मकवानपुर । बागमती प्रदेशसभाबाट ३ वटा विधेयक पारित भएकाे छ । प्रदेशसभाको सोमबारको बैठकले संसदीय समितिले संसदमा पेस गरेको विधेयक पारित गरेको हो ।
प्रदेशसभाबाट प्रदेश हस्तकला ग्राम स्थापना तथा सञ्चालन सम्बन्धमा व्यवस्था गरेको विधेयक, प्रदेश कृषि विकास सम्बन्धमा व्यवस्था गर्न बनेको विधेयक र प्रदेश स्वास्थ्य ऐन २०७५ लाई संशोधन गर्न बनेको विधेयक सर्वसम्मत पारित भएकाे हो ।
प्रदेशकी उद्योग , वाणिज्य , भूमि तथा प्रशासनमन्त्री सुकमाया तामाङले प्रदेश हस्तकला ग्राम स्थापना तथा सञ्चालन सम्बन्धमा व्यवस्था गरेको विधेयककाे प्रस्ताव पेस गरेका थिए । यसैगरी प्रदेश कृषि तथा पशुपन्छी विकास मन्त्री प्रकाश श्रेष्ठले प्रदेश कृषि विकास सम्बन्धमा व्यवस्था गर्न बनेको विधेयककाे प्रस्ताव पेश गरेका थिए । यस्तै प्रदेश स्वास्थ्य मन्त्री किरण थापा मगरले प्रदेश स्वास्थ्य ऐन २०७५ लाई संशोधन गर्न बनेको विधेयक प्रस्ताव पेश गरेका थिए ।
सभामुख भुवनकुमार पाठकले उक्त विधेयकहरु छलफलका प्रस्ताव पछि निर्णयार्थ प्रदेश सभामा पेस गरेका थिए । सभामुख पाठकले पेस गरेको उक्त विधेयकलाई सांसदहरूले सर्वसम्मत पारित गरेका हुन् ।
आइतबारकाे बैठकमा उद्योग पर्यटन तथा वातावरण समितिका सभापति आनन्दकुमार श्रेष्ठले प्रदेश हस्तकला ग्राम स्थापना तथा सञ्चालन सम्बन्धमा व्यवस्था गर्न बनेको विधेयकको निर्णयको प्रतिवेदन पेस गरेका थिए । शिक्षा स्वास्थ्य तथा कृषि समितिका सभापति ठाकुर ढकालले समितिले दफावार छलफल गरेर तयार पारेको प्रदेश स्वास्थ्य ऐन २०७५ लाई व्यवस्था गर्न बनेको विधेयकको निर्णयको प्रतिवेदन र प्रदेश कृषि विकास सम्बन्धमा व्यवस्था गर्न बनेको विधेयकको निर्णयको प्रतिवेदन पेस गरेका हुन् ।
यसैगरी प्रदेश सभाकाे विभिन्न बैठकका विशेष समयमा प्रदेश सदस्यहरुले उठाएका समसामयीक तथा प्रदेशका कार्यक्षेत्र भित्रका विषयका सम्बन्धमा मुख्यमन्त्रीले जवाफ दिएका थिए । प्रदेश सभाकाे सोमबारकाे बैठकमा शुन्य तथा विशेष समय निर्धारण गरिएन् । सभामुख पाठकले प्रदेश सभाकाे अर्काे बैठक सूचना जारी नभएसम्मकाे लागि स्थगित गरे ।
मकवानपुर । मकवानपुरकाे हेटौडा उपमहानगरपालिका वडा नम्बर ९ बालमैत्री स्थानीय शासनयुक्त वडा घाेषणाकाे तयारीमा छ । ११ असोज २०८१ मा वडालाई बालमैत्री स्थानीय शासनयुक्त वडा घोषणा गरिने भएकाे हाे ।
वडालाई निकृष्ट बालश्रम मुक्त, बाल विबाह मुक्त तथा बालमैत्री स्थानीय शासनयुक्त वडा घोषणा गर्ने तयारी गरिएकाे सोमबार पत्रकार भेटघाट गरी जानकारी दिइएकाे हाे । वडा घोषणा गर्ने मात्र होइन घोषणा पछिको जिम्मेवारीलाई समेत बहन गर्ने गरी अभियानमा जोडिएको हेटौंडा–९ का अध्यक्ष एवम् बालमैत्री स्थानीय शासनयुक्त वडा घोषणा मुल समारोह समिति संयोजक सुकराम केसीले बताए ।
वडा अध्यक्ष केसीले सभ्य र भव्य कार्यक्रम गर्ने तयारीमा रहेको महाअभियानमा सबैलाई सहयोगी बन्न तथा सहभागिता जनाउन आव्हान समेत गरेका छन् ।
उनका अनुसार बालमैत्री स्थानीय शासन घोषणाका लागि आवश्यक रहेको ५१ सुचकलाई पुरा गर्दै वडालाई बालमैत्री घोषणा गरिने छ।यस अघि पूर्ण खोपयुक्त, पूर्ण साक्षर र खुल्ला दिशा मुक्त वडा घोषणा भइसकेको हेटौंडा ९ लाइ सातौं वडाको रुपमा बालमैत्री स्थानीय शासन युक्त वडा घोषणा गरिने भएकाे हाे ।
घरधुरी तथ्याङक अनुसार वडामा १८ बर्ष मुनिका २ हजार ७०७ बालबालिका रहेकाेमा १ हजार ४४५ बालक र १ हजार २६२ जना बालिकाहरु रहेकाे वडा सचिव राजेन्द्रनाथ पोखरेलले जानकारी दिए ।
‘वडामा २५ वटा बाल समुह र १ वटा वडास्तरीय बाल सञ्जाल रहेकाेमा त्यसमा ६ सय २५ जना बालबालिका आवद्ध रहेका छन्’ उनले भने ‘बिभिन्न संरचनागत समितिमा ६५५ जना बालबालिकाहरको प्रत्यक्ष सहभागिता रहेको छ ।’
आगामी पौष सम्ममा हेटौंडा उपमहानगरपालिकालाई बालमैत्री स्थानीय शासन युक्त नगर घोषणा गर्ने गरी अभियान रहेकाे छ । साही अनुसार हेटौंडा उपमहानगरपालिकाका वडाहरु बालमैत्री घाेषणा हुँदै छन् । यस अघि हेटौंडा उपमहानगरपालिकाको ८, २, ७, १७, ४ र १० नम्बर वडा बालमैत्री घोषणा भएका छन् ।
मकवानपुर । मकवानपुरमा बैंकिङ कसुर सम्बन्धी मुद्दा बढेकाे छ । पछिल्लाे समय देखिएकाे आर्थिक मन्दीले बैंकिङ जन्य कारोबारमा बढि मुद्दा पर्ने गरेकाे प्रहरीकाे तथ्याङ्कले समेत देखाएकाे छ ।
जिल्ला प्रहरी कार्यालय मकवानपुरमा गत आर्थिक वर्षमा बैंकिङ कसुरका एक सय ८४ मुद्दा दर्ता भएकाे छ । आर्थिक वर्ष २०७९/०८० मा ७९ मात्रै बैकिङ कसुर सम्बन्धी मुद्दा दर्ता भएकाेमा गत आवमा बढेर एक सय ८४ पुगेकाे हाे । यसैगरी चालु आर्थिक वर्षकाे भदौ मसान्तसम्म पनि बैकिङ कसुरका मुद्दा बढी दर्ता भएकाे प्रहरीकाे तथ्याङ्कले देखाउँछ । चालु आवकाे भदौ मसान्तसम्म ३३ मुद्दा बैंकिङ कसुर सम्बन्धी रहेकाे छ ।
बैंकिङ कसुर सम्बन्धी मुद्दा पछि लागु औषध मुद्दा बढी दर्ता भएकाे देखिन्छ । आर्थिक वर्ष २०७९/०८० मा लागु औषध सम्बन्धी मुद्दा सबै भन्दा बढी दर्ता भएकाे थियाे । जिल्लामा उक्त आवमा एक सय ५३ मुद्दा लागु औषधका दर्ता भएकाेमा गत आवमा लागु औषधका एक सय ५८ मुद्दा दर्ता भएकाे जिल्ला प्रहरी कार्यालय मकवानपुरले जनाएकाे छ । यसैगरी चालु आवकाे भदौ मसान्तसम्म १७ मुद्दा लागु औषधका दर्ता भएका छन् ।
यसैगरी आव २०७९/०८० मा लागुऔषध सम्बन्धी मुद्दा १ सय ५३ दर्ता हुँदा २ सय ४८ जना पक्राउ परेका छन् । आव २०८०/०८१ मा लागु औषध मुद्दा एक सय ५८ दर्ता हुँदा दुई सय ४९ जना पक्राउ परेकाे जिल्ला प्रहरी कार्यालय मकवानपुरले जनाएकाे छ । यस्तै चालु आवमा १७ मुद्दा दर्ता हुँदा २९ जना पक्राउ परेका छन् ।

स्राेतः जिल्ला प्रहरी कार्यालय मकवानपुर
यस्तै मकवानपुर प्रहरीले आव २०७९/०८० मा मकवानपुरका विभिन्न पालिकामा १४६ विगाह १७ कठ्ठा १० धुरमा लगाइएकाे गाँजा फडानी गरेकाे छ । यसैगरी साेही आवमा २२४ विगाह ३ कठ्ठामा लगाइएकाे अफिम नष्ट गरेकाे छ । चार ९७ प्रहरी परिचालन गरी उक्त लागुऔषध फडानी गरिएकाे हाे । यसैगरी गत आवमा मकवानपुर प्रहरीले २७८ विगाह ३ कठ्ठामा लगाइएकाे गाँजा र १४६ विगाह ५ कठ्ठा १५ धुरमा लगाइएकाे अफिम नष्ट गरिएकाे हाे । उक्त अभियानमा ५ सय ९६ जना प्रहरी परिचालन गरिएकाे हाे ।
यस्तै जिल्ला प्रहरी कार्यालय मकवानपुरमामा अपराध अनुसन्धान सम्बन्धी मुद्दा दर्ताकाे संख्या बढ्दै गएकाे तथ्याङ्कले देखाउँछ । आर्थिक वर्ष २०७८/०७९ मा विभिन्न अपराधका आठ सय दुई मुद्दा दर्ता भएकाेमा सात सय ३० जना पक्राउ परेका छन् । आर्थिक वर्ष २०७९/०८० मा आठ सय ६६ मुद्दा दर्ता भएकाेमा सात सय ६४ जना पक्राउ गरिएकाे थियाे । गत आवमा अपराध सम्बन्धी एक हजार १९ मुद्दा दर्ता भएकाेमा सात सय ३२ जना पक्राउ गरिएकाे प्रहरीकाे तथ्याङ्कमा उल्लेख छ । चालु आवकाे भदौ मसान्तसम्म अपराधका एक सय ६४ मुद्दा दर्ता भएकाेमा एक सय २२ जना पक्राउ गरिएकाे छ ।
जिल्ला प्रहरी कार्यालय मकवानपुरकाे तथ्याङ्क अनुसार चालु आवकाे भदौसम्म फरार प्रतिवादी १५ जना पक्राउ गरेकाे देखिन्छ । यसैगरी गत आवमा विभिन्न मुद्दाका फरार प्रतिवादी दुई सय ६१ जना पक्राउ गरिएकाे प्रहरीले जनाएकाे छ । यस्तै आव २०७९/०८० मा फरार प्रतिवादी एक सय ६७ र आव २०७८/०७९ मा एक सय १४ जना फरार प्रतिवादी पक्राउ गरिएकाे तथ्याङ्कमा उल्लेख छ ।

स्राेतः जिल्ला प्रहरी कार्यालय मकवानपुर
मकवानपुर । बागमती प्रदेशसभाकाे आइतबारकाे बैठकमा ३ वटा विधेयकको प्रतिवेदन पेश भएको छ । बैठकमा शिक्षा,स्वास्थ्य तथा कृषि समितिका २ वटा र उद्योग, पर्यटन तथा वातावरण समितिको एउटा विधेयकको निर्णयकाे प्रतिवेदन पेश भएको हो ।
शिक्षा, स्वास्थ्य तथा कृषि समितिका सभापति ठाकुर ढकालले प्रदेश स्वास्थ्य ऐन २०७५ लाई व्यवस्था गर्न बनेको विधेयकको प्रतिवेदन र प्रदेश कृषि विकास सम्बन्धमा व्यवस्था गर्न बनेको विधेयकको प्रतिवेदन प्रदेश सभामा पेश गरेका हुन् । उद्योग,पर्यटन तथा वातावरण समितिका सभापति आनन्द कुमार श्रेष्ठले प्रदेश हस्तकला ग्राम स्थापना तथा सञ्चालन सम्बन्धमा व्यवस्था गर्न बनेको विधेयकको प्रतिवेदन पेश गरेका छन् ।
यसैगरी सभामुख भुवन कुमार पाठकले संघीय सरकारको ध्यानाकर्षण गराए । बैठकमा सदस्य केशव प्रसाद पोखरेलले विद्युतीकरण सम्बन्धी विषयमा ध्यानाकर्षण प्रस्ताव पेश गरेका थिए । पोखरेलले पेश गरेको ध्यानाकर्षण प्रस्ताव माथि सभामुख पाठकले संघीय सरकारकाे ध्यानाकर्षण गराएका हुन् ।
आइतबारकाे बैठकमा शुन्य समय व्यवस्था गरिएकाे थिएन । विशेष समयमा प्रदेश सभा सदस्यहरुले प्रदेशका समसामयीक विषय, बजेट प्रदेशका कानून कार्यान्वयनकाे स्थिति, नयाँ सरकारकाे २ महिना अवधिकाे काम तथा चाडवाडकाे समयमा जनताले पाउने सास्तीलगायतका विषयमा धारणा राखेका थिए । विशेष समयमा राजेन्द्र प्रजापति,मातृका प्रसाद भट्टराई,डम्बर तामाङ,भरत बहादुर केसी, तारा नारायण श्रेष्ठ,आशा लामा, भारती कुमारी पाठक,शैलेन्द्रमान बज्राचार्य, सुरेन्द्रराज गोसाई, उद्धब थापा,आनन्द कुमार श्रेष्ठ,राम कुमार पहाडीले धारणा राखेका थिए ।
यसैगरी मुख्यमन्त्री बहादुर सिं लामाले महालेखा परीक्षककाे छैटौ प्रतिवेदन २०८१ सभामा पेश गरेका थिए । सभामुख पाठकले प्रदेश सभाकाे अर्को बैठक ७ असोज सोमबार बस्ने गरी ताेकेका छन् ।
मकवानपुर । बागमती प्रदेश सरकारले न्युनतम साझा कार्यक्रम सार्वजनिक गरेकाे छ । प्रदेश सरकारले आइतबार पत्रकार सम्मेलन मार्फत न्यूनतम साझा कार्यक्रम सार्वजनिक गरेको हो ।
प्रदेश सरकारले सुशासनको प्रत्याभूति दिलाउने, संघीयताको प्रभावकारी कार्यान्वयन गर्न समन्वय गर्ने, स्थानीय तहसँग सहकार्य गर्ने लगायतका ६७ बुँदामा रहेकाे साझा कार्यक्रम सार्वजनिक गरेको हाे ।
भ्रष्टाचारको अन्त्यगरी सुशासन कायम गर्न, भ्रष्टाचारप्रति शून्य सहनशीलता अपनाउने,संविधानमा आवश्यक संशोधन गर्न र कानुन निर्माण गर्न संघीय सरकारलाई सहयोग गर्ने प्रदेश सरकारको न्यूनतम साझा कार्यक्रममा समावेश गरिएको छ । प्रदेश प्रहरी स्थापना गर्ने, प्रदेश सरकारका मन्त्रालयहरुका प्रदेश सचिवहरु र स्थानीय तहका प्रशासकीय अधिकृतहरु प्रदेश सरकारले खटाउने व्यवस्था गर्ने, फजुलखर्च कटौती गरी आर्थिक अनुशासनलाई कडाइका साथ पालना गर्ने सरकारको न्यूनतम साझा कार्यक्रम रहेको छ ।
संघीयताको प्रभावकारी कार्यान्वयनका लागि संघीय सरकारसँग सहकार्य र समन्वय गर्ने, प्रदेश योजना बैंक स्थापना गर्ने, ललितपुर महानगरलाई हस्तकलाको राजधानी घोषणा गर्ने, रुग्ण उद्योगहरुको प्राविधिक र आर्थिक सम्भाव्यताको आधारमा पुनः सञ्चालन गर्न संघीय सरकारसँग आवश्यक समन्वय गर्ने सरकारको न्यूनतम साझा कार्यक्रममा समावेश छ ।
एक प्रदेश निर्वाचन क्षेत्र, एक स्थानीय कच्चा पदार्थमा आधारित घरेलु उद्योग स्थापना गर्ने, हेटौंडा–टेकु रज्जुमार्ग (रोप–वे) पुनः सञ्चालनमा ल्याउने, स्थानीय तहसँग सहकार्य गरी भूमि बैंक स्थापना गर्ने, ‘जनताको जिज्ञासा सुझाव र गुनासा प्रदेश सरकारलाई सिधा फोन’ कार्यक्रम गर्न सञ्चालनमा ल्याउने, एक जिल्ला एक उत्पादन क्षेत्र घोषणा गर्ने सरकार ल्याएकाे साझा कार्यक्रममा छ ।
प्रदेश मुख्यमन्त्री बहादुर सिंह लामा, सत्तारुढ दल नेकपा एमाले बागमती प्रदेश संसदीय दलका नेता जगन्नाथ थपलिया,आर्थिक मामिला तथा योजना मन्त्री कुन्दनराज काफ्ले,आन्तरिक मामिला तथा योजना मन्त्री सुरजचन्द्र लामिछाने तथा प्रदेश सभा सदस्यहरुको उपस्थितिमा सरकारको न्यूनतम साझा कार्यक्रम सार्वजनिक गरिएको हो । सरकारमा नरहेता पनि राप्रपाले न्युनतम साझा कार्यक्रममा सहमित जनाएको छ ।
हेर्नुहाेस साझा कार्यक्रम