मकवानपुर । मकवानपुरको बकैया गाउँपालिकामा ट्रक दुर्घटना हुँदा आगलागी भएको छ ।
बकैया ५ तिनतल्लेमा हेटौंडाबाट सिन्धुली तर्फ जादै गरेको ना. ७ ख ५०४५ नम्बरको सिमेन्ट लोड ट्रकको इन्जिनमा समस्या भइ नालीमा खस्दा आगलागी भएको अस्थायी प्रहरी प्रहरी पोष्ट गरगरे बकैयाका प्रहरी सहायक निरीक्षक राम शंकर यादवले जानकारी दिए ।
मदन भण्डारी राजमार्गको हेटौंडा सिन्धुली सडकखण्डको तिनतल्लेमा जेठ २९ गते राती ११ बजेको समयमा भएको ट्रक दुर्घटना हुदा लागेको आगो हेटौंडा उपमहानगरपालिकाको दमकल तथा प्रहरीको सहयोगमा नियन्त्रणमा लिइएको मकवानपुर प्रहरीले जनाएको छ ।
आगलागीबाट ट्रकको अगाडिको भाग र केही सिमेन्ट नष्ट भएको बताइएकाे छ ।
मकवानपुर । मकवानपुर सहित केहि स्थानमा मंगलबार राती मौसम बदली भइ हल्का वर्षा भएको छ । करिब २ हप्ता देखिको उखरमाउलो गर्मीलाई मंगलबारको वर्षाले केही राहत पुगेको छ ।
यस्तै कोशी तथा बागमती प्रदेशको केही स्थानहरू साथै मधेश र गण्डकी प्रदेशको एक दुई स्थानमा हल्कादेखि मध्यम वर्षा भइरहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ ।
मौसम पूर्वानुमान महाशाखाका अनुसार देशमा पश्चिमी वायुका साथै भारतको बिहारमा रहेको न्यून चापीय प्रणालीको आंशिक प्रभावका कारण हल्का वर्षा भएको हो । तर यस वर्ष मनसुनी वर्षाको आगमनको औसत मिति (जुन १३ तारिख) भन्दा एक-दुई दिन ढिला हुने सम्भावना रहेको छ।
महाशाखाका अनुसार मंगलबार आज दिउँसो कोशी, मधेश र बागमती प्रदेश लगायत देशका पहाडी भू-भागमा आंशिक देखि सामान्य बदली रही बाँकी भू-भागमा आंशिक बदली देखी मौसम सामान्यतया सफा रहेको छ।कोशी, बागमती र गण्डकी प्रदेशका थोरै स्थानहरूमा र मधेश प्रदेश लगायत बाँकी प्रदेशका पहाडी भू-भागका एक दुई स्थानमा मेघगर्जन र चट्याङ्गसहित हल्का देखि मध्यम वर्षाको सम्भावना रहेको छ ।
मंगलबार राती भने कोशी प्रदेश लगायत देशका पहाडी भू-भागमा आंशिक देखि सामान्य बदली रही बाँकी भू-भागमा आंशिक बदली देखि मौसम सामान्यतया सफा रहनेछ। कोशी, बागमती र गण्डकी प्रदेशको पहाडी भू-भागका केही स्थानहरूमा मेघगर्जन र चट्याङ्गसहित हल्का देखि मध्यम वर्षाको सम्भावना रहेको छ । साथै मधेश प्रदेश लगायत देशका बाँकी पहाडी भू-भागका एकदुई स्थानमा मेघगर्जन र चट्याङ्गसहित क्षणिक वा हल्का वर्षाको सम्भावना रहेको महाशाखाले जनाएको छ ।
विगत केही दिन देखि बढेको गर्मी र वर्षा नहुदा देशका अधिकांश भू-भागहरू: विशेष गरि मध्य तथा पश्चिमी भू-भागमा अधिकतम तथा न्यूनतम तापक्रम वृद्धि भइरहेको छ। काठमाण्डौ उपत्यका लगायत देशका अन्य क्षेत्रमा पनि तापक्रममा अस्वाभाविक वृद्धि भएको छ । देशका मध्य तथा पश्चिम तराईका भू-भागमा लगातार अधिकतम तापक्रम चालीस डिग्री सेल्सियस वा सो भन्दा बढी मापन भएको महाशाखाले जानकारी दिएको छ।
महाशाखाले आगामी केही दिनसम्मको लागि देशभरको तापक्रमको अवस्थाको विश्लेषण गरे अनुसार सुदूरपश्चिम, लुम्बिनी र गण्डकी प्रदेशको तराईका धेरैजसो भू-भागहरूमा अत्याधिक गर्मीको सम्भावना अझै रहने देखाएको छ । कोशी प्रदेशमा भने बदली र वर्षाको सम्भावना रहेकोले तापक्रम घट्नुका साथै अत्याधिक गर्मीको नहुने देखिएको छ।
यस्तै बागमती प्रदेशको तराईका भू-भाग र मधेश प्रदेशको पश्चिमी भू-भागमा थोरै तापक्रम घटे तापनि अत्याधिक गर्मीको सम्भावना यथावत् रहने देखिएको छ । तसर्थ, ती भू-भागहरूमा आगामी चार दिन जेठ ३० गते देखि असार १ गतेसम्म तातो हावा तथा लू (Heat wave) को सम्भावना यथावत् रहने महाशाखाको अनुमान छ ।
मधेश प्रदेशको पूर्वी भू-भागमा तापक्रम केही धट्ने सम्भावना देखिए तापनि गर्मीको सम्भावना रहनुका साथै देशको पश्चिमी पहाडी भू-भागका उपत्यका तथा खोँचहरूमा पनि तापक्रम यथावत् रहन सक्ने सम्भावना रहेको हुनाले ती भू-भागहरूमा पनि गर्मीको सम्भावना रहेकाले तातो हावा तथा लूबाट बच्न आवश्यक सतर्कता अपनाउन हुन महाशाखाले आग्रह गरेको छ ।
तातो हावा तथा लू बाट थकाई लाग्ने, कमजोरी हुने, बढी तिर्खा लाग्ने, टाउको दुख्ने, खुट्टा बाउँडिने, चक्कर आउने, बेहोस हुने, मांसपेशीहरू दुख्ने, बान्ता आदि असर देखिन सक्छ । तातो हावा तथा लू बाट बच्न महाशाखाले बढी गर्मीको समयमा घर भित्र अर्थात् चिसो स्थानमा रहने, बाहिरी वातावरणमा बढी नजाने, हल्का लुगा लगाउने, सुती कपडा लगाउने, बाहिर निस्किँदा टाउको छोप्ने, टोपी लगाउने, नियमित (पटक-पटक) पानी तथा झोल पदार्थ जूस, सर्बत, आदि प्रशस्त मात्रामा पिउने र स्वास्थ्यमा समस्या भएमा स्वास्थ्यकर्मी सँग नियमित सम्पर्कमा रही थप सल्लाह सुझाव लिन समेत अनुरोध गरेको छ ।
देशका मध्य तथा पश्चिम तराईका भू-भागहरूमा अत्याधिक गर्मी हुने सम्भावना यथावत् देखिन्छ । कोशी, बागमती र गण्डकी प्रदेशका थोरै स्थानहरूमा साथै मधेश प्रदेश लगायत देशका बाँकी पहाडी भू-भागका एकदुई स्थानमा मेघगर्जन र चट्याङ्गसहित क्षणिक वा हल्का वर्षाको सम्भावना रहेको छ। तसर्थ, अत्याधिक गर्मी, मेघगर्जन र चट्याङ्ग तथा वर्षा बाट हुन सक्ने जोखिम वा क्षति बाट बच्न आवश्यक सतर्कता अपनाउन महाशाखाले अनुरोध गरेको छ ।
मकवानपुर । मकवानपुरका हास्यव्यंग्यकार आरसी रिजाल हेटौडामा सम्मानीत भएका छन् । सिस्नुपानी नेपाल मकवानपुरले शनिबार गणेश कुमार पौडेल स्मृति सम्मान, २०८० बाट रिजाललाई २५ हजार १ रुपैयाँसहित सम्मान गरेकाे हाे ।
हास्यव्यंग्यकार रिजालले आफूले सम्मानस्वरुप प्राप्त रकममा त्यत्तिनै रकम थप गरेर सिस्नुपानी नेपाल मकवानपुरलाई नै फिर्ता गरेका छन् । रिजालले सिस्नुपानी नेपाल मकवानपुरकी कोषाध्यक्ष शुभद्रा हुमागाईलाई सम्मानसहित प्राप्त रकम र आफूले थप गरेकाे समेत रकम गरी ५० हजार रुपैयाँ हस्तान्तरण गरेका हुन् ।
यस्तै सिस्नुपानी नेपाल मकवानपुरले स्वर्गीय गणेश कुमार पौडलको स्मृति ग्रन्थ पनि लोकार्पण गरेको छ । स्मृति ग्रन्थ्रमा स्वर्गीय पौडेलका समकक्षी, साहित्यकारले उनीसँगकाे सामिप्यता, व्यक्तित्व र योगदानका सन्दर्भमा लेखिएका लेख, रचना प्रकाशित गरिएको छ ।
यसैगरी सिस्नुपानी मकवानपुरले साहित्यिक गतिविधिमा संलग्नता सहित तस्विर तथा दृश्य खिचेर सहयोग गर्दै आएका महेन्द्र ओझालाई समेत प्रसंशापत्रले सम्मान गरेको छ । स्वर्गीय पौडेलका छोरा गौरव पौडेलले बुबाप्रति साहित्य र सामाजिक क्षेत्रबाट प्राप्त माया र सद्भावप्रति आभार व्यक्त गर्दै भने ‘बुबाले त्यत्ति ठूलो काम गर्नुभयो जस्तो नलागे पनि साहित्य र सामाजिक क्षेत्रबाट उहाँप्रति देखाउनु भएको सम्मानले हामी आभारी भएका छौं ।’
सिस्नुपानी नेपाल मकवानपुरका अध्यक्ष राजकुमार लामिछानेको सभाध्यक्ष, वरिष्ठ हास्यव्यंग्यकार नरनाथ लुइँटेलको प्रमुख आतिथ्य तथा हेटौडा ४ का वडा अध्यक्ष नवीन सिग्देलकाे विशिष्ट आतिथ्यतामा कार्यक्रम भएको हो ।
मकवानपुर । प्रदेश युबा परिषदको आयोजनामा ‘युवा र नवप्रवर्तन’ शीर्षकमा प्रदेशस्तरीय खुला वक्तृत्वकला प्रतियोगितामा चितवनका देबेन्द्र श्रेष्ठ प्रथम भएका छन् ।
प्रतियोगितामा मेलिशा ढुङ्गेल दोस्रो भइन । विबिना लामीछाने प्रतियोगितामा तेस्रो हुँदै क्रमशः ५० – हजार, ३० हजार र २० हजार प्राप्त गरेका छन् । परिषदको बार्षिक स्वीकृत युबा प्रतिभा पहिचान कार्यक्रम अन्तर्गत बागमती प्रदेशका १३ जिल्लामा आयोजित कार्यक्रममा प्रथम हुन सफल प्रतिस्पर्धीहरू बीच कार्यक्रम आयोजन गरिएको थियो।
परिषदका उपाध्यक्ष सन्तोष चौलागाईंले अध्यक्षता गरेको कार्यक्रममा सामाजिक बिकास मन्त्री कुमारी मोक्तानको प्रमुख आतिथ्यता रहेको थियो ।मकवानपुर क्यामपसका प्राध्यापक घनश्याम शर्मा , निरा शर्मा र दीपक मिश्र निर्णायकको भुमिकामा रहेका थिए।
समाज परिवर्तन र राज्यको स्वरुप रुपान्तरणमा युवाको भुमिका जरुरी रहेको मन्त्री मोक्तानले बताइन् । अब युबालाई नबप्रबर्तनसंग जोड़ने सके मात्र मुलूकले सम्बृदिको यात्रा तय गर्ने मोक्तानले बताउनु भयो ।
प्रदेश युवा परिषद् कार्यकारी उपाध्यक्ष चौलागाईले अबको युवाले बोल्ने कलामात्र हैन, व्यवहारमा पनि दखाउने युवाको खाँचो रहेको बताए । समाजको बिग्रेको अवस्था सुधार्ने भनेकै युवा हो भन्दै क्षमता भएका युवालाई देशमै केही गरेर खाने वातावरण रहेको भन्दै युवा अब टाठो हुनुपर्ने उनले बताए ।
मकवानपुर । गोपालप्रसाद रिमालको जन्मजयन्तीको दिन जेठ २७ गते शनिबार मकवानपुरकाे हेटौडामा ३ जना स्रष्टा सम्मानीत भएका छन् । साहित्य संगम मकवानपुरले गोपालप्रसाद रिमालकाे जन्मजयन्तीमा मकवानपुरका ३ अग्रज स्रष्टालाई सम्मानीत गरेकाे हाे ।
संगमले गोपालप्रसाद रिमाल स्मृति राष्ट्रिय सम्मानबाट साम्व ढकाललाई २० हजार नगदसहित सम्मान गरेकाे हाे । यस्तै श्यामप्रसाद शर्मा स्मृति सम्मानबाट केदारप्रसाद न्यौपानेलाई १५ हजार ५ सय ५५ रुपैयाँसहित सम्मान गरेको छ भने शान्तिदेवी वनस्खण्डी स्मृति सम्मानबाट तुलसी घिमिरेलाई १० हजार नगदसहित सम्मान गरिएकाे साहित्य संगम मकवानपुरकी अध्यक्ष अनिता न्यौपानेले जानकारी दिइन् ।
कार्यक्रममा आरसी रिजालले शान्तिदेवी वनस्खण्डी स्मृति सम्मान र सम्मानका संस्थापक स्वर्गीय गणेश पौडेलको व्यक्तित्वका विषयमा चर्चा गर्दा कवी पुरुषोत्तम आचार्यले श्यामप्रसाद शर्माको योगदानका विषयमा चर्चा गरेका थिए । गोपालप्रसाद रिमालको सिर्जनाले समाजमा पारेको प्रभावका विषयमा कवि सुवास खनालले जानकारी गराएका थिए ।
कम्युनिष्ट राजनीतिमा सक्रिय भई जेल जीवन बिताउनु भएका केदार न्यौपानेले जनवादी गीतहरू रचना गरेका छन् भने तुल्सी घिमिरे गीत तथा कविता लेखनमा सक्रिय सर्जक हुन । यस्तै साम्ब ढकाल कविता लेखनमा सक्रिय मकवानपुरका सर्जक हुन।
संगमकी अध्यक्ष अनिता न्यौपानेको अध्यक्षता, हास्यव्यंग्यकार नरनाथ लुइटेलको प्रमुख आतिथ्य तथा हेटौँडा उपमहानगरपालिका ४ नम्बर वडा अध्यक्ष नवीन सिग्देलको विशिष्ट आतिथ्यतामा भएको कार्यक्रममा सम्मानित व्यक्तित्वका बारेमा साहित्य संगमका मनोज पोखरेलले जानकारी दिएका थिए ।
