मकवानपुर । बागमती प्रदेशको मुख्यमन्त्रीमा नियुक्त भएका बहादुर सिंह लामाको शपथ ग्रहण बुधबार (आज) हुने भएको छ । बुधबार बिहान मुख्यमन्त्रीको शपथ ग्रहण कार्यक्रम प्रदेश प्रमुख कार्यालय हेटौंडामा हुने भएको हो ।
मुख्यमन्त्री लामासहित प्रदेशको १३ मन्त्रालयको मन्त्रीहरूको शपथ पनि बुधबार नै हुने प्रदेश प्रमुखको कार्यालयले जनाएको छ ।
लामालाई मंगलबार प्रदेश प्रमुख यादव चन्द्र शर्माले संविधानको धारा १६८ को २ अनुसार मुख्यमन्त्रीमा नियुक्त गरेका थिए । एमाले २७ र कांग्रेसका ३७ गरी ६४ सांसदहरूको समर्थन उनी मुख्यमन्त्री नियुत्त भएका हुन् ।
सत्ता गठबन्धन दल नेकपा एमालेले प्रदेश सरकारमा जाने मन्त्रीको नाम र मन्त्रालयको टुंगो मंगलबार लगाए पनि नेपाली काग्रेसले भने मन्त्रीको नाम टुंगो लगाउन सकेको छैन ।
एमालेबाट प्रकाश श्रेष्ठले कृषि तथा पशुपन्छी, किरण थापाले स्वास्थ्य, कृष्ण प्रसाद सिलवालले वन तथा वातावरण, सुकमाया तामाङले उद्योग, वाणिज्य, भूमि तथा प्रशासन, अमन मास्केले भौतिक पूर्वाधार विकाश र प्रेम भक्त महर्जनले श्रम रोजगार तथा यातायात मन्त्रालयको जिम्मेवारी पाउने तय भएको छ ।
कांग्रेसबाट नियुक्ति हुने ६ जना मन्त्रीको पनि बुधबार शपथ ग्रहण हुने बताइए पनि मन्त्री हुनेको नाम टुंगो लागेको छैन । कांग्रेसले आर्थिक मामिला तथा योजना, आन्तरिक मामिला तथा कानुन, सामाजिक विकास, संस्कृति पर्यटन तथा सहकारी, खानेपानी ऊर्जा तथा सिँचाइ र युवा तथा खेलकुद मन्त्रालयको लागि मन्त्री टुंगो लगाएर शपथ ग्रहण गराउने भएको हो ।
को हुन् नवनियुक्त मुख्यमन्त्री लामा ?
कांग्रेसको भ्रातृ संगठन नेविसंघहुँदै पार्टी राजनीतिमा लागेका बहादुर सिंह लामा हाल कांग्रेस केन्द्रीय समिति सदस्य छन् । लामा २०२७ कात्तिक ८ गते नुवाकोटको किस्पाङ गाउँपालिका ५ मनकामनामा जन्मेका हुन् ।
लामाले गाउँकै स्कुलबाट आधारभूत तहको शिक्षा हासिल गरेका उनले माध्यमिक तहको अध्ययन नुवाकोटको विदुरबाट पूरा गरेका थिए । उनले काठमाडौंको शंकरदेव क्याम्पसबाट स्नातकसम्मको उच्चशिक्षाको अध्ययन पूरा गरेका छन् ।
उनले २०४३ मा नेविसंघको सदस्यता लिएका थिए । २०४५ सालमा नेविसंघ नुवाकोटको क्षेत्रीय सभापति भएका उनी पछि कांग्रेस नुवाकोटको जिल्ला उपसभापति भए ।
२०५४ को स्थानीय तहको निर्वाचनमा नुवाकोटको तत्कालीन मनकामना गाविस अध्यक्षमा निर्वाचित भएका लामा पार्टीको १३ औँ महाधिवेशनमा निर्वाचित केन्द्रीय सदस्य भए भने १४ औँ महाधिवेशनबाट पनि उनले केन्द्रीय सदस्यमा निरन्तरता पाए ।
२०६४ सालमा नुवाकोट क्षेत्र नम्बर–३ बाट संविधानसभा सदस्य पदको निर्वाचनमा पराजित भएका उनी २०७० को दोस्रो संविधानसभा निर्वाचनमा विजयी भएका थिए ।
२०७४ मा समानुपातिक कोटाबाट प्रतिनिधिसभा सदस्य निर्वाचित भएका लामा २०७९ मा भने बागमती प्रदेशसभा सदस्य निर्वाचित भएका थिए । बागमतीको आर्थिक मामिला तथा योजना मन्त्रालयको जिम्मेवारी समेत सम्हालिसकेका उनी मुख्यमन्त्रीमा नियुक्त भएका छन् । निर्माण व्यवसायी समेत रहेका लामा देशकै पहिलो तामाङ समुदायका मुख्यमन्त्री हुन् ।
मकवानपुर । बागमती प्रदेशको मुख्यमन्त्रीमा बहादुर सिं लामा नियुक्त भएका छन् । लामालाई प्रदेश प्रमुख यादवचन्द्र शर्माले मुख्यमन्त्री पदमा नियुक्त गरेका हुन् ।
नेपालको संविधानको धारा १६८ को उपधारा २ बमोजिम उनी मुख्यमन्त्रीमा नियुक्ति भएका हुन् । नेपाली काग्रेसको तर्फबाट पहिलो मुख्यमन्त्री बनेका लामा प्रदेशको पाँचौ मुख्यमन्त्री हुन् ।
फेरिएको सत्ता समीकरण अनुसार गत असार २४ गते नेकपा एमाले सरकारबाट बाहिरिए पछि अल्पमतमा परेका तत्कालिन मुख्यमन्त्री शालिकराम जम्कट्टेलले साउन ६ गते प्रदेश प्रमुख समक्ष राजिनामा दिएका थिए ।उनको राजिनामा पछि प्रदेश प्रमुख शर्माले २ वा २ भन्दा बढी दलको समर्थमा सरकार गठनको लागि साउन ८ गते बेलुका ५ बजेसम्म मुख्यमन्त्रीमा दाबी पेश गर्न आह्वान गरेका थिए ।
लामाले प्रदेश प्रमुखले आह्वान गरेको समय अनुसार मंगलबार विहान मुख्यमन्त्रीमा दाबी पेश गरेका थिए । नेपाली कांग्रेस बागमती प्रदेश संसदीय दलका नेता समेत रहेका लामाले काग्रेसका ३७ र एमालेका २७ गरी ६४ जना सांसद्को समर्थनमा दाबी पेश गरेका थिए । लामा २०७९ सालको निर्वाचनमा नुवाकोटबाट प्रदेश सभामा निर्वाचित भएका हुन् ।
मकवानपुर । बागमती प्रदेशमा नेपाली काँग्रेसका संसदीय दलका नेता बहादुर सिं लामाले मुख्यमन्त्रीमा दावी पेश गरेका छन् । साउन ६ गते मुख्यमन्त्री शालिकराम जम्कट्टेलले पदबाट राजिनामा दिए पछि प्रदेश प्रमुखबाट मंगलबार ५ बजेकाे समय सिमा ताेकी दावी पेशकाे लागि आव्हान गरेका थिए । लामाले नेकपा एमालेकाे समर्थनमा मुख्यमन्त्रीमा मंगलबार दावी पेश गरेका हुन् ।
बागमती प्रदेशमा नेकपा एमाले र नेपाली काङ्ग्रेसको आधा आधा कार्यकाल मुख्यमन्त्री नेतृत्व गर्ने सहमति भएको छ । पहिलो २० महिनाको लागि गठबन्धनको तर्फबाट बहादुर सिं लामालाई मुख्यमन्त्री बनाउने गरी दाबी पेश गरिएको एमाले नेता जगन्नाथ थपलियाले बताए । २० महिनापछि एमालेबाट मुख्यमन्त्री हुने गरी अहिले मुख्यमन्त्री र अर्थ काङ्ग्रेसलाई दिने सहमति भएकाे थपलियाले बताए ।
सहमति अनुसार प्रदेशको सुरुवातमा नेपाली काङ्ग्रेसका दलका नेता बहादुर सिंह लामा २० महिना र त्यसपछि नेकपा एमालेका दलका नेता जगन्नाथ थपलिया मुख्यमन्त्री बन्ने सहमति बनेको छ । मंगलबार हेटौंडामा पुर्वमुख्यमन्त्री डोरमणि पौडेलसहित नेताहरु लामा, थपलिया, नेपाली काङ्ग्रेसका नेता इन्द्र बहादुर बानियाँ, पुर्व मन्त्री केशव पोख्रेलसहितका नेताहरु बसेर सहमति गरेका हुन् । सहमति अनुसार एमालेले भौतिक पुर्वाधार सहित ६ मन्त्रालय र काङ्ग्रेसले मुख्यमन्त्री सहित ७ वटा लिने सहमति बनेको छ ।
काङ्ग्रेसले मुख्यमन्त्रीसहित, आर्थिक मामिला तथा योजना मन्त्रालय, आन्तरिक मामिला तथा कानुन मन्त्रालय, सामाजिक मन्त्रालय, युवा तथा खेलकुद मन्त्रालय, श्रम रोजगार तथा यातायात मन्त्रालय, सस्कृती, पर्यटन तथा सहकारी मन्त्रालय लिने भएको छ भने एमालेले भौतिक सहित खानेपानी, उर्जा तथा सिंचाइ, कृषि तथा पशुपन्छी बिकास, वन तथा वातावरण, उद्योग, वाणिज्य, भूमि तथा प्रशासन र स्वास्थ्य मन्त्रालय लिने सहमति बनेको हो ।
सोमबार नै मुख्यमन्त्रीकाे लागि दावी पेश गर्ने समय तोकिएकाे भएपनि भागवण्डा नमिल्दा आजकाे लागि समय सारिएकाे थियाे । मंगलबार विहान सहमति भएसँगै नेपाली काँग्रेसले पहिलोपल्ट बागमतीमा नेतृत्व गर्ने अवसर पाएकाे हाे । लामा प्रदेशकाे पाचौं मुख्यमन्त्री नियुक्ति हुनेछन् । मंगलबार नै मुख्यमन्त्री र मन्त्रीकाे नियुक्ति गरिने र बुधबार सपथ ग्रहणकाे कार्यक्रम हुने बताएकाे छ ।
मकवानपुर । बागमती प्रदेश सामाजिक विकासमन्त्री कुमारी मोक्तानले आफ्नो कार्यकालमा भएको उपलब्धी सार्वजनिक गरेकी छन् । मन्त्री मोक्तानले सोमबार मन्त्रालयमा आफ्नो कार्यकालमा भएको मुख्य–मुख्य कार्य विवरण समेटिएको पुस्तक सार्वजनिक गरेकी हुन् ।
सार्वजनिक पुस्तिकामा मन्त्रालयको कार्य क्षेत्र भित्र पर्ने शिक्षा, गरिबी निवारण, महिला तथा बालबालिका, ज्येष्ठ नागरिक, अपांगता भएका व्यक्ति, सामाजिक सुरक्षा, सीपमूलक तालिमको विषयमा भएको कार्य समेटिएको छ । सो क्रममा उनले आफ्नो कार्यकालमा शिक्षा क्षेत्र सुधारमा उल्लेखनीय प्रगति भएको दाबी गरिन् ।
यसैगरी, प्रदेशका ३५ वटा स्थानीय तहसँगको साझेदारीमा गृहिणी महिला सशक्तिकरण कार्यक्रम सञ्चालन भइरहेको प्रकाशित पुस्तकमा उल्लेख छ । चेपाङ समुदायको उत्थानका लागि प्रदेशका ६ वटा स्थानीय तहमा चेपाङ, चमेरो र च्यूरी संरक्षण कार्यक्रम सुरु उनको भनाई छ ।
उनी नेकपा माओवादी केन्द्रकाे तर्फबाट दोश्रो कार्यकालकाे लागि २०७९ माघ ११ गतेबाट मन्त्री भएकी हुन् । साउन ६ गते प्रदेश मुख्यमन्त्री शालिकराम जम्कट्टेलले पदबाट राजिनामा दिएसँगै उनकाे समेत पदावधी समाप्त भएकाे छ ।
चितवन । चितवनकाे पर्यटकीय नगरी सौराहमा चन्द्रमा होटल एण्ड रेष्टुरेण्ट सञ्चालनमा आएको छ । जापानमा होटल व्यवसाय गर्दै आएका चितवनका युवा व्यवसायी चेतराम गैरेले सौराहमा ७ करोड लगानीमा सुविधा सम्पन्न होटल सञ्चालनमा ल्याएका हुन्।
भरतपुर महानगरपालिका वडा नं. ९ शरदपुरका व्यवसायी गैरेले रत्ननगर वडा नं. ६ साैराहामा १७ काेठे सुविधा सम्पन्न हाेटल सञ्चालनमा ल्याएका हुन् । हाेटलकाे आइतबार राष्ट्रिय आविस्कार केन्द्र नेपालका अध्यक्ष डा. महाविर पुनले उद्धघाटन गरे । उनले साैराहाका हाेटलहरूले गुणस्तरीय सेवा सुबिधामा दिनुपर्ने बताए ।
२००९ सालबाट जापानकाे टाेकियाेमा व्यवसाय सुरू गरेका गैरेले नेपालकाे तेस्राे पर्यटकीय नगरी साैराहामा सुबिधा सम्पन्न हाेटल सञ्चालनमा ल्याएका हुन् । टोकियोमा पनि चन्द्रमा रेस्टुरेन्ट सञ्चालन गरिरहेका गैरेले विदेशको कमाई स्वदेशमै लगानी गर्न एउटै नामबाट सौरामा होटल व्यवसाय सञ्चालन गरेको बताए।
होटलमा एसीसहितका सुबिधा सम्पन्न कोठा, बिदेशी तथा आन्तरिक पर्यटकलाई स्वादिष्ट परिकारको व्यवस्था रहेको सञ्चालक गैरेले बताए । गैरेले पुनले लेखेका १०० वटा पुस्तक होटेलमा लाइब्रेरीको रुपमा राख्ने जानकारी दिए। उनले उक्त किताब बापत नेपाल आविष्कार संघलाई १ लाखको चेक हस्तान्तरण गरे।
गैरेको अध्यक्षतामा भएकाे उद्घाटन कार्यक्रममा रत्ननगर ६ का वडा अध्यक्ष किरण महतो, रेवान सौराहाका अध्यक्ष ध्रुव गिरी, क्षेत्रीय होटल संघ सौराहाका अध्यक्ष गंगा गिरी बाघमार वनका अध्यक्ष जितबहादुर तामाङ व्यवसायी तथा समाजसेवी पुरूषोत्तम लामिछाने,रेवानका पूर्व अध्यक्ष गोकर्ण गिरी, नेचर गाईड एसोशियसनका अध्यक्ष अनिल गुरूङ, बछौली प्रहरी चौकी प्रमुख श्याम थापालगायतकाको सहभागिता रहेको थियो ।