छौ !
तिम्रो गैर हाजिरीमा
हराउन खोज्दै थियो मेरो अस्तित्व
तिम्रो अनुपस्थितिमा
रोकिँदै थिए मेरा प्रत्येक
श्वास प्रश्वास अनि धड्कन पनि।
थाहा छ तिमीलाई ?
मैले गरेको प्रेम
केवल स्वार्थ पूर्ति
र वासना मात्र होइन !
पाउनु मात्र र आलिङ्घन मात्र पनि
प्रेम होइन,
त्याग, बलिदान, उत्सर्ग पनि प्रेम हो
समर्पण र अरूको खुसीमा रमाउनु पनि ,
अनि भुल्न सक्नु नसक्नु पनि
प्रेमकै अर्को पाटो हो ।
जीवनका पलपल
मेरा खुसीहरू
तिम्रा निम्ति त्यागेकी छु ,
मेरा इच्छा र आकाङ्क्षालाई
खोपीमा राखेर
दीप बालेर
पूजा गरेकी छु,पुष्प चडाएकी छु।
सायद यसैले हुनुपर्छ आज
म तिम्रा अगाडि
निर्धक्क उभिन सक्छु
हाँस्न सक्छु, हाक्न सक्छु अनि बोल्न सक्छु
कराउन सक्छु, चिच्याउन सक्छु
किनकि !
टिस्टा र गंगाको जस्तो
कलकल गर्ने
पहाडी झर्ना र
निश्चल पवित्र नदी जस्तो
तिमीलाई चोखो अनि पवित्र प्रेम गरेकी छु ।
थाहा छैन मलाई
तिम्रो मनको शब्दकोशमा
के के लेखेर राखेका छौ !
थाहा नहोस् पनि मलाई
तिम्रो शब्दकोश हेरेर
तिमीप्रति
घृणा उत्पन्न पनि त हुन सक्छ ?
तर थाहा छ तिमीलाई ?
तिमी पढ्छौ भने मेरो मनको शब्दकोश
हेर्छौ भने शब्दकोशका शब्दहरू
त्याग, तपस्या,आदर, सत्कार
मुस्कान, दया, सहयोग
तिम्रा रोजाइ र खुसीका
कैयौं पोका पत्यौरा र कन्तुर छन् ।
मेरो मनको सन्दुकमा
तिम्रो इज्जत, मान, सम्मान
खातैखात भएर बसेका छन्
कतै माउले नखाओस् भनेर
कपुर र पीपलका पात मात्र होइन
कुशेऔशीमा निकालेर
घाममा सुकाएकी छु !
तिमी सोच्दै छौ होला ?
कति निष्ठुरी छ अनि
यो बदलिइछ भनेर
तर…….
कदापि होइन, किञ्चित हुँदै होइन
बदलिएकी छैन म
र बदलिन्न पनि ,
बदलिएको छ यहाँ केवल
प्रेमको परिभाषा
प्रेम गर्ने तरिका
र
प्रेमको शैली मात्र।
गान्तोक, सिक्किम