मकवानपुर । पुष्पाञ्जली आमा रात्री गस्ती समुहकाे अध्यक्षमा पुनः कल्पना थापा मगर चयन भएकी छन् । समुहकाे तेश्रो साधारण सभाले थापा मगरलाई पुनः अध्यक्षमा चयन गरेकाे हाे ।
यसैगरी उपाध्यक्षमा धन मुक्तान, सचिव शुशीला कुमारी गौतम, कोषाध्यक्ष गोमा शाह, सदस्यहरु बिना रिजाल, ज्ञानु जोशी, गोमा क्षेत्री, बिमला भारती, शारदा कार्की, बेली लामा चयन भएका छन् । एक जना सदस्य पछि मनोनित गर्ने गरी दश सदस्यीय कार्य समिति सर्व सम्मत चयन भएकाे हाे । सभामा समुहको प्रगति प्रतिवेदन सचिव शुशीला कुमारी गौतम र आर्थिक प्रतिवेदन कार्यवाहक कोषाध्यक्ष गोमा शाहले प्रस्तत गरेका थिए ।
समूह रात्रीकालिन सडक सुरक्षा र हिंसामुक्त सडक अभियानका साथ युवाहरुलाई लागुपदार्थ दुर्व्यसनीबाट मुक्त गर्दे हिंसाजन्य घटनाको दर शुन्यतामा लैजाने उद्देश्यका साथ २०७४ सालमा स्थापना भएको हाे । मकवानपुर जिल्लामै रातको समयमा आमाहरुको समुह बनाएर राजमार्ग र वडाका विभिन्न टोलमा दुर्व्यसन र हिंसा रहित समाज निर्माणको लागि गस्ती गर्दे आएकाे छ । समुदाय स्तरबाट नियमित गस्ती गरेर सुरक्षा निकायको सहयात्रीको रुपमा काम गर्दे आएको गस्ती समुहले शान्तिपूर्ण समाज निर्माणमा सहयोग पुगेको वडा अध्यक्ष सुकराम केसीले बताए ।
सुमदायलाई अनुशासित राख्न दुर्व्यसन र हिंसा रहित समाजले धेरै सहयोग पुर्याउछ र घरकै आमाहरु नै सडकमा हिंसाजन्य घटनादर न्युनीकरण गर्न र युवाहरुलाई कुलतमा लाग्न नदिन अहोरात्र रातिको समयमा पहरा दिनु निकै प्रंसशायोग्य काम भएको अध्यक्ष केसीले जानकारी दिए । समुहको कामलाई अवलम्बन गर्दे टोल विकाश संस्थाहरुकाे समेत रात्रिकालीन गस्ती समुह बन्दै गएकाे छ’ उनले भने ‘यसले समाजलाई झैझगडा कम हुने, अव्यवस्थित मदिरा बिक्री वितरण, लागुपदार्थ दुर्व्यसन तथा घरेलु हिसांको घटना समेत न्युनिकरण हुदै गएकाे छ ।’
मकवानपुर । वर्षाकाे कारण अबरुद्ध हेटौंडाबाट काठमाडौं जाने ३ वटा छोटो मार्ग संचालनमा आएकाे छ ।
१०–१२ असोजमा परेको अविरल वर्षाकाे कारंण आएको बाढीपहिरोले बागमती प्रदेश राजधानी हेटौडालाई संघीय राजधानी काठमाडौ जोड्ने छोटो दुरीका ३ वटा मार्ग ९ दिनदेखि अवरुद्ध रहेकाे थियाे ।
हेटौंडा- कुलेखानी-सिस्नेरी-दक्षिणकाली-काठमाडौं, कुलेखानी-फाखेल-हुमानेभन्ज्याङ्ग-काठमाडौं, कुलेखानी- महालक्ष्मी-चखेल-मातातिर्थ-काठमाडौं मार्ग आइतवारबाट संचालनमा आएको हाे। यसैगरी मार्खु-चित्लाङ्ग-चन्द्रागिरी-काठमाडौं सडक बुधबारदेखि नै खुलेको हाे। कुलेखानी ड्याममुनिको डाइभर्सनको काम सकिएपछि फाखेल र सिस्नेरीको दुवैतर्फको मोटरबाटो आइतबारबाट संचालनमा आएको बागमती प्रदेश भौतिक पूर्वाधार मन्त्री अमन कुमार मास्केले जनाकारी दिए ।
मन्त्री मास्केका अनुसार दसैंकाे चहलपहल सुरु भएकाेले सवारी साधनको आवागमनको चाप अत्याधिक हुने हुँदा सिस्नेरी र फाखेलकाे बाटो मध्ये आउँदा एकातर्फबाट जाँदा अर्कोतर्फबाट जाने गरी सवारी साधन चलाउने विषयमा छलफल भइरहेको छ। दक्षिणकालीबाट सिस्नेरीसम्मकाे खण्ड भने शुक्रबार नै खुलेको थियाे ।
बाढीपहिरोले क्षतिग्रस्त हटौंडा–काठमाडौं जोड्ने कान्ति लोकपथ भने केही दिनमा संचालन हुने बताइएकाे छ । त्रिभुवन राजपथ हुँदै दामन–पालुङ्ग –चित्लाङ–चन्द्रागिरी–काठमाडौं सडक भने १४ असोजबाट संचालन आएकाे थियाे । बाटो अवरुद्ध हुँदा त्रिभुवन राजपथमा सवारीको चाप बढेको थियो।
मकवानपुर । मकवानपुरकाे हेटौंडामा भएकाे जिल्ला लिग फुटबल प्रतियोगिताको उपाधि हेटौडाकाे पदमपोखरी युथ क्लबले हात पारेकाे छ । हेटौंडा–५ स्थित पिप्ले–क्याम्पा रंगशालामा शनिबार भएको फाइनल खेलमा शहीद स्मृति क्लबलाई ३–१ गोलअन्तरले हराउँदै पदमपोखरीले उपाधि जितेको हो ।
प्रतियोगिताको उपाधि विजेतासँगै पदमपोखरीले १ लाख रुपैयाँसहित शिल्ड, मेडल तथा प्रमाणपत्र प्राप्त गरेको छ भने उपविजेतामा चित्त बुझाएकाे बागमती गाउँपालिकाको शहीद स्मृतिले ५० हजार रुपैयाँसहित शिल्ड, मेडल तथा प्रमाणपत्र प्राप्त गर्याे ।
पदमपोखरीको जितमा दिवस गोलेले पहिलो हाफको २४ औं मिनेटमा, विजेश तितुङ्ले दोस्रो हाफको २१औं मिनेटमा र अमीत स्याङ्तानले इन्जुरी समयमा १ गोल गर्दै पदमपोखरीको जित सुनिश्चित गरेका थिए । एक गोल गर्दै टिमलाई अग्रता दिलाएका थिए । शहीद स्मृतिका उप्रान्त आले मगरले पहिलो हाफकाे ३९औं मिनेटमा १ मात्र गोल गरेका थिए ।
प्रतियोगिताको सर्वोकृष्ट खेलाडी पदमपोखरीका रोजक थिङ, फर्वार्ड शहीद स्मृतिका उप्रान्त आले मगर, पदमपोखरीका प्रशिक्षक ज्ञानु मुक्तान, मिडफिल्डर नवराज थिङ, गोलरक्षक रोजक थिङ र उत्कृष्ट डिफेन्डर अरूण आले मगर घोषित भए । उनीहरुले ट्रफि प्राप्त गरेका छन् ।
शहीद स्मृति जिल्ला लिगमा पहिलो पटक सहभागी भएको हो भने पदमपाेखरी पहिलाेपटक लिग विजेता भएकाे हाे । १४ भदौबाट सुरु लिग जिल्लामा रहेका २८ वटा क्लवलाई वर्गीकरण गर्ने गरी संचालन गरिएको थियाे । फुटबल संघमा आबद्ध रही अघिल्लो पटकको लिग खेलेका २८ क्लवलाई ४ समूहमा विभाजन गरि प्रतियाेगिता संचालन भएकाे हाे ।
यसअघि भएको जिल्ला लिगको उपाधि न्यु डाँफे युथ क्लबले जितको थियो भने हटिया स्पोटर्स एकेडेमी उपविजेता रहेकाे थियो।विजेता, उपविजेता तथा उत्कृष्ट खेलाडीलाई बागमती प्रदेशका पूर्वसामाजिक विकास मन्त्री कुमारी मोक्तान, प्रदेशसभा सदस्य प्रेमबहादुर पुलामी, मकवानपुर जिल्ला फुटबल संघका अध्यक्ष टीकाराम लामा, प्रतियोगिता संयोजक युवराज लामालगायतले पुरस्कार प्रदान गरेका हुन् ।
मकवानपुर । मकवानपुर क्योकुशिन कराँते संघ बालकुमारीको आयोजनामा भएको कार्यक्रममा २१ जनाले रक्तदान गरेका छन् । शनिबार क्योकुशिन कराँते बालकुमारीले हेटौंडा–४, स्थित हुप्रचौरमा गरेकाे ५ औं खुला रक्तदान कार्यक्रममा १७ जना पुरुष र ४ जना महिलाले रक्तदान गरेका हुन् ।
संघले वार्षिक कार्यक्रम अनुसार हरेक वर्ष दशैंको अवसरमा रक्तदान कार्यक्रमको आयोजना गर्दै आएको जनाएकाे छ । दशैंको समयमा अत्याधिक मात्रामा सवारी दुर्घटना हुने भएकोले घाइतेहरुले रगतको अभावमा ज्यान गुमाउने गरेकाेले ५ वर्षदेखि रक्तदान कार्यक्रमको आयोजना गर्दै आएको संघका केन्द्रीय उपाध्यक्ष विष्णु श्रेष्ठले जानकारी दिए ।
रक्त सञ्चार केन्द्र हेटौंडाको प्राविधिक सहयोगमा भएको रक्तदान कार्यक्रम हेटौंडा उपमहानगरपालिका–१८, का वडाध्यक्ष अनिल बानियाँको प्रमुख अतिथ्यता तथा कराँते संघका अध्यक्ष बुद्धिनाथ न्यौपानेको सभाध्यक्षमा भएकाे थियाे ।
मकवानपुर । बागमती प्रदेश सरकारले बाढीपहिरोले क्षति पुर्याएको ४५ वटा स्थानीय तहलाई ५ करोड ८० लाख रुपैयाँ सहायता प्रदान गर्ने भएको छ ।
शनिबार हेटौंडामा बसेको प्रदेश मन्त्रिपरिषद् बैठकले प्रदेशका ७ वटा स्थानीय तहलाई २० लाख, १२ वटा स्थानीय तहलाई १५ लाख र २६ वटा स्थानीय तहलाई १० लाखका दरले रकम दिने निर्णय गरेकाे हाे ।
असोज १० गतेदेखि १२ गतेसम्म परेकाे वर्षाका कारण बाढीपहिरोबाट धेरै क्षति पुगेको मकवानपुरको इन्द्रसरोबर गाउँपालिका काभ्रेपलाञ्चोकको रोशी, बेथानचोक र तेमाल गाउँपालिका तथा पनौती नगरपालिका, सिन्धुलीको सुनकोशी गाउँपालिका, ललितपुरको महांकाल गाउँपालिकालाई बढी जोखिमयुक्त क्षेत्र भएकाले २० लाखका दरले १ करोड ४० लाख रकम निकासा गरिने सरकारका प्रवक्ता आन्तरिक मामिला तथा कानूनमन्त्री सुरजचन्द्र लामिछानेले जानकारी दिए ।
यसैगरी मकवानपुरको बागमती गाउँपालिका, काठमाडौंको चन्द्रागिरी र नागार्जुन नगरपालिका, ललितपुरको गोदावरी नगरपालिका, कोन्ज्योसोम गाउँपालिका, बागमती गाउँपालिका, सिन्धुपाल्चोकको जुगल र लिसंखुपाखर गाउँपालिका, भक्तपुरको सूर्यविनायक नगरपालिका, रामेछापको खाँडादेवी गाउँपालिका, दोलखाको बिगु र धादिङको गजुरी गाउँपालिकामा १५ लाखका दरले १ करोड ८० लाख रुपैयाँ रकम निकासा गर्ने निर्णय भएको मन्त्री लामिछानेले बताए ।
यस्तै दोलखाको शैलुङ, गौरीशंकर र तामाकोशी गाउँपालिका, धादिङको बेनिघाट रोराङ, नेत्रावती डब्जोङ गाउँपालिका र धुनिवेशी नगरपालिका, रामेछापको मन्थली र रामेछाप नगरपालिकासहित गोकुलगंगा, दोरम्बाशैलुङ, सुनापति, लिखुतामाकोशी र उमाकुण्ड गाउँपालिकामा १० लाखका दरले रकम निकासा हुने भएको छ ।
यस्तै, मकवानपुरको बकैया गाउँपालिका, सिन्धुलीको गोलन्जोर र फिक्कल गाउँपालिका सिन्धुपाल्चोकको मेलम्ची नगरपालिका, भोटेकोशी, पाँचपोखरी थाङपाल र हेलम्बु गाउँपालिका, काभ्रेको नमोबद्ध र मण्डनदेउपुर नगरपालिका तथा चौरीदेउराली, महाभारत गाउँपालिका र चितवनको माडी नगरपालिका र इच्छाकामना गाउँपालिकालाई १०–१० लाख गरी २ करोड ६० लाख रुपैयाँ निकासा दिने निर्णय भएको कानूनमन्त्री लामिछानेले जानकारी दिए ।
उक्त रकम प्रदेश विपद् व्यवस्थापन कोषबाट सम्बन्धित स्थानीय तहको विपद व्यवस्थापन कोषमा पठाइने भएकाे छ । प्रदेश विपद् व्यवस्थापन कोषमा रकम न्यून रहेको भन्दै मन्त्रिपरिषद्ले आर्थिक मामिला तथा योजना मन्त्रालयबाट १० करोड ५० लाख रुपैयाँ निकासा गर्ने निर्णय समेत गरेकाे मन्त्री लामिछानेले बताए ।
यसैगरी प्रदेश सरकारले चणिकलाल तामाङलाई १ लाख ५० हजार रुपैयाँसहित सम्मान गर्ने भएको छ । प्रदेश मन्त्रिपरिषद् शनिबारकाे बैठकले तामाङलाई नगदसहित सम्मान गर्ने निर्णय गरेको हो ।
गत असोज १२ मा नख्खु खोलामा आएको बाढीमा पसेका २ जनाको जीवन रक्षा गरेको भन्दै उनलाई प्रदेश सरकारले सम्मान गर्ने निर्णय गरेको हो ।
मुख्यमन्त्री तथा मन्त्रीहरूकाे १५ दिनको तलब विपद् कोषमा
बागमती प्रदेशका मुख्यमन्त्री तथा मन्त्रीहरूले १५ दिनको तलब विपद् कोषमा जम्मा गर्ने भएका छन् । शनिवार प्रदेश राजधानी हेटौँडामा मन्त्रीहरूको छलफलले विपद् प्रभावित नागरिकहरूका लागि १५ दिनको तलब प्रदेश विपद् कोषमा जम्मा गर्ने निर्णय गरेको हो ।
उक्त रकम प्रदेशका विपद् प्रभावित नागरिकको उद्धार राहत तथा पुनः स्थापनाको लागि खर्च गरिने छ । प्रदेश सरकारका प्रवक्ता सुरजचन्द्र लामिछानेका अनुसार प्रदेश विपद् कोषमा १३ जना मन्त्रीको १५ दिनको तलब बापत ४ लाख २७ हजार ४४५ रुपैयाँ जम्मा हुनेछ ।
मन्त्रीहरूले मासिक प्राप्त गर्दै आएको ६० हजार २२० रुपैयाँको आधा रकम ३० हजार १६० रुपैयाँ र मुख्यमन्त्रीलाई मासिक प्राप्त हुने ७० हजार ७३० रुपैयाँको आधा रकम ३५ हजार ३६५ रुपैयाँ प्रदेश विपद् काेषमा जम्मा हुनेछ ।
प्रदेशमा विपदबाट क्षतिको यकिन विवरण तयार गर्न प्रदेश नीति तथा योजना आयोगलाई निर्देशन दिइएकाे छ । आयोगले विषयगत मन्त्रालय र क्षेत्रका आधारमा क्षति विवरण सङ्कलन गरी प्रतिवेदन बुझाउने छ ।