मकवानपुर । मकवानपुरकाे हेटौंडा उपमहानगरपालिका वडा नम्बर १९, बस्तिपुरस्थित निर्मल माध्यमिक विद्यालयको स्वर्ण महोत्सव आज (मंगलबार) बाट सुरु भएको छ ।
विद्यालयले मंगलबारदेखि शनिबारसम्म ५ दिन विद्यालयको ५०औं वार्षिकोत्सवलाई स्वर्ण महोत्सवको रुपमा मनाउन लागेको प्रधानाध्यापक प्रवोध बिडारीले जानकारी दिए । उनका अनुसार बागमती प्रदेशका मुख्यमन्त्री इन्द्रबहादुर बानियाँले महाेत्सवकाे उद्घाटन गर्ने छन् । स्वर्ण महोत्सव अन्तरगत प्रत्येक दिन विशेष कार्यक्रमहरु आयोजना गरिने उनले जानकारी दिए ।
महोत्सवअन्तर्गत बुधबारदेखि शुक्रबारसम्म पालिकास्तरीय पुरुष भलिबल प्रतियोगिता हुनेछ । प्रतियोगितामा प्रथम हुने टोलीले ७५ हजार, द्वितीय हुनेले ५० हजार र तृतीय हुने टोलीले सन्त्वना पुरस्कार १५ हजार रुपैयाँ पाउने छन् । उत्कृष्ट खेलाडीले १० हजार रुपैयाँ पुरस्कार पाउनेछ ।यसैगरी बिहीबार विद्यालय परिसरमा नगरस्तरीय विद्यार्थी हाजिरीजवाफ प्रतियोगिता हुनेछ । प्रतियोगितामा प्रथम, द्वितीय र तृतीय हुनेले क्रमशः १५ हजार, १० हजार र ६ हजार रुपैयाँसहित प्रमाणपत्र प्राप्त गर्नेछन् भने चौथो स्थान हासिल गर्नेले ४ हजार नगदसहित प्रमाणपत्र प्राप्त गर्ने छ ।
शिक्षक नृत्य प्रतियोगिता समेत हुने महोत्सवमा विद्यालयको गान(गीत) तथा वृत्तचित्र सार्वजनिक हुनेछ । स्वर्ण महोत्सवमा निर्मल स्मारिका प्रकाशन तथा स्वर्ण स्तम्भ अनावरण हुनेछ भने बृहत रक्तदान तथा बृहत स्वास्थ्य शिविर समेत सञ्चालन हुने प्रअ विडारीले जानकारी दिए । विद्यालयले महोत्सव अवधिभरी खानाको स्टल तथा मिनी व्यापार महोत्सव समेत सञ्चालन गर्नेछ ।
यसैगरी स्काउट मार्चपास प्रतियोगिता आयोजना हुनेछ । प्रतियोगितामा प्रथम, द्वितीय र तृतीय हुनेले क्रमशः १५ हजार, १० हजार र ७ हजार रुपैयाँ पुरस्कार पाउने छ । सान्त्वना स्वरुप ५ हजार पुरस्कार राशिको व्यवस्था गरिएको छ । स्थानीय र राष्ट्रिय कलाकारकाे प्रत्यक्ष लोकदोहरी कार्यक्रम समेत महोत्सवमा हुनेछ ।
स्वर्ण महोत्सवका लागि पूर्वविद्यार्थीहरुबाट करिब २५ लाख रुपैयाँ प्राप्त भएको विद्यालय व्यवस्थापन समितिका अध्यक्ष अमृत ओलीले बताए । करिव ५० लाख रकम लाग्ने अनुमान गरिएकाे महोत्सवका लागि हेटौंडा उपमहानगरपालिकाले ५ लाख, १९ नम्बर वडा कार्यालयबाट ५ लाख, मनहरी गाँउपालिकाबाट २ लाख, बुढानिलकण्ठ नगरपालिकाबाट २ लाख सहयोग प्राप्त भएको बताइएकाे छ ।
शनिबार बागमती प्रदेशका भौतिक पूर्वाधार विकास मन्त्री डा. दिनेशचन्द्र देवकोटाले स्वर्ण महाेत्सवकाे समापन गर्ने कार्यक्रम रहेकाे विद्यालयले जनाएकाे छ ।
मकवानपुर । बागमती प्रदेशका मुख्यमन्त्री इन्द्रबहादुर बानियाँले व्यवस्था चलाउन सरकार कठोर बन्नु पर्ने बताएका छन् । सोमबार विपी कोइरालाको स्मृतिमा स्थापित वाचनालय र कांग्रेस मकवानपुर संस्थापक सभापति सूर्यबहादुर डिमडुङको स्मृतिमा निर्मित भवनको उद्घाटन गर्दै मुख्यमन्त्री बानियाँले उक्त कुरा बताएका हुन् ।
‘व्यवस्था चलाउन सरकार कठोर बन्नु पर्छ तर निर्दयी बन्नु हुँदैन’ उनले भने । पछिल्लो समय राजनीतिमा प्रतिशोधको भावना बढेको उनले बताए । ‘राजनीतिमा संकटकाे बेला संघर्ष गर्ने नेतृत्वको अभाव देखिए छ’ उनले भने पार्टीभित्र राजनीतिक धैर्यता कमजोर बन्दै गएको छ ।’ मुख्यमन्त्री बानियाँले महाधिवेशनको कार्यतालिका सार्वजनिक भएसँगै कांग्रेस फुट्छ भन्ने भ्रम अन्त्य भएको उनले बताए । गणतन्त्रमा हिंसा, तोडफोड र व्यक्तिको घर जलाउने जस्ता कार्य किमार्थ स्वीकार्य नहुने उनकाे भनाई छ ।
हेटौंडाकाे बजार क्षेत्रकाे सडक विस्तारकाे प्रसंङ्गमा उनले अव्यवस्थित सडक विस्तारका कारण हेटौंडाको अवस्था अहिले प्रेतआत्माको शहर जस्तो देखिएको बताए । ‘हेटौंडालाई अँध्यारो बनाउने काम भएकाे छ उनले भने ‘प्रेतआत्माको शहर जस्तो भएको छ ।’ सरकारले उचित व्यवस्थापन र विकल्प विना नै घरहरू भत्काउँदा शहर कुरूप बनेको उनले बताए ।
हेटौंडा मानव विनाको शहर जस्तो देखिएको उनकाे भनाई छ । हेटौंडालाई अँध्यारो बनाउने काम भएकाेले यसलाई तीनै तहका सरकारले मिलेर तत्काल निकास दिनुपर्ने उनले बताए ।
मकवानपुर । मकवानपुरकाे हेटौंडा उपमहानगरपालिका वडा नम्बर–४ स्थित श्रमिक माध्यमिक विद्यालयले हीरक जयन्ती मनाउने भएकाे छ । विद्यालयले हीरक जयन्ती (६० औँ वार्षिक उत्सव) ६ दिन विविध कार्यक्रम गरी मनाउन लागेकाे हाे ।
विद्यालयले सोमबार पत्रकारसँग भेटघाट गर्दै ९ पुस बुधबारदेखि हिरक जयन्तीलाई उत्सवकाे रुपमा मनाउने तयारी भइरहेकाे जानकरी दिएको छ ।हीरक जयन्ती तथा वार्षिक उत्सवको अवसरमा विद्यालयले १४ पुससम्म जिल्लास्तरीय शिक्षक हाजिरीजवाफ, जिल्लास्तरीय चित्रकला प्रतियोगिता, नगरस्तरीय छात्र फुटबल, वडास्तरीय अन्तर विद्यालय वक्तृत्वकला प्रतियोगिता आयोजना गर्ने प्रधानाध्यापक श्रीराम दाहाले जानकारी दिए ।
यसैगरि नृत्य प्रतियोगिता, पूर्व विद्यार्थी पुनर्मिलन कार्यक्रम, अभिभावक अभिमुखीकरणसहित विभिन्न खेलकूद र मनोरञ्जनात्मक कार्यक्रम आयोजना गर्ने विद्यालयले जनाएको छ । यसअघि दुई पटक वार्षिक उत्सव मनाएको विद्यालयले यो वर्ष स्थापनाकाे ६० वर्य पगेकाे उपलक्ष्यमा हीरक जयन्तीलाई उत्सवकाे रुपमा मनाउने लागिएकाे प्रअ दाहालले बताए ।

मकवानपुर । बागमती प्रदेशका मुख्यमन्त्री ईन्द्रबहादुर बानियाँले मकवानपुरकाे कैलाशका एक चेपाङ दम्पतीलाई घर बनाइ दिएका छन् । उनले आफूले प्राप्त गर्ने सेवा सुविधाको रकमबाट बनाइएकाे घर कैलाश गाउँपालिका–४ धुसरका दम्पती लालकुमार चेपाङ र सानुमाया चेपाङलाई हस्तान्तरण गरेका हुन् ।
घर हस्तान्तरण गर्दै मुख्यमन्त्री बानियाँले विपन्न नागरिकलाई आफूले सेवा सुविधाको रकम खर्च गरेर घर निर्माण गरिदिएकाे बताउँदै प्रदेश सरकारमार्फत पनि आवास कार्यक्रम सञ्चालन गर्न लागिएको जानकारी दिए । ‘आफ्नो निर्वाचन क्षेत्रका नागरिकहरू गाँस, बास र कपासबाट बञ्चित हुन नदिने उदेश्य छ’ उनले भने ‘प्रदेशभरका गरिब निमुखा, दलित, सिमान्तकृत, एकल महिलालगायतलाई समेटेरे एक हजार वटा घर निर्माण गरी हस्तान्तरण गर्ने योजना छ ।’ यसकाे लागि प्रदेश सरकारले कार्यविधि बनाएर कार्य बढाउन लागेकाे उनले बताए ।
घर निर्माणसँगै उनीहरुलाई आयआर्जनका लागि बिना ब्याजमा प्रति परिवार २ लाख रुपैयाँ ऋणसमेत दिइने मुख्यमन्त्रीले जनाकारी दिए । कार्यक्रमकस्थलमै मुख्यमन्त्री बानियाँले चेपाङ दम्पतिलाई आयआर्जनका लागि बाख्रा पालन गर्न अनुरोध गर्दै नगद २० हजार रुपैयाँसमेत सहयोग हस्तान्तरण गरेका थिए ।
करिब ८ लाख रुपैयाँ लगानीमा ३ वटा कोठाको जस्ताले छाएको घर र शौचालय निर्माण गरिएको हाे । कैलाश गाउँपालिकाले अति विपन्न पहिचान गरी उनीहरुकाे लागि घर निर्माण गर्न मुख्यमन्त्री बानियाँ समक्ष सिफारिस गरेको थियो । गाउँपालिकाको सिफारिसपछि उनले आफूले प्राप्त गर्ने सेवा सुविधाको रकमबाट खर्च गर्नेगरी केही महिनाअघि घर निर्माण सुरु गराएका थिए ।
पचास वर्षीय लालकुमार लामो समयदेखि जीर्ण र असुरक्षित घरमा बस्दै आएका थिए । सानै उमेरमा हात जलेर सानुमाया आंशिक अपांग छिन् । उनीहरुकाे नाममा दुई कट्ठा नम्बरी र झण्डै तीन–चार कठ्ठा ऐलानी जग्गा छ । आर्थिक अभावका कारण उनीहरू सुरक्षित घर निर्माण गर्न असमर्थ थिए । घर निर्माणसँगै ओढ्ने, ओच्छ्याउने लगायतका लत्ताकपडाको व्यवस्थापन कैलाश गाउँपालिकाले गरिदिने गाउँपालिकाका अध्यक्ष लोकबहादुर मुक्तानले प्रतिवद्धता व्यक्त गरे ।
यसअघि मुख्यमन्त्री बानियाँले आफ्नो सुविधाको रकमबाट मकवानपुर मनहरी गाउँपालिका–९ की मिठुमाया सुनारकाे लागि ७ लाख रुपैयाँ लगानीमा घर निर्माण गरी हस्तान्तरण गरेका छन् । यसैगरी उनकै पहलमा राक्सिराङ गाउँपालिका–१ का सुमनसिं प्रजाको घर पनि निर्माणको क्रममा रहेको बताइएकाे छ ।
हेर्नुहाेस भिडियो
मकवानपुर । बागमती प्रदेशसभाकी उपसभामुख अप्सरा चापागाईले लैंगिक हिंसा अन्त्यका लागि राज्यका सबै तहले हस्तक्षेपकारी भूमिका निर्वाह गर्नुपर्ने बताएकी छिन् । लैंगिक हिंसा प्रतिकार्य संयन्त्र सुदृढीकरणका लागि संघीय, प्रदेश र स्थानीय सरकारबीच समन्वय, सहकार्य र भूमिका सम्बन्धी प्रदेशस्तरीय सम्मेलनमा उनले उक्त कुरा बताएकी हुन् ।
मकवानपुरकाे हेटौंडाम भएकाे उक्त कार्यक्रम सम्बाेधन गर्दै उपसभामुख चापागाईंले भनिन् ‘कार्यपालिका, न्यायपालिका र व्यवस्थापिकामा प्रभावकारी सुधार बिना लैंगिक हिंसा अन्त्य सम्भव छैन ।’ ‘शिक्षा, स्वास्थ्य र रोजगारीमा महिलाको सहज पहुँच सुनिश्चित गर्न सके महिला माथिकाे सबै प्रकारका विभेद र हिंसा अन्त्य गर्न सहज हुन्छ’ उनले भनिन् ‘यसकाे लागि हरेक तहकाे जिम्मेवारीमा रहेकाे व्यक्तिले इमान्दारीताका साथ आफ्नो दायित्व पूरा गर्नुपर्ने हुन्छ ।’
यसैबीच उपसभामुख चापागाईंलाई लैंगिक हिंसा अन्त्यका लागि १२ बुँदे मागपत्र बुझाइएकाे छ । लैंगिक हिंसाको अन्त्यका तथा पीडितलाई न्याय सुनिश्चित गर्न तेस्रो बागमती प्रदेश स्तरीय महिला सम्मेलनबाट पारित उक्त मागपत्र बुझाइएकाे हाे । यौन हिंसा विरुद्ध अभियान चितवनकी सावित्री पौडेलले उपसभामुख चापागाईलाई मागपत्र हस्तान्तरण गरेकी हुन् ।
संविधानले प्रत्याभूत गरेको सम्मानपूर्वक बाँच्न पाउने हक, समानताको हक, रोजगारीको हक लगायतका अधिकारको प्रभावकारी कार्यान्वयनको माग गरिएको मागपत्रमा हिंसा प्रभावित महिलालाई प्रमाण संकलनको जिम्मा थोपर्ने अभ्यासको अन्त्य गर्दै अनुसन्धान र न्यायिक प्रक्रियामा राज्य निकायलाई जिम्मेवार बनाउने नीति निर्माण गर्नुपर्ने उल्लेख गरिएको छ ।
त्यस्तै, स्थानीय तहमा न्यायिक डेस्क स्थापना गरी जोखिममा रहेका महिलाको अधिकार संरक्षण गर्नुपर्ने, न्यायमा पहुँच र सेवा प्रवाह सुनिश्चित गर्नुपर्ने, समुदाय तहमा सहयोगी संयन्त्र तुरुन्त गठन गर्नुपर्ने तथा हिंसा प्रभावित महिलाको मनोबल अभिवृद्धि गर्ने कार्यक्रम सञ्चालन गर्नुपर्ने माग गरिएकाे छ । महिलालाई आर्थिक रूपमा सशक्त बनाउन व्यवसायिक सीप र क्षमताको विकासमा जोड दिनुपर्ने मागपत्रमा उल्लेख गरिएको छ ।
एक्सनएड नेपालको आर्थिक सहयोगमा मकवानपुर महिला उत्थान समाज, चितवन सक्रिय महिला प्रतिष्ठान, महिला अधिकारका लागि राष्ट्रिय अभियान, मानव अधिकार संरक्षण तथा मानव बेचबिखन विरुद्ध जिल्ला सञ्जाल मकवानपुर र यौनजन्य हिंसा विरुद्धको साझा अभियान चितवनको संयुक्त सहकार्यमा गरिएको सम्मेलनमा संघ, प्रदेश र स्थानीय तहबीच समन्वय सुदृढ गर्दै लैंगिक हिंसा प्रतिकार्य प्रणाली मजबुत बनाउने उपायबारे समूह छलफल समेत गरिएको थियो ।
चितवन सक्रिय महिला प्रतिष्ठानकी उपाध्यक्ष दिक्षा रिमालको सभाध्यक्षता भएकाे कार्यक्रममा प्रदेशसभा सदस्य प्रेमबहादुर पुलामी, जिल्ला समन्वय समिति मकवानपुर प्रमुख ललितबहादुर घलान, हेटौंडा उपमहानगरपालिकाकी नगर प्रमुख मिनाकुमारी लामा, राष्ट्रिय महिला आयोगकी उपसचिव रोशनी कार्की, बागमती प्रदेश प्रहरी प्रमुख अरुण पौडेल, प्रमुख जिल्ला अधिकारी बसन्त अधिकारी, जिल्ला प्रहरी कार्यालय मकवानपुरका प्रमुख सुवासचन्द्र बोहरा, नेपाल पत्रकार महासंघ मकवानपुरका अध्यक्ष बालकृष्ण अधिकारी तथा महिला अधिकारकर्मीको उपस्थिति रहेको थियो ।